O fara joe de trafasi leki na grontapoe?
„Na fasi foe anbegi di foe na sé foe wi Gado èn Tata de krin èn sondro flaka na disi: . . . foe kibri ensrefi sondro flaka foe na grontapoe.” — JAKOBUS 1:27.
1, 2. Soema ben taki dati kristensma ben sa de tra fasi leki na grontapoe? Foe san-ede meki Jehovah Kotoigi moe froewakti foe de tra fasi leki na grontapoe?
JEZUS ben de a fosiwan di ben taki dati kristensma no moe de wan pisi foe na grontapoe (Joh. 15:19). Èn di na a neti bifo a ben dede a ben begi na en Tata, en discipel ben jere en e taki: „Mi ben gi joe wortoe na den, ma grontapoe no ben wani si den na ai foe di den no de wan pisi foe na grontapoe. soleki mi no de wan pisi foe na grontapoe.” Èn pikinmoro wantronwantron na baka a ben taki ete wantron moro: „Den no de wan pisi foe na grontapoe, soleki mi no de wan pisi foe na grontapoe.” — Joh. 17:14, 16.
2 A moro bigi pisi foe den fasi foe bribi foe na kristenheid no e doe no wan enkri moeiti foe handri akroederi nanga den wortoe disi. Ma Jehovah Kotoigi e ferstan dati kristensma na ini a ten disi no abi no wan tra fasi leki foe hori densrefi aparti foe na grontapoe. Den sabi dati Satan de a tiriman foe na grontapoe disi (Joh. 13:30; 1 Joh. 5:19). Foe de wan pisi foe na grontapoe, wani taki dati wan sma tanapoe na ondro na krakti foe Satan. Jakobus ben gi na warskow: „Ala sma foe dat’ede di wani de wan mati foe grontapoe, e meki ensrefi tron wan féanti foe Gado” (Jak. 4:4). Soboen wi moe froewakti foe de tra fasi.
3. Na ini sortoe fundamenti sani Jehovah Kotoigi e kenki foe den sma di e lontoe den?
3 Ma na ini sortoe fasi Jehovah Kotoigi de tra fasi? Jezus ben taki dati den no ben sa teki kristensma poeroe troetroe foe na grontapoe (Joh. 17:15). Èn foe troe Jehovah Kotoigi e libi a mindri foe den sma foe na grontapoe èn moro foeroe foe den trow èn e kweki wan osofamiri, net leki ibri tra sma. Densrefi moe soekoe ooktoe wroko, kakafoetoe gi a diri foe sani èn pai belasting. Ma tokoe den de trafasi. Na ini wan artikel di ben go foe den na redacteur ben ferklari ini na pisi foe a koranti di e go foe kerkitori na ini wan Amerkan koranti foe san-ede a ben prakseri taki a ben de so. A ben taki: „San e poti den Kotoigi aparti foe a moro bigi pisi foe den sma di e feni fowtoe a den de kande dati na heri libi foe den — fa den e gebroiki den moni èn nanga soema den e pasa den ten — e teki krinkrin abra nanga a overtoigi foe a bribi foe den.” Precies! Jehovah Kotoigi e gi densrefi krinkrin na ini a dini foe Jehovah Gado. Den e bribi troetroe na ini den pramisi foe en na ini na bijbel èn den e teki ala den komando di Gado poti gi den na wan serjoesoe fasi (1 Joh. 5:3). Dati e meki den de tra fasi.
4. Sortoe sani e meki a de moeilek foe kibri joesrefi aparti foe na grontapoe? San wi moe doe foe dat’ede alamala te na ten?
4 Ma a poti densrefi aparti disi no de populair èn ooktoe no de makriki. Na ini na aladé libi foe wi na tranga lostoe de foe de leki tra sma. Moro foeroe foe wi foe nature abi na lostoe foe no kenki foeroe foe tra sma. Te afersi e soetoe ede kon na tapoe pe wi moe sori taki wi de neutraal, dan wan tranga overtoigi de fanowdoe foe de tra fasi èn foe gi jesi na den komando foe Jehovah (Tori. 5:29; 15:28, 29). Foe dat’ede meki a de wan boen sani dati ibri sma persoonlek e ondrosoekoe ensrefi ten na ten foe si fa a de nanga en ini a tori foe na hori ensrefi aparti foe na grontapoe. - 2 Kor. 13:5.
De fajafaja na ini na velddienst
5. (a) San son sma di no de Kotoigi e taki foe na faja di Jehovah Kotoigi e sori na ini na prékiwroko? (b) San de wantoe bijbel gronprakseri di e boewégi Kotoigi foe de fajafaja na ini a wroko disi?
