Wan tranga fanowdoe di de foe moro wrokoman na ini na kotiwroko!
„Na kotiwroko bigi, ma wrokoman de pikinso. Begi foe dat’ede na Masra foe na kotiwroko foe seni wrokoman go na ini en kotiwroko.” — LUKAS 10:2.
1. Fa joe ben sa kan tak-go-tak-kon foe den wortoe foe Jezus na ini Lukas 2, ma san a ben sa de heri boen foe doe?
TE JOE e lési den wortoe disi foe Jezus joe e firi taki ai taki nanga joe? Foe di den wortoe disi ben taki tinanégi hondro jari psa kaba, dan joe ben kan firi foe den toe dati den ben lasi a waarde san ben wani taki. Ma sowan bosroiti di joe e teki so es’esi de wan bigi fowtoe. Meki wi drai go loekoe baka san ben psa di Jezus ben taki biginbigin den wortoe disi foe ferstan san Jezus wortoe wani taki dorodoro èn morofara go loekoe wi égi situwasi na ini a ten disi. — Teki gersi 1 Korinte 10:11.
2. Sortoe situwasi di e aksi foe opo doe wan sani es’esi, Jezus ben tanapoe na en fesi na ini 32 G.T., èn fa a ben doe foe dat’ede?
2 Baka a wiwiri-kampoe-fesa na ini 32 G.T., dan soso siksi moen ben libi ete bifo Jezus ben moesoe si na dede na wan pina-oedoe ondro ai. Foe jepi na prékiwroko foe go moro esi, Jezus ben seni sébitenti discipel „toe na toe na en fesi go na ibri foto nanga presi pe ensrefi ben abi na prakseri foe go.” Den ben go a pasi, aladi den wortoe foe Jezus ben de ini den jesi: „Na kotiwroko de bigi, ma den wrokoman de pikinso. Begi foe dat’ede na Masra foe na kotiwroko foe seni wrokoman go ini en kotiwroko.” — Lukas 10:1, 2.
Wan bigi kotiwroko de a bakapisi
3. Ferteri foe wantoe foe den boen bakapisi foe na prékiwroko di ben kon moro bigi ini den laatste moen foe Jezus diniwroko?
3 San ben de a bakapisi foe a moro bigi moeiti disi na ini na prékiwroko? Wi e lési: „Ne den sébitenti drai kon baka nanga prisiri èn ben taki: ’Masra, srefi ogri-jeje ban poti go na wi ondro foe di wi ben gebroiki joe nen.’” Fa disi ben de wan wondroe sori foe na makti foe Gado a tapoe ogri-jeje. Jezus ben prisiri séker foe a moi dienstbericht disi bika a ben taki: „Mi ben si Satan fadon kaba leki wan bliksem foe hemel” (Lukas 10:17, 18). Jezus ben sabi dati Satan nanga en ogri-jeje te foe kaba baka na gebortoe foe na Messias Kownoekondre na ini hemel ben sa iti poeroe foe hemel. Ma aladi Jezus ben de ete na gronatpoe, dan na poeroe disi foe ogri-jeje nanga jepi foe osos libisma ben dini gi en leki wan ekstra djaranti foe na prisiri sani dati di boo psa ini a ten di ben de na en fesi. Foe dat’ede meki Jezus ben taki foe na fadon foe Satan komoto foe hemel di boo psa na ini a ten di e kon netleki wan sani san ben de séker. — Openbaring 12:5, 7-10.
4. San ben de a marki foe na kotiwroko di Jezus nanga en discipel ben doe bifo 14 Nisan 33 G.T.?
4 Jezus no ben taki foe wan kotiwroko foe sani leki karoe, alési ofoe a koti foe froktoe, ma foe a koti foe libisma, foe sma di ben kan teki gersi nanga skapoe èn di ben sa teki na kownoekondreboskopoe nanga angri. Den froktoe foe sowan kotiwroko ben bigin kaba foe sori ensrefi. Nanga na kotiwroko di Jezus nanga en bakaman ben doe na ini den wéniki moen di ben tan abra te 14 Nisan 33 G.T., dan soso na fundamenti ben poti foe wan moro bigi kotiwroko, di ben sa doe baka a dede nanga opo-baka foe Jezus. — Teki gersi nanga Psalm 126:1, 2, 5, 6.
