’Tan na ai èn hori joe prakseri na wan’
„No meki wi go doro foe sribi soleki den trawan, ma meki wi tan na ai èn hori wi prakseri na wan.” — 1 Thess. 5:6.
1. Na kontroe foe sortoe bijbelprofétitori wi kan froewakti djonsro?
DI Jezus ben taki na pori foe Jeruzalem ini en geslacht na fesi, a ben ferklari: „Disi de dé pe den e hori densrefi na geregtigheid, sodati ala sani di ben skrifi, kan kon troe” (Luk. 21:22). Ini 70 G.T. Gado ben tjari en regtvaardiki kroetoe kon tapoe den sma di ben doti en nen, di ben pasa en wèt, èn di ben ferfolgoe en dienstknekti. Na a srefi fasi Gado regtvaardiki kroetoe sa tjari djonsro kon tapoe na disi ten ogri seti foe sani, sodati agen na bewijsi sa gi dati ala sani di skrifi ini den bijbel profétitori, séker sa kon troe. Èn na kroetoe dati sa kon nanga skreki wantronso, bikasi na bijbel e taki: „Te den e taki: ’Vréde nanga sékerfasi!’ dan wan wantron-wantron pori sa kon tapoe den ini wan momenti.’” — 1 Thess. 5:2, 3.
2. Sortoe rai di wi kan gebroiki ini a krosbé ten di e kon a Wortoe foe Gado e gi wi?
2 Na mindri now nanga na ten di Gado kroetoe sa kon na wan kaba, a de wan tranga fanowdoe sani gi den dienstknekti foe Jehovah foe de na ai srefsrefi èn hori tranga na a gi di den gi densrefi abra na Gado. Na apostel Paulus, di ben skrifi na profétitori ini 1 Thessalonika 5:2, 3, ben taki toe: „No meki wi go doro foe sribi soleki den trawan, ma meki wi tan na ai èn hori wi prakseri na wan” (1 Thess. 5:6). Jezus ben gi na rai: „Tan dan na ai, begi alaten, dati joe sa man foe lon komoto foe ala den sani disi, di o go pasa séker” (Luk. 21:26). Na apostel Petrus ben skrifi na a srefi fasi: „Foedi ala den sani disi sa smelti, dan o sortoe soema joe moe de dan ini santa libifasi nanga doe foe Gado libi.” — 2 Petr. 3:11
KON NOW INI WAN JOISTI MATIFASI NANGA JEHOVAH
3. San wan sma moe doe foe go ini Gado njoen orde leki wan sma di tan na libi?
3 Ibriwan sma di wani go ini Gado regtvaardiki njoen orde leki wan sma di tan na libi foe na bigi „benawtoe”, moe sorgoe now tranga foe kon ini wan joisti matifasi nanga Jehovah nanga en grontapoe organisaatsi. „A nen foe Jehovah de wan tranga toren. Na regtvaardiki sma e lon go na ini èn a de kisi kibri” (Odo 18:10). „A moe psa na den laatste dé dati na bergi foe na oso foe Jehovah sa poti stéfi tapoesé na ede foe den bergi, èn seker a sa poti hé tapoesé foe den pikin bergi; èn na drape naatsi moe lon go” (Jes. 2:2). Ja, den sma foe den naatsi di wani libi ini Gado paradijs njoen orde, moe lon go now na Jehovah bergi, na en troe anbegi, di ben poti stéfi èn hé tapoesé foe ala tra vorm foe anbegi.
