Loekoe moro fara leki a „vrede nanga seikerfasi” di libisma meki
A troe tori de, taki libisma noiti kan meki troe vrede kon di e tan. Foe san-ede? Bika libisma no de troetroe den sma di pori a vrede, ala di den abi prati ini a fowtoe foe a historia foe den, di flaka nanga broedoe. A troetroe sma di e pori a vrede de moro makti leki libisma. A no de no wan tra sma moro leki Satan Didibri, di den e taki foe en na ini bijbel leki a wan di „e kori a heri grontapoe pe sma e libi na tapoe.” — Openbaring 12:9.
BIJBEL e taki: „A heri grontapoe didon ini a makti foe a ogriwan [Satan]” (1 Johanes 5:19). Foe dati-ede, foe kisi troe vrede nanga seikerfasi di e tan, dan dati moesoe abi na ini a poeroe foe Satan a pasi, makandra nanga en grontapoe seti di a bow èn di en e tiri, so leki fa a de krin foe si. (Teki gersi Jesaja 48:22; Romesma 16:20.) Libisma no man doe disi.
Fa, dan, den kan kisi vrede nanga seikerfasi? Nanga a krakti foe a Wan di tranga krinkrin moro Satan. Na almakti Gado ben poti wan ten di skotoe gi den doe foe Satan a mindri libisma. Te a ten dati di skotoe doro, dan wan „wantronso pori” sa kon abra a grontapoe di didon ini a makti foe Satan (1 Tesalonikasma 5:3-7). Ala den boeweisi e meki wi kon na a bosroiti taki disi sa pasa heri esi.
Vrede nanga Seikerfasi Now!
Ma fa a de nanga a tori disi now? Wan seiker marki foe troe vrede nanga seikerfasi de wan sani di kan, srefi ini a ten disi. Fa? No leki fa foeroe kerki tiriman ben proeberi, foe di den e moksi densrefi ini den politiek afersi foe a grontapoe disi, ma, moro foeroe foe waka baka den komando nanga rai foe Gado.
So wan fasi foe handri e tjari vrede kon troetroe? Ija. Foe eksempel, Jehovah Kotoigi ben proeberi dati èn den ondrofeni taki troetroe a kan foe njanboen foe troe vrede so boen leki wan seiker marki foe seikerfasi. Foe di den e waka na baka den komando foe Gado so leki fa disi tjari kon a krin ini bijbel, meki den kan kon makandra ini troe vrede leki wan internationaal organisâsi, awansi foe sortoe ras, nationaliteit ofoe tongo den de. — Psalm 133:1.
Foe di den e gi jesi na den wet foe Gado, meki na wan simbôlis fasi den ’smeti den owroe tron proegoe èn den no e leri orlokoe moro’ (Jesaja 2:2-4). Den e firi densrefi seiker ini a lobi foe Gado èn abi na froetrow taki den jeje brada foe den e hori ai tapoe den (Romesma 8:28, 35-39; Filipisma 4:7). Efoe joe e tweifri efoe disi de troe, wi e gi joe a kari foe kon fisiti den na ini wan foe den Kownoekondrezaal èn si disi foe joesrefi.
Vrede nanga Seikerfasi na a Heri Grontapoe
Ma disi no de a heri kontroe foe a pramisi ini bijbel foe troe vrede nanga seikerfasi. Kwetikweti! A de soso wan pikin tesi di wi e tesi na fesi foe na fasi fa a grontapoe disi o de efoe ibriwan sma ben waka baka den wet foe Gado. Heri esi a pikin tesi dati di wi e tesi na fesi, sa kon tron wan troe sani.
Na apostel Paulus ben taki: „Te den [den wan di no e dini Gado] e taki: ’Vrede nanga seikerfasi!’ [foe di den e denki taki te foe kaba na den tjari vrede nanga seikerfasi kon na den eigi fasi] dan wantronso wan pori sa kon wantewante na den tapoe” (1 Tesalonikasma 5:3). Gado sa feni dan taki Satan ben kori a libisma famiri langa nofo kaba. A sa de dan a ten foe poeroe en na pasi, makandra nanga a bidrigi grontapoe seti di de ini en makti. Dan a ten sa doro foe a profeititori foe Danièl kon troe: „Ini den dei foe den kownoe dati, a Gado foe hemel sa opo wan kownoekondre di noiti sa tjari kon na wan kaba. Èn a kownoekondre srefi no sa gi abra na no wan tra pipel. A sa masi ala den kownoekondre disi èn tjari den kon na wan kaba, èn ensrefi sa tan te ten di no skotoe.” — Danièl 2:44.
Disi sa de wan onregtfardiki doe foe na sei foe Gado? Kwetikweti. Wan wantronso pori sa kon soso tapoe den wan di e froedini en akroederi den kroetoe nanga markitiki foe Gado. Joe e froetrow taki a Mekiman sa teki bosroiti na wan regtfardikifasi ini na afersi disi? Seiker wi kan libi na afersi disi ini en anoe sondro foe broko wi ede! Èn san sa de a bakapisi foe a kroetoewroko foe en? Na ini odo skrifi: „Den regtfardikiwan na den wan di sa libi na grontapoe, èn den wan sondro flaka na den wan di sa tan abra na en tapoe. Foe taki foe den ogriwan, den sa koti den poeroe foe a grontapoe srefi” (Odo 2:21, 22). Wan sma sa de toe di sa firi sari foe a lasi di den ogriwan lasi gowe?
Nanga a poeroe na pasi foe den sma di e pori a vrede, troe vrede nanga seikerfasi sa de na pisi foe libisma na a heri grontapoe ondro a boen tiri foe Gado kownoekondre. „Sma no sa doe no wan sortoe ogri, èn no sa meki iniwan sortoe pori kon na tapoe heri mi santa bergi; bika a grontapoe seiker sa kon foeroe nanga a sabi foe Jehovah, so leki den watra toe e tapoe den se” (Jesaja 11:9). Joe e bribi a pramisi disi di skrifi ini bijbel? Joe e froetrow taki den sani disi sa feni presi heri esi? Efoe joe e tweifri pikinso, dan wi e gi joe deki-ati foe ondrosoekoe na afersi disi moro fara. Te joe loekoe en boen, dan Gado fasi na a wan enkri fasi fa libisma oiti sa man doro na marki foe troe vrede nanga troe seikerfasi, di den e angri foe en.
[Prenki na tapoe bladzijde 6]
A pipel foe Jehovah e njanboen foe troe vrede èn wan boen marki foe seikerfasi ini a ten disi