Den ferklari den regtvaardiki „foe libi”

’Nanga jepi foe wán doe foe meki sma kon regtvaardiki, a e abi leki bakapisi dati den e ferklari den regtvaardiki foe libi.’ — ROMEINI 5:18, herziene NW.

1. Soema e angri èn e dréwatra foe kisi regtvaardikifasi èn fa dn sa doe leki fa den e winsi?

„KOLOKOE den sma de di e angri èn e dréwatra foe regtvaardikifasi, bika den bere sa foeroe” (Mattéus 5:6). Na dréwatra disi foe regtvaardikifasi sa poeroe, no wawan gi den sma di ’a kownoekondre foe hemel de foe den’, ma ooktoe gi den sma, di ’sa abi na grontapoe leki goedoe’ (Mattéus 5:10; Psalm 37:27). Ala toe groepoe abi na howpoe di na apostel Petrus ben tjari kon na fesi di a ben skrifi: „Njoen hemel nanga wan njoen grontapoe de, di wi e ferwakti akroederi en [Gado] pramisi, èn na dape regtvaardikifasi sa libi” (2 Petrus 3:13). Jehovah Gado ben pramisi wan regtvaardiki njoen hemel tiri, „a kownoekondre foe hemel”, èn wan regtvaardiki „njoen grontapoe” ofoe libisma maatschappij tapoe wan paradijs grontapoe.

2. Sortoe verband de a mindri Jehovah regtvaardikifasi èn wi howpoe tapoe wan vréde, Njoen Seti?

² Ma san wi moe ferstan precies na ondro regtvaardiki njoen hemel èn wan regtvaardiki njoen grontapoe? Den e bedoel nanga dati, taki na njoen hemel tiri èn na libismafamiri na grontapoe di den sa tiri moe erken Gado markitiki foe boen nanga ogri. Jehovah de „na tanpresi foe regtvaardikifasi” (Jeremia 50:7). Regtvaardikifasi de a fundamenti foe en soevereiniteit ofoe en positsi leki tiriman foe na universum di wan troon e agersi (Job 37:23, 24; Psalm 89:14). Efoe vréde wani foe de na ini na universum, dan den mekisani foe Jehovah moesoe erken dati en abi na reti foe poti den markitiki ini a tori foe san de regtvaardiki èn san de godelowsoe. Na a tra sé na howpoe foe wi tapoe wan regtvaardiki njoen seti man de wawan efoe Jehovah hori ensrefi na en markitiki. — Psalm 145:17.

3. Sortoe aksi e kon na wi te wi e prakseri dati Jehovah de regtvaardiki dorodoro?

³ Foe dat’ede na aksi e kon na fesi fa na santa èn regtvaardiki Gado Jehovah kan bemoei nanga onregtvaardiki sondari. (Teki gersi nanga Jesaja 59:2; Habakuk 1:13.) Fa a kan teki a mindri sondari sma di sa abi wan prati na a regtvaardiki „njoen [tiri] foe hemel” èn teki sma leki en mati di sa de wan pisi foe na regtvaardiki „njoen grontapoe” èn dan tokoe ete tan getrow na en hé markitiki foe regtvaardikifasi? Foe feni a piki tapoe disi, dan wi moe ferstan na bijbelleri foe meki sma kon de regtvaardiki ofoe ferklari sma regtvaardiki.

Wan sar’ati seti

4. Foe san-ede na libismafamiri fadon dipi na ini paiman na Gado, èn foe san-ede wi no kan fri wisrefi foe na paiman disi?

⁴ Den e teki ini a bijbel sondoe gersi nanga paiman. (Loekoe Mattéus 9:12, 14; 18:21-35; Lukas 11:4.) Ala sma na sondari èn de foe dat’ede dipi na ini paiman na Gado. „Na paiman di sondoe e pai, na dede” (Romeini 6:23). Foe di a fosten tata foe den Adam ben seri den na ondro sondoe, meki den leki en bakapikin no ben kan doe noti foe fri densrefi foe na hebi paiman disi (Romeini 7:14). Soso na dede foe na sondari ben kan figi na paiman disi poeroe, „bika a sma di ben dede, e kan fri foe en sondoe” (Romeini 6:7). Ala boen wroko di kande wan sondari ben doe na ini a ten foe en libi, no ben kan bai baka san Adam ben lasi; den no ben kan gi ensrefi wan regtvaardiki positsi na fesi foe Gado. — Psalm 49:7, 9; Romeini 3:20.

