„Vréde nanga sékerfasi” — Dan wan „wantron-wantron pori”
„Te den taki: ’Vréde nanga sékerfasi!’ dan wan wantron-wantron pori sa kon ini wán momenti tapoe den.” — 1 Tess. 5:3.
1. San foeroe sma di e loekoe fa a de go nanga den toestand na grontapoe e taki now?
FOEROE sma di e loekoe fa a de go nanga libisma afersi e agri nanga makandra, dati den toestand foe a grontapoe kon moro takroe ini den jari di psa. Ini Canada na fesi-man foe na Club foe Rome, Aurelio Peccei, ben verklari, tapoe wan grontapoe-conferentie foe a Ten di e kon: „Na grontapoe de now ini wan moro takroe situwasi leki 10 jari psa kaba — èn a de go moro nanga moro na baka. Ini a ten disi na grontapoe, di e waka foe a wan rampoe go na a trawan, e bigin gersi moro nanga moro wan djompodjompo koegroe.” André Fontaine, redacteur foe na Parijs aladé koranti Le Monde, ben taki: „Nowan sma ini na Westen gersi foe man foe kakafoetoe gi den bigi problema leki inflatie (a kon diri foe sani) èn a no de foe wroko. Na olo mindri Noord nanga Zuid e kon moro nanga moro bigi. Moro bigi feti e feti, èn na strélon foe abi moro fetisani de wan skreki sani. Foe datede meki mi no e si nowan enkri réde foe abi boen froewakti. . . . Mi no sabi now nowan enkri tiri ini na grontapoe di gersi dati a man foe kakafoetoe gi den bigi ekonomia problema foe wi ten.” Èn ini wan Zuid-afrikan tijdschrift ben tanapoe: „Na libisma famiri gersi dati a doro wan dipi marki foe ogri pasa marki, hoeroedoe, a no firi foe frantwortoe, gridifasi nanga bigi-ai-fasi.”
2. Fa den toestand ini na libisma maatschappij e akroederi nanga di ben de leti bifo na froedoe foe Noach dé?
2 Den toestand ini na disiten libisma maatschappij séker e akroederi nanga san ben pasa na grontapoe leti bifo Gado ben pori wan owroe grontapoe nanga jepi foe wan grontapoe froedoe. Soso na regtvaardiki Noach nanga en osofamiri ben kisi kibri ini a ten dati. Na bijbel e taki foe na ten dati: „Jehovah ben si dati na takroedoe foe libisma ben de pasa marki na grontapoe . . . Èn grontapoe ben kon pori ini na ai foe na troe Gado èn grontapoe ben kon foeroe nanga ogridoe” (Gen. 6:5, 11). „Soleki den dé foe Noach ben de”, na so Jezus Kristus ben taki na fesi, na so a de ini wi ten (Matt. 24:37). Agen na grontapoe „kon foeroe nanga ogridoe”, foedi „na takroedoe foe libisma” de pasa marki. Den sortoe toestand dati di ben waka na fesi na Froedoe ben de na bewijsi foe na kaba foe na owroe seti foe sani dati, di ben e kon krosbé. Na so a de ooktoe ini na ten disi. Den grontapoe toestand di e feni presi leki wan kontroe foe bijbel profétitori, de sori krin dati na disiten seti foe sani disi de ini en „ten foe na kaba”, en „laatste dé”. Disi de sensi na jari 1914 G.T. so. — Dan. 12:4; Matt. 24:3-14; 2 Tim. 3:1-5.
3. (a) Fa wi sabi dati wi de boen fara ini den „laatste dé”? (b) Foe san-ede meki wi kan froetrow krinkrin den bijbel profétitori?
3 Jezus ben taki na fesi dati son sma foe den sma di ben sa de na libi te den „laatste dé” ben bigin, ben sa si na kaba foe na seti disi. Sensi na „libisma-lo” foe 1914 ben de kotoigi foe na bigin foe den moeilijkheid disi, dan so wan 67 jari pasa kaba (Matt. 24:34). Gi na „kron èn drai libisma-lo” disi, na ten foe datede pikinmoro pasa kaba (Fil. 2:15). Djonsro wi sa de ai-kotoigi foe na kontroe foe den foeroe bijbel profétitori di abi foe doe nanga na „pasa gowe foe na grontapoe disi” (1 Johannes 2:17). Èn wi kan froetrow krinkrin, dati ala fini pisi foe den profétitori disi sa kon troe. „Na Sma di foe na bigin e ferteri na kabapisi”, Na Sma di ben gi den profétitori disi nanga jepi foe en jeje, „ben sweri, taki: ’Foe troe, joisti soleki mi ben prakseri, na so a moe pasa; èn soleki mi ben gi rai, na dati sa kon troe.’” — Jes. 14:24; 46:10; 2 Petr. 1:20, 21.
