Dé di de leki den dé foe Noach
„Na grontapoe ben kon foeroe nanga ogri di e doe nanga tranga . . . a ben pori, bikasi ala (libisma) meti ben pori en pasi na grontapoe.” — GENESIS 6:11, 12.
1, 2. (a) Sortoe vorm foe ogri di e doe nanga tranga Jehovah Kotoigi ben ondrofeni now? (b) Ini sortoe omstandigheid Gado dienstknegti ben feni trowstoe foe na opobaka howpoe?
OGRI di e doe nanga tranga! Netleki fa a ben de na ini a ten foe Noach, na so a wortoe ogri di e doe nanga tranga kon de ooktoe wan sani foe ala dé. Srefi sma di, netleki Noach, e waka nanga na troe Gado, no de fri foe ogri di e doe nanga tranga. Na wan krakti fasi disi ben tjari kon na a prakseri foe na grontapoe di a jari di psa na tapoe 21 juli wan bom ben pori wan Kownoekondrezaal foe Jehovah Kotoigi na ini Sydney (Australië), aladi wan publiki bijbellezing ben e ori foe ’loyaliteit na Gado nanga na osofamiri’. Wán Kotoigi ben lasi libi. Moro leki fotenti sma den ben moe teki ini at’oso. Den alamala kon gesontoe baka, aladi sonwan foe den leki wan bakapisi foe na ogri doe disi ben kisi takroe mankeri. Wan dekta foe skowtoe ben taki: „110 sma ben de na ini na zaal, èn a de gewoon wan wondro dati 110 dede sma no ben de.”
2 Na ini tra pisi foe a grontapoe — soleki ini Noord-Ierland nanga El Salvador — Jehovah Kotoigi e meki a „boen njoensoe” bekènti na ini wan kontren pe soso ogri di e doe nanga tranga e de nomo. Wan toe foe den den ben kiri, sonwan foe den di den ben de bezig na ini a diniwroko. Na ini foeroe kondre dan „sani di joe no sabi a fesi taki a o psa”, so leki oto-ongolokoe nanga aardbéfi, ben teki diri libi toe; Jehovah Kotoigi e teki trowstoe na ondro den sortoe omstandigheid dati foe na opobaka howpoe. — Prékiman 9:11; 1 Thessalonika 4:13, 14.
3. (a) San kan psa nanga sonwan foe a pipel foe Jehovah soleki sani di no ben psa langa ete èn di Lukas 21:16 e sori? (b) Sortoe djaranti wi abi dati Gado sa kibri wi na ini a ten foe a „bigi benawtoe”?
3 No so langa psa kaba na ini Mexico, dan ala nanga ala 23 Kotoigi nanga sma di ben tai densrefi na Jehovah Kotoigi ben de na mindri den moro leki féfi doesoen dede di ben fadon na ini wan bigi aardbéfl. Na ini Porto Rico dan sébi trawan ben de a mindri den dri hondro sma di ben dede na ini wan bigi watra nanga na skoifi foe na doti. Disi wani taki dati Jehovah ben misi foe kibri wan toe foe en dienstknegti? Kwetkweti Ongolukoe nanga rampoe kan miti wi ooktoe. Èn foe na sé foe ferfolgoe Jezus ben warskow en discipel na fesi: „Sonwan foe oenoe den sa kiri.” Hondrohondro foe wi brada nanga sisa ben lasi libi leki wan bakapisi foe na takroe-ati ferfolgoe foe nazi-Hitler. Jehovah sa memre ala den sortoe sma disi na ini wan opobaka. Ma te na „bigi benawtoe” sa rigeri a tapoe grontapoe, dan Jehovah sa sori dati a kan ferloesoe den sma di e kari en nen, net so leki a ben doe na ini den dé foe Noach. — Lukas 21:16-19; Mattéus 24:14, 21, 22, 37-39; Jesaja 26:20, 21; Joël 2:32; Romeini 10:13.
