Wan opobaka sa de foe den regtfardikiwan
„Tapoe Gado mi poti mi howpoe . . . taki wan opobaka sa de foe den regtfardikiwan nanga den onregtfardikiwan.” — TORI FOE DEN APOSTEL 24:15.
1. Sortoe situwâsi ibri libisma miti sensi Adam nanga Eva fadon ini sondoe?
„ALA san joe anoe feni foe doe, doe dati nanga joe krakti, bikasi no wan wroko, noso prakseri, noso sabi, noso koni de ini Sjeol, a presi pe joe e go” (Preikiman 9:10). Nanga den pikinso wortoe disi di a froekisi na wan boen fasi, a koni kownoe Salomo e skrifi foe wan situwâsi di ibri geslakti foe a libisma famiri miti sensi a fadon di wi fosi papa nanga mama, Adam nanga Eva, fadon ini sondoe. Sondro misi, dede swari te foe kaba ibri wan sma — goedoewan nanga pôtiwan, kownoe nanga gewoon sma, getrow sma nanga sma di no de getrow. Foe troe, dede „tiri leki kownoe”. — Romesma 5:17.
2. Foe san ede meki wan toe getrowsma lasi-ati, na a ten disi foe a kaba?
2 Ala di wi abi den lasti go na fesi foe sabidensi tapoe a kontren foe datrawroko, tokoe dede e tiri leki kownoe, srefi ini a ten disi. Ala di disi no de wan froewondroe sani, tokoe son sma kan lasi-ati pikinso te, te foe kaba, den ben miti nanga a feanti disi di wi abi langa ten kaba. Foe san ede? We, na ini den jari 1920 te go miti 1930 di pasa kaba, a Waktitoren Genootschap ben meki a boskopoe bèkenti taki „miljoenmiljoen sma di e libi now no sa dede noiti”. Soema ben sa de den miljoenmiljoen sma disi? Den na den „skapoe” di Jesus ben taki foe den, di a ben taki foe den skapoe nanga den bokoboko (Mateus 25:31-46). Den ben taki na fesi foe den wan disi di wi kan teki gersi nanga skapoe, taki den sa de foe si na a ten foe a kaba, èn a howpoe foe den ben sa de foe libi foe têgo na wan paradijs grontapoe. Di ten ben pasa, a pipel foe Gado ben kisi wan moro betre froestan foe a presi di den „skapoe” disi abi ini den prakseri foe Jehovah. Den ben froestan taki, a difrenti ben moesoe de foe si na mindri den wan disi di e gi jesi nanga den trangajesi „bokoboko”, èn baka te den bokoboko disi ben sa kisi pori, den skapoe ben sa kisi a grontapoe kontren foe a Kownoekondre di ben sreka gi den.
A tjari kon na wán foe den wan di wi kan teki gersi nanga skapoe
3. Na tapoe sortoe wroko a pipel foe Gado poti prakseri sensi 1935?
3 Sensi 1935, ’a getrow srafoe’ poti prakseri foe feni den wan disi di wi kan teki gersi nanga skapoe èn foe tjari den go na ini Jehovah en organisâsi (Mateus 24:45; Johanes 10:16). Den kresten disi di wani teki leri, kon froestan taki Jesus e tiri now ini Jehovah en hemel Kownoekondre èn taki a ten e kon esi-esi moro krosibei gi a kaba foe na ogri seti foe sani disi èn foe tjari wan njoen grontapoe pe regtfardikifasi sa tan (2 Petrus 3:13; Openbaring 12:10). Ini a njoen grontapoe dati, den wortoe foe Jesaja di e gi deki-ati sa kon troe: „Foe troe, a sa swari dede foe têgo.” — Jesaja 25:8.
4. San pasa nanga foeroe foe den tra skapoe, ala di den ben howpoe tranga foe si a regtfardiki foe a soevereinfasi foe Jehovah na Armagedon?
4 Foe di a kaba foe a grontapoe foe Satan de so krosibei, meki kresten di wi kan teki gersi nanga skapoe, wani srefisrefi foe de na libi te leki a soevereinfasi foe Jehovah kon regtfardiki na a ten foe a banawtoe di sa kon na tapoe Babilon a Bigiwan nanga na tapoe a tra pisi foe a grontapoe foe Satan (Openbaring 19:1-3, 19-21). Gi foeroe sma a no ben waka so. Foeroe foe den wan di ben howpoe foe de na mindri den „miljoenmiljoen sma” di noiti no ben sa dede, ben dede troetroe. Son wan ben pina hebi èn ben dede foe a waarheid ede, na ini doengroe-oso nanga konsentrâsi kampoe noso na anoe foe den fanatieksma foe relisi. Trawan dede foe di den kisi mankeri, noso foe di den kon siki noso kon owroe (Psalm 90:9, 10; Preikiman 9:11). A de krin, taki moro sma sa dede bifosi a kaba kon. Fa den sma dati sa si a kontroe foe a pramisi foe a njoen grontapoe pe regtfardikifasi sa de?
