Den ben ferklari en regtvaardiki leki mati foe Gado
„’Abraham ben poti bribi na ini Jehovah èn den ben teri dati gi en leki regtvaardikifasi’. èn den ben kari en ’Jehovah mati’”. — JAKOBUS 2:23.
1, 2. Fa den sani „ini den hemel” èn „den sani na grontapoe” e kon verzoen nanga Gado?
„GADO ben feni en boen dati a heri foeroefasi libi a ini en [Kristus], èn nanga jepi foe en verzoen ala tra sani nanga en èn foe meki vréde nanga jepi foe na broedoe di a ben trowe na a pina-oedoe, a no a trobi edi a de den sani di de na grontapoe ofoe den di de ini den hemel” (Kolosse 1:19, 20). Na prakseri disi foe Gado foe tjari verzoening kon, e boewégi ensrefi go na en hémarki.
2 „Den sani na ini den hemel” no de den jeje mekisani bika den disi no e bai kon fri nanga jepi foe a broedoe foe Kristus. Na a tra sé a de den sma di a broedoe foe na Lam ben bai foe tron makandra nanga Kristus „wan kownoekondre èn priester” na ini den „njoen hemel”. Den ferklari den regtvaardiki kaba dorodoro nanga na broedoe foe Kristus. Boiti foe dati Jehovah e meki vréde now kaba sowan féfitenti jari langa kaba nanga „den sani na a grontapoe”, dati wani taki, nanga den sma di de wan pisi foe na regtvaardiki „njoen grontapoe” (Openbaring 5:9, 10; 2 Petrus 3:13). Na ’tjari kon makandra foe ala sani’, den grontapoe èn den hemel sani, „de ini akroederi nanga en [Jehovah] prisiri, di a ben poti ini prakseri”. — Efese 1:9, 10.
A prakseri foe Gado ini a tori foe en manpikin Adam
3, 4. Sortoe positsi Adam ben teki a fesi foe Gado, ma a sortoe fasi den ben moe ferklari en tog regtvaardiki?
3 Den ben meki Adam leki wan volmaakti, regtvaardiki, libisma manpikin foe Gado (Lukas 3:38). Den no ben teri regtvaardikifasi gi en ofoe gi en regtvaardikifasi. A ben abi dati foe sensi den ben meki en. Te joe loekoe en foe a sé foe sondro fowtoefasi a fesi foe Jehovah, dan a no ben de fanowdoe dati den ben „ferklari” Adam regtvaardiki. Solanga a ben saka ensrefi na ondro na reti tirimakti foe Gado, dan a ben e hori en presi a fesi foe en Mekiman.
4 Ma a no ben bewijsi ete, dati a ben de wan sma di ben hori en soifri-reti-fasi èn den no ben kroetoe ete dati a de warti foe kisi a reti tapoe tégo libi na grontapoe. Foe na sani dati a ben moesoe bewijsi foe wan moi langá pisten en getrow-fasi na Jehovah èn dati a ben tai hori na regtvaardikifasi. Efoe na a fasi dati a ben bewijsi na ondro tesi dati a ben hori na en soifri-reti-fasi, dan a ben sa kisi na reti tapoe tégo libi na grontapoe. A ben sa de dan netleki Gado ben ferklari ofoe ben taki officieel dati Adam ben ferdini libi sondro wan kaba. Leki wan marki foe dati dan sondro degedege Jehovah ben sa tjari en go na a „bon foe libi” èn ben gi en pasi foe njan foe a froktoe foe en. — Genesis 2:9, 16, 17; 3:22.
5. (a) San Adam ben lasi gi ensrefi èn gi en bakapikin? (b) Sortoe howpoe tapoe ferloesoe foe sondoe èn dede Jehovah ben gi na den libisma mekisani?
5 Ma Adam no ben psa na tesi dati, èn leki bakapisi foe dati a ben lasi gi ensrefi èn gi en bakapikin, volmaaktifasi, regtvaardikifasi èn a de foe wan manpikin (Romeini 5:12). Foe dat’ede meki ala den bakapikin foe Adam foe sensi mama meki den, den de wan vreemde sma gi Gado èn onregtvaardikifasi tai na den (Efese 2:3; Romeini 3:10). Na so fasi den libisma mekisani „ben kon ondro sosofasi”, ma „tapoe a fundamenti foe howpoe”, èn na howpoe disi tapoe ferloesoe foe sondoe nanga dede wantewante ben gi, baka na meki oproeroe na ini Eden. — Romeini 8:20, 21; Genesis 3:15.