4. Fa wi kan teki den disiten toestand gersi nanga di foe Genesis 6?
4 Foe sensi 1914 dan ogri di e doe nanga tranga ben kon moro foeroe srefsrefi na a heri grontapoe. Moro leki wan hondro miljoen sma ben lasi libi na ini feti nanga srakti foe na jarhondro disi. Ogri sma di e teki opolangi nanga sipi abra, e poti bom foe kiri sma, a kiri foe hipihipi sma nanga ogri-ati a mindri ras e trobi a libismafamiri èn den libi e kon ini kefar nanga a meki foe moro kernfetisani. Wi e libi séker na ini „moeilek ten”, nanga „broeja skreki foe den naatsi di . . . no sabi wan pasi foe komoto” (2 Timotéus 3:1-5; Lukas 21:25). Ma Jehovah pipel e libi now na ini wan ten pe wan plaag e waka lontoe na grontapoe di de wan moro bigi kefar leki na ogri di e doe nanga tranga, aladi nofotron ai go makandra nanga dati. A e go moro leki 4300 jari psa kaba te na a ten foe Noach. San na a plaag disi?
A bribi foe Noach a mindri foe porifasi
5, 6. (a) Fa Satan ben bigin foe doti na libismafamiri? (b) Na sortoe fasi Noach nanga en osofamiri ben kon na fesi leki sma di no ben de wan pisi foe na grontapoe dati?
5 Sensi na opo di sma opo densrefi tége Gado na ini Eden, dan Satan na Didibri ben hari go ’foe kori na heri grontapoe pe libisma e libi’ (Openbaring 12:9). Jehovah ben gi na man nanga oema na komando foe gebroiki na seksueel krakti di a ben gi den tapoe wan respeki fasi inisé foe na trow seti foe ben kan ’foeroe’ a grontapoe nanga na sortoe foe den (Genesis 1:28; Hebrewsma 13:4). Ma Didibri ben bigin foe pori na libismafamiri nanga tégen-natuurlek seks. Fa disi ben psa? ’Jeje manpikin foe Gado’ ben go moksi densrefi na Satan na a opo di a opo ensrefi. Den ben tron „ogrijeje”, nanga Satan leki „tiriman” foe den (Lukas 11:15). Èn san ben de den activiteit foe den ogrijeje na a ten dati? Den ben kon na grontapoe, ben teki libisma skin èn ben go libi nanga den moi oemapikin foe libisma. A bakapisi ben takroe srefsrefi!
6 Na so fasi bakapikin di ben de basra ben doe kon, bigi langa man na skinfasi di ben de afoe ogrijeje èn afoe libisma. Den disi ben de den Nefilim, sma di ben angri foe kiri tra sma, di ben e „fara” a libismafamiri „trowe”, soleki a tori e sori: „Èn grontapoe ben kon pori ini a ai foe a troe Gado èn grontapoe ben kon foeroe nanga ogri di ben e doe nanga tranga. Soboen Gado ben si a grontapoe èn loekoe! a ben pori bika ala (libisma) meti ben pori en pasi a grontapoe.” Ogridoe di e doe nanga tranga èn seks porifasi ben panja densrefi so fara dati soso foe Noach joe ben kan taki: „A ben sori taki a ben de sondro fowtoe a mindri en geslagti. Noach ben waka nanga na toe Gado.” En oema, en manpikin nanga den oema foe den — den wan enkriwan foe na libismafamiri ben sori bribi èn frede gi Gado. A de krin dati na seks porifasi foe Noach ten no ben pori na geslagti lin foe en. — Genesis 6:4, 9-12, voetnoot, na Ingrisi NW-Verwijs-bijbel.
7. Fa Jehovah e kroetoe den ogriwan èn den regtvaardikiwan soleki ben kon na krin na ini na ten foe Noach? (Teki gersi nanga Mattéus 25:40, 45, 46.)
7 Jehovah ben pori na grontapoe dati di ogrijeje, nanga seks nanga ogridoe ben e basi en. A ben tjari na bigi Froedoe kon tapoe na grontapoe èn wasi ala sani gwe di ben takroe. Ala basra Nefilim nanga pori sma ben figi poeroe krinkrin aladi den fosten ’manpikin foe Gado’ di ben tron ogrijeje, ben lon komoto foe di den drai go baka na a jeje kondre e wakti a kroetoe di Gado sa tjari kon tapoe den. Ma sma ben de di ben tan a libi! Noach nanga en osofamiri ben tan a libi. Èn leki wan bakapisi foe san? Foe a bribi foe den ede, makandra nanga wroko, foe di den ben bow na ark èn ben préki regtvaardikifasi gi na grontapoe dati di ben sa kisi kroetoe. — 2 Petrus 2:4, 5.
