Hori na waarheid hé na ini wan goddelowsoe grontapoe
„Joe wortoe de waarheid.” — JOHANNES 17:17.
1. (a) Oten èn fa na waarheid ben tron wan stré? (b) Sortoe toemsi gran njoen waarheid ben meki bekènti na ini Eden?
NA WAARHEID de boen langaten kaba wan sani foe stré! Na stré disi, di de so owroe leki na historia foe libisma, ben kon na fesi kaba na ini Eden, di na fosi Sneki ben tjari na waarheidgetrowfasi foe na Soeverein Masra Jehovah kon na ini degedege. Na ondro kori den fosi papa nanga mama foe wi ben teki na bosroiti foe go denki onafhankelek èn foe go waka den ègi gridipasi. Den no ben de sma di ben kibri den soifri-retifasi èn di ben hori na waarheid hé. Ma na drape Gado ben meki na moro moiwan foe ala njoen waarheid bekènti, dati wani taki dati wan Kownoekondre „siri” ben sa kon foe broko den wroko foe Didibri. — Gen. 3:1-6, 14, 15.
2. (a) Fa sma ben fadon kon feti nanga na waarheid ini na grontapoe bifo na Froedoe (b) Foe san-ede Noach nanga en osofamiri ben feni boenati na ini na ai foe Jehovah?
2 Sma ben djompo kon now foe feti na waarheid. Na gran bidrigiman ben kisi na jepi foe tra oproeroe jeje manpikin foe Gado foe meki na grontapoe go ini pori. Na hoeroedoe geslagti foe bifo na Froedoe ben gi densrefi abra krinkrin na ini ’doe foe den sani di densrefi ben abi prisiri na ini’, sodati den ben misi foe teki na waarheid na ati di Gado ben meki sma jere nanga jepi foe Noach. Den ben lasi den libi. Ma Noach nanga en osofamiri ben tan na libi bikasi foe na sondro fowtoe soifri-retifasi foe den. Di den fesiman disi foe waarheid ben komoto foe na ark foe ferloesoe kon na doro, dan na fosi prakseri foe den ben de foe tjari gi Jehovah tangi-ofrandi — wan switi smeri di e meki Jehovah firi korostoe. — Gen. 6:4-12; 8:18-21; Lukas 17:26, 27; 2 Petrus 2:5.
Den pori bakapisi foe san no de waarheid
3. San na Babylon a Bigiwan, èn fa a doe kon?
3 Tokoe na owroe Sneki, Didibri, ben go doro nanga en moeiti foe troeboe den waarheid watra. Sondro degedege a ben de so dati Satan ben de na poesoe krakti baka na bow foe na owroe Babylon. Den „kibri tori foe Babylon” ben tron na fondamenti foe falsi fasi foe anbegi, di Openbaring 17:5 e skrifi foe en leki „Babylon a Bigiwan, na mama foe den hoeroe èn foe den tégoe sani foe grontapoe”. „Babylon na Bigiwan” di de na ini foeroe pisi, nanga den sektaris leri foe den di de kontrari makandra, den tan de te nanga a dé foe tide leki wan boen bigi watra baki foe kerki falsi leri. — Genesis 10:8-10; Jeremia 51:6.
4. Fa Jezus ben hori na waarheid hé, èn nanga sortoe bakapisi?
4 Di Jezus ben de na grontapoe, dan nanga dek’ati a ben hori na waarheid hé. A ben taki nanga den kerki hoigriman foe en ten nanga den wortoe: „Oenoe komoto foe oen tata Didibri . . . a no ben tanapoe faste na ini waarheid, bika waarheid no de na ini en.” Ooktoe na wan tra okasi Jezus leki na „siri” foe na pramisi di den ben taki foe en na fesi taki a o kon, ben poti krakti tapoe na prensparifasi foe na waarheid di a ben taigi Pontius Pilatus: „Joesrefi e taki dati mi tron kownoe. Na foe dati mi ben kon gebore èn na foe dati mi ben kon na grontapoe foe gi kotoigi foe na waarheid.” Jezus ben gi en libisma libi na ini a stré foe hori na waarheid hé — na Kownoekondre waarheid. — Johannes 8:44; 18:37; Genesis 3:2-5.