A howpoe foe na opobaka
5, 6. Sortoe tamara de gi den wan di abi wan howpoe foe libi na grontapoe, ma di dede bifo Armagedon?
5 Na apostel Paulus ben gi a piki di a ben tanapoe na fesi foe Feliks, a granman di ben de wan Romesma. So leki ben skrifi na Tori foe den Apostel 24:15, dan na wan krin fasi sondro foe frede Paulus ben froeklari: „Tapoe Gado mi poti mi howpoe . . . taki wan opobaka sa de foe den regtfardikiwan nanga den onregtfardikiwan.” A howpoe foe na opobaka e gi wi deki-ati te wi e miti den moro ogri rampoe. Foe a howpoe dati ede, den lobi brada nanga sisa foe wi di kon siki èn di e firi taki den e go dede, no e lasi ati krinkrin. Awinsi san sa pasa toe, den sabi taki den sa koti a pai foe a getrowfasi foe den. Foe na opobaka howpoe ede, meki wi brada nanga sisa di abi deki-ati èn di e miti dede na anoe foe den sma di e froefolgoe den, sabi taki a no kan srefisrefi taki den sma di e froefolgoe den sa tron winiman (Mateus 10:28). Te wan sma ini a gemeente dede, wi e sari foe lasi a sma dati. Na a srefi ten, efoe a brada noso a sisa na wan foe den tra skapoe, dan wi e prisiri taki wi kompe bribiman boeweisi foe de getrow te na a kaba èn e rostoe now èn a de seiker foe wan tamara ini a njoen grontapoe foe Gado. — 1 Tesalonikasma 4:13.
6 Ija, a howpoe foe na opobaka de wan prenspari pisi foe a bribi foe wi. Ma foe san ede a bribi foe wi ini na opobaka de so tranga, èn soema abi a srefi howpoe dati?
7. San na a opobaka, èn san na wan toe tekst di e taki foe a seikerhèit foe en?
7 A Griki wortoe gi „opo baka” na a·naʹsta·sis, èn a wani taki troetroe „opo tanapoe”. A e sori moro foeroe go na wan opobaka foe dede. A de warti foe si taki a wortoe „opobaka” srefi no de ini den Hebrew boekoe foe bijbel, ma den e taki krinkrin foe na opobaka howpoe drape. Foe eksempre, wi e si en ini den wortoe di Job ben taki di a ben pina: „O, taki joe ben sa kibri mi na ini Sjeol, . . . taki joe ben sa poti wan pisi ten gi mi èn ben sa prakseri mi!” (Job 14:13) Na a srefi fasi, wi e leisi na Hosea 13:14: „Foe na anoe foe Sjeol mi sa fri den; foe dede mi sa poeroe den baka. O Dede, pe den maka foe joe de? Pe a krakti foe joe de, di e tjari pori kon, O Sjeol?” Na 1 Korentesma 15:55, na apostel Paulus ben kari den wortoe disi baka èn a ben sori dati a taki di den ben taki na wan profeitifasi foe a wini di den sa wini dede, sa kon troe na a ten foe na opobaka. (A no de foe taki dati Paulus ben taki ini a tekst dati foe na opobaka foe libi na hemel.)
„Froeklari regtfardiki” foe den wan di e bribi
8, 9. (a) Fa onvolmaakti libisma kan abi wan prati ini na opobaka foe den regtfardikiwan? (b) San na a gron foe a howpoe foe wi, ini wan libi di dede no man tapoe?
8 Ini den wortoe di Paulus ben taigi Feliks, di skrifi na paragraaf 5, a ben taki dati wan opobaka ben sa de gi den regtfardikiwan nanga den onregtfardikiwan. Soema na den regtfardikiwan di sa opo baka? We, no wan libisma abi regtfardikifasi leki en eigifasi. Wi alamala na sondoe sma foe sensi wi gebore, èn wi e sondoe na ini wi heri libi — èn dati e meki taki wi e froedini foe dede tapoe gron foe toe sani (Romesma 5:12; 6:23). Ma ini bijbel wi e feni den wortoe „froeklari regtfardiki” (Romesma 3:28). Disi e sori go na libisma di Jehovah e gi pardon foe den sondoe foe den, ala di den de onvolmaakti.
