„Na brede foe libi” de foe ala sma sa kisi en

„MI de a libi brede di saka komoto foe hemel; efoe wan sma njan foe a brede disi a sa libi foe tégo; èn troetroe, na brede di mi sa gi, de mi meti foe na boen foe a libi foe grontapoe.” — JOHANNES 6:51.

1. Na libismafamiri tanapoe a fesi sortoe takroe situwasi?

BREDE na a njanjan di e njan moro foeroe na grontapoe èn di ben hori langa ten kaba na libi foe a grontapoe foe libisma. Foe dat’ede meki den kari en ooktoe „na tiki foe na libi”. Ma nownow na angri foe brede ben tron wan sari tori. Wan kwart foe den sma di e libi na grontapoe angri nanga mankeri foe njan e miti den. Na ini The Globe and Mail foe Toronto, Canada, no so langa kaba ben taki: „Mankeri foe njanjan, netleki feti, no abi skotoe.” Na koranti ben teki den wortoe foe wan hé man foe na VN-bureau foe nowto operatie ini Afrika, ben gi na warskow dati Afrika de na a lanki foe wan „foe den moro bigi rampoe foe libisma, wan foe den moro bigi tjalansi di oiti wi ben kon tanapoe a fesi”.

2, 3. (a) Foe sortoe marki den mankeri foe njanjan de wan pisi foe en? (b) Fa den njanjan problema sa kon loesoe? (c) San de moro ete fanowdoe èn sortoe prisiri djaranti Jesaja 25:8 e gi wi?

² Jezus ben taki a fesi dati mankeri foe njanjan ben sa de wan pisi foe na marki foe en denoja ini kownoekondre makti (Mattéus 24:3, 7, 32, 33; 25:31, 32; Lukas 21:11). Fa wi kan prisiri dati a Kownoekondre kon krosbé kaba! Heri esi na glori kownoe disi sa wini ala féanti foe na libismafamiri èn a sa meki wan kaba kon na a politiek nanga ekonomia kroektoedoe, di ben tjari sowan hogri pina kon. Dan ala pipel sa prisiri dati ala dé den e kisi den brede foe tide. — Mattéus 6:10, 11; 24:21, 22; Daniël 2:4-4; Odo 29:2.

³ Ondro na regtvaardiki tiri na boen grontapoe foe wi sa kan meki njanjan „pasi marki”, nofo foe kan sorgoe gi moro sma leki den sma di e libi nownow a grontapoe foe abi nofo njanjan (Psalm 72:12-14, 16, 18). Jehovah sa poti „wan fesa njanjan” foe boen sani gi en pipel (Jesaja 25:6). Ma ete wan sani de fanowdoe. Den sma, nanga a psa foe den jari, sa siki alaten ete èn dede? Kolokoe meki Jesaja 25:8 e taki foe Jehovah moro fara: „Foetroe a sa swari na dede foe t6go, èn Masra Jehovah sa figi den watra ai séker poeroe foe ala fesi.” Fa disi sa doe kon?

Na lobi seti foe Jehovah

4. Sortoe lobi seti Jehovah ben sreka na ini Egypte?

⁴ Di Jozef ben de a man di ben loekoe a njanjan ini Egypte, dan karoe ben de pasa marki. Disi ben doe kon foe di Jozef, baka di Farao ben poti en na wroko, dan na wan konifasi a ben sreka sani gi den sébi jari foe angri ten di ben taki na fesi dati den boo kon, aladi Jehovah tapoe wan lobifasi ben poti en blesi a tapoe disi (Genesis 41:49). Nofo ben de gi ala sma èn srefi a ben tan abra ete. Di Jozef tata Jakob nanga Jozef brada nanga den osofamiri foe den ben go na Egypte foe kon moksi densrefi na Jozef, dan den ben njan foeroe boen foe a seti dati foe Gado. Sondro degedege den Israëlsma dati ben kon sabi heri boen ooktoe brede nanga swa tarwe deeg, foe di a sortoe foe brede disi ben abi en bigin na ini Egypte soleki e kon na krin.