Sma na ini disiten, moe loekoe boen
8. Na sortoe fasi na ten foe Noach ben de wan agersifasi gi wi ten?
8 A ten foe Noach ben de wan prenki foe wi ten. Fa wi sabi disi? We, Jezus ben taki foe so wan sortoe ten di boo kon foe ogri di e doe nanga tranga, kroektoedoe nanga sondro lobifasi leki wan pisi foe „a marki”, dati wi tanapoe leti a fesi foe wan „bigi benawtoe . . . leki foe sensi a bigin foe grontapoe te leki now no ben kon ete, èn ook no sa kon moro.” A ben taki ooktoe: „Foe na dé èn foe na joeroe dati nowan sabi wan sani, . . . leki na Tata wawan.” Moro fara a ben taki: „Net so a ben de na ini den dé foe Noach, na so na denoja foe na Manpikin foe libisma sa de, bika soleki den ben de na ini den dé dati bifo na froedoe, den ben njan èn den ben dringi, man ben trow èn oema den ben gi foe trow, te leki a dé di Noach ben go na ini na ark, èn den no ben poti prakseri, te leki a froedoe ben kon èn ben figi den alamala poeroe, na so na denoja foe na Manpikin foe libisma sa de.” — Mattéus 24:3-21, 36-39.
9. Fa wi kan lon komoto foe a sani di ben miti den sma di ’no ben poti prakseri na tapoe’?
9 Ija, „den no ben poti prakseri a tapoe”. Ma joe no a foe de leki den. Joe kan lon komoto te Masra Jezus komoto foe hemel sa sori ensrefi foe tjari a refensi foe Gado kon foe di „a e pori foe tégo den sma di no sabi Gado èn . . . no gi jesi na a boen njoensoe foe wi Masra Jezus” (2 Thessalonika 1:7, 8). Joe no afoe de leki den grontapoe sma di a belangstelling foe den na ini a libi moro foeroe e go foe prisiri densrefi, foe di den e feti a baka wan boen wroko pe nen tai na en ofoe poti grontapoe goedoe leki wan marki a den fesi sondro foe denki oiti na Gado. Ija, „a gado foe den na den bere”. — Filippi 3:19.
„No wani si ogri na ai”
10, 11. (a) Sortoe poridoe wi moe tan fara foe en foe kisi a boenati foe Gado? (b) Sortoe feti-sani wi moe weri, èn foe san-ede?
10 Na ini den lasti dé disi a libi foe boen foeroe sma e drai lontoe seks, efoe den trow now ofoe no trow. Èn gi foeroe sma di trow a de so dati broko trow ofoe wan tra vorm foe broko a trow de wan ala dé sani. Foeroe sma na ini a kristenheid e poti den krin warskow foe Jezus discipel a wan sé èn e gi densrefi abra na homoseksualiteit. Sonwan foe den e kisi kaba „ini densrefi na paiman dorodoro” na ini a vorm foe Aids èn tra siki di sma e kisi foe seks contacti. Ma srefi gi den sortoe sma disi howpoe tapoe ferloesoe de. No fergiti dati Jezus ben taki boen foe hoeroe oema di ben tjari den libi kon krin èn ben poti bribi na ini kontrari den hémemre kerki tiriman na ini en ten di no ben abi berow. — Romeini 1:26, 27; 2 Petrus 2:9, 10; Judas 6, 7; Mattéus 21:31, 32.
11 Efi na mindri Jehovah pipel sma de di kon doti nanga hoeroedoe wroko ofoe di den kori go gi densrefi abra na dati, dan den moe wiki kon na ai èn weri na heri fetisani di Gado e gi! (Efese 6:11-18) Den dé disi de séker „net so leki den dé foe Noach ben de”. Na „krasi lew” dati, Didibri, nanga den pori ogrijeje foe en no e bro na ini a moeiti foe den foe poti den dienstknegti foe Gado aparti èn kori den go na ini a trapoe. Wi moe tanapoe fasti na ini bribi èn teki oen bosroiti tége en. — 1 Petrus 5:8, 9.