4. Fa Jezus sori dati a kan abi wan ogri bakapisi foe wakti toemsi langa, bifosi wan sma kon na Jehovah Gado?
4 Foe san-ede a de so tranga fanowdoe foe tron now wan troe anbegiman foe Jehovah? Wan opregti sma no ben sa kan wakti te leki a de si troetroe dati Jehovah e bigin nanga na tjari kon foe en kroetoe, foe teki dan esesi na sé foe En? Dati ben kan de wan moi sani gi son sma, ma nofo ten ben sa de dan foe bow wan boen matifasi nanga Jehovah? Na kotoigi foe den Santa Boekoe e taki nono. Jezus ben warskow: „Poti prakseri na joesrefi, dati joe ati noiti kon hebi nanga toemsi njan nanga toemsi dringi nanga sorgoe foe na libi èn na dé dati kon wantronso, ini wan momenti na joe tapoe leki wan trapoe. Bikasi a sa kon tapoe ala sma di e libi tapoe na heri grontapoe pe libisma e libi” (Luk. 21:34, 35). Poti prakseri a tapoe, dati den sma di no de na ai na jeje fasi, a dé dati e fadon kon na den tapoe onfroewakti, foedi a de kon a den tapoe „wantronso”, ini „wan momenti”, precies soleki na „wantron-wantron pori” e kon tapoe den sma di e taki „Vréde nanga sékerfasi!”
5. Foe sortoe bijbel eksempre e kon na krin dati sma moe kisi sabi foe Jehovah, bifosi na pori e bigin?
5 Jezus ben agersi den sortoe sma dati nanga wan meti, di sondro foe sabi e waka go ini wan trapoe. A ben agersi ooktoe sma di na jeje fasi no sabi na gevaar nanga sma ini Noach dé di „no ben poti prakseri, te leki na froedoe ben kon èn ben figi den alamala poeroe”. Den sma dati ben abi ten ete foe leri sabi Jehovah èn kon ondro en kibri baka di na Froedoe ben bigin? Nono, bikasi Jezus e taki krin, dati di na Froedoe ben kon, disi „ben figi den alamala poeroe”. Den no ben de makandra kaba nanga Noach nanga en osofamiri ini na ark foe kibri. Èn di Gado ben tjari en kroetoe kon tapoe Sodom nanga Gomorra, sma ben de sontron di ben komoto baka di wan faja pori ben bigin fadon kon foe hemel? Nono, bikasi den alamala ben kisi pori, boiti Lot nanga en oemapikin, di ben gwe libi na kontren kaba. Srefi na oema foe Lot, di na a bigin ben hari gwe ma di ben drai-drai, no ben komoto foe na pori. Jezus ben taki foe datede nanga reti: „Prakseri na oema foe Lot.” — Matt. 24:37-39; Luk. 17:32.
6. Sortoe prakseri no de joisti leki fa a heri kotoigi foe a bijbel e sori?
6 Ma baka te „Babylon na Bigiwan”, na grontapoe makti foe falsi bribi, komoto na pasi, wan pisi ten ben sa de ete pe sma abi na okasi foe de na ai na jeje fasi èn foe soekoe Jehovah? Na heri kotoigi foe na bijbel e taki kontra disi. Boiti den eksempre di wi loekoe dja na fesi, joe abi ooktoe na eksempre foe na fosi eeuw djoe naatsi. Den kerki djoe dati ben abi na prakseri dati den ben e anbegi Gado nofo èn dati den no ben abi fanowdoe foe arki na a préki foe Jezus nanga en bakaman. Ma Jezus ben warskow: „Te oen si legre-kampoe lontoe Jeruzalem, sabi dan dati a pori foe en ben kon krosibé. Meki den di de ini Judéa, lon go na den bergi, èn meki den di de ini na mindri foe Jeruzalem, hari komoto na ini” (Luk. 21:20-22). Ma di den Romein legre di ben lontoe Jeruzalem, ben hari gwe ini na jari 66 G.T., den djoe ini a froetrow ini densrefi no ben go abra foe „lon komoto”. Now di den djoe ben kenki na hari gwe foe den Romein legre ini wan broeja lon gwe, foedi den fadon go feti nanga na baka pisi foe a legre, dan den no ben feni en fanowdoe foe lon gwe. Den ben bribi dati Gado ben de nanga den èn den ben meki srefi njoen solfroe moni nanga na skrifi „Na Santa Jeruzalem”. Ma na profétitori foe Jezus foe santa jeje ben sori dati Jeruzalem no ben de moro langa santa ini na ai foe Jehovah.