JEHOVAH „DÉ FOE REFRENSI”
4. San de wan foe den profétitori di abi foe doe nanga na kaba foe na seti foe sani disi, èn sortoe aksi a de meki kon na fesi?
4 Na mindri den foeroe bijbel profétitori foe na kaba foe na seti foe sani disi, de na profétitori di tanapoe ini 1 Thessalonika kapitel 5, den vers 2 nanga 3. Wi e lési drape: „Bika oensrefi sabi heri boen, dati Jehovah dé e kon precies so leki wan foefoeroeman ini na neti. Te den e taki: ’Vréde nanga sékerfasi!’ dan wan wantron-wantron pori sa kon ini wan momenti na den tapoe soleki na pen foe wan bere oema èn den no sa lon komoto kwetkweti.” San na bari tranga disi foe „vréde nanga sékerfasi” wani taki? Soema e taki en? Èn sortoe pori e kon wantron-wantron a baka?
5. Foe sortoe sani na profétitori ini 1 Thessalonika 5:2, 3 e go?
5 Den vers disi foe bijbel e taki foe „Jehovah dé”, di sa abi leki bakapisi wan „wantron-wantron pori”. Soboen, a de krin, dati na profétitori disi e handri foe na „dé” ofoe pisi ten di Jehovah sa tjari en kroetoe kon tapoe na ogri seti foe sani disi di Satan na Didibri e basi (2 Kor. 4:4; Openb. 12:9). Disi sa de Jehovah „dé foe refrensi” (Jes. 61:2). Jezus ben taki disi foe na pisi ten disi: „Dan so wan bigi benawtoe sa de leki sensi na bigin foe grontapoe te leki now no ben kon èn ooktoe no sa kon moro toe” (Matt. 24:21). Na apostel Paulus ben skrifi, dati na tjari kon foe na kroetoe di e kon, ben sa wani taki „na kon na krin foe na Masra Jezus komoto foe na hemel nanga en krakti engel, ini wan faja flam, te a de teki refrensi tapoe den di no sabi Gado èn tapoe den di no e gi jesi na a boen njoensoe foe wi Masra Jezus”. A de taki moro fara: „Den disi sa kisi na reti strafoe foe tego pori, farawe foe na fesi foe Masra èn foe na glori foe en tranga.” — 2 Thess. 1:7-9.
6. Nanga san na „bigi benawtoe” e bigin, èn e kon na wan kaba?
6 Na „bigi-benawtoe” di e kon, Jehovah „dé foe refrensi”, sa kon tapoe na heri disiten seti foe sani — den falsi bribi èn den ekonomia, maatschappelek èn politiek systema foe na seti disi. Fa sani sa waka baka makandra ini na „bigi benawtoe” dati, e kon na krin ini den profétitori ini na bijbelboekoe Openbaring (na Apocalyps). Ini den profétitori disi e kon na krin dati Jehovah „dé foe refrensi” e bigin nanga na pori foe ala falsi bribi. Na dé disi e kon na wan kaba te, te foe kaba den politiek nanga tra elementi foe na grontapoe foe Satan makandra nanga den bakaman foe den, „pikinwan èn bigiwan”, kisi pori. — Openb. kapitel 17 te 19.
WAN „WANTRON-WANTRON PORI”
7. San sa kon wantron-wantron baka na kari foe „Vréde nanga sékerfasi!”?
7 Soboen, na kari „Vréde nanga sékerfasi!” e kon leti bifo na „wantron-wantron pori” foe na grontapoe makti foe falsi bribi, wan makti di den bijbel profétitori e kari „Babylon na Bigiwan” (Openb. 17:5). Den e taki foe en toe leki „na bigi hoeroe, di den kownoe foe grontapoe ben doe hoeroedoe nanga en” (Openb. 17:1, 2). Ma tra fasi leki joe ben sa froewakti, dan foeroe foe den „kownoe disi foe na grontapoe”, di ben de wan dé den „fréri” foe na hoeroe, sa drai densrefi go tége en. bika na tori e taki: „Den dati sa abi ogri-ati gi na hoeroe èn den sa meki a kon légi èn nanga soso skin, èn den sa njan den pisi foe en skin èn den sa bron en krinkrin nanga faja.” — Openbaring 17:16.
