Arki na Jehovah now di a kaba e kon krosbé
„Kolokoe a sma de di e arki mi . . . bika soema feni mi, seker sa feni a libi.” — ODO 8:34, 35.
1, 2. (a) San son sma e taki now aladi na libismafamiri ini a heri historia no ben sabi vrede? (b) Foe sanede troe vrede foe na sé foe den moeiti foe libisma na wan sani di no de mogelek?
ALADI na ini a heri historia, èn spesroetoe na ini na twenti jarhhondro disi, vrede no ben de, tokoe ete son sma e taki dati den natie e teki maatregel foe loesoe den moilijkheid foe den. Den ben sori a tapoe dati den tiriman foe grontapoe e hori top-komakandra foe taki foe vrede èn e sroto difrenti kroederi. Ija, den Verenigde Natie ben kari a jari di psa srefi na „Internationaal jari foe vrede”! Den ben howpoe dati disi boo meki sma si a bigin foe wan extra moeiti di den natie ben doe foe meki vrede go a fesi, nanga kande dati sani waka boen na ini a krosbé ten di boo kon.
2 Ma wan eksempre de foe feni na ini a heri historia toe dati den sortoe moeiti dati ben tjari vrede di e tan? Efoe foe taki en na a fasi foe libisma dati a ben sa kan, dan langaten psa kaba vrede ben moe de — langaten bifo féfi miljard libisma ben de a grontapoe, di prati inimoro leki 160 natie, nanga politiek, ekonomia, nanga kerki filosofie ini doesoendoesoen sortoe. Ma noiti ete vrede ben de; èn noiti vrede sa kon toe nanga den moeiti foe den tiriman foe a grontapoe disi. Foe san-ede? Wan rede de dati den problema foe na libisma-famiri de so serjoesoe dati den no de foe loesoe nanga jepi foe libisma moeti wawan. Soleki fa Jeremia 10:23 e taki: „A no de a wan man di e waka srefi foe poti en foetoe a pasi.”
Foe san-ede libisma moeiti no kan waka boen?
3. Foe sortoe tra rede meki libisma èn natie noiti sa tjari troe vrede kon?
3 Ete wan rede de foe san-ede den moeiti foe libisma nanga natie noiti kan tjari troe vrede. A bijbel e sori a tapoe disi na ini 1 Johannes 5:19, pe tanapoe: „Na heri grontapoe didon na ini a makti foe a goddelowsoewan.” Openbaring 12:9 e sori dati na „goddelowsoewan” de a sma „di den e kari Didibri nanga Satan, di e kori na heri grontapoe pe libisma e libi”. Toe Korinte 4:4 e kari en „na gado foe na seti foe sani disi.” Na heri disi ten seti foe politiek, ekonomia, nanga kerki tiri di ben tjari someni ogridoe kon, de foe datlede na bakapisi foe na tiri foe Satan, no foe na tiri foe Gado. Foe dat’ede 1 Korinte 2:8 e taki, te drape e taki foe a koni di komoto foe Gado: „Na koni disi no wan foe den tiriman disi foe na seti disi foe sani ben kon sabi”. — Lukas 4:5, 6.
4. San ben de na bakapisi dati wi fosi papa nanga mama ben tapoe foe arki Jehovah?
4 Di Satan ben opo ensrefi tege Gado, a ben tjari a fosi papa nanga mama foe wi so fara foe arki na en na presi foe na Gado. Foe dat’ede den ben drifi komoto foe gi jesi na Gado èn ben tjari sowan siksidoesoen jari foe kefarlek moeilekheid kon tapoe na libisma-famiri. A bijbel e ferteri wi krin dati Satan e tjari sma go so fara foe bribi dati den ben sa doe moro boen foe no arki na a Mekiman foe den (Genesis 3:1-5). Ini en koni Jehovah ben meki te nanga a dé foe tide na grontapoe foe libisma ini algemeen go den égi pasi, sondro a tiri foe en. Ini ala den jarhondro dati seker a bewijsi ben gi pasa marki dati libisma tiri na wan sani di no sa waka boen. — Deuteronomium 32:5; Prékiman 8:9.
