Jehovah nanga Krestes — Den moro prenspari komunikâsiman

„Na Soeverein Masra Jehovah no sa doe wan sani, efoe a no tjari den froetrow afersi foe en kon na krin gi en dienstknekti, den profeiti.” — AMOS 3:7.

1. Sortoe fasi foe komunikâsi sma e gebroiki ini a ten disi?

INI a ten disi, komunikâsi de wan bisnis foe foeroe miljoen dala. Ala den boekoe di den e tjari kon na doro, ala den koranti nanga tijdschrift di den e druk doronomo, ala den radio èn telefisi programa, so toe ala den felem nanga komediprei, de moeiti di den e doe foe abi komunikâsi. A srefi de troe foe ala den brifi di sma skrifi èn seni gowe nanga post, so srefi nanga ala den telefon takimakandra. Ala den sani disi na moeiti di sma e doe foe abi komunikâsi.

2. San na wan toe eksempel foe den go na fesi di sma meki na tapoe a kontren foe a tèknik sei foe abi komunikâsi?

² Den go na fesi di sma meki ini na tèknik sei foe komunikâsi, de sani di e froewondroe sma. Foe eksempel, fibergrass kabel, di de wan bigi go na fesi tapoe koproe kabel, kan tjari foeroe tenti doesoen telefon takimakandra na a srefi ten. Dan joe abi den komunikâsi satelliet (moenkenki di sma meki), di e drai lontoe a grontapoe ini a loktoe èn di abi wrokosani foe tjari telefon, telegraaf, radio nanga telefisi marki go abra. Wan foe den satelliet disi kan handri 30,000 telefon boskopoe na a srefi momenti!

3. San e pasa te joe abi komunikâsi olo?

³ Ma awasi ala den fasi disi foe komunikâsi de, tokoe foeroe problema de ini a grontapoe, foe di mankeri de foe komunikâsi a mindri sma. So boen, den e froeteri wi taki „wan problema di e kon moro bigi de — wan olo di dei foe dei e kon moro bradi foe abi ’komunikâsi’ — na mindri den tiriman nanga den wan di den e tiri.” Èn san na a so-kari olo a mindri den geslakti, di de noti moro leki a misi di papa nanga mama nanga den pikin e misi foe abi komunikâsi na wan boen fasi nanga makandra? Sma di e gi rai tapoe a kontren foe a trowlibi e taki dati a moro bigi problema ini a trowlibi de wan misi di man nanga wefi e misi foe abi komunikâsi. Wan mankeri foe abi boen komunikâsi kan tjari srefi dede kon. Na a bigin foe 1990, 73 sma ben lasi libi ini wan opolani rampoe, pe, so leki fa a sori, a piloot nanga a gron kontrole ben misi foe abi komunikâsi. Wan ede-tori ini wan koranti ben froeklari: „Komunikâsi problema ben tjari rampoe kon.”

4. (a) San na „komunikâsi”? (b) San na a marki foe kresten komunikâsi?

⁴ San na komunikâsi, te joe e loekoe en na a fasi fa kresten e si en? Akroederi wan wortoe-boekoe, „komunikâsi” wani taki „foe tjari bodoi, prakseri, ofoe firi go abra, so taki sma e kisi en na wan fasi di e gi satisfaksi noso di den e froestan.” Wan tra wortoe-boekoe e froeteri san a de leki „wan fasi foe tjari idea kon na krin na wan fasi di no e misi en marki”. Poti prakseri tapoe „tjari idea kon na krin na wan fasi di no e misi en marki.” Kresten komunikâsi spesroetoe moesoe man miti en marki, bikasi a abi leki marki foe doro den ati foe sma nanga a waarheid foe Gado Wortoe, so taki, so leki fa wi e howpoe, den kan doe wan sani tapoe san den leri. Na wan aparti fasi, a soekoe di sma no e soekoe den eigi boen nomo èn lobi e poesoe en.