5 Jehovah Kotoigi foe eksempre sma sabi den foe na faja di den abi ini a prékiwroko. Dat meki den de séker tra fasi. Son sma e bewondroe den, ala di trawan e njan den niri foe dati. Zendeling foe wan bepaalde anitri organisaatsi e ferteri dati pe den e go ooktoe na grontapoe den e miti sma foe denpresi pe den e go di de faja Kotoigi foe Jehovah di abi foeroe foe doe! „Taki pikinso foe wan pisten foe situwasi di e feni presi na wan presi nanga pikinmoro ibri. . . zendeling, pe den de ooktoe na grontapoe èn joe sa jere den e kari a nen foe Jehovah Kotoigi”, ben tanapoe na ini wan foe den boekoe foe den. Foe san-ede den Kotoigi foe Jehovah e wroko so tranga na ini a wroko disi? Na rede de dati a préki foe na boen njoensoe de a wani foe Gado èn de wan marki foe kon sabi den troe kristen (Matt. 28:19, 20; Ef. 6:14, 15; Openb. 22:17). Na ini a ten disi na préki foe Jehovah Kotoigi de wan sori na publiki foe na loyaliteit foe den na a kownoekondre foe Gado èn a lostoe foe den foe jepi trawan foe anbegi Jehovah. — Jes. 2:2-4; Matt. 24:14.
6. San de wantoe aksi di wi moe aksi wisrefi foe loekoe fa wi tanapoe nanga na préki foe na boen njoensoe foe na kownoekondre?
6 O prenspari na prékiwroko de gi joe? Moro foeroe sma na ini a grontapoe e feni dati a wroko foe moni foe tan a libi ofoe srefi ontspanning de moro prenspari leki a dini foe Gado ini wan kerki (2 Tim. 3:4; 1 Joh. 2:16). Ma Paulus ben skrifi gi Timóteus: „Poti prakseri doronomo na joe srefi èn na a leri foe joe. Tan na den sani disi, dan te joe e doe disi, dan joe sa jepi joesrefi èn den sma di e arki joe” (1 Tim. 4:16). Joe e prakseri a srefi fasi? Joe e memre ooktoe na warskow foe na apostel Petrus dati joe ’moe hori na de-noja foe na dé foe Jehovah boen na ini prakseri’? (2 Petr. 3:12). Efoe dati de so, dan joe sabi dati na préki foe na boen njoensoe foe na kownoekondre foe Gado de wan tranga fanowdoe afersi. Disi sa tjari joe go sa fara kande foe doe sani di de vreemd gi sma.
7. Sortoe stap foeroe sma ben doe na ini a tori foe na prékiwroko? Foe san-ede?
7 John foe eksempre, wan onderwijzer foe Ghana, ben teki serjoesoe san a bijbel e taki. Èn a so a libi na wroko foe en foe abi moro ten foe ferteri den sma ini a birti foe a kownoekondre. Brian, wan Ingrisi boi ben moe libi na okasi di a ben abi foe go na universiteit (héskoro) foe a ben kan de wan foeroeten prékiman; èn Eve, wan Amerkan meisje, ben tapoe nanga studie foe en na a universiteit baka wantoe semesters foe a srefi réde. Den jongoesma disi ben de onpraktis noso law? Ibri sma di e teki a bijbel serjoesoe, dan san den ben doe te joe e loekoe en boen ben de soso wan sani di de redelek èn logis. Den no ben tjari na toekomst foe den kon na ini kefar. Na presi foe dati den ben jepi dati disi ben kon de séker. Soleki Paulus ben taki, dan a wroko di den ben teki ben wani taki jepi ’gi densrefi èn gi den sma di ben arki den’. — 1 Joh. 4:16.
Wan heri tra libi nanga waka
8. Sortoe bijbel gronprakseei na ini Hebrewsma 1:9 e meki taki Jehovah Kotoigi de tra fasi?
8 Djaso ete wan gronprakseri e kon di e meki kristensma de tra fasi leki na grontapoe: „Joe ben lobi regtvaardikifasi èn kroektoedoe joe no ben wani si na ai” (Hebr. 1:9). Na ini na kontekst den wortoe disi e taki foe Jezus Kristus, ma Jehovah Kotoigi e erken dati den de ooktoe gi kristensma leki markitiki (1 Petr. 2:21). Wi moe lobi den sani di Gado e taki dati den de regtvaardiki èn no wani si na ai den sani di Gado e taki dati den de kroektoedoe.
