Kristen e kakafoetoe nanga horidoro gi ferfolgoe
1, 2. Fa loyaal Kotoigi foe Jehovah e kakafoetoe gi ferfolgoe, ma sortoe aksi disi e meki kon?
JEHOVAH KOTOIGI no e wani foe de sma di moesoe kisi pina. Tog den sabi dati „ala sma di wani libi nanga frede gi Gado na ini wan-fasi nanga Kristus Jezus . . . sa kisi ferfolgoe toe” (2 Tim. 3:12). Disi e meki den sari?
2 Nono, bikasi loyaal kristen kan ’kakafoetoe nanga horidoro gi ferfolgoe’ (1 Kor. 4:12, The Twentieth Century New Testament, herziene uitgave). Ma fa wi kan sreka wisrefi na tapoe na pina disi bifo a kon abra wi?
Sreka wisrefi tapoe ferfolgoe
3. San de wantoe fasi fa wi kan sreka wisrefi tapoe ferfolgoe?
3 Na ini na takmakandra foe wi a fesi dja, wi ben taki foe fasi te wi kan sreka wisrefi tapoe ferfolgoe. Foe eksempre wi moe prakseri sortoe prakseri Didibri abi — foe pori wi mati-fasi nanga Jehovah. Meki wi no gi pasi noiti, nanga jepi foe Gado no-verdini-boenfasi dati disi psa! Wi kan sreka wisrefi sosrefi toe tapoe ferfolgoe te wi go prakseri foe na réde foe san-ede Jehovah e gi pasi foe ferfolgoe. A de doe disi spesroetoe foe na stré-aksi foe universele soevereiniteit ede èn ook toe foe tesi wi loyaliteit. Meki foe dat’ede wi teki na fesi na bosroiti dati wi nanga jepi foe Gado, sa hori Jehovah soevereiniteit loyaal èn hé. Moro fara wi kan sreka wi-srefi tapoe ferfolgoe ook toe te wi e sorgoe dati na kownoekondre howpoe teki wan prenspari presi na ini wi ati.
4, 5. Fa wi kan bow wi bribi, te wi sreka wisrefi a fesi?
4 Foe kan sreka wisrefi na fesi tapoe ferfolgoe, dan ala dé wi moe bow wi bribi, wi dek’ati èn wi horidoro. Ma foe abi wan troetroe bribi, dan wi moe lobi Jehovah troetroe, èn foe disi wan soifri sabi foe en Wortoe de fanowdoe. Foe doe disi a de fanowdoe dati wi lési èn stoeka alaten den bijbelboekoe, makandra nanga kristen boekoe di tai nanga disi. Foe kisi wan tranga bribi a de moro fara ook toe fanowdoe dati wi anbegi èn dini Jehovah makandra nanga medebribiman. — Hebr. 10:23-25; 12:28; Openb. 7:9, 10, 15.
5 Foe sreka wisrefi tapoe ferfolgoe, dan wi moe ’go doro foe waka ook toe na ini na waarheid’ foe di wi o libi ala dé akroederi nanga dati èn foe di alaten wi ’e meki na waarheid tjari wi’ (3 Joh. 3, 4, NW; TCNT). Te wi teki a tiri foe Gado ini den tesi di wi moe kakafoetoe gi den ibri dé baka, dan wi moe bow wi bribi na ini Jehovah èn na ini en pasi. Disi foe en sé sa gi wi réde foe ’meki na waarheid tjari wi’ te wi kisi ferfolgoe.
6. Fa begi kan jepi wi foe sreka wisrefi tapoe ferfolgoe?
6 Te wi meki en wan gwenti foe begi na Jehovah alaten, dan disi sa hari wi go moro krosbé na en èn nanga disi ookoe wi sa kisi jepi foe sreka wisrefi na fesi tapoe ferfolgoe. O moro wi e fertrow na ini begi tapoe wi hemel Tata o moro bigi na fertrow sa de di wi e poti na ini en (2 Kor. 1:8-10). Na matifasi foe wi nanga Jehovah nanga disi sa kon de moro tranga dati féjanti, di de libisma ofoe ogri jeje noiti sa kan pori dati. — Teki gersi Psalm 9:1-6; 1 Johannes 2:12-14.