9 Den wortoe gebroiki na wan moro prensparifasi nanga salfoe kresten na prakseri, di abi wan howpoe foe libi na hemel. Na Romesma 5:1, na apostel Paulus e taki: „Now di den froeklari wi regtfardiki leki wan bakapisi foe bribi, meki wi njanboen foe vrede nanga Gado nanga jepi foe wi Masra Jesus Krestes.” Ala salfoe kresten froeklari regtfardiki foe a bribi foe den ede. Bribi na ini san? So leki Paulus e froeklari finifini ini a boekoe foe Romesma, a de bribi ini Jesus Krestes (Romesma 10:4, 9, 10). Jesus ben dede leki wan volmaakti man èn baka dati a ben kisi wan opobaka foe dede èn ben opo go na hemel foe òfer a waarde foe en libisma libi foe a boen foe wi (Hebrewsma 7:26, 27; 9:11, 12). Di Jehovah ben teki na ofrandi dati, dan foe taki en leti, Jesus ben bai a libisma famiri foe a katibo foe sondoe nanga dede. Den wan di e sori bribi ini a sani disi di seti, e njanboen troetroe foe en (1 Korentesma 15:45). Na tapoe a gron foe a sani disi, getrow mansma nanga oemasma abi a howpoe foe kisi wan libi di a takroe feanti, dede, no sa tapoe. — Johanes 3:16.
10, 11. (a) Sortoe opobaka e wakti den getrow salfoe kresten? (b) Na tapoe sortoe opobaka den anbegiman ben howpoe di ben libi bifo a ten foe den kresten?
10 Tangi foe a froeloesoe ofrandi foe Jesus, meki den getrow salfoewan di den froeklari regtfardiki abi a seiker howpoe foe kisi wan opobaka leki jeje mekisani di no man dede, so leki Jesus (Openbaring 2:10). Den e skrifi foe na opobaka foe den na Openbaring 20:6, di e taki: „Kolokoe èn santa ibri sma de di abi wan prati na a fosi opobaka; na den disi tapoe a di foe toe dede no abi makti, ma den sa de priester foe Gado èn foe a Krestes, èn den sa tiri leki kownoe nanga en, doesoen jari langa.” Disi na a opobaka foe libi na hemel. Ma loekoe, taki bijbel e kari en „a fosi opobaka”, èn dati e sori taki moro de foe kon.
11 Na Hebrewsma kapitel 11, Paulus ben sori go na wan lo foetoeboi foe Gado di ben libi bifo a ten foe den kresten, di ben sori taki den abi wan tranga bribi ini Jehovah Gado. Den wan disi ben abi bribi toe ini na opobaka. Na vers 35 foe a kapitel dati, Paulus e taki foe den wondroe opobaka di ben feni presi na ini a historia foe Israèl, di a e taki: „Oemasma ben kisi den dedewan foe den nanga jepi foe na opobaka; ma tra man den ben pina na skin fasi foe di den no ben wani teki froeloesoe foe wán noso tra froeloesoe paiman, so taki den ben kan kisi wan moro betre opobaka.” Den getrow kotoigi dati foe owroeten, ben kan loekoe go na fesi na wan opobaka di ben moro boen leki den wan di, foe eksempre, Elia nanga Elisa ben doe (1 Kownoe 17:17-22; 2 Kownoe 4:32-37; 13:20, 21). Den ben howpoe foe kisi wan opobaka na ini wan grontapoe pe den foetoeboi foe Gado no ben sa kisi pina na skin fasi foe a bribi foe den ede, wan grontapoe pe oemasma no ben sa lasi den lobiwan foe den na ini dede. Ija, den ben loekoe go na fesi foe opo komoto na dede na ini a srefi njoen grontapoe di wi e howpoe foe kisi (Jesaja 65:17-25). Jehovah no ben tjari sani foe a njoen grontapoe disi kon na krin gi den, so leki fa a ben doe dati gi wi. Ma den ben sabi taki a njoen grontapoe ben e kon, èn den ben wani foe libi na ini a njoen grontapoe.
