Jehovah — Na Gado foe ten nanga pisten
„Gi alasani wan faste ten de.” — PRÉKIMAN 3:1.
1, 2. (a) Na sortoe fasi sma e hori ten na prakseri? (b) Fa foeroe foe na libi na ini a ten disi ben sa de efoe oen no ben abi na mogelekheid foe ben kan sabi o lati a de?
NA INI na aladé libi wi e prakseri ten srefsrefi. Efoe foe eksempre na oloisi e sori dati a de neti, èn wi e si a son e dongo èn a loktoe e kon moro doengroe, dan wi sabi taki neti e doro. A so ooktoe ini bepaalde pisi foe na Grontapoe, te a kalender e sori dati na herfst e kon a wan kaba èn wi e si wiki baka wiki fa a e kowroe moro nanga moro èn den wiwiri e fadon foe den bon, dan wi sabi séker dati winter de krosbé. Den marki di e sori o lati a de ofoe na ini sortoe pisi foe na jari wi e libi, soboen e ferteri san na oloisi nanga na kalender e taigi wi.
2 Efoe wi no ben sa man foe sabi ten nanga pisiten, dan foeroe sani foe a libi na ini a ten disi ben sa de toemsi broeja, e go srefi na wan libi pe no wan sma e hori ensrefi moro na wèt. Denki pikinso na den hondrohondro opolani di e proberi foe saka na tapoe wan druk opolanigron efoe wan ten foe den opolani saka no ben seti, foedi na no wan fasi sma kan kon sabi o lati a de! Ofoe prakseri den miljoenmiljoen sma di e proberi foe kon biten na den wroko efoe den no ben kan sabi o lati a de!
3. Soema ben poti ten nanga pisten?
3 Soema ben poti den ten nanga den pisten? A de na Mekiman foe hemel nanga grontapoe, Jehovah Gado. Genesis 1:14 e taki: „Moro fara Gado ben taki: ’Dati hemelleti kon na a tenti foe na hemel foe meki wan prati kon a mindri na dé nanga na neti; èn den moe dini leki marki èn foe bepaal pisten nanga dé nanga jari.’”
Prenspari ten nanga pisten
4-6. (a) San de moro prenspari leki foe kon sabi ten nanga pisten foe a doe foe activiteit foe libisma? Foe san-ede? (b) Sortoe aksi wi moe aksi wi srefi?
4 Ma aladi foe na sé foe libisma activiteit a de prenspari foe sabi na ten èn na pisten, tokoe a de so dati prenspari sani de ete: Sortoe ten ofoe pisten a de te wi loekoe en foe a sé foe Gado? Prékiman 3:1 e taki: „Gi ala sani wan faste ten de, ija, wan ten gi ibri afersi na ondro hemel.” Èn aladi disi de troe te wi loekoe en foe a sé foe libisma, dan te wi loekoe en foe a sé foe a Mekiman dan a de moro troe srefi. En poti faste ten nanga pisten foe meki en prakseri kontroe. Efoe wi no e tjari wi libi ini akroederi nanga disi, dan ala sani san wi ben doe foe seti na libi nanga oloisi ofoe kalender, e tron wan soso sani.
5 Foe san-ede disi de so? Foedi Jehovah abi wan prakseri nanga na grontapoe disi èn nanga den libisma mekisani di e libi a tapoe, noso a no ben sa meki den. Efoe wi no seti wi libi akroederi a prakseri dati, dan den no sa teki wi poti na ini. Èn en prakseri séker sa kontroe precies tapoe a joisti ten. A e ferklari: „Na so mi Wortoe sa de di komoto foe mi mofo. A no sa drai kon na mi sondro bakapisi, ma séker a sa doe san e plisi mi èn séker a sa waka boen na ini den sani foe san mi ben seni en go.” — Jesaja 55:11.
6 Foe dat’ede wi moe aksi den aksi di e kon now: Sortoe ten ofoe pisten a de te joe loekoe en foe a sé foe Gado? Fa den naatsi nanga pipel foe na grontapoe disi e fiti na ini en ten-schema? Ija, fa joe e fiti na ini disi? Joe ben tjari joe libi kon na ini akroederi nanga na ten-schema foe Gado?
Na grontapoe disi e meki na prakseri foe Gado kontroe?