Fa den ben kan ferklari sma regtvaardiki bifo Kristus ben kon?
6, 7. (a) Ofara den ben ferklari son sma bifo a ofrandi dede foe Kristus regtvaardiki? (b) San na wantoe eksempre foe dienstknegti foe Jehovah bifo a ten foe Kristus di ben kisi wan regtvaardiki positsi na Gado?
6 Na howpoe tapoe ferloesoe foe sondoe nanga dede ben anga foe na kon foe na pramisi „siri”, na wan enkri gebore Manpikin foe Gado (Johannes 3:16). Bifo na ofrandi dede foe Kristus a ben de gi libisma wan sani di no ben kan foe kisi „fri èn libi” ofoe „foe den ben ferklari den regtvaardiki foe kisi libi” (Romeini 5:18). Ma srefi bifo Kristus ben pai na ferloe-soe prijs gi libisma foe kon fri, dan son man nanga oema ben poti bribi na ini a pramisi foe Gado èn den ben poti krakti na a bribi dati nanga jepi foe wroko, Na foe a réde dati meki Jehovah foe en boenati-fasi ede ben gi den pardon foe den sondoe èn ben teki den leki en dienstknegti. Tapoe lobifasi a ben teri den leki relatief sondro fowtoe te joe ben teki den gersi nanga na moro bigi pisi foe na libisma famiri di ben de leki wan vreeemde sma foe Gado (Psalm 32:1, 2; Efese 2:12). A ben gi den wan positsi foe regtvaardikifasi foe di a ben ferklari den regtvaardiki na ini na marki di ben de wan bigi sani na a momenti dati.
7 Na so fasi „kotoigi ben gi na Abel dati a ben de regtvaardiki” foe en bribi ede (Hebrewsma 11:4). Noach „ben tron wan erfgenaam foe na regtvaardikifasi di de akroederi bribi” (Hebrewsma 11:7). Aladi Job ben abi fowtoe, tokoe den ben taki foe en dati a ben de „sondro fowtoe èn opregti” (Job 1:1, 22; 7:21). Pinehas ben sori faja gi na soifri anbegi „èn den ben teri dati gi en leki regtvaardikifasi” (Psalm 106:30, 31; Numeri 25:1-13). Na hoeroe-oema Rachab di no ben de wan Israëlsma ben kisi wan regtvaardiki positsi na Gado ofoe den ben ferklari en regtvaardiki „nanga jepi foe bribi” èn foe den switidoe foe en gi a pipel foe Gado. — Hebrewsma 11:31; Jakobus 2:25.
Fa den ben teri regtvaardikifasi gi Abraham
8, 9. (a) A regtvaardikifasi foe soema de a moro prenspari tori foe a brifi foe Paulus gi den Romeinisma? (b) Na sortoe fasi na meki kon regtvaardiki foe den „santawan” e go moro fara leki di foe Abraham?
8 A tori fo Abraham e ferdini spesroetoe prakseri. Dati den ben ferklari en regtvaardiki toe skrifiman foe den kristen Griki Boekoe e ferteri èn ala toe ben skrifi gi fosi-jarhondro kristensma di den ben kari foe ben kon de den 144.000 memre foe na jeje Israël. — Romeini 2:28, 29; 9:6; Jakobus 1:1; Openbaring 7:4.
9 Ini en brifi gi den Romeinsma Paulus e ferteri dati den sma di „den ben kari foe de santawan” (1:7), djoe èn heiden (1:16, 17), den e ferklari regtvaardiki „nanga jepi foe bribi . . . , parti foe den wroko foe na wet” (3:28). Foe hori baka gi a bewijsi foe en a e bigin foe broko-broko a tori finifini tjari kon a krin (4:1-22) èn a e teki Genesis 15:6 e skrifi taki: „Abraham ben poti bribi na ini Jehovah èn den ben teri dati leki regtvaardikifasi gi en.” Na ini den laatste vers foe kapitel 4 Paulus e taki moro fara dati Jezus den ben gi abra foe wi sondoe ede èn ben kisi opobaka foe den ferklari wi regtvaardiki [dati wani taki „den santawan” (Romeini 1:7)]. „Wi” no kan abi na ini Abraham, foe di a ben dede langaten bifo Kristus dede nanga opobaka. Efoe Paulus foe dat’ede ini den kapitel di e kon e taki foe den sma „di sa tiri leki kownoe” èn foe na meki foe den kon regtvaardiki „foe kisi libi” sodati den kan tron „manpikin foe Gado” èn „mede-erfgenaam nanga Kristus”, dan de krin taki a ben taki foe wan heri tra sani leki foe a tori foe na gi foe regtvaardiki fasi na Abraham. — Romeini 5:17, 18; 8:14, 17, 28-33
