„Mi sa opo hem baka na a laatste dee”
1. Dem woortoe foe Jezus, „Mi sa opo hem baka na a laatste dee”, no de kon troe tapoe soortoe soema ini disi tem?
DEM vreemde woortoe dati, Jezus ben taki ini Johannes 6:54. Dem no kan de woortoe di kan kon troe tapoe na „bigi ipi” di de na libi en di sa pasa libi-libi na „bigi benawtoe” di e kon (Openb. 7:9-17). We, soema Jezus ben habi ini prakseri, di a ben taki dem woortoe disi 19 hondro jari pasa kaba?
2. Gi soema Jezus ben taki den woortoe disi foe na opobaka, en soortoe fesa di Jezus ben habi foe doe nanga hem, ben de krosbee?
2 Dem bijbel vers lontoe Johannes 6:54 de sori dati Jezus ben taki dem woortoe dati, no soso gi djoe soema wawan, ma ooktoe gi foeroe foe hem djoe discipel, makandra nanga hem 12 apostel. Na Pascha foe dem foe na jari 32 foe wi gewoon teri, „na fesa foe dem djoe”, ben de krosbee (Joh. 6:4). Leki wan sreka foe na fesa dati, dem djoe ben sa slagti na Pascha lam na a tempel ini Jeruzalem en dem priester ben sa fanga na broedoe ini preti en kanti hem trowe na a foetoe foe na altari (Loekoe M’Clintock and Strong’s Cyclopaedia, deel 7, ondro „Pascha”, bladzijde 738, kolom 1, paragraaf 4, lijn 1-34; ooktoe The Temple — Its Ministry and Services As They were at the Time of Jesus Christ, foe Alfred Edersheim, 1874 foe wi teri, bladzijde 190, 191). Jezus ben habi ini prakseri foe go na a fesa dati foe memre na fosi Pascha, di ben hori ini Egypte ini 1513 bifo wi teri. Hemsrefi ben de troe-troe na agersi Pascha Lam, „na Lam foe Gado”. — Johannes 1:29, 36.
3. Foe sainde dem djoe ben go soekoe foe feni Jezus baka na wondroe foe hem na dee a fesi, en san dem pristeri hem foe sori taki dem habi leti?
3 Dem djoe, pe joe ben habi na ini hem discipel, ben si hem doe wan spesroetoe wondroe tapoe na dee bifo na taki-makandra nanga dem ini Capernaum. A ben meki feefi brede nanga toe fisi kon moro foeroe foe gi dem doesoen doesoen arkiman foe hem njanjan. Foe datede dem djoe, di ben lobi dem kondre ben wani meki hem tron kownoe leki dem Messias Tiriman. Foedi Jezus ben moesoe foe de wan hemel Messias Kownoe, a ben lon komoto foe dem soema disi di ben wani meki hem kownoe. Bakatem, di a ben waka tapoe na watra, a ben moksi hemsrefi nanga hem 12 apostel, di ben de ini wan boto na a see foe Galilea (Johannes 6:14-21). Ma joe no ben kan meki dem djoe firi so esi verleegi ini dem prakseri foe waka baka wan grontapoe libisoema Messias. Foe datede dem ben go soekoe foe feni hem, aladi dem ben habi na wondroe di a ben doe na dee na fesi ini prakseri. Dem ben wani wan Messias Kownoe, di ben kan meki dem kisi njanjan na skin-fasi soleki Jezus ben sori dati a man foe doe. Foe sori dati dem habi leti, dem memre Jezus, dati ini na sabana foe Sinaï schier-eilanti, Gado ben gi dem fositen-papa foe dem „brede foe hemel” foe njan leki wondroe manna. — Johannes 6:22-31.
4. Fa Jezus ben verteri dem ofoe Mozes ben gi dem fositem-papa na troe „brede foe hemel”?
4 Leki wan piki tapoe disi, Jezus ben verteri dem, dati Mozes no ben gi dem fositen-papa na troe brede foe hemel. „Na brede foe Gado”, a ben taki, „de na soema, di saka kon foe hemel en gi hem libi foe grontapoe ede”. — Johannes 6:32, 33.