Kakafoetoe nanga horidoro
7. San Gado kan doe te wi égi krakti libi wi na pasi na ini ten foe ferfolgoe?
7 San wi kan doe foe kakafoetoe nanga horidoro gi ferfolgoe te disi troetroe kande na ini wan ofoe tra ogri-atifasi e kon abra wi? Na krakti di komoto foe Jehovah de toemsi prenspari! Neleki Paulus wi abi krakti fanowdoe „di e go moro hé leki san de normaal”, èn wi moe begi foe disi (2 Kor. 4:7-12). Te moro fara wi e fertrow krinkrin na tapoe wi hemel Tata, dan wi kan abi na srefi fertrow leki Paulus di a ben taki: „Gi ala sani mi abi na tranga foe en [Jehovah Gado] di e gi mi krakti (Fil. 4:13). Srefi baka te wi égi skin-krakti libi wi, Jehovah sa de ete wan fonten di no e dré. A kan gi en pipel krakti, èn ai doe disi toe (Jes. 40:28-31; 45:22-25). Efoe wi e steun tapoe Jehovah dan a sa gi wi ini ten foe druk krakti di e go moro hé leki wi égi krakti. Èn meki wi de sondro frede. Libisma kan go so fara nomo dati a kan teki wi disiten libi, ma na Jehovah na makti de foe tjari wi kon na libi baka nanga jepi foe wan opobaka. — Ps. 46:1, 2; Luk. 12:4-7; Joh. 5:28, 29.
8. Foe san-ede begi de so prenspari foe kakafoetoe nanga horidoro gi ferfolgoe?
8 Begi na Jehovah de wan sani di de fanowdoe foe kan kakafoetoe, nanga horidoro gi ferfolgoe. Jezus di ben ondrofeni foeroe pina ben tan alaten krosbé foe en Tata nanga jepi foe begi di ben komoto foe en ati bika wi e lési: „Na ini den dé foe en na skinfasi Kristus, ben seni begi nanga tranga begi toe go na a sma di ben kan ferloesoe en foe dede, nanga tranga babari èn watra-ai, èn a ben leri en foe na frede foe en gi Gado” (Hebr. 5:7). Wi kan de séker dati na „sma di e jere begi” sa arki wi toe foe na frede di wi abi foe Gado (Ps. 65:2). Na fanowdoe foe „horidoro na ini begi” na ini ten foe ferfolgoe”, ’sondro foe tapoe nanga begi’ èn ’de na ai tapoe begi’, no kan kisi nofo krakti (Rom. 12:12; 1 Thess. 5:17; 1 Petr. 4:7). Noso wi ben sa kan go denki wawan na a moeilekheid èn pina èn wi ben kan fadon gi wan lostoe foe kisi ferlekti èn na den firi foe na skin foe di wi ben sa meki wan skeki nanga wi bribi.
9, 10. (a) Fa na „vréde foe Gado” kan jepi te wi e kisi ferfolgoe? (b) San wi kan leri foe na korostoe fasi di Stéfanus ben waka miti en ferfolgoeman?
9 Soekoe „na vréde foe Gado” te den poeroe na fri foe joe na joe anoe. Te wi e begi ala dé na Jehovah, dan wi ben bow na ini na libi wan toemsi moi patron, èn te wi e kisi ferfolgoe, dan wi moe tan go opregti na en na ini begi. A de wan sani di fiti foe begi foe „na vréde foe Gado, di e psa ala prakseri”. Disi sa ’kibri wi ati èn wi jejefasi nanga jepi foe Kristus Jezus’ — efoe a de fanowdoe te na dede na ini getrowfasi. — Fil. 4:6, 7.
