Kolokoe awansi ferfolgoe de!
„Kolokoe den sma de di foe regtvaardiki fasi ede e kisi ferfolgoe, bika na kownoekondre foe hemel de foe den”. — MATTÉUS 5:10
1. Sortoe ferfolgoe na Romein keizer Nero ben meki kon?
„DEN ben domroe son sma na metiboeba èn dagoe ben priti den. Trawan den ben spikri na kroisi èn trawan baka den ben soetoe faja gi den, sodati te doengroe ben kon den ben sa dini leki frambo.” Na so na Romein historia skrifiman Tacitus ben taki (Annales, Boek XV, par. 44. Èn soema ben de den sma di den sani disi psa nanga den? Kristen — discipel foe Jezus Kristus. A njoensoe ben waka lontoe dati keizer Nero ben de frantwortoe foe na bron di na foto Rome ben bron (ini 64 G.T.), èn a ben proberi foe poti na fowtoe na tapoe Jezus bakaman. Na so fasi na fosi wan foe difrenti ferfolgoe foe kristen ben bigin na ini na glori ten foe na owroe Rome.
2. (a) San Jezus ben taki foe den sma di „foe regtvaardikifasi ede” ben kisi ferfolgoe? (b) San Jehovah Kotoigi moe abi foe de kolokoe awinsi ferfolgoe de?
2 Fa den fositen kristen ben kan hori doro na ondro sowan ogri-ati ferfolgoe? Èn fa a ben kan dati den kotoigi foe Jehovah na ini a ten di psa èn na ini disi ten ben tan nanga prisiri aladi sma na tapoe ala sortoe fasi ben e dobbelkross den ofoe foe espresi ben doe ogri na den na ini wan moeiti foe wai den bribi ofoe den kerki overtoig poeroe? (2 Thess. 1:3-5) Ija, Jezus Kristus foe troe ben taki: „Kolokoe den sma de di foe regtvaardikifasi ede e kisi ferfolgoe, bika na kownoekondre foe hemel de foe den” (Matt. 5:10) Ma foe kan de kolokoe awansi ferfolgoe de dan Jehovah kotoigi moe sabi (1) nanga sortoe prakseri Didibri e tjari ferfolgoe kon tapoe den, (2) foe san-ede Jehovah e gi pasi dati na benawtoe disi kon, (3) Foe san-ede Gado dienstknegti awinsi ferfolgoe de kan de kolokoe, (4) san kan doe foe kan sreka joesrefi tapoe ferfolgoe èn (5) fa den kan kakafoetoe gi ferfolgoe èn horidoro.
Na prakseri foe Didibri
3, 4. (a) Soema de troetroe a baka na ferfolgoe di Kotoigi foe Jehovah e ondrofeni? (b) Fa Jezus ben meki wi kon sabi na moro prenspari sma di e soetoe faja foe na ferfolgoe disi?
3 Den Romeintiriman no ben abi noti foe frede foe den opregti kristen di ben abi vréde. Den kotoigi foe Jehovah dati, na wan séker marki ben saka densrefi „ondro hé makti” di ben abi tirimakti èn ’den ben gi Ceasar baka san na foe ceasar, ma Gado san a foe Gado (Rom. 13:1-7; Matt. 22:21). Den Romeini keizer no ben abi no wan prakseri, dati foe sensi na ten foe „na regtvaardiki Abel” kaba wan sma ben de na baka libisma e soetoe faja foe abi ogri-ati dorodoro tegen den Kotoigi foe Jehovah (Matt. 23:33-36; Hebr. 11:4, 32-40; 12:1). Den sma di te nanga na dé foe tide e soetoe faja tapoe sowan ogri-ati fasi dati so wan sortoe ferfolgoe kon, a no wan tra sma moro leki Satan Didibri. Leki wan gensman foe Gado nanga foe Jehovah pipel „a e waka lontoe leki wan krasi lew, di e soekoe foe swari wan sma”. — 1 Petr. 5:8.
4 Alaten baka Jezus ben taigi en discipel dati den ben sa kisi ferfolgoe. A ben taki foe eksempre: „Wan srafoe no de moro bigi leki en méstri. Efoe den ferfolgoe mi [san den ben doe troetroe], den den sa ferfolgoe oenoe toe” (Joh. 15:20; 16:2; Matt. 10:22, 23). Boiti dati, Jezus no ben libi no wan degedege na a de foe so wan prenspari sma di ben soetoe faja dati na ferfolgoe disi ben sa kon, di a ben taki gi wan foe den „sébi gemeente”: „Loekoe! Didibri sa go doro foe trowe son wan foe oenoe na ini doengroe-oso, sodati oenoe sa kisi tesi dorodoro” (Openb. 1:1, 4; 2:10). Ma nanga sortoe prakseri Didibri e ferfolgoe Jehovah Kotoigi?
