Komunikâsi ini na kresten diniwroko

„Go foe dati-ede èn meki disipel foe sma foe ala nâsi.” — MATEUS 28:19.

1. Sortoe odroe di Krestes ben gi e sori na fanowdoe foe abi komunikâsi?

NA ORDROE foe Jesus di skrifi djaso a tapoesei, e poti wi na fesi na tjalensi foe abi komunikâsi nanga sma ini wi diniwroko te wi e go oso-foe-oso, e meki go-baka èn e teki prati ini ala tra pisi foe a Kownoekondre preiki. Na ordroe dati abi na ini toe na frantiwortoe foe meki sma kon sabi na waarheid di e go foe Jehovah Gado, Jesus Krestes èn na Messiaans Kownoekondre pe Jesus e tiri now na ini. — Mateus 25:31-33.

2. San wi abi fanowdoe foe abi komunikâsi di e doro en marki?

² Fa wi kan abi komunikâsi na wan fasi di e doro en marki? Na a fosi presi wi moesoe bribi den tori di wi e meki sma kon sabi. Nanga tra wortoe, wi moesoe abi wan tranga bribi taki Jehovah na a wán troe Gado, taki na bijbel de troetroe Gado Wortoe èn taki Gado Kownoekondre de na wan enkri howpoe gi na libisma famiri. Na a fasi dati, san wi e leri sma sa komoto foe wi ati, èn wi sa e poti prakseri na a rai foe Paulus di a gi Timoteus: „Doe ala moeiti foe presenteri joesrefi na Gado foe a feni joe boen, leki wan wrokoman di no abi foe sjen foe noti, di e handri na wortoe foe waarheid na a joisti fasi.” — 2 Timoteus 2:15.

Komunikâsi sondro foe gebroiki wortoe

3-5. (a) Fa wi kan abi komunikâsi sondro foe taki srefi wan wortoe? (b) Sortoe ondrofenitori e sori disi?

³ Komunikâsi foeroe tron abi foe doe nanga wortoe. Ma, foe taki en leti, wi abi komunikâsi nanga sma srefi bifo wi taki nanga den. Fa so? Nanga a fasi fa wi e tjari wisrefi èn fa wi e weri krosi èn e drès. Foeroe jari pasa kaba wan zendeling, di ben kisi en papira foe na Waktitoren-Bijbelskoro Gilead, ben e rèis nanga wan sipi go na a dorosei kondre pe den ben seni en foe wroko. Baka wan toe dei na tapoe se, wan freimdesma ben aksi en foe san-ede a ben de so tra fasi leki ala tra sma na tapoe a sipi. Na zendeling ben komunikâsi wan aparti sani go na sma soso nanga a fasi fa a ben tan na dorosei èn ben tjari ensrefi — dati a ben abi tra markitiki èn dati sma ben kan go na en. Disi ben opo wan toemoesi moi okasi gi na zendeling foe gi kotoigi.

⁴ So srefi, wan sisa, di ben tanapoe tapoe strati e pristeri bijbel lektuur na sma di ben e waka pasa, ben loekoe wan oemasma di ben waka krosibei foe en nanga wan switi lafoe fesi. Na oema disi ben bigin foe saka na trapoe di ben go na wan halte foe a trein di e rèi na ondro gron. Ne a ben kenki en prakseri, ben waka go baka na a sisa, èn ben aksi foe kisi wan oso-bijbelstudie. San ben naki en ati? Ala di a sisa no ben pristeri en bijbel lektuur, tokoe a ben kisi wan switi lafoe fesi foe si foe na Kotoigi di ben e doe strati-wroko.

⁵ Wan di foe dri eksempel: Wan groepoe foe jongoe Kotoigi ben njan ini wan restaurant èn den ben kisi wan onfroewakti prisiri di wan freimdesma ben kon na den tafra èn ben pai gi na njanjan foe den. Foe san-ede a ben doe dati? A fasi fa den ben tjari densrefi ben naki en ati. Sondro foe den jongoe krestensma disi taki wan wortoe nanga a freimdesma, den ben komunikâsi go taki den ben de sma di e frede Gado. A de krin taki nanga a fasi fa wi e tjari wisrefi, a fasi fa wi e tan na dorosei èn switifasi wi abi komunikâsi srefi bifo wi e taki wan wortoe. — Teki gersi 1 Petrus 3:1, 2.