9. (a) San de wantoe fasi foe „kroektoedoe”? (b) Fa na fasi di wan kristen gemeente e teki na ini a tori foe kroektoedoe kenki foe na fasi foe na grontapoe?
9 Na apostel Paulus e meki kon na fesi na ini den wortoe di e kon san wi moe si leki kroektoedoe. „No hoeroeman, no afkodréman, no soetaman, no man di den e hori gi tégennatuurlek markl, no man di e didon na man, no foefoeroeman, no gridiman. no droengoeman, no bidrigiman sa kisi a kownoekondre foe Gado” (1 Kor. 6:9, 10). Na ini a ten disi na grontapoe e gi pasi na sma foe doe sani srefsrefi, spesroetoe na tapoe a kontren foe moraliteit. Ma wi no kan doe bisnis nanga bijbelgronprakseri. A bijbel e taki dati wan kristen di fadon go ini hoeroedoe na wan lobifasi moe kisi jepi foe go na tapoe wan tra pasi (Gal. 6:1; Jak. 5:19, 20). Efoe a wégri foe doe disi, dan kristensma moe komoto na en pasi. — 1 Kor. 5:9-13.
10. Foe san-ede meki Jehovah Kotoigi moesoe kibri densrefi tége kroektoedoe?
10 Son sma e gi na kragi dati disi de wan sondro lobi ofoe fanatiek fasi foe handri. Den e firi moro gi na moro frifasi foe loekoe sani di de a gwenti na ini a grontapoe. Joe e denki so foe dati toe? Ofoe joe e ferstan dati sowan sortoe doe no de wan mankeri di e sori gi na sondari, ma moro foeroe de wan sori foe tegoe gi den kroektoedoe foe en? Èn joe e froestan dati na kristen gemeente moesoe foe handri so efoe a wani tan kristelek? Jakobus ben taki: „Gi Gado, na Tata, wan troetroe soifri dini foe Gado de: . . . foe no flaka ensrefi nanga na peki foe grontapoe” (Jak. 1:27, Bigi Njoensoe Bijbel). Fa wan groepoe ben sa kan taki taki den abi a troe fasi foe dini Gado efoe den ben sa meki serjoesoe sondoe flaka den?
11. Fa kristen markitiki abi krakti di kristen e gebroiki?
11 Na ’si di wan kristen no wani si takroedoe na ai’ e go moro fara. A bijbel e taki: „Meki den no taki srefi na mindri oenoe foe hoeroedoe nanga ala sortoe doti libi ofoe gridifasi, soleki a e fiti den santawan; ooktoe no wan sjen libifasi, no wan law taktaki, no wan fisti spotoe” (Ef. 5:3, 4). Den kompe foe troetroe kristen e sabi den foe dat’ede leki sma di no e gebroiki dot’taki, no e ferteri fisti spotoe èn no e abi prisiri foe a taki foe den doti sani dati. Wan krin memre èn ati nanga wan krin fasi foe taki, moromoro no e de foe feni.
12. Fa Jehovah Kotoigi de tra fasi leki na grontapoe te a e go foe prisiri?
12 Jehovah Kotoigi de srefi tra fasi te a e kon tapoe amusement prisiri. Foe di na ’heri grontapoe de ini a makti foe na ogriwan’, meki den ben leri foe loekoe boen tapoe na kontren foe prisiri di na grontapoe e pristeri (1 Joh. 5:19). Den e tan farawe srefsrefi foe foeroe pré foe groepoe, tijdschrift, videobanti, film, pokoe nanga TV-show di na inibere foe den de foe ogri jeje ofoe fisti sani ofoe di e poti krakti na tapoe a siki foe doe ogri nanga tra sma tapoe wan takroe fasi. Den e loekoe boen ooktoe nanga sokari „osofamiri prisiri” pe lekti ofoe moreel fri prakseri e tjari kon na fesi, di wan kristen no kan agri nanga den (1 Kor. 15:33). Ibriwan sma di e teki a bijbel serjoesoe, no sa soekoe en ontspanning na ini san den no moe taki foe den srefi a mindri kristen.
13. A e sori dati wi e prakseri sjatoe te wi poti den sortoe skotoe disi gi wisrefi tapoe a kontren foe prisiri? Ferklari disi.