10. Jakobus e meki wi si ofara den ben ferklari Abraham regtvaardiki?
10 Jakobus ooktoe e kari Abraham leki wan eksempre foe bewijsi taki bribi moe go makandra nanga wroko di de toe ini a dini foe Gado. Baka di a ferteri taki den ben ferklari Abraham regtvaardiki, Jakobus e teki Genesis 15:6 èn e taki wan sani a tapoe di e jepi wi ferstan na o fara den ben ferklari Abraham regtvaardiki. A e skrifi: „A tekst foe bijbel ben kon troe di e taki: ’Abraham ben poti bribi na ini Jehovah èn den ben teri dati leki regtvaardikifasi gi en, èn den ben kari en ’Jehovah mati’” (Jakobus 2:20-23). Ija, den ben ferklari Abraham regtvaardiki foe en bribi ede, leki wan mati foe Jehovah, no leki wan manpikin nanga a reti tapoe volmaakti libismalibi ofoe tapoe na kownoewroko nanga Kristus. A de wan moi sani foe si taki Robert Cirdlestone na ini en Synonyms of the Old Testament ben skrifi foe a regtvaardikifasi foe Abraham: „Na regtvaardikifasi disi no ben de absoluut, no na a fasi disi dati den ben kan rikomanderi Abraham na Gado leki wan sma di nanga reti ben kan taki dati a abi reti tapoe na erfenis foe a de foe wan manpikin.”
A memreboekoe foe Jehovah
11. Den nen foe soema skrifi na ini Jehovah memre boekoe èn foe san-ede?
11 Na teri foe relatief regtvaardikifasi gi getrow man nanga oema di ben libi bifo a ten foe Jezus, ben de wan marki foe na troetroe regtvaardikifasi èn volmaaktifasi di ’tai nanga na tégo libi di den kan kisi na ini Gado njoen grontapoe. Nanga ini prakseri den ferwakti di den abi tapoe libi, dan wi kan si den leki sma foe soema den nen foe den skrifi na ini wan memreboekoe (Teki gersi nanga Maleachi 3:16; Exodus 32:32, 33.) A abi den nen foe den sma di Jehovah e si leki „regtvaardikiwan” di ben sori den bribi nanga jepi foe regtvaardiki wroko èn di den feni boen foe kisi tégo libi na tapoe grontapoe. — Psalm 69:28; Habakuk 2:4.
12. San den „regtvaardikiwan” di e kisi wan opobaka moe doe sodati den nen foe den sa tan de skrifi na ini Jehovah memre boekoe?
12 Ma den nen no skrifi na ini Jehovah „boekoe foe libi” (Openbaring 20:15). Efoe den sortoe getrow man nanga oema dati ini na ten di psa sa drai kon baka na ini ’na opobaka toe den regtvaardikiwan’ na grontapoe, dan sondro degedege den sa teki nanga bribi Jehovah seti foe kisi libi nanga jepi foe Kristus ferloesoe-ofrandi (Tori foe den Apostel 24:15). Na so fasi den sa tron wan pisi toe den „tra skapoe” foe Jezus, makandra nanga a „bigi ipi” di sa ben pasa libilibi na „bigi benawtoe” (Johannes 3:16; Openbaring 7:9, 14). Na so fasi na nen foe den sa tan skrifi na ini Jehovah memreboekoe.
Den e si den leki regtvaardiki leki mati foe kan psa libilibi
13. Na Toemsi Boen Herder e tjari soema kon now makandra, èn tapoe a fundamenti foe san meki den nen foe den e skrifi poti na ini Jehovah memre boekoe?