12. Foe san-ede a de prenspari foe waka baka a rai di gi na ini Psalm 97:10?
12 A wan sani di e seki sma dati srefi wantoe di de na wan prenspari positsi na ini Jehovah organisaatsi ben broko kindi gi hoeroedoe, pe joe ben abi na ini ooktoe homoseksualiteit, a kenki foe patna nanga a misbruik foe pikin. Ooktoe wi moe taki dati ini a jari di psa 36.638 sma ben moesoe poti na dorosé foe na gemeente, moro foeroe foe na doe foe hoeroedoe. Jehovah organisaatsi moe hori krin (1 Korinte 5:9-13). Na ini a ten disi gemeente owroeman, dinari na ini a diniwroko nanga te joe loekoe en boen ala wi brada nanga sisa moe komoto na pasi gi ibri omstandigheid di ben sa kan tjari den go ini hoeroedoe. Loyaliteit na den markitiki foe Jehovah sa kisi pai, soleki fa ini Psalm 97:10 e taki: „O oenoe di lobi Jehovah, no wani foe si ogri na ai. En e kibri na sili foe en loyaalwan; foe na anoe foe den goddelowsoewan a e fri den.”
13. Sortoe boen rai den apostel Paulus èn Petrus e gi?
13 Ala sma „di de wan tegoe sani na ini na dotifasi foe den” te foe kaba sa figi poeroe na ini na „bigi benawtoe”. Soboen wi moe broko wi ede krakti foe no wani si grontapoe porifasi na ai, ija, foe tegoe èn tan farawe foe en! Wi moe ’lon komoto gi hoeroedoe’! (Openbaring 21:8; 1 Korinte 6:9, 10, 18) Baka di na apostel Petrus ben gi warskow foe den sma di fadon komoto na bribi èn di e sai degedege na ini a ati foe trawan èn ben sori na tapoe na troe fasi foe „Jehovah dé”, a ben gi wi na dek’ati foe „de santa na ini wi libi èn ini doe foe gi wisrefi na ini a dini foe Gado”. A ben taki moro fara: „Ma njoen hemel nanga wan njoen grontapoe de di wi e ferwakti akroederi en pramisi, èn na dape, regtvaardikifasi sa de. Foe dat’ede, oen lobiwan, foe di oen e ferwakti den sani disi doe ala san oen man foe den feni oen te foe kaba sondro fowtoe èn sondro flaka èn ini vréde.” Fa a sa de wan prisiri foe kan go na so wan fasi na ini „na njoen grontapoe” pe Gado sa meki ’ala sani njoen’ èn krin! — 2 Petrus 3:3-7, 10-14; Openbaring 21:1, 4, 5.
Poti prakseri tapoe ’moro warskow eksempre’
14. Foe san-ede na krin di a froedoe ben tjari kon ben de foe wan pisten nomo?
14 Baka di na bigi Froedoe ben krin a grontapoe foe ala ogrijeje nanga libisma doti libi, dan Jehovah ben taki ete wantron na komando di a ben gi biginbigin na Adam, foe di a taki gi Noach nanga en manpikin: „Meki pikin èn kon foeroe èn foeroe a grontapoe” (Genesis 9:1). Na tapoe wan agersifasi den ben doe a komando disi foe di den ben meki sébitenti famiri — wan agersi volmaakti nomroe — di Genesis kapitel 10 e kari. Ma na libismafamiri ben e ondrofeni ete den bakipisi foe na sondoe di den ben kisi foe Adam. Èn a de krin dati libisma na ondro na krakti foe den ogrijeje agen ben tjari go so fara foe soengoe go na ini seksueel pori libi.
15. San wi e leri foe na kroetoe di Gado ben tajri kon tapoe Sodom?
15 Baka wan pisten Jehovah „mati Abraham” nanga Abraham neef Lot ben hari go na a kontren foe Kanaän. Lot ben teki a bosroiti foe go na a Jordaan distrikt, di „ben de leki na djari foe Jehovah”. Ma a ben de disi ooktoe na ini moreelfasi? Fara foe dati! Na foto Sodom pe Lot ben go libi, èn na foto Gomorra, ben de homoseksueel dorodoro. Tin regtvaardiki sma srefi no ben de foe feni drape. Na foe na réde disi meki Jehovah ben tjari ’na strafoe foe tégo faja’ foe na kroetoe kon tapoe den foto dati. Den pori foto dati noiti sa kon boen moro! Jezus ben sori a tapoe a kroetoe di Jehovah ben tjari tapoe Sodom nanga Gomorra èn na tapoe den sani di ben psa na ini „den dé foe Noach” foe poti krakti a tapoe, dati wi moe loekoe boen! — Genesis 13:10; 18:32; Judas 7; Lukas 17:26-30.