5. Nanga sortoe prakseri Didibri e tjari ferfolgoe kon tapoe Jehovah dienstknegt?
5 Satan e poti dienstknegti foe Jehovah na ondro kwinsi èn e tjari ferfolgoe kon na tapoe den nanga na prakseri foe den dwengi den foe skeki nanga den bribi. A wani broko na diri matifasi di den abi nanga den hemel Tata. Ija, foe sensi na momenti dati sondoe ben kon, Jehovah Gado ben taki na fesi foe na féjantifasi na mindri a „sneki” èn Gado agersi „oema” èn na mindri de ’siri’ foe den! (Gen. 3:14, 15) Sondro dati degedege ben sa de na tapoe na tori disi, Jezus ben meki oen kon sabi na sneki leki Satan èn a ben taki gi den ferfolgoeman foe en dati den „komoto foe den tata Didibri” èn foe dat’ede ben de foe na siri foe na Gensman (Joh 8:31 te 59). Na ini den ’laatste dé disi’ Didibri abi ete soso wan sjatoe ten èn en atibron bigi foetroe (2 Tim. 3:1-5; Openb. 12:7-12). Na féjantifasi na mindri na siri foe Gado èn na siri foe Didibri soboen e go doro èn ala sma na grontapoe te foe kaba moe poti ensrefi na a wan ofoe na a tra sé. (Teki gersi 1 Johannes 3:10.) Efoe wan sma e dini Jehovah Gado getrow dan a e tron ofoe a e go de dan ook toe wan sani foe ferfolgoe. Satan na Didibri sa loekoe dati dati psa. — 2 Tim. 3:12.
6. Sortoe bigi stré-aksi Satan ben bigin, èn san foe libisma stré taki a no de do?
6 Satan ben bigin wan stré-aksi na ini na tori foe universele soevereiniteit èn a ben stré dati libisma no ben sa hori na den getrowfasi te den ben sa kisi tesi. Na so getrow fasi na Gado ben de na ini a tori di Satan ben sorgoe dati ferfolgoe ben kon tegen na man Job di en oema èn 3 „trowstoeman” ben de sabisabi ofoe sondro foe sabi e dini na prakseri foe Didibri (Job 1:8-2:9; 16:2; 19:22, 28). Soleki na geval Job e sori krin, dan Didibri ben tjalansi Jehovah foe di a taki dati no wan enkri sma ben sa tan getrow na Gado efoe Satan ben kisi pasi foe tesi na sma dati. Didibri e ferfolgoe Kotoigi foe Jehovah foe dat’ede foe broko den getrowfasi èn foe bewijsi dati na tjalansi foe en troe.
7. Oten kaba wan kristen e meki wan skeki na ini a tori foe en bribi, ma fa Jezus ben doe di a ben kisi tesi a tapoe disi?
7 Satan sabi dati te troe kristen sori soso wán „fasi foe anbegi” gi en, so wan sma meki wan skeki kaba na ini a tori foe en bribi èn gi steun na a tjalansi foe Didibri dati den libisma di e kisi tesi ofoe ferfolgoe, no sa tan getrow na Gado. San Didibri ben taki di a ben sori Jezus leki na moro bigi ferfolgoeman „ala kownoekondre foe grontapoe nanga den glori”? „Mi sa gi joe ala den sani disi efoe joe kindi èn doe wan fasi foe anbegi na mi.” Ma na wégri foe Jezus, sondro foe seki, ben gi tranga na na troe anbegi, a ben opo feti na a sé foe Jehovah foe na stré-aksi foe na universele soevereiniteit èn bewijsi dati Didibri de wan léman. — Matt. 4:8-11.
8, 9. (a) Fa den fosten kristen ben sori dati den no ben wani doe no wán „fasi foe anbegi” gi Satan? (b) Fa son kristen foe na di foe twenti jarhondro ben kisi tesi na a srefi fasi, èn sortoe bosroiti den ben teki?
