Tru lobi e pai
„Gado no de onregtfardiki so taki a sa frigiti yu wroko èn na lobi di yu ben sori gi en nen.” — HEBREW SMA 6:10.
1, 2. Fu san-ede tru lobi de gi wi srefi wan paiman?
LOBI di no e suku wini gi en srefi na a moro bigiwan, na moro graniwan, na moro diri eigifasi di wi kan sori. Na lobi disi (Griki, a·gaʹpe) doronomo e aksi furu fu wi. Ma fu di wan Gado fu retidu nanga lobi ben meki wi, meki wi e feni taki lobi di no e suku wini gi en srefi e pai trutru. Fu san-ede disi de so?
2 Wan reide taki tru lobi e pai abi fu du nanga a psychosomatisch gronprakseri, na krakti di prakseri nanga firi abi na tapu wi skin. Wan koniman tapu na kontren fu stress taki: „’Lobi a sma na yu sei’ na wan fu den moro koni datra rai di gi oiti wanten.” Iya, „wan man fu lobi bunfasi e handri nanga en eigi sili na wan fasi di e pai” (Odo 11:17). Na srefi sani den wortu wani taki: „Na sili di lobi fu gi sani sa meki kon fatu èn na sma di e gi trawan watra fri en srefi tu den sa gi watra fri.” — Odo 11:25; teki gersi Lukas 6:38.
3. Fa Gado e handri fu meki tru lobi e pai?
3 Lobi e pai so srefi bika Gado e pai a no suku wini gi yu srefi. Wi e leisi: „A sma di e sori bun-ati na a mofinawan e leni Yehovah, èn a fasi fa en e handri nanga trawan [Gado] sa pai en baka” (Odo 19:17). Yehovah Kotoigi e handri ini akruderi nanga den wortu disi te den e meki na bun nyunsu fu Gado kownukondre bekenti. Den sabi taki ’Gado no de onregtfardiki so taki a sa frigiti den wroko fu den èn na lobi di den e sori gi en nen’. — Hebrew sma 6:10.
Na moro moi eksenpre fu wi
4. Suma e gi na moro bun eksenpre taki tru lobi e pai, èn fa a du dati?
4 Suma e gi na moro moi eksenpre taki tru lobi e pai? We, nowan enkri tra sma moro leki Gado srefi e sori disi! A „lobi a grontapu [fu libisma] so te, taki a ben gi en wan enrki gebore Manpikin” (Yohanes 3:16). A gi di a gi en Manpikin, so taki den wan di e teki na frulusu paiman dati ben kan abi libi fu têgo seiker kostu Yehovah furu, èn a ben sori krin taki a abi lobi èn e firi gi trawan. Disi e kon a krin moro fara ini a tori taki ’ini ala den banawtu fu Israèl na ini Egypte a ben de banawtu gi en’ (Yesaya 63:9). Omoro banawtu a ben musu de gi Yehovah fu si en Manpikin e pina na a pina-udu èn yere en e bari taki: „Mi Gado, mi Gado, fu san-ede yu libi mi?” — Mateyus 27:46.
5. San psa fu di Gado ben lobi libisma so te taki a ben gi en Manpikin leki wan ofrandi?
5 Yehovah ben feni taki a sori di a sori tru lobi e pai? Seikerseiker! Fu tru, wan moi piki Gado ben man fu slenger go na ini na fesi fu Didibri fu di Yeises ben sori taki a de kotrow awansi ala san Satan ben kan du nanga en! (Odo 27:11). Te yu e luku en bun, dan ala sani di na Kownukondre fu Gado sa meki kon tru fu krin Yehovah nen fu syen, fu meki na paradèis kon bun baka na a grontapu disi, èn fu gi milyunmilyun sma têgo libi sa feni presi bika Gado ben lobi libisma so te taki a ben gi na moro diri gudu fu en ati leki wan ofrandi.
Na moi eksenpre fu Yeises
6. Lobi ben buweigi Yeises fu du san?
6 Wan tra moi eksenpre di e sori taki tru lobi e pai na di fu Gado Manpikin, Yeises Krestes. A lobi en hemel Tata, èn na lobi dati buweigi Yeises fu du Yehovah wani awasi san a e kostu (Yohanes 14:31; Filipi sma 2:5-8). Yeises ben tan sori en lobi gi Gado aladi sontron dati ben wani taki taki a ben musu fu begi en Tata tranga „nanga tranga babari èn watra-ai.” — Hebrew sma 5:7.