5. Awinsi vrede ben kan tjari kon nanga den moeiti foe libisma dan nanga san wi ben sa abi foe feti ete nanga den?
5 Di Adam nanga Eva ben tapoe foe arki na Jehovah, na Fonten foe volmaakti libi, dan den ben kon de boiti dati onvolmaakti èn ben dede te foe kaba. Nanga dati ala den bakapikin foe den ben kon gebore onvolmaakti. Siki, owroe dé nanga dede ben tron na lot foe na libisma-famiri (Romeini 5:12). Soboen srefi awinsi den libisma ben sa man foe tjari vrede kon dan ete den no ben kan feni na dresi gi na onvolmaakti fasi di wi ben kisi. Wi ben sa kon siki èn grani te now ete èn dede. Foedi Satan de frantwortoe foe disi, meki Jezus ben taki foe en: „A wan dati ben de wan kiriman di a ben bigin, èn a no ben tanapoe faste na ini a waarheid” (Johannes 8:44). Ija, efoe joe go denki foe den miljardmiljard libisma di ben libi na ini a ten di psa èn di ben dede, dan a de leki Satan ben kiri den alamala.
6. Soema na den sma di e pori vrede, èn san moesoe psa nanga den?
6 Satan ben tjari tra jeje mekisani ooktoe go sofara foe meki oproeroe èn teki a sé foe en, èn ala den goddelowsoe jeje disi ben wégri foe arki te Jehovah ben e taki. Satan, en ogri-jeje na den sma di opo densrefi ben tjari foe dat’ede na grontapoe disi kon ini na toestand foe now. Den alamala moe poeroe na pasi, sodati wan kaba kon na a sari doesoendoesoen jari experiment disi foe onafhankelekheid foe Gado. „Na Gado di e gi vrede”, Romeini 16:20 e djaranti wi, „heri esi sa masi Satan”, makandra nanga en ogri-jeje èn ala libisma di e wégri foe arki te Gado e taki. — Mattéus 25:41.
Now wan moro bigi fanowdoe de foe arki
7. Foe san-ede wi moe doe moro moeiti foe dini Jehovah now?
7 Wi de boen fara na ini na laste pisi foe „den laste dé” disi (2 Timóteus 3:1-5). Foe dat’ede wan moro bigi fanowdoe de foe arki na san Jehovah e taigi wi. Wan srefi fanowdoe de foe wi de moro klarklari ete foe tjari offer kon foe na boen foe en dienst. Foe san-ede wi moe meki den moeiti foe wi kon moro bigi? Foedi Satan sabi dati soso „wan sjatoe pisten” libi gi en (Openbaring 12:12). A sa doe seker moro hebi moeiti foe pori sani.
8. (a) Foe san-ede feanti foe na prékiwroko no kan tapoe a wroko disi? (b) San wi moe doe foe kan hori na jepi foe Gado.
8 Satan spesroetoe nanga ala prisiri ben sa wani meki Jehovah Kotoigi ben sa tapoe foe préki na boen njoensoe foe a Kownoekondre. Ma dati a no man kisi sofara bika Jehovah ben pramisi den: „Nowan enkri wapen di meki tege joe, sa waka boen” (Jesaja 54:17). Den sma di e gens en dienstknegti, „te joe loekoe en boen sa sorgoe dati den e feti nanga Gado” (Tori foe den Apostel 5:38, 39). Foe dat’ede meki na meki bekenti foe na Kownoekondre nanga jepi foe na makti jepi foe Jehovah jeje èn foedi Kristus Jezus èn bigi ipi foe engel e gi ala jepi foe den, meki ibri jari ai kisi moro krakti. Jehovah dienstknegti wani hori na jepi disi foe Gado èn e loekoe foe dati ede boen foe waka baka na rai na ini Jakobus 4:7, 8: „Saka joesrefi foe dat’ede ondro Gado, ma kakafoetoe gi Didibri èn a sa lon komoto foe joe. Go na Gado èn en sa kon na joe.”
9. Foe san-ede wi no moe meki spotoe nanga Satan?
9 No loekoe psa na krakti foe Satan foe kori èn foe doe ogri. A Wortoe foe Gado e warskow wi: „Hori joe prakseri na wan, de nanga ai. Joe gensman Didibri e waka lontoe leki wan krasi lew e soekoe foe swari wan sma. Ma teki joe bosroiti tege en, fasti ini bribi” (1 Petrus 5:8, 9). Efoe joe ben sabi dati wan krasi lew ben e waka ini a birti, dan joe ben sa seti sani a fesi foe kibri joesrefi nanga joe osofamiri. Efoe ai go foe Satan, dan wi moe de moro nanga ai, foedi a kan doe wi ogri foe tego. Ma a sari foe taki dati a moro bigi pisi foe libisma de sondro foe kan feti nanga en foedi den no sabi srefi dati a de. Fa dati doe kon? Foedi den teki a bosroiti foe no arki na a Wortoe foe Jehovah. Èn san sa de bakapisi foe a takroe bosroiti disi? „San wan libisma e sai na dati a sa koti toe.” — Galatia 6:7.
