Fri kon krosibey gi sma di e gi den srefi ini a dini fu Gado!
„Yehovah e sabi fa fu fri sma, di gi den srefi ini a dini fu Gado, puru fu tesi, ma fu hori onregtfardikiwan gi na dey fu krutu fu koti den puru.” — 2 PETRUS 2:9.
1. (a) Na libismafamiri tanapu na ini na ten disi na fesi sortu omstandigheid di e frede yu? (b) Sortu aksi wi o luku nanga disi na ini prakseri?
DEN PROBLEMA fu na libi e kon dey fu dey moro furu gi na heri libismafamiri. Disi de tru efu wan sma e libi now pe sani de bogobogo ofu pe mankeri fu sani de. Ala pe onseykerfasi de. Èn neleki na ekonomiya situwâsi, di no de stabiel, no nofo fu broko wi ede nanga en, dan na planeet Grontapu e feti nanga seryusu milieu problema, di de wan kofar gi ala libi. Siki e grabu lontu en. Siki di kan gi abra na tra sma, atisiki nanga na krawasi fu kanker e aksi furu sma libi. Huru libi du bigi ogri na a libisma firi èn na a osofamiri libi. Boyti ala den sani disi, dan a grontapu sungu go na ini ogridu. Nanga ala den sani disi di na libisma maatschappij tanapu na en fesi, dan wi e aksi wi srefi trutru: Wan bun fondamenti de fu fruwakti fri heri-esi? Èn efu dati de so, fa a sa kon èn gi suma? — Teki gersi Habakuk 1:2; 2:1-3.
2, 3. (a) Fu san-ede san taki na ini 2 Petrus 2:9 e gi wi seykerfasi? (b) Sortu spesrutu du fu tyari fri kon na beybri e sori a tapu leki wan fondamenti fu abi deki-ati?
2 San e psa na ini wi ten, e memre wi na bepaalde tra pisiten ini na historiya fu libisma di ben wani taki wan sani srefisrefi. Na apostel Petrus e poti prakseri tapu den sani di Gado ben du fu fri sma na den okasi dati èn dan e kon na a bosroyti disi di e gi wi wan korostu ati: „Yehovah e sabi fa fu fri sma, di e gi den srefi ini a dini fu Gado, puru fu tesi.” (2 Petrus 2:9). Luku pikinso na ini sortu kontekst den wortu dati de, na ini 2 Petrus 2:4-10:
3 „Seyker, efu Gado no ben hori en srefi fu strafu den engel di ben sondu, ma, fu di a ben trowe den go na ini Tártarus, ben gi den abra na peti fu deki dungru fu hori den gi na krutu; èn a no ben hori en srefi fu strafu wan grontapu, ma ben kibri Noa, wan preykiman fu regtfardikifasi, psa bun makandra nanga seybi trawan, di a ben tyari wan bigi frudu kon na tapu wan grontapu fu hogri sma; èn a ben krutu den foto Sodom nanga Gomorra, fu di a ben meki den kon tron asisi; so taki a poti den leki wan eksenpre gi ogri sma fu den sani di e kon; èn a fri na regtfardiki Lot, di ben kisi kwinsi hebi nanga na yayo waka nanga libi fu den sma di ben kakafutu gi a wet; bika na regtfardiki man dati nanga san a ben si èn ben yere di a ben libi a den mindri ben pina en regtfardiki sili dey nanga neti nanga den kruktudu fu den — dan Yehovah e sabi fa fu fri sma, di e gi den srefi na ini a dini fu Gado, puru fu tesi, ma fu hori onregtfardiki sma gi a dey fu krutu fu koti den puru, spesrutu den di e waka baka skin nanga na angri fu doti en èn di e wisiwasi makti.” So leki a pisi fu na beybri e meki wi si, dan san ben psa ini den dey fu Noa, èn ini den dey fu Lot wani taki furu gi wi.
Na yeye di ben de ini Noa dey
4. Fu san-ede grontapu ben kon pori ini na ay fu Gado ini den dey fu Noa? (Psalm 11:5)
4 Na historiya tori na ini Genesis kapitri 6 e fruteri wi taki grontapu ben kon pori na ini na ay fu na tru Gado na ini den dey fu Noa. Fa dati ben du kon? Fu ogridu ede. Disi no ben de wan afersi fu ogri di ben du wawantron. Genesis 6:11 e fruteri taki: „Grontapu ben kon furu nanga ogridu.”