13 Joe e prakseri a srefi fasi? Ofoe joe e feni dati den sortoe prakseri dati e meki Jehovah Kotoigi e denki sjatoe ofoe e skotoe den toemsi? Efoe dati de so, dan prakseri pikinso foe disi: Te sma kon sabi dati wan njanjan sani pori èn den e poeroe en wantronwantron foe den pranga foe den wenkri, dan den klanti no e kragi taki a fri foe den skotoe foe di a no de moro foe bai. Ma presi foe dati den de grantangi taki den kibri den foe no njan sani di kan siki den. Na so Jehovah Kotoigi no e kragi dati a fri foe den e skotoe pikinso te den e kisi foe jere, dati foeroe sani tap a kontren foe prisiri de pori sani. Na kibri disi tége den kefar di fasi na so wan porifasi disi, den e ondrofeni moro foeroe leki wan bigi jepi.
Den lobi makandra
14. Nanga sortoe égifasi soleki Jezus ben taki na kristen gemeenschap boo de heri tra fasi leki na grontapoe lontoe den?
14 Ooktoe disi na wan sani di e sori ofara kristen de aparti foe a grontapoe. Na neti bifo Jezus ben dede a ben taki gi en bakaman: „Nanga disi ala sma sa sabi dati oenoe de mi discipel, ofoe oen abi lobi gi makandra” (Joh. 13:35). Oten lobi ben sa de wan marki gi dorosé sma? Foe di ini algemeen na situwasi de precies so leki Paulus ben taki a fesi: „Den sma sa lobi densrefi, lobi na moni . . ..no sa abi natuurlek lobi” (2 Tim. 3:2, 3). Na ini so wan omgeving èn wan gemeenschap di de na a heri grontapoe foe sma di lobi makandra, ben sa de wan marki di ala sma e si. So wangroepoe foe sma, di de brada de a mindri Jehovah Kotoigi. — 1 Petr. 2:17.
15. San na wantoe situwasi na ini san Jehovah Kotoigi ben abi na okasi foe sori lobi gi makandra?
15 A lobi disi de krin foe si èn e meki nofotron dorosé sma di e loekoe Kotoigi finifini e gi kommentaar, te den e kon makandra tapoe den bigi komakandra foe den. Te rampoe pasa dan Jehovah Kotoigi de es’esi drape foe jepi den brada. Èn na ini na kristen gemeente troe kristensma e sori makandra lobi èn dati den e froestan makandra. Srefi te den fasi foe a sma di den de e toeka nanga makandra, dan den e doe ala moeiti foe ’ferdrage makandra èn foe gi makandra pardon na wan frifasi’. — Kol. 3:12-14.
Den no e meki den stotoe makandra foetoe fadon
16. (a) Sortoe situwasi Paulus ben e taki foe en di ben moe gi den fosi jarhondro kristen wan moi okasi foe sori gi makandra na dipi foe a lobi foe den? (b) Sortoe gronprakseri, di ooktoe na ini a ten disi kan gebroiki foeroe tron, a ben ferklari?
16 Sowan sortoe lobi e meki dati Jehovah Kotoigi ooktoe na wan tra fasi e de tra fasi. Na ini a ten disi foeroe sma e tanapoe tapoe a reti foe den èn e kibri en srefsrefi. Ma na apostel Paulus ben gi wan tra markitiki: „Meki wi feti na baka den sani di e meki vréde kon na fesi èn den sani di de bow makandra” (Rom. 14:19). Foe na kontekst e kon na fesi dati Paulus ben taki dja foe wan problema di ben e de na a ten dati foe na tori toe njanjan. Tra fasi leki den djoe na ondro na Wet foe Mozes, den kristen ben de fri foe njan san den wani solanga den no ben de tap’ala. Son sma di foe sensi jongoeten ben si bepaalde sortoe njanjan leki wan tegoe sani, ben broeja di den ben si dati kompekristen e njan den njanjan disi wel. Den tra kristen dati tokoe ben tanapoe a tapoe den leti foe njan ala san den ben wani? Nono, efoe den ben waka na baka na rai foe Paulus. Den ben taki: „A de boen foe no njan meti, èn no dringi win, ofoe doe wan sani di e meki joe brada stotoe foetoe fadon” (Rom. 14:21). Fa disi ben de wan foeroe nanga lobi rai! Joe kan si fa a rai dati kan jepi wi ooktoe tapoe wantoe tra kontren leki wan tjariman.
17, 18. (a) Fa na gronprakseri na ini Romeini 14:21 kan gebroiki tapoe na afersi foe tranga dringi? (b) Fa a kan gebroiki na ini a tori foe krosi? (c) Sortoe tra kontren joe kan go prakseri tapoe san na gebroiki foe na srefi gronprakseri sa jepi wi foe sori lobi gi makandra?