Jehovah leki Komunikâsiman

5. San na wan foe den fosi fasi fa Jehovah Gado ben abi komunikâsi nanga sma?

⁵ Sondro degedege Jehovah de a moro bigi Komunikâsiman. Bikasi a ben meki wi na en prenki èn foe gersi en, meki a man foe abi komunikâsi nanga wi, èn a kan foe wi abi nanga trawan komunikâsi di e go foe Jehovah. Sensi di Jehovah meki libisma, a ben abi nanga den mekisani foe en na grontapoe komunikâsi di ben go foe ensrefi. Wan fasi fa a ben doe disi ben de nanga jepi foe en mekisani di joe kan si. So boen, na psalmsingiman e taigi oenoe: Den hemel e meki na glori foe Gado bekènti; èn na loktoe e froeteri foe na wroko foe en anoe. Wan dei baka a trawan e meki taki opo kon, èn a wan neti baka a trawan e tjari sabi kon a krin” (Psalm 19:1, 2). Èn Romesma 1:20 e froeteri wi taki den „eigifasi foe Gado di no de foe si, de krin foe si foe sensi grontapoe meki.” „De krin foe si” e sori tapoe komunikâsi di no e misi en marki!

6. San Jehovah komunikâsi go na en fosi grontapoe mekisani, ala di den ben de ini a djari foe Eden?

⁶ Den sma di no e bribi ini Gado nanga den sani di a e tjari kon na krin, wani meki wi bribi taki Gado libi en gi libisma foe den kon sabi foe san-ede a de. Ma Gado Wortoe e sori krin taki Gado ben abi komunikâsi nanga libisma foe sensi a bigin. So boen, na a fosi man nanga oema Gado ben gi na ordroe foe meki pikin: „Meki pikin èn kon foeroe èn foeroe a grontapoe èn poti en na oen ondro, èn abi na oen ondro . . . ibri libi mekisani.” Gado ben gi den pasi toe foe den njan den bere foeroe nanga den froktoe foe a djari — boiti den froktoe foe wán bon. Dan, di Adam nanga Eva ben tranga jesi, Jehovah ben taki na fosi pramisi di e go foe a Messias, èn di e gi pikin howpoe na a libisma famiri: „Mi sa poti feantifasi a mindri joe (a sneki) nanga a oema èn a mindri joe siri nanga en siri. En sa masi joe na ini joe ede èn joe sa masi en na ini en bakafoetoe.” — Genesis 1:28; 2:16, 17; 3:15.

7. San na boekoe foe Genesis e meki wi si ini a tori fa Jehovah ben abi komunikâsi nanga en dienstknekti?

⁷ Di na manpikin foe Adam, Kaïn ben kon foeroe nanga wan takroe djaroesoe di kan kiri sma, foe taki en leti, Jehovah Gado ben abi komunikâsi nanga en: ’Loekoe boen! Joe e soekoe problema!’ Ma Kaïn no ben wani poti prakseri na a warskow dati èn a ben kiri en brada (Genesis 4:6-8). Dan di a grontapoe ben kon foeroe nanga tranga èn ogridoe, Jehovah ben komunikâsi en prakseri go na a regtfardiki man Noa foe figi ala sani poeroe di e doti na grontapoe (Genesis 6:13–7:5). Baka na Froedoe, di Noa nanga en famiri ben komoto na ini na ark, Jehovah ben komunikâsi en prakseri go na den ini a tori foe a santafasi foe libi nanga broedoe, èn nanga jepi foe na alenbo a ben gi na djaranti taki noiti moro a sa pori ala libisani nanga wan froedoe. Wan toe jarihondro a baka, Jehovah ben komunikâsi en prakseri go na Abraham foe blesi a libisma famiri nanga jepi foe a siri foe Abraham (Genesis 9:1-17; 12:1-3; 22:11, 12, 16-18). Èn di Gado ben bepaal taki a ben o pori den jajo sma foe Sodom nanga Gomora, na wan lobi fasi a ben komunikâsi a tori dati go na Abraham, taki: „Mi sa kibri gi Abraham san mi e doe?” — Genesis 18:17.

