Jezus libi nanga diniwroko

Faja gi na anbegi foe Jehovah

BAKADI Jezus ben de na a trowoso ini Kana, a ben waka go na Kapernaüm, wan foto di ben de krosbé foe na se foe Galiléa. Den discipel foe en, en mama nanga en brada, di ben nen Jakobus, Jozef, Simon èn Judas, ben de nanga en. Ma bifo den ben bigin a waka disi, a kande dati den ben go fosi na a oso foe Jezus ini Nazareth, sodati na osofamiri ben kan teki san den ben abi fanowdoe.

Ma foe san-ede Jezus e go na Kapernaüm na presi foe go doro nanga en diniwroko ini Kana, Nazareth ofoe wan tra presi ini den pikin bergi foe Galiléa? Foe bigin, Kapernaüm didon moro boen, èn a de krin dati a de wan moro bigi foto. Ooktoe a moro bigi pisi foe en njoen discipel e libi ini ofoe ini a birti foe Kapernaüm, sodati den no afoe komoto gwe foe oso foe kisi leri foe en.

Na ini a ten dati Jezus de ini Kapernaüm, a e doe wondroe, soleki ensrefi e kotoigi wan toe moen a baka. Ma esesi Jezus nanga en kompe de baka a pasi e gwe. A de lente (pikin dréten) èn den de a pasi e go na Jeruzalem foe njan a Pascha foe 30 G.T. Te den de drape, dan den discipel foe Jezus e leri sabi en foe wan sé di kande den no ben si noiti ete.

A wet foe Gado e aksi dati den Israëlsma e tjari meti-ofrandi. Foe meki en moro makriki, meki bisnisman ini Jeruzalem e seri meti ofoe fowroe foe a doe disi. Ma den e doe disi let’mindri ini a tempel, èn den e foefoeroe den sma foe di den e aksi toemsi hé prijs.

Nanga dipi faja ati Jezus e meki wan wipi foe teté èn a e drifi den seriman go na dorosé. A e trowe den moni foe den sma di e kenki moni na gron èn a e drai den tafra tapoe. „Teki den sani disi komoto dja!” a e bari gi den sma di e seri doifi. „No meki na oso foe mi Tata moro langa wan oso foe seri sani!”

Te den discipel foe Jezus e si disi, den e memre na profétitori di ben taki foe a Manpikin foe Gado: „Na faja foe joe oso sa njan mi.” Ma den djoe e aksi: „Ortoe marki joe kan meki wi si, foe di joe e doe den sani disi?” Jezus e piki: „Broko na tempel disi èn ini dri dé mi sa opo en baka.”

Den djoe e bribi dati Jezus e taki foe na letterlek tempel, ma a e taki foe na tempel foe en skin. Èn dri jari baka dati den discipel e memre den wortoe disi foe en te a kisi opobaka foe dede. Johannes 2:12-22; Mattéus 13:55; Lukas 4:23.

◆ Jezus e reis go na sortoe presi baka a trowoso ini Kana?

◆ Foe san-ede Jezus ati e faja èn san a e doe?

◆ San den discipel foe Jezus memre te den e si a de bezig?

◆ San Jezus ben taki foe a tempel disi, èn san a ben méne nanga dati?