5. Fa Jehovah ben sorgoe foe ferloesoe gi na sondoe libismafamiri sondro foe waka psa en volmaakti geregtigheid?

⁵ Fa Jehovah ben kan sorgoe gi a kon boen baka foe a libismafamiri, sondro foe poti en égi markitiki foe regtvaardikifasi a wan sé? Na piki e trowe leti na tapoe Jehovah koni èn no-ferdini-boenfasi. Na apostel Paulus e tjari disi kon moi na krin na ini en brifi gi den Romeinsma. A e skrifi: „A de leki wan fri presenti dati nanga en no-ferdini boenfasi den e ferklari den regtvaardiki tapoe a fundamenti foe na ferloesoe nanga jepi foe na loesoeprijs di Kristus Jezus ben pai. Gado ben poti en leki wan zoenofrandi nanga jepi foe bribi na ini en broedoe. Disi a ben doe foe sori en égi regtvaardikifasi, bika a ben gi pardon na den sondoe di ben doe na ini a ten di psa, aladi Gado ben sori taki a e ferdrage sani langa, foe kan sori na ini na disi pisten en égi regtvaardikifasi sodati a ben sa de regtvaardiki, srefi te a e ferklari a sma regtvaardiki di e poti bribi na ini Jezus.” — Romeini 3:24-26.

6. (a) Fa na ofrandi foe Jezus ben doro Jehovah markitiki foe geregtigheid, èn foe doe san Jehovah ben de klari foe dati’ede? (b) Fa Jehovah kan gi regtvaardikifasi na wan sma di abi bribi?

⁶ Ini akroederi nanga en no-ferdiniboenfasi Jehovah ben teki Jezus ofrandi foe na boen foe den bakapikin foe Adam (1 Petrus 2:24). A ben de wan srefi ofrandi ofoe di ben de gelijk na dati, foe di Jezus, leki volmaakti libisma ben bai baka san na volmaakti libisma Adam ben lasi. (Loekoe Exodus 21:23; 1 Timóteus 2:6.) Foe di now den ben doro na marki foe geregtigheid. dan Jehovah nanga lobi ben de klari foe „figi poeroe” den sondoe di de tapoe na rekening foe „a libisma di abi bribi na ini Jezus” (Jesaja 44:22; Tori foe den Apostel 3:19). Efoe sowan sma e tan getrow, dan Jehovah no wawan no ’e teri den sondoe foe en’ ma a e teri srefi regtvaardikifasi gi en (2 Korinte 5:19). Nanga jepi foe na sar’ati seti disi pe den e teri regtvaardikifasi gi wan sma, meki ’foeroe sma ben meki kon de regtvaardiki sma’ (Romeini 5:19). Disi na wán fasi foe meki sma kon de regtvaardiki, na doe foe Gado pe den e si wan sma leki sondro fowtoe (Tori foe den Apostel 13:38, 39). Soema de den sma di ini na seti foe sani disi kon de regtvaardiki ofoe di den ferklari regtvaardiki?

144.000 „santawan”

7. Na sortoe fasi den ben e kari Kristus regtvaardiki, èn san ben kan foe dat’ede?

⁷ A no de foe taki dati den no ben a foe teri regtvaardikifasi gi Jezus, foe di a ben de troetroe regtvaardiki (1 Petrus 3:18). Foe di Jezus te na en dede leki wan volmaakti libisma („na laatste Adam”) ben sori taki a de getrow èn ben offer en reti na tapoe grontapoelibi, meki en Tata, Jehovah ben wiki en baka. Den ben „ferklari Jezus regtvaardiki ini jeje”, dati wani taki foe en sé den ben taki dati a ben de troetroe regtvaardiki tapoe a gron foe en égi verdienste èn den ben opo en baka leki „wan jeje di e gi libi” (1 Korinte 15:45; 1 Timóteus 3:16.). Nanga jepi foe en ofrandi dede a ben gi na fundamenti tapoe san Jehovah ben kan gi regtvaardikifasi na man nanga oema di ben sori bribi. — Romeini 10:4.

