Jezus en libi nanga diniwroko
Mama e meki a sma di e sreka a pasi
ELISABETH moe kisi heri esi now en bébi. Na ini den dri moen di ben pasa Maria ben de nanga en. Ma now a de a ten gi Maria foe gi adjosi èn foe waka na langa waka go baka na oso na Nazareth. Baka sowan siksi moen ensrefi sa kisi wan bébi toe.
Sjatoe baka di Maria ben gwe. Elisabeth e meki wan pikin. Fa bigi prisiri e de te a meki foe na pikin waka boen èn ala sani de heri boen nanga Elisabeth nanga en bébi! Efoe Elisabeth e meki den birtisma èn famiri foe en si na pikin bébi, den alamala e prisiri nanga en.
Na ini Israël leki fa na wet foe Gado taki, dan wan pikin boi moe besnij na tapoe na di foe aiti dé baka di en mama meki en. Gi na okasi dati mati nanga famiri e kon na fisiti. Den e taki dati na boi moe nen Zacharias, leki fa en papa nen. Ma Elisabeth no e agri nanga den. ’Nono!’ a e taki. ’A moe nen Johannes.’ Prakseri taki na engel Gabriël ben taki dati a pikin moe kisi a nen dati.
Ma den mati foe en e kakafoetoe. ’No wan sma na ini joe famiri nen so.’ Dan nanga sori nanga anoe den e aksi a papa fa a boi moe nen. Zacharias e aksi wan skrifitafra èn leki wan ferwondroe gi ala sma a e skrifi: ’Johannes na en nen.’
Na a srefi momenti Zacharias tongo e loesoe baka nanga jepi foe wan wondroe. Joe kan memre ete dati wantenwanten so a no ben man taki morofoe di a no ben e bribi di na engel ben taki dati Elisabeth ben sa kisi wan pikin. Te Zacharias e go taki now, dan ala sma di e libi ini na birti e ferwondroe èn den e taki a mindri makandra: ’San a pikin disi sa tron?’
Zacharias e kon foeroe now nanga santa jeje, èn a e taki a fesi foe en manpikin: ’Den sa kari en wan proféti foe na Moro Héwan èn a sa go a fesi gi Jehovah èn sreka a pasi gi en. A sa ferteri a pipel taki den moesoe kisi jepi, foe di den sondoe e kisi pardon.’
Ini ala a ten dati, Maria di a de krin no ben trow ete, ben doro oso na Nazareth. San sa pasa nanga en te a kon na krin dati a de nanga bere? Lukas 1:56-80; Leviticus 12:2, 3.
◆ Omeni moro owroe Johannes ben de leki Jezus?
◆ San ben pasa alamala di Johannes ben owroe aiti dé?
◆ Sortoe wroko leki fa ben taki a fesi Johannes ben sa go doe?