7. San de a fasi fa a moro bigi pisi foe sma di e bribi na ini Gado de, ma foe san-ede disi no abi wan fundamenti
7 Foeroe sma e denki taki den abi wan presi na ini na prakseri foe Gado foedi den e taki dati den e bribi naini Gado. Ma efoe joe e aksi den foe sori joe nanga jepi foe Gado ègi wortoe san na prakseri dati de, dan den no man doe dati. Den e waka den égi pasi, ma den e denki tokoe dati Gado sa sori en boen-ati tapoe wan ofoe tra fasi gi den. A moro bifi pisi foe den grontapoe tiriman na ini den hondrohondro jari di pasa èn te now ete, ben sori wan srefi sortoe fasi. Den abi na méne dati Gado e tjari en prakseri kontroe nanga jepi foe den, awinsi fa a doe foe den de toe. Ma ooktoe den no sabi foe ferteri san na prakseri dati de.
8. Foe san-ede a de wan onrédelek sani foe den, dati a Mekiman e gi den tiriman nanga den sma foe na grontapoe disi en steun?
8 Na ini na bijbel e kon na krin, dati Gado e gi a steun foe en na a grontapoe disi, èn ooktoe den tiriman nanga pipel di abi wan fasi foe bribi? We, go prakseri disi pikinso: A makti foe Gado de absoluut wan sani di e gi vréde. A ben meki na universum nanga miljardmiljard merkipasi-sistema, di ibriwan foe den e teri miljardmiljard stari. Èn boiti na krakti dati, dan Gado abi sabi nanga koni, di no abi marki (Psalm 147:4). Boiti foe dati, Gado abi koni di no de foe marki. Efoe Gado now, nanga en makti nanga koni ben gi en steun na den naatsi foe na grontapoe disi, dan den ben sa ondrofeni someni ogri di e doe na tra sma, oorlog, kroektoedoe nanga pina? Gado ben sa gi nationaal tiriman nanga miljoenmiljoen sma di de na den ondro komando foe hari go feti foe kiri tra nationaal tiriman nanga miljoenmiljoen sma di de na den ondro, aladi den ooktoe e taki dati na Gado e tjari den? Dati de rédelek?
9. Leki fa a Wortoe foe Gado taki, dan fa a jeje toestand foe en troe dienstknegti moe de?
9 Na bijbel e ferteri wi na ini 1 Korinte 14:33 dati Gado „no de wan Gado foe broeja, ma foe vréde”. Moro fara Jehovah e komanderi den sma di de troetroe en pipel, „dati oenoe alamala moe taki na ini akroederi nanga makandra èn dati pratifasi no moe den a oen mindri, ma dati oenoe de krosbé na ini wan-fasi na ini na srefi jeje èn na ini na srefi fasi foe denki” (1 Korinte 1:10). Èn efoe wan sma foe na pipel foe Gado no e fiti ensrefi na a markitiki disi, dan san dan? Romeini 16:17 e gi na rai: „Hori den na prakseri . . . di kontrari nanga na leri di oen ben kisi, e meki pratfasi kon . . . , èn tan farawe foe den.” Nationaal nanga kerkipratifasi nanga stré a mindri tiriman nanga pipel de soboen krin bewijsi dati den no abi na steun foe Gado.
10, 11. Sortoe tekst e sori soema e steun den tiriman nanga pipel foe a grontapoe disi?
10 Soema e steun den troetroe? 1 Johannes 3:10-12 e taki: „Nanga disi den pikin foe Gado nanga den pikin foe Didibri de foe sabi: Ibri sma di no e doe regtvaardikifasi no e komoto foe Gado, èn ooktoe en di no lobi en brada. Bika disi de na boskopoe di oenoe ben jere sensi a bigin, dati wi moe abi lobi gi makandra; no so leki Kaïn, di ben komoto foe na godelowsoewan èn ben kiri en brada.” Moro fara wi e lési na ini 1 Johannes kapitel 4:20: „Efoe wan sma e taki: ’Mi lobi Gado’ èn tokoe abi ogri-ati gi en brada, a de wan léman. Bika a sma di no lobi en brada, di a ben si no kan lobi Gado, di a no ben si.” Jezus ben poti foe dat’ede ooktoe na ini Johannes 13:35 na régel di e kon now: „Nanga disi ala sma sa sabi dati oenoe de mi discipel, efoe oen abi lobi gi makandra.”
