A nyanyan na den gron lepi kaba fu koti
1. Sortu prenspari wroko e pasa now?
1 Baka di Yesus gi kotoigi na wan Samaria uma, a taigi den disipel fu en: „Opo un ai luku den gron, dan unu o si taki a nyanyan lepi kaba fu koti” (Yoh. 4:35, 36). Wan kotiwroko fu sma di e gi yesi na a boskopu fu Gado ben musu pasa, èn Yesus ben man si na fesi taki a wroko disi ben o du na heri grontapu. Yesus di de na hemel, e horibaka gi a kotiwroko te nanga now (Mat. 28:19, 20). San e sori taki a wroko disi e tan go na fesi?
2. San e sori taki a kotiwroko di e du na heri grontapu e go na fesi?
2 Wan kotiwroko di e du na heri grontapu: Na ini a dienstyari 2009, a nomru fu preikiman na heri grontapu kren nanga 3,2 procent. Na ini kondre pe lanti tapu a preikiwroko, a nomru kren nanga 14 procent. A nomru fu Bijbelstudie di ben hori ibri mun, ben pasa 7.619.000. Disi na moro leki a heimarki fu preikiman fu a yari di pasa, èn sowan afu milyun moro leki a nomru fu Bijbelstudie di ben hori na ini a yari di pasa. Fu di a wroko e gro na ini furu kontren, meki den brada e seni aksi moro nanga moro zendeling di kisi leri na a Gileadskoro. Na ini furu kondre, furu yepi de fanowdu tu na ini den kontren pe sma e taki wan tra tongo. A de krin fu si taki Yehovah e meki a wroko go na fesi esi-esi na ini a ten fu a kaba fu a kotiwroko (Yes. 60:22). Yu abi wan yoisti denki fu a „gron” pe yu e preiki?
3. San son sma e denki te a abi fu du nanga a kotiwroko na ini a kontren fu den?
3 A kotiwroko na ini a kontren fu yu: „Furu sma no wani arki na ini a kontren fu mi”, na so son sma e taki. A tru taki na ini son kontren a gersi leki sma no wani arki, noso taki now sma no e arki so furu moro leki fosi. Fu dati ede son Kotoigi e denki taki den preiki kaba gi pikinmoro ala den sma di ben o gi yesi na a boskopu, èn taki den musu suku den wanwan sma di o gi yesi ete. Na so a de trutru?
4. Sortu yoisti denki wi musu abi fu wi diniwroko, èn fu san ede?
4 Fu a bigin te na a kaba, sma musu wroko tranga na a ten fu a kotiwroko. Luku o prenspari a wroko disi de, soleki fa Yesus taki: „A kotiwroko bigi, ma furu wrokoman no de. Fu dati ede, begi a Masra fu a kotiwroko meki a seni wrokoman fu go du a kotiwroko fu en” (Mat. 9:37, 38). Yehovah, a Masra fu a kotiwroko, e sorgu pe èn o ten a kotiwroko o gro (Yoh. 6:44; 1 Kor. 3:6-8). San na a wroko di wi musu du? Bijbel e gi wi a piki disi: „Sai yu siri na mamanten èn no meki yu anu rostu fosi neti tapu” (Preik. 11:4-6). Iya, te a kotiwroko e doro en kaba, dan dati a no a ten fu meki wi anu rostu!
5. Fu san ede wi musu tan preiki fayafaya na ini kontren pe a gersi leki sma no wani arki?
5 Tan du a kotiwroko: Srefi efu wi wroko a kontren fu wi furu leisi èn a e gersi leki sma no wani arki, toku wi abi bun reide fu du wi wroko fayafaya èn fu hori na prakseri taki wi e libi na ini wan prenspari ten (2 Tim. 4:2). Fu di furu dyugudyugu de na grontapu, meki sma e kenki a fasi fa den e denki fu sani èn den e prakseri moro seryusu fu a tamara fu den. Yonguwan di e kon bigi, feni taki a de fanowdu fu abi a dyaranti taki sani o waka bun gi den èn taki den abi wan korostu firi. A fasi fa wi e horidoro kan abi krakti tapu tra sma. Iya, den sma di no ben wani arki fosi, kande sa wani arki now. Srefi den sma di e weigri fu arki a boskopu fu wi, musu kisi a warskow.—Esek. 2:4, 5; 3:19.
6. Efu a muilek fu preiki na ini a kontren fu wi, dan san o yepi wi fu tan preiki fayafaya?
6 Efu a muilek fu preiki na ini a kontren fu wi, dan san o yepi wi fu tan preiki fayafaya? Boiti na oso-fu-oso preikiwroko, wi kan preiki na tra fasi soleki na ini bisnis kontren noso wi kan preiki nanga yepi fu telefon. Noso ibri leisi wi kan kenki a fasi fa wi e pristeri a bun nyunsu. Wi kan kenki a schema fu wi èn go na ini a preikiwroko na mofoneti, noso na tra ten te moro furu sma de na oso. Kande wi kan du muiti fu leri taki wan tra tongo so taki wi kan fruteri moro sma a bun nyunsu. Wi kan du moro na ini wi diniwroko te wi e go na ini a gewoon pionierwroko. Noso wi kan froisi go na wan kontren pe furu preikiman no de. Efu wi abi wan yoisti denki fu a kotiwroko, dan wi o du ala san wi man fu teki prati na a prenspari wroko disi.
7. O langa ete wi musu tan du a wroko fu tyari sma kon na wán?
7 Gronman no abi furu ten fu tyari a nyanyan kon na wán. Dati meki den no e rostu èn den no e du en safrisafri teleki a wroko kaba. Na so a de tu nanga na agersi kotiwroko. Wi sabi taki a ten syatu. O langa ete wi musu tan du a wroko disi? Te „na a kaba fu a grontapu sistema”, noso te na „a kaba” (Mat. 24:14; 28:20). Neleki a Moro Prenspari Preikiman fu Yehovah, wi wani klari a wroko tu di wi kisi fu du (Yoh. 4:34; 17:4). Fu dati ede, meki wi tan du wi diniwroko nanga faya, nanga prisiri, èn meki wi tan abi a yoisti denki te na a kaba (Mat. 24:13). A kotiwroko no kaba ete!
[Prenspari pisi na tapu bladzijde 2]
Fu a bigin te na a kaba sma musu wroko tranga na a ten fu a kotiwroko