13 Na toemsi Boen Herder, Jezus Kristus, e tjari now „tra skapoe” konmakandra, di no de foe na „pikin ipi” foe 144.000 „santawan” di den ben gi na hemel kownoekondre (Lukas 12:32; Daniël 7:18). Den „tra skapoe” disi e arki na a sten foe na Toemsi Boen Herder (Johannes 10:16). Den e poti bribi na ini Jehovah nanga en Manpikin, tapoe na fundamenti foe Kristus ferloesoe-ofrandi den e gi den libi abra na Jehovah. Den e kisi dopoe na „ini na nen foe na Tata èn foe na Manpikin èn foe na santa jeje” èn e ferstan taki a de fanowdoe foe kweki „den froktoe foe na jeje” (Mattéus 28:19, 20; Galacia 5:22, 23). Den e skrifi den nen poti na ini Jehoah memreboekoe.
14. San e gi den „tra skapoe” wan krin positsi na fesi foe Jehovah, ma san den moe aksi na Gado?
14 Den „tra skapoe”, di tjari kon makandra na ini a ten disi foe na kaba, sa tron na „bigi ipi” di na apostel Johannes ben si na ini wan visioen, baka di a ben si den 144.000 memre foe na jeje Israël (Openbaring 7:4, 9). A ben meki oen si dati „bigi ipi” „ben wasi den langa krosi foe den èn ben meki a kon weti na ini a broedoe foe a Lam.” (vers 14). Foe na bribi di den abi na ini a broedoe foe na Lam di ben trowe meki den e teri wan pisi foe regtvaardikifasi gi den. Den agersi weti krosi foe den e agersi disi. Den e teki wan krin positsi a fesi foe Jehovah èn „foe dat’ede” a e gi den pasi foe doe santa dienst gi en „dé nanga neti na ini en tempel” (vers 15). Tokoe ibri dé den moe ferteri Jehovah den sondoe foe den èn aksi en pardon nanga jepi foe Jezus Kristus. — 1 Johannes 1:9-2:2.
15. (a) Fa e kon a krin na ini na agersitori foe den skapoe nanga bokoboko dati den „tra skapoe” e teki wan regtvaardiki positsi na fesi foe Gado? (b) Na ini sortoe fasi den e ferklari den regtvaardiki now?
15 Dati den „tra skapoe” de mati foe Gado èn now srefi e teki wan relatief regtvaardiki positsi na fesi foe en, e kon ooktoe na krin ini Jezus profétitori foe „na marki foe en denoja’, pe na agersitori foe den skapoe èn bokoboko de na ini toe. Foe di den „skapoe” e doe boen gi na fikapisi foe Kristus 144.000 „brada” di de ete na grontapoe, meki na ’blesi’ foe Jezus Tata de a tapoe den èn den e kari den „regtvaardikiwan”. Netleki Abraham den e teri regtvaardikifasi gi den ofoe e ferklari den regtvaardiki leki mati foe Gado. A regtvaardiki positsi foe den sa wani taki gi den ooktoe dati den e tan a libi te den „bokoboko e go na ini na tégo kotipoeroe” (Mattéus 24:3-25:46). Den sa kon a doro „foe na bigi benawtoe” di e marki na kaba foe na disiten godelowsoe seti foe sani. — Openbaring 7:14.
Tjari kon de volmaakti
16. Fa wi sabi dati na bigi ipi den no sa ferklari regtvaardiki foe kisi libi bifo na „bigi benawtoe”?
16 Na „bigi ipi”, di e pasa libilibi „na bigi benawtoe”, den no ferklari regtvaardiki ete foe kisi libi. Den kan ferstan disi foe di na ini na kapitel pe den e kari den, den e taki moro fara: „Na Lam di a mindri foe na troon, sa tjari den go njan grasi èn tjari den go na fonten foe watra foe libi” (Openbaring 7:17). Soboen awinsi a fesi foe dati Gado ben si den leki regtvaardiki te joe teki den gersi nanga a libismafamiri ini algemeen, èn ooktoe leki en mati, tokoe den abi ekstra jepi fanowodoe ofoe ekstra sani moe doe sodati den kan ferklari den regtvaardiki foe kisi libi.
17. (a) San den e bedoel nanga „meki kon gesontoe foe den naatsi”? (b) Den nen foe soema moe skrifi poti na ini a „boekoe foe libi”?
17 Na ini a ten toe na Millennium (doesoen jari tiri) dan na Lam di den poti a tapoe a troon, makandra nanga en 144.000 kompe kownoe èn priester, sa meki wan programma foe „meki den naatsi kon gosontoe” a jeje èn skin fasi go doro (Openbaring 22:1, 2). Den naatsi disi sa de den sma di psa na bigi benawtoe libilibi, den pikin di kande sa gebore gi den baka Armageddon, èn den sma di sa drai kon baka na ini na opobaka foe den regtvaardikiwan èn den onregtvaardikiwan” (Tori foe den Apostel 24:15). Den nen foe ala sma di e poti bribi ini Kristus broedoe èn di e „doe sani” di fiti, den sa skrifi den poti ini na „boekoe foe libi”. — Openbaring 20:11-15.