7. San ben miti den djoe di ben doe kontra san Jezus ben gi leki rai?
7 Foedi falsi bribi ben kori den, meki dati den djoe no ben gwe libi Jeruzalem nanga Judéa di den ben abi na okasi. Ini na bakajari foe na jari 70 G.T. den ben doe precies kontra. Den ben hari go ini Jeruzalem foe na hori foe wan kerki fesa. Ma precies tapoe na joeroeten dati den Romein legre ondro na tiri foe generaal Titus ben drai kon baka, ben lontoe Jeruzalem, èn ben kisi ala den sma disi ini wan val leki wan meti ini wan trapoe. Baka wan sjatoe didon lontoe na foto, Jeruzalem ben kisi pori. Wan ai-kotoigi foe den sani dati di ben pasa, na historia-skrifiman Flavius Josephus ben skrifi: „Den djoe di den ben kisi tjari gwe ini na feti disi ben de ala nanga ala négi-tenti-na sébi doesoen aladi ini na heri pisi ten foe na lontoe (foe Jeruzalem) wan miljoen-wan-hondro doesoen sma (1.100.000) ben dede. Na moro bigi pisi foe den ben de gebore djoe, ma no foe Jeruzalem. Bikasi foe na heri kondre na pipel ben hari go na a mamafoto foe hori na fesa foe brede sondro swa, di onfroewakti na feti ben sroto den lontoe, . . . na so na noodlot ben sroto joisti na heri pipel ini a ten dati leki ini wan strafoe-oso èn féjanti legre ben sroto na foto lontoe.” — Den djoe feti, Boekoe VI, kap. IX, par. 3, 4, akroederi na bewerking foe Dr. Terwogt.
8. Sortoe bakapisi a ben abi gi kristen di ben arki na Jezus, kontra foe san ben psa nanga den sma di ben proberi foe lon komoto tapoe a laatste momenti?
8 Den kristen di ben de na ai èn di ben hori den prakseri na wan, ben hari komoto kaba foe Jeruzalem nanga heri Judéa. Den ben lon gwe na den presi foe veiligheid, di baka na jari 66 G.T. den ben man foe doe disi. Foedi den ben bribi den proféti wortoe foe Jezus èn den ben handri akroederi nanga dati, meki dati den ben tan na libi. Ma di na „bigi benawtoe” ben kon tapoe den djoe ini 70 G.T., a ben lati foe ben lon gwe. Difrenti doesoendoesoen foe den di ben proberi foe lon komoto foe a foto èn lon psa na Romein barricade, den sroedati ben graboe, èn den ben koti srefi son foe den djoe opo foe feni na gowtoe di foeroe foe den ben swari.
TAN NA LIBI FOE NA MORO HEBI „BIGI BENAWTOE”
9, 10. (a) O hebi na „bigi benawtoe” sa de? (b) Foe san-ede a gersi dati nowan pisi ten foe rostoe de baka na pori foe „Babylon na Bigiwan”?
9 Dati ben de troetroe wan hebi „benawtoe” di ben kon tapoe den djoe, precies soleki Jezus ben taki na fesi (Luk. 19:43, 44). Tokoe den wortoe foe Jezus ben sori, dati ini wi ten, ini Jehovah „dé foe refrensi”, wan moro bigi „benawtoe” ben sa kon. Di Jezus ben gi piki tapoe na aksi foe na marki foe en „de noja”, a ben ferklari: „Dan so wan bigi benawtoe sa de soleki sensi na bigin foe grontapoe te nanga now no ben kon, èn no kon moro toe” (Matt. 24:3, 21). Na „benawtoe” disi no sa kon wawan tapoe „Babylon na Bigiwan”, ma ooktoe tapoe na tra pisi foe Satan seti, na politiek, maatschappelek èn ekonomia pisi foe en.