5. (a) Fa Jehovah ben gi njanjan na ini a sabana? (b) Soema ben njan boen makandra nanga Israël na ini a blesi disi, èn foe san-ede?

⁵ Bakaten Jehovah ben sreka moro lobi seti gi en pipel. Disi ben psa di den miljoenmiljoen Israëlsma ben gwe libi Egypte foe hari psa na sabana foe Sinaï. Fa na bigi ipi disi ben sa man kisi njanjan na ini na sabana disi di no ben abi bon èn di no ben de so moi? Aladi Jehovah ati ben bron foe na mankeri foe bribi foe den, „tokoe a ben opo den doro foe hemel gi den èn a ben meki doronomo manna fadon leki alen, foe njan, èn na hemel karoe a ben gi den”. „Nanga brede foe hemel a ben tan gi den njanjan foe den bere foeroe”, fotenti jari langa (Psalm 78:22-24; 105:40; Exodus 16:4, 5, 31, 35). Èn no fergiti dati den Israëlsma no ben de den wan enkriwan di ben e njan na manna dati. „Wan bigi moksi groepoe” foe no-djoesma ben sori bribi na ini Jehovah èn ben moksi densrefi nanga den ini na hari komoto foe Egypte. Gado ben sorgoe fod manna gi den ooktoe. — Exodus 12:38.

6. (a) Sortoe moro bigi fanowdoe libisma sabi, èn foe san-ede? (b) San den srakti-ofrandi di Israël ben e tjari ben meki kon a fesi, èn san den ben agersi?

⁶ Ma na libismafamiri ben firi alaten wan fanowdoe, di ben de moro bigi leki na firi gi na letterlek „brede foe hemel”. Srefi den sma di ben njan a manna di ben kon nanga wan wondroe, ben kon owroe èn ben dede, bika na sondoe toestand di libisma kisi no kan meki a koti pasi gi dede awinsi san a e njan (Romeini 5:12). Den srakti-ofrandi di Israël ben e tjari ben de wan fasi fa den ben kan tan na ini wan boen matifasi nanga Gado, ma den srakti-ofrandi dati ooktoe ban meki na sondoefasi foe na naatsi kon a fesi. Den srakti-ofrandi ’noiti ben kan poeroe krinkrin na sondoe’. Boiti foe dati, den srakti-ofrandi dati ben de wan agersifasi foe na ’wan enkri srakti-ofrandi foe Jezus’, tapoe na fondamenti foe san sondoe „ben kan teki poeroe alaten”. Foe na hé positsi foe en na ini hemel Jezus ben kan gebroiki now na ferdienste foe na srakti-ofrandi dati. — Hebrewsma 10:1-4, 11-13.

„Na troe brede foe hemel”

7. (a) Na ini sortoe njoen kontekst wi moe si den wortoe foe Jezus na ini Johannes kapitel 6? (b) Foe san-ede Jezus ben pir’ai gi na hipisma?

⁷ Meki wi poti wi prakseri now na tapoe Johannes kapitel 6. Den sani di Jezus taki dja no de wan go moro fara foe san skrifi na ini kapitel féfi. Na kontekst de tra fasi, bika san tanapoe ini Johannes 6 ben taki wan jari moro fara. A de now 32 G.T. Jezus no de moro langa a mindri den djoe di ben krin densrefi na Jeruzalem ma a de na mindri na gewoon pipel na ini Galiléa. Djonsrode a ben doe a wondroe foe gi féfi doesoen man njanjan nanga féfi gerste-brede nanga toe fisi. A tra dé na hipi sma ben waka na baka Jezus na ini a ferwakti foe kisi agen njanjan foe soso. Dat’ede Jezus e taigi den: „Oenoe no e soekoe mi foe di oen ben si marki, ma foe di oen ben njan foe den brede èn foe di oen bere ben kon foeroe. No wroko gi a njanjan di e lasi gwe ma gi a njanjan di e tan gi a tégo libi.” Jezus Tata seni en foe gi a njanjan disi na ala sma di ben sa sori bribi na ini en. Disi ben sa de „na troe brede foe hemel” nanga spesroetoe bakapisi leki na letterlek manna di den Israëlsma foe owroeten ben njan. — Johannes 6:26-32.