5, 6. (a) Fa Satan ben tan stré nanga na waarheid? (b) Sortoe doti ben de a bakapisi èn sortoe lé ben komoto foe dati? (c) Foe san-ede wi sa wani foe de faja fetiman foe na waarheid?
5 Sani di no de waarheid e go anoe ini anoe nanga kroektoedoe. Foe dat’meki a no de wan froewondroe sani dati Satan na ini na alaten stré foe en tége na waarheid, ben meki wan klasse foe kerki leriman ben doe kon, di ini 2 Thessalonika 2:3 den e taki foe den leki „na sma foe kroektoedoe”. Baka na dede foe den apostel foe Jezus Kristus den kroektoedoe sma disi di ben fadon komoto na bribi ben opo densrefi poti tapoe den leken (kerki sma) èn den ben doti na soifri kristen leri foedi den smelter disi makandra nanga „kibri tori foe Babylon” èn Griki filosofie, spesroetoe na theorie foe Plato dati na libisma sili no e dede.
6 Na lé disi ben poti na fondamenti gi tra lé, soleki „ala boen sma e go na hemel”, ’den sma di no ben libi so boen, e go na vagevuur’ èn ’den takroe sma den e losi foe tégo na ini wan hèl foe pina’. Foedi na ini na grontapoe makti foe a Babylon fasi foe anbegi someni fowtoe leri de, meki wi kan de toemsi prisiri dati Jezus ben gi na pramisi di e kon now: „Efoe oen tan na ini mi wortoe, dan oen de troetroe mi discipel, dan oenoe sa sabi na waarheid èn na waarheid sa meki oen kon fri”! Wi moe wani séker foe de faja fetiman gi na waarheid di e gi joe fri. — Johannes 8:31, 32.
Wan bigi lé e meki
7. (a) San na a marki foe Satan di a poti na en fesi, èn fa a e proeberi foe meki a kon troe? (b) Sortoe falsi leri ben kon na fesi na ini a di foe tinanégi jarhondro?
7 Ma Didibri no e libi nowan sani a dorosé foe stré nanga na waarheid. Ai meki en atibron srefsrefi efoe wan sma e poti pikinso bribi na ini a Wortoe foe Gado foe waarheid, na bijbel. Na prakseri foe en de, ’foe breni na jeje foe den sma di no e bribi sodati den no ben sa leri sabi na boen njoensoe foe Kristus’. Didibri ben poti leki na marki na en fesi foe gi na waarheid por’nen, no wawan foedi a sorgoe dati na „sma foe kroektoedoe” foe na kristenheid doe moeiti foe poti falsi kerkileri na ini na bijbel, ma ooktoe foedi den taki dati na bijbel gron na tapoe anansitori. Foe dat’ede meki na owroe Sneki na ini a di foe tinanégi jarhondro ben meki ete wan falsi èn bidrigi leri. Disi den e kari na evolutie theorie. — 2 Korinte 4:4.
8. San na theorie foe Darwin wani taki?
8 Na ini 1859, di na bijbel „ten foe a kaba” bon e kon krosbé, Charles Darwin tjari en boekoe kon a doro di ben nen The Origen of Species (Fa den sortoe doe kon). (Daniël 12:4). Darwin ben tak-go-tak-kon dati sani di abi libi a no Gado ben meki den ma na presi foe dati ben evolueer foe fosten vorm foe libi nanga jepi foe ’natuurleke selektie (a tan na libi foe den moro boen wan) leki wan bakapisi foe na stré foe tan a libi’. Te foe kaba na libisma ben evolueer komoto foe wan sortoe keskesi di gersi libisma. Darwin ben taki dati a ben de wan afersi foe „a tan na libi foe den moro boen wan”.
9. (a) Sortoe bijbel waarheid di Jezus ben leri ben sa de sondro wanenkri betékenis efoe evolutie ben de wan troe tori? (b) Fa na hypothese foe Darwin foe na „tan na libi foe den moro boenwan” ben doe a libisma-famiri ogri?