Taki-go-taki-kon de toemoesi prenspari gi komunikâsi

6. Sori fa taki-go-taki-kon abi toemoesi foeroe waarde gi komunikâsi.

⁶ Foe abi komunikâsi nanga sma nanga mofo ini a tori foe na boen njoensoe dan wi moesoe sreka wisrefi, no foe wi wawan e taki nomo, ma foe taki-go-taki-kon nanga den. Wi e leisi foeroe tron baka taki Paulus ben taki-go-taki-kon nanga den wan di a ben proeberi foe prati na boen njoensoe nanga den (Tori foe den Apostel 17:2, 17; 18:19). Fa wi kan waka baka na eksempel foe en? We, grontapoe situwâsi di e kon moro ogri kande ben meki son sma tweifri taki wan almakti èn lobi Gado de di e sorgoe gi na libisma famiri. Ma wi ben sa kan taki-go-taki-kon nanga den taki Gado abi wan ten gi ala sani (Preikiman 3:1-8). So boen Galasiasma 4:4 e taki dati di na joisti ten foe Gado ben kon, a ben seni en manpikin go na grontapoe. Disi ben de doesoendoesoen jari baka na fosi leisi di a ben pramisi foe doe disi. Na a srefi fasi te en joisti ten doro, a sa tjari wan kaba kon na pina èn ogridoe. Boiti dati, Gado Wortoe e sori taki Gado abi reide di e dwengi en foe gi pasi foe ogridoe tan so langa. (Teki gersi Exodus 9:16.) Foe taki-go-taki-kon na a fasi disi èn foe horibaka gi na taki-go-taki-kon dati nanga jepi foe agersitori èn krakti bijbel boeweisi, sa jepi opregti sma foe kon froestan taki sma no kan gebroiki na panja di ogridoe panja na alape leki wan boeweisi taki Jehovah no de noso no e sorgoe. — Romesma 9:14-18.

7, 8. Fa taki-go-taki-kon ben kan jepi wi foe abi komunikâsi nanga wan orthodox djoe (wan djoe di e hori steifi na a leri foe en kerki)?

⁷ Kon meki wi taki, dati ala di joe e go oso-foe-oso wan ososma e taigi joe: „Mi na wan djoe. Mi no abi belangstelling.” Fa joe ben sa kan piki? Wan brada e froeteri, taki a ben abi boen bakapisi te a taki na a fasi disi nanga den sma: ’Mi de seiker taki joe sa agri nanga mi taki Moses ben de wan foe den moro bigi profeiti di Gado ben gebroiki oiti. Èn joe ben sabi taki a ben taki, so leki fa a skrifi na ini Deuteronomium 31:29: „Mi sabi heri boen taki baka te mi dede joe sa . . . drai komoto foe na pasi di mi ben komanderi joe; èn rampoe sa miti joe seiker”? Moses ben de wan troe profeiti, foe dati-ede den wortoe foe en ben moesoe kon troe. A ben kan de taki den ben kon troe di Gado ben seni na Messias kon na den djoe èn dati de na reide foe san-ede den djoe no ben teki en? Dati ben kan de so. We efoe disi de so èn den ben meki wan fowtoe, dan dati de wan reide foe san-ede joe nanga mi moesoe meki na srefi fowtoe?’

⁸ Prakseri toe taki den djoe ben pina foeroe ini den anoe foe na krestenheid, spesroetoe ini na jarihondro disi. So boen kande joe ben sa wani froeteri na ososma taki wi no ben teki prati ini dati. Foe eksempel, kande joe ben sa wani taki: ’Joe ben sabi taki di Hitler ben de na makti, Jehovah Kotoigi no ben teki prati na a boycot (skotoe) di a ben boycot den djoe? Den ben weigri srefi foe taki na odi foe Hitler èn foe dini ini na legre foe en.’a

9, 10. Fa taki-go-taki-kon ben kan gebroiki foe jepi wan sma di e bribi ini helfaja?

⁹ Te joe e proeberi foe abi komunikâsi nanga wan sma di e bribi ini helfaja, joe ben sa kan taki-go-taki-kon taki efoe wan sma moesoe pina foe têgo ini hel, a moesoe abi wan sili di no e dede. Na sma di e bribi ini helfaja sa agri makriki nanga dati. Dan joe kan taki foe na tori foe na meki foe Adam èn Efa èn kan aksi na wan switi fasi efoe oiti a ben si ini den tori dati taki den e taki foe so wan sili di no e dede. Te joe e go moro fara nanga a taki-go-taki-kon foe joe, joe ben sa kan poti en prakseri tapoe Genesis 2:7, pe na bijbel e froeteri wi taki Adam ben tron wan sili. Èn loekoe san Gado ben taki ben sa de na bakapisi foe na sondoe foe Adam: „Ini na sweti foe joe fesi joe sa njan brede, te leki joe drai go baka na a gron, bika foe drape den ben teki joe poeroe. Bika doti joe de èn na doti joe sa drai go baka” (Genesis 3:19). So boen Adam na sili ben go baka na a doti.