Te den e bari taki: „Vrede nanga sekerfasi!”
10, 11. (a) San wi moe hori na ini prakseri foe a waka boen kande foe sani dati den natie kande kisi ini na moeiti foe den foe tjari vrede kon? (b) Sortoe bijbel profétitori abi foe doe nanga den moeiti di den natie ini wi ten e doe foe seekoe vrede? (c) Olanga sowan vrede di ben sa kan kon sa tan?
10 No meki a waka boen foe sani di den natie kande e abi ini a moeiti, foe den foe tjari vrede kon wini joe. Hori alaten ini prakseri dati Jehovah no e gebroiki nowan enkri organisatie foe na grontapoe disi foe doe dati. Jehovah abi en égi fasi foe tjari troe vrede kon. A e doe disi soso nanga jepi foe en kownoekondre ondro Kristus. Soboen awinsi sortoe marki foe na waka boen foe sani di den natie mag abi ooktoe tapoe kontren foe tjari foe vrede kon, a sa de soso wan vrede di de foe wan sjatoe ten èn noti moro leki wan vernis. Noti sa kenki troetroe. Wi sa abi foe doe ete nanga ogridoe, tranga ogridoe, feti, angri a panja foe oso-famiri hoeroedoe, siki, dede nanga Satan nanga en ogri-jeje te leki Jehovah tjari wan kaba kon na ala den sani disi. „Efoe Jehovah srefi no bow na oso, na foe soso den bowman ben wroko tranga na en.” — Psalm 127:1.
11 Ini wan bijbel profétitori foetroe e sori dati den natie makandra sa doe wan moeiti foe tjari ini na ten disi vrede kon. Ini a profétitori dati tanapoe: „Oen sabi srefi heri boen dati Jehovah dé e kon precies leki wan foefoeroeman na neti. Te den e taki: ’Vrede nanga sekerfasi!’ dan wan wantewante pori ini wan momenti sa kon tapoe den soleki na pen foe wan bere oema, èn kwetkweti den no sa lon komoto” (1 Thessalonika 5:2, 3). Na kari dati foe „Vrede nanga sekerfasi” no wani taki dati wan boen kenki o kon ini na go na baka foe na grontapoe disi. Toe Timotéus 3:13 o e taki dati „goddelowsoeman nanga bedrigiman . . . sa go kon moro ogri”. Na troe foe a tori kan de ete so leki wan president foe wan milieu-organisatie ben taki: „Na mamaproblema foe san na libimakandra tanapoe na en fesi, na dati a tron wan sani di joe no kan tiri moro.”
12. San Johovah dienstknegti sabi foe na troetroe betekenis foe na kari di e kon ini a ten di de a wi fesi foe „Vrede nanga sekerfasi”?
12 Te na kari di o kon na ini a ten di o kon na wi fesi foe „Vrede nanga sekerfasi!” sa de foe jere dan froewakti di de wan soso sani sa kori foeroe sma ini na grontapoe. Ma no den dienstknegti foe Jehovah, bika den e arki te Gado e taki. Foe dat’ede den sabi foe a Wortoe foe Gado dati sowan sani di sa meki bekenti no sa tjari troe vrede nanga sekerfasi kon. Na presi foe dati dan na kari disi sa de foetroe na laste marki dati „wan wantewante pori ini wan momenti sa kon tapoe den”. A sa de wan sani di o meki a bigin bekenti di de foe kon foe na „bigi benawtoe” di Jezus ben taki a fesi gi a ten foe wi. A ben taki: „Bika dan wan bigi benawtoe sa de soleki sensi a bigin foe grontapoe te leki now no ben kon, nono, èn ooktoe no sa kon moro”. — Mattéus 24:21.
