Wan opobaka foe libi nanga wan foe kroetoe
1, 2. Foe sainde na verklari foe Jezus, dati makti ben gi hem foe doe kroetoewroko, no de wan froewondroe sani foe bribi?
TAPOE na dee foe Gado di a poti, hem Pikin sa gebroiki „na makti foe libi” (Joh. 5:26, Knox). A sa opo dem dedesma di sa kisi dem winimarki foe na ransoen ofrandi. Na „dee” sa de wan tem foe kroetoe, ma a no sa lange 24 joeroe. A sa de na pisi tem foe 1000 jari leki fa disi poti gi na rigeri foe Kristus (Openb. 20:4-6). Te a kroetoe e hori a sa habi leki bakapisi libi gi son soema èn strafoe foe pori gi trawan. Disi de wan froewondroe sani gi wi ini na tem disi te so meni mankeri foe retifasi nanga so meni verkeerti prakseri foe na see foe kerki de san Gado dee foe kroetoe sa de? A ben de leki wan froewondroe sani gi dem djoe ini Jezus tem di ben hori sabbat.
2 Foe datede Jezus ben taigi dem: „No froewondroe foe disi, bikasi na joeroe e kon, pe ala dem di de ini dem memre-grebi sa jere hem sten en sa kon na doro, dem di ben doe boen sani foe wan opobaka foe libi, dem di ben doe takroe sani foe wan opobaka foe kroetoe. Mi no kan doe no wan enkri sani foe misrefi; soleki mi e jere (foe na Tata leki na Moro Hee Kroetoe-bakra), mi e kroetoe; en na kroetoe di mi e kroetoe de reti, bikasi mi no e soekoe mi eegi wani, ma na wani foe hem di ben seni mi.” — Johannes 5:28-30.
3. Fa dem soema di pasa foe dede go na libi en di no e kon ondro wan takroe kroetoe de difrenti foe dem soema di Jezus ben taki foe dem ini Johannes 5:28, 29 en soortoe groepoe foe soema dem moe de?
3 Bifo Jezus taki dem woortoe dja na tapoesee, a ben taki ini Johannes 5:24, 25 foe dem tra „dedewan”, di na „joeroe” foe dem kon na libi ben bigin. Dem ben taki foe dem spesroetoewan disi, dati dem ben „dede” en ete dem no ben de „ini dem memre-grebi”. Srefi dem ben jere ini na tem dati na „woortoe” foe na Pikin foe Gado, di a ben teki en dem ben bribi na Wan di ben seni hem kon. Soboen dem ben pasa foe dede go na libi en dem no ben sa kon ini wan takroe kroetoe. Foedi dem ben pasa foe dede go na libi, dem ben taki foe dem soema disi di ben poti prakseri tapoe na sten foe Gado Pikin, dati dem e libi en habi teego libi na dem fesi. Dem disi ben moesoe de dem wan di ben tron mede-erfgenaam foe Jezus Kristus, foe taki, dem 144000, di dem ben gi wan opobaka ini na jeje kondre foe de nanga hem ini na Koonoekondre.
4. Na presi foe dem kroetoe dem, soortoe wroko dem 144000 ben kisi leki mede-erfgenaam foe Kristus?
4 Na presi dati dem sa kroetoe dem, dem 144000 disi, di de mede-erfgenaam foe Jezus Kristus, dem sa sdon nanga hem tapoe kroetoe-stoeroe. Openbaring 20:4 e taki dati „dem ben kisi na makti foe kroetoe”. Dem e kari na opobaka foe dem „na fosi opobaka”. Nanga disi dem e kisi wan opobaka wantron wantron go ini hemelkondre. — Openb. 20:6.
5. Otem na kroetoe-tem foe na gemeente foe jeje Israël ben bigin en san Jezus ben taki ben sa de na grani foe dem ini hem koonoekondre?
