’Kolokoe oen de te sma e vervolgoe oenoe’
„Kolokoe oen de te sma e kosi èn vervolgoe oen èn e lé ala sortoe ogri gi oenoe foe mi ede. Prisiri èn djompo foe prisiri, bikasi oen paiman de bigi ini den hemel.” — Matt. 5:11, 12.
1-4. Sortoe ondrofeni ben sa meki dati aksi kon ini wi prakseri tapoe na tori foe de nanga prisiri ondro vervolgoe?
JOE kan de troetroe kolokoe te den sma e ferteri lé foe joe èn den e proberi tapoe ala sortoe fasi foe doe joe ogri? Loekoe pikinso na tori foe wan jongoe oema ini Finland di wan toe jari pasa kaba ben bigin foe studeri na bijbel nanga Kotoigi foe Jehovah. A no de teki langa ofoe a ben de toemsi prisiri nanga den boen sani di a ben leri foe Jehovah prakseri nanga libisma èn a ben kisi wan bigi waarderi gi en boenfasi nanga lobi.
2 Ma ne en masra ben bigin foe kakafoetoe dati a ben studeri na bijbel, èn di a wégri foe tapoe, a ben bigin foe gebroiki tranga tegen en. Te foe kaba a ben go na kroetoe foe aksi wan prati foe tafra nanga bedi. A no teki langa ofoe na jongoe oema ben poti na dorosé foe na oso èn den ben dwengi en foe libi en dri jongoe pikin na baka nanga wan bébi foe pikinso moro owroe leki wan jari, foe di na kroetoe ben gi den pikin na a papa. Foe san ede? A ben misi foe doe en prekti di a ben abi foe den pikin? Nono, bikasi a stoeka foe na bijbel ben leri en joisti foe de wan moro betre wefi èn mama.
3 Wan toe wiki na baka en masra nanga tranga ben meki den poeroe en foe a presi pe a ben wroko èn meki den tjari en go na wan presi foe kisi gesontoe foe den gi wan verklari dati a law èn meki den teki en poti ini wan lawman oso. Na a bigin na datra di ben ondrosoekoe en ben wégri foe gi so wan verklari, ma bakaten ondro druk foe na masra a ben gi wel wan verklari pe ben skrifi dati na oema ben moe teki poti ini wan lawman oso. Na a pisi ten dati na jongoe oema, di ben dopoe now èn ben tron wan sma foe Jehovah Kotoigi, ben go na wan tra foto, pe a ben go na wan tra datra. Baka di a datra disi ben ondrosoekoe en, a ben gi wantron wan bewijsi pe tanapoe na ini dati a ben de gosontoe ini en froestan.
4 Ma nanga disi na datra-verklari foe na fosi datra no ben lasi krakti. Foe datede meki difrenti wiki baka makandra a ben moe kibri te leki na krakti foe na verklari ben pasa. Baka dati na datra ben wégri foe gi wan njoen verklari; foe dat ede meki na sisa ben kan drai go baka na en tanpresi. Baka wan pisi ten na masra meki den broko a trow na lanti tapoe na gron foe na prati foe tafra nanga bedi, èn na kroetoe ben gi na papa den pikin.
5, 6. (a) Disi ofoe wan srefi ondrofeni ben sa de reden foe prisiri? Foe san ede? (Mark. 10:29, 30) (b) Sortoe reden Job ben abi, soleki den sori ini den tekst, foe prisiri nanga na vervolgoe?
5 Joe ben sa si so wan ondrofeni leki wan reden foe prisiri? Seker no wan wefi èn mama ben sa firi kololoe te den ben poeroe en ini en oso èn foefoeroe en jongoe pikin poeroe foe en anoe. Ook toe a no ben sa prisiri te lobi famiriman ben sa proberi foe meki den teki en poti ini kolera, soso foe di a ben wani stoeka na bijbel èn ben wani foe gebroiki den toemsi moi gronprakseri foe en ini en libi. Ma loekoe pikinso sortoe reden Jezus e kari foe prisiri ondro den sortoe omstandigheden disi: „Prisiri èn djompo foe prisiri, bikasi oen paiman de bigi ini den hemel.” — Matt. 5:12.
6 Ja, efoe na reden foe na vervolgoe de troetroe „foe mi ede”, soleki Jezus ben taki ini na vers na fesi, dan wi kan prisiri dati wi ben de ini na okasi foe bewijsi wi getrowfasi na fesi foe Jehovah èn neleki Jezus abi wan prati na a poti reti foe en nen. Na so fasi wi e bewijsi dati na Didibri de wan léman te a de taki dati a kan hari poeroe ala sma foe na sé foe Gado. A de prisiri Jehovah Gado, te tapoe so wan fasi wi e teki na sé foe en, èn soleki wi kan si ini na tori foe Job, dan disi no sa go sondro foe kisi paiman. — Job 1:9, 10; 42:10-16; 1 Petr. 2:19, 20.
Froewakti vervolgoe
7. (a) Foe san ede kristen kan froewakti foe kisi vervolgoe? (b) Disi de so gi ala kristen ofoe soso tapoe wan toe foe den?