5. San dem djoe aksi foe Jezus, en san hem taki foe sori dem na pasi foe kisi teego libi?
5 Tapoe disi dem djoe ben taki: „Masra, gi wi alatem na brede disi”. Jezus ben sori dati hem ben de dati, di a taki: „Mi de na brede foe libi. Na soema di e kon na mi no sa kisi angri kwet-kweti, en na soema di poti bribi ini mi no sa kisi dree-watra kwet-kweti . . . Bikasi disi de na wani foe mi Tata, dati ibriwan soema di e loekoe na a Pikin en e sori bribi ini hem sa habi teego libi en mi sa opo hem baka tapoe na laatste dee”. — Johannes 6:34-40.
6. Foe sainde dem soema kan de seker foe wan opobaka, di e kon na Jezus ini na tem foe na seti foe sani disi en poti bribi ini hem leki Messias?
6 Dem spesroetoe wan disi di ini na seti foe sani foe disi tem e kon na Jezus en poti bribi ini hem leki na Messias habi teego libi na dem fesi. Foe sainde? Bikasi Jezus sa opo dem baka tapoe na laatste dee. Disi e gi dem na djaranti foe wan opobaka. A boen foe wi sori dja, dati Jezus no ben taki, ini na pisi tori disi di wi e taki, dati wan sma moe habi wan opobaka fosi, en baka dati kon na hem ini bribi en moe njan hem foe habi teego libi. A de krin dati Jezus no e taki dja foe dem soema di de leki dedesma ini dem memre-grebi kaba leki Abraham, Izaak, Jacob, nanga Mozes, David nanga Johannes na Doopoeman. Jezus ben drape e taki nanga dem djoe di ben de na libi na a tem dati nanga dem foeroe discipel foe hem, di ben de ini na Wet-verbontoe foe Mozes.
7. San Jezus ben taki, leki piki tapoe na knoroe foe dem djoe, foe na soema, di dem hari kon na hem en di ben habi teego libi?
7 Dem djoe-arkiman ben bigin foe knoroe en kroetoe foe pe Jezus komoto. Foe dem woortoe di Jezus ben taki tapoe disi, wi kan si nanga soema spesroetoe a ben taki. „Jezus ben piki dem: ’Oen kaba foe kroetoe nanga makandra. No wan soema kan kon na mi, efoe na Tata, di ben seni mi kon, no hari hem; en mi sa opo hem baka tapoe na laatste dee. A tanapoe ini dem profeeti: „En Jehovah sa leri dem alamala.” Iniwan soema di ben jere en leri hem foe na Tata (leki leriman), e kon na mi. . . Foe troe mi taki gi oen taki: Na soema di bribi, habi teego libi.’” — Joh. 6:41-47.
8. Soortoe profeeti-tori Jezus ben teki, en soortoe okasi a ben gi dem djoe arkiman foe hem foe datede?
8 Jezus ben teki wan pisi poeroe foe na profeeti-tori foe Jesaja 54:13, di e taki na Gado „oema”, na hemel Sion en pe wi e leesi: „En ala joe pikin Jehovah sa leri, en na vreede foe joe pikin sa foeroe pasa marki.” Disi de dem jeje pikin foe Jehovah Gado. Disi de dem wan di ai hari kon na Jezus, foedi dem de bribi now ini Jezus. Disi de dem wan foe soema Jezus ben taki, dati dem sa kisi teego libi foedi a sa opo dem baka tapoe na laatste dee. Dem ben sa libi teego ini Jehovah hemel organisaatsi. Jezus ben pristeri hem djoe arkiman, pe joe ben habi na ini hem discipel, na okasi foe tron pikin foe Gado „oema”, na hemel Sion.
„MI SKIN FOE NA BOEN FOE NA LIBI FOE GRONTAPOE”
9-11. (a) Soortoe aksi ben kon foedi Jezus ben taki dati na „brede” di a ben gi ben de hem „skin”, di „ben gi foe na boen foe na libi foe grontapoe”? (b) Fa Paulus e piki dati ini 1 Korinte 10:2-11?
9 Baka di Jezus ben taki foeroe tron kaba dati hem de „na libi brede”, a ben go moro fara foe taki: „Mi de na libi brede, di saka komoto foe hemel; efoe wan soema (foe oenoe, mi arkiman) njan foe na brede disi, a sa libi foe teego; en troe troe, na brede di mi sa gi, de mi skin foe na boen foe na libi foe grontapoe.” — Johannes 6:51.