13. Fa a bijbel e ferteri foe a kaba foe ala libisma tiri?
13 Na ini a ten foe na „bigi benawtoe” wan kaba sa tjari kon na ala libisma tiri-makti. Ini Psalm 2:2-6 tanapoe: „Den kownoe foe na grontapoe e poti densrefi ini lin èn den hé tiriman srefi ben sori den srefi ini wan blok tege Jehovah èn tege en salfoewan, e taki: ’Meki wi priti den banti foe den èn trowe den tité foe den foe wi!’ Ija, a wan di de sidon ini hemel, sa lafoe; Jehovah srefi sa spotoe den. Ini a ten dati a sa taki ini en atibron nanga den, èn ini en faja atibron a sa naki den nanga broeja, taki: ’Mi, ja mi, ben poti mi kownoe tapoe [na hemel Sion] mi santa bergi.’” Psalm 110:5, 6 e poti disi a tapoe: „Jehovah srefi seker sa naki panja kownoe tapoe a dé foe en atibron. Èn a sa hori kroetoe a mindri den natie.” Ala politiek systema sa kon na wan kaba, bika Jesaja 8:9, 10 e taki: „Tai joe mindri èn de nanga ferwondroe! Tai joe mindri èn de nanga ferwondroe! Meki wan takroe plan èn a sa broko! Taki sortoe wortoe dan ooktoe èn a no sa kon, bika Gado de nanga wi!”
De nanga overtoigi foe tan a lbi
14. Foe san-ede wi abi na overtoigi dati sma sa de di sa psa libilibi a kaba foe a grontapoe disi?
14 Wi abi na faste fertrow dati Jehovah sa ferteri en pipel ala sani sodati den kan teki den joisti maatregel foe kan psa libilibi na „bigi benawtoe” di e kon. Fa wi kan de seker foe dati? Foedi na profètitori foe Openbaring 7:9, 14 e sori dati wan „bigi ipi troetroe sa tan a libi. Foe san-ede? Foedi den e arki te Jehovah e taki èn den kisi na joisti leri. Na sofasi den memre foe na „bigi ipi” kan doe san Openbaring 7:15 e taki: „Den e doe dé nanga neti santa dienst gi en.” Foe dat’ede den di e doe a wani foe Gado, e kisi en boenati èn e kisi kibri foe kan psa libilibi na kaba foe a grontapoe disi. — 1 Johannes 2:15-17.
15. Fa Joël e ferteri foe a makti krinkrin foe a seti disi, èn san sa de na bakapisi foe den dienstknegti foe Gado?
15 Joël 3:13-16 abi ooktoe foe doe nanga a tan a libi foe Gado dienstknegti te na seti disi sa masi leki droifi ini wan winpersbaki. Drape tanapoe: „Poti wan kronnefi na ini, bika na koti foe njanjan kon lepi . . . na persbaki e kon watra troetroe; bika na takroe fasi foe den kon foeroe pasa marki. Bigi ipi, bigi ipi de ini na lagi presi foe na bosroiti, bika na dé foe Jehovah kon krosibé ini na lagipresi foe na bosroiti. Na son èn na moen sreki seker sa kon doengroe èn srefi den stari troetroe sa hori a krin leti foe den a baka. Èn komoto [foe a hemel] Sion Jehovah srefi sa bari . . . Hemel nanga grontapoe seker sa seki, ma Jehovah sa de wan kibripresi gi en pipel.”
16. Foe sortoe tra profétitori e kon na krin dati Jehovah sa kibri en pipel langalanga psa a pori foe a grontapoe?
16 Ini asrefi fasi Jehovah e taigi wi ini Jesaja 26:20, 21 foe a ten di e kon: „Go, mi pipel, go na ini joe inisé kamra, èn sroto na doro na joe baka. Kibri joesrefi foe soso wan momenti, te leki na publiki kroetoe pasa. Bika! Jehovah e kon foe en presi a doro foe aksi frantwortoe foe a sma di e libi ini a kondre foe a sondoe foe en.” Zefanja 2:2, 3 e gi wi tranga foe dat’ede: „Bifo sa kon na tapoe joe na dé foe Jehovah atibron, soekoe Jehovah, ala oen safri-ati sma foe grontapoe, di e doe En kroetoe besroiti. Soekoe regtvaardikifasi, soekoe safri-atifasi. Kande den sa kibri joe tapoe a dé foe Jehovah atibron.”
’Lon go’ na Jehovah
17. (a) San moe doe foe Jehovah kibri wi? (b) Sortoe fowtoe den sma di ben e libi ini a grontapoe bifo a Froedoe ben meki?