8. Fa wan sma kan kisi tégo libi?

⁸ Foe tjari kon na krin sortoe wini-marki den kan kisi te den sa njan foe na „njanjan dati”, Jezus e taki moro fara gi den: „Mi de na brede foe libi. A sma di kon na mi, no sa kisi angri moro, èn a sma di e sori bribi na ini mi, no sa kisi dré watra noiti moro. . . . bikasi disi de a wani foe mi Tata dati ibriwan sma di e si a Manpikin èn e sori bribi na ini en abi tégo libi, èn mi sa wiki en tapoe a laste dé.” — Johannes 6:35-40.

9, 10. (a) Wi kan teki „a brede foe libi” gersi nanga na manna? (b) Jezus ben gi en libi gi soema akroederi Johannes 6:42-51? (c) Fa ’den ’e njan en meti’?

⁹ Den djoe dati di ben lobi goedoe ben opo densrefi tége den wortoe disi. Den ben si Jezus leki noti moro leki wan manpikin foe Jozef nanga Maria. Jezus e warskow den: „Oen stop foe knoroe a mindri makandra. No wan sma kan kon na mi, efoe mi Tata, di ben seni mi kon no hari en kon; èn mi sa wiki en tapoe a laste dé.” Moro fara ai taki asrefi sani baka: „Mi de a brede foe hemel. Den fosten tata foe oenoe ben njan a manna na ini a gran sabana èn ete den ben dede. Disi na a brede di e saka kon foe hemel, sodati ibriwan sma kan njan foe en èn no sa dede. Mi de a libi brede di saka komoto foe hemel; efoe wan sma njan foe a brede disi, a sa libi foe tégo; èn troetroe, a brede di mi sa gi, de mi meti foe na boen foe a libi na grontapoe.” — Johannes 6:42-51.

¹⁰ Soboen Jezus ben gi en meti foe a boen foe „na libi foe na grontapoe” — na heri grontapoe foe libisma di kan bai kon fri. Èn „ibriwan sma” foe na grontapoe foe libisma di foe taki en na agersifasi e njan „a brede dati” foe di ai poti bribi na ini na ferlowsoe krakti foe Jezus ofrandi, kan go waka na pasi foe tégo libi. Djaso na ’bigi moksi groepoe’ di ben njan makandra nanga den Israëlsma na manna ini na sabana, e agersi na „bigi ipi foe Jezus tra skapoe” di, makandra nanga na salfoe fikapisi foe na „Israël foe Gado”, e njan now na ini wan agersi betekenis na meti foe Jezus. Den e doe disi foe di den e poti bribi na ini na srakti-ofrandi foe en. — Galacia 6:16; Romeini 10:9, 10.

11. Sortoe wortoe foe Jezus moro broeja den djoe, èn foe san-ede?

¹¹ Drape na ini Galiléa foeroe foe den arkiman foe Jezus ben kon broeja nanga den wortoe foe en. Soboen aladi Jezus ben e taki ete foe en meti, dan a e go pikinso moro fara ete foe di a e taigi den: „Foetroe, mi e taki gi oen, efoe oenoe no njan na meti foe na Manpikin foe libisma èn no dringi en broedoe, dan oen no abi ibi ini oensrefi. Na sma di e gi ensrefi njanjan nanga mi meti èn e dringi mi broedoe, abi tégo libi, èn mi sa wiki en tapoe a laste dé; bika mi meti na troetroe njanjan èn mi broedoe na troetroe dringi” (Johannes 6:53-55). Troetroe wan sani di ben broeja den! No wawan dati na prakseri foe kanibalisme (sma di e njan tra sma meti) de wan tegoe sani gi den djoe dati, ma ini Leviticus 17:14 a Wet ben taki nanga tranga dati den no „ben mag njan na broedoe foe nowan sortoe meti”.