5. (a) Sortu fasi fu den sma meki na ogri ini Noa ten ben du kon? (b) Fu sortu sani Henoch ben warskow na ini na tori fu ogridu?
5 San ben de na baka disi? Na pisi fu beybri na ini 2 Petrus di wi kari didyonsro e taki fu ogri sma. Iya, den libisma afersi ben sungu go na ini wan yeye fu ogri. Disi no ben wani taki nomo taki a wet fu Gado ben poti na wan sey ini algemeen ma a ben de wan oprurufasi teyge Gado srefi.a Èn te sma e meki opruru nanga Gado, dan fa wi kan fruwakti dan taki den sa behandel tra sma nanga switifasi? Srefi bifo Noa ben koboru, dan na ogrifasi disi ben kon de so bigi taki Yehovah ben meki Henoch taki na fesi san ben o de na bakapisi (Yudas 14, 15). Na kaka di den ben kakafutu gi Gado seyker ben tyari na krutu fu Gado kon.
6, 7. Sortu situwâsi pe engel ben de na ini ben de wan prenspari sani ini den takru toestand di ben kon de bifo na frudu?
6 Wan tra krakti ben de tu di ben meki na ogri fu den dey dati kon. Genesis 6:1, 2 e poti prakseri na tapu dati te a e taki: „Now a ben psa taki di den sma ben kon furu na tapu na fesi fu grontapu èn den ben kisi umapikin, taki den manpikin fu na tru Gado ben bigin fu poti prakseri tapu den umapikin fu libisma èn ben si taki den ben moy. Èn den ben kon teki uma, dati wani taki, den alamala di den ben frukisi.” Suma ben de den manpikin dati fu na tru Gado? Den no ben de gewoon sma. Mansma ben poti prakseri someni yarihondro kba tapu uma di ben moy èn ben trow den. Den manpikin disi fu na tru Gado ben de engel di ben teki libisma skin. Na ini Yudas vers 6 den e taki fu den leki „engel di no ben hori den fosi posisi ma ben gwe libi den eygi yoysti libipe”. — Teki gersi 1 Petrus 3:19, 20.
7 San ben de na bakapisi di den mekisani disi di hey moro leki libisma èn di ben teki mansma-skin, ben go libi nanga den umapikin fu libisma? „Den Nefilim ben sori taki den ben de na ini den dey dati na grontapu, èn so srefi baka dati, di den manpikin fu na tru Gado ben tan libi nanga den umapikin fu libisma èn den disi ben meki manpikin gi den; den disi ben de den tranga man di ben de ini owruten, man fu nen.” Iya, fu na tegennatuurlijk matifasi dati den Nefilim ben du kon, tranga man di ben gebroyki na moro bigi krakti fu den fu tanteri trawan. — Genesis 6:4.
8. Fa Yehovah ben du nanga den takru toestand na grontapu?
8 O ogri na situwâsi ben tron? A ben kon so fara taki „Yehovah ben si taki na takrudu fu libisma ben de psa marki na grontapu èn taki ibri firi fu den prakseri fu den ati alaten ben de soso takru”. Fa Gado ben du tapu dati? „Yehovah ben firi sari taki a ben meki libisma na grontapu, èn a ben sutu en te na ini en ati.” Disi no ben wani taki taki Gado ben prakseri taki a ben meki wan fowtu fu di a ben meki libisma. Ma a ben sari taki baka di a ben meki libisma, a waka nanga libi fu den ben kon de so takru taki a ben musu fu pori den. — Genesis 6:5-7.
Na waka nanga libi di e tyari frulusu kon
9. (a) Fu san-ede Gado ben handri nanga Noa na wan bun fasi? (b) San Yehovah ben fruteri Noa na fesi kba?
9 Fu taki fu Noa, a „ben feni bun-ati na ini den ay fu Yehovah. . . . Noa ben de wan regtfardiki man. A ben sori en srefi sondro fowtu a mindri sma fu en ten. Noa ben waka nanga na tru Gado” (Genesis 6:8, 9). Yehovah ben fruteri Noa fu dati-ede na fesi taki a ben sa tyari wan frudu kon na a heri grontapu èn a ben gi en na wroko fu bow wan ark. Na heri libismafamiri, boyti Noa nanga en osofamiri, ben sa figi puru fu na fesi fu grontapu. Srefi den meti ben sa dede, boyti den wantu fu ibri basis sortu di Noa ben sa teki go nanga en na ini na ark. — Genesis 6:13,14, 17.
10. (a) Sortu sani ben musu sreka a fesi fu hori den a libi, èn o bigi na wroko ben de? (b) San de warti fu wi prakseri fu a fasi fa Noa ben du en wroko?
10 Na sabi disi, di a ben sabi sani na fesi, ben poti wan hebi frantiwortu tapu Noa. Na ark ben musu bow. A ben sa de leki wan bigi kisi, nanga wan inibere fu ala nanga ala 40.000 kubieke meter. Noa ben musu furu en nanga nnyan èn baka dati tyari den meti, so tu fowru — „ala sortu fu skin” — kon makandra so taki den ben sa tan na libi. A ben de wan wroko di ben o teki furu yari. Fa Noa ben du tapu disi? A „ ben bigin fu du akruderi ala sani san Yehovah ben komanderi en. Yoysti so a ben du.” — Genesis 6:14-16, 19-22; Hebrew sma 11:7.
11. Sortu tumusi prenspari frantiwortu ben de tapu Noa na ini a tori fu en eygi osofamiri?
11 Ala di Noa ben du a wroko dati, toku a ben musu gi ten tu fu bow na yeyefasi fu en osofamiri kon tranga. A ben musu kibri den fu no teki den hogri pasi nanga opruru yeyefasi fu den sma di ben lontu den. A ben de prenspari taki den no ben meki den aladey sani fu na libi teki den abra tumusi. Gado ben abi wan wroko gi den fu du, èn a ben de tumusi prenspari taki den ben poti disi tapu a fosi presi na ini den libi. Wi sabi taki Noa osofamiri ben teki en leri èn en bribi, bika Noa, en uma, en dri manpikin nanga den uma fu den manpikin dati — ayti sma ala nanga ala — a beybri e taki bun fu den. — Genesis 6:18; 1 Petrus 3:20.
12. Sortu frantiwortu Noa ben du so leki 2 Petrus 2:5 e sori?
12 Noa ben abi ete wan tra frantiwortu — fu warskow sma fu na frudu di ben o kon èn fu meki bekenti fu san-ede a ben o kon. A de krin taki a ben du a frantiwortu dati kotrow, bika Gado Wortu e taki fu en leki „wan preykiman fu regtfardikifasi”. — 2 Petrus 2:5.
13. Nanga sortu omstandigheid Noa ben abi fu du ala di a ben du a wroko di a ben kisi fu Gado?
13 Now, go denki pikinso fu den omstandigheid pe Noa ben musu du a wroko dati. Poti yu srefi na ini en presi. Efu yu ben de Noa ofu wan sma fu en osofamiri, dan ogridu di den Nefilim nanga tra ogri sma ben du ben sa e lontu yu. Yu ben sa kon tanapu langalanga na fesi na krakti fu opruru engel. Ala di yu ben bow na ark, dan yu ben o de na spotupopki fu sma. Èn yari psa yari, ala di yu ben e warskow sma gi na Frudu di e kon, dan yu ben sa si taki den sma ben go so dipi na ini den aladey sani fu na libi taki ’den no ben poti prakseri’ — dati wani taki „te leki na frudu ben kon èn ben figi den alamala puru”. — Mateyus 24:39; Lukas 17:26, 27.
San na ondrofeni fu Noa wani taki gi yu?
14. Fu san-ede a no de muylek gi wi ini na ten disi fu frustan na situwâsi di Noa nanga en osofamiri ben miti?
14 Gi moro furu fu wi leysiman a no de trutru muylek fu tyari so wan situwâsi kon na den fesi. Fu san-ede? Fu di den toestand na ini wi dey gersi furu leki den di ben de na ini Noa dey. Yeyses ben taki taki wi ben kan fruwakti disi. Ini en profeytitori di ben taki finifini fu den sani fu a ten fu en denoya ini a bosroyti fu na seti fu sani Yeyses ben taki na fesi: „So leki den dey fu Noa ben de, na so na denoya fu na Manpikin fu libisma sa de.” — Mateyus 24:37.
15, 16. (a) Fa wi kan taki taki neleki fa a ben de na ini Noa ten na so srefi now a grontapu furu nanga ogridu? (b) Sortu spesrutu ogridu Yehovah dienstknekti miti?
15 Den sani di Yeyses ben taki ben kon tru? A disiten grontapu kon furu nanga hogridu? Iya! Moro leki wan hondro milyun sma dede na ini den feti fu na yarihondro disi. Sowan fu wi leysiman ben si a bakapisi fu dati na den skin srefi. Ogriman di ben wani sma moni ofu tra warti gudu ben tapu skreki srefi gi moro furu sma. Èn yongu sma de ini kofar fu ogridu na skoro.
16 Ma Yehovah dienstknekti e ondrofeni moro leki a pori fu sani di e kon fu feti nanga ogridu ini algemeen. Ogri kan miti den tu fu di den no de wan pisi fu na grontapu disi, ma e feti fu de sma di e gi den srefi ini a dini fu Gado (2 Timoteyus 3:10-12). Na ogri dati sontron e teki gewoon na vorm fu pusu den ofu klap den; tra tron a e wani taki fu pori den gudu, fu fon èn srefi kiri den. — Mateyus 24:9.
17. Ogridu de furu na ini a ten disi? Tyari disi kon na krin.
17 Te hogri sma e teki prati na den sortu takru sani disi, dan sontron sondro fu syen den e wisiwasi Gado. Na ini wan kontren na ini Afrika skowtu ben taki: „Wí e tiri dya. Un go na Gado, efu wan de èn aksi en fu kon yepi unu.” Na ini dungru-oso, na ini concentratie kanpu Yehovah Kotoygi miti nanga man leki Baranowsky, na ini Sachsenhausen (Doysrikondre) di ben spotu: „Mi bigin wan feti nanga Yehovah. Wi sa si pikinso suma moro tranga, mi ofu Yehovah.” Syatu baka dati Baranowsky kon siki èn dede; ma trawan e go doro nanga wan srefi sortu fasi. Lantiman di e bigin wan frufolgu no de den wan enkriwan di e sori taki den wani tyalensi Gado. Dienstknekti fu Gado na a heri grontapu e kisi sani fu yere èn si di e sori taki sma di gi den srefi abra na dati, no abi frede gi Gado na ini den ati.
18. Na sortu fasi ogri yeye e meki onkorostu sani kon a mindri na libismafamiri?
18 Na ini den dey disi di gersi na ten fu Noa so furu, wi de so srefi kotoygi fu ogri yeye di e bumuy ini sani (Openbaring 12:7-9). Den ogri yeye disi de den srefi engel di ini den dey fu Noa ben teki libisma skin èn ben trow nanga umasma. Di na frudu ben kon, dan den uma nanga pikin fu den ben dede, ma den trangayesi engel dati ben musu dray go baka na a yeyekondre. Den no ben abi moro langa wan presi na ini Yehovah santa organisâsi, ma den ben gi den abra na Tártarus, wan toestand fu deki dungru, koti puru fu a leti fu Gado (2 Petrus 2:4, 5). Fu di den e wroko na ondro na tiri fu Satan, meki den go doro fu hori krosibey kontakti nanga libisma èn ala di den no man teki wan libisma skin moro, toku den e proberi fu kisi mansma, umasma, èn srefi pikin-nengre na ondro den makti. Fu wan pisi disi e psa nanga yepi fu afkodrey. Den e pusu libisma tu fu kiri makandra na wan fasi di e psa a denki fu libisma. Ma dati a no ala sani ete.
19. (a) Suma spesrutu den ogri yeye no wani si na ay? (b) Den ogri yeye e proberi fu dwengi wi fu du san?
19 Na beybri e tyari kon na krin taki den ogri yeye e feti nanga den sma „di e hori den gebod fu Gado èn di abi a wroko di de ini na gi kotoygi fu Yeyses” (Openbaring 12:12, 17). Den ogri yeye dati de den moro prenspari wan di e sutu faya fu meki frufolgu kon tapu Yehovah futuboy (Efeysiya sma 6:10-13). Den e kobroyki ala sortu sani di yu kan denki fu dwengi ofu fu kori kotrow sma fu broko a soyfri retifasi fu den na fesi Yehovah èn fu stòp a meki bekenti fu Yehovah kownukondre nanga Yeyses leki na Mesiyas Kownu.
20. Fa den ogri yeye e proberi fu tapu sma fu kon fri fu na makti fu den? (Yakobus 4:7)
20 Den ogri yeye e span den srefi fu tapu sma di e angri fu kisi frulekti fu na kwinsi di den e kwinsi den. Wan fositen obia-uma na ini Brasyonkondre e fruteri taki di den Kotoygi ben kon na en doro, den sten fu ogri yeye ben komanderi en fu no opo na doro; ma a ben du dati tog, èn ben kon leri na waarheid. Na ini furu kontren den ogri yeye e meki kobroyki langalanga fu sma di e du towfruwroko ini wan muyti fu stòp a wroko fu Yehovah Kotoygi. Na so fu eksenpre na ini wan dorpu na ini Sranankondre, gensman fu Yehovah Kotoygi ben meki kontakti nanga wan obiaman di ben abi bigi barinen fu di a ben man fu meki sma dede wantewante soso efu a sori a tiki fu en go na den. Nanga ala den dansiman nanga dronman di ben waka nanga en, na obiaman disi di ben abi wan ogri yeye na en tapu ben waka miti Yehovah Kotoygi. A ben bari den towfruwortu fu en èn a ben sori nanga en tiki go na den. Den sma fu na dorpu ben fruwakti taki den Kotoygi ben sa fadon dede, ma a ben de na obiaman di ben fadon flaw èn esi-esi den bakaman fu en nanga syen ben musu tyari en gwe.
