Libi ini na ten di e kon nanga jepi foe wan opobaka
„Efoe oen no njan na skin foe Soemapikin èn dringi hem broedoe, oen no habi libi ini oensrefi”. — Johannes 6:53.
1, 2. (a) San Jezus ben taki ini Johannes 6:53, 54, en dem bribiman foe soortoe leri ben feni hem tranga foe verstan dem woortoe disi?
NA LERI dati na libisoema sili no e dede panja na foeroe presi. Dem soema di e bribi ini na leri disi, sa feni hem wan tranga sani foe datede foe si fa dem woortoe foe Jezus Kristus ben kan de troe, soleki dem skrifi ini na bijbel ini Johannes 6:53, 54:
2 „Foe troe mi taki gi oenoe, efoe oenoe no njan na skin foe Soema-pikin en dringi hem broedoe, oenoe no habi libi ini oenoesrefi. Hem di e njan mi skin en dringi mi broedoe habi teego libi, en mi sa opo hem baka na a laatste dee.”
3. Soortoe redelijk aksi dem soema e aksi di e bribi dati na sili no e dede tapoe na tori foe „libi ini joesrefi” nanga na opobaka?
3 Efoe, soleki foeroe soema e taki, na libisoema sili no e dede, ma e libi go doro baka na skin foe meti dede, foe sainde wi moe njan na skin foe Jezus Kristus, „Soemapikin”, en dringi hem broedoe foe habi „libi ini wisrefi”? Efoe na sili e kon fri na a ten te na skin dede, foe sainde wan libisoema moe kisi wan opobaka foe libi agen? Alamala foe wi moesoe agri dati disi na wan logische redenering.
4. Soema na mindri dem arkiman foe Jezus ben feni hem moeilijk foe graboe san Jezus ben taki en fa a de ini disi tem?
4 Srefi dem foetoeboi foe Jezus Kristus ben feni hem moeilijk foe san a ben taki, bikasi wi e lési: „Ma Jezus, di ben sabi ini hemsrefi dati hem discipel ben knoroe foe disi, ben taigi dem: ’Disi meki oen naki foetoe?’” (Joh. 6:61). Srefi ini disi tem son wan foe wi lésiman e feni hem tranga foe verstan Jezus woortoe. Ete Jezus ben sabi foe san a ben taki ini na tem dati, bikasi hemsrefi no ben bribi dati libisma-sili no e dede. Hem eegi woortoe e bewijsi disi.
5. Nanga soortoe woortoe Jezus sori dati a no ben bribi dati na sili no ben dede?
5 Wan lési Jezus ben taki gi hem discipel: „Frede hem, di kan pori sili nanga skin ini Gehenna” (Matt. 10:28). Bakaten, bifo dem ben kisi hem hori ini na djari foe Gethsemane, a ben taigi hem discipel: „Mi sili de nanga sari te foe dede” (Matt. 26:38; Mark. 14:34). Jezus ben teki foeroe tron dem profeeti-tori foe Jesaja èn a ben agri nanga san dem ben taki foe hem: „Hem sa poti hem berpe srefi na dem ogrisma en na dem goedoewan ini hem dede . . . hem ben kanti trowe hem sili ini dede srefi.” — Jes. 53:9, 12.
6. Akroederi nanga Johannes 6:53, 54, san son wan ben sa doe nanga na libisoema ofrandi foe Jezus bifo „na laatste dee”, en san ben sa pasa nanga dem disi na a dee dati?
6 Foe datede ini Johannes 6:53, 54 Jezus ben tjari kon na krin, dati a ben sa tron wan libisoema ofrandi en joe ben sa habi dem, di ben sa njan hem skin en dringi hem broedoe bifo dem „laatste dee”. Dem disi ben sa dede te tem ben sa pasa, ma, foe taki foe ibri wan foe dem disi, Jezus ben taki: „Mi sa opo hem baka na a laatste dee”. Akroederi nanga san Martha foe Bethania ben taki ini Johannes 11:24, dan na tem foe na opobaka foe dem dedewan, ben moe verstan dati a ben sa de na a „laatste dee” dati. Pe Martha ben libi ben de krosbee foe Jeruzalem. Dja, wan pisi tem baka na Pascha foe 31 foe wi gewoon teri, Jezus ben taki foe na komando di Gado ben gi hem foe opo dem dedewan. Dem kerkisoema ben feni fowtoe na hem foedi a ben dresi wan man tapoe wan sabbat-dee en a ben taigi hem foe teki hem bedi en go na oso. Di a ben gi piki tapoe na feni foe fowtoe disi, Jezus ben taki:
7, 8. (a) Soema Jezus Kristus ben meki komoto foe dede kon na libi, en leki soema a verdini foe kisi grani en foe sainde? (b) Soortoe soema e pasa now foe dede go na libi? (c) Foe kon ini soortoe opobaka Soemapikin sa kari ala dem di de ini dem memre-grebi?