8 Fa a de wan sani di switi foe dat’ede dati getrow kristen foe na bigin foe na kristendom ben wégri ook toe foe doe wan „fasi foe anbegi” di ben sa gi steun na Satan sé foe na stré-aksi! Loyaal bakaman foe Kristus e wégri foe bron wierook leki wan grani gi na Romeini keizer, awasi disi ben kostoe den den libi. Daniël P. Mannix ben skrifi foe disi: „Toemsi pikinso kristen ben poti den bribi na wan sé, aladi foe meki en makriki gi den ini algemeen wan altari nanga wan faja di e bron na ini ben de na ini na arena (Prégron). Na wan enkri sani di wan strafman ben abi foe doe, ben de foe stroi wan pikinso wierook na ini na faja, èn dan a ben kisi wan ofrandi-papira èn a ben kisi fri. Den ben bodoi soifri sosrefi toe dati a no e anbegi na keizer ma dati a e erken soso den gado-égifasi foe na keizer leki edeman foe na Romeinkondre. Ma pikinmoro nowan enkri kristen meki gebroiki foe na tjans disi foe lon komoto foe dede” (Those About to Die. blz. 137). Soso wán foe so wan „fasi foe anbegi” ben sa boen nofo foe gi satisfaksi na Didibri.
9 Son kristen foe na di foe twenti-jarhondro ben kisi tesi na a srefi fasi. Foe sensi na momenti dati den ben kisi Jehovah Kotoigi èn foeroetron baka makandra na ini a ten di den en hori den na ini nazi-concentratiekampoe, moeiti ben e doe foe meki den poti den bribi na wan sé na ondro dwengi èn foe wégri foe hori kontakti moro fara nanga en pipel. Spesroetoe foe dati meki den nazi-soema ben meki wan ferklari di den ben pristeri den kotoigi foe poti den nen na ondro foe kisi fri. Ala sani san den e aksi, ben de soso na nen foe wan sma. Tokoe pikinso Kotoigi ben poti den nen na ondro.
10. Foe san-ede a ben sa de wan sani di no de wan ferstan sani foe meki wan skeki foe wan pikin sani na ini na howpoe foe kisi fri baka foe kan préki?
10 Meki wi noiti fadon gi na wan ofoe tra kori foe Didibri foe lon komoto gi wan stré foe no kisi moeilekheid, foe di wi e ferstan na prakseri di Didibri abi nanga en ferfolgoe foe Jehovah Kotoigi. No meki srefi na fowtoe prakseri pré na wi dati skeki na ini a tori foe wan sani di ben gersi njofi, ben sa kan gi wi so esi baka na fri foe doe na prékiwroko. Ibri skeki na ini na tori foe wi getrowfasi kan meki wi fadon krinkrin. (Teki gersi Mattéüs 13:21; Galaciasma 6:12.) Te wan skeki „de wan fasi foe anbegi”, dan wi no boen moro foe teki presi gi den kownoekondre afersi foe Jehovah. Wi kan de séker dati wan enkri fasi di wi e broko wi getrowfasi, e gi Didibri toemsi bigi prisiri, èn wi no sa meki Jehovah bréti srefsrefi. Na presi foe dati wi sa wani foe prisiri Jehovah ati foe di wi e hori na wi getrowfasi, sodati a kan gi wan piki na a bigi Man di e pori en nen. — Odo 27:11.
Foe san-ede Jehovah e gi pasi foe ferfolgoe
11. San de na moro prenspari réde foe san-ede Jehovah e gi pasi dati en pipel kisi ferfolgoe?
11 Wi hemel Tata ben sa kan meki dati en pipel no kisi ferfolgoe. Ma a ben bosroiti foe gi pasi dati ferfolgoe kon, èn te wi e ferstan na réde foe dati dan disi sa jepi wi foe de kolokoe awinsi ferfolgoe de. Na moro prenspari réde foe san-ede ferfolgoe e kon, abi foe doe nanga na stré-aksi foe universele soevereiniteit. Ibri kotoigi foe Jehovah di e hori getrowfasi na ondro wan foe den tesi foe Didibri e bewijsi dati Didibri de wan léman èn e sori sondro degedege dati srefi wan onvolmaakti libisma kan tan getrow na Gado awansi a de kisi ferfolgoe ofoe hebi tesi. Na loyaal sma e hori na sé foe Gado stré-aksi hé èn e hori baka gi a reti foe Jehovah foe tiri leki universele soeverein. Fa a de wan prisiri sani foe meki den bewijsi kon moro foeroe dati „a e tiri leki na moro héwan”! — Ps. 47:9, Todays English Version.
12, 13. (a) Foe sortoe réde moro fara meki Jehovah e gi pasi dati kristen kisi ferfolgoe? (b) Soema na mindri den sa kisi wan presi di sa tan na ini Gado seti foe sani?