7 Ma foe san ede wan sma ben sa kisi vervolgoe soso foe di a wani stoeka Gado Wortoe na bijbel èn wani de wan kristen? Jezus ben gi na piki disi tapoe na aksi disi: „Efoe na grontapoe abi ogri-ati foe joe, joe sabi dati a ben abi ogri-ati foe mi bifo joe. Efoe joe ben sa de wan pisi foe grontapoe, dan grontapoe ben sa lobi sote san ben de foe en. Ma foe di joe no de wan pisi foe grontapoe, ma mi ben teki joe poeroe foe na grontapoe, foe datede meki na grontapoe abi ogri-ati foe joe. Prakseri na wortoe di mi ben taki gi joe: Wan srafoe no de moro bigi leki en masra. Efoe den vervolgoe mi, dan den sa vervolgoe joe sosrefi toe; efoe den ben hori mi wortoe, dan den sa hori di foe joe toe. Ma den sa doe ala den sani disi nanga joe foe mi nen ede, foe di den no sabi en di mi ben seni kon” (Joh. 15:18-21). Soleki na apostel Paulus ben tjari kon na krin ini en tweede brifi gi Timoteus, dan kristen moe froewakti vervolgoe. A ben skrifi: „Ala sma di wani libi nanga frede foe Gado ini wanfasi nanga Kristus Jezus, sa moe kisi vervolgoe toe.” — 2 Tim. 3:12.
8. Soema de troetroe baka na vervolgoe foe kristen èn san de en prakseri?
8 Meki wi no frigiti dati, na sma di de baka na vervolgoe, no de nowan sma moro leki na bigi gensman, Satan na Didibri. Na sé di joe e teki leki kristen tapoe wan krakti fasi èn na lobi gi Jehovah Gado de wan bewijsi dati na Didibri de wan léman, foe di a de taki dati no wan sma lobi Gado troetroe, èn dati efoe wan sma e dini en tog, a de doe disi soso foe ensrefi kon moro betre. Satan ben meki bigi, efoe a kan doe san a wani, a ben kan hari Job poeroe èn foe datede ala tra sma ook toe (Job 1:8-11; 2:3-5). Aladi a no ben man foe broko na getrowfasi foe Job, na Didibri no ben libi noiti den moeiti foe en. — 2 Kor. 4:4.
Fosten kristen kisi vervolgoe
9. Gi eksempre foe den Boekoe di e sori sortoe vervolgoe den fosten kristen ben ondrofeni?
9 Akroderi nanga na warskow foe Jezus den fosten kristen ben kisi troetroe vervolgoe, di wawan tron ben de boen hebi. Foeroe foe den, den ben poeroe ini den oso èn den ben dwengi den foe lowe go na tra kontren, soleki disi ben de so nanga na gemeente ini Jeruzalem (Tori foe den Apostel 8:1). Trawan, soleki na apostel Johannes, den ben poti ini strafoe (Openb. 1:9). Na apostel Paulus nanga den sma di ben wroko makandra nanga en ini na publiki diniwroko, den ben ston den èn naki den (Tori foe den Apostel 14:19; 16:22). Foeroe foe den fosten kristen den ben poti ini strafoe, den ben teki den goedoe foe son wan foe den, èn den ben kiri srefi son wan foe den (Kol. 4:3; Filem. 9, 10; Hebr. 10:34; 13:3; Tori foe den Apostel 12:1, 2). Ma den ben kan prisiri, foe di den ben froestan dorodoro foe san ede den ben kisi vervolgoe.
10. San e sori dati den bakaman foe Kristus ini na fosi eeuw no ben meki den tapoe skreki gi den?
10 Na vervolgoe disi ben meki dati wan stop ben kon na a wroko foe ’taki foe Gado èn foe gi kotoigi foe Jezus’, ofoe dati a ben go safri-safri? Nono, bika den fosten kristen ben wégri foe sma tapoe skreki gi den. Na tori ini Tori foe den Apostel 5:40-42 e ferteri wi dati den lantiman foe na djoe Sanhedrin „ben kari den apostel, ben krawasi den èn ben gi den na komando foe no taki moro tapoe a gron foe Jezus nen”, èn baka dati „ben meki den go”. San den kristen disi ben doe moro fara? „Den dan ben komoto foe na Sanhedrin, nanga prisiri, dati den ben feni den warti foe njan pina foe en nen ede. Èn sondro foe stop den ben tan leri ini na tempel èn oso foe oso èn foe meki na boen njoensoe bekenti foe na Kristus”.