5 Wan tem foe kroetoe ben de fosi gi dem 144000, di dem ben de na grontapoe. Disi ben bigin na a geboortoe foe na kristen gemeente foe jeje Israël tapoe na dee foe 33 foe wi teri. So wan tem foe kroetoe ben go doro te leki ala memre foe na gemeente disi foe jeje pikin foe Gado ben piki poeroe (1 Petr. 4:17, 18). Foe na glori tem di de na dem fesi, Jezus ben taki gi hem getrouw apostel tapoe Pascha neti foe 33 foe wi teri: „Mi e meki wan verbontoe nanga oen, soleki mi Tata ben meki wan verbontoe nanga mi, foe wan koonoekondre, dati oen kan njan en dringi na mi tafra ini mi koonoekondre, en kan sidon tapoe troon foe kroetoe dem twarfoe lo foe Israël” (Luk. 22:29, 30). So, na presi foe dem kroetoe dem ini dem doesoen jari rigeri foe Kristus, dem e teki prati nanga hem ini na kroetoe foe libisoema di ben bai fri.
6. Gi na libisoema-famiri ini na algemeen foe habi wan kroetoe-tem, san de dan fanowdoe, en fa Ha’des sa kon pori?
6 Te na libisoema-famiri di ben bai fri wani habi wan tem foe kroetoe ini het algemeen dja na grontapoe, dan wan opobaka foe „ala dem di de ini dem memre-grebi” de fanowdoe. Foe sori dati disi de so, Jezus ben taki ini Johannes 5:28-30, dati a „joeroe” ben sa kon pe ala dem disi ben sa jere hem sten en piki. A ben sa kari dem komoto foe na grebi foe dem, na a srefi fasi di a ben bari kari hem mati ini grebi ini Bethania: „Lazarus, kon na doro” (Joh. 11:43, 44) Na „joeroe” dati ben sa kon ini dem doesoen jari rigeri foe Jezus Kristus nanga hem 144000 glori mede-erfgenaam (Openb. 20:6, 11-14). Ini na tem foe na rigeri dati, Hades, ofoe na algemene grebi foe libisoema, moe pori nanga na meki kon leegi foe hem foe ala dem dedesma di ben bai fri. Dati wani taki opobaka!
7. Soortoe groepoe e kon now na fesi, en disi e pasa na a bigin foe na opobaka-programma?
7 Jezus ben taki dati toe groepoe sa kon na a tem dati na fesi. Ma, disi no sa de na a bigin foe na opobaka programma, foedi a no ala soema foe dem soema di bai fri sa komoto foe dem memre-grebi na a srefi tem. Jezus ben taki (1) foe „dem di ben doe boen sani” nanga (2) foe „dem di doe takroe sani”. Dem woortoe disi no de sori tapoe san dem soema di opobaka sa de na a momenti di dem opbaka komoto foe dem memre-grebi. Foe sainde wi e taki disi?
8. (a) Ini san dem soema, di ben opobaka foe dede no sa kon, foedi „na Lam foe Gado” ben dede foe teki tjari gowe na sondoe foe grontapoe? (b) ma ete, fa sem fositem libi sa habi krakti tapoe dem en foe sainde?
8 Na sani di e bepaal foe dem soema disi di opobaka sa kon na doro, no de san dem ben de bifo dem ben dede. Disi de troe, bikasi ini dede dem ben pai na strafoe foe sondoe (Rom. 6:23). Ooktoe, Jezus ben dede leki na „lam foe Gado” foe a ben kan „tjari na sondoe foe grontapoe gowe” (Joh. 1:29). San a ben „tjari gowe” no kan go poti baka gi na grontapoe foe libisoema baka te dem opobaka foe dede. Foe datede na apostel ben skrifi: „Wi no sa go doro foe de srafoe foe sondoe. Bikasi na soema di ben dede kon fri foe hem sondoe” (Rom. 6:6, 7). Foe datede, foedi dem opo hem baka, no e meki wan sma, di ben bai fri, e kon ini wan „dobroe gevaar” foe strafoe hem baka foe san a ben doe bifo a ben dede. Soboen, na sani di o bepaal gi dem libisoema di opobaka sa de, san dem sa meki foe dem libi now di dem ben gi dem wan njoen bigin ondro na 1000-jari koonoekondre foe Kristus? A no de foe taki, dati ini na sribi ini dede no wan kenki e kon ini dem eegifasi. Foe datede, san dem ben doe ofoe fa dem ben libi ini na ogri seti foe sani now, sa habi krakti tapoe dem lostoe ofoe fasi gi Kristus koonoekondre.