Na opobaka foe libi na grontapoe
12. Jehovah ben froeklari den getrow sma di ben libi bifo a ten foe den kresten, regtfardiki? Tjari dati kon na krin.
12 Wi moesoe si a wiki di den getrow mansma nanga oemasma di ben libi bifo a ten foe den kresten, sa wiki ini a njoen grontapoe, leki wan pisi foe na opobaka foe den regtfardikiwan? Leki fa a sori, dan a piki na Ija, bikasi bijbel e taki foe den leki regtfardikisma. Foe eksempre, a disipel Jakobus e taki foe wan man nanga wan oema foe owroeten di den ben froeklari regtfardiki. A man ben de Abraham, na afo foe a Hebrew ras. Foe en wi e leisi: „’Abraham ben poti bribi ini Jehovah, èn dati Gado ben teri gi en leki regtfardiki’, èn den ben kari en ’a mati foe Jehovah.’” Na oema ben de Rakab, wan oema di no ben de wan Israèlsma èn di ben sori bribi ini Jehovah. Den ben „froeklari en regtfardiki” èn a ben kon tron wan pisi foe a Hebrew nâsi (Jakobus 2:23). Foe dati ede, mansma nanga oemasma foe owroeten di ben sori tranga bribi ini Jehovah èn ini den pramisi foe en èn di ben tan getrow te na dede, Jehovah ben froeklari den regtfardiki tapoe gron foe a bribi foe den, èn seiker den sa kisi na ’opobaka foe den regtfardikiwan’.
13, 14. (a) Fa wi doe sabi taki kresten di abi wan howpoe foe libi na grontapoe kan froeklari regtfardiki? (b) San dati wani taki gi den?
13 Ma fa a de nanga ibriwan sma di wi kan teki gersi nanga skapoe ini a ten disi, den wan di abi wan howpoe foe libi na grontapoe èn di gi densrefi abra na Jehovah èn di dede na wan getrowfasi ini a ten disi foe a kaba? Den sa de ini na opobaka foe den regtfardikiwan? So leki fa a sori, Ija. Na apostel Johanes ben si wan bigi ipi foe den sortoe getrowsma disi ini wan fisjoen. Loekoe fa a e taki foe den: „Mi ben si, èn, loekoe! wan bigi ipi di sma no ben man teri, foe ala nâsi nanga lo nanga pipel nanga tongo e tanapoe na fesi a kownoestoeroe èn na fesi a Pikin Skapoe èn den ben weri weti krosi; èn palmtaki ben de ini den anoe. Èn den e tan bari nanga wan tranga sten taki: ’Froeloesoe wi e kisi foe wi Gado, di e sidon na a kownoestoeroe tapoe, èn foe a Pikin Skapoe.’” — Openbaring 7:9, 10.
14 Loekoe taki den safri-atiwan disi abi a tranga overtoigi taki den sa kisi froeloesoe, èn den e gi tangi foe dati na Jehovah èn na Jesus, „a Pikin Skapoe”. Boiti dati, den e tanapoe na fesi Jehovah èn na fesi a Pikin Skapoe, ala di den weri weti krosi. Foe san ede na ini weti krosi? Wan hemel mekisani e taigi Johanes: „Den wasi den krosi èn den meki den weti ini a broedoe foe a Pikin Skapoe” (Openbaring 7:14). Ini bijbel, weti na wan simbôl foe krinfasi, regtfardikifasi (Psalm 51:7; Danièl 12:10; Openbaring 19:8). Foe di a de so, taki den e si a bigi ipi weri weti krosi, dan dati wani taki dati Jehovah e si den leki regtfardikisma. Fa dati kan? Bikasi na wan agersifasi den wasi den langa krosi foe den ini a broedoe foe a Pikin Skapoe. Den e froeklari den regtfardiki leki mati foe Gado nanga a marki foe pasa a bigi banawtoe, bika den e sori bribi ini Jesus Krestes en broedoe di lon. Foe dati ede, ibri getrow kresten di gi ensrefi abra na Gado èn di de wan pisi foe a „bigi ipi” ini a ten disi èn di dede bifo a bigi banawtoe, kan de seiker taki a sa kisi na opobaka foe den regtfardikiwan foe libi na grontapoe.
15. Foe di den regtfardikiwan nanga den onregtfardikiwan sa kisi wan opobaka, san na a wini gi na opobaka foe den regtfardikiwan dan?