7. Na sortu fasi Yeises feni tru lobi leki wan sani di e pai?
7 Yeises ben kisi pai gi so wan lobi di e òfer en srefi? Iya, seiker! Prakseri na prisiri di a ben kisi fu ala den bun sani di a ben du ini den dri-nanga-afu-yari fu en diniwroko. O furu a ben yepi sma na yeye fasi èn a skin fasi! Na tapu fu ala sani, fu di a ben demo taki wan volmaakti man ben kan kibri en soifri retifasi na Gado fesi na wan volmaakti fasi awansi san Satan ben kan tyari kon tapu en, Yeises ben abi na satisfaksi fu sori taki Didibri na wan leiman. Boiti fu dati, leki wan kotrow dienstknekti fu Gado, Yeises ben kisi na bigi paiman fu no kan dede moro baka di a ben opo baka fu libi na ini hemel (Rome sma 6:9; Filipi sma 2:9-11; 1 Timoteyus 6:15, 16; Hebrew sma 1:3, 4). Èn sortu wondru grani didon na en fesi na ini Armagedon èn na ini en Dusun Yari Tiri, te na paradèis sa kon bun baka na grontapu èn milyunmilyun sma sa opo kon baka fu dede! (Lukas 23:43) Degedege no de taki Yeises ondrofeni taki tru lobi e kisi pai.
Na eksenpre fu Paulus
8. San ben de na ondrofeni fu Paulus fu na tru lobi fu en gi Gado èn gi en konpe libisma?
8 Na apostru Petrus ben aksi Yeises wan leisi: „Luku! Wi libi ala sani èn ben waka na yu baka; san sa de trutru na porsi fu wi?” Fu wan pisi, Yeises ben piki: „Ibri sma di libi oso ofu brada ofu sisa ofu papa ofu mama ofu pikin ofu gron fu mi nen ede sa kisi furu tron moro èn sa kisi libi fu têgo” (Mateyus 19:27-29). Ini na apostru Paulus, di ben nyanbun fu furu blesi, so leki Lukas skrifi spesrutu na ini na buku Tori fu den Apostru, wi abi wan eksenpre fu disi di e seki yu ati. Tru lobi gi Gado èn gi en konpe libisma ben meki Paulus libi a wroko fu en libi leki wan Fariseiman di abi grani. Prakseri tu, fu san Paulus ben frudrage ini tori fu naki, krosibei fu dede, kofar, nanga pina — alamala fu na tru lobi fu Gado nanga En santa diniwroko ede. — 2 Korente sma 11:23-27.
9. Fa Paulus kisi pai fu di a ben e sori tru lobi?
9 Yehovah ben pai Paulus fu di a ben de so wan tumusi bun eksenpre ini a sori fu tru lobi? We, prakseri fa Paulus diniwroko ben meki froktu. A ben man fu opo na wan kresten gemeente baka na trawan. Èn fu du sortu wondru Gado ben gi en a krakti! (Tori fu den Apostru 19:11, 12) Paulus ben abi na grani so srefi fu kisi boven-natuurlijk fisyun èn fu skrifi 14 brifi di de now pisi fu den kresten Griki Buku. Fu poti na kroon tapu ala disi, den ben gi en na prijs fu libi sondro fu kan dede moro na ini hemel (1 Korente 15:53, 54; 2 Korente sma 12:1-7; 2 Timoteyus 4:7, 8). Paulus ben feni seiker taki Gado e pai tru lobi.
Tru lobi e pai na ini wi dei
10. San a kan kostu fu tron wan disipri fu Yeises èn fu sori wi lobi gi Yehovah?
10 Yehovah Kotoigi na ini a ten disi feni so srefi taki tru lobi e pai. Fu sori wi lobi gi Yehovah fu di wi e teki en sei èn e tron disipri fu Yeises kan kostu wi wi libi srefi leki sma di e kibri den soifri retifasi. (Teki gersi Openbaring 2:10.) Disi na fu san-ede Yeises ben taki taki wi musu teri den kostu. Ma wi no e du dati fu bepaal efu a de fu wan disipri e pai ofu no. Na presi fu dati, wi e du disi fu sreka wi srefi fu pai awansi san na disipri wroko kan kostu. — Lukas 14:28.