12. (a) San Jezus e poti krakti a tapoe dja? (b) Foe sortoe tekst e kon na krin dati disi no abi foe doe wawan nanga den mede-erfgenaam?

¹² A no de foe taki dati Jezus e poti dja krakti a tapoe dati ibriwan sma di wani tégo libi, moe sori bribi na ini na ofrandi di Jezus ben tjari bakaten di a ben offer en volmaakti libisma skin èn ben meki en libisma broedoe lon (Hebrewsma 10:5, 10; 1 Petrus 1:18, 19; 2:24). Na seti disi no de wawan gi Jezus mede-erfgenaam. A moesoe de ooktoe gi na „bigi ipi”, di e psa libilibi „na bigi benawtoe” bika ala den sma disi „ben wasi den langa krosi èn ben meki den kon weti na ini a broedoe foe na Lam”. Dati den e poti bribi na ini Jezus ofrandi soleki ooktoe e kon na fesi foe di den e doe santa dienst gi Gado, ben abi leki bakapisi, dati den ben tjari psa na moro bigi ten foe benawtoe na grontapoe. Den ben ferklari Rachab ooktoe regtvaardiki èn a ben tan a libi di Jozua ben gi Jericho abra na pori. — Openbaring 7:9, 10, 14, 15; Jozua 6:16, 17; Jakobus 2:25.

„Libi ini joesrefi”

13. (a) San wi moe taki te wi teki Johannes 5:26 gersi nanga Johannes 6:53? (b) Sortoe algemeen Griki grammatikale constructie e jepi wi foe ferstan Johannes 6:53? (c) San a wani taki foe dat’ede foe abi ’libi ini joesrefi’, èn den wortoe abi foe doe nanga soema?

¹³ Na ini Johannes 6:53, 54 Jezus e poti „tégo libi” gelijk nanga „abi libi ini joesrefi”. Den wortoe „libi ini joesrefi” soboen gersi taki den wani taki wan tra sani leki den wortoe di Jezus ben gebroiki na ini Johannes 5:26. Wortoe di abi na srefi grammatikale constructie leki abi „libi ini joesrefi”, joe e feni na tra presi ini den Griki skrifi. Foe eksempre: „Abi sowtoe ini joesrefi” (Markus 9:50) èn „e kisi ini densrefi na paiman dorodoro” (Romeini 1:27).a Na ini den eksempre disi den wortoe no e sori tapoe na makti foe gi tra sma sowtoe ofoe wan paiman. Na presi foe dati, a e sori a tapoe wan sani di boen dorodoro na inisé ofoe foeroe dorodoro. Akroederi na kontekst foe Johannes 6:53 dan moe „abi libi ini joesrefi” wani taki foe dat’ede dati den sma di den e taki nanga den te foe kaba sa go na ini a libi di foeroe dorodoro. Den sma di de foe na „pikin ipi” foe kownoekondre-erfgenaam e ondrofeni disi te den kisi wan opobaka foe go libi ini hemel. Den „tra skapoe” e ondrofeni disi baka a kaba foe den doesoen jari, te den e kisi tesi èn den e ferklari den regtvaardiki foe libi foe tégo a tapoe wan paradijs grontapoe. — 1 Johannes 3:2; Openbaring 20:4, 5.