7 „Bikasi soleki na Tata e opo dem dedewan en meki dem kon na libi, na so na Manpikin toe e meki kon na libi soema hem wani. Bikasi na Tata no e kroetoe no wan soema kwetkweti, ma a ben gi ala na kroetoe na a Manpikin . . . Na soema di no e gi grani na a Manpikin, no e gi grani na a Tata, di ben seni hem. Foe troe mi taki gi oen, na soema di jere mi woortoe en bribi hem di ben seni mi kon, habi teego libi, en a no de kon ini kroetoe, ma a ben pasa foe dede go na libi.
8 Foe troe mi taki gi oen, Na joeroe de kon, èn a de now kaba, te dem dedewan sa jere na sten foe na Manpikin foe Gado en dem di ben poti prakseri na tapoe sa libi. Bikasi soleki na Tata habi libi ini hemsrefi, so a ben gi pasi na a Manpikin foe habi libi ini hemsrefi. En a ben gi hem makti foe doe kroetoewroko, bikasi Soemapikin a de. No froewondroe foe disi, bikasi na joeroe e kon, pe ala dem di de ini dem memre-grebi sa jere hem sten en sa kon na doro, dem di ben doe boen sani foe wan opobaka foe libi, dem di ben doe takroe sani foe wan opobaka foe kroetoe. Mi no kan doe no wan enkri sani foe mi srefi; soleki mi e jere, mi e kroetoe; en na kroetoe di mi e kroetoe de reti, bikasi mi no e soekoe mi eegi wani, ma na wani foe hem di ben seni mi.” — Joh. 5:21-30.
9. Na krakti e poti spesroetoe tapoe soortoe afersi ini dem woortoe foe Jezus di ben kari dja na fesi?
9 Ini dem woortoe dja na tapoe wi e si na krakti di e poti tapoe na tori foe kroetoe, dem woortoe „kroetoe” e kon ala nanga ala seebi tron. Ooktoe wan „opobaka foe kroetoe” e wakti dem soema di ben doe takroe sani.
10. Na soema na kroetoe foe libisoema sa gi abra ini Kristus rigeri foe doesoen jari, en foe sainde na aksi foe loekoe so wan kroetoe ete wan tron no sa de?
10 Soboen, na tori foe opobaka e go makandra nanga kroetoe. Foedi na Pikin foe Gado ben tron „Soemapikin” na grontapoe, Gado ben gi hem na makti foe kroetoe ala memre foe na libisoema-famiri. So Gado na Tata ben meki hem getrouw Manpikin de makandra nanga hem leki kroetoebakra. Foe loekoe ete wan tron na kroetoe di na Pikin foe Gado ben kroetoe no sa de, bikasi a sa de volmaakti. Na kroetoe di Jehovah Gado sa kroetoe baka na doesoen jari Dee foe Kroetoe, no sa de foedi na libisoema-famiri di ben kon boen ben sa aksi Jehovah leki na Moro Hee Retifasi Soema, na Kriboi Kroetoebakra foe loekoe na kroetoe ete wan tron. — 1 Kor. 15:24-28.
PASA FOE DEDE GO NA LIBI NOW
11. Ini Johannes 5:24, 25 fa Jezus ben verklari foe sainde hem bribiman ben „pasa foe dede go na libi”?
11 Tapoe grontapoe Jezus Kristus ben handri leki Gado takiman gi libisoema. So te ibri arkiman ben bribi san Jezus na Pikin foe Gado ben taki, dan a ben de a srefi leki bribi san Gado na Tata ben taki. Dem winimarki di a ben sa tjari gi dem djoe di ben jere hem Jezus ben sori, di a ben taki dem woortoe di e kon gi dem djoe: „Foe troe mi taki gi oen, Na soema di jere mi woortoe en bribi hem di ben seni mi, habi teego libi, en hem no sa kon ini kroetoe, ma hem ben pasa foe dede go na libi” (Joh. 5:24, 25). A no de foe taki, dem wan ini na ten dati di ben de dede sma troe troe ini dem grebi no ben kan jere Jezus woortoe di a ben taki en poti prakseri na tapoe, na a „joeroe”, di a ben taki foe hem. We, foe soortoe dedesma Jezus ben taki dan?
12, 13. (a) Soortoe dedewan Jezus ben meene, di a ben taki foe na jere foe hem sten en kisi libi leki bakapisi? (b) Nanga na soortoe seti disi foe Gado na prakseri, san Paulus ben kan skrifi gi dem „dedewan dati” ini ogridoe nanga sondoe ini Efese 2:4-7?