8. Foe san-ede Jehovah e tjari so wan hebi kroetoe kon tapoe den bribi foe na grontapoe?
8 Foe san-ede so wan hebi kroetoe tapoe na kerki sistema foe disi grontapoe? A Wortoe foe Gado e piki: „Bikasi den sondoe foe en hé go te na hemel” (Openb. 18:5). Wan foe don sondoe disi den e skrifi so fasi foe en: „Ini en na broedoe ben feni foe proféti èn foe santawan èn foe ala sma di ben srakti na grontapoe” (Openb. 18:24). Den bribi foe na grontapoe no ben leri den bakaman foe den na waarheid di e go foe Gado nanga en wèt, ma den ben go moksi densrefi nanga oorlog di ben abi leki bakapisi na srakti foe hondro-hondro miljoen sma. Ooktoe falsi bribi ben teki fesi ini na ferfolgoe foe den troe dienstknekti foe Gado (Luk. 11:47-51; Openb. 17:6). Soboen, wantron-wantron foe ensrefi ofoe foe wan bakadoro, nanga san den ben doe ofoe ben libi foe doe, Jehovah e taki dati „Babylon na Bigiwan” de frantwortoe foe na broedoe foe „ala sma di ben srakti na grontapoe”.
9, 10. (a) Fa a de kon na krin dati son sma e froestan na frantwortoe di falsi bribi e tjari te nanga na dé foe tide tapoe na tori foe trowe broedoe? (b) Gi soema „Babylon na Bigiwan” ben doe dienst gi troetroe?
9 Den falsi bribi e tan go te nanga na dé foe tide foe poti broedoe-paiman na den tapoe. Ini na New York Post foe 18 mei 1981 foe eksempre ben skrifi: „Na fosten presidenti Carter ben taki esrede dati ogri-ati nanga ogridoe e meki a gersi dati ’a grontapoe kon law’.” A ben taki ooktoe dati „na dipi kerki bribi, di ini lobi ben moe tai den sma kon makandra, foeroe tron gersi dati a de wan pisi foe na lawfasi nanga kiri”. Na a srefi fasi, toe dé a fesi, ini wan redactioneel artikel foe na anoe foe Mike Royko ini a srefi boekoe ben ferklari, dati katholiek, anitri, moslim nanga djoe „e sori na dini foe den gi (Gado) foedi den e srakti makandra”. A ben taki: „Mi e bribi, dati den e prakseri, dati efoe na wan partij kan figi a trawan poeroe na pasi, na bewijsi sa gi nanga dati, dati na fasi foe na anbegi foe den de joisti.” A ben taki ooktoe, dati aladi sma e taki foe na paus foe na Lomsoe-Katholiek Kerki dati a de wan man foe vréde, „de bekenti foe den bakaman foe en, dati den trowe foeroe miljoen liter broedoe te den meki den ati kon bron”.
10 Na „bigi benawtoe” e bigin dan nanga reti nanga na pori foe na hoigri grontapoe makti foe falsi bribi di e kosi Gado. A de wan regtvaardiki kroetoe, foedi na grontapoe bribi, „Babylon na Bigiwan”, e taki dati a de dini Gado, ma e dini na Didibri te joe loekoe en boen. Hondro-hondro miljoen sma foe dat-ede ben kisi kori nanga jepi foe en „ogri jeje wroko” foe dini den afersi foe na Didibri. — Openb. 17:3-6; 18:23.
11. San e sori dati na pori foe na falsi bribi sa kon wantron-wantron leki wan skreki sani?
11 Na fadon foe „Babylon na Bigiwan” e kon wantron-wantron, sondro wan sma froewakti te joe loekoe en foe na sé foe na grontapoe. Na pori foe en sa kon so wantron-wantron, dati den politiek tiriman, di ben hori baka gi en, sa skreki, bikasi wi e lési: „Den kownoe foe na grontapoe, di ben doe hoeroedoe nanga en èn ben libi nanga en sondro sjen ini goedoe, sa kré foe en, èn naki densrefi ini sari, te den sa loekoe na a smoko di komoto foe na bron di a bron, aladi den tanapoe farawe foe frede ede foe na pen foe en èn taki: ’A sari, a sari, joe bigi foto, Babylon, joe tranga foto, bikasi ini wán joeroe na kroetoe foe joe ben kon!’” Trawan — den „koopman di e waka lontoe” ofoe den handel elementi di ben hori baka gi en — e bari ooktoe: „A sari, a sari, . . .. bikasi ini wán joeroe so wan bigi goedoe ben kisi pori!” — Openbaring 18:9-19.