18. Na ini sortoe toestand den sma di sa libi an grontapoe na a kaba foe na Millennium?
18 Na a kaba foe Kristus doesoen jari tiri dan den sma di e libi a grontapoe èn di ben sori dati den e teki Kristus ferloesoe-ofrandi èn di sa libi ini akroederi nanga Jehovah markitiki, sa tjari kon de volmaakti (Openbaring 20:5). Den sa de leki Adam bifo a ben sondoe. Neleki en den sa tesi na gi di den ben moe gi jesi.
„Glori fri” leki „pikin foe Gado”
19. (a) San sa psa wantewante baka na Millennium? (b) San sa psa nanga den sma di den no e feni den skrifi na ini a „boekoe foe libi”?
19 Baka na Millennium dan Kristus sa gi na volmaakti libisma abra na en Tata (1 Korinte 15:28). Dan „den sa loesoe Satan” foe poti na libismafamiri ondro wan tesi di s sori san a wan sma de (Openbaring 20:7, 8). Den nen foe ala sma di no ben psa na tesi disi, den no sa feni skrifi „ini na boekoe foe libi”. Na agersifasi den sa „iti den go na ini na se foe faja”, dati wani taki ’na di foe toe dede’. — Openbaring 20:15; 21:8.
20. (a) Soema Jehovah sa ferklari regtvaardiki foe kisi libi, èn foe san-ede? (b) Fa na sari-ati seti foe Jehovah ini a tori foe kon meki sma regtvaardiki sa dini en marki?
20 Den nen foe den sma di sori taki den de loyaal na Jehovah, sa skrifi sondro dati wi kan figi en poeroe na ini na „boekoe foe libi”, foe di den de volmaakti na ini soifri-reti-fasi èn de warti na reti tapoe tégo libi na grontapoe. Jehovah srefi sa ferklari den regtvaardiki dorodoro (Romeini 8:33). Den sa de regtvaardiki foe kisi tégo libi. Gado sa teki den leki en grontapoe manpikin ofoe adopteer den èn den sa go na ini na pramisi „glori fri foe den manpikin foe Gado” (Romeini 8:20, 21). Vrégde nanga wánfasi sa kon baka na ini na universum. Den „sani na grontapoe” èn „den sani na ini hemel”, sa kon de verzoen dorodoro nanga Gado (Kolosse 1:20). Jehovah sar’ati seti na ini a tori foe meki sma kon de regtvaardiki sa dini na marki foe en. Ibri mekisani na ini hemel èn na ini grontapoe sa kan plki na aksi „joe de a fesi foe Gado na ini wan regtvaardiki positsi?” nanga „ija” èn den kan taki a tapoe foe disi ete: „En di sidon a tapoe a troon èn a Lam moe kisi na blesi èn na grani èn na makti te ini ala ten foe tégo.” — Openbaring 5:13.
Disi e go foe na positsi foe den „tra skapoe” a fesi foe Gado
◻ Foe san-ede den no ben ferklari Adam regtvaardiki?
◻ Ini ofara Abraham nanga tra man nanga oema bifo a ten foe Kristus den ben ferklari regtvaardiki?
◻ Den nen foe soema den ben skrifi poti na ini Jehovah memre boekoe?
◻ Na ofara den „tra skapoe” e teki now wan regtvaardiki positsi, èn oten den sa tjari kon de volmaaktifasi?
[Prenspari pisi na tapoe bladzijde 8]
Foe a bribi foe den na ini „a broedoe foe na Lam” meki den e gi den „tra skapoe” wan positsi na fesi foe Jehovah di feni den boen èn na so fasi den e ferklari den regtvaardiki leki mati nanga en èn foe psa libilibi „na bigi benawtoe”. Na a kaba foe na milennium (doesoen jari tiri) den sa kon de volmaakti. Baka na laatste tesi den sa ferklari den regtvaardiki foe kisi libi.
[Prenki na tapoe bladzijde 7]
Den nen foe den regtvaardikiwan skrifi ini Jehovah memreboekoe
Abel
Job
Rachab
Na disiten bigi ipi