16. Sortoe activiteit foe den ogrijeje e meki a de fanowdoe dati wi feti sondro foe weri gi na bribi?
16 No kori joesrefi! Satan nanga en ogrijeje e doe te now ete leki wan lawman! Aladi den pori jeje dati iti go na ini agersi „peti di no abi gron” foe deki doengroe èn no abi moro langa na krakti foe teki wan skin foe meti, tokoe den poti a prakseri foe pori libisma, èn spesroetoe Jehovah dienstknegti (2 Petrus 2:4-6). Sondro degedege den ogrijeje ben abi krakti na tapoe Kanaän foe doe wan hoeroedoe fasi nanga en granipapa Noach (Genesis 9:22-25). Den ben de den sma di go prakseri den kefarlek doti libi di ben tron a fasi fa den sma ben e doe na ini a kondre Kanaän, so dati te foe kaba a kondre ben braak den sma di ben e libi na ini trowe (Leviticus 18:3-25). Ooktoe den ogrijeje ben meki den tegennatuurlek seksdoe go na fesi so dati someni gemeenschap foe sma na ini a ten disi abi foe doe nanga en. Te wi e feti sondro foe weri gi a bribi, dan wi moe kakafoetoe gi ala aanval foe den fadon engel dati di e gi faja ’foe doe hoeroedoe psa marki èn foe waka na baka skin foe gebroiki en na tapoe wan tegen natuurlek fasi’. — Judas 3, 6, 7
Bow na joe ferloesoe
17. Fa wi, netleki Noach nanga en osofamiri kan sori dati wi no de wan pisi foe a grontapoe?
17 Fa wi kan feni na pasi foe ferloesoe te wi e loekoe na serjoesoe fasi foe wi ten? We, fa Noach nanga en osofamiri ben psa libilibi na Froedoe? „Nanga bribi Noach . . . ben kroetoe a grontapoe” (Hebrewsma 11:7). Na so Jehovah Kotoigi na ini a ten disi no de wan pisi foe na goddelowsoe grontapoe. Boiti foe dati, wi e sori a bribi foe wi foe di wi e gi wi libi abra na Jehovah èn saka wisrefi na ondro a dopoe na ini watra foe tron discipel foe Jezus Kristus. — Johannes 17:14, 16; Mattéus 28:19.
18. San a bow foe na ark e agersi?
18 Boiti foe dati, wi e teki prati na a wroko foe Jehovah gi a ten disi, wan jeje bowprogramma na ondro a tiri foe a moro Bigi Noach, Jezus Kristus. Leki wan presi foe sékerfasi èn tan a libi na ark e teki a presi foe na jeje paradijs di Jehovah ben bow sensi 1919 a mindri en anbegiman. A de a toestand foe wan vréde matifasi nanga Gado di ben kon boen baka. A de En seti foe kibri na agersi osofamiri foe na moro Bigi Noach psa na „bigi benawtoe”. — Mattéus 24:21; 1 Korinte 3:9, 11; 2 Korinte 12:3, 4; Openbaring 7:13, 14.
19. Soema ofoe san Noach, den memre foe en osofamiri nanga a wroko di a ben e doe e agersi?
19 „Noach ben feni boenati na Jehovah.” Fa a de wan boen prenki foe Jezus Kristus, di ben waka na wan sakafasi na grontapoe nanga Gado èn no ben doe wan sani foe en egi! (Genesis 6:8; Mattéus 17:1, 5; Johannes 8:28) Ala toe ben de prékiman foe regtvaardikifasi — wan toemsi moi eksempre gi ala kotoigi foe Jehovah. Èn wi kan de séker dati na oema foe Noach, di de wan prenki foe den salfoewan di tan abra èn di de now a grontapoe, wan eksempre fa joe kan saka joesrefi na ondro trawan (2 Petrus 2:5; Lukas 4:14-19; Efese 5:21-24). Èn efoe wi loekoe o bigi na wroko ben de foe bow na ark di ben kibri Noach nanga en osofamiri, dan wi kan ferstan boen o bréti Noach di ben kon owroe kaba ben moe de dati a ben kisi a jepi foe en dri tranga manpikin nanga den oema foe den! Den e agersi na wan boen fasi na disi ten „bigi ipi”, di na ini na lasti teri foe na „countdown” (a teri go miti na kaba) di e waka a fesi a loesoe kon foe na agersi froedoe, e doe a moro bigi pisi foe a jeje bowwroko. — Openbaring 7:9, 15.
20, 21. (a) Sortoe moi ferwakti foe libi tapoe wan krin grontapoe de a fesi foe Jehovah anbegiman? (b) Sortoe prisiri wi kan ondrofeni now kaba?