12. Na sortoe fasi pori e kon onfroewakti èn na wan fasi di e gi pen?
12 Disi e akroederi nanga san skrifi ini 1 Thessalonika 5:2, 3, pe e sori dati na pori e kon wantron-wantron èn onfroewakti, foedi „Jehovah dé e kon precies so leki wan foefoeroeman ini ni neti”? Foedi na moro bigi pisi foe sma no de na ai tapoe a tori foe na go na fesi foe na kon na krin foe a wani foe Gado. Den e sribi na jeje fasi. Den de leki wan sma di e sribi na neti, te wan foefoeroeman kon onfroewakti. Den sortoe sma disi ben gi pasi dati den ben go steun na seti foe sani disi di de foe go na pori ini na jeje hebi-skin foe den. Foe dat-ede meki na pori foe Babylon na Bigiwan e kon onfroewakti tapoe den. Ja, „Jehovah dé” foe na pori foe ala elementi foe Satan seti, „sa kon precies so leki wan foefoeroeman ini na neti” . Na pori sa miti den féjanti foe Gado wantron-wantron èn na wan fasi di e gi pen, „soleki den pen foe wan bere oema, èn den no sa lon komoto kwetkweti”. — Loekoe ooktoe 2 Petrus 3:10.
NA TAKI FOE „VRÉDE NANGA SÉKERFASI”
13, 14. (a) Fa den naatsi ben taki wan heri pisi ten kaba foe vréde nanga sékerfasi? (b) Foe san-ede meki nowan foe den sortoe moeiti foe vréde disi de wan kontroe foe 1 Thessalonika 5:2, 3?
13 Sani di e seki na grontapoe sa marki na „wantron-wantron pori” foe falsi bribi èn na heri seti foe sani foe Satan. Ma na pori dati e kon wantewante baka na taki foe „Vréde nanga sékerfasi!” A de foe datede prenspari foe sabi san na taki disi foe „vréde nanga sékerfasi!” ben kan wani taki. Wan sani de so, a no gersi a abi foe doe nanga den gewoon moeiti foe den naatsi, di wani vréde. Den ben taki langa foe dati kaba. Baka na Fosi Grontapoefeti den naatsi ben skrifi den nen foe eksempre ondro na Kroederi foe Versailles. Bakaten, ini 1928, na moro bigi pisi foe den kondre ben skrifi den nen ondro na Briand-Kellog-kroederi. Na di foe Toe Grontapoefeti ooktoe ben kon na wan kaba nanga vréde-kroederi. Ini den jari no langa pasa kaba Sovjet Unie nanga den Verenigde Staten foe Amerkankondre ben taki foe vréde èn den ben skrifi den nen na ondro wantoe kroederi foe na skotoe foe strategisch fetisani. Difrenti naatsi ini na Mindri-Ostoe ben sroto ten na ten vréde-kroederi nanga makandra.
14 Ma nowan foe den moeiti disi e akroederi nanga san skrifi ini 1 Thessalonika 5:2, 3. Foe san-ede? Foedi na „bigi benawtoe”, Jehovah „dé foe refrensi”, no ben bigin. Hori ini prakseri dati Paulus ben taki dati pori sa waka baka na taki foe „Vréde nanga Sékerfasi”, wantron-wantron, „ini wan momenti”, so. Boiti dati, na kontroe ben moe de so wan aparti sani, foe sori dati a ben de wan reti sani foe a ben skrifi leki wan spesroetoe profétitori di Jehovah ben gi nanga en santa jeje. Na „Vréde nanga sékerfasi” moe de wan aparti sani, di o kon èn di de difrenti foe ala moeiti di meki te na a ten dati foe tjari vréde kon.