10 Soboen Jezus ben de na troe manna foe hemel di kan gi libi. Na agersi brede disi, so a ben taki, ben de hem skin. Na skin disi, so a ben taki, ben de „foe na boen foe na libi foe grontapoe”. Jezus ben meene, di a ben taki dem woortoe disi, dati dem djoe ini Mozes dee di ben njan na manna ini na sabana, ben de wan agersi fasi foe na „grontapoe” foe libisoema ini na doesoen jari rigeri foe Kristus nanga hem glori gemeente?
11 Paulus e piki: „Alamala ben kisi dopoe ini Mozes nanga jepi foe na wolkoe en foe a se; en alamala ben dringi na srefi jeje dringi. Bikasi dem ben dringi foe na jeje klipston, di ben waka nanga dem, en na klipston dati ben wani taki Kristus . . . Dem sani disi now ben tron eksempel gi wi (kristen soema), foe wi no de soema di ben sa lostoe ogri sani, soleki dem ben lostoe . . . dem sani disi now ben kon tapoe dem leki eksempel en dem ben skrifi leki wan warskow gi wi (kristen di ben kon njoen gebore nanga geest) en di tapoe dem na kaba foe dem seti foe sani ben kon.” — 1 Kor. 10:2-11; Ex. 16:1-35; Num. 11:1-9.
12. Soortoe difrenti de mindri na kondisi foe dem jeje Israël soema ini na seti foe sani disi en na kondisi foe na grontapoe foe libisoema ini na tem foe na doesoen jari rigeri?
12 Dem Israël soema dati di ben de ondro na tiri foe Mozes ini na sabana foe Sinaï, ben agersi soboen dem jeje Israël soema ini na seti foe sani disi. Na agersi fasi, wi kan taki dati na seti foe sani disi e tjari dede kon. Now now dem jeje Israël soema e gi demsrefi njanjan nanga na hemel manna, Jezus Kristus, di ben offer hemsrefi. Ini na doesoen jari rigeri foe Kristus dan na libisoema famiri di ben opobaka na dede no sa de moro ini wan kondisi di gersi wan sabana. Dan na kon boen baka foe na Paradijs na heri grontapoe sa de na troe troe wroko. Jehovah Gado no sa „hari” soema kon na Jezus soleki a de doe now leki Leriman nanga dem jeje Israël soema (Joh. 6:44). Na presi foe dati, na Soevereine Masra Jehovah e poti hem Pikin Jezus Kristus leki Kownoe tapoe libisoema, en na Kownoe disi e kari dem dedesma komoto foe grebi.
13. Efoe na „skin” disi wani de na manna foe owroetem, soortoe skin a moe de dan ofoe fa dem ben moe behandel hem?
13 Brede di meki foe karoe ofoe aleesi, de, leki manna na owroetem, wan sani di joe kan njan en di de sondro broedoe. Jezus ben taki, dati „na brede foe libi”, ben de na agersi manna, hem skin „foe na boen foe na libi foe grontapoe”. Foe de na srefi leki na manna foe owroeten, wi moe si na woortoe „skin” dja leki skin sondro broedoe. San Jehovah ben gi dem Israël soema ini na sabana foe dringi ben de watra en no broedoe.
14. Foe sainde dem arkiman foe Jezus ben verstan dati a ben taki foe meti sondro broedoe, wans a ben de libisoema skin.
14 Dem djoe arkiman foe Jezus ben verstan disi ooktoe so, bikasi ini na kroetoe foe dem nanga makandra san a ben meene, a ben taki: „Fa (tapoe soortoe fasi) na man disi kan gi wi hem skin foe njan?” (Joh. 6:52). Dem ben sabi na wet foe Gado tapoe na tori foe broedoe. Di baka na froedoe foe Noach dee Gado ben gi pasi na libisoema foe njan moro sani, a no ben gi dem broedoe foe meti foe dringi na see na skin foe meti di a ben gi dem leki njanjan foe hori demsrefi na libi. A ben gi dem watra foe dringi nanga meti di no habi broedoe foe njan. Leki na Soema di gi libi na ala mekisani foe skin nanga broedoe a ben aksi na broedoe gi hemsrefi (Gen. 9:1-4). Na ini na Wet foe Mozes di ben gi na a naatsi Israël, ben tanapoe na dedestrafoe foe na pasa foe Gado Wet tapoe na tori foe broedoe foe meti (Lev. 17:10-12; Deut. 12:16, 22-27). En na njan foe libisoema skin, wans a ben de sondro broedoe, ben de gi dem djoe di ben arki Jezus, leki wan boen ogri sani. Dem no ben wani tron libisoema di e njan tra libisoema (kannibalen). — 2 Kon. 6:26-31.