¹⁰ Joe ben sa kan poti na sma prakseri so srefi tapoe a troe tori taki na no wan presi ini a Genesis tori, Gado e taki foe têgo pina na ini helfaja. Di Gado ben warskow Adam foe no njan foe na froktoe di a ben tapoe en foe njan, a ben taki: „Na a dei di joe sa njan foe dati, joe sa dede nomonomo” (Genesis 2:17). Noti no ben taki foe helfaja! Efoe na troetroe bakapisi foe sondoe ben sa de têgo pina gi Adam, na presi foe dede, ’drai go baka na a doti’, dan ini ala geregteghèit Gado no ben moesoe tjari disi kon a krin? So boen voorzichtig èn switi taki-go-taki-kon kan jepi wan opregti sma foe si den sani foe en bribi di no e kroederi nanga makandra. Meki noiti wi loekoe pasa na prensparifasi foe wroko tapoe a froestan te wi e prati na waarheid foe Gado Wortoe nanga trawan. — Teki gersi 2 Timoteus 2:24-26; 1 Johanes 4:8, 16.

Eigifasi di de fanowdoe gi komunikâsi di e doro en marki

11-13. Sortoe kresten eigifasi kan jepi wi foe abi komunikâsi di e doro en marki?

¹¹ Sortoe eigifasi wi moesoe kweki foe komunikâsi Kownoekondre waarheid di e doro a marki? We, san na eksempel foe Jesus e froeteri wi? Na ini Mateus 11:28-30 wi e leisi en wortoe: „Kon na mi, oen alamala di e wroko tranga èn di abi hebi lai, èn mi sa kowroe oen ati. Teki mi tjatjari na oen tapoe èn leri foe mi, bika mi abi safri-atifasi èn sakafasi foe ati, èn oenoe sa feni kowroe-ati gi oen sili. Bika mi tjatjari safoe èn mi lai lekti.” Drape wi e si wán foe den sroto foe den boen bakapisi di Jesus ben abi ini a abi foe komunikâsi nanga sma. A ben abi safri-atifasi èn sakafasi foe ati. Reti-ati sma ben feni taki a ben kowroe den ati. Na apostel Paulus so srefi ben gi wan toemoesi moi eksempel, bikasi, neleki fa a ben froeteri den owroeman na ini Efeise, taki foe sensi na fosi dei di a ben kon na den, a ben wroko leki wan srafoe gi Masra „nanga na moro bigi sakafasi foe jeje.” — Tori foe den Apostel 20:19.

¹² Efoe ala ten wi e sori bescheidenfasi nanga sakafasi foe jeje, dan trawan sa feni taki wi toe e kowroe den ati, èn a sa de moro makriki gi wi foe abi komunikâsi nanga den. Iniwan tra fasi foe doe kande sa poti wan skotoe a mindri wi èn den wan di wi e proeberi foe abi komunikâsi nanga den. Foe troe, „koni de na den bescheidenwan.” — Odo 11:2.

¹³ Foe wi prati tori na wan fasi di e doro en marki, dan wi so srefi moesoe abi pasensi nanga takt. Na apostel Paulus seiker ben abi takt di a ben gi kotoigi na den filosoofman di ben kon makandra na fesi en na tapoe na hei presi di den kari Mars. A ben presenteri na boen njoensoe na wan fasi di den ben kan froestan (Tori foe den Apostel 17:18, 22-31). Efoe wi winsi foe abi komunikâsi nanga wi arkiman, nanga boen bakapisi, dan wi moesoe poti prakseri na a rai di na apostel Paulus ben gi na den Kolosesma di a ben taki: „Meki na takimakandra foe oenoe de ala ten switi, èn noiti sondro sowtoe; studeri loekoe a moro boen fasi foe taki nanga ibri sma di joe e miti” (Kolosesma 4:6, The New English Bible). Wi taki alaten moesoe abi boen tesi. Na sortoe taki dati moro foeroe sa opo den froestan foe wi arkiman, ala di taki di no sori koni sa meki den tapoe den froestan.

