Bun Komunikâsi—Wan Sroto gi wan Bun Trowlibi

Na ini 1778, Robert Barron ben poti den reti fu wan sortu mamasroto di a ben meki, na tapu en nen. A sroto ben wroko na tu fasi nanga yepi fu tu pikin bowtu di ben man skoifi na so wan fasi taki a bowtu na ini a mamasroto ben kon lusu, èn te now ete disi de a fondamenti fu den mamasroto di den e gebroiki na ini a ten disi. Gi a mamasroto di a ben meki, wán sroto nomo ben de fanowdu di ben man opo den tu pikin bowtu na ini a mamasroto na a srefi ten.

NA SO A DE TU, taki wan trowlibi sa waka bun te masra nanga wefi e span anu makandra. Wan bun komunikâsi na wan prenspari sani di sa meki taki wi man feni èn ondrofeni a trutru prisiri fu wan bun trowlibi.

San a Wani Taki fu Abi Bun Komunikâsi

San a wani taki fu abi bun komunikâsi? Wan wortubuku e taki dati komunikâsi na „a fruteri di sma e fruteri makandra san den e denki, noso a kenki di den e kenki prakseri, e fruteri fa den e si sani, noso fu sani di den sabi fu di den e taki nanga mofo, e skrifi, noso e sori nanga anu”. Fu dati ede komunikâsi wani taki, a taigi di sma e taigi makandra san den e firi èn san den e denki. Èn wan bun komunikâsi abi fu du nanga sani di e bow sma, di e meki sma firi bun, di bun, di warti fu kisi prèise, èn di e gi trowstu.—Efeisesma 4:29-32; Filipisma 4:8.

Sma kan abi wan bun komunikâsi te den e bribi makandra, den e frutrow makandra, èn den e frustan den firi fu makandra. Den eigifasi disi kan kon te den e si a trowlibi leki wan banti di musu tan den heri libi langa èn te den abi a fasti bosroiti fu meki a trowlibi wroko. Joseph Addison, wan skrifiman fu a di fu 18 yarihondro, ben taki fu so wan banti, èn a ben skrifi: „Tu sma di teki makandra na mindri ala tra sma di de, fu di den ben abi na prakseri fu trowstu makandra èn fu gi makandra prisiri, fruplekti densrefi nanga dati fu abi switifasi, bunfasi, fu du sani nanga koni, fu de klariklari fu gi makandra pardon, fu abi pasensi, èn fu abi prisiri, ala di den e hori den swakifasi nanga den volmaaktifasi fu makandra na prakseri, te na a kaba fu den libi.” ¡So wan trowlibi na wan koloku trowlibi! Èn den eigifasi disi di gersi diriston kan meki a trowlibi fu yu tron wan moi sani, bika yu kan kisi den te yu abi wan bun komunikâsi.

Problema Di E Pori wan Bun Komunikâsi

Moro furu trowpaar e fruwakti someni fu a trowlibi, srefi kefalek furu koloku nanga prisiri. Ma baka wan syatu pisi ten, furu fu den no e firi so koloku moro, èn den no e fruwakti someni moro. Na presi taki den e firi densrefi seiker, den e kisi bita firi gi makandra, soleki bruya, atibron, feantifasi, èn srefi taki den no lobi makandra kwetikweti. Te dati de so, dan a trowlibi e tron wan situwâsi pe den no abi no wan tra fasi leki fu tan na ini nomo ’te leki dede prati den’. So bun, fu meki a bun komunikâsi di de fanowdu gi wan bun trowlibi kon moro bun, noso fu meki dati tan, dan yu musu lusu wan tu fu den problema fosi.

Wan sani di e pori wan bun komunikâsi trutru na a frede di wan sma frede a fasi fa en trowpatna sa handri te a trowpatna kon sabi son sani noso te a sma e taigi en san a wani. Fu eksempre, wan sma kan frede taki en trowpatna no sa wani en moro te a disi yere taki wan seryusu siki e opo ede kon di kan malengri a skin fu a sma. Fa wan sma kan tyari kon na krin gi wan patna taki a fasi fa datra sa dresi en sa kenki krinkrin a fasi fa a gersi noso a man di a man du sani? Dyaso a de trutru fanowdu fu taki eerlijk nanga makandra èn fu sidon prakseri bun fu sani di musu du na ini a ten di o kon. Efu unu e gi makandra a dyaranti nanga wortu taki unu sa tan lobi makandra, èn unu e du furu sani gi makandra nanga lobi dan dati sa sori taki unu e teki notisi fu makandra, a sa yepi fu meki a trowlibi kon tron wan sani di e gi trutru satisfaksi. Na odo disi musu de fu si krin na ini a trowlibi: „Wan trutru mati abi lobi ala ten, èn a de wan brada di en mama meki fu te banawtu de.”—Odo 17:17.

Ete wan sani di e pori bun komunikâsi na te sma e hori makandra na ati. A fiti di sma ben taki dati wan koloku trowlibi na a banti fu tu sma di sabi fu gi makandra pardon. Efu wan trowpaar wani de so, dan den musu du ala muiti fu waka baka a bun rai di na apostel Paulus ben gi: „No meki son dongo ala di yu e atibron ete” (Efeisesma 4:26). Fu teki a rai disi na presi fu tan nanga atibron noso fu hori makandra na ati, dan a de fanowdu fu taki nanga makandra na wan sakafasi. Patna na ini wan bun trowlibi no e tan atibron nanga makandra, no e meki trobi nanga makandra, èn no e hori makandra na ati doronomo (Odo 30:33). Den e pruberi fu de leki Gado, di no e hori sma na ati (Yeremia 3:12). Iya, den e gi makandra pardon trutru.—Mateus 18:35.