15. Soema sa taki logischerwijs „Vréde nanga sékerfasi”?
15 Boiti dati, soema de „den” di e taki „Vréde nanga sékerfasi” leti bifo na kaba kon? A no de wan sani di kande kan de so dati sortoe pisi foe na grontapoe disi, ben sa taki so wan sani sondro dati den bigi politiek makti ben sa wroko nanga den makandra ofoe ben sa poesoe den ini na sé dati. Den tiriman foe den naatsi e gersi dati den abi wan bigi pisi foe datede ini na kontroe foe na profétitori disi. Na organisatsi foe den Verenigde Naatsi, di soleki sma e bribi, ben gi densrefi na a tori foe vréde, ben sa kan pré wan rol toe. Èn san wi kan taki foe den kerki elementi? Foedi den disi de so tranga wan pisi foe na grontapoe èn di e „doe hoeroedoe nanga den kownoe foe na grontapoe”, dan kande séker den sa steun ofoe meki go na fesi den moeiti di den politiek makti e doe ini na sé disi. Ini na tori disi den sa waka baka den falsi proféti foe na Juda ini owroeten, di ben taki falsi: „Jehovah ben taki: ’Vréde joe sa kisi’”. Na presi foe dati, dan Jehovah ben de tapoe a punt foe tjari rampoe kon tapoe den, soleki en troe proféti Jeremia ben taki na fesi. — Jer. 23:16-22.
16, 17. (a) A gersi leki den naatsi foe now e bewégi go na wan ofoe tra vorm foe „vrede nanga sékerfasi”? (b) Ma foe san-ede ete wi kan abi na froetrow dati disi sa pasa?
16 Ma a no langa kaba den naatsi ben gi faja foe wan ofoe tra sortoe foe „vréde nanga sékerfasi”? Te joe loekoe den njoensoe foe den laatste ten, dan a gersi dati precies a tra sé foe a tori de so. George Kennan, na fosten Amerkan ambassadeur ini Sovjet Unie ben taki: „Na politiek spanning ini den 30 jari di pasa no ben doro so wan hé èn gefarlek punt leki now. Noiti a fesi ini na heri pisi ten disi, so wan bigi aboisi, bakabaka, lasi ensrefi èn soso sroedati frede” ben de leki now. Ini wan redactioneel artikel ini na Toronto Star ben taki moro fara: „Frede gi a ten di e kon no ben de someni na punt, ma wan moro skreki sani: Frede foe nojaso.”
17 Den laatste ten den bigi makti ben kragi makandra èn ben tapoe skreki gi makandra. Ini na wan pisi foe na grontapoe go miti na tra pisi broejafasi mindri borgroe, revolutie nanga feti ben loesoe kon. Na ekonomia foe grontapoe de toemsi na degedege. Kiri nanga ogridoe ben kon bigi leki wan pestsiki. Foe troe, a gersi wan moeilek sani foe kan si fa sma ben sa taki „vréde nanga sékerfasi!”. Tokoe na Wortoe foe Jehovah no e fadon noiti (Jes. 55:11; 1 Thess. 5:3, Na Njoen Testament ini aladé-tongo; Vertaling foe prof. Brouwer). Te na bijbel e taigi wi, dati so wan sani sa kon leti bifo „wantron-wantron pori” kon, dan disi sa pasa troetroe, fa disi kan gersi toe dati a no kan.
18. Fa den profétitori tége na owroe Babylon kan jepi wi foe poti bribi ini na disiten kontroe foe den profétitori?
18 Tjari kon ini joe prakseri den foeroe profétitori di den dienstknekti foe Gado ben meki bekenti tége Babylon foe owroeten, na makti grontapoe makti di ben de hondro-hondro jari bifo na gewoon teri foe ten. Wan skrifiman ben bereken a kans foe den bigi profétitori di skrifi ini bijbel tége Babylon ben kan kon troe, de wán tapoe 5 miljard! A no wan wondroe dati foeroe sma foe a pipel foe Gado ini owroeten ben moe aksi densrefi fa den profétitori dati kontra so wan tranga, krakti nanga skotoe grontapoe makti leki Babylon oiti ben sa kan kon troe. Ma a ben pasa wel, te ini den moro fini pisi. Ini na ten disi a kan gersi foe datede wan sani di no kan dati „vréde nanga sékerfasi” o taki, èn baka dati na grontapoe seti pori. Ma na profétis Wortoe foe Gado e ferklari dati disi séker sa pasa.