17 Ini Odo 18:10 tanapoe: „Na nen foe Jehovah na wan tranga toren. Na dja a regtvaardikisma e lon go na ini èn e kisi kibri.” Joe e „lon go” na Jehovah? Prakseri san Jezus ben taki foe den sma foe Noach dé, „Den ben njan èn den ben dringi, man ben trow èn oema den ben gi ini trow, teleki na dé tapoe san Noach ben go na ini a ark, èn den no ben poti prakseri te leki a froedoe ben kon èn ben figi den alamala poeroe” (Mattéus 24:38, 39). Na fowtoe di den ben meki, ben de dati den ben gi densrefi krinkrin na den aladé sani foe a libi ma no ben e arki na Gado di a ben e taki nanga den nanga jepi foe en dienstknegti Noach, wan prékiman foe regtvaardikifasi” (2 Petrus 2:5). Foedi den no ben arki meki dati den ’alamala ben figi poeroe’ ini na pori, di na Froedoe ben kon.
18. Foe san-ede soso dati foeroe sma di ben e libi bifo a Froedoe ben de „boen sma” no ben ken kibri den foe no kisi pori ini na rampoe disi?
18 Foeroe sma foe den sma di ben dede na ini a Froedoe, ben e si densrefi sondro degedege leki ’boen sma’ foedi den no ben e gi densrefi abra na tranga ogridoe foe san na libimakandra ini den dé dati ben foeroe nanga en. Ma soso foe de „boen” no ben jepi den! Nanga na mi-no-ke fasi foe den den ben taki dati na ogri ini na dé foe den ben boen. A punt di ben sori pe wan sma tanapoe ben de dati den no ben „lon go” na Jehovah; den no ben arki di Gado dienstknegti ben taki. Soboen den no ben teki den joisti maatregel foe tan a libi. Den sma di ben arki, na a tra sé ben tan a libi.
19. Sortoe wondroe blesi Jehovah dienstknegti e kisi now kaba èn foe san-ede?
19 Na ini a ten disi Gado e taki wan boskopoe foe vrede gi den sma di e arki na en. Nanga sortoe bakapisi gi den? Jesaja 54:13 e taki: „Ala den manpikin foe joe sa de sma di Jehovah gi leri, èn a vrede foe joe manpikin sa foeroe psa marki.” Ija, „Jehovah srefi sa blesi en pipel nanga vrede.” (Psalm 29:11). Foe dat’ede a mindri na ogri grontapoe disi joe abi a mindri Jehovah Kotoigi makandra troe vrede di no e brokosaka. Den e prisiri ini wan lobi internationaal bradafasi di no den tiriman foe grontapoe no den borgroe di de foe den natie foe den èn den kerki groepoe foe den ben tan waka na en baka. Foe san-ede? Foedi den no e arki troetroe te Gad e taki. Soboen den no e libi ini akroederi nanga san ai taki. Ma Jehovah Kotoigi e arki wel na Gado. Den e teki den wortoe di skrifi na Prékiman 12:13 serjoesoe na ati: „Frede na troe Gado, èn hori en gebod bika disi na a heri ferplekti foe na libisma.”
20. San ibriwan foe wi moe doe foe psa go libilibi ini Gado njoen grontapoe?
20 Dati ala sma moe doe — ija, ibriwan sma di wani libi ini Gado njoen seti. Den moesoe lon go na Gado sondro draidrai. Ija, den moesoe meki na koni di komoto foe Gado tjari den, èn di na wan agersifasi de leki wan sma di e taki san o kon now: „Arki mi; kolokoe den sma de di e hori mi pasi. Arki mi tranga leri èn kon koni, èn no sori kwetkweti dati joe no e poti prakseri. Kolokoe na sma de di o arki na mi . . . bika a sma di feni mi, seker sa feni a libi.” — Odo 8:32-35.
San joe ben sa piki?
◻ Foe san-ede noiti vrede sa kon nanga den moeiti foe libisma?
◻ Foe san-ede a de moro tranga fanowdoe now foe arki na Jehovah?
◻ San na kari di o kon na a ten di de na oen fesi foe „Vrede nanga sekerfasi!” sa wani taki troetroe?
◻ San wi moe doe te wi wani psa libilibi go ini Gado njoen seti?
[Prenki na tapoe bladzijde 7]
Leki wan krasi lew Satan e meki den moeiti foe en kon moro foeroe, foe pori èn foe broko sani
[Prenki na tapoe bladzijde 8]
Te na seti foe sani disi sa masi leki droifi na ini wan winpersbaki, dan ’Jehovah sa de wan kibripe gi en pipel’