9 Na theorie disi wani foe taki dati tapoe wan grofoe fasi a ben poti na bijbeltori foe a meki di Gado meki sani èn a fadon di libisma fadon ini sondoe a wan sé. Nanga disi dan na ferloesoe-ofrandi foe Jezus èn den bijbelleri foe na Kownoekondre, na opobaka, tégo libi èn wan paradijs grontapoe no ben sa wani taki noti-noti. Boiti foe dati, na evolutie theorie, efoe a ben de troe ben sa poeroe ibri moreel frantwortoe tapoe libisma di a ben abi na fesi foe na Mekiman.a Foedi na stelling foe na „tan a libi foe den moro boen wan” ben kon na fesi, meki na theorie sondro degedege ben poti na fundamenti dati na Marxisme, Facisme èn tra ideologie ben kan teki roetoe.b Den sma di de fesiman foe na evolutie foe wan bigi pisi moe tjari na frantwortoe foe foeroe foe den godelowsoefasi èn na pina di de te tide na ini na grontapoe. — Psalm 14:1-4.
Fesiman foe lé
10. Fa den kerkileriman te joe loekoe na fasi fa den ben de nanga Darwin, ben sori taki den de fesiman foe lé?
10 Den kerki fesiman na ini na ten foe Darwin ben stré sori taki na theorie foe en e afrontoe Gado? Leki wan ferwondroe sani wan héleriman na a héskoro foe Cambridge ben skrifi: „Na ini a bigin dan foeroe foe na gens tége na theorie foe Darwin ben kon foe na sé foe den sma di ben e beoefen natuur-wetenschap tapoe na gron foe bewijsi, no foe na sé foe den theoloog tapoe a gron foe a bijbel.” Wan tra héleriman e taki disi moro fara: „Wantoe nomo no de na ini, noso ala kristen denkiman di e teki fesi na ini Bigi-Brittanië nanga Amerkankondre ben agri esesi kaba nanga a Darwinisme (na leri foe Darwin èn na evolutie theorie.” Na ini 1882 den ben beri Darwin srefi na mindri foe kownoe na ini na Westminster Abbey, akroederi wan spesroetoe sani di ben seti nanga na Anglicaanse deken foe na Abdei Kerki dati! — Teki gersi nanga Tori foe den Apostel 20:30; 2 Timotéus 4:3.
11. San den kerkileriman ben taki foe na atheïstis theorie foe Darwin?
11 Nownow foeroe kerkileriman foe na kristenheid e teki na atheïstis theorie foe Darwin leki ’evangelie waarheid’. Na moro prenspari bisschop foe York, di de a wan baka a moro hé kerki-edeman foe na Anglicaans kerki, e si na theorie foe biologis evolutie nanga so boen bewijsi dati a de „na wan enkri fondamenti di joe kan prakseri gi na disiten biologie”. No langa psa kaba dan twarfoe héleriman di ben teki a presi foe na moro hé wetenschappelek college foe na Katholiek kerki na tapoe wan komakandra na ini na Vaticaan ben taki: „Wi abi na overtoigi dati nanga na boen foeroe bewijsi di de meki sma no kan degedege na a gebroiki foe na evolutie prakseri tapoe libisma èn tra keskesi nanga afoe keskesi.” Èn na New Catholic Encyclopedia e taki more fara: „Algemene evolutie, srefi foe na skin foe libisma, gersi taki a de a moro séker wetenschappelek ferklari foe a fasi fa [ala fasi foe libi] ben doe kon.” Ma evolutie de troetroe wetenschappelek? Wetenschappelek bewijsi di joe kan fertrow na tapoe e hori baka gi na theorie? Noti moro mendri leki joe libi e anga foe sabi na waarheid na ini na afersi disi. — Johannes 14:6; 16:13; 17:17.