12 Jehovah e gi pasi na ferfolgoe ook toe foe tesi na loyaliteit foe den sma di moe gi densrefi abra na en. A ben tjari wan pipel kon makandra leki wan spesroetoe goedoe, sodati den sma disi di kisi salfoe nanga en jeje ’ben sa meki den toemsi boen sani bekenti’ (1 Petr. 2:9). Sosrefi toe Gado e „seki ala naatsi”, sodati „den sani di ala sma ben sa wani foe ala naatsi” — sma di abi na boen ati foe Gado ben sa kan tjari kon na ini en „oso” foe anbegi èn foeroe en nanga glori (Hag 2:7; teki gersi Zacharia 8:23). Foe dat’ede meki na mindri den sma di de kristen, di gi densrefi abra èn di tron kotoigi foe Jehovah, no de wawan sma nanga wan hemel howpoe, ma sosrefi toe trawan di abi na howpoe foe libi foe tégo na wan paradijs grontapoe. — Luk. 23:43; Openb. 7:1-17.
13 Ma soema foe ala den kristen disi di gi densrefi abra te foe kaba ben sa de na ini na pramisi „njoen hemel” èn „njoen grontapoe”? (Openb. 21:1) No ala sma na mindri den sa de na ini (Ps. 15:1-5; Matt. 22:14). Presi no sa de alaten na ini na seti foe Gado gi den sma di sori dati den de ontrow. Soboen ala di Jehovah no e meki ferfolgoe kon, a de gi pasi foe ferfolgoe kon foe poeroe sma a mindri en pipel di no de loyaal aladi a e meki tan na den mindri sma nanga wan loyaliteit di no e seki èn di e lobi Gado nanga den heri ati (Matt. 22:37, 38; 25:31-33; 2 Kor. 13:5). Meki a de so dati wi de na mindri den sma di e hori-doro getrow na mindri den ferfolgoe èn na so fasi e abi alaten „na grani foe doe santa dienst [gi Jehovah Gado] sondro frede èn nanga loyaliteit èn regtvaardikifasi na en fesi ala dé” — ija, foe tégo. — Luk. 1:68, 69, 74, 75.
Foe san-ede joe moe de kolokoe awinsi ferfolgoe de
14. San Jezus ben taki aparti leki wan réde foe de kolokoe awinsi ferfolgoe de?
14 Na Kownoekondrehowpoe Jezus ben taki foe en spesroetoe di a ben taki: „Kolokoe den sma de di foe regtvaardikifasi ede e kisi ferfolgoe, bika na kownoekondre foe hemel de foe den” (Matt. 5:10). Ija, na konmakandra nanga Kristus na ini na hemel kondre de wan wondroe prijs di de gi den salfoe bakaman foe Jezus di hori doro getrow na ondro ferfolgoe (Luk. 12:32; Openb. 2:10; 14:1; 20:6). Èn gi getrow kotoigi foe Jehovab di abi wan grontapoe howpoe wan toemsi bigi grani foe tégo libi na tapoe wan paradijs grontapoe poti na den fesi (Luk. 23:43; Joh. 10:16; 17:3; Openb. 7:9, 10, 14). Te wi hori na Kownoekondre howpoe na ini prakseri, dan wi kan de séker kolokoe awinsi ferfolgoe de. — Rom. 12:12.
15. Fa Jehovah soevereiniteit tai nanga na Kownoekondre, èn fa ala disi abi foe doe nanga na troe tori dati wi de kolokoe awinsi ferfolgoe de?
15 Jehovah universele soevereiniteit tai nanga na Kownoekondre sondro dati joe kan prati en bika nanga jepi foe na Kownoekondre a sa santa en santa nen. Leki Jehovah getrow kotoigi èn kownoekondre prékiman wi e hori en soevereiniteit hé èn na so fasi abi wan extra réde foe de kolokoe srefi na mindri foe benawtoe (Jes. 43:10-12; Matt. 6:9, 10). Meki foe dat’ede nanga na jepi foe Gado wi hori getrowfasi na Gado èn bewijsi nanga dati dati Didibri de wan léman di no kan bewijsi na sani di a taki dati nowan enkri sma ben sa tan getrow na ondro tesi. (Job 27:5). Fa wan kristen di kisi ferfolgoe kan brèti foe dat’ede te a hori Jehovah sé a ini na bigi stré-aksi! — Teki gersi Tori foe den Apostel 4:24.