10 Aladi na pori sa kon wantronso èn sa miti na falsi bribi fosi, a sa go doro sondro foe kan tapoe en te leki na kaba foe en doro (1 Thess. 5:3). Den bijbel profétitori e sori dati baka na trowe na gron foe „Babylon na Bigiwan” nowan pisi ten foe rostoe sa kon, bika ini disi e kon na krin dati den anti-Gadokrakti di e pori en, no sa sori boen-ati gi Jehovah kotoigi di gi den densrefi abra. Kontrari foe dati, den anti-Gadokrakti disi sa abi ogri-ati gi na pipel foe Gado èn drai ooktoe go feti nanga den. Na bijbel e sori dati na srefi „wilde meti nanga tin toetoe”, di e meki „Babylon na Bigiwan” kon légi, sa stré ooktoe nanga na „Lam”, Jezus Kristus, soleki den bakaman foe en e teki presi gi en na grontapoe (Openb. 13:1; 17:12-14, 16;19:19). Ini na . . . victoridroengoe foe den winiman disi tapoe falsi bribi, sondro degedege sa si Gado dienstknekti leki so wan bribi ete, di moe poeroe na pasi, sodati nowan skotoe tan abra foe na sori foe a tirimakti foe den tapoe na heri grontapoe. — Ezech. 38:14-16.
11. Fa na „bigi benawtoe” e doro en hé marki?
11 Ma na fadon kon feti disi nanga Gado dienstknekti de a srefi leki a go feti nanga Gado, bika a de taki: „Soema fasi joe, e fasi na popki foe mi ai” (Zach. 2:8; Ezech. 38:18, 19). Disi e meki Jehovah doe wan sani wantron-wantron. A fasi foe den e meki na atibron foe en kon, di a sa kanti trowe tapoe den sma di kon feti nanga en ini Armageddon (Openb. 16:14, 16). A de koemanderi en Kownoe-Manpikin, Kristus Jezus, èn en hemel legre foe go feti! Nanga wan krakti di e masi sani, Kristus nanga en hemel legre sa koti trowe den kownoe foe na grontapoe èn ala tra elementi di tan abra foe na ogri seti disi, ooktoe ibriwan sma di e hori baka gi en. Wan engel di e bari nanga wan tranga sten, e kari den fowroe di e fré na ini loktoe: „Kon dja, kon makandra na a Avondmaal foe Gado, foe njan den skinpisi foe kownoe èn den skinpisi foe sroedati edeman, èn den skinpisi foe tranga man èn den skinpisi foe asi èn foe den di e sdon a tapoe, èn den skinpisi foe ala sma, den friwan èn den srafoe, nanga den pikin èn den bigiwan” (Openb. 19:17, 18). Na so fasi na „bigi benawtoe” e doro en hé marki. Na regtvaardiki „dé foe refrensi” foe Gado tapoe na seti foe sani foe Satan e kon na wan kaba.
12. Oten opregti sma moe soekoe Jehovah?
12 Foe sensi a bigin foe na „wantron-wantron pori”, di e bigin nanga na pori foe „Babylon na Bigiwan”, di na fadon kon feti foe den naatsi tapoe Jehovah dienstknekti e waka na en baka èn di e go abra ini Gado feti foe Armageddon, dan wan stop no gersi de ini na „bigi benawtoe”. Soboen wan bijbel réde gersi de foe meki na bosroiti dati baka na pori foe falsi bribi nofo ten sa de foe drai go na Gado. Na presi foe dati, den sma di e howpoe foe tan a libi èn go ini Gado njoen orde, moe go now na Jehovah. „Soekoe Jehovah aladi a de foe feni. Kari en aladi a de krosbé” (Jes. 55:6). Now opregti sma moe meki wan libi foe bribi, dekati, lobi nanga dienst gro kon. Now den moe sreka densrefi foe kaka foetoe gi den foeroe vorm foe druk di sa kon tapoe Gado pipel ini a ten foe a „bigi benawtoe”.
13. Nanga soema Gado dienstknekti e teki gersi èn na sortoe fasi?
13 Gado Wortoe e agersi en getrow dienstknekti nanga boen-oefen sroedati di de nanga ai, di abi na fetisani foe den foe kibri den èn di de klari foe gi jesi na ibri komando di a tiriman foe den e gi den. Den no de leki troepoe di no oefen èn di ini wan ten foe gevaar èn tranga fanowdoe e sribi ini na sroedati-kampoe. Paulus e taki: „No meki wi go doro foe sribi soleki den trawan, ma meki wi tan na ai èn hori wi prakseri na wan. Bika den di e sribi e gwenti foe sribi na neti, èn den di droengoe, de droengoe moro foeroe na neti. Ma foe wi di de foe na dé, meki wi hori wi prakseri na wan, èn abi na borstwapoe foe bribi nanga lobi èn leki helm na howpoe foe ferloesoe, bika Gado no ben poti wi gi atibron, ma foe a kisi foe ferloesoe nanga jepi foe wi Masra Jezus Kristus.” — 1 Thess. 5:6-9.