8, 9. (a) Soema e njan boen leki den fosiwan foe na regtvaardikifasi di den kisi, èn foe san-ede? (b) Soema de den njoen hemel, èn tapoe san den sa tiri?

⁸ A de wan logis sani dati den sma di Jehovah e ferkisi foe tron den regtvaardiki „njoen hemel”, ofoe na kownoekondre tiri na ondro na Kownoe Jezus Kristus, de den fosi wan di na ini a seti foe sani disi ben njan boen dorodoro foe na sar’ati seti disi. Na boekoe Daniël e ferteri foe na plechtigheid na ini hemel pe Kristus, na Manpikin foe libisma, e „kisi tirimakti nanga wartifasi èn wan kownoekondre”, sodati „den folkoe, nationaal groepoe nanga tongo na grontapoe ben sa dini alamala en.” Moro fara Daniël e meki wi si taki „na kownoekondre èn na tirimakti” ben gi ooktoe na „den santawan foe na Moro Héwan”, Jehovah. — Daniël 7:13, 14, 18, 27; Teki gersi nanga Openbaring 5:8-10.

⁹ Den e tjari kon na krin dati na nomroe foe den „santawan” disi di den ferkisi foe tiri makandra nanga na Lam Jezus Kristus tapoe na hemel bergi Sion, de 144.000 èn dati „den ben bai den foe a mindri foe libisma” (Openbaring 14:1-5). Makandra nanga Kristus den de den regtvaardiki „njoen hemel” foe Jehovah njoen seti foe sani.

Fa èn foe san-ede den e teri regtvaardikifasi gi den

10. (a) Na ini sortoe bjbelboekoe a meki kon regtvaardiki foe sma e kon moro krin a fesi èn na soema den ben skrifi en gi? (b) Soema moro foeroe de ini a tori foe na bijbelleri foe a meki kon regtvaardiki foe sma?

¹⁰ Na bijbelboekoe di e tjari moro krin kon na fesi san na ferklari kon régtvaardiki foe libisma di Gado e doe wani taki, de sondro degedege a brifi foe Paulus gi den Romeinisma. A de wan moi sani foe si dati a e skrifi a brifi disi gi den di den „kari foe de santawan” (Romeini 1:1, 7). Disi e ferklari foe san-ede na leri foe „a kon de regtvaardiki foe sma”, ofoe a ferklari kon de regtvaardiki di a e tjari kon a krin, abi foe doe nanga den 144.000 „santawan”.

11. Sortoe verband de a mindri bribi, wroko, nanga a meki kon regtvaardiki foe sma?

¹¹ Na tak-go-tak-kon foe Paulus na ini Romeini wani taki dati no djoe no heiden e kisi wan regtvaardiki positsi na fesi foe Gado nanga jepi foe wroko, ofoe den disi e doe now foe di wan sma e gi jesi na a wet foe Mozes ofoe foe respeki foe na firi foe Moreel wet (Romeini 2:14, 15; 3:9, 10, 19, 20). Den kan ferklari djoe èn heidensma regtvaardiki soso tapoe a fundamenti foe bribi ini Kristus ferloesoe-ofrandi (Romeini 3:22-24, 29, 30). Ma na rai na ini den laatste kapitel foe Romeini (12-15) e tjari kon na krin dati a bribi disi moe kisi krakti nanga jepi foe wroko di de ini a dini foe Gado, soleki Jakobus ooktoe e tjari kon a fesi (Jakobus 2:14-17). Den wroko dati e sori dati na kristen di kisi regtvaardikifasi abi na bribi di de na fosi marki di Gado e loekoe foe ferklari wan sma regtvaardiki.

12, 13. (a) Foe san-ede den moe ferklari den 144.000 „santawan” kon regtvaardiki? (b) San den e doe nanga na reti tapoe libi di den e kisi?

¹² Ma den moe ferklari kristen di den „ben kari foe de santawan” foe de regtvaardiki foe sortoe dwengi réden? Now a di foe toe sani foe wan sma kan kon de regtvaardiki e kon a fesi, dati na, dati Gado e ferklari wan sma taki a de warti foe kisi libi leki wan volmaakti libisma manpikin foe En. Foe di den ben kari den 144.000 foe de wan pisi foe na regtvaardiki „njoen hemel”, meki den moesoe gi ibri howpoe na tapoe tégo libi na tapoe grontapoe abra krinkrin èn offer dati (Psalm 37:29; 115:16). Na a fasi disi den e dede wan ofrandi dede. Den e ’saka densrefi na a srefi dede foe Kristus’. — Filippi 3:8-11.