11. Fa Petrus nanga Johannes ben teki den tapoe-skreki di ben taki gi den?
11 Na fesi, na apostel Petrus nanga Johannes ben moesoe gi frantwortoe na fesi na Sanhedrin foe di den ben dresi wan lanman èn den ben gi leri tapoe na gron foe Jezus nen. Wi e lési ini na tori: „Nanga dati den (tiriman nanga owroeman) ben kari den kon èn ben komanderi den foe no taki no wan presi moro wan sani ofoe foe leri tapoe na gron foe na nen foe Jezus. Ma Petrus nanga Johannes ben piki den: ’Kroetoe gi oen srefi ofoe a de reti ini na ai foe Gado foe arki moro na oenoe leki na Gado. Ma foe wi sé, wi no kan tapoe foe taki foe den sani di wi ben si èn jere.’ Baka di den ben tapoe skreki moro gi den, den loesoe den, foe di den no ben kan feni no wan gron foe strafoe, èn foe na pipel ede.” — Tori foe den Apostel 4:18-21.
12. Foe sortoe jepi foe Jehovah den apostel èn discipel ben begi, aladi den ben kisi vervolgoe?
12 Den tapoeskreki no ben frede den. Na tori e sori dati den apostel nanga discipel nanga reti ben begi na Jehovah ofoe en nanga jepi foe en jeje ben wani gi den krakti foe tan taki en wortoe fri èn sondro frede, na presi foe poeroe na vervolgoe. Èn dati a ben doe ook toe. — Tori foe den Apostel 4:29, 31.
13. Sortoe winimarki na poti foe Paulus ini strafoe ini Rome ben abi, akroederi san Paulus ben skrifi gi den Filipi sma?
13 Na poti foe Paulus ini strafoe ini Rome ben abi boen bakapisi, soleki a de tjari kon na krin ini en brifi gi den soema foe Filipi: „Now mi wani dati oen sabi, brada, dati mi afersi moro foeroe ben meki na boen njoensoe go na fesi, sodati mi strafoe-oso-boei ini Kristus ben kon a mindri na heri pretoriaanse wakti èn ala trawan, èn a moro bigi pisi foe den brada ini Masra e sori moro foeroe dekati foe taki na wortoe foe Gado sondro frede, foedi den ben kisi froetrow foe mi strafoe-oso-boei ede” (Fil. 1:12-14). Ja, na vervolgoe foe Paulus ben meki dati wan moro bigi kotoigi ben gi, no wawan foe na publiciteit ede èn den okasi di a ben abi foe gi kotoigi na bigiman foe kroetoe, ma ook toe, foe di tra kristen ben kisi nanga dati dekati foe meki den activiteit kon moro bigi.
Vervolgoe ini „den laatste dé”
14. Sortoe reden Jezus ben gi foe na vervolgoe di wi e ondrofeni ini disi ten?
14 Neleki den proféti foe Gado ini owroe ten èn neleki Jezus Kristus nanga en apostel nanga discipel ini na fosi eeuw ben ondrofeni vervolgoe, na so kristen ini den „laatste dé” foe na seti foe sani kan froewakti, dati den moe ondrofeni vervolgoe. Jezus ben taki disi leki wan pisi foe na samengestelde „marki” foe na kaba foe na seti foe sani. A ben taki: „Dan den sa gi joe abra na benawtoe èn kiri joe, èn foe mi nen ede joe sa de gi ala naatsi wan sani foe ogri-ati.” — Matt. 24:9, 15.
15, 16. (a) Sortoe tra profétitori di e go foe wi ten e sori dati wi kan froewakti vervolgoe leki wan bakapisi foe wi kotoigi-wroko? (b) Sortoe aksi wi e aksi now foe wi go loekoe moro fara?
15 Baka ten Jezus ben ferteri na na apostel Johannes san en bakaman na grontapoe ben kan froewakti baka na gebortoe foe na hemel kownoekondre. Na agersi fasi a ben taki: „Di now na kaiman (di ini vers 9 den ben kon sabi leki „na fosi sneki, di den e kari Didibri nanga Satan”) ben si dati a ben smési go na grontapoe, a ben vervolgoe na oema (Gado universele organisaatsi) di ben meki na manpikin (na kownoekondre nanga Kristus leki kownoe). Èn na kaiman ati ben kon bron nanga na oema èn a ben go foe feti nanga den wan di ben tan abra foe en siri, di e hori den komando foe Gado èn di abi na wroko di de ini na gi kotoigi foe Jezus.” — Openb. 12:13, 15-17.
16 Disi ben pasa ini den „laatste dé” disi? Na sortoe fasi troe kristen ini disi ten moe ben horidoro ondro vervolgoe, èn fa den ben kan prisiri wansi vervolgoe ben de? Sortoe krakti vervolgoe ben abi tapoe den, èn tapoe foeroe foe den sma di ben si disi? Den aksi disi wi sa loekoe ini na tra artikel.
[Prenki na tapoe bladzijde 158]
Den sma di neleki Job e bewijsi dati Didibri de van léman, no sa go sondro paiman
[Prenki na tapoe bladzijde 159]
Petrus, Johannes nanga tra fosten kristen ben wégri dati lantiman, di ben gens na wroko di Gado ben gi den foe doe, tapoe skreki gi den
[Prenki na tapoe bladzijde 161]
„Na kaiman ben kisi atibron èn ben go foe feti nanga den sma di ben abi na wroko foe gi kotoigi foe Jezus”. — Openbaring 12:15-17.