10 Dati na korostoefasi no abi en speri na ondro ferfolgoe kan de wan pisi foe wi, e kon na krin na ini na geval foe na getrow Stéfanus, na fosi kristensma di kisi pina. Na tori foe bijbel e taki foe en, leti bifo santa jeje ben boewégi en foe gi foe na laatste tron wan dek’ati kotoigi: „Gi ala sma di ben sidon na ini na Sanhedrin ben e loekoe nanga span prakseri na en, ben si dati en fesi ben de leki na fesi foe wan engel” (Tori. 6:15). A no ben abi na sari fesi foe wan ogri sma, ma na fesi foe wan engel, wan boskopoeman foe Gado foeroe nanga na fertrow dati a ben abi na jepi foe Jehovah. Stéfanus ben abi dek’ati èn ben de korostoe. (Teki gersi Johannes 14:27.) Bakadi a ben poeroe den kroetoeman bere kon na doro foe na fowtoe di den ben abi ini na kiri foe Jezus Kristus, den ben firi en „te na ini a dipi foe den ati èn den ben kaw tifi tegen en”. Ma Stéfanus, „di ben foeroe nanga santa jeje, ben loekoe go a hemel èn ben si Gado glori èn Jezus Kristus tanapoe na a reti-anoe foe Gado”. Foe di na visoen dati ben gi en tranga, meki Stéfanus ben kan opo taki nanga dek’ati nanga den onregtvaardiki kroetoeman dati, na ini na fertrow dati a ben doe Jehovah wani (Tori. 7:52-56). Aladi kristen na ini na ten disi no e ferwakti foe kisi so wan visioen, tog den kan abi wan korostoe fasi di Gado e gi te den e kaka foetoe nanga horidoro na ondro ferfolgoe.
11. Te den go prakseri dipi foe san, Jehovah dienstknegti sa kisi jepi foe hori doro na ondro ferfolgoe?
11 Go prakseri dipi foe Jehovah Wortoe, doe nanga prakseri. Go denki foe a Wortoe foe Gado, srefi te joe de sondro bijbel nanga boekoe di e go foe na bijbel. Tjari bijbel vers nanga bijbeltori kon na ini joe prakseri èn tan doe disi foeroetron, na dé èn na neti te joe no kan sribi (Teki gersi Psalm 77:2, 6, 11, 12. Denki foe den wondroefasi fa Jehovah ben handri nanga en pipel di ben kisi ferfolgoe nanga kwinsi na ini na ten disi. Tan pikinso na a fasi fa Gado ben fri den Israëlsma na a katibo foe Egypte, fa a ben skraki Daniël nanga en 3 Hebrewmati na ini den tesi foe den, fa a ben kibiri den djoe na ini den dé foe Mordechaï nanga Esther èn fa a ben jepi den apostel nanga tra kristen na ini a pina foe den foe a regtvaardikifasi ede (Ex. 12:1-15:21; Dan. 3:1-30; 6:1-28; Esth. 3:1-9:32; Tori 4:1-5:42; 12:1-17; 14:1-7, 19, 20; 16:16-40; 18:12-17; 19:23-41; 21:26-26:32). Prakseri sosrefi toe foe na fasi fa Jehovah ben jepi en disiten dienstknegti na ini nazi-concentratie-kampoe, communistis doengr’oso èn den sortoe presi dati. Te anbegiman foe Jehovah e kisi ferfolgoe, dan den e firi na jepi foe Gado „tégo anoe”. — Deut. 33:27, Luther-vertaling.
12. San wi moe hori na ini prakseri na ini a tori foe pina te wi e kisi ferfolgoe, èn sortoe fertrow ofoe bribi wi moe abi?
12 Wan kaba sa kon na pina. Te wi e hori disi na ini prakseri dan wi sa kisi jepi sosrefi toe foe kakafoetoe èn horidoro gi ferfolgoe. Boiti dati ’Gado sa pai benawtoe na den di e meki benawtoe kon gi w’, aladi a sa gi wi ferlegti (2 Thess. 1:6-10). Foe dat’ede meki wi moe loekoe na a ten di e kon na ini a ten di wi de e njan pina leki Kotoigi foe Jehovah nanga fertrow dati wan kaba sa kon na den pina foe wi èn dati getrowfasi sa abi bigi blesi foe wi hemel Tata leki ba kapisi. Na so baka wan pisiten wi kan kon fri kande foe na doengroe-oso èn abi baka na fri foe dini Jehovah sondro moeilekheid leki prisiri kownoekondre-prékiman. Ma awinsi dati no psa wantronwantron dan wi sabi tog dati a pina foe wi no kan go doro alaten. Èn wi kan hori doro efoe wi fertrow Jehovah dorodoro èn poti bribi na ini na kontroe foe en pramisi foe blesi di no abi en speri na ini a Njoen Seti di taki na fesi. — Openb. 21:1-4; teki gersi 2 Korintesma 1:19, 20.