15, 16. (a) Fa wan soema ben moe njan Jezus skin? (b) Fa Jezus ben meki na punt disi kon moro krakti na fesi ini Johannes 6:53-59?
15 Jezus ben wani tjari kon na krin gi hem arkiman, dati na njan foe hem skin ben de na agersi fasi. Foe meki na punt disi kon moro krakti na fesi, a ben taki baka dati wan sani di ben de moro ogri efoe joe ben sa teki hem letterlijk. Wi e leesi:
16 „Foe datede Jezus ben taki gi dem: ’Foe troe, mi taki gi oen: Efoe oen (mi djoe arkiman) no njan na skin foe Soemapikin en no dringi hem broedoe, oen no habi libi ini oen srefi. Na soema (foe oen, mi arkiman) di njan mi skin en dringi mi broedoe, habi teego libi, en mi sa opo hem baka tapoe na laatste dee; bikasi mi skin de troe njanjan en mi broedoe de troe dringi. Na soema di e njan mi skin en di e dringi mi broedoe, e tan ini wanfasi nanga mi en mi ini wanfasi nanga hem. Soleki na Libi Tata ben seni mi go en mi e libi nanga na krakti foe na Tata, so toe na soema (foe oen, mi arkiman) di e njan mi skin, ja ooktoe hem sa libi nanga na krakti foe mi. Disi de na brede di saka komoto foe hemel. A no ben de soleki na tem di oen fositen-papa ben njan (na manna ini na sabana) en ete dem ben dede. Na soema di njan foe na brede disi, sa libi foe teego.’ Dem sani disi a ben taki di a ben leri ini wan publiki konmakandra ini Kapernaum.” — Joh. 6:53-59.
17. (a) Soortoe krakti dem woortoe dati, di Jezus ben taki ini na djoe kerki, ben habi srefi tapoe foeroe foe hem discipel? (b) Nanga soema moro foeroe Jezus ben taki ini Johannes 6:53 en san dem e tron?
17 Dem woortoe „ini wan publiki konmakandra” de letterlijk ini na fosi Griki tekst „ini wan djoekerki”. A de na srefi woortoe di Jezus e gebroiki ini Johannes 18:20, di e ben taki: „Ini wan djoekerki en ini na tempel, pe ala djoe ben kon makandra.” Jezus ben taki foe datede gi djoe arkiman, di ben de ini na Wetverbontoe foe Mozes, en mindri dem foeroe discipel foe Jezus ben de. Wi kan prakseri soortoe krakti Jezus woortoe ben habi di a no ben taki wawan foe na njan foe hem skin, ma ooktoe foe na dringi foe hem broedoe. „Di foeroe foe hem discipel foe datede ben jere disi, dem ben taki: ’Na leri disi na wan tanteri sani; soema kan arki na hem?’” (Joh. 6:60). Foe na verklari disi e kon na krin dati a no ala discipel foe Jezus ben mandi nanga hem leri. Boiti dem soema di ben mandi joe ben habi „moro discipel”, en na mindri dem disi joe ben habi dem twarfoe apostel (Joh. 6:61-66). Dem woortoe foe Jezus ini Johannes 6:53 soboen moro foeroe ben taki gi hem discipel, en te joe loekoe hem moro bradi, a ben taki gi dem di ben sa tron hem discipel bifo na „laatste dee”. Dem wan disi ben tron jeje djoe ofoe jeje Israël soema. — Rom. 2:28, 29.
18, 19. (a) Soema ben habi na broedoe foe offer-meti en san a ben wani taki foe datede foe njan makandra nanga hem, aladi Jezus broedoe ben moe dringi, hem skin ben moe njan? (b) Fa Jezus ben sori tapoe so wan njanjan foe na bribi foe wan heiden sroedati-edeman en fa wan seker djoe ben sori na tapoe, di a ben gi commentaar tapoe san wan Jezus ben taki tapoe wan njanjan-tafra?