17 Foe eksempre na bijbel e gi kristen pasi foe gebroiki nanga marki dringi di abi sopi (1 Tim. 3:8; 5:23). Ma son sma e firi sani es’esi tapoe a punt foe tranga dringi. Tra sma no gwenti en ofoe no man nanga en. Efoe joe ben sa de nanga so wan sma tapoe wan prisiri demakandra, joe ben sa proeberi foe tjari en go so fara foe dringi sopi net soleki joe, foe di joe o poti druk a tapoe en ofoe foe meki a kisi sjen? Ofoe joesrefi moro foeroe no ben sa go na ini dringi, foe no tjari en ini moeilekheid?
18 Ete wan eksempre: na afersi foe krosi. Na bijbel no e ferteri sortoe krosi wan kristen moesoe weri, aladi a bijbel e taki dati krosi moe de bescheiden èn netjes (1 Tim. 2:9). Ini a ten disi moro foeroe kondre abi wan bepaalde markitiki foe krosi di ini officieel kring den e teki leki boen. Gewoonlek a de so dati na markitiki disi e gi loen foe redelek variatie, ma te wan sma drifi komoto fara foe disi, dan a e gersi dati a e prakseri ensrefi nomo, wan prisiri foe den firi foe en ofoe de aparti foe san de gewoon. Kristensma, man nanga oema, moe hori disi na ini prakseri. Joe de klari foe skotoe na fri foe joe tapoe na kontren foe krosi foe na boen foe na boen njoensoe èn foe no meki joe brada stotoe foetoe fadon?
19-21. (a) Foe san-ede meki Jehovah Kotoigi e span densrefi foe tan aparti foe na grontapoe? (b) Tapoe sortoe tra kontren wi moe feti foe tan aparti foe na grontapoe?
19 Ija, Jezus ben abi leti di a ben taki dati kristensma no ben sa de „wan pisi foe na grontapoe” (Joh. 17:16). Ini a tori foe na préki foe na boen njoensoe, na tan farawe foe san de takroe èn a sori foe lobi èn sori dati wi e ferstan makandra, Jehovah Kotoigi de troetroe tra fasi. A de a fasi di e tjari blesi kon gi den Kotoigi, foe di den e kisi kibri foe foeroe foe den problema di e tergi na grontapoe na ini a ten disi.
20 Joe e warderi na ini joe égi libi na de aparti disi èn joe e wroko na en? Hori na ini prakseri dati efoe Jehovah Kotoigi moro pikinso ben sa de aparti, den ben sa gersi a grontapoe disi moro di Satan Didibri de a gado foe en (2 Kor. 4:4). Den ben sa lasi na krin marki disi foe sma kon sabi den leki wan ’santa pipel’ èn den no ben sa man „foe hori densrefi sondro flaka foe na grontapoe”. Dan den no ben sa abi moro langa „wan soifri èn sondro flaka dini foe Gado na ini na ai foe Gado” (Jak. 1:27, Vertaling prof. Brouwer; (1 Petr. 1:14-16). Efoe joe si na joesrefi dati joe abi na winsi foe kan gersi moro a grontapoe, prakseri dan na warskow na ini Jakobus 4:4.
21 Na apostel Paulus ben taki a fesi dati na ini na disten grontapoe ete wan tra marki ben sa kon a fesi. A ben taki dati den sma „ben sa lobi a moni” (2 Tim. 3:1, 2). Precies soleki a ben taki a fesi, a grontapoe de now ini na trapoe foe a feti baka moni, dati na foeroe sma a e basi na heri libi foe den. Kristensma ooktoe de ini disi tra fasi? A de wan sani di kan foe tan a libi na ini na grontapoe disi sondro foe de wan sma ’di lobi moni’? Wi sa go loekoe disi na ini na tra artikel di e kon.
Joe kan memre disi?
◻ Foe san-ede wan kristen moe ferwakti foe de tra fasi leki na grontapoe?
◻ Sortoe tekst e jepi Jehovah Kotoigi foe abi wan joisti loekoe na tapoe na prékiwroko?
◻ Na ini sortoe difrenti fasi Jehovah Kotoigi de tra fasi leki a grontapoe disi na ini na poti na ini den libi foe Hebrewsma 1:9?
◻ Sortoe krakti na gebroiki foe na gronprakseri di de na ini Romeini 14:21 abi tapoe den waka nanga libi?
[Prenki na tapoe bladzijde 3]
Jehovah Kotoigi ben leri foe loekoe boen nanga prisiri di na grontapoe e pristeri