14. Fa wan takimakandra sondro foe de spanspan, kan jepi wi foe abi komunikâsi nanga tra sma?

¹⁴ Wi wani ala ten foe den si taki wi no de spanspan. Disi e jepi foe meki wi arkiman firi ensrefi switi. No de spanspan wani taki toe foe wi no wani e taki wi wawan na heri ten. Na presi foe dati, nanga wan fasi sondro taki wi e hasti èn aksi di poti na wan switi fasi, wi e gi wi arkiman na okasi foe taki san den e denki. Spesroetoe te wi e gi okasi-kotoigi a de wan koni sani foe gi na tra sma deki-ati foe taki. Na so wan Kotoigi ben si wan leisi taki a ben sidon na ini wan opolani sei wan lomsoe priester. Moro leki wan joeroe langa na Kotoigi ben tan aksi na priester aksi nanga takt, èn na priester ben taki moro foeroe di a ben e gi piki. Ma na a ten di den ben prati, na priester ben teki difrenti bijbel poeblikâsi. So wan pasensi fasi foe bigin wan taki nanga sma sa jepi wi foe kweki ete wan tra eigifasi di de fanowdoe, namkoe empathie.

15, 16. Fa empathie kan jepi wi foe abi komunikâsi nanga sma?

¹⁵ Empathie wani taki foe poti wisrefi ini na presi foe trawan, foe taki en so. Na apostel Paulus ben warderi na fanowdoe foe empathie dorodoro so leki fa sma kan si foe san a ben skrifi gi den Korentesma: „Ala di mi de fri foe ala sma, tokoe mi meki misrefi de a srafoe foe ala sma, foe mi kan wini moro foeroe sma. Èn na so gi den djoesma mi ben tron leki wan djoe, foe mi kan wini djoesma; gi den wan di de ondro na wet, mi ben tron leki mi de ondro na wet, ala di misrefi no de ondro na wet, foe mi kan wini den di de ondro na wet. Gi den wan sondro wet, mi ben tron leki mi de sondro wet, ala di mi no de sondro wet na fesi foe Gado, ma ondro na wet foe Krestes, foe wini den di de sondro wet. Gi den swakiwan mi ben kon swaki, foe wini swakiwan. Mi ben tron gi ala sortoe foe sma ala sani soso foe froeloesoe wan toe.” — 1 Korentesma 9:19-22.

¹⁶ Foe waka baka na apostel Paulus ini disi, wi moesoe abi takt, abi na koni foe si sani èn man foe loekoe sani boen. Empathie sa jepi wi foe komunikâsi na waarheid go na wi arkiman akroederi na fasi fa den e denki èn e firi. Na poeblikâsi Taki-go-taki-kon nanga jepi foe den Boekoe e gi foeroe jepi ini a tori disi. Abi en ala ten nanga joe ini na diniwroko.

Lobi — wan jepi ini komunikâsi

17. Sortoe wan foe ala den kresten eigifasi de na moro prenspariwan foe meki sma kon sabi na waarheid di e doro en marki, èn fa sma e sori na eigifasi disi?

¹⁷ Bescheidenfasi, sakafasi foe jeje, pasensi nanga empathie de toemoesi prenspari foe abi komunikâsi, di e doro en marki, èn pe a e go foe a prati foe tori. Ma a tapoe foe ala sani, dan lobi di no e soekoe en eigi wini sa jepi wi foe abi boen bakapisi ini a doro foe na ati foe trawan. Jesus ben firi sari gi den sma bikasi den „ben piri den skin poeroe èn panja den leki skapoe sondro herder.” Lobi ben meki Jesus taki: „Kon na mi, oen alamala di e wroko tranga èn di abi hebi lai, mi sa kowroe oen ati” (Mateus 9:36; 11:28). A de foe di wi lobi den meki wi wani foe kowroe sma ati toe èn jepi den foe kon na tapoe a pasi foe libi. Wi boskopoe na wan boskopoe foe lobi, so boen meki wi tan froeteri en na wan lobi fasi. Na lobi disi e sori ensrefi nanga jepi foe wan switi lafoe fesi, nanga jepi foe switifasi èn safoefasi, nanga jepi foe prisirifasi èn waranfasi.

18. Fa wi kan waka baka Paulus neleki fa a ben waka baka na Meester?

¹⁸ Ini a tori disi na apostel Paulus ben de wan sma di na wan toemoesi boen fasi ben waka baka en Masra, Jesus Krestes. Foe san-ede a ben abi so foeroe boen bakapisi ini a opo foe gemeente a wan baka a trawan? Foe di a ben de nanga faja? Ija. Ma so srefi foe na lobi ede di a ben sori. Loekoe den sani di a ben taki di e sori en lobi gi na njoen gemeente na ini Tesalonika: „Wi ben sori switifasi na oen mindri, neleki te wan mama di e gi en pikin bobi e boboi en eigi pikin. Foe di wi abi safoe lobi gi oenoe meki wi ben gi oenoe nanga prisiri no wawan na boen njoensoe foe Gado, ma so srefi wi eigi sili, bikasi oenoe ben tron wan sani foe lobi gi wi.” Foe waka baka Paulus sa jepi wi ini den moeiti foe wi foe abi komunikâsi nanga sma. — 1 Tesalonikasma 2:7, 8.

