Jezus libi nanga diniwroko

Johannes e sreka a pasi

TINASÉBI jari psa kaba foe sensi a ten di Jezus leki pikin foe twarfoe jari ben gi den leriman na ini na tempel. A de na ini na lente (pikin dréten) foe 29 G.T. èn a gersi leki ala sma e taki foe na neef foe Jezus, Johannes, di ben e préki alape na ini na kontren foe na Jordaan.

Johannes de troetroe wan man di e meki indruk, ini en fasi fa a e sori ensrefi èn na ini en taki. A e weri krosi foe kameel wiwiri. èn lontoe en mindri a abi wan leerbanti. A e njan sprenka èn wilde oni. Èn a boskopoe foe en? „Abi berow. bika na Kownoekondre foe hemel kon krosbé.”

A boskopoe disi e wiki krakti firi na den arkiman foe en. Foeroe e ferstan dati den moesoe abi berow, dati wani taki, moe kenki a fasi foe den èn moe drai baka gi na fosten waka nanga libi foe den di no ben boen. Na ini a eri kontren foe a Jordaan èn srefi foe Jeruzalem den sma e kon na bosoe na Johannes, èn a e dopoe den foe di a e dipi den go na ondro watra na ini na Jordaan. Foe san-ede?

Johannes e dopoe den sma leki wan symbool, ofoe ini erkenning foe a opregti berow foe den foe a sondoe foe den tége a Wetferbontoe foe Gado. Te foe dat’ede den kerki Fariséman èn Sadducéman e kon na a Jordaan ai kroetoe den: ’Sneki broedoe,’ a e taki, ’meki froktoe di e fiti berow.’

Foe na prakseri di Johannes e kisi, den Fariséman e seni priester nanga Levietsma go na en. Den e aksi. „Soema na joe? sodati wi kan gi wan piki na den di ben seni wi kon. San joe e taki foe joesrefi?”

Johannes e tjari kon na krin: „Mi de wan sten foe wan sma di e kari na ini na gran sabana: ’Meki na pasi foe Jehovah reti’, soleki na proféti Jesaja ben taki.” Johannes e sreka na pasi foe di a e tjari den sma kon na ini na joisti ati toestand, sodati den sa teki a Messias di sa tron kownoe. Foe en Johannes e taki: „A sma di e kon baka mi, de moro tranga leki mi, èn mi no warti foe loesoe den soesoe foe en.”

Na boskopoe foe Johannes, „na kownoekondre foe hemel kon krosbé”, de soboen leki wan publiki bekenti dati na diniwroko foe Jehovah kownoe di a poti, Jezus Kristus de foe bigin. Johannes 1:6-8, 15-28; Mattéus 3:1-12; Lukas 3:1-18; Tori foe den Apostel 19:4.

◆ Sortoe man Johannes de?

◆ Foe san-ede Johannes e dopoe sma?

◆ Foe san-ede Johannes ben taki dati na Kownoekondre ben kon krosbé?