Waka nanga fertrow na ini na tiri foe Jehovah
„De nanga dek’ati èn de tranga. No frede èn no krempi na ini wan foe frede ede gi den, bika Jehovah oen Gado srefi e hari go nanga oenoe. A no sa libi oen ofoe gwe libi oen krinkrin.” — DEUTERONOMIUM 31:6.
1. Fa Jehovah ben sori dati a ben de wan tiriman foe den Israëlsma di no ben abi en speri?
JEHOVAH ben sori taki a de wan tiriman di no abi en speri di a ben tjari den Israëlsma komoto foe na katibo na ini Egypte. A no ben tjari den wawan pasa na gran sabana, ma a ben sorgoe ooktoe foe njanjan nanga dringi èn a ben gi den leri di ben de sondro fowtoe. Foe dat’ede meki den Levietsma na ini a ten foe Nehemia ben kan taki: „Joe, ija joe [Jehovah Gado], no ben libi den na ini na gran sabana na ini joe sari-ati di de pasa marki. Na wolkoe kolom srefi no ben drifi a tapoe den na déten, foe tjari den na tapoe na pasi, èn ooktoe na faja postoe na neti, foe kan krin na pasi gi den di den ben moesoe go. Èn a boen jeje foe joe joe ben gi foe ben meki den tan na ai, èn a manna foe joe, joe no ben hori a baka foe den mofo, èn watra joe ben gi den foe na dréwatra foe den èn fotenti jari langa joe ben sorgoe foe den njanjan gi den na ini na gran sabana. Noti den ben mankeri. Srefi den krosi foe den no ben broko èn den foetoe foe den srefi no ben sweri”. — Nehemia 9:19-21.
2. Foe san-ede meki Mozes ben kan gi den Israëlsma tranga „foe de nanga dek’ati èn de tranga”?
2 Na Gado Leriman ben leri den Israëlsma nanga jepi foe tranga leri di a ben gi den leki wan Tata, san ben wani taki foe sori geregtigheid èn foe de regtvaardiki. Ala san a ben doe ben de foe a boe foe den. Srefi efoe den ben e knoroe èn den ben e opo densrefi, a ben abi foeroe pasensi èn no ben libi den. Spesroetoe te den ben kon tanapoe a fesi féjanti legre di na ini nomroe ben de moro foeroe, Jehovah ben sori taki a ben de wan bekwaam Tiriman di ben tjari hebi lasi kon a mindri den sma di ben kon feti nanga den. Mozes ben taki a waarheid di a ben gi den Israëlsma dek’ati nanga den wortoe: „De nanga dek’ati èn de tranga. No frede èn no krempi na ini wan foe frede ede gi den, bika Jehovah, oen Gado srefi e hari go nanga oen. A no sa libi oen èn no sa gwe libi oen kwetkweti” (Deuteronomium 31:1, 6). Gado ben sa hari go nanga den efoe den ben sori bribi. Fa disi ben de wan dek’ati gi den foe waka nanga fertrow na ini a tori foe Jehovah!
Warskow foe a ten di pasa
3. Fa na pipel Israël eri esi baka di den ben kon fri foe katibo na Egypte, ben sori taki den no de grantangi èn ben abi mankeri foe fertrow na ini Jehovah?