14. San e sori dati Gado dienstknekti kisi séker boen bodoi, sodati den kan doe a wani foe Gado?
14 Boiti dati, den dienstknekti foe Gado abi na froetrow dati a sa gi en organisatsi boen bodoi, sodati den kan doe den joisti stap foe tan a libi. Wi kan de séker foe disi, fóedi na profétitori foe santa jeje ini Openbaring kapitel sébi e sori dati „wan bigi ipi, di nowan sma ben kan teri, foe ala naatsi èn lo èn folkoe èn tongo, e komoto foe na bigi benawtoe” èn e go ini Gado njoen orde, pe Gado „sa figi poeroe ala watra na den ai” (Openb. 7:9, 14, 17). Èn leki wan bakapisi foe san, meki na „bigi ipi” e tan na libi? Foedi den e „doe dé nanga neti santa dienst gi Gado”, leki wan bakapisi dati a de „bradi tapoe den en tenti foe kibri den” (Openb. 7:15). Foedi tapoe wan joisti fasi den kisi bodoi, . . . dan den sabi fa den moe dini Gado tapoe wan fasi di a de teki. Den no e wakti e loekoe san sa pasa. Den sabi dati wan sma di „e doe na wani foe Gado e tan foe tégo”. — 1 Joh. 2:17.
MORO WROKO?
15. Fa Jehovah Kotoigi ben gi jesi na a komando foe préki na ’boen njoensoe foe Gado kownoekondre tapoe a heri grontapoe’?
15 A wani foe Gado gi wi ten wani taki ooktoe na kontroe foe Jezus profétitori: „A boen njoensoe disi foe a kownoekondre sa préki tapoe na heri grontapoe pe libisma e libi leki wan kotoigi gi ala naatsi èn dan na kaba sa kon” (Matt. 24:14). Gi troe kristen den proféti wortoe disi de troetroe wan komando foe ferteri tra sma foe a boen njoensoe foe a kownoekondre foe Gado èn na njoen orde di e kon. Èn ini den „laatste dé” disi, Jehovah Kotoigi ben gi jesi séker na a komando disi. (2 Tim. 3:1; teki gersi Mattéus 28:19, 20). Sondro gridifasi den ben gebroiki ten nanga sani di den abi, foe leri trawan foe Gado wondroe prakseri nanga na grontapoe disi. Leki wan bakapisi foe ala na tranga wroko disi pikinmoro 6 miljoen sma na a heri grontapoe ben sori belangstelling gi Gado njoen orde èn en seti foe ferloesoe nanga jepi foe Jezus Kristus, soleki e kon na krin ini disi, dati den ben de a jari di psa april tapoe na Memrefesa foe memre na dede foe Kristus.
16, 17. (a) Sortoe komando ben gi na a naatsi Israël bifo Gado ben pori Jericho? (b) Fa den ben doe den komando dati?
16 Now di a organisaatsi foe Jehovah di e hari e go na fesi e doro den laatste jari foe en prékiwroko gi na grontapoe disi, dan degedege no de dati a wroko sa kon moro bigi. Joe kan memre ete san den Israëlsma ben kisi foe doe leti bifo Gado ben pori Jericho? Fosi den ben kisi na komando foe waka lontoe na foto siksi dé baka makandra wán tron wán dé. Ma dan den ben kisi na komando: „Na a di foe 7 dé oen moe waka 7 tron lontoe na foto èn den priester moe bro tapoe den toetoe. Èn a moe psa dati te den e bro na toetoe foe a manskapoe èn te oen jere na babari foe na toetoe, na heri pipel moe bari wan bigi strébabari; èn na skotoe foe na foto moe fadon na gron.” — Jozua 6:2-5.