21. Fa a moro bigi pisi fu libisma e du neleki na ini Noa ten tapu na preyki fu wi èn fu san-ede?
21 Srefi na ini presi pe bonu nanga towfruwroko no e du so na publiki, dan ibri kotoygi fu Yehovah ben ondrofeni san a wani taki fu proberi fu preyki gi sma di de bezig nanga aladey afersi fu a libi, taki den no wani fu sma muylek den. Neleki fa a ben de na ini den dey fu Noa, a so a de taki a moro bigi pisi fu sma ’no e poti prakseri a tapu’ (Mateyus 24:37-39). Kande son sma e buwondru na wánfasi fu wi nanga sani di wi man fu du. Ma na bow-wroko fu wi na yeyefasi — pe furu yuru fu persoonlijk studi, go geregeld na konmakandra nanga velddienst de ini na tori — de trutru wan law sani gi den. Den e spotu nanga wi frutrow di wi abi na ini den pramisi fu Gado Wortu, fu di a libi fu den bow lontu gudu na skinfasi nanga prisiriten di den abi now.
22, 23. Fa den sani di ben psa na ini Noa ten e gi wan dyaranti di yu kan bow a tapu taki Yehovah sa fri sma, di e gi den srefi na ini a dini fu en, puru fu tesi?
22 Yehovah loyaal dienstknekti sa tan de alaten na spotupopki gi den di no abi lobi gi Gado? Kwetikweti! San ben psa na ini Noa dey? Tapu na komando fu Gado Noa ben go na ini na ark di ben kon klari. Ne tapu na fasti ten di Gado ben poti, „dan ala den fonten fu a bigi watradipi ben broko opo èn den sroysi fu heymel ben kon opo”. Na frudu ben tan go doro teleki srefi den bergi ben kon tapu nanga watra (Genesis 7:11, 17-20). Den engel di ben gwe libi den yoysti tanpresi, den ben dwengi fu libi na libisma skin di den ben teki èn dray go baka na a yeyekondre. Den Nefilim nanga ala trawan fu na grontapu dati fu ogri sma, makandra nanga den sma di ben abi tumusi mi-no-ke-fasi fu teki a warskow fu Noa ben kisi pori. Ma Noa nanga en uma nanga den dri manpikin nanga den uma fu den manpikin dati ben kisi frulusu. Na so Yehovah ben fri Noa nanga en osofamiri puru fu na tesi di den ben frudrage so furu yari na wan loyaal fasi.
23 Yehovah sa du a srefi gi sma di e gi den srefi na ini a dini fu en na ini na ten disi? Dati na wan sani di no de fu taki srefisrefi. A ben pramisi dati èn a no kan ley. — Titus 1:2; 2 Petrus 3:5-7.
[Foetoewortoe]
a „Anomia na wan wisiwasi ofu kakafutu gi den wet fu Gado; asebeia [na substantief vorm fu na wortu di poti abra nanga ’ogri sma’] de wan srefi fasi a fesi na Persoon fu Gado.” — Vine Expository Dictionary of Old and New Testament Words, Deel 4, blz. 170.
Yu kan memre disi ete?
◻ Fa Petrus e sori taki Yehovah sabi fu fri sma, di e gi den srefi na ini a dini fu Gado, puru fu tesi?
◻ Sortu sani ben meki a ogridu fu den dey fu Noa du kon?
◻ Sortu frantiwortu ben de tapu Noa te yu sa luku na frudu di ben o kon na a heri grontapu?
◻ Sortu srefi sortu sani fu den dey fu Noa wi e si na ini wi ten?
[Prenki na tapoe bladzijde 23]
Na bow fu na ark ben wani taki yari fu tranga wroko
[Prenki na tapoe bladzijde 24]
Noa ben gi ten fu meki na yeyefasi fu en osofamiri gro