12. Foe san-ede wi moe taki dati na creationisme de wan sani di no abi en gron tapoe na bijbel èn di joe no kan bribi?
12 Ini den ten di no psa solanga ete dan son fundamentalistis fasi foe bribi ben poesoe na creationisme kon a fesi leki a piki tapoe na evoltitie. Ma foedi den e gi na piki disi, meki den e taki wan sani di no e akroederi nanga a bijbel èn no de foe joe kan bribi, dati wani taki, na hemel, na grontapoe èn ala sani di de na grontapoe, Gado ben meki ini siksi dé di ben de ibriwan 24 joeroe — ija, na ini soso 144 letterlek joeroe! A leri disi ben tjari foeroe sma go sofara foe spotoe nanga a bijbel. Ma wan „dé” na ini a bijbel langa alaten 24 joeroe? Na ini Genesis 2:4 den e taki foe „na dé di Jehovah Gado ben meki grontapoe nanga hemel.” Na wan dé disi abi na ini en ala siksi meki dé foe Genesis kapitel 1. Soleki fa na wortoe „dé” e gebroiki na ini a bijbel, dan a de eenvoudig wan skotoe pisiten. Wan „dé” na Jehovah kan de doesoen jari ofoe difrenti doesoen jari — soleki ben de nanga den meki ’dé’. Tapoe na punt disi na bijbeltori de foe dat’ede rédelek èn na ini akroederi nanga troe wetenschap. — 2 Petrus 3:8.
Na bigin foe na libi
13. (a) Fa den fesiman foe na evolutie theorie e ferklari na bigin foe na libi? (b) Foe san-ede a de wan lafoe sani foe taki dati na libi cel ben meki ensrefi somaar?
13 Fa den fesiman foe na evolutie theorie e ferklari na troetroe bigin foe na libi? Den e taki dati na bigi se di e lontoe na grontapoe, kande wan toe miljardmiljard jari pasa kaba ben tron wan „organis soepoe”, ma ete sondro foe abi libi. Dan, so den e ferklari, ’nanga wan toemsi onwaarschijnlek sani di pasa somaar wan aparti molecule ben doe kon’. Leki nanga wan wondroe na molecule disi ben meki tra sortoe foe ensrefi èn na sofasi ben meki tra molecule di ben go fasi a densrefi èn ben tron wan libi cel. Wan tra sani de ete di de toemsi moro moi foe jere? Na skrifiman di e ferteri foe a sani disi ben ferteri na ini na fesiwortoe na ini en boekoe: „Na boekoe disi sma moe lési en te joe loekoe en boen leki science fiction (wan anansitori foe wetenschap).” Foetroe, wan anansitori, ma séker no wetenschap! Na tijdschrift National Geographic ben taki dati na geprogrammeerde instructie (na DNA) na ini wan pikin cel, „efoe joe ben sa moesoe skrifi den ini wan boekoe, a ben sa foeroe wán doesoen boekoe foe 600-bladzijde”. Fa a de wan lafoe sani foe taki dan dati na libi cel ben meki ensrefi somaar ini wan ofoe tra bigin soepoe!
14. Sortoe fondamenti bijbelleri wi moe hori hé leki fesiman foe na waarheid?
14 A de moro rédelek èn moro foe ferstan san a bijbel skrifiman David e ferklari na ini Psalm 36, den vers 5 nanga 9: „O Jehovah, . . . na joe na fonten foe libi de.” Leki sma di e hori na waarheid hé, wi moe tanapoe na baka na fondamenti bijbelleri. — Loekoe ooktoe Psalm 100:3; Jesaja 42:5, 8.
Evolutie di ben go safrisafri ofoe sani di meki wantewante
15. (a) Efoe evolutie ben de troe, fa na fossiel verslag (fossiel dati na den bonjo nanga tifi èn so moro fara di tan abra foe sani di ben de a libi) ben sa hori baka gi na theorie disi? (b) San na verslag e sori, san e gi krakti na sortoe sani di Darwin ben erken?
15 Ma a no ben sa kan dati, efoe wi bribi taki libi de, dati difrenti sortoe foe libi ben go safrisafri abra na ini tra sortoe? We, efoe disi ben psa, dan disi ben sa de foe si na ini na verslag foe den fossiel foe den hondrohondro jari di psa kaba. Ma dati de so? Loekoe pikinso na pisten di den e kari cambrium. Na ini na pisten disi foe a fositron èn alamala wantewante, fossiel foe ede-groepoe foe den meti di no abi bonjo e sori densrefi, ini wan spectaculair explosie foe vorm foe libi. Efoe ala den difrenti groepoe disi alamala ini wantron wantewante ben kon na libi, fa oiti dan den ben kan evolueer komoto a wan foe a trawan? Darwin srefi e piki fri taki: „Efoe a ben de troetroe so dati sontron foeroe sortoe . . . alamala wanten ben doe kon, dan disi ben sa wani taki na dedeslag gi na theorie foe na evolutie.” Na dedeslag foetroe! — 1 Korinte 3:19, 20.