18 Dem djoe di ben de ini na Wetverbontoe ben sabi, dati èn na broedoe èn na fatoe foe wan offer-meti ben de foe Jehovah (Lev. 3:16, 17). Di Jezus ben opo go na hemel en ben kon na fesi foe Jehovah, a ben pristeri Jehovah hem broedoe ofoe na waarde foe na broedoe leki wan verloesoe-paiman (Hebr. 9:12-14; Joh. 6:61, 62). Foedi na broedoe ben de foe Jehovah, dan na dringi foe hem en na njan foe na skin foe Jezus ben sori dati wan soema e njan makandra nanga Jehovah. Na so fasi Gado ben sa teki prati na a broedoe foe hem Lam Jezus Kristus makandra nanga dem discipel foe na Lam disi. Jezus ben taki foe so wan njanjan nanga Jehovah leki na Moro Bigi Abraham, di a ben taki na fesi dati foeroe heiden bribiman (soleki na heiden sroedati-edeman di ben bribi) ben sa kon foe ala presi foe grontapoe en „ben sa kanti didon na tafra ini na Kownoekondre foe hemel nanga Abraham (Jehovah) en Isaak (Jezus Kristus) en Jacob (na kristen gemeente di kon njoen gebore nanga geest)”. Matteus 8:5-12.
19 Di Jezus ben taki wan tron foe wan njanjan di sondro wini ofoe gridi ben poti, a ben verklari dati na fasi disi foe no gridi ben sa kisi pai. Nanga san? „Dem sa pai joe baka ini na opobaka foe dem reti-doe wan.” Dem woortoe disi e memre wan seker soema na a grani foe habi wan njanjan makandra nanga Jehovah Gado, bikasi wi e leesi: „Di wan sma foe dem kompe-gast ben jere dem sani disi, a ben taki gi hem: ’Kolokoe na soema de di e njan brede ini na Kownoekondre foe Gado’” (Luk. 14:12-15). Leki wan piki tapoe na sani disi, Jezus ben verteri na agersitori foe wan „bigi avondmaal”, di wan seker masra ben poti. Ini na agersi-tori dati Jezus ben sori dati no ala soema ben sa habi na kolokoe foe njan nanga Gado ini na Kownoekondre. — Luk. 14:16-24.
„LIBI INI JOESREFI”
20. Ini soortoe fasi dem soema di kisi „libi ini demsrefi” foedi dem njan Kristus skin en dringi hem broedoe, habi libi en pe en otem den sa gebroiki na makti disi?
20 Ini Johannes 6:53 Jezus ben taki: „Efoe joe no njan na skin foe Soemapikin en joe no dringi hem broedoe, joe no habi libi ini joesrefi.” Foedi dem srefi woortoe e kon dja ini Johannes 5:26, An American Translation e vertaal hem so: „Mi e taigi joe, dati efoe joe no njan na skin foe Soemapikin en joe no dringi hem broedoe, joe no sa habi libi tapoe joesrefi”. Jezus ben meene soboen dja „libi” nanga wan spesroetoe makti di a ben taki moro fara: „Na soema di njan mi skin en dringi mi broedoe, habi teego libi en mi sa opo hem baka tapoe na laatste dee” (Joh. 6:54). Dem soema di sa kisi na teego libi disi, no sa kisi hem tapoe grontapoe, ma ini na hemel Kownoekondre, pe Kristus de ook toe. A sa kisi na libi disi, te Jezus Kristus ben opo hem baka tapoe na „laatste dee”. Dem soema di, makandra nanga Jezus Kristus ini hemel habi „libi ini demsrefi” soboen, sa man foe prati gi trawan dem winimarki foe Kristus slagti-ofrandi. Dem sa doe disi, te dem sa kari komoto foe dem memre-grebi tapoe na „laatste dee” dem wan foe na libisoema-famiri di ben bai kon fri. — Joh. 5:28, 29.
21, 22. (a) Na soortoe fasi Jezus „skin” en broedoe ben de „troe njanjan” gi dem soema di ben gebroiki hem? (b) Ini soortoe matifasi dem de nanga hem en o fara dem habi hem fanowdoe?