3 Tokoe den ondrofeni foe den Israëlsma de wan warskow gi wi. Aladi foe wan sjatoe ten pasa den ben kon fri foe katibo foe Egypte, den ben sondoe ten na ten baka tége na tjariman foe den di den no ben e si. Aladi Mozes ben de na tapoe na bergi Sinaï den ben kisi na wet, den ben sori taki den no ben de grantangi gi ala sani san Gado ben doe gi den. Den ben kisi Aäron so fara foe meki wan gowtoe pikin kaw èn ben anbegi disi tapoe na fesa di Aäron ben kari „wan fesa gi Jehovah” (Exodus 32:1-6). Tin foe den twarfoe spion di den ben seni go foe go loekoe a kondre Kanaän ben sori taki den no ben abi bribi. Soso Jozua nanga Kaleb ben gi na pipel dek’ati foe hari go ini na kondre èn foe teki en abra. Ma Israël no ben handri nanga bribi ini Gado, di ben gi foe dat’ede komando dati ala man foe „twenti jari owroe èn moro”, boiti na lo Levi nanga den getrow man Kaleb nanga Jozua, na ini na pisten foe fotenti jari ben sa dede na ini na bigi sabana (Numeri 13:1-14:38; Deuteronomium 1:9-40). Ala disi séker moe de wan warskow gi wi tége so wan sortoe fasi foe no sori tangi èn wan mankeri foe fertrow na ini a tiri foe Jehovah.
4. Fa na historia foe Israël e sori dati nanga reti den rampoe ben kon tapoe Juda, Jeruzalem nanga na tempel na ini 607 bifo G.T.?
4 Aladi den Israëlsma ben waka lontoe fotenti jari langa na ini na bigi sabana, tokoe Jehovah no ben libi den. A ben tan feti den feti foe den. Baka na dede foe Mozes nanga Jozua Gado ben wiki kroetoeman kon foe fri a pipel foe en foe den féjanti foe den di ben kwinsi den. Ma na ini a ten dati na pipel foe Israël ben doe san ben de joisti na ini den égi ai èn godelowsoe doe — ogri na tra sma, hoeroedoe nanga afkodré ben e njan pré (Kroetoeman 17:6-19:30). Di bakaten den ben wani wan libisma kownoe foe de net leki den naatsi di ben de lontoe den, Jehovah ben jere a begi foe den ma ben warskow den foe den bakapisi (1 Samuël 8:10-18). Ma srefi na kownoe wroko foe na oso foe David no „ben prisiri na pipel èn ini den dé foe Rehabeam tin lo ben opo densrefi” (1 Kownoe 11:26-12:19). Na prakseri dati na Gado srefi ben e tjari den, ben figi poeroe moro nanga moro na ini a prakseri foe a moro bigi pisi foe den. Na pori di ben kon tapoe Jeruzalem nanga na tempel èn ooktoe na trowe na gron foe na kownoekondre foe Juda nange anoe foe den Babylonsma na ini 607 bifo G.T, ben de strafoe na wan pipel di ben ferdini dati èn di no ben waka nanga fertrow na ini Jehovah tiri. Fa disi de wan warskow gi wi!
Jehovah tiri tapoe wan njoen naatsi
5. San Jehovah ben gi na ini na sma foe Jezus, èn san Jezus ben sa doe?
5 Net leki den Israëlsma foe owroeten na so den bakaten dienstknegti foe Jehovah ben kon tanapoe alaten baka na fesi omstandigheden di ben kenki, ma a ben tjari den sondro fowtoe. Di Jezus foe Nazareth na ini 29 G.T. ben meki den dopoe en na ini watra, dan Gado ben gi wan proféti nanga tiriman di ben bigi moro leki Mozes. Leki na Messias a ben sa tjari sma komoto foe na godelowsoe grontapoe di de na ini na makti foe Satan (Mattéüs 3:13-17; Deuteronomium 18:18, 19; Daniël 9:25; Tori foe den Apostel 3:19-23; 1 Johannes 5:19). Ma sortoe sortoe foe sma? A no de foe taki dati a ben de den djoe èn tra sma di ben sa sori bribi na ini na Messias di na Bigi Hemel Tiriman, Jehovah Gado ben gi.
6. (a) Fa a ben doe kon dati Jezus bakaman ben man foe préki èn foe ben sorgoe foe wan organisaatsi di ben e tan gro? (b) Foe san-ede bakaten a ben gersi leki na leti foe na bijbel waarheid ben kon dede?
