Aksi foe lésiman
◼ Sma e taki dati na kristen libifasi srefi now ete e tjari boen kon. Foe san-ede Paulus ben skrifi dan: „Efi soso na ini a libi disi wi ben howpoe tapoe Kristus, dan foe ala sma wi de moro foe den sari”?
Na troe kristendom de séker wan libi fasi di e gi satisfaksi. Ma den wortoe foe na apostel Paulus ini 1 Korinte 15:19 ben sori dati wan sma di moe njan pina foe en howpoe ede, ben sa de foe sari efoe na howpoe dati no ben abi wan fundamenti.
Réden de foeroe srefsrefi gi na prakseri, dati na libifasi di e kon foe na libi di wi e libi akroederi na troe kristendom, de boen. Loekoe pikinso wan toe bewijsi foe dati. Wan opregti kristen de wan pisi foe wan gemeente di de foe krin, foeroe-nanga-lobi sma nanga wan hé moraal, sma, di abi belangstelling gi en èn di de klari foe gi jepi na jejefasi èn na skinfasi. Foe di wan kristen e waka baka a rai foe Gado, a e kisi kibri tegen ala sortoe kefar nanga siki na skinfasi, soleki den di abi foe doe nanga hoeroedoe, dringi pasa marki, smoko nanga drugmisbruik (Rom. 1:26, 27; 1 Kor. 6:18; 2 Kor. 7:1; Ef. 4:18, 19). A no e drifi na tapoe watra lontoe sondro sabi san a libi wani taki ofoe pe a e tjari sma go; na a tra sé a abi warderi gi en matifasi nanga en Mekiman èn a e feni prisiri na ini a doe foe a wani foe Gado. Ma di a e libi akroederi gronprakseri di abi den fundamenti tapoe a bijbel, e meki dati a e kisi wan osofamiri di e de moro stanfaste èn pe sani e waka moro boen. Foe di wan kristen de eerlek, dan sma kande ben sa wani teki en nanga ala prisiri leki wrokoman èn kande moro mendri makriki den poti en na wan sé ofoe meki a lasi wroko.
Srefi na sjatoe loekoe foe den sani disi e meki wi si kaba dati na kristen libifasi troetroe de wan goedoe wan èn e pai.
Ma sontron wan kristen kan miti nanga gens, kisi foe doe nanga ferfolgoe ofoe srefi ondrofeni tranga ogridoe (2 Tim. 3:12). Jezus ben taki a fesi dati disi ben sa de so (Matt. 24:9, 10; Mark. 8:34; 10:30; Luk. 21:12; Joh. 16:2). Den kristen sma na ini na owroe Korinte ben sabi disi. Den ben sabi dati Paulus, di „ben ferfolgoe na gemeente foe Gado” now ben e kisi srefi ferfolgoe. A ben skrifi den: „Efoe den e skempi wi, wi e blesi den; efoe wi e kisi ferfolgoe, wi e hori doro” (1 Kor. 5:9; 4:12- 2 Kor. 11:23-27). Ma a ben tak-go-tak-kon: „Ma foe san-ede meki ooktoe wi de ibri joeroe na ini kefar? Ala dé mi e si dede ondro ai. . . . efoe mi leki libisma, ben feti na Efese nanga boesi meti, sortoe wini dati de gi mi? Efoe den dedewan no e kisi opobaka, ’meki oen njan èn dringi, bikasi tamara wi e dede’.” — 1 Kor. 15:30-32.
Na ferfolgoe di kristensma e kisi soboen ben abi foe doe nanga a howpoe foe den. Efoe na howpoe disi soso ben de wan falsi prakseri, dan a ben sa de foe soso dati den e ondrofeni ferfolgoe. Foe dat-ede meki Paulus ben kan taki: „Efoe na soso na ini a libi disi wi ben howpoe tapoe Kristus, dan wi de moro foe sari leki ala sma.” — 1 Kor. 15:19.
Ma a ben sabi séker dati Kristus ben opobaka foe dede. Baka di Jezus ben opobaka, a ben sori ensrefi na hondrohondro kotoigi, na mindri soema Paulus srefi ben de (1 Kor. 15:3-8). Foe dat-ede meki a ben begi den Korintesma tranga: „Foe dat’ede,mi lobi brada, kon de stanfaste, sondro foe seki, alaten abi foeroe foe doe na ini a wroko foe Masra, sabi dati joe wroko no de foe soso di abi foe doe nanga Masra.” — 1 Kor. 15:58.
Paulus ben abi na overtoigi dati no en, no tra kristensma di ben ondrofeni pina foe Kristus ede. ben de foe sari. A ben abi wan libi di de foeroe nanga sani foe doe, di ben warti foe memre èn srefi di sma ben kan djaroesoe nanga en. San ben de gi en, kande ooktoe gi wi, namkoe, taki ’na gi joesrefi na ini a dini foe Gado de boen gi ala sani, foe di a abi wan pramisi gi na disiten libi èn a libi di e kon’. — 1 Tim. 4:8.