19. Foe san-ede wi no moesoe meki gebied pe sma no e doe wan sani tapoe wi boskopoe meki wi lasi-ati?

¹⁹ Efoe wi ben doe san wi kan foe abi komunikâsi nanga sma èn wi e misi foe kisi den bakapisi di wi e winsi, dan wi moesoe lasi-ati? Kwetikweti. Den Bijbel Studenti (so leki fa den ben kari den Kotoigi foe Jehovah fositen) ben gwenti foe taki dati efoe sma wani teki na waarheid den moesoe abi dri eigifasi. Den moesoe de eerlijk, abi sakafasi, èn abi angri. Wi no kan froewakti taki sma di no de opregti, no de eerlijk, sa teki na wan boen fasi na waarheid; so srefi wi no kan froewakti taki asranti sma noso sma di abi bigi-memre sa arki na boen njoensoe. Moro fara, srefi efoe wan sma abi wan seiker marki foe eerlijkfasi èn sakafasi, dan tokoe kande a no de so, taki a sa teki na waarheid efoe a no abi angri na jeje fasi.

20. Foe san-ede wi kan taki ala ten dati den moeiti foe wi no ben de foe soso?

²⁰ Sondro tweifri foeroe sma di joe e miti na ini joe gebied sa misi wan noso moro foe den dri eigifasi disi. Na profeiti Jeremia ben abi na srefi ondrofeni (Jeremia 1:17-19; teki gersi Mateus 5:3). Tokoe den moeiti foe wi noiti de foe soso. Foe san-ede? Bikasi wi e bariwroko gi Jehovah nen èn Kownoekondre. Nanga jepi foe na preiki foe wi èn a de di wi de drape, wi e warskow den ogrisma (Esekièl 33:33). Èn no frigiti noiti taki nanga jepi foe den moeiti foe komunikâsi waarheid gi trawan, wi e kisi winimarki gi wisrefi (1 Timoteus 4:16). Wi e hori wi bribi tranga nanga wi Kownoekondre howpoe libilibi. Moro fara, wi e hori wi soifri-retifasi èn na so fasi e teki prati ini a santa di wi moesoe santa Jehovah Gado nen, san e meki en ati prisiri. — Odo 27:11.

21. San wi kan taki foe taki a tori foe a studie sjatoe baka?

²¹ Foe taki en sjatoe: Komunikâsi na a prati foe tori, nanga boen bakapisi. Na koni foe abi komunikâsi prenspari troetroe, èn foeroe ogri de na bakapisi te na komunikâsi a mindri sma e kon troeboe. Wi ben si taki Jehovah Gado nanga Jesus Krestes de den moro boen komunikâsiman èn taki Jesus Krestes ben poti wan komunikâsikanari ini wi ten. Wi ben si so srefi taki nanga a fasi fa wi e drès èn a fasi fa wi e tjari wi srefi, wi abi komunikâsi, e seni boskopoe go na tra sma. Wi ben leri taki foe taki-go-taki-kon e prei wan prenspari ròl ini a proeberi di wi e proeberi foe abi komunikâsi nanga sma èn taki foe abi komunikâsi di e doro en marki wi moesoe de bescheiden èn de nanga sakafasi, moesoe sori empathie, moesoe kweki pasensi, èn a tapoe foe ala sani wan ati foeroe nanga lobi moesoe poesoe wi. Efoe wi e kweki den eigifasi disi èn e waka baka bijbel eksempel, dan wi sa de kresten komunikâsiman di abi boen bakapisi. — Romesma 12:8-11.

[Foetoewortoe]

Fa joe ben sa piki?

◻ Fa komunikâsi e bigin srefi bifo wan wortoe ben taki?

◻ San na wan toe eksempel foe komunikâsi nanga jepi foe taki-go-taki-kon di e doro en marki?

◻ Sortoe eigifasi ben meki Jesus Krestes nanga Paulus man foe abi komunikâsi di e doro en marki?

◻ Foe san-ede wi no moesoe lasi-ati efoe den bakapisi no e kon esi-esi?