Wan sani di seiker e pori ibri sortu komunikâsi, na te patna no e taki nanga makandra moro. Disi wani taki kande dati den e swa den fesi, den e geme, den e du sani soso fu di den musu du en, èn wán fu den e weigri fu taki. Wan trowpatna di e du disi e sori taki wan sani de di no e plisi en. Ma a moro betre te trowpatna e taki fu den firi fu den na wan opregti èn na wan switi fasi so taki a trowlibi e waka moro bun, na presi fu tan tiri èn swa a fesi.

Wan tra problema di sma musu lusu efu den wani abi bun komunikâsi na ini a trowlibi, na a problema taki den no e arki bun noso den no e arki kwetikweti te wan patna e taki. Kande wi weri tumusi noso wi abi tumusi furu fu du fu feni a krakti di de fanowdu na frustan sei èn na emotioneel sei fu arki makandra bun. Trobi kan kon te trowpatna no ben frustan bun nanga sortu sani den ben agri, fu di a wan patna ben denki taki den ben taki krin fu den sani dati, ma a tra patna e taki nomonomo dati na fositron a yere fu den. A de krin, taki den problema disi e kon fu di wan bun komunikâsi no de.

Fa Sma Kan Abi wan Moro Bun Komunikâsi

¡A de tumusi prenspari fu teki a ten gi bun komunikâsi pe lobi de! Son sma e gebroiki someni ten fu luku a libi fu tra sma na tapu telefisi, taki den no abi furu ten gi den eigi libi. Fu dati ede, nofotron a de fanowdu fu kiri a telefisi fu kan abi wan bun komunikâsi.

Ma neleki fa wan yoisti ten de fu taki, na so wan ten de tu fu tan tiri. A koni man ben taki: „Gi ala sani wan fasti ten de, . . . wan ten fu tan tiri èn wan ten fu taki.” Iya, den yoisti wortu musu taki tu. „Wan wortu di taki na a yoisti ten — ¡o bun a de!”, na so wan odo e taki (Preikiman 3:1, 7; Odo 15:23) So bun, luku o ten na a moro bun ten fu taki san yu abi na prakseri, noso fu sori san de na tapu yu ati. Aksi yusrefi: ’¿Mi patna weri noso a de relaks èn a e firi bun? ¿A tori di mi wani taki sa man tyari trobi kon? Sortu wortu di mi ben gebroiki a lasti leisi di wi ben taki fu a tori disi, mi patna no ben lobi?’

A bun fu hori na prakseri taki sma e handri bun te den kan si taki wan sani di yu aksi den fu du noso di den musu agri na dati ben sa bun gi den. Efu patna atibron pikinso nanga makandra, dan wan fu den ben sa wani taki kande: „¡Wan sani e trobi mi, èn wi musu taki fu en nownowde!” A no de fu taki, dati den yoisti wortu e anga fu a situwâsi, ma kande a moro bun fu taki wan sani leki disi: „Gudu, mi denki a tori di wi ben taki fu en kaba èn fa wi ben kan feni wan lusu gi en.” Sortu fasi fu taki, a patna fu yu ben sa lobi moro?

Iya, a fasi fa wan sani e taki, prenspari tumusi. Na apostel Paulus ben skrifi: „Meki a taki fu unu de switi ala ten, a musu abi sowtu leki spesrei” (Kolosesma 4:6). Pruberi fu meki yu sten èn den wortu di yu e gebroiki piki switi. Hori na prakseri taki „switi wortu de wan oni-oso, switi gi a sili èn dresi gi den bonyo”.—Odo 16:24.

Te son trowpaar e wroko makandra na sani di musu du na ini oso, dan den abi wan moi okasi fu abi komunikâsi. Te den e wroko makandra na a fasi dati, dan den sa wani fruteri makandra san den e firi, ala di den e teki a ten fu taki nanga makandra fu bun sani. Gi tra trowpatna, a moro bun fu sidon nanga makandra sondro fu pruberi fu wroko èn a moro bun fu abi wan bun komunikâsi.

Furutron wi kan leri furu te wi e luku fa trowpatna di e fiti makandra bun, abi komunikâsi nanga makandra. Fa den kon sa fara? Kande a wánfasi èn a fri fasi fa den abi komunikâsi nanga makandra kon fu a muiti di den du fu dati, a pasensi èn a hori di den hori makandra na prakseri na wan lobi-ati fasi. Kande densrefi ben musu leri wan lo sani tu, bika bun trowlibi no e kon fu ensrefi so. Fu dati ede a de tumusi prenspari fu hori a fasi fa a trowpatna fu yu e denki na prakseri, èn fu si san en abi fanowdu èn fu gebroiki koni wortu fu wai pasi gi situwâsi di kan tyari trobi kon (Odo 16:23). Fu dati ede efu yu trow, dan du muiti fu de wan sma di trawan e prisiri fu libi nanga en èn di trawan no e feni muilek fu aksi pardon. Dati seiker sa yepi yu fu abi wan bun trowlibi.

Yehovah Gado wani taki sma abi koloku trowlibi di sa tan (Genesis 2:18, 21). Ma a sroto de na ini na anu fu den sma di de ini a trowlibi. Na tu sma di lobi makandra èn di trutru e wroko nanga makandra de fanowdu fu opo a doro di e tyari den go na wan bun trowlibi fu di den sabi fa fu abi bun komunikâsi nanga makandra.

[Prenki na tapu bladzijde 22]

Te sma e kiri a telefisi, dan moro ten sa de fu abi komunikâsi

[Prenki na tapu bladzijde 23]

Bun komunikâsi e yepi fu tai ati kon na wán na ini lobi di e tan