¹³ Na ini akroederi nanga a gronprakseri di tjari kon na krin na ini a wet foe Mozes dan ibri srakti-ofrandi di e pristeri na Jehovah, moe de sondro mankeri (Leviticus 22:21; Deuteronomium 15:21). Den e taki foe den 144.000 „santawan,” dati den de „regtvaardiki sma, di den tjari kon de volmaakti”. — Hebrewsma 12:23.

(. . .)

14, 15. (a) Sortoe kenki ini a tori foe sondoe den 144.000 e ondrofeni? (b) Na sortoe fasi den e kisi wan opobaka kon „na ini wan njoen fasi foe libi”?

¹⁴ Ala di den „regtvaardikiwan” disi de ete na libi ini skin, dan den e ondrofeni wan agersi dede. Na apostel Paulus e tjari kon na krin: „Fa wi, foe di wi ben dede ini a tori foe na sondoe, sa tan libi moro langa ete na ini dati? Ofoe oenoe no sabi dati wi alamala di ben dopoe ini Kristus Jezus ben dopoe na ini en dede? Foe dat’ede den ben beri wi nanga en nanga jepi foe na dopoe foe wi na ini en dede, sodati ooktoe wi net soleki fa Kristus nanga jepi foe na glori foe na Tata ben kisi opo-baka, a sofasi wi ben sa waka na ini na njoen fasi foe libi . . . bika wi sabi dati na owroe sma di wi de, ben anga nanga en na a oedoe, sodati na sondoe skin foe wi ben sa kon de sondro foe wroko moro, sodati wi no ben sa tan de moro langa srafoe foe na sondoe. Bika a sma di ben dede, e kon fri foe en sondoe.” — Romeini 6:2-7.

¹⁵ Na ini na pisten foe a libismalibi foe den, den 144.000 „santawan”, foe soema na ini a ten disi foe na kaba soso wan fikapisi de ete na grontapoe „e dede na ini a tori foe na sondoe”. Baka na agersi dede foe den dan den sma di den ben kari „foe de santawan”, e kisi opobaka kon na „ini wan njoen fasi foe libi”. Foe di Jehovah ben ferklari den regtvaardiki, dan moro fara a kan wiki den nanga en jeje leki „jeje pikin”. Den „e kon gebore baka” èn den e teki den leki „manpikin foe Gado” ofoe den e adopteer den (Johannes 3:3; Romeini 8:9-16).a Den e tron jeje Israëlsma èn den e teki den na ini na njoen ferbontoe. — Jeremia 31:31-34; Lukas 22:20; Romeini 9:6.

Erfgenaam foe na priesterwroko èn kownoewroko

16. Foe san den 144.000 „santawan” e tron erfgenaam?

¹⁶ Leki jeje „manpikin foe Gado di den ben teki, dan den 144.000 „santawan” e tron ooktoe ’erfgenaam’ (Galacia 4:5-7). Paulus ben skrifi gi den kompe-kristen di ben wiki nanga jeje: „Efoe wi de dan pikin, dan wi de ooktoe erfgenaam, erfgenaam foe Gado, ma mede-erfgenaam nanga Kristus, efoe wi e njan pina makandra, sodati makandra wi kan kisi glori” (Romeini 8:17). San na a famiri goedoe foe Kristus? Jehovah meki en de wan Kownoe-priester „foe tégo . . . na a fasi foe Melchizedek” (Hebrewsma 6:19, 20; 7:1). Leki „mede-erfgenaam” nanga Kristus Jehovah e salfoe den kristen di wiki nanga jeje ooktoe foe tron jeje priester (2 Korinte 1:21; 1 Petrus 2:9). Moro fara wan foe den marki te foe kaba de foe san-ede Jehovah e ferklari den regtvaardiki, dati bakaten den „e tiri leki kownoe” ini a libi nanga jepi foe na wan persoon, Jezus Kristus”. — Romeini 5:17.

17. (a) San salfoe kristen moe doe ala dé, aladi den ferklari den regtvaardiki? (b) Fa den e kisi den paiman?