5. Sortoe span sani ben doe tapoe na Pinksterdé ini 33 G.T., èn fa den ben abi krakti tapoe na kotiwroko di ben moesoe doe moro fara?
5 Na pinksterdé na ini 33 G.T. ben bigin. Sowan 120 foe Jezus bakaman ben kon makandra na ini Jeruzalem. „Wantewante ben komoto foe hemel wan babari leki di foe wan bigi winti di ben poesoe go a fesi èn a ben foeroe na heri oso pe den ben sidon na ini. . . . èn den alamala ben kon foeroe nanga santa jeje èn ben bigin foe taki na ini diftenti tongo, soleki na jeje ben gi den foe taki.” Disi ben de a bigin foe wan kefarlek bigi kotiwroko! „A tapoe a dé dati sowan dridoesoen sili ben kon moro a tapoe” (Tori foe den Apostel 1:15; 2:1-4, 41). „Dé na dé den ben de leki wán man ala ten na ini a tempel èn den ben prijse Gado èn den ben de na ini a boen-ati foe na heri pipel. Na a srefi ten Jehovah ben tan poti moro sma di ben kisi ferfolgoe na tapoe” (Tori foe den Apostel 2:26, 47). Bakaten wi e lési: „Bribiman na ini Masra ben poti a tapoe, ipi-ipi foe man nanga oema.” Èn bakaten moro ete: „Na so a wortoe foe Gado tan foe gro, èn a nomroe foe discipel na ini Jeruzalem ben tan kon moro foeroe èn wan bigi ipi priester ben gi jesi na a bribi.” — Tori foe den Apostel 5:14; 6:7.
6. Sortoe krakti na gens di ben de tége na prékiwroko ben abi tapoe a meki foe kownoekondre-froktoe?
6 Na gens tegen na kownoekondreboskopoe ben kon moro bigi now. Na kotiwroko ben go a baka nanga dati? Nono, bika „den di den ben panja ben waka psa a heri kondre èn ben meki a boen njoensoe foe a wortoe bekenti”. Filippus ben go na a foto Samaria. Den ipi-ipi sma ben arki nanga bribi na ini en. Den sma di ben abi ogri-jeje na den tapoe, den lanman èn den malengriman alamala ben kon gesontoe. A no de wan wondroe, dati ’bigi prisiri ben kon na ini a foto dati’. — Tori foe den Apostel 8:1-8.
7. Ofara na komando di Jezus ben gi en discipel na ini Tori foe den Apostel 1:8 ben doe te foe kaba?
7 Na Jezus di ben opo baka foe dede, ben taigi en discipel: „Oenoe sa de kotoigi foe mi na ini Jeruzalem èn na ini heri Judéa èn Samaria te na den moro farawe kontren foe grontapoe” (Tori foe den Apostel 1:8). Na bigi foe na gron pe den ben moe wroko ben aksi moro wrokoman — èn dati ben de tranga fanowdoe! Fa wan kotiwroko foe discipel ben de now foe ferwakti! Èn dati ben bigin foe kon kaba — alamala na ondro na tiri foe na santa jeje foe Gado. Baka na bekering foe na Saulus di ben angri foe kiri sma, na so wi e kisi foe jere, „dan gi na gemeente na ini heri Judéa nanga Samaria troetroe wan pisten foe vréde ben kon èn den ben bow na ini bribi; èn foe di den ben e waka na ini frede foe Jehovah èn na ini trowstoe nanga santa jeje, meki den ben kon moro foeroe na ini nomroe” (Tori foe den Apostel 9:31). Di na kotiwroko foe den sma di joe kan teki gersi nanga skapoe ben kon moro foeroe dan sondro degedege den fosten discipel dati ben moe denki alaten na den wortoe foe Jezus: „Begi . . . na Masra foe na kotiwroko foe seni wrokoman go ini en kotiwroko.” Jehovah, na Masra foe na kotiwroko, ben jere na begi dati? Séker! Bika fa a ben kan dan dati „na howpoe foe na boen njoensoe dati ben préki na ini heri na mekisani di de na ondro hemel”? — Kolosse 1:23.
