Yesus e taki wan sani di e meki furu sma skreki

Na ini wan snoga na ini Kaperna-um, Yesus e leri sma taki en na a tru brede di komoto fu hemel. Den sma di ben drai kon baka fu na owstusei fu a Se fu Galilea èn di Yesus ben gi brede nanga fisi fu nyan, ben de drape tu. Soleki fa a sori, dan Yesus e taki go doro fu den sani di a ben leri den sma disi.

A e taki: „Den afo fu unu ben nyan a mana na ini a sabana, ma toku den dede.” Ma dan a e taki: „Mi na a brede di e gi libi èn di saka komoto fu hemel. Efu wan sma e nyan a brede disi, dan a o libi fu têgo. Iya, a brede na mi skin di mi o gi, so taki grontapu kan kisi libi.”​—Yohanes 6:48-51.

Na a Paskafesa fu a yari 30, Yesus ben taigi Nikodeimus taki Gado ben lobi grontapu so te, taki a seni en Manpikin fu frulusu libisma. Now Yesus e taigi den sma taki den musu nyan en skin. Disi wani taki dati den musu sori bribi na ini a ofrandi di a o tyari. Na so den o kisi têgo libi.

Ma den sma no e agri nanga a sani di Yesus taki. Den e aksi: „Fa a man disi kan gi wi en skin fu nyan?” (Yohanes 6:52) Yesus wani meki den frustan taki a e taki na agersi fasi. Disi de krin fu si te wi e luku san a e taki moro fara:

„Efu unu no e nyan a skin fu a Manpikin fu libisma èn unu no e dringi en brudu, dan unu no abi libi na ini unsrefi. A sma di e nyan mi skin èn di e dringi mi brudu o kisi têgo libi,  . . bika mi skin na a trutru nyanyan èn mi brudu na a trutru dringi. A sma di e nyan mi skin èn di e dringi mi brudu, e tan de wán nanga mi.”​—Yohanes 6:53-56.

Prakseri fa den Dyu ati bron di Yesus taki a sani dati! Kande den e denki taki Yesus e taigi den fu nyan libisma meti, noso fu pasa a Wet fu Gado di e taki dati sma no mag nyan brudu (Genesis 9:4; Lefitikus 17:10, 11). Ma Yesus no e taki dati sma musu nyan en trutru skin noso taki den musu dringi en trutru brudu. A e sori den taki ala sma di wani kisi têgo libi musu poti bribi na ini a ofrandi di a o tyari. Na ofrandi dati na en libisma skin di no abi sondu èn a brudu fu en di o lon fu a bun fu libisma. Ma srefi furu fu den disipel fu en no e frustan san a wani leri den. Sonwan fu den e taki: „A sani di a taki e gi groskin. Suma kan tan arki den sani disi?”​—Yohanes 6:60.

Fu di Yesus e si taki sonwan fu den disipel fu en e krutukrutu, meki a e aksi den: „Unu e mandi fu a sani disi? We, san unu o du dan, te unu o si a Manpikin fu libisma e opo go na a presi pe a ben de fosi? . . . Den sani di mi taigi unu, komopo fu a yeye èn den e gi libi. Ma sonwan fu unu no e bribi.” A sani dati e meki taki furu disipel e gowe èn den no e waka moro na en baka.​—Yohanes 6:61-64.

Now Yesus e aksi den 12 apostel fu en a sani disi: „Unu no wani gowe tu?” Petrus e piki: „Masra, na suma wi musu go? Yu abi wortu di e gi sma têgo libi. Wi e bribi èn wi kon sabi taki yu na a Santawan fu Gado” (Yohanes 6:67-69). Disi na wan moi sani di Petrus taki! Aladi en nanga den tra apostel no e frustan krin san Yesus taki, toku den e tan horibaka gi en.

Aladi Yesus breiti nanga san Petrus taigi en, toku a e taki: „Mi teki unu twarfu, a no so? Ma wan fu unu na wan ogri-ati leiman” (Yohanes 6:70). Yesus e taki fu Yudas Iskariot. A kan taki a e si now taki Yudas e bigin meki den sondu firi fu en abi krakti na en tapu.

Toku Yesus breiti fu si taki Petrus nanga den tra apostel o tan waka na en baka èn taki den o tan wroko makandra nanga en fu yepi sma fu kisi têgo libi.