¹⁷ Solanga den salfoe kristen disi de ete na grontapoe, den moe feti ete alaten nanga den sondoe firi foe den, aladi den ferklari den regtvaardiki (Romeini 7:15-20). Den abi a broedoe foe Kristus fanowdoe foe kon krin foe den aladé sondoe di den e doe ini na onvolmaakti fasi foe den (1 Johannes 1:7; 2:1, 2). Te den tan getrow te na a kaba foe na grontapoe libi foe den, dan den e dede troetroe èn den e kisi wan opobaka „go ini wan goedoe di no kan pori èn di no flaka èn di no kan flaw” èn den e tron wan pisi foe den regtvaardiki „njoen hemel”. — 1 Petrus 1:3, 4; 2 Petrus 3:13.

’Wakti na tapoe a kon na krin foe den manpikin foe Gado’

18, 19. (a) Tapoe san den libisma „mekisani” e wakti? (b) Fa „den manpikin foe Gado” sa tjari kon na krin, èn foe san-ede den libisma „mekisani” e loekoe nanga faja ferwakti na disi?

¹⁸ Sortoe krakti disi abi na tapoe a groepoe foe sma di de moro foeroe na ini nomroe leki den 144.000 jeje „manpikin foe Gado” di alamala e angri èn e dréwatra foe kisi regtvaardikifasi, ma di abi na howpoe foe kisi a grontapoe leki goedoe? Foe den na apostel Paulus e skrifi: „Bika na faja ferwakti foe den mekisani e wakti tapoe a kon na krin foe den manpikin foe Gado. Bika den mekisani ben gi abra na sosofasi . . . tapoe a fundament foe howpoe dati den mekisani srefi sa kon fri foe na katibo foe pori èn sa abi na glori fri foe den manpikin foe Gado”. — Romeini 8:19-21.

¹⁹ Den libisma „mekisani”, di abi na howpoe foe libi foe tégo tapoe wan paradijs grontapoe, e loekoe „nanga faja ferwakti na a krosbé ten di de now dati na Kownoe Jezus Kristus èn den „manpikin foe Gado” di kisi opobaka foe dede ’sa kon na krin’ foe di den e pori na disiten godelowsoe seti foe sani èn baka dati e tiri leki kownoe nanga priester „den doesoen jari” (Openbaring 20:4, 6). Na ini a ten foe na doesoen jari tiri foe Kristus dan den libisma mekisani srefi ooktoe sa kon fri foe na katibo foe pori!”.

20. San wi sa loekoe na ini a tra artikel di e kon?

²⁰ Fa sma di o libi leki borgroe foe na regtvaardiki „njoen grontaoe” te foe kaba sa kisi „na glori fri foe den manpikin foe Gado”, èn fa na bijbel leri foe meki sma kon de regtvaardiki srefi abi krakti now tapoe den, wi sa go loekoe na ini a tra artikel.

[Foetoewortoe]

Disi abi foe doe nanga na ferklari di Gado e ferklari sma regtvaardiki

◻ San a bijbel bedoel nanga regtvaardiki njoen hemel èn wan regtvaardiki njoen grontapoe?

◻ Foe san-ede na libismafamiri moe tjari kon na ini wan regtvaardiki positsi na fesi foe Jehovah?

◻ Fa sma ben doro den markitiki foe Jehovah foe regtvaardikifasi?

◻ Foe san-ede den e ferklari den 144.000 regtvaardiki leki den fosiwan, èn san den e doe nanga a reti tapoe libi di den kisi?

◻ Foe san den 144.000 e tron erfgenaam nanga Kristus?

[Faki na tapoe bladzijde 3]

Den toe sani foe wan sma kon de regtvaardiki ofoe di den e ferklari taki a de regtvaardiki:

(1) dati Gado e si a sma dati sondro fowtoe

(2) dati Gado e ferklari a sma dati volmaakti èn e teri en warti foe kisi tégo libi na grontapoe

Den e ferklari den 144.000 salfoe kristen regtvaardiki ini ala den toe sani disi. Den offer den libisma reti tapoe libi èn den e wiki den leki jeje „manpikin” di den kari foe tron kownoe nanga priester makandra nanga Kristus na ini den „njoen hemel”.