8. San de fo fasi fa Jehovah ben abi komunikâsi nanga en dienstknekti na grontapoe?

⁸ Bigin nanga Moses, Jehovah ben gebroiki wan langa lin foe profeiti foe abi komunikâsi nanga Israèl (Hebrewsma 1:1). Sontron a ben doe dati foe taki en boskopoe nanga mofo, so leki di a ben froeteri Moses: ’Skrifi den wortoe disi gi joesrefi’ (Exodus 34:27). Moro foeroetron Jehovah ben abi komunikâsi nanga en takiman nanga jepi foe fisjoen, so leki fa a ben doe kaba nanga Abraham.a Jehovah ben abi komunikâsi toe nanga libisma nanga jepi foe dren, èn no soso nanga en dienstknekti ma so toe nanga den wan di ben abi foe doe nanga en dienstknekti. Foe eksempel, Jehovah ben meki toe foe Josef kompe, di ben de nanga en ini doengroe-oso, kisi dren, di Josef ben poeroe gi den (Genesis 40:8–41:32; Danièl kapitel 2 nanga 4). Na tapoe foe dati, na foeroe okasi Jehovah ben gebroiki engel leki boskopoeman foe abi komunikâsi nanga en dienstknekti. — Exodus 3:2; Kroetoeman 6:11; Matéus 1:20; Lukas 1:26.

9. San ben boeweigi Jehovah foe abi komunikâsi nanga en pipel Israèl, so leki de foe si na sortoe froeklari foe en?

⁹ Ala den sortoe komunikâsi disi foe Jehovah nanga jepi foe den profeiti foe en e sori en lobi gi en pipel Israèl. So boen, a ben taki nanga jepi foe en profeiti Esekièl: „Mi abi prisiri, no ini a dede foe den ogriwan, ma na ini disi, taki a ogriwan drai baka gi en pasi èn troetroe tan na libi. Drai baka, drai baka foe joe takroe pasi, bikasi foe san-ede joe ben sa moesoe dede, o, oso foe Israèl?” (Esekièl 33:11) Jehovah ben de wan langa-pasensi èn pasensi komunikâsiman nanga en oproeroe pipel, so leki fa wi kan si ini 2 Kroniki 36:15, 16: „Jehovah na Gado foe den fosi papa, ben tan seni ala tron baka [warskow] gi den nanga jepi foe en boskopoeman, foe di a ben firi sari-ati gi en pipel èn foe en libi presi. Ma den . . . no ben wani loekoe en wortoe na ai èn ben e hori en profeiti na spotoe . . . te den no ben man kon betre moro.”

10. Fa Jehovah e abi komunikâsi nanga en pipel ini a ten disi, èn te sortoe marki a de a Gado foe komunikâsi?

¹⁰ Ini a ten disi wi abi na Wortoe foe Gado na Santa Bijbel di skrifi nanga jepi foe en santa jeje, nanga jepi foe a wortoe dati Jehovah e komunikâsi bodoi di e go foe ensrefi, en prakseri, nanga en wani kon gi wi (2 Timoteus 3:16, 17). Te joe loekoe en boen, leki na toemoesi boen Komunikâsiman, Jehovah e froeklari: „Na Soeverein Masra Jehovah no sa doe wan sani, efoe a no tjari den froetrow afersi foe en kon na krin gi en dienstknekti, den profeiti” (Amos 3:7). A meki en dienstknekti kon sabi san a e prakseri foe doe.

Gado Manpikin leki Komunikâsiman

11. Soema de a moro prenspari wrokosani foe Jehovah ini na abi foe komunikâsi nanga libisma, èn foe san-ede a titel foe en „a Wortoe” fiti?

¹¹ Foe ala den mindriman di Jehovah gebroiki foe komunikâsi en wani go doro, a moro prenspariwan de a Wortoe, a Logos, di ben tron Jesus Krestes. San a wani taki dan, dati den e kari en a Wortoe, ofoe Logos? Dati en de Jehovah moro Prenspari Takiman. Èn san na wan takiman? Wan sma di e komunikâsi go a doro san wan trawan abi foe taki. So boen na Logos ben tron a Komunikâsiman foe a wortoe foe Jehovah Gado gi den grontapoe mekisani foe en di a ben gi wan froestan. A ròl dati de so prenspari, taki den e kari en a Wortoe. — Johanes 1:1, 2, 14.

12. (a) Nanga sortoe prakseri Jesus ben kon na grontapoe? (b) San e kotoigi taki na wan getrow fasi a ben doe na prakseri dati?

¹² Jesus srefi ben froeteri Pontius Pilatus taki a moro prenspari prakseri foe en foe kon na grontapoe, ben de foe komunikâsi na waarheid go na a libisma famiri: „Na foe disi meki mi ben gebore èn na foe disi meki mi ben kon na ini grontapoe, foe gi kotoigi foe a waarheid” (Johanes 18:37). Èn a tori ini den evangelium e froeteri wi o boen a ben doe a wroko dati di a ben kisi. Sma e feni na Bergipreiki foe en a moro boen preiki di oiti wan sma ben hori. O boen a ben abi komunikâsi nanga jepi foe a preiki dati! „A bakapisi ben de taki na ipi [di ben jere na preiki] ben froewondroe foe en fasi fa a ben gi leri” (Mateus 7:28). Foe wan tra okasi wi e leisi: „Na bigi ipi ben e arki en nanga prisiri” (Markus 12:37). Di den ben seni wan toe ofisiri foe go kisi Jesus, den ben kon baka sondro en. Foe san-ede? Den ben piki den Fariseiman: „Noiti wan tra sma ben taki na a fasi disi.” — Johanes 7:46.

Den disipel foe Krestes ben kisi na komando foe de komunikâsiman

13. San e sori taki Krestes no ben de tevrede foe en wawan de leki komunikâsiman?

¹³ Foe di Jesus no ben de tevrede foe de en wawan leki komunikâsiman, meki a ben gi 12 apostel èn baka ten 70 evangeliumpreikiman na komando foe tan go na fesi leki komunikâsiman foe na boen njoensoe foe a kownoekondre (Lukas 9:1; 10:1). Dan sjatoe bifo a ben opo go na hemel, a ben gi den disipel na komando foe doe wan spesroetoe wroko. Sortoe wroko? Leki fa wi e leisi ini Mateus 28:19, 20 a ben gi den na ordroe foe de komunikâsiman; èn den ben moesoe leri trawan baka foe de komunikâsiman so srefi toe.

14. O boen den fosi kresten komunikâsiman ben de?

¹⁴ Den disipel ben de boen komunikâsiman? Seiker den ben de dati! Leki bakapisi foe a preiki foe den tapoe a dei foe a Penksterfesa 33 G.T., 3000 sili ben kon ini a njoen kresten gemeente di ben opo. Heri esi a nomroe ben gro te doro 5000 sma (Tori foe den Apostel 2:41; 4:4). Foe dati-ede a no de wan froewondroe sani taki den djoe di ben de feanti foe den ben kragi den, taki den ben e foeroe heri Jerusalem nanga a leri foe den èn baka ten den ben kragi taki den ben drai a heri grontapoe pe sma e libi ondro go na tapoe nanga a preiki foe den! — Tori foe den Apostel 5:28; 17:6.

15. Sortoe wrokosani Jehovah gebroiki ini a njoenmodo ten foe abi komunikâsi nanga sma?

¹⁵ Fa a de ini a njoenmodo ten disi? Leki fa Mateus 24:3, 45-47, e froeteri wi, dan na Meester, Jesus Krestes, ben poti „na getrow èn koni srafoe”, di de den salfoe kresten, foe sorgoe gi ala den goedoe foe en na grontapoe ini a ten foe en denoja. Na Tiri Skin foe Jehovah Kotoigi e teki presi gi na getrow èn koni srafoe dati, di abi leki wrokosani foe tjari boekoe kon a doro, na Watch Tower Bible and Tract Society. A fiti foe dati-ede taki den kari na getrow èn koni srafoe so srefi na kanari foe Gado foe abi komunikâsi. Na srafoe foe en sei e gi oenoe deki-ati foe de komunikâsiman. A de so, taki ini na fosi uitgave foe Zion’s Watch Tower and Herald of Christ’s Presence na rai ben gi na en leisiman: „Efoe joe abi wan birti ofoe mati di joe e denki taki a abi belangstelling ini ofoe e njan boen foe den leri ini a [tijdschrift] disi, joe kan tjari disi na ondro den prakseri; èn a so fasi e preiki na Wortoe èn e doe boen na ala sma te o fara joe abi na okasi.”