21 Efoe wi prakseri na soortoe fasi na „teego libi” de di dem wan disi sa kisi ini hemel, dan wi kan verstan foe sainde Jezus ben taki: „Mi skin de troe njanjan en mi broedoe de troe dranki” (Joh. 6:55). Baka di a ben taki dati, a ben sori ini soortoe spesroetoe matifasi hem discipel ben sa kon, di a ben taki moro fara: „Na soema di njan mi skin, en dringi mi broedoe, e tan ini wanfasi nanga mi en mi ini wanfasi nanga hem. Soleki na Libi Tata ben seni mi go en mi e libi ini na krakti foe na Tata, na so a sa de toe nanga na soema di e njan mi skin, ja hemsrefi sa libi ini na krakti foe mi” (Joh. 6:56, 57). Na so fasi Jezus ben taki dati hem discipel ben sa de ini wanfasi nanga hem en hem ini wanfasi nanga dem. Bakaten a ben verteri wan agersi-tori en a ben gebroiki dem srefi soortoe woortoe dati na ini:
22 „Tan ini wanfasi nanga mi, en mi ini wanfasi nanga joe. Soleki na taki no kan meki froktoe foe hemsrefi efoe a no tan na a bon, so oenoe toe no kan meki froktoe, efoe oenoe no tan ini wanfasi nanga mi. Mi de na droifi-bon, oenoe de dem taki. Na soema di tan ini wanfasi nanga mi en mi ini wanfasi nanga hem, hem e meki foeroe froktoe; bikasi aparti foe mi, joe no kan doe noti kwet-kweti foe joesrefi.” — Joh. 15:4, 5.
23. Foe sainde Judas Iskariot no ben kisi „libi ini hemsrefi”?
23 Aladi Judas Iskariot ben tan moro leki wan jari ete ini na kompani foe Jezus Kristus, a no ben tan ini wanfasi nanga hem Masra. Soboen, sensi Pinksteren ini na jari 33 foe wi teri a no ben gi hem srefi njanjan nanga Jezus skin di a ben gi leki wan ofrandi en a no ben dringi Jezus broedoe. A no ben kisi „libi ini hemsrefi”. — Joh. 6:66-71.
24. (a) Na soortoe fasi Jezus ben de na „brede” di ben saka komoto foe hemel? (b) Na soortoe fasi Jezus ben libi nanga na krakti foe na Tata en na soortoe fasi dem soema di e gi dem srefi njanjan nanga hem skin, e libi nanga hem krakti?
24 Jezus ben memre Judas nanga dem trawan foe hem djoe arkiman drape tapoe na konmakandra ini Kapérnaum fa dem fositen tata foe dem ben njan na manna ini na sabana foe hori dem na libi. Leki bosroiti foe na taki foe hem a ben taki: „Disi de na brede, di ben saka komoto foe hemel . . . Na soema di e gi hemsrefi njanjan nanga na brede disi, sa libi foe teego” (Joh. 6:58). Drape na tapoesee ini hemel a ben de „na Woortoe” foe Gado, ma tapoe Gado tem a ben „tron libisoemaskin” (Joh. 1:14). Leki wan volmaakti Pikin foe Gado di ben tron libisoema a ben de soboen „na libi brede, di ben saka komoto foe hemel”, na agersi manna. Hem skin di ben dini leki agersi manna gi dem jeje Israël soema, de ooktoe „foe na boen foe na libi foe grontapoe” (Joh. 6:51). Now Jezus Kristus e libi baka nanga na krakti foe hem hemel Tata, now leki wan mekisani di no kan dede nooiti, ini hemel, bikasi na „libi Tata” disi ben opo hem baka komoto foe dede en gi hem jeje libi. Na discipel di e gi hemsrefi njanjan foe datede bifo na kon foe na „laatste dee” nanga na agersi manna (Kristus „skin”), soleki Jezus ben taki, „sa libi nanga krakti foe mi”, bikasi na libi Jezus sa wiki hem „tapoe na laatste dee”. — Joh. 6:54, 57, 58.
25. (a) Dem soema di de tapoe grontapoe en di e gi demsrefi njanjan nanga Kristus skin, sa doe disi ooktoe ini hemel? (b) Ini soortoe santa wroko dem sa doe diniwroko en soortoe blesi disi sa tjari gi na libisoema-famiri?
25 Ini na hemel dem jeje Israël soema di ben opo baka na dede en di habi „libi ini demsrefi”, no sa habi moro langa fanowdoe foe njan Jezus „skin” en dringi hem broedoe (Joh. 6:53). Dem sa kisi na grani foe doe diniwroko leki „priester foe Gado en foe na Kristus” en na so fasi dem sa man foe meki na libisoema-famiri kisi dem winimarki foe Kristus zoen-ofrandi di sa tan (Openb. 20:6). Foedi dem habi ini hemel teego libi, dem no sa habi soema fanowdoe di sa teki na priesterwroko foe dem abra. Soleki na Heepriester, Jezus Kristus, dem sa man doe wroko sondro foe tapoe leki ondropriester ini na tem foe dem doesoen jari. Na so fasi dem sa wroko makandra nanga Kristus foe opo na libi-soema-famiri kon kisi libisoema volmaakti fasi.