SOSO WAN VERNISJE
19. San na taki foe „vréde nanga sékerfasi” no sa wani taki?
19 Wi kan de séker foe disi: Na kari foe „Vréde nanga sékerfasi!” — sortoe vorm disi kan teki ooktoe — no wani taki dati wan kenki sa kon ini na troetroe toestand foe na grontapoe disi. Ooktoe disi no wani taki dati den naatsi sa poeroe den fetisani foe den poti na wan sé ofoe sa libi na féjanti fasi foe den. „’Vréde no de’ mi Gado ben taki, ’gi den ogrisma’” (Jes. 57:21). Na wan enkri sani di sa pasa de dati den grontapoe-fesiman, foedi den no e si wan olo moro ofoe foedi den e si wan ofoe tra winimarki foe tiri a kondre tra fasi, tapoe wan bepaalde momenti moro tranga leki fosten sa bari „Vréde nanga sékerfasi!”.
20. (a) Fa wi kan de so séker dati den toestand foe na grontapoe sa tan kon moro ogri? (b) San wi kan froewakti dati na moro bigi pisi foe den sma sa doe nanga na anbegi foe Gado?
20 Foe san-ede wi kan de so séker dati den toestand foe na grontapoe sa tan kon moro ogri? Foedi 2 Timotéus 3:1, 13 e taki na fesi dati ini den ’laatste dé disi ogri sma nanga bidrigiman sa kon moro ogri.’ Foe datede meki na kari foe „vréde nanga sékerfasi!” de soso wan vernisje. Na troetroe toestand foe na libismafamiri no sa kenki nanga dati. Noti san na grontapoe disi e doe ondro Satan, sa meki wan kaba kon na a lawine foe kiri nanga ogridoe, ofoe tjari wan stop kon na a fadon panja foe na osofamiri-libi, ofoe foe tjari wan drai kon ini na hoeroedoe di e kon moro bigi ofoe foe sorgoe a fesi dati ibri jari miljoen-miljoen bere no poeroe foe pikin di no gebore ete, ofoe foe gi wan loesoe foe sortoe tra bigi problema foe na libisma famiri toe (Jer. 10:23). Ooktoe na moro bigi pisi foe den sma ini wi ten no sa drai wantenwanten go na a troe anbegi foe Gado. Den bijbel profétitori nanga reti ben taki dati den libisma ini wi ten ben sa abi „moro lobi gi prisiri leki lobi gi Gado” èn dati „den ben sa abi wan fasi foe anbegi Gado, ma den no ben sa sori dati den abi na krakti foe en”. — 2 Tim. 3:4, 5; loekoe ooktoe Mattéus 7:13, 14.
21. Sortoe ferklari Jehovah dienstknekti sa gi foe na taki ini a ten di e kon foe „vréde nanga sékerfasi!”?
21 Soboen, aladi na grontapoe sa kisi kori nanga falsi froewakti te a kari ini na ten di e kon foe „vréde nanga sékerfasi!” sa bari, dan disi no sa de so nanga Jehovah dienstknekti. Na presi foe dati, dan den sa froestan na kon troe foe na profétitori foe san a de troetroe: wan laatste marki dati na „bigi benawtoe” de tapoe a punt foe bigin! Den sabi ooktoe dati baka te a „dé foe Gado refrensi” kon na wan kaba, en getrow dienstknekti sa go ini wan regtvaardiki njoen seti foe sani foe tan libi foe tego tapoe wan grontapoe di krin, èn di kenki kon tron wan paradijs (2 Petr. 3:13; Openb. 7:9-17). Fa na fasi foe wi moe de, now di ala den span sani disi di e psa e kon so esi na wi tapoe?
[Prenspari pisi na tapoe bladzijde 70]
Gado dienstknekti no sa meki sma kori den nanga na kari ini na ten di e kon foe „vréde nanga sékerfasi!”
[Prenki na tapoe bladzijde 65]
Den disiten toestand na grontapoe de leki di foe fesi a Froedoe, di grontapoe „ben foeroe nanga ogridoe”
[Prenki na tapoe bladzijde 67]
A kroetoe di Gado e tjari kon tapoe falsi bribi de so hebi, foedi „en sondoe ben hé go te na hemel”
[Prenki na tapoe bladzijde 69]
Nowan foe den moeiti foe tjari vréde kon ini wi ten de wan kontroe foe 1 Tessalonika 5:2 èn 3, foedi nowan „wantronwantron pori” ben kon ete