14. Soema moro ete sa njan boen foe na brede foe hemel èn fa?

¹⁴ Ooktoe tra sma kan njan boen foe na „brede foe hemel”. Jezus ben taki foe den sma di e „njan en meti, èn e dringi en broedoe” ma di e dede tokoe ete: „Mi sa wiki en tapoe na laste dé”. Mi sabi dati salfoe kristen di sribi na ini dede, e kisi wan opobaka te na „laste trompeti” bro, wan sani di sa feni presi na ini a ten foe „na sori” di Jezus Kristus sa sori ensrefi na ini a Kownoekondre, glori (1 Korinte 15:52; 2 Timotéus 4:1, 8). Ma fa a de nanga den „tra skapoe” foe na ten di e kon ma di dede? Den wortoe di Martha ben taki bakaten di Lazarus ben dede, de prenspari ini disi, bikasi na ini a ten dati djoe di ben frede Gado no ben abi wan tra howpoe leki di foe wan grontapoe opobaka, A bribi foe Martha ben kon na fesi na ini den wortoe: „Mi sabi dati en [Lazarus] sa opobaka ini na opobaka tapoe na laste dé” (Johannes 11:24). Wi, di e libi now na ini a ten foe Kristus denoja kan abi na howpoe dati getrow memre foe na „bigi ipi” di dede, sa kisi wan froekoe opobaka dja na grontapoe, sodati den kan gebroiki agen foe na „brede na ini hemel”, nanga tégo libi na den fesi. Fa disi de wan toemsi bigi howpoe, di abi wan djaranti foe di Jezus srefi ben opobaka foe dede. — 1 Korinte 15:3-8.

„Ini wanfasi nanga Kristus”

15. Den wortoe foe Paulus „ini wanfasi nanga Kristus” abi foe doe nanga soema, èn foe san-ede joe e piki so?

¹⁵ Jezus e go moro fara nanga den wortoe: „A sma di e gi ensrefi njanjan nanga mi meti èn e dringi mi broedoe e tan ini wanfasi nanga mi èn mi ini wanfasi nanga en” (Johannes 6:56). Disi de troe foe dat’ede gi ibriwan sma di soboen e sori bribi na ini Jezus srakti-ofrandi nanga a ferwakti foe abi „libi ini en srefi”. Ala sma di e sori sowan bribi, kan kon „ini wanfasi nanga” Jezus. Den memre foe na „bigi ipi” di abi wan grontapoe howpoe, a no de foe taki no „de ini wanfasi nanga Kristus” na ini a fasi dati den de mede-erfgenaam nanga en, memre foe en bruid, di e kisi wan hemel opobaka leki di foe en (Romeini 8:1, 10; 1 Korinte 1:2; 2 Korinte 5:17; 11:2; Galacia 3:28, 29; Efese 1:1, 4, 11; Filippi 3:8-11). Tokoe ete ala sma di abi wan grontapoe howpoe kan èn moesoe de ini wanfasi dorodoro nanga na Tata èn na Manpikin ini na sabi èn a doe foe na „volmaakti wani foe Gado”, net soleki disi de a geval nanga a „pikin ipi”. — Romeini 12:2; teki gersi nanga Johannes 17:21.

16. (a) Na ini sortoe toemsi prenspari fasi alasma di e sori bribi ini Kristus ofrandi de „ini wanfasi” nanga Jezus? (b) Na ini sortoe sani na wanfasi foe den foe praksei nanga moeiti e sori ensrefi?