15 Den e taki foe na opobaka dati na Openbaring kapitel 20, vers 13, nanga den wortoe disi: „A se ben gi den dedewan abra di ben de na ini, èn dede nanga Hades ben gi den dedewan abra di ben de na ini, èn den ben kroetoe ibriwan foe den persoonlijk, akroederi den sani di den ben doe.” So boen, na ini a bigi doesoen-jari Kroetoedei foe Jehovah, ala den sma di de na ini a memre foe Gado sa kisi wan opobaka — den regtfardikiwan nanga den onregtfardikiwan (Tori foe den Apostel 17:31). Ma o moro boen a sa de gi den regtfardikiwan! Den ben libi wan libi ini bribi kaba. Den abi wan krosibei matifasi nanga Jehovah kaba èn den abi froetrow ini a kontroe foe den prakseri foe en. Den regtfardiki kotoigi foe bifo a kresten jarihondro sa wiki na dede èn den sa angri foe kon sabi fa den pramisi foe Jehovah ini a tori foe a Siri ben kon troe (1 Petrus 1:10-12). Den wan foe den tra skapoe di Jehovah e si leki regtfardikisma ini den dei foe wi, sa komoto na a grebi èn den sa abi na angri foe si a paradijs di den ben taki foe en di den ben meki a boen njoensoe bekènti ini a seti foe sani disi. Fa dati sa de wan prisiri ten!
16. San wi kan taki foe na opobaka na a Kroetoedei, gi den wan di dede ini a ten foe wi?
16 Foe taki soifri, o ten na ini a doesoen-jari Kroetoedei dati, den sma di dede getrow ini den lasti jari disi foe a seti foe sani foe Satan sa kisi wan opobaka? Bijbel no e taki o ten dati sa de. Ma a no ben sa de wan logis sani foe prakseri taki den wan di den ben teri leki regtfardiki èn di dede ini a ten foe wi, ben sa abi wan froekoe opobaka? Èn a ben sa de wan logis sani foe prakseri foe dati ede, taki den ben kan abi wan prati nanga a bigi ipi foe sma di pasa Armagedon libilibi, na a wroko foe gi den wan foe den fositen geslakti di sa kisi wan opobaka, wan switi kon? Ija, foe troe!
Wan howpoe di e gi trowstoe
17, 18. (a) Sortoe trowstoe a howpoe foe na opobaka e gi? (b) Na ati foe wi e boeweigi wi foe meki sortoe sani foe Jehovah bekènti?
17 A howpoe foe na opobaka e gi tranga nanga trowstoe na ala kresten ini a ten disi. Efoe wi e tan getrow, dan no wan onfroewakti situwâsi èn no wan feanti kan foefoeroe a pai di wi sa kisi! Foe eksempre, ini a Jaarboek van Jehovah’s Getuigen 1992, tapoe bladzijde 177, fowtow de foe si foe deki-ati kresten na Etiopia, di ben dede na presi foe skeki nanga a bribi foe den. Na ondro den fowtow wi e leisi: „Den fesi foe sma di wi e froewakti foe si baka ini na opobaka.” Fa a sa de wan grani foe kon sabi den sortoe sma disi èn foeroe trawan di wi no kan teri, di sori a srefi sortoe getrowfasi disi ala di den ben tanapoe na fesi foe dede!
18 Fa a de nanga wi eigi lobiwan nanga brada nanga sisa di, foe di den ben owroe noso ben malengri, no ben kan libi pasa a bigi banawtoe? Akroederi a howpoe foe na opobaka, den abi wan toemoesi moi tamara efoe den e tan getrow. Èn efoe wisrefi e sori bribi na wan deki-atifasi ini a froeloesoe ofrandi foe Jesus, dan wi abi wan toemoesi moi tamara toe. Foe san ede? Bikasi neleki Paulus, wi e howpoe ini na „opobaka foe den regtfardikiwan nanga den onregtfardikiwan”. Nanga wi heri ati wi e taigi Jehovah tangi gi a howpoe disi. Foe troe, a e boeweigi wi foe bari den wortoe foe a psalm singiman moro fara: „Meki a glori [foe Gado] bekènti na mindri den nâsi, den toemoesi moi wroko foe en na mindri ala pipel. Bika Jehovah bigi èn a warti srefisrefi foe sma prèise en.” — Psalm 96:3, 4.
Joe kan froeklari disi?
◻ Sortoe tekst e jepi wi foe hori baka gi a howpoe foe wi ini wan opobaka foe libi na grontapoe?
◻ Tapoe gron foe sortoe sani, kresten ini a ten disi froeklari regtfardiki?
◻ Fa a howpoe foe na opobaka e gi wi deki-ati èn wan fasti overtoigi?
[Prenki na tapoe bladzijde 19]
Neleki Paulus, salfoe kresten e howpoe tapoe na opobaka foe libi na hemel