17 Tapoe na di foe 7 èn laatste dé den Israëlsma ben moe doe 7 tron moro so foeroe! Baka dati den ben moe bari „wan bigi strébabari”. Den ben doe precies soleki den ben taigi den. „Now a ben psa tapoe na di foe 7 dé dati den opo froekoe, so esi di moesoedé ben opo, èn dan den ben waka na a srefi fasi 7 tron lontoe na foto . . . Now a ben psa na a di foe 7 tron, dati den priester ben bro tapoe den toetoe, èn Jozua ben taki gi a pipel: ’Bari, bikasi Jehovah ben gi oen na foto’. . . . Now a ben pasa dati so esi di na pipel ben jere na babari foe na toetoe èn na pipel ben bari wan bigi strébabari, dan na skotoe ben bigin foe fadon na gron.” — Jozua 6:15, 16, 20.
18. San wi e froewakti foe na kon bigi foe na prékiwroko èn na fasi fa disi sa doe bifo na seti doro en kaba?
18 Ini disi ten, now di wi doro na hé marki foe den ten, dan wi kan froewakti na a srefi fasi wan kon moro bigi foe wi prékiwroko. Bifo na „bigi benawtoe” kon na wan kaba, dan sondro degedege wi sa si nanga wi égi ai, dati na moro bigi kotoigi sa gi ini na heri historia foe na grontapoe disi tapoe a tori foe a nen foe Gado èn a kownoekondre. Èn aladi na kotoigiwroko abi now na ini en na kari foe kon na a organisaatsi foe Jehovah foe ferloesoe, dan na ten sa kon „dati na boskopoe sa kisi wan moro tranga babari, leki wan „tranga strébabari”. Openbaring 16:21 e sori dati „wan bigi hagra, di ibri ston foe en ben abi na hebi foe wan talenti (so wan wán hondro pontoe) . . . ben fadon foe hemel tapoe den sma, èn den sma ben kosi Gado foe na hagra ede, bikasi na plaag foe en ben bigi pasa marki”. Hagra tranga, foedi a de watra di tron ijs. Disi e agersi foe datede fa Jehovah kroetoe-boskopoe, di te foe kaba moe meki bekenti na a tranga jesi libisma-famiri, sa de leki wan finpéri foe tranga hagra. Dati den e taki dati a plaag foe den hagraston „ben bigi pasa marki”, e sori a tapoe dati Jehovah dienstknekti let bifo na seti disi doro en kaba sa doe wan tranga préki foe „Jehovah dé foe refensi”.
19. „Sortoe sma wi moe de” te wi e loekoe na ten di e kon krosbé?
19 Wi e doe boen foe datede foe taki leki Petrus: „Foedi ala den sani disi sa smelti na a fasi disi, dan sortoe sma oen moe de dan ini santa libifasi èn doe foe Gadolibi”! (2 Petr. 3:11). Séker wi moe „tan trowstoe èn bow makandra”. Wi moe feti „alaten na baka san de boen gi makandra” (1 Thess. 5:11, 15). Soboen foe datede, solanga na ten de boen gi wi ete, meki wi doe boen gi ala sma, ma moro foeroe gi den di abi na srefi bribi leki wi” (Gal. 6:10). Nanga disi ini prakseri, sorgoe dati joe „tan na ai èn hori joe prakseri na wan”. — 1 Thess. 5:6.
[Prenki na tapoe bladzijde 71]
Ala sma di wani tan na libi foe go ini Gado njoen seti, moe lon go now na a troe anbegi foe Jehovah
[Prenki na tapoe bladzijde 73]
Den kristen di ben gi jesi na Jezus, ben lon komoto biten foe Jeruzalem èn no ben ondrofeni na pori foe a foto ini 70 G.T.
[Prenki na tapoe bladzijde 75]
A Wortoe foe Gado e agersi en nanga ai dienstknekti nanga boen-oefen sroedati di weri wan fetisani foe kibri den èn di de klari foe gi jesi
[Prenki na tapoe bladzijde 77]
Di den Israëlsma ben „bari wan tranga strébabari”, dan den skotoe foe Jericho ben fadon