A bijbel fasi foe loekoe vrede nanga seikerfasi

Joe abi foeroe sma di e teki a fasi fa sani e waka go na wan moro bigi wanfasi na grontapoe èn a vrede nanga seikerfasi di disi kande kan tjari kon foe san a gersi taki a warti. Den e howpoe taki so wan boeweigi sa meki wan moro boen grontapoe kon. Ma bijbel e sori taki moro foeroe de ini a tori leki san na ai kan si.

NA AFERSI foe vrede nanga seikerfasi de spesroetoe foe belang gi kresten, foe na sani ede san na apostel Paulus ben skrifi ondro krakti foe Gado santa jeje gi wan kresten gemeente foe a fosi jarihondro. Den wortoe foe en skrifi na ini bijbel ini 1 Tesalonikasma 5:3: „Te den e taki: ’Vrede nanga seikerfasi!’ dan wantronso wan pori sa kon wantewante na den tapoe so leki fa pen foe meki e kon na wan bere-oema; èn den no sa man lon komoto kwetikweti.” Na bijbel tekst disi e meki foeroe aksi opo ede kon.

Vrede nanga Seikerfasi — Wan bigin foe san?

Efoe joe e leisi na kontekst foe Paulus wortoe di skrifi na tapoesei, dan joe sa si taki den sma di e taki „vrede nanga seikerfasi” no de kresten sma di de na ai, ma moro foeroe, sma di e sribi ini a tori foe den sani di e feni presi now. Den de ini wan kefarlek situwâsi, ma den no sabi dati, bika den e prakseri taki sani e kon moro betre. Ma, Paulus ben taki foe kresten: „Foe a sei foe den ten nanga den pisiten, brada, wi no abi foe skrifi oenoe noti foe dati.” (1 Tesalonikasma 5:1) Ija, wi moesoe de na ai gi den ten di Gado poti foe den sani di o pasa. Foe san-ede? Bika Paulus taki dati wan ten foe wantronso pori, di den e kari „na dei foe Jehovah”, e kon „leti fa wan foefoeroeman e kon na neti”. — 1 Tesalonikasma 5:2.

San a vrede nanga seikerfasi di sma ben taki na fesi foe en wani taki? A de krin taki a moesoe de moro leki taki wawan. Sma ben e taki foe vrede pikinmoro so langa leki den ben e feti orlokoe. Den wortoe foe Paulus moesoe sori go na wan ten pe a gersi taki den nâsi e doro vrede nanga seikerfasi na wan aparti fasi leki noiti na fesi. Ma disi e sori taki a no e go moro dipi leki san ai kan si. So wan sortoe vrede nanga seikerfasi di e tjari sma go na wan wantronso pori, leki fa a o de krin foe si, no de wan troetroe vrede noso wan troetroe seikerfasi.

Jesus ben taki toe foe na wantronso pori disi. A ben kari en wan „bigi banawtoe di noiti kon ete foe sensi a bigin foe grontapoe te leki now, nôno, èn noiti no sa kon moro.” Foeroe hondro jari bifo Jesus, a profeiti Danièl toe ben taki foe disi, èn a ben skrifi foe en leki „a ten foe nowtoe di no ben kon foe sensi wan nâsi ben doe kon te leki a ten dati.” — Mateus 24:21; Danièl 12:1.

Joe kan kari en wan bigi banawtoe noso wan ten foe nowtoe — ini ala toe kefal, leki fa den profeititori e taki, a sa figi poeroe ibri foetoemarki foe Satan grontapoe seti. Na presi taki Gado feni a taki di den e taki a fesi foe a kon foe vrede nanga seikerfasi, boen, dan disi e tjari den go na a tra sei foe a tori. — Teki gersi Sefania 3:8.

Den tjari den elementi foe a ten kon a krin

Den sani di gersi taki sma doe tra dei foe doro wan moro bigi grontapoe wanfasi nanga a froewakti taki vrede nanga seikerfasi sa de a bakapisi foe dati, na wan kontroe foe a profeiti warskow foe Paulus? We, so leki fa a tijdschrift disi foeroetron ben sori, dan sensi 1914 wi ben de kotoigi foe a kontroe foe foeroe foe den bijbel profeititori di abi foe doe nanga Jesus en denoja na ini hemel ini Kownoekondre makti (Mateus kapitel 24, 25; 2 Timoteus 3:1-5; Openbaring 6:1-8). Jesus ben sori taki a dei foe Jehovah, te wan wantronso pori sa kon tapoe den ogri sma, sa doro ala di memre foe a famiri-lo foe sma di ben de kotoigi foe a bigin foe a ten disi, de ete a libi. — Lukas 21:29-33.