16. (a) Fa na fossielen verslag, te joe loekoe a fasi fa den vorm foe libi ben kon, e sori na lé foe na evolutie theorie? (b) Fan na troetroe waarheid e tjari kon na fesi na ini Genesis 1:25?
16 Na fossiel verslag e sori dati difrenti èn boen foeroe moeiliki vorm foe libi wantewante ben sori densrefi èn ini na vorm di den ben de dorodoro. A de so leki fa wan héleriman na ini den natuur wetenschap ben taki: „Walvis, fremoesoe, asi, keskesi nanga afoe keskesi, asaw, hé, eekhoorn (denge) nanga somoro fara, e kenki alamala na ini a fosi sori di den sori densrefi net someni foe makandra leki now. Nowan enkri marki de foe wan gemeenschappelek papa ofoe mama, lastan wan schakel nanga wan ofoe tra sneki-sani, pe den ben sa gro komoto foe en leki fa sma e prakseri.” Fossiel de foe giraf nanga wan neki foe san na lanega foe a neki de twee derde ofoe dri kwart foe a langa foe a neki foe giraf di e libi now? Nono, den dati no de. Na waarheid de soleki tanapoe na ini Genesis 1:25: „Gado ben go abra foe meki den boesi-meti foe grontapoe akroederi a sortoe foe den èn osometi akroederi a sortoe foe den nanga ala den meti di e bewégi densrefi na grontapoe akroederi a sortoo foe den. Ne Gado ben si dati a ben boen.” Ija, heri boen!
17. Sortoe toemsi moi difrenti èn sortoe moi ontwerp de foe si a mindri den vorm foe libi, èn na soema wawan disi ben kan abi en bigin?
17 Loekoe pikinso ooktoe na span difrenti di de a mindri ala vorm foe libi dja a grontapoe! Na roos, na kaperka, na kortje, na paw èn den doesoendoesoen tra fasi foe libi ben kisi na aparti moifasi foe den somaar, ini wan feti foe a tan a libi foe den moro boen wan? Ofoe den de na kefarlek meesterwroko foe wan lobi Gado di wani dati na libismafamiri feni prisiri na ini en wroko? Te wi si na kefarlek fini moifasi di de alape foe si tapoe na moi grontapoe disi dan séker wi moe bari taki: „O foeroe den wroko foe joe de o Jehovah! Joe ben meki den alamala ini koni. Na grontapoe foeroe nanga den sani di joe meki.” — Psalm 104:24.
18. Foe san-ede joe ben sa taki dati na vogelbek-meti na soso Gado ben kan meki en?
18 Ontwerp e aksi alaten dati wan ontwerper de di abi ferstan. Èn wan kefarlek ferwondroe ontwerp de ini den libisani di de foe si. Loekoe pikinso na a vogelbek-meti, di e libi na ini Australië. A de so bigi leki wan konkoni, a abi wan skin leki wan watra dagoe, wan mofo leki di foe wan doksi, maka leki a maka foe wan kakafowroe foetoe èn foetoe di abi swenvlies nanga klaw. Ai meki eksi leki wan sneki èn e gi den pikin foe en njanjan leki wan meti di e gi den pikin foe en bobi. Ai firi ensrefi boen tapoe drégron èn na ondro watra. Foe sortoe sani na vogel-bek-meti ben evolueer? Foedi na meti disi soso na neti wawan e kon na doro, meki oen kan kari en na takroe neti-dren foe na evolutionistsma. Wan foe den bioloog di de na a Harvard Universiteit e ferteri foe en leki „wan toemsi boen mekisani di meki gi wan spesroetoe èn ongewoon libifasi”. Soema ben de a toemsi boen Mekiman? A kan de soso na Gado di e taki: „Na soema abi den boesmeti foe na boesi.” — Psalm 50:10.