¹⁶ Na ofrandi waarde foe na meti èn a broedoe foe Kristus de now soboen gi a sma di e sori bribi na ini, èn ala sma di e meki gebroiki foe en, kan de ini toemsi prenspari fasi „ini wanfasi” nanga Jezus. Alamala kan go de wan pisi foe na universele osofamiri foe Jehovah Gado. Na ini den moeilek „laste dé” disi den e prisiri ini wan grontapoe wanfasi foe bribi, prakseri èn activiteit. Foe di den e sori bribi na ini Jezus, meki den e man, te joe loekoe a bigi foe sani, doe ’moro bigi wroko’ leki den di Jezus ben doe dja a grontapoe. Èn meki wi taki en, dati den miljoenmiljoen memre foe na „bigi ipi”, de now 99,7 procent foe den sma di e doe a wroko foe Jehovah na ini a ten disi (Johannes 14:12; Romeini 10:18). Na wanfasi disi foe prakseri nanga moeiti de foe si na ini na toemsi bigi grontapoe kotoigi-wroko èn na ini na de klari di sma de klari foe hori baka gi den bowprogramma foe na Wachttoren Genootschap (Psalm 110:3). Wi no sabi omeni foe den sma foe na grontapoe foe libisma sa poti bribi ete èn go de wan pisi foe na diri wanfasi disi. Leki fa wan bericht di no ben kon a doro so langa psa ete taki dan wi abi 3.024.131 actief kotoigi.

17. Sortoe punt ala sma di e go na a Memrefesa moe ferstan?

¹⁷ Wi howpoe dati foeroe sma di abi belangstelling sa meki a nomroe foe sma di sa de a tapoe a Memrefesa na ini 1986 sa kon moro foeroe. Miljoenmiljoen „tra skapoe” sa de drape makandra nanga doesoendoesoen sma foe na „pikin ipi” di a nomroe foe den e kon moro pikin, èn den alamala abi foeroe warderi gi na lobi seti foe Jehovah nanga jepi foe Kristus, aladi den e ferstan o toemsi prenspari na meti nanga na broedoe foe Kristus de. Ma alamala moesoe foe si boen san na positsi foe den de. Wan sma no e kisi tégo libi foe di a e njan foe den symbool foe a Memrefesa. Den de symbool foe na ofrandi foe Jezus, di ini a fosi presi ben tjari kon ini a tori foe na „njoen ferbontoe”. Den salfoewan di den teki poti na ini a ferbontoe dati èn den wawan, nanga reti e gebroiki foe den symbool. Wan sma de na ini a njoen ferbontoe dati ofoe a no de na ini (1 Korinte 11:20, 23-26). Den sma di no de na ini a njoen ferbontoe èn di Jezus no ben teki poti ini wan ferbontoe foe wan kownoekondre, no e gebroiki foe den symbool foe na Memrefesa, ma den moe èrkèn tokoe o prenspari na meti nanga na broedoe di Jezus ben offer de gi den (Lukas 22:14-20, 28-30). Na srakti-ofrandi disi de a wroko sani di kan meki den kisi tégo libi na grontapoe.

18. Sortoe kolokoe wi e kisi te wi man si san Jezus srakti-ofrandi wani taki dorodoro?

¹⁸ Meki foe dat’ede wi loekoe nanga ferwakti na Memrefesa nanga wan krin ferstan foe ala sani san Jezus srakti-ofrandi wani taki gi na libismafamiri. Meki den memre foe na „pikin ipi” tan sori bigi waarderi gi na kari foe den èn meki ala sma di de wan pisi foe na ipi di e gro foe den „tra skapoe” prisiri na ini a ferwakti foe abi volmaakti grontapoe „libi ini densrefi”, aladi den abi foeroe waarderi gi a disiten wanfasi foe den nanga na Tata, na Manpikin èn na nomroe di e kon moro pikinso foe na salfoe fikapisi di de ete na grontapoe. Fa wi bréti dati „a brede foe libi” de now foe ibriwan sma kisi!

[Foetoewortoe]

Aksi foe loekoe san wi ben leri

◻ Foe sortoe toe sortoe foe manna Jezus ben taki foe en na ini 32 G.T., èn den ben gi foe soema abi den?

◻ Soema Jezus gi a kari foe gi ensrefi njanjan nanga en meti èn foe dringi en broedoe, èn fa den e doe disi?.

◻ San den e bedoel nanga „abi libi ini joesrefi”, èn fa èn oten sma e doro na marki disi?

◻ Na ini sortoe kolokoe ala sma kan teki prati na ini a tori foe na „brede foe libi”?