12 Foedi Jezus ben taki, dati na „joeroe” dati disi pasa, „de now”, a ben kan meene soso dem sma di ben waka lontoe tapoe grontapoe, ma di ben de ondro na strafoe foe dede foe onvolmaakti-fasi ede en sondoe di dem ben kisi foe Adam. Libisoema ini algemeen de „dede” ini na ai foe Gado; dem no habi reti tapoe libi en na „paiman” di sondoe e pai na dede (Rom. 6:23). Ma te dem jere en poti prakseri tapoe Jezus „Woortoe” dem sa komoto ondro Gado strafoe gi dem foe dede en soboen, foe taki hem na agersi fasi „ben sa pasa foe dede go na libi”.
13 Foedi Gado ben seti so wan sani, meki na apostel Paulus ben kan skrifi dem „santa” bribiman ini Efese, di ben de „ini wanfasi nanga Kristus Jezus” dem woortoe di e kon now: „Moro fara, a ben de joe, di Gado ben meki kon na libi, aladi joe ben dede ini joe ogridoe nanga sondoe . . . Gado, di habi foeroe sari-ati, bikasi hem bigi lobi di a ben lobi wi, ben meki wi kon na libi makandra nanga Kristus, srefi di wi ben de dedesma ini ogridoe — nanga no-verdini-boenfasi joe ben kisi redding — en a ben opo wi makandra en poti wi makandra ini dem hemel presi ini wanfasi nanga Kristus Jezus, dati ini dem seti foe sani di e kon ben kan sori dem bigi goedoe foe hem no-verdini-boenfasi ini hem boen-ati-fasi gi oen ini wanfasi nanga Kristus Jezus.” — Efese 1:1; 2:1, 4-7.
14. Soboen, dem wan di ben kon na libi na jejefasi, sidon pe en foe soortoe groepoe en moesoe tan ini wanfasi nanga soema?
14 Dem di ben kon fri foe na strafoe foe dede en ben kon na jejefasi na libi foe sidon nanga Kristus Jezus „ini dem hemel presi” ben tron memre foe na gemeente skin foe Kristus. Dem ben tron toe wan „tempel” groepoe, pe Gado ben kan libi nanga santa jeje leki ini wan „santa tempel” (Ef. 1:22, 23; 2:20-22). Foedi dem ben de Kristus „skin”, dem de spesroetoe „ini wanfasi nanga Kristus Jezus”. Dem habi fanowdoe foe tan ini wanfasi nanga hem. — Joh. 15:4.
15. Soortoe aksi e kon foe na tori dati na Tata „habi libi ini hemsrefi”?
15 Jezus woortoe habi krakti tapoe dem wan disi: „Soleki na Tata e opo dem dedewan en meki dem kon na libi, na so na Manpikin toe e meki kon na libi soema hem wani” (Joh. 5:21). Disi wani taki toe dati na Pikin habi makti foe gi libi abra na trawan. Na reden foe disi Jezus ben verteri, di a ben taki: „Bikasi soleki na Tata habi libi ini hemsrefi, so a ben gi pasi na a Pikin foe habi libi ini hemsrefi.” (Joh. 5:26). San na „habi libi ini hemsrefi” foe a Tata wani taki troe troe? Disi wani taki soso dati a de na libi leki na wan enkri „libi nanga troe Gado”? (1 Thess. 1:9). A wani taki dati a habi onafhankelijk libi ofoe libi di tai makandra nanga hem? An American Translation e verstan na tori na a fasi dati, bikasi dem e vertaal Johannes 5:26 na a fasi disi: „Bika soleki na Tata De-na-libi-hemsrefi, a ben gi na Pikin De-na-libi-foe-hemsrefi.” Akroederi nanga disi, The Holy BibIe in Modern English by Farrar Fenton e verstan dati na nem Jehovah wani taki „Libi-alatem”, en e vertaal Jesaja 42:8 so: „Mi na ’Libi-alatem’ — bikasi dati na mi nem”. Dem ben kari Jehovah „Na Wan-di-de-na-libi-hem-srefi”.
16. Efoe na gi foe „habi libi ini hemsrefi” na a Pikin foe Gado ben wani taki soso foe gi hem volmaakti libi, foe sainde na Pikin no ben sa de aparti ini na pisi tori disi?