Na apostel Paulus ben tjari wan ten-elementi kon na ini a tori toe. A ben taki: „Ala di den e taki foe vrede nanga seikerfasi, dan wantronso wan rampoe o miti den.” Na a fasi fa den gebroiki den wortoe disi foe Paulus na ini The New English Bible e sori krinkrin taki a bigi banawtoe e feni presi „ala di den e taki”. Leki wan foefoeroeman na neti — sondro foe sabi dati na fesi — a pori sa kon te sma no e froewakti en srefisrefi, te den prakseri foe moro foeroe libisma de tapoe a howpoe di den abi foe vrede nanga seikerfasi di den wani sote. Ala di, now, wi no kan taki nanga seikerfasi, dati a situwâsi foe vrede nanga seikerfasi foe now e meki den wortoe foe Paulus kontroe — ofoe te o fara ete a taki di den e taki foe vrede nanga seikerfasi sa moesoe go doro ete — dan soso a sani kaba taki so wan taki de foe jere now na wan fasi di noiti den no ben jere ete a fesi, e meki kresten si a fanowdoe foe de ala ten na ai.

’Wan troesoe-troesoe’ a mindri toe bigi grontapoe makti

Di a ben taki foe wan ten foe nowtoe, a profeiti Danièl ben tjari wan ten-elementi kon na ini a tori toe. A ben sori taki a ten foe nowtoe ben o kon na a kaba foe wan kesekese di ben de foe wan langa pisiten a mindri den toe groepoe foe makti, a wan den e kari „a kownoe foe noordsei” èn a trawan den e kari „a kownoe foe zuidsei” (Danièl 11:5-43). Sensi na kaba foe na di foe Toe Grontapoe Feti, a kapitalistisch „kownoe foe zuidsei” nanga a socialistisch „kownoe foe noordsei” ben teki presi gi den groepoe foe makti disi.

Danièl ben taki na fesi taki a bita strei a mindri den toe groepoe foe makti disi, so leki fa dati ben de foe si ini den 45 jari di pasa, ben sa de leki wan „troesoe-troesoe”, soleki fa toe haswaman e doe moeiti foe kisi makti tapoe a trawan. A gersi taki tra dei, a troesoe-troesoe disi, kon moro mendri. Foe dati-ede, ini mei foe a jari di pasa, a Minister foe dorosei afersi foe Rosiakondre, ben meki bekènti taki a Kowroe Orlokoe ben kon na wan kaba. Ini juni, a Time koranti ben sori go na wan konmakandra foe den moro heiman foe den Verenigde Staten foe Amerkankondre nanga Rosiakondre èn ben skrifi: „Son wan foe den kroederi tapoe a kontren foe a meki kon moro mendri foe fetisani èn den test foe nucleair mekisani, ben sa gersi leki wan sani di noiti ben sa kan kon troe wan toe jari pasa kaba. Now, srefi te joe e teki den makandra, a gersi leki den e waka na wan fasi di sma no kan bribi.”

Na ten sa sori efoe a matifasi, di e gersi taki de a mindri den toe supermakti, na foe wan sjatoe pisiten noso sa tan. Ma wan sani de krin: A pisi ten di Jesus ben taki foe en de moi fara kaba. Èn den sani di e feni presi ini grontapoe e sori taki wi de krosibei kaba foe den sani di o pasa èn di na apostel Paulus nanga a profeiti Danièl ben taki na fesi foe den. Awansi den politiek sani di pasa tra dei de te na wan seiker marki leki wan bakapisi foe a krakti di den kerki foe krestenhèit ben abi tapoe dati, tokoe den no sa tjari vrede kon di e tan foe ala ten. Na boeweisi e sori taki den sa tjari joisti a tra sei foe a tori kon gi den nâsi foe grontapoe.

[Prenki na tapoe bladzijde 4]

Ten sa sori o langa a matifasi di gersi taki de a mindri den toe supermakti sa tan

[Sma di abi a reti foe a prenki]

USSR Mission to the UN