6 Jezus ben leri en bakaman den wondroe waarheid foe Gado èn ben gi den na fanowdoe leri foe na diniwroko (Lukas 10:1-16). Di Kristus ben klari en diniwroko èn ben prisrteri ensrefi leki srakti-ofrandi foe na boen foe na sondoe foe na libismafamiri, a ben libi foe dat’ede bakaman a baka di ben kisi leri foe ben tjari na prékiwroko go moro fara èn foe ben tiri den afersi foe na orga foe sma di ben e bribi na ini en èn di ben e kon moro bigi. Na ini a ten foe den apostel hebi fertolgoe ben de. Ma na anoe foe Jehovah ben de nanga en pipel èn a wondroe gro ini a nomroe foe bribiman ben de wan krakti gi a pina foe den (Tori foe den Apostel 5:41, 42; 8:4-8; 11:19-21). Bakadi Jezus apostel nanga den krosbé kompe wrokoman foe den ben dede, dan den sma di ben taki dati den de bakaman foe Kristus, ben kon na ondro na tirimakti foe ogri-ati èn asranti kerkileriman nanga kownoe (Tori foe den Apostel 20:28-30). Foe di na toestand disi ben tan go doro so wan tinaféfi hondro jari, a ben gersi leki na leti foe na bijbel waarheid ben dede.
7. Oten èn fa Jehovah ben meki a tiri foe en kon njoen baka, èn san a ben tjari kon na krin gi en disiten dienstknegti?
7 Ne ben kon netleki ’wan sten di ben e bari na ini na sabana’ na boskopoe: „Na Kownoekondre kon krosbé!” (Teki gersi Jesaja 40:3-5; Lukas 3:3-6; Mattéüs 10:7.) Na ini a di foe toe afoe foe na di foe tinanégi jarhondro Jehovah ben meki a tiri foe en kon njoen baka èn a ben bigin foe kari en troe anbegiman komoto foe na godelowsoe grontapoe disi nanga en Babylon kerki sistema (Openbaring 18:1-5). Nanga jepi foe en skrifi Wortoe èn na santa jeje Gado ben tjari kon na krin gi en disiten dienstknegti dati na ini a jari 1914 na kaba ben sa kon foe tirimakti ini na anoe foe heiden naatsi èn ooktoe na glori Jezus Kristus, di Gado ben ferkisi leki Kownoe tapoe na heri libismafamiri ben sa poti tapoe na troon ini hemel. — Lukas 21:24; loekoe Jariboekoe foe Jehovah Kotoigi 1976, blz. 31-34.
8. (a) San ben orga baka dati? (b) Soema ben moksi densrefi na den salfoe bakaman foe Jezus, èn fa a ben kon boen na krin dati Gado nanga Kristus ben abi na tiri?
8 Bakadati wan njoen naatsi di ben de na fikapisi foe jeje Israël, ben orga èn den ben kisi krin leti moro fara foe a prakseri foe Gado èn ben kisi leri foe na diniwroko dorodoro. Bakaten wan ipi bribiman nanga wan grontapoe howpoe ben go moksi densrefi na den salfoe bakaman disi foe Kristus. Now ala den Kotoigi foe Jehovah disi makandra e meki nanga prisiri en nen nanga kownoekondre bekenti te na den kaba pisi foe na grontapoe (Jesaja 66:7, 8; Galacia 6:16; Openbaring 7:4, 9, 10). Foe na fasi fa den activiteit foe den kotoigi orga, e kon na krin dati Jehovah nanga en Kownoe-Manpikin abi na tiri. Disi e kon spesroetoe na krin foe na boen fasi fa miljoenmiljoen opregti sma ben opo doe wan sani èn di ben tron getrow fesiman foe Kownoekondre-tirimakti. Joe de wan pisi foe a kolokoe ipi disi di e go na fesi nanga fertrow na ini na tiri foe Jehovah. — Micha 4:1, 2, 5.
