De wan sma di sabi taki nanga trawan!
1 Wi musu taki nanga trawan fu man du a preikiwroko èn fu man meki disipel (Mat. 24:14; 28:19, 20). A kan de wan tyalensi fu taki nanga trawan, srefi efu wi musu taki nanga mati. San kan yepi wi fu tyari a bun nyunsu gi freimdesma?
2 Yepi na ososma fu si yu leki wan mati èn no leki wan freimdesma: Pruberi fu poti yusrefi na ini a presi fu den sma di yu e miti na ini a preikiwroko. Wi kan frustan taki ini a grontapu fu tide son sma no e frutrow freimdesma; iya, den e frede den sma dati srefi. Disi kan meki taki wi no man taki bun nanga den. Fa yu kan yepi den sma di yu miti a fosi leisi fu no frede yu? Srefi bifo wi e bigin taki nanga trawan, dan den e si kaba taki wi na sma di e tyari densrefi na wan bescheiden fasi. Te wi e weri krosi di fiti, èn te a sma e si taki wi e tyari wisrefi na wan lespeki fasi, dan dati sa meki taki a no e frede moro.—1 Tim. 2:9, 10.
3 Wan tra sani di e yepi fu man taki bun nanga sma na fu taki na wan prisiri èn na wan switi fasi. Disi e meki trawan firi bun èn a sa de moro makriki gi den fu arki san wi abi fu taki. Wi musu sreka wisrefi bun fu man du disi. Te wi abi bun na prakseri san wi o taki, dan dati sa meki wi no senwesenwe so. Te wi de sondro broko-ede, dan dati kan meki taki sma wani arki a boskopu fu wi. Wan uma ben taki a sani disi fu wan fisiti di a ben kisi fu wan Kotoigi: „San mi man memre fu a lafufesi fu en na taki a ben de sondro broko-ede. Mi ben wani sabi moro.” Disi ben meki taki na uma ben wani arki a bun nyunsu.
4 Bun maniri di e meki sma arki wi: Wi musu teki ten fu luku fa a e go trutru nanga trawan (Fil. 2:4). Wan fasi fa wi kan du disi na fu sorgu taki wi no e taki doronomo sondro fu gi a tra sma na okasi fu taki wan sani tu. Fu taki en leti, te wi sabi taki nanga sma, dan wi musu arki tu san den e taki. Te wi aksi den sma di e arki wi san den e denki fu wan tori èn wi e arki san den abi fu taki, dan den e firi taki wi e broko wi ede nanga den. Sobun, te den sma di e arki yu e taki, dan yu no musu de tumusi gaw fu go baka na a pristeri di yu ben sreka na fesi. Yu musu prèise den sma trutru te den e taki bun sani èn yu musu pruberi fu taki go doro fu den sani di den tyari kon na fesi. Efu den e taki fu sani san de tapu den ati, dan yu musu fiti a pristeri fu yu so taki yu kan taki fu a tori di e gi den broko-ede.
5 Bescheidenfasi nanga sakafasi na tu sani di e yepi wi fu man taki bun nanga trawan (Odo 11:2; Tori. 20:19). Sma ben e go na Yesus bika a ben abi „safrifasi nanga sakafasi” (Mat. 11:29). Na a tra sei, bigifasi e meki sma drai den baka gi wi. Sobun, aladi wi abi na overtoigi taki wi abi a waarheid, toku wi e handri nanga koni te wi no e taki na wan fasi di e sori leki wi sabi ala sani moro bun leki den.
6 Ma fa a de efu den piki fu a sma e sori taki a e bribi sani di no e kruderi nanga Bijbel leri? Wi abi a plekti fu yepi en fu frustan en moro bun? Iya, te fu kaba wi musu du dati, ma wi no abi fu pruberi fu du dati te wi miti a sma a fosi leisi. Furu tron a abi moro winimarki te wi e taki fu sani di wi nanga na arkiman e si na a srefi fasi, bifo wi e taki nanga en fu Bijbel leri di a kan feni moro muilek fu bribi. Pasensi nanga switifasi de fanowdu fu du disi. Paulus ben gi wan moi eksempre ini a tori disi, di a ben gi kotoigi na den krutubakra fu a moro prenspari krutu-oso fu Areopagus, na ini Grikikondre.—Tori. 17:18, 22-31.
7 A moro prenspari sani di de fanowdu fu man taki bun nanga trawan na fu sori lobi, sondro fu prakseri wisrefi nomo. Neleki Yesus wi musu firi sari nanga sma di ’kisi kwinsi èn den ben e waka bruyabruya leki skapu sondro skapuman’ (Mat. 9:36). Disi e meki taki wi wani tyari a bun nyunsu gi den èn wi wani yepi den sma fu waka na tapu a pasi fu libi. A nyunsu di wi e preiki na wan boskopu fu lobi, dati meki wi musu tan preiki dati na wan lobi-ati fasi. Te wi e du dati, dan wi sa waka baka Yehovah Gado nanga Yesus Krestes, den moro prenspari sma fu hemel nanga grontapu di sabi taki moro bun leki ala sma.