16. Foe san-ede wi kan taki dati wan krin konsensi e meki dati wi de kolokoe awinsi ferfolgoe de?
16 Wan soifri konsensi e meki kolokoe kon toe gi kownoekondre prékiman di kisi ferfolgoe, ma di tog tan loyaal. Aladi wan nen-kristen kande sa kisi kwinsi foe sjen nanga frede te a de ondrofeni pina foe wan takroe libifasi ede, dan wan sma nanga reti e de nanga prisiri te en, leki wan getrow kotolgi foe Jehovah èn bakaman foe Jezus Kristus, e ondrofeni pina foe na regtvaardikifasi ede. Soboen, srefi baka di den ben „krawasi” Jezus apostel, „den ben komoto foe na Sanhedrin, nanga prisiri dati den ben feni den warti foe njan sjen foe Kristus nen ede.” (Tori foe den apostel 5:40, 41). Sosrefi toe Paulus nanga Silas no ben de nanga sari, baka di den ben naki den na ini Filippi èn poti den na ini doengroe’oso, èn ook toe den no ben abi konsensi fonfon, neleki den ben doe wan sani di fowtoe. Na presi foe dati a ben de so dati na mindri neti „den ben e begi èn prijse Gado nanga wan singi” (Tori. 16:22-25). Aladi wan kotoigi foe Jehovah soboen noiti sa tjari ensrefi so dati a e kisi strafoe leki wan sma di doe wan ogri èn kande en konsensi e kwinsi en leki wan tiriman, foefoeroeman, ogriman ofoe wan sma di e soetoe en mofo ofoe noso ini tra sma tori, a kan de kolokoe efoe a e njan pina foe regtvaardikifasi. — 1 Petr. 2:11, 12; 3:13, 14; 4:15, 16.
17. San sa meki wi de spesroetoe kolokoe te wi e kisi ferfolgoe leki sma di e hori baka gi na kownoekondre?
17 Prisiri Jehovah èn gi en grani spesroetoe sa meki wi de kolokoe te wi e kisi ferfolgoe leki sma di e hori baka gi na Kownoekondre. Srefi na ondro na poeroe foe na fri foe wi a de gi den sma di leki Jehovah dienstknegti di wani tan de nanga prisiri, wan toemsi prenspari sani dati den „waka so dati den e prisiri Gado” (1 Thess. 4:1). Te boiti dati wi e njan pina leki wan kristen, dan wi ’moe ferteri foe na nen dati leki wan grani gi Gado’. Tan prakseri pikinso! Boiti dati wi e prisiri Jehovah te wi e hori doro getrow ondro ferfolgoe, „wi e tan gi Gedo glori” (1 Petr. 4:16, The New English Bible; Nieuwe Wereldvertaling). Fa disi de wan tranga di e gi joe prisiri foe hori doro nanga dek’ati na ondro ferfolgoe!
Go doro leki sma di e hori den getrowfasi
18. Fa Jehovah Kotoigi moe denki foe na hori foe getrowfasi na Gado?
18 A de soboen krin dati Jehovah Kotoigi abi boen réde foe de kolokoe awinsi ferfolgoe de. Meki wi foe dat’ede nanga a jepi foe Gado de net so faste na ini wi bosroiti leki na Psalm-singiman David, di ben taki: „Foe mi sé, mi sa waka na ini mi getrowfasi.” — Ps. 26:11.
19. Sortoe aksi wi moe loekoe now?
19 Leki getrow kristen wi kan de kolokoe awinsi ferfolgoe de foe di wi sabi nanga sortoe prakseri Didibri e tjari so wan sortoe benawtoe kon abra wi. Wi e ferstan toe foe san-ede Jehovah Gado e gi pasi dati en pipel e kisi ferfolgoe, ma san wi kan doe, aladi wi abi den sortoe réde disi foe de kolokoe awinsi ferfolgoe de, foe sreka wisrefi a tapoe? Èn fa wi kan kakafoetoe nanga horidoro gi ferfolgoe di faja ofoe di de srefi ogri?
Overzichtaksi
□ Nanga sortoe prakseri Didibri tjari ferfolgoe kon abra Jehovah Kotoigi?
□ Sortoe bigi stré-aksi Satan ben bigin èn san a ben stré foe libisma dat a no de so?
□ Foe san-ede Jehovah e gi pasi dati en kotoigi e kisi ferfolgoe?
□ San Jezus Kristus ben ferteri aparti leki wan réde foe de kolokoe te wi e kisi „ferfolgoe foe regtvgardikifasi ede”?
□ San e meki wi de kolokoe te wi e kisi ferfolgoe leki Jehovah dienstknegti?
[Prenki na tapoe bladzijde 3]
Di tesi ben miti Jezus, a ben wégri foe sori wan doe foe anbegi gi Satan
[Prenki na tapoe bladzijde 5]
Na kownoekondre-howpoe e gi boen réde foe de kolokoe awinsi ferfolgoe de