9. Sortoe grontapoe gemeenschap ben kon, èn fa a fasi ben de nanga a tiri foe Gado èn nanga theokratis tirimakti?
9 Te foe kaba Jezus bakaman ben sa moe de kotoigi foe en „te na den moro farawe kontren foe na grontapoe” (Tori foe den Apostel 1:6-8; Markus 13:10). Foe dat’ede meki Jehovah Kotoigi e meki a boen njoensoe foe a kownoekondre now bekenti abra na heri grontapoe èn den „di abi na joisti jejefasi ini na tégo libi” e teki na waarheid nanga wan prisiri ati. Den e go de wan pisi foe wan grontapoe gemeenschap foe jeje brada nanga sisa di nanga ala prisiri e teki na tiri foe Gado èn di ben saka densrefi na ondro theokratis tirimakti (Tori foe den Apostel 13:48; 1 Petrus 2:17). Joe abi netleki den ala fertrow dati Jehovah Gado nanga en Kownoe-Manpikin, Jezus Kristus, e tjari na organisaatsi disi foe Kownoekondre prékiman?
Sorgoe dati joe no lasi joe fertrow
10. Sortoe warskow moesoe de gi ibri kristen wan réde foe ondrosoekoe ensrefi finifini?
10 Sma di kisi so foeroe blesi, foe di den saka densrefi na ondro na tiri foe Jehovah, kan kon na ini a trapoe foe mankeri foe bribi èn fertrow na ini en? Ija, bika den e kisi na warskow: „Loekoe boen, brada, dati na ini no wan sma foe oenoe wan godelowsoe ati, di no e bribi sani, gro, foe di ai hari ensrefi poeroe foe na libi Gado, ma tan fermane makandra ibridé, solanga wi kan kari en ’tide’, sodati no wan sma ati kon tranga nanga na bidrigikrakti foe sondoe” (Hebrewsma 3:12, 13). Foe dat’ede ibri kristen moe ondrosoekoe ensrefi finifini.
11. (a) Na sortoe fasi na konsensi foe wan sma kan kon tranga? (b) San ben pasa nanga sonwan na ini na fosi jarhondro G.T.?
11 Wan sma konsensi kan kon de so tranga, dati a no e si ogri ini wan libifasi di no e akroederi nanga na jeje foe na kristendom èn di e sori wan mankeri foe bribi nanga fertrow ini Jehovah. Sonwan ben sa kan fadon go na ini na trapoe, dati den e poti a feti baka goedoe nanga prisiri na skinfasi tapoe wán lin nanga ofoe srefi e si en moro prenspari leki na dienst foe den gi Gado. Trawan kande e kon lobi goedoe ofoe e feni fowtoe tapoe frantwortoe brada na ini na gemeente. Na ini na fosi jarhondro foe G.T. „godelowsoe sma” di na kibrifasi ben boro kon na ini na gemeente ben doti ’na skin èn ben wisiwasi tirimakti èn ben taki skempi foe gloriwan’ di ben e tjari frantwortoe na ini na gemeente (Judas 4-8, 16). Den falsi kristen dati ben lasi na troe bribi na ini Jehovah èn na ini en tiri. Meki dati noiti pasa nanga wi!
12. (a) San wan onafhankeleke nanga oproeroe jeje e poti na wan sé? (b) Sortoe kontrari ben de a mindri Korach nanga David?
12 Foeroetron na ’wisiwasi foe tiri makti’ e go makandra nanga wan onafhankeleke èn oproeroe jeje di e loekoe pasa dati Jehovah e tjari en organisaatsi. Na jeje disi ben abi kefarlek bakapisi gi Korach nanga trawan di ben stré nanga na makti di Gado ben gi Mozes nanga Aäron (Numeri 16:1-35). Ma fa David ben de tra fasi! Foe di a ben abi vréde nanga dati foe wakti te leki Gado ben sa poeroe na kroektoedoe, a no ben wani foe kiri en godelowsoe féjanti, kownoe Saul, foe di disi ben de „na salfoewan foe Jehovah” (1 Samuël 24:2-7). Ija, Jehovah ben poti Mozes, Aäron, Saul, David. Jezus Kristus nanga trawan foe doe wroko. Na a srefi fasi na ini a disiten organisaatsi foe Jehovah den e poti sma foe doe dienst na ini akroederi nanga den marki di bijbel poti èn na ondro tiri foe Jehovah santa jeje. — 1 Timóteüs 3:1-13; Titus 1:5-9; Tori foe den Apostel 20:28.