11 Joe e si wan akroederi na mindri na lobi nanga na wánfasi di moesoe de a mindri den dienstknegti foe Gado èn na sani di grontapoe tiriman nanga den sma ini algemeen ben sori hondrohondro jari kaba? Soso ini wi jarhondro kaba ben aksi tintin miljoen sma libi. Foeroetron den sma di e kiri makandra de foe a srefi fasi foe bribi! Dati de a séker bewijsi, dati Gado no e hori baka gi den. Na presi foe dati na Wortoe foe Gado e sori dati na sma di e steun den no de nowan tra sma moro leki Satan Didibri. Foe dat’ede na apostel Johannes ben kan taki: „Wi sabi dati wi komoto foe Gado, ma na heri grontapoe didon na ini na makti foe na godelowsoewan” (1 Johannes 5:19). Ija, Satan Didibl de „na gado foe na seti foe sani disi” (2 Korinte 4:4). En de na makti baka den tiriman nanga pipel foe na grontapoe disi, bika nanga na doe foe den sma disi foe na grontapoe disi e kon a krin dati den no kan komoto foe Gado.
Na prakseri foe Gado nanga safri-ati sma
12, 13. San na a prakseri foe Gado nanga en grontapoe disi èn nanga na grontapoe disi èn nanga libisma?
12 Ma di Jehovah ben meki libisma, a ben abi na prakseri dati na heri grontapoe ben sa tron wan paradijs leki a djari foe Eden, foeroe nanga volmaakti sma, di de na ini wanfasi, èn kolokoe (Genesis 1:26-28; 2:15; Jesaja 45:10). Sma di ben opo densrefi èn godelowsoe jeje mekisani no ben meki na prakseri dati no kontroe. Ooktoe foedi Gado de wan Gado foe ten nanga pisten, a sa meki en prakseri kontroe tapoe na ten nanga na pisten di a ben poti kaba foe dati. A no sa meki na libisma tirimakti di e wroko sondro en tan moro langa leki a ten di a ben poti foe wroko kontrari en prakseri.
13 Jezus ben abi fertrow dorodoro na ini a prakseri foe Jehovah gi na grontapoe disi. A ben taki gi na ogri man di ben sori bribi na ini en: „Joe sa de nanga mi na ini paradijs” (Lukas 23:43). Dati ben de na grontapoe paradijs di moe kon. Na wan okasi na fesi Jezus ben taki: „Kolokoe den safri-ati sma de, bika den sa kisi na grontapoe leki den goedoe” (Mattéus 5:5). Djaso Jezus kande séker ben e sori tapoe na prakseri ini Psalm 37:29, pe tanapoe: „Den regtvaardikiwan, den dati sa abi na grontapoe leki den goedoe èn den sa tan a tapoe foe tégo.”
14. Sortoe sma sa kisi na grontapoe leki goedoe?
14 Soema de den sma di sa kisi na grontapoe leki goedoe? Psalm 37:34 e taki: „Howpoe tapoe Jehovah èn hori en pasi, èn en sa hé joe foe teki na grontapoe leki goedoe. Te den godelowsoesma e koti poeroe, joe sa si en.” Den vers 37 nanga 38 e taki moro fara: „Loekoe na a wan di de sondro fowtoe èn hori na opregtiwan na ini ai, bika na tamara foe na man dati sa de wan foe vréde. Ma den sondari, den dati séker den sa wai poeroe makandra; na tamara foe den godelowsoe foetroe sa koti poeroe”. Soboen den sma di sa abi na grontapoe leki goedoe, moesoe leri sabi Jehovah, moesoe bribi en pramisi, èn a moe si den leki opregti èn sondro fowtoo, foedi den e gi jesi na en wèt. Soleki 1 Johannes 2:17 e taki en: „Grontapoe e pasa gowe èn ooktoe en lostoe, ma a sma di e doe a wani foe Gado, e tan foe tégo.”
15. Sortoe toemsi prenspari kenki moesoe kon, efoe bigi èn boen kenki kan feni presi na grontapoe?
15 Ma efoe den sortoe kenki disi moe feni presi, dan wan kefarlek bigi kenki moe kon ini ala situwasi di de now. A sa wani taki na poeroe na pasi foe den disten tirimakti, foedi libisma tirimakti noiti ben tjari fasi foe libi kon di ala sma ben wani sote. Ma den kenki disi di sa seki grontapoe de ini na makti foe Jehovah. Loekoe foe eksempre san na bijbel e taki: „En e kenki ten nanga pisten, e poeroe kownoe foe a troon èn e poti kownoe tapoe a troon.” — Daniël 2:21.
Gensman poeroe a pasi
16, 17. (a) Fa Jehovah ben doe nanga Farao di ben gens en prakseri? (b) Fa na proféti wortoe foe Jehovah ben kon reti?
16 Loekoe pikinso san Jehovah ben doe na ini a ten di pasa nanga makