Jepi tra sma foe feni troe vréde nanga sékerfasi
1 Alape na grontapoe foeroe opregti sma de ete di no de dienstknegti foe Jehovah ete, ma di e „geme èn e soktoe foe ala den tegoe sani di e doe na ini [a kristenheid]” (Ezech. 9:4). Den sortoe sma disi abi na trowstoe howpoe fanowdoe foe na njoen seti nanga na paradijs di e kon pe vréde nanga sékerfasi sa de dorodoro.
2 Gi den sortoe opregti sma disi a boekoe Troe vréde nanga sékerfasi — fa joe kan feni dati? e tjari kon a doro. Disi de wan loekoe njoen foe wan boekoe di ben de kaba foe a srefi thema. A boekoe e gi piki finfini tapoe aksi foe tori leki foe san-ede no wan troe vréde nanga sékerfasi de now, fa dati sa doe kon, o ten wi sa sabi dati a ten dati de krosbé, èn san wi moe doe persoonlek na ini disi. A e poti a prakseri foe sma na tapoe na méne foe den sani di e psa na ini a grontapoe. A e meki den si efoe den moe poti fertrow ofoe no na ini den moeiti di sma e doe foe tjari vréde kon. Na Troe vréde-boekoe e poti prakseri na a ferklari foe den Verenigde Naatsi dati na ini a jari 1986 spesroetoe moeiti sa bigin doe foe na sé foe grontapoe tiriman foe meki ’vréde nanga sékerfasi’ go na fesi. Nanga na ferklari disi ini prakseri, a Troe vréde-boekoe e taki: „Sondro degedege disi de wan stap na ini a richting foe a kontroe foe Paulus wortoe. Ma ete na profétitori e sori dati na ten sa kon dati den naatsi sa ferklari dati den ben doro wan séker marki foe vréde nanga sékerfasi.” — 1 Thess. 5:3.
3 Na organisaatsi foe Jehovah abi na prakseri foe hori ini april nanga mei wan spesroetoe veldtocht foe prati na toemsi moi boekoe disi na a heri grontapoe. Aladi na ini Wi Kownoekondredienst foe april èn foe mei moro bodoi sa kon foe disi, wi e gi ala gemeente dek’ati foe seni den bestelling kon now kaba, efoe disi no ben psa ete, sodati wan voorraad sa de foe bigin nanga a prati foe den na ini april.