16 Ma, akroederi nanga na lin foe bewijsi ini na kontext, dem woortoe „Libi ini hemsrefi” hebi wan moro krakti betekenis leki De-na-libi-hemsrefi. Dem woortoe wani taki dati na hemel Tata habi wan reservoir (leki wan watra-baki) foe libi ini hemsrefi, so dati, leki na Tata, hem man foe gi libi abra na trawan. Nanga disi na prakseri, a ben man foe gi libi abra na hem Pikin so foeroe, dati hem toe ben sa man foe gi libi abra na tra soema. Efoe na gi di na Tata ben gi na Pikin na makti foe habi „libi ini hemsrefi” ben wani taki soso dati a ben gi hem volmaakti libi, dan na Pikin no ben sa de aparti foe tra sani. Foe sainde? Bikasi Gado ben gi volmaakti libi ooktoe na dem hemel engel. No dati wawan, ma a ben gi volmaakti libi na Adam nanga Eva ini na djari foe Eden. Ma foe sainde na Pikin foe Gado ben kisi „libi ini hemsrefi”?
17. Foe sainde na Pikin ben kisi libi ini hemsrefi, en fa na begi foe hem ini Johannes 17:1, e akroederi nanga dati?
17 Disi ben de foedi na Pikin foe Gado ben gi hem volmaakti libi abra leki wan ransoen slagti-ofrandi gi ala soema (Matt. 20:28; 1 Tim. 2:5, 6). Na a fasi disi hem ben kan bai libisoema baka komoto foe dede, di den ben kisi leki wan strafoe foe dem onvolmaakti fasi di dem ben kisi. Nanga disi ini prakseri, Jezus ben kan bigin hem begi tapoe na neti foe Pascha nanga dem woortoe: „Tata, na joeroe ben kon; gi joe Pikin glori, foe joe Pikin kan gi joe glori toe, soleki joe ben gi hem tranga tapoe ala libisoema, dati, foe taki foe na heri nomroe foe dem di joe ben gi hem a ben kan gi dem teego libi.” — Joh. 17:1, 2.
18. Fa na vertaling foe na anoe foe R.A. Knox foe Johannes 5:26 e tjari a waarheid dati kon na krin, en otem Kristus ben kisi na makti nanga tranga foe gi libi abra na trawan?
18 The New Testament of Our Lord and Saviour Jesus Christ foe na anoe foe A. Knox ben verstan na waarheid dati en meki hem krin ini hem vertaling foe Johannes 5:26. Drape we lési: „Soleki na Tata habi na inisee foe hem na makti foe libi, so a ben gi na Pikin dati hem toe ben sa habi na makti foe libi inisee foe hem.” Baka hem ofrandi dede, hem opobaka èn hem pristeri foe na waarde foe hem volmaakti libi na hem hemel Tata Jezus Kristus ben kan kisi na makti nanga tranga foe gi abra dem winimarki foe hem na dem wan di habi hem fanowdoe — na heri libisoema-famiri di habi strafoe en e dede. Foe datede wi e lési ini Romeini 6:23. „Na paiman foe sondoe na dede, ma na presenti di Gado e gi de teego libi nanga jepi foe Jezus Kristus, wi Masra.”
19. Foe sainde Jezus Kristus ben de na reti wan gi Gado foe gebroiki ini na kroetoe foe na libisoema-famiri?
19 Leki wan libisoema foe skin nanga broedoe, Jezus na „Soemapikin” ben kan offer na Gado na soifri waarde foe san Adam ben lasi gi ala hem bakaten-pikin nanga hem espresi sondoe ini Eden (Hebr. 2:9, 14, 15; Johannes 1:14). Soleki Jehovah Gado e gebroiki Jezus Kristus „Soemapikin” ini na gi foe libi na a libisoema-famiri di habi strafoe en e dede, na so a de na reti soema gi Jehovah foe gebroiki ini na kroetoe foe na libisoema-famiri di ben bai fri.
20. Ini Johannes 5:26, 27, san Jezus ben taki foe na makti foe doe kroetoewroko en fa Paulus ben poti krakti tapoe dati ini hem Iezing tapoe na pikin bergi Mars?
20 Akroederi nanga na sani disi, Jezus ben go moro fara foe taki: „So a (na Tata) ben gi pasi na a Pikin foe habi libi ini hem srefi. En a ben gi hem makti foe doe kroetoewroko, bikasi Soemapikin a de” (Joh. 5:26, 27). Bikasi na glori Jezus Kristus now ben de wan tron hemsrefi wan man na mindri na bidrigi grontapoe seti foe sani, a kan de wan kroetoebakra di sa habi èn sari-ati èn retifasi gi dem di a ben bai fri foe dede. Na sani disi ben poti krin na fesi foe na moro hee kroetoe skin ini owroe Athene, Grikikondre, di na apostel Paulus ben tanapoe mindri dem kroetoebakra tapoe na pikin bergi Mars en a ben taki: „Hem (na Gado di dem no ben sabi) ben poti wan dee pe a habi ini prakseri foe kroetoe na grontapoe pe libisoema e libi ini retidoe nanga jepi foe wan man di a ben poti, en a ben gi wan djaranti na ala soema foe di a ben opo hem baka foe dede.” — Tori foe dem Apostel 17:23, 31.