A tranga fanowdoe de now moro bigi
8. Foe san-ede na ini den jari aititenti foe na di foe twenti jarhondro na fanowdoe de moro bigi foe abi moro kownoekondre wrokoman leki oiti na fesi?
8 Now na ini den jari aititenti foe na di foe twenti jarhondro, dan na fanowdoe foe moro wrokoman na ini na kotiwroko moro bigi leki oiti. Foe san-ede? Foe di na bigi foe na grontapoe veld de moro bigi. A bakapisi de dati den kownoekondre froktoe di moe koti èn tjari kon makandra de moro foeroe. Disi de na ini akroederi nanga san Jezus ben taki a fesi. A ben taki dati en bakaman foe so fara a ben abi foe doe nanga na préki foe na boen njoensoe ben sa doe moro bigi wroko leki en ben doe na grontapoe. — Johannes 14:12.
9. (a) Fa wan visioen foe Openbaring 7:1-3 e poti krakti na tapoe na tranga fanowdoe foe a disiten prékiwroko? (b) San wi kan ferstan foe den wortoe di gebroiki na ini Openbaring 14:4 „den fosiwan gi Gado èn gi a Lam”?
9 Na ferstan foe na tranga fanowdoe foe na disiten prékiwroko ben tjari kon moi na fesi na ini na dramatis situwasi di de foe lési na ini wan visioen di Johannes ben kisi èn di skrifi na ini Openbaring 7:1-3. Drape Johannes ben si „na den fo oekoe foe grontapoe fo engel tanapoe di ben hori stéfi den fo oekoe foe grontapoe”. Olanga den sa tan hori den „fo winti” dati? Soso ’te baka di den srafoe foe wi Gado ben kisi wan ségelmarki na ini den fes’ede’. Omeni ten dati ben sa teki? Wan marki de foe feni na ini disi dati na ini a ten foe na Memrefesa tapoe 15 april 1984 soso 9081 sma ben sori taki den de foe den 144.000. Den salfoewan ini disi ten de den laatstewan foe di Openbaring 14:4 e skrifi foe den leki sma di „bai komoto foe a mindri foe den libisma leki fosiwan gi Gado, èn gi na Lam.” Agersi dati a moro bigi pisi foe den „fosiwan” ben tjari kon makandra. Ma na wortoe „fosiwan” wani taki dati tra froktoe sa waka na baka kon? Séker! Disi ben agersi moi nanga den moro foeroe froktoe foe tra froktoe, di na a kaba foe na djoe landbouw jari na a ten foe na wiwiri-kampoe-fesa ben tjari kon makandra. — Deuteronomium 16:13-15.
10. Sortoe toe kotiwroko e feni presi now, èn fa a sani disi e poti krakti a tapoe na tranga fanowdoe foe kisi moro wrokoman na ini a kotiwroko?
10 A e kon foe dat’ede na krin dati, omoro na kotiwroko foe na fika-pisi foe salfoewan e kon na wan kaba, wan tra kotiwroko ben moe bigin. Disi no de foe si nanga san Johannes ben kisi foe si moro fara na ini wan visioen? „Baka den sani disi, mi ben si, èn loekoe! Wan bigi ipi, di no wan sma kan teri foe ala naatsi nanga lo èn folkoe èn tongo.” Den ben taigi Johannes: „Den disi na den sma di komoto foe wan bigi benawtoe” (Openbaring 7:9, 14). Pikinso ten de ete foe klari na wroko foe tjari n „bigi ipi” kon a wan. Te den „fo winti foe na grontapoe” loesoe kaba èn na marki e gi nanga dati foe a bigin foe „bigi benawtoe”, dan a sa lati! Joe e si fa a de tranga fanowdoe foe abi moro wrokoman na ini na kotiwroko foe tjari den hipi-hipi sma di moe feni ete kon na inisé?
Doesoendoesoen sma e opo doe wan sani now na wan boenfasi
11. (a) Na ofara Jezus „tra skapoe” abi wan prati na a kotiwroko? (b) San wi kan ferstan foe na nomroe foe den sma di ben de na a ten foe na memrefesa na ini 1984?
11 Jezus ben taki na fesi foe a kon moro bigi disi foe na kotiwroko pe „skapoe” sa tjari kon na ini en ipi. „Èn mi abi tra skappe ete di no de foe na koi disi, den dati ooktoe mi moe tjari, èn den sa arki mi sten èn den sa tron wán ipi, wán herder” (Johannes 10:14, 16). Joe abi now moro leki 2.800.000 foe den „tra skapoe” disi di meki sma kon sabi den nanga den activiteit foe den leki sma di de foe na ’wán ipi’ dati. Foe a nomroe dati 179.421 ben teki dopoe na ini a dienstjari 1984! Ma a nomroe foe sma di ben de na tapoe na Memrefesa ben de 7.416.974. San disi wani taigi wi? Dati foeroe tra sma ben jere na sten foe na Herder, ma foe wan ofoe tra réden no ben gi jesi ete na a switi kari foe Jezus: „Tron mi bakaman,” — Lukas 5:27.
12. Sortoe prenspari aksi wi kan aksi wisrefi now?
12 Pe joe tanapoe na ini a tori foe na prenspari kotiwroko disi na ini na ’bosroiti foe na seti foe sani disi’? (Mattéus 13:39) Joe de na ini na kolokoe groepoe foe den di abi now wan prati na den prisiri foe na kotiwroko? Ofoe joe de ete wan sma di e loekoe nomo èn ini joe jeje e skreki foe teki na kari foe na Toemsi Boen herder: „Tron mi bakaman”? Séker no wan sma sa wani tog foe tjari sani kon a fesi foe no teki a kari soleki disi ben psa nanga den dri man na ini Lukas kapitel 9 di wi ben taki foe den na ini na artikel na fesi! Prakseri pikinso san den dri man dáti ben misi — den prisiri foe na kownoekondredienst, na ondro san kande wan prati ben de na a fri foe son sma di ogri-jeje ben de a den tapoe! — Lukas 9:57-62; 10:17.
13. Fa bribi e pré wan prenspari ròl na ini a de klari foe oenoe foe de wan wrokoman na ini a kotiwroko?
13 Na apostel Paulus ben taki: „Sondro bribi a de wan sani di no kan foe plisi Gado” (Hebrewsma 11:6). O ja, a e aksi séker bribi foe ibriwan foe wi foe poti égi belang a wan sé èn foe de klarklari foe gi wi libi abra na Gado leki wrokoman na ini na kotiwroko. Kande foe eksempre joe abi foe doe nanga wan gesontoe problema di joe no kan meki spotoe nanga en; kande joe abi ini joe osofamiri ofoe famiri wantoe tranga gensman foe Jehovah Kotoigi; kande joe e feni joesrefi toemsi owroe foe tjari den fanowdoe kenki kon na ini joe libi; ofoe efi na a tra sé i de jongoe, dan kande i e firi taki i no man tége a druk foe den jongoewan foe a jari foe joe na skoro. San de omstandigheid foe joe de ooktoe, no frigiti noiti dati Jehovah e ferstan joe problema moro boen leki sortoe sma toe. Ooktoe a de klari foe kon krosbé foe joe èn foe tranga joe na ini joe bosroiti foe go dini en, efoe joesrefi doe bepaalde fanowdoe sani. — Psalm 103:13, 14; Jakobus 4:8.