16. San e sori taki moro de fanowdoe gi Gado leki soso a Bijbel foe abi komunikâsi nanga boen bakapisi nanga en dienstknekti di de na grontapoe?

¹⁶ Ma, soso foe abi pasi go na a Wortoe foe Gado èn e leisi en joesrefi, no de nofo foe kisi na soifri sabi di e poti wan sma na tapoe a pasi foe libi. Memre na Etiopia heiman foe na oso foe kownoe, di ben e leisi a profeititori foe Jesaja ma no ben froestan san a ben e leisi. Filipus na evangeliumpreikiman ben tjari a profeititori kon a krin gi en, èn baka dati a man ben de klariklari foe teki dopoe leki wan disipel foe Jesus (Tori foe den Apostel 8:27-38). Taki moro de fanowdoe leki soso foe leisi a bijbel joesrefi, wi kan si na ini Efeisesma 4:11-13, pe Paulus e sori taki Krestes no gi soso sonwan, leki apostel nanga profeiti di abi Gado jeje, ma so toe ben gi „sonwan leki evangeliumpreikiman, sonwan leki herder nanga leriman, nanga ai tapoe a tjari kon boen baka foe den santawan, foe doe a diniwroko, foe bow na skin foe na Krestes, te leki wi alamala kon de wán ini a bribi nanga ini a soifri sabi foe a Manpikin foe Gado, te doro wan bigisma.”

17. Nanga sortoe marki di meki wi kon sabi wan sani wi kan herken na wrokosani di Jehovah e gebroiki ini a ten disi foe komunikâsi en prakseri go na a libisma famiri?

¹⁷ Fa wi kan kon sabi den wan di Jehovah Gado nanga Jesus e gebroiki foe jepi sma di e tron kresten foe kan doro na presi foe wan bigisma? Akroederi san Jesus taki, dan wan foe den marki foe kon sabi den sma disi, ben sa de taki den disi sa lobi makandra neleki fa Jesus ben lobi en bakaman (Johanes 13:34, 35). Wan tra marki foe kon sabi den: Den no ben sa de wan pisi foe a grontapoe, neleki fa Jesus no ben de wan pisi foe a grontapoe (Johanes 15:19; 17:16). Wan tra marki ben sa de taki den ben o erken a Wortoe foe Gado leki waarheid, neleki fa Jesus ben doe, èn ala ten e gebroiki dati leki a waarheid (Mateus 22:29; Johanes 17:17). Poti Gado nen na fesi so leki fa Jesus ben doe, ben o de so toe wan marki (Mateus 6:9; 17:6). Èn ete wan marki ben sa de foe waka baka na eksempel foe Jesus foe preiki a Kownoekondre foe Gado (Mateus 4:17; 24:14). Soso wan groepoe de di e doro den marki disi, dati na den internationaal komunikâsiman di sma sabi leki den kresten Kotoigi foe Jehovah.

18. Sortoe dri kontren foe komunikâsi den tra artikel sa taki foe en?

¹⁸ Ma, komunikâsi wani taki toe foe abi frantiwortoe na trawan. Kresten abi na frantiwortoe foe abi komunikâsi ma nanga soema? Na a gron foe a tori, dri kontren de di kresten moesoe broko den ede foe hori den komunikâsilin opo: na osofamiri, na kresten gemeente èn na kresten diniwroko. Den artikel di e kon sa go foe den penti disi foe a tori di wi e taki foe en.

[Foetoewortoe]

Fa joe ben sa piki?

◻ Sortoe takroe bakapisi wan mankeri foe komunikâsi kan tjari kon?

◻ Soema na den toe moro prenspari komunikâsiman?

◻ Sortoe difrenti fasi Jehovah ben gebroiki foe abi komunikâsi nanga libisma?

◻ Fa Jesus ben gi wan toemoesi boen eksempel leki wan komunikâsiman?

◻ Sortoe boen bakapisi den fosi kresten ben abi ini na abi foe komunikâsi?

[Prenki na tapoe bladzijde 10]

Leki en hemel Tata, Jesus ben de wan sari-ati komunikâsiman