11. Fu san-ede son sma no e gi den srefi abra na Gado?
11 Na ini a ten disi, furu sma — sondro degedege milyunmilyun sma — e bribi na boskopu di Yehovah Kotoigi e tyari gi den fu na Wortu fu Gado. Ma den e kikbak fu gi den srefi abra na Gado èn teki dopu. Disi kan de so fu di den e mankeri tru lobi gi Gado di trawan abi? Furu sma e misi fu teki den stap fu gi den srefi abra èn teki dopu fu di den wani tan abi na bun-ati fu wan patna di no de na bribi. Trawan no e kon krosibei fu Yehovah bikasi den abi na fasi fu wan bisnis man di ben taigi wan Kotoigi: „Mi lobi sondu.” Leki fa a sori, dan den sortu spesrutu sma dati no e warderi ala san Gado nanga Krestes du gi den.
12. San na tijdschrift disi taki, san e sori na bigi waarde fu na paiman fu sabi, di e tyari wi kon moro krosibei na Gado ini tru lobi?
12 Efu wi abi trutru warderi gi ala san Yehovah Gado nanga Yeises Krestes du gi wi, dan wi sa sori disi fu di wi e wani fu pai awansi san a e kostu fu dini wi hemel Tata èn fu de wan fu Yeises disipri. Fu na tru lobi ede gi Gado, meki man nanga uma na ini ala fasi fu libi — bisnisman di sani e waka bun gi den, prenspari sport sma, èn so moro fara — kenki wroko fu den libi, pe den ben e suku den eigi bun nomo, gi na kresten diniwroko, netso leki na apostru Paulus ben du. Èn den no ben sa teki noti na presi fu den paiman fu sabi èn dini Gado. Ini na tori disi, Na Waktitoren ben taki wan leisi: „Wi aksi sontron: Omeni brada ben sa de klariklari fu teki wan dusun dala èn libi san den sabi fu na Waarheid. No wan anu ben de fu si! Suma ben sa teki tindusun dala? Nowan anu! Suma ben sa teki wan milyun dala? Suma sa teki na heri grontapu na a presi fu san a sabi fu na fasi fu Gado èn na plan fu Gado? Nowan sma! Ne wi ben taki: Unu a no wan takru ipi di no de tevrede, lobi mati. Efu unu e firi unu srefi so gudu taki unu no ben sa teki noti na presi fu na sabi fu Gado di unu abi, dan unu e firi unu srefi netso gudu leki wi e firi wi srefi” (15 december, 1914, bladzijde 377, [Ingrisitongo]). Iya, soifri sabi fu Gado nanga den prakseri fu en e hari wi kon moro krosibei na en ini tru lobi di e pai fu tru.
13. Fa wi musu si stuka nanga wi srefi?
13 Efu wi lobi Gado, dan wi sa du muiti fu sabi en wani èn du en wani (1 Yohanes 5:3). Wi sa teki na studeri nanga wi srefi, begi, èn a go na kresten konmakandra leki wan seryusu sani. Ala disi e aksi fu wi ofru wi srefi, fu di den wroko disi abi na ini a kobroiki fu ten, krakti, èn tra yepisani. Wi ben kan abi fu teki a mindri a luku fu wan tv programa èn fu teki prati ini beibri-studi nanga wi srefi. Ma omoro tranga wi e kon na yeye fasi, omoro betre wi man fu preiki gi trawan, èn omoro wi e puru fu den kresten konmakandra te wi e teki den sortu stuka dati seryusu èn e poti nofo ten gi disi na wan sei! — Psalm 1:1-3.