Bribi kan poeroe ’bergi’ foe en presi
14. Tjari kon na krin san Jezus ben bdoel nanga den wortoe di skrifi na ini Mattéus 17:20?
14 Jezus ben taki: „Efoe joe abi bribi foe a bigi foe wan mosterdsiri, dan joe kan taigi na bergi disi: ’Opo joesrefi poeroe foe dja go drape’, èn a sa poeroe ensrefi èn no wan sani sa de gi joe san no kan.” Disi de na persoonlek ondrofeni foe foeroe foe den hondrohondro doesoen sma di ben teki tapoe wan boenfasi na kari foe moro wrokoman na ini na kotiwroko na ini den jari aititenti. Persoonlek problema nanga moeilekheid di ben de gi den leki bergi, den ben wini den nanga a jepi foe Jehovah (Mattéus 17:20; 19:26). Go prakseri pikinso den ondrofeni tori di e kon now.
15, 16. Ferteri fa wan jongoeman na ini den Verenigde Staten foe Amerkankondre èn wan katholiek trowpaar na ini Brasionkondre ben wini bigi problema di ben de wan ston a tapoe den pasi foe kisi dopoe?
15 Wan jongoeman na ini Californië (Amerkankondre) ben de wan hebi malengriman foe polio èn en papa nanga mama tapoe wan sarifasi no ben sorgoe en. Ne wan sma foe Jehovah Kotoigi ben feni en na ini na oso-foe-osowroko. Wan bijbelstudie ben opo. Ma a ben sjensjen so kefarlek dati, te a kotoigi ben kon foe hori na studie, a ben lolo a lolostoeroe foe en go na ini na oekoe foe a kamra èn ben go sidon nanga en fesi dri go na a skotoe foe en fesi no ben de foe si. A ben kostoe na jongoeman disi moen foe wini wantoe foe den problema foe en. Ma a ben wini den èn now a de wan kolokoe, dopoe kotoigi.
16 Wan katholiek trowpaar na ini Brasionkondre no ben de tevréde nanga a kerki foe den èn te foe kaba den bigin studeri na bijbel nanga Jehovah Kotoigi. Den ben firi dati now den ben kisi sorgoe ini na jeje fanowdoe foe den, ma wan bigi problema di ben kan teki gersi nanga wan bergi ben de. A man, Antonio, ben de wan kefarlek smoko man. A ben smoko 48 jari, foe sensi a ben abi sébi jari! Na ini den jari di ben psa a ben proeberi foe broko nanga a gweni disi ma foe soso. Ma a tron disi a ben de trafasi èn Antonio e ferteri: „Now mi ben leri dati mi, efoe mi ben wani plisi Gado èn mi ben wani gi misrefi abra foe doe en wani, ben sa moe libi a smoko. Baka foeroe begi te foe kaba mi ben man foe doe dati.” Fa a ben bréti di a ben sori taki a ben gi ensrefi abra na Jehovah foe di a be teki dopoe na ini watra! — Psalm 66:19; Markus 11:24.
17. (a) Sortoe takroe krakti, nanga san Jezus nanga en discipel ben abi foe doe nanga en, de now moro tranga leki oiti na fesi? (b) San Jezus nanga en discipel ben doe na ini na fosi jarhondro na sma di ogri-jeje ben de na den tapoe, èn fa den e doe nanga na afersi disi now?