13. Sortoe trowstoe wi kan kisi na ini ten foe ferfolgoe foe 1 Kor. 10:13?
13 Gado no sa gi pasi dati wi kisi tesi psa san wi man foe tjari. Na apostel Paulus ben gi na djaranti dati di a ben skrifi: „No wan tesi ben kon na tapoe joe boiti di de gi ala sma. Ma Gado de getrow èn a no sa gi pasi dati joe kisi tesi psa na sani di joe kan tjari, ma nanga na tesi a sa sorgoe foe wan pasi foe komoto sodati joe kan hori doro” (1 Kor. 10:13). Den no e aksi foe ala kristen dati den moe horidoro na ondro na srefi pina. Foe dat’ede meki nowan réde de foe denki dati na moro takroe vorm foe ogri-ati ferfolgoe ini wi aparti geval de wan sani di moesoe foe kon. Jehovah no sa libi wi ofoe sa gi pasi dati wan sani psa nanga wi di wi leki persoon no kan tjari na ini en krakti èn nanga jepi foe en santa jeje. A no de foe taki wi moe fertrow tapoe en, sondro kondisi èn bribi san en wortoe e taki. Ma efoe wi e bribi na tapoe Jehovah dorodoro, dan séker wi kan kakafoetoe nanga horidoro gi ferfolgoe. — Ps. 9:9, 10.
Na féjantifasi foe Satan e tron noti
14, 15. Fa den moeiti foe Satan tron noti foe wai Jehovah pipel poeroe nanga jepi foe ferfolgoe?
14 Foe di na Almakti Gado di joe no kan teki gersi nanga no wan trawan e tiri èn jepi Jehovah getrow kotoigi na tapoe wan makti fasi, meki Satan Didibri nanga en ferfolgoeman di de ondro en bedrigifasi, noiti sa kan wini den troe kristen disi. Den moeiti foe Didibri foe wai Jehovah pipel poeroe nanga jepi foe ferfolgoe, ben fadon alaten. Na ferfolgoe srefi nofotron ben wroko leki wan boemerang tapoe na bigi féjanti foe Jehovah nanga en pipel, èn na wani foe Gado ben wini.
15 Loekoe leki wan bewijsi foe disi na hebi ferfolgoe di ben opo ede kon tegen na gemeente foe Jeruzalem wantronwantron na baka na dede foe Stéfanus. Wi e kisi foe jere: „Den alamala ben panja go na den kontren foe Judéa nanga Samaria, boiti den apostel.” Ma den discipel di ben panja gwe „ben waka psa a kondre èn ben meki na boen njoensoe foe na wortoe bekenti”, èn na moeiti foe den ben kisi blesi. Jeje go na fesi na ini na foto Samaria ben de leki wan eksempre (Tori. 8:1-8). Tra discipel di ben panja gwe ben préki na ini Fenecië, Cyprus nanga Antiochië (Syrië). Ija, ini Antiochië „na anoe foe Jehovah ben de na tapoe den, èn wan bigi nomroe sma ben teki na bribi èn ben drai go na Masra”! (Tori. 11:19-21). Wi kan de séker dati na sani disi ben de precies a tra sé foe san na bigi ferfolgoeman ben wani foe psa. — Teki gersi Filippensesma 1:12-14.
16. San e psa sontron na ini a geval foe ferfolgoeman?
16 Ibri tron dati wan loyaal kotoigi foe Jehovah e kakafoetoe. nanga horidoro gi ferfolgoe, disi e meki na brokosaka foe Satan kon moro bigi èn en bere e kon na doro leki wan léman. We boiti dati wan fosten ferfolgoeman e tron wan getrow kotoigi foe Gado èn Kristus di e kisi ferfolgoe, dan Didibri e ondrofeni na sjen foe wan lasi. Séker a no ben prisiri en foe eksempre dati na fosten ferfolgoeman Paulus foe Tarsus ben tron wan foe den bakaman foe Jezus di e kisi ferfolgoe èn di ben wroko fajafaja foe panja na boen njoensoe awinsi ferfolgoe nanga foeroe pina ben de. — 2 Kor. 11:23-27; 1 Tim. 1:12-16.