13. (a) Foe san-ede meki wi de grantangi gi a tiri foe Jehovah? (b) Net leki soema wi moe waka, èn nanga sortoe fasi?
13 Foe di „a no de na a sma di e libi na grontapoe foe bepaal en pasi”, meki wi moe de grantangi dati Jehovah abi na tiri (Jeremia 10:23). Abraham nanga en oema Sara di ben e gi ensrefi ben gi jesi na Gado èn ben handri na ini bribi. Boaz nanga Ruth ben fiti densrefi na den seti foe Gado. Èn foeroe tra getrow man nanga oema ete ben teki nanga ala prisiri na tiri foe Jehovah (Hebrewsma 11:4-38; Ruth 3:1-4:17). Net leki den fosten dienstknegti dati foe Gado na so wi moe tegoe foe dat’ede gl wan onafhankeleke jeje, wroko nanga prisiri nanga Gado theokratis organisaatsi èn waka nanga ala fertrow na ini na tiri foe Jehovah.
’Poti joe lai nanga fertrow tapoe Jebovah’
14. San e jepi foe loekoe boen nanga wan oproeroe jeje?
14 San e jepi wi leki loyaal kotoigi foe Jehovah foe loekoe boen nanga wan oproeroe jeje? We, na a fosi presi wi moe erken dati a de fowtoe foe meki oproeroe èn foe poti na wan asrantifasi na tiri foe Gado a wan sé (Nehemia 9:16, 28-31; Odo 11:2). Net leki David wi kan begi na wi hemel Tata èn aksi: „Ori joe knegti ooktoe fara foe mi-no-ke-doe; no meki den tiri mi. Na ini a geval dati mi sa de boen dorodoro èn mi sa tan sondro fowtoe foe foeroe pasa foe a wet” (Psalm 19:13). A sa de ooktoe boen foe go prakseri omeni lobi Jehovah ben sori wi. Disi moe meki na lobi foe wi gi en kon moro foeroe èn moe boewégi wi foe teki a tiri foe en alaten. — Lukas 10:27; Johannes 3:16.
15. Sortoe fasi den e sori dja efoe wan brada e denki dati den no ben poti en leki dinari ini na diniwroko ofoe leki opziener foe di den owroeman abi wan sani tége en?
15 Wi no moe lasi na wi prakseri dati Gado e tjari en organisaatsi, ala di sontron kande a no de makriki foe waka nanga ala fertrow ini a tiri foe Jehovah. Leki wan eksempre: Kow taki dati wan brada e denki dati den no poti en leki dinari ini na diniwroko ofoe leki opziener foe di den owroeman abi wan sani tége en. Na presi foe opo doe wan sani tapoe wan fasi sodati na de na ini na gemeente ben sa kan broeja, a prakseri dati Jehovah e tjari na theokratis organisaatsi. Foe dat’ede meki na brada kande tapoe wan sakafasi èn foeroe-nanga-lobi èn vrédefasi kan aksi wan ferklari (Hebrewsma 12:14). Moro fara a ben sa doe heri boen foe ben sa erken eventueel swakifasi di tjari kon ondro en prakseri èn na ini begi ben sa feti a baka foe tjari kenki kon! Baka wan pisten a kan libi na afersi na Jehovah abra ini akroederi nanga den wortoe: „Poti joe lai tapoe Jehovah” (Psalm 55:22). Baka wan pisten èn te safrisafri wi e kon bekwaam na jejefasi, dan Jehovah séker sa gi wi foeroe foe doe na ini en dienst. — Teki gersi nanga 1 Korinte 15:58.