17 Jezus nanga en discipel alaten baka ben kon tanapoe a fesi na problema foe djoe di ben abi ogri-jeje a den tapoe. Densrefi ogri krakti disi e wroko na ini a ten disi, spesroetoe now di Satan nanga den ogri-jeje ipi foe en ben iti komoto foe hemel go na a grontapoe disi (Openbaring 12:7-9, 12, 17). Tra fasi leki fa a ben de nanga na kristendom na ini en bigin-jari dan Jehovah no gi en pipel now den wondroe presenti foe poeroe ogri-jeje a sma tapoe. Na jeje feti-sani di a ben gi kristensma, kan dini leki wan kibri tége ogri-jeje krakti èn a kan gebroiki ooktoe leki wan wrokosani foe fri tra sma foe na makti foe ogri-jeje (Efese 6:10-18). Foe a kondre Ghana a tori disi komoto: „Foeroe sma e kon fri foe a hori di ogri-jeje hori den nanga a moeiti di den brada nanga sisa e doe.” Wan Kotoigi ben miti na ini a diniwroko wan oema èn so esi leki a takmakandra ben kon tapoe na bijbel, „a oema ben bigin kré”. San ben de na problema? Na Kotoigi ben ferteri: „Wan jeje ben teki en abra, èn alaten di a ben ferferi en, a ben moe kré èn ala moni di a ben abi kande na en ben gwe.’ Nanga jepi foe wan geregelde bijbelstudie a ben kisi jepi foe loesoe en poeroe foe na tergi foe den ogri-jeje disi, sodati a ben kan gi ensrefi abra na Jehovah. — Johannes 8:32.
18. Sortoe ondrofenitori e sori dati engel e gi tiri na a prékiwroko fajafaja?
18 Problema leki di taki dja a tapsé kan de so bigi na ini na jeje foe wan sma dati ai go prakseri foe kiri ensrefi. Teki na geval foe wan jongoe oema na ini Nieuw Zeeland. Na Kotoigi di ben fisiti en na fositron ben si dati „en firi ben span srefsrefi èn dati a ben de krin dati a ben broko’ede foe wan sani”. Bakaten a oema disi ben ferteri dati „a ben wani kiri ensrefi èn ben teki a bosroiti foe begi Gado fosi foe kisi jepi”. Tapoe a momenti dati na Kotoigi ben naki a doro foe en, èn a ben „taki Gado tangi troetroe, foedi a ben jere en begi”. Disi ben de wan sani di ben waka somaar so? Foe san-ede den sortoe sani disi nofotron e psa? San Jezus ben taki? Te na Manpikin foe libisma sa kon na ini en glori èn ala engel nanga en dan a sa prati den sma foe makandra soleki wan herder e prati den skapoe foe den bokoboko”. (Mattéus 25:31, 32; loekoe ooktoe Openbaring 14:6.) Den engel ben jepi Jezus na a herderwroko èn den e tjari den „kompe-wrokoman” foe na Meester kon na den sma di e kari en foe kisi jepi. — 1 Korinte 3:6, 9; loekoe Tori foe den Apostel 8:26-39; 16:9, 10.
19. Sortoe situwasi de now na a heri grontapoe, èn sortoe moeiti disi e aksi foe wi sé?
19 Pe wi e libi ooktoe, doesoendoesoen sma e las’ati èn e go boekoendoen na ondro densrefi problema di foeroe sma foe a pipel foe Jehovah ben wini kaba. Sonwan foe den e libi kande let’ na sé joe. Den abi tranga fanowdoe foe kisi jepi. Foe troe, a de soleki Jezus ben taki: ’Na kotiwroko bigi.’ Wi e begi na Meester foe na kotiwroko now foe seni na ini a jar 1986 moro wrokoman go na ini na kotiwroko. Meki a de so dati na ati foe joe boewégi joe na tapoe wan boenfasi foe teki doe na kari: Tranga fanowdoe di de foe moro wrokoman na ini na kotiwroko!
Aksi foe loekoe san wi ben leri
◻ Soema na a Masra foe na kotiwroko?
◻ Sortoe toe kotiwroko e doe now?
◻ Sortoe moro bigi wroko Jezus ben taki dati en bakaman ben sa doe?
◻ Foe san-ede ala wrokoman na ini na kotiwroko abi bribi fanowdoe?