Jezus en libi nanga diniwroko

Njoen wondroe na ini Kapernaüm

TAPOE na sabbat baka di Jezus ben gi a kari na en fosi fo discipel, Petrus, Andréas, Jakobus nanga Johannes, dan den alamala e go na ini na djoe kerki na ini Kapernaüm. Na drape Jezus e bigin gi leri, èn den sma e ferwondroe foe di ai gi den leri leki wan sma di abi makti èn no leki den meester foe wèt.

Na a sabbat disi wan man de drape di wan ogrijeje de na en tapoe. Baka wan pisten a e bari tranga: „San wi abi foe doe nanga joe, Jezus, joe di de wan sma foe Nazareth? Joe kon foe kiri kiri wi? Mi sabi precies soema joe de: na Santawan foe Gado.”

Te joe loekoe en boen dan na ogri-jeje di abi na man ini en makti de wan foe den engel foe Satan. Jezus e strafoe na ogrijeje èn e taki: „Tapoe joe mofo, èn komoto na a man tapoe!”

We, na ogrijeje e meki a man stoipi èn e bari nanga ala makti. Ma ai gwe libi a man sondro foe gi en mankeri. Ala sma tanapoe e ferwondroe! „San na disi?” So den e aksi. „Srefi den doti jeje a e komanderi tapoe wan makti fasi èn den e gi jesi na en.” Na njoensoe foe disi e panja ensrefi na a heri kontren.

Efoe Jezus nanga en discipel e gwe libi na djoe kerki, dan den e go na na oso foe Simon, ofoe di nen ooktoe Petrus. Drape na wefi mama foe Petrus e siki tranga èn a de nanga hebi korsoe na ini bedi. ’Jepi en grantangi’, den e aksi. Foe dat’ede Jezus e go na en, e hori en na en anoe èn e opo en. Wanslag ai kon betre èn ai go meki wan njan klari gi den.

Bakaten, baka te son dongo, den sma e kon foe alasé nanga den sikiman foe den na na oso foe Petrus. Te foe joe denki na heri foto de a fesi a doro! Èn Jezus e dresi ala den sikiman foe den, sortoe siki den abi ooktoe. A e meki srefi den sma kon fri di ogrijeje de tapoe den. Te den ogrijeje di ai poeroe a tapoe den sma, e hari komoto foe den sma, den e bari taki: „Joe de a Manpikin foe Gado.” Ma Jezus e strafoe den èn no e gi den pasi foe taki, foe di den sabi dati en de a Kristus. Markus 1:21-34; Lukas 4:31-41; Mattéus 8:14-17.

◆ San e psa na ini a djoe kerki na a sabbat baka di Jezus ben gi a kari na en fo discipel?

◆ Pe Jezus e go efoe a libi a djoe kerki èn sortoe wondroe ai doe drape?

◆ San e psa bakaten tapoe a srefi dé?

[Wan prenki di e tapoe heri bladzijde 12]