16. Wi no moe waka na baka sortoe fasi foe doe, awinsi kroektoe ben doe troetroe na wi na inisé foe na gemeente èn foe san-ede?
16 Ma srefi ofoe wan brada ofoe sisa ben doe wi kroektoe troetroe dan disi ben sa gi wi wan boen réde foe no abi demakandra nanga na gemeente? A ben sa de regtvaardiki efoe wi ben sa tapoe foe doe santa diniwroko gi Jehovah? Nono, bika so wan doe ben sa sori dati wi no de getrow na Gado èn no de tangi gi na tiri foe en. A ben sa sori ooktoe dati wi no ben lobi wi loyaal kompe-bribiman na a heri grontapoe (Mattéüs 22:36-40; 1 Johannes 4:7, 8). Boiti foe dati, efoe wi ben sa broko wi soifri-retifasi nanga Jehovah, dan wi ben sa gi Satan nanga dati wan gron foe kosi Gado — wan sani di wi séker no wani. — Odo 27:11.
17. (a) San sa jepi wi foe tan getrow tapoe na tiri di Jehovah e gi en organisaatsi? (b) San sa de na ondrofeni foe den sma di e tn waka na ini Jehovah tiri nanga fertrow?
17 Meki foe dat’ede ’wi blesi Jehovah èn noiti frigiti ala den boen foe na Sma di e moi wi libi nanga lobi boen-atifasi èn sari-ati’ (Psalm 103:2-4). Efoe wi e denki alaten na wi foeroe-nanga-lobi Gado èn e handri na ini akroederi nanga en wortoe, dan wi sa tan fertrow krakti tapoe en tiri di noiti e fadon (Odo 22:19). Efoe wi ben sa drai baka gi Jehovah nanga en organisaatsi, wisiwasi na tiri foe „na getrow èn koni srafoe èn poti wisrefi wawan na tapoe na persoonlek lési foe na bijbel èn tjari en kon na krin leki fa wi wani dan wi ben sa de leki wan bon di de en wawan na ini wan dré kondre. Na a tra sé, wan sma di poti en fertrow na ini wi bigi Tiriman, Jehovah e tron séker leki wan bon di prani na den watra, di e panja en roetoe leti na a wakafoe a watra; èn a no sa si dati faja kon, ma en wiwiri sa tan de foeroe troetroe”. Boiti foe dati a no sa broko en ede na ini wan jari foe dré, ooktoe a no sa tan a baka foe meki froktoe leki wan glori gi Gado (Mattéüs 24:45-47; Jeremia 17:8). Dati kan de na blesi ondrofeni foe joe efoe joe teki na faste bosroiti foe tan waka na ini fertrow na ini na tiri foe Jehovah.
Joe kan piki den aksi disi?
◻ Na sortoe fasi Jehovah ben sori taki a ben de wan tiriman foe na naatsi Israël di no abi en speri?
◻ Sortoe warskow ini a tori foe na tiri foe Gado na Israël foe owroeten e gi?
◻ Tapoe soema Jehovah abi en tiri na ini a ten disi?
◻ San kan jepi wi foe no lasi na fertrow na ini a tiri foe Jehovah?
◻ Fa wi moe de nanga na tiri foe Jehovah te na inisé foe na gemeente kroektoe e doe a wi?
[Prenki na tapoe bladzijde 9]
Na ini 607 bifo G.T. rampoe ben miti den sma di no ben waka nanga fertrow na ini a tiri foe Jehovah. Poti prakseri tapoe a warskow na wan toemsi koni sani!
[Prenki na tapoe bladzijde 11]
Abraham, Sara, David, Jezus nanga trawan ben waka nanga fertrow na ini a tiri foe Jehovah. Joe e doe dati toe?