14. O prenspari begi èn wan bun matifasi nanga Yehovah Gado de?
14 Wi e prisiri fu taki alaten nanga wi hemel Tata fu di wi ’e horidoro ini begi’? (Rome sma 12:12) Ofu nofotron wi de tumusi bezig fu du reti na a diri grani disi? ’Begi sondro fu stòp’ na wan prenspari fasi fu tranga wi matifasi nanga Yehovah Gado (1 Tesalonika sma 5:17). Èn noti no de fu yepi wi te wi abi fu du nanga tesi, leki wan bun matifasi nanga Yehovah. San ben yepi Yosef fu kakafutu di na uma fu Potifar ben tesi en? Èn fu san-ede Danièl no ben stòp fu begi di na wet fu den Media sma nanga Persia sma ben tapu en fu begi Yehovah? (Genesis 39:7-16; Danièl 6:4-11). We, wan bun matifasi nanga Gado ben yepi den man disi fu komoto leki winiman, net soleki fa a sa yepi wi fu du so!
15. Fa wi musu si kresten konmakandra èn fu san-ede?
15 Dan, o seryusu wi e teki a go na den feifi alawiki konmakandra fu wi? Wi e meki na weriskin, wan lekti firi di wi no firi wi srefi bun, ofu wan pikinso takru weer e kon a mindri wi fruplekti fu no libi den konmakandra nanga konpe bribisma? (Hebrew sma 10:24, 25) Wan Amerkan masyinist di e kisi bun pai ben si taki en wroko doronomo ben kon a mindri te a ben musu de na den kresten konmakandra. Fu dati-ede a ben kenki a wroko fu en, teki wan lasi na monisei so taki a ben man fu go alaten baka na ala den gemeente konmakandra. Wi konmakandra e yepi wi fu nyanbun fu gi makandra deki-ati èn fu tranga na bribi fu makandra (Rome sma 1:11, 12). Na ini ala den afersi disi, wi no e feni taki „a sma di e sai bogobogo sa koti bogobogo tu?” (2 Korente sma 9:6) Iya, fu demo tru lobi ini den sortu fasi disi e pai tumusi.
Tru lobi èn wi diniwroko
16. San kan de a bakapisi te lobi e buweigi wi fu gi okasi preiki?
16 Lobi e buweigi wi fu preiki na bun nyunsu leki na pipri fu Yehovah. Fu eksenpre, a e buweigi wi fu teki prati na okasi preiki. Wi kan draidrai fu gi okasi preiki, ma lobi sa pusu wi fu taki. Iya, lobi sa meki wi denki fu taktvol fasi fu bigin wan takimakandra èn dan fu tyari en go tapu na Kownukondre. Fu gi wan eksenpre: Na ini wan opolangi, wan kresten owruman ben sidon wan leisi na sei wan lomsu katolik pristri. Biginbigin, na owruman ben poti furu aksi gi na pristri di no ben meki a naki futu. Ma, na ten di a pristri ben komoto fu na opolani, a belangstelling fu en ben pusu en fu teki tu fu wi buku. Fa disi de wan bun bakapisi fu a preiki na okasi!
17, 18. Lobi sa meki wi du san ini a tori fu na kresten diniwroko?
17 Tru lobi e pusu wi so srefi fu teki prati alaten baka ini na oso-fu-oso-preikiwroko èn tra fasi fu na kresten diniwroko. Fu so fara wi man fu abi wan beibri takimakandra, dan wi sa tyari grani gi Yehovah Gado èn sa yepi sma di gersi skapu fu kon na tapu a pasi fu têgo libi. (Teki gersi Mateyus 7:13, 14.) Srefi efu wi no man fu abi wan beibri takimakandra, a muiti fu wi no ben sa de fu soso. A de di wi e de na den oso fu den sma e dini leki wan kotoigi, èn wi srefi e nyanbun fu na diniwroko, fu di wi no kan meki beibri waarheid bekenti sondro fu tranga wi bribi. Fu tru, a e teki sakafasi fu go oso-fu-oso, ’fu du ala sani fu na bun fu na bun nyunsu, so taki wi kan tron sma di e teki prati na en makandra nanga trawan’ (1 Korente sma 9:19-23). Ma fu lobi fu Gado nanga konpe libisma, meki wi e meki muiti na wan sakafasi èn e kisi pai nanga furu blesi. — Odo 10:22.