SETI FOE GADO FOE KISI VOLMAAKTI LIBISOEMA LIBI
26. Sensi otem na „bigi ipi” ben tjari kon makandra, en soortoe fanowdoe dem e firi nanga na broedoe foe na Lam Jezus Kristus?
26 Soleki wi sabi, dan sensi na mindri foe dem jari dritenti foe wi twintigste eeuw wan „bigi ipi” foe Kristus „tra Skapoe” ben tjari konmakandra (Openb. 7:9, 10; Joh. 10:16) Ooktoe dem sa njan boen ini dem doesoen jari foe na priesterwroko. Na apostel Johannes, di ben si na „bigi ipi” ini na visioen foe apocalypse (Openbaring), dem ben memre hem dati ooktoe dem disi ben habi waarderi foe na broedoe foe na Lam Jezus Kristus. Dem e verstan dati a de wan sani foe krin sondoe, bikasi Johannes ben kisi foe jere: „Disi de dem soema di komoto foe na bigi benawtoe, en dem ben wasi dem langa krosi en dem meki a kon weti ini na broedoe foe na Lam” (Openb. 7:14). Dem sabi dati dem no kan dini Gado ini hem tempel tapoe wan fasi di hem e feni boen efoe dem ten weri doti krosi. — Loekoe Zacharia 3:3-10.
27. Foe soortoe diniwroko dem moe njan boen ini dem doesoen jari, aladi dem no habi wan opobaka fanowdoe?
27 Na „bigi ipi” no e gi Gado nanga na Lam Jezus Kristus tangi foe wan opobaka foe dem memre-grebi, ma dati dem kisi jepi foe komoto ini na bigi benawtoe. Foe datede, dem no hafoe, soleki dem soema di Johannes 6:54 e taki foe dem, foe opo dem baka tapoe „na laatste dee”. Ma dem no sa man foe doe hem sondro dem winimarki foe dem diniwroko foe na Heepriester Jezus Kristus nanga dem 144000 ondro-priester ini dem doesoen jari.
28. Soortoe „joeroe” e kon krosibee gi na libisoema-famiri di dede en di bai fri en soortoe okasi dem sa kisi?
28 Now wan wondroe „joeroe” e kon krosbee. A de na „joeroe”, pe Jezus Kristus leki kompe kroetoebakra foe Jehovah sa kari kon na doro „ala soema di de ini dem memregrebi”, leki soema di a ben bai fri. Dem sa tron dem grontapoe borgroe foe hem hemel kownoekondre, efoe dem wani ofoe no wani disi. Alamala sa kisi na okasi foe kisi volmaakti libisoema libi tapoe wan paradijs-grontapoe. — Joh. 5:28, 29.
29. San èn na „bigi ipi” èn dem libisoema di opo baka foe dede sa dringi en njan dan, en soortoe spesroetoe okasi na „bigi ipi” sa habi dan?
29 San dem borgroe foe Kristus sa dringi dan? San dem sa njan? Ini na Openbaring di Johannes ben kisi, e sori wi dati „wan liba foe watra foe libi” sa lon komoto foe ondro na troon foe Jehovah Gado nanga na Lam Jezus Kristus. Na ala toe see foe na „liba” ben tanapoe dem „bon foe libi”, di ibri moen e gi froktoe. Dem wiwiri foe dem bon de leki dresi foe dem naatsi. Foe dem seti disi foe Gado èn dem memre foe na „bigi ipi” èn dem soema di ben opo baka foe dede sa dringi en njan (Openbaring 22:1-3). Foedi dem soema di e sori waarderi en gi jesi e njan boen foe ala dem boen-ati disi foe Gado nanga jepi foe Jezus Kristus, dem e meki na opobaka foe dem de wan „opobaka foe libi”. Na „bigi ipi” foe Kristus „tra skapoe”, di sa pasa libi libi „na bigi benawtoe” en foe datede no habi fanowdoe foe wan opobaka, sa habi na okasi foe tan libi sondro foe dede ooiti en drai go baka na a doti foe grontapoe.