20 Te a grontapoe disi wasi kon krin èn de klari foe kenki kon na ini wan letterlek paradijs, dan a de wan sani di kan dati den sma di Noach manpikin nanga en manpikin wefi ben agersi, sa kisi pe wan pisten pikin di sa gebore ini regtvaardikifasi. Moro fara na foeroe foe a grontapoe nanga libisma sa doro en marki nanga a wondroe foe na opobaka. Ala sma di e teki na grani foe tron Jezus „tra skapoe”, sa tjari kon de volmaakti, èn te den pasa libilibi na lasti tesi, baka di Kristus ben gi a kownoekondre abra na en Tata, dan den sa ferklari den regtvaardiki foe kisi tégo libi. — Johannes 5:28, 29; 10:16; 1 Korinte 15:24-26; Psalm 37:29; Openbaring 20:7, 8.
21 Fa foeroe prisiri didon na a fesi foe Jehovah getrow anbegiman! Ma srefi now a e gi foeroe prisiri foe teki prati nanga wi heri ati na na bow foe na disi ten ark foe tan a libi. Sortoe wini a wroko disi tjari kon? A tra studie foe wi sa gi a piki.
San joe ben sa piki?
◻ Fa den sani di ben psa bifo na Froedoe de wan warskow gi wi?
◻ San wi kan leri foe Mattéus 24:37-39?
◻ Foe san-ede a de so prenspari foe ’no wani si ogri na ai’?
◻ Fa wi kan abi wan prati na a bow foe na agersi ark?
[Faki na tapoe bladzijde 2]
LEKI ’NOACH TEN’ —
„Soso fotenti procent foe na nomroe foe kerkileriman na héskoro . . . e bribi taki a de hoeroedoe te wan man nanga wan oema doe seks.” — Saterday Oklahoman and Times, 29 december 1964.
[Faki na tapoe bladzijde 3]
Bijbel gronprakseri e teri?
Wan Anglicaans priester ben arki na wan dienst na berpe di wan Kotoigi foe Jehovah ben hori. Tapoe wan kari foe na priester dan toe bedinari foe na Wachttorengenootschap ben teki prati na wan takmakandra nanga difrenti kerkileriman foe Brooklyn Heights, New York.
Na afersi foe homoseksualiteit ben kon tapoe taliment. Den Kotoigi ben sori krin dati a bijbel e tapoe disi èn dati den Kotoigi e poti sma na dorosé foe na gemeente di e doe awinsi sortoe vorm foe hoeroedoe ooktoe (Romeini 1:24-27; 1 Korinte 6:9, 10; Judas 7). Den Kotoigi ben aksi den kerkileriman fa den ben de nanga na afersi èn ben kisi den piki di e kon now:
Wan congregationalistis prékiman: „Mi e denki dati wan wet foe poti wan sma na dorosé foe a gemeente tanapoe na ini den boekoe foe a gemeente foe a kerki foe wi, ma nanga moro boen wani foe a grontapoe mi no kan memre dati oiti wi ben gebroiki na wet dati!”
Na Anglicaans priester: „Efoe wi ben sa gebroiki na wet, dan wi no ben sa abi kerki sma moro.”
Wan katholiek monseigneur: „Efoe wi ben sa gebroiki a wet dati dan wi no ben sa abi priester moro.”
Awinsi den kommentaar foe den kerkileriman disi kande taki pasamarki, tokoe Jehovah Kotoigi e prisiri nanga na krakti bosroiti di den ben teki fo hori na gemeente krin. Den no de „wan pisi foe a grontapoe”. — Johannes 15:19.
[Faki na tapoe bladzijde 4]
LEKI ’A TEN FOE NOACH’ —
„Na ini Manhatten wan openbare middelbare skoro gi homekseksueel skoro pikin ben opo gi na foto New York.” Wan foe den meester di de tapoe na skoro disi ben taki: „Wi ben wani wan kontren pe homeseksueel boi nanga pikin no libi abra gi na fasi foe pikin di no lepi.” — The New York Times, 6 juni 1985.
[Faki na tapoe bladzijde 5]
LEKI ’A TEN FOE NOACH’ —
„Den memre foe na Riverside Church ben taki esrede dati den ben feni en boen foe sma libi wan homoseks libi tapoe a gron taki homoseksueel matifasi den e teki leki wan pasi foe san sma kan si leki a kristen osolibi.” — New York Post, 3 juni 1985.