19. (a) Sortoe kefarlek bigi sani na pikin blaka-ede singi fowroe e doe? (b) Fa a man doe disi?
19 San wi kan taki moro fara foe na instinct di de ini foeroe libi sani? Joe abi foe eksempre wan pikin feoroe, na blaka-ede singi fowroe, di e wegi sowan 20 gran. A sabi precies na joisti herfst weer foe fré foe Alaska go na Njoen Engeland na ini Amerkankondre. A e meki ensrefi kon fatoe foe di a e njan en bere foeroe foe boen njanjan èn ai wakti tapoe wan kowroe presi. Dan ai hari gwe, e fré na wan hé foe more leki 6000 meter foe kon na ini wan straalstroom foe winti èn ai go na a sé foe Afrika te leki wan winti di moro tranga drape e teki en go na en tanpresi na ini Zuid Amerika. Na sabi foe na blaka-ede singi fowroe de na ini en edetonton di bigi leki wan pesi. Na evolutionist kan ferklari fa sowan instinct doe kon? Nono. Ma na bijbel e sori na tapoe dati Jehovah de na moro koni „Mekiman foe hemel nanga grontapoe, foe na se èn foe ala sani di de na ini”, makandra nanga den mekisani di de „instinctief koni”. — Psalm 146:5, 6; Odo 30:24-28.
Joe de grantangi?
20. (a) San moe de na ferklari foe den wondroe di e lontoe wi? (b) Fa na lobi boenatifasi foe oen Mekiman gi wi e kon na fesi? (c) Fa wi moe doe leki sma di e hori na waarheid hé?
20 Na waarheid na ini na afersi disi de disi: Joe abi lontoe wi na ini hemel nanga grontapoe, so foeroe sani di de so switi, so praktis èn di e gi joe respeki, dati a meki foe sani nanga jepi foe wan lobi Almakti Ontwerper de na wanenkri ferklari di de! Fa na tapoe wan wondroefasi, na ondro normaal omstandigheid, den sani leki firi, jere, smeri, tesi, di Gado ben gi oenoe fiti na a natuurlek omgeving foe wi foe meki a libi foe oenoe switi! Fa tapoe wan bigifasi na lobi boenfasi foe wi Mekiman èn Gado e kon a fesi nanga na moi fasi te son e dongo di wi e si, den moi switi smeri bromki di wi e smeri, den switi froktoe di wi e tesi, na safoe winti di wi e firi èn na pokoe foe na boesi di wi e jere! (Psalm 136:1-6, 25, 26) Fa nanga wan tranga lostoe wi moe de foe sori na tangi foe wi foedi wi e hori na waarheid hé na ini na godelowsoe grontapoe disi! Ija, Gado „wortoe de waarheid”!
[Foetoewortoe]
a Teki gersi nanga den bijbel waarheid di Jezus ben leri na ini Openbaring 4:11; Mattéus 19:4; Lukas 24:46, 47; Mattéus 20:28; 6:10; Johannes 5:28, 29; 17:3; Lukas 23:43.
b Karl Marx ben taki: „Na boekoe foe Darwin de toemsi prenspari èn de leki wan fondamenti gi wi foe na stré a mindri den klasse na ini na kristenheid.”
San joe ben sa piki foe opo taki gi na waarheid?
◻ Fa na waarheid tron wan stré?
◻ Fa na bijbel waarheid e poeroe falsi leri foe Babylon kon na doro?
◻ Fa wawan na bigin foe na libi èn den difrenti sortoe foe libi kan ferklari?
◻ San e kon na krin nanga na ontwerp di de foe si na ini ala vorm foe libi?
◻ Fa wi kan taki wi Mekiman tangi?
[Prenki na tapoe bladzijde 2]
Jezus ben taki krin gi féanti foe na waarheid: „Oen komoto foe oen Tata na Didibri”.
[Prenki na tapoe bladzijde 3]
Charles Darwin — Fesiman foe a theorie foe keskesi di tron libisma
[Prenki na tapoe bladzijde 4]
Na Anglicaans Kerki ben beri Darwin na ini na Westminster Abbey
[Sma di abi a reti foe a prenki na tapoe bladzijde 5]
U.S. Fish & Wildlife Service