9. Dem soema di dem fositen libi ben habi krakti tapoe dem, soortoe toe bakapisi ben sa kan de foe dem?
9 Ja, dem fositen model foe libi sa habi krakti tapoe dem problema foe dem wan di opobaka foe fiti demsrefi na dem Koonoekondre wet foe retidoe en na go foe dem na fesi foe kisi volmaakti libi na grontapoe. Dan toe bakapisi sa de. Leki fa Jezus ben tjari kon na krin ini Johannes 5:28, 29, dan dem sa drai go na a pasi foe doe boen sani ofoe drai go na a pasi foe doe takroe sani. Nanga soortoe bakapisi?
10. Ini dem woortoe „wan opobaka foe libi”, san „Libi” wani taki?
10 Jezus ben sori tapoe dem bakapisi disi di a ben taki foe „wan opobaka foe libi” en „wan opobaka foe go na kroetoe”. Nanga na woortoe „libi” ini na context disi, Jezus no e meene na libi di soema habi te dem komoto foe dem memre-grebi. Noso, no wawan dem doeman foe boen sani ben sa habi „wan opobaka foe libi”, ma dem doeman foe takroe sani ben sa habi ooktoe so wan opobaka, foedi dem sa moe bigin foe kon na libi tapoe grontapoe. Soboen, „libi” soleki a gebroiki ini Johannes 5:29 wani taki volmaakti libi di son wan sa kisi na a kaba foe Kristus rigeri, foedi dem tan doe boen sani, bikasi dem ben jere hem koonoekondre nanga kroetoewroko.
11. Ini dem woortoe „wan opobaka foe kroetoe”, san „kroetoe” wani taki?
11 Na a srefi fasi, „kroetoe” wani taki san e kon leki bakapisi gi tra soema ofoe ini, ofoe na a kaba foe na doesoen-jari „kroetoe-dee”. Ini Johannes 5:29 „Kroetoe” wani taki na tra see foe „libi”. Foe dat-ede a wani taki wan kroetoe di de wan strafoe, wan strafoe foe dem doe man foe takroe sani foe dem kisi teego pori. Disi de wan pori foe sili nanga skin ini Gehenna. — Matt. 10:28.
12. Soboen, soortoe toe kabapisi kan de, di wan sma di opobaka na dede ondro Kristus Koonoekondre kan go?
12 Soboen, toe kabapisi kan de, di na opobaka foe wan sma ondro Kristus Koonoekondre kan tjari hem go na wan foe dem toe, ofoe volmaakti libi ofoe kroetoe di e tjari na lasi foe libi. Tapoe wan moifasi An American Translation vertaal Johannes 5:29 efoe wi e lési: „sa kon na doro foe wan opobaka nanga libi en . . . foe wan opobaka en kroetoe.”
13, 14. (a) San Jezus nanga hem kompe kroetoebakra e jere fosi bifo dem lési strafoe? (b) Foe sainde presi no de foe go moro hee foe loekoe na kroetoe foe Kristus ini na millennium?
13 Ini na millennium (1000 jari rigeri) na kroetoe-wroko foe Jezus nanga hem kompe-kroetoebakra sa de wan retidoe wan gi ala libisoema. Jezus ben taki: „Soleki mi e jere, mi e kroetoe”. — Joh. 5:30.
14 San Jezus e jere foe na Moro hee Retidoe-wan, Jehovah Gado, a de poti ini hem eegi kroetoe. A sa tjari hemsrefi akroederi san skrifi na proféti-fasi foe hem leki kroetoebakra, en disi hem hemel Tata ben gi Jesaja hem jeje foe skrifi ini Kapiter 11, vers, wan te nanga feefi. Tapoe dem kroetoestoeroe, dem 144000 kompe kroetoebakra sa doe soleki Jezus Kristus e doe. Na a fasi disi, a sa de troe troe na kroetoe foe Jehovah, di dem sa kroetoe, foedi hem Pikin Jezus Kristus sa soekoe foe doe alatem hem Tata wani, no di foe hemsrefi wani. Foe datede, wan soema no kan go na wan moro hee kroetoe foe loekoe na kroetoe di Jezus Kristus ben kroetoe. Soboen, na a kaba foe hem jari foe kroetoewroko, a sa man foe gi na Moro hee Retidoe-wan na Koonoekondre, fri foe ala kragi dati a no doe hem wroko boen (1 Kor. 15:24-28). Foe na tem dati Jehovah Gado sa handri afersi foe wan laatste bepalend tesi foe ala soema di hem Pikin ben gi abra na hem. — Openb. 20:7-15.