18 A e aksi so srefi tru lobi gi den futuboi fu Yehovah fu de nanga bun konsensi ini a tori fu a meki fu gobaka na sma di abi belangstelling gi beibri waarheid. Fu hori beibri-studi na wan wiki baka na trawan èn na wan mun baka na trawan na wan sori fu lobi gi Gado nanga sma na yu sei, fu di na wroko disi e aksi fu wi gi ten, muiti, nanga sani na skinfasi (Markus 12:28-31). Toku, te wi e si taki wan fu den beibri-studenti disi e teki dopu èn kande srefi e go ini na furuten diniwroko, dan a no de so taki wi abi na overtoigi taki tru lobi e pai? — Teki gersi 2 Korente sma 3:1-3.
19. San lobi abi fu du nanga furuten diniwroko?
19 Lobi di no e suku wini gi en srefi e buweigi wi fu òfer sani na skin fasi di e meki a libi makriki fu na bun fu na furuten diniwroko efu wi kan teki prati na so wan wroko. Dusundusun Kotoigi kan kotoigi taki fu sori na lobi fu den na a fasi dati ben pai moro ala sani. Efu omstandigheid e gi yu pasi fu teki prati ini na furuten diniwroko ma yu no e meki kobroiki fu den, dan yu no sabi pikinso srefi sortu blesi yu e misi. — Teki gersi Markus 10:29, 30.
A e pai na tra fasi tu
20. Fa lobi e yepi wi fu gi trawan pardon?
20 Wan tra fasi fa tru lobi e pai na dati a e yepi wi fu gi trawan pardon. Iya, lobi „no e teri ogri.” Te yu e luku bun, dan „lobi e tapu wan heri ipi sondu” (1 Korente sma 13:5; 1 Petrus 4:8). „Wan heri ipi” wani taki furu sondu, a no so? Èn fa a e pai fu kisi pardon! Te yu e gi pardon, dan disi e meki yu èn a wan di du sondu na yu firi moro betre. Ma srefi moro prenspari a tori de, taki efu wi no gi pardon kba na den wan di du sondu na wi, wi no kan fruwakti taki Yehovah gi wi pardon. — Mateyus 6:12; 18:23-35.
21. Fa tru lobi e yepi wi fu saka wi srefi?
21 Moro fara, tru lobi e pai fu di a e yepi wi fu saka wi srefi. Efu wi lobi Yehovah, dan wi sa saka wi srefi na ondro a makti anu fu en (1 Petrus 5:6). Lobi gi en sa buweigi wi so srefi fu saka wi srefi na ondro na wrokosani fu en di a teki, „na koni èn kotrow srafu.” Disi wani taki so srefi fu saka wi srefi na ondro den wan di e teki fesi na ini a gemeente. Disi e pai bikasi efu wi misi fu du disi, a ben sa „du wi ogri” (Mateyus 24:45-47; Hebrew 13:17). A no de fu taki, na gronprakseri disi fu saka wi srefi fiti so srefi na ini na osofamiri. So wan fasi fu waka nanga libi e pai bika a e meki na prisiri, na vrede, nanga na wánfasi fu na famiri go na fesi aladi a e gi wi na satisfaksi di e go makandra nanga a sabi di wi sabi taki wi e prisi Gado. — Efesia sma 5:22; 6:1-3.
22. Fa wi kan de trutru koloku?
22 A de krin sobun, taki na moro bigi eigifasi di wi kan kweki na a·gaʹpe, na sortu fu lobi di no e suku wini gi en srefi èn di abi en fondamenti tapu gronprakseri. Èn degedege no kan de taki tru lobi e pai. Fu dati-ede, wi sa de koloku futru efu wi kweki èn sori na eigifasi disi na moro bigi marki gi na glori fu wi lobi Gado, Yehovah.
Fa yu ben sa piki?
Na sortu fasi Yehovah Gado sori trutru lobi?
Fa Yeises Krestes ben sori lobi?
Sortu eksenpre na apostru Paulus ben gi ini a sori fu lobi?
Fa Yehovah Kotoigi ben sori lobi?
Fu san-ede yu ben sa taki taki tru lobi e pai?
[Prenki na tapoe bladzijde 28]
A lobi fu Yehovah gi na libismafamiri ben buweigi en fu gi en Manpikin so taki wi ben kan kisi têgo libi. Yu e warderi so wan tru lobi?
[Prenki na tapoe bladzijde 30]
Tru lobi gi Yehovah sa buweigi wi fu „horidoro ini begi”