17. Sortoe fasi Kotoigi foe Jehovah di kisi ferfolgoe moe sori gi den ferfolgoeman?
17 O prenspari a de foe dat’ede dati kotoigi foe Jehovah di e kisi ferfolgoe sori wan joisti fasi gi den ferfolgoeman foe den! Stéfanus no ben kon foeroe nanga ogri-ati gi den sma di ben ferfolgoe en. Di den ben ston en, a ben fadon let a tapoe en kindi bifo a ben dede èn ben „bari nanga krakti sten: ’Jehovah no teri na sondoe disi gi den’” (Tori. 7:57-60). Jezus ben taki boiti dati: „Tan lobi joe féjanti èn tan begi gi den di e ferfolgoe joe.” — Matt. 5:44; Rom. 12:14; 1 Kor. 4:11-13.
Wi Mekiman no sa libi wi
18. San sa psa te Satan sa bigin wan laatste aanval tegen Jehovah pipel?
18 Wi e libi now na ini den moro moeiliki ten foe na libisma-historia. A de wan ten pe den sma di e taki dati den de kristen, e kisi tesi èn den e teki den poeroe poti a wan sé. (Teki gersi Lukas 22:31, 32; 1 Petr. 4:16, 17.). A ten foe Satan sjatoe, èn heri esi a sa bigin nanga wan laatste totale aanval tapoe Jehovah pipel. Ma Jehovah sa meki den man foe kakafoetoe nanga horidoro gi na ferfolgoe disi èn den sa kon na doro leki winiman. Agen Satan leki Gog foe Magog, sa lasi èn wan lasi sa kon tapoe en di sa tjari pori kon. Na ini na opo feti disi gi en pipel, Gado, boiti dati, sa ’meki ensrefi bigi èn santa ensrefi èn meki den kom sabi en na fesi na ai foe foeroe naatsi èn den sa moe sabi dati en de Jehovah’. Dati toe de agen precies na tra sé foe san Satan ben sa wani sote. — Ezch. 38:14-39:7; Openb. 12:12.
19. San Kotoigi foe Jehovah di kisi ferfolgoe sa doe nanga a Gado jepi foe Jehovah?
19 Leki Jehovah Kotoigi di gi den libi abra wi sabi dati Satan wani pori na matifasi di wi abi nanga na Almakti Gado. Nanga jepi foe Jehovah no verdini-boenfasi wi no sa skeki na ini na tori foe wi bribi. Morofoeroe wi sa hori na bigi stré-aksi na prakseri èn proeberi foe hori Jehovah universele soevereiniteit hé. Nanga fertrow na ini na kownoekondre howpoe wi kan de kolokoe alwasi ferfolgoe de. Wi de srekasreka foe kakafoetoe nanga horidoro gi ferfolgoe, foe di wi abi wan fertrow sondro kondisi na ini „na sma . . . di akroederi en krakti, di e wroko na ini wi, kan doe foeroe moro psa marki leki ala sani san wi e aksi ofoe san wi kan go denki”. — Ef. 3:20, 21.
20. Sortoe fertrow wi kan abi na ini wi „getrow Mekiman”?
20 Meki wi waka go miti foe dat’ede na féjanti sondro frede leki wan grani gi Gado èn wi égi ferloesoe hori wi getrowfasi. Meki wi ’howpoe tapoe Jehovah èn hori en pasi’ (Ps. 37:34). Èn meki wi, aladi wi e hori doro na ondro ferfolgoe, sori na fasi di e kon na fesi na ini den wortoe foe na apostel Petrus: „Meki . . . den di e njan pina na ini akroederi nanga na wani foe Gado, fertrow den libi na a wan getrow Mekiman, aladi den e go doro foe doe boen” (1 Petr. 4: 19). Wi „getrow Mekiman” no sa libi wi. Na ini en krakti wi kan de kolokoe alwasi ferfolgoe de èn wi kan kakafoetoe nanga horidoro gi ferfolgoe.
Overzichtaksi
□ Fa Kotoigi foe Jehovah kan sreka densrefi tapoe ferfolgoe?
□ Foe san-ede begi de so prenspari te wi e kakafoetoe gi ferfolgoe?
□ Fa na „vréde foe Gado” e jepi wi te wi e kisi ferfolgoe?
□ Sortoe trowstoe wi kan kisi foe 1 Korintesma 10:13?
□ Fa Jehovah Kotoigi de nanga den ferfolgoeman, èn foe san-ede?
[Prenki na tapoe bladzijde 9]
Stefanus no ben hori en ferfolgoeman na ati èn disiten kotoigi foe Jehovah no e hori den ferfolgoeman na ati toe. Son ferfolgoeman e tron bakaten kotoigi.