NA „BIGI IPI” EN NA OPOBAKA
15. Di Paulus ben taki tranga nanga Timoteus na fesi fesi foe Kristus, soema ben poti foe kroetoe dem libiwan nanga dem dedewan en soema Paulus ben meene nanga dem „dedewan”?
15 Na kon foe na kroetoe-dee de wan sani di ala libisoema moe hori na prakseri (Tori foe dem Apostel 17:30, 31). Nanga wan joisti teki foe na sani disi, na apostel Paulus ben skrifi gi Timoteus, di ben de na fesi wan zendeling-kompe foe hem: „Mi de taki tranga gi joe na fesi foe Gado nanga Kristus Jezus, di sa kroetoe dem libiwan nanga dem dedewan” (2 Tim. 4:1). Dem woortoe „dem dedewan”, Paulus e sori tapoe dem „wan di de ini dem memre-grebi”. Ma soema na dem wan di Paulus e kari „dem libiwan”?
16. Soema spesroetoe na dem „libiwan”?
16 Dem sa de dem wan na grontapoe di pasa na „bigi benawtoe” en na tai foe Satan Didibri nanga hem ogri jeje. Dem disi sa de foe datede ete na libi na grontapoe te na 1000-jari rigeri foe Kristus tapoe hem grontapoe kondre bigin. Dem wan di tron hem borgroe nanga teego libi tapoe wan grontapoe paradijs, de dem wan di a de meene spesroetoe. Son wan foe dem salfoe fika-pisi foe dem mede-erfgenaam foe Kristus, sa tan na libi ooktoe, ma efoe dem sa bigin foe kroetoe na grontapoe bifo dem tjari dem go na a hemel Koonoekondre, de wan sani di wi moe loekoe fa a sa de (1 Thess. 4:15-17; 2 Petr. 3:11-14). Ma, wan „bigi ipi” foe dem tra skapoe foe Kristus sa pasa na „bigi benawtoe” en tan na libi makandra nanga na fika-pisi foe jeje Israël, en libi-libi dem sa go ini na millennium. Openbaring 7:9-17 de sori dati disi de troe.
17. Fa wi doe sabi ofoe na grontapoe sa de sondro soema na a kaba foe na seti foe sani?
17 Ala dem sani disi makandra e sori dati wi grontapoe planeet no sa de krin krin sondro soema na a kaba foe na seti foe sani. Soboen, „na bigi ipi” foe dem „tra skapoe” foe Kristus sa de dem „libiwan” nanga soema na millennium kroetoe-dee e bigin.
18. San de na wondroe sani foe dem „bigi ipi” soema di sa pasa na „bigi benawtoe” en foe soortoe reden?
18 Na wondroe sani foe na „bigi ipi” disi, di sa tan na libi te na „bigi benawtoe” kon, de, dati nooiti dem ondrofeni wan opobaka. Foedi dem no dede noiti en dem no ondrofeni na pori foe na libisoema skin, dan dem no habi fanowdoe foe na Koonoe Jezus Kristus kari dem komoto foe dem memre-grebi. Foe na fasi fa dem ben handri nanga na salfoe fika-pisi foe dem jeje brada foe Kristus ini na tem di pasa, dem skapoewan disi ben poti na a Koonoe reti-anoe see foe boen-ati en gi dem a de taki na a bigin foe hem millennium rigeri: „Kon, oen di mi Tata ben blesi, go ini na koonoekondre di ben sreka gi oen sensi na fundamenti foe grontapoe”. Soboen, dem sa tjari go ini na pasi foe kisi volmaakti libisoema libi tapoe wan paradijs grontapoe (Matt. 25:31-46; Johannes 10:16). Bigi na grani se de foe de dja te na rigeri „Soemapikin”, Jezus Kristus, sa bigin foe kari dem di de ini dem memre-grebi kon na doro ini wan opobaka, di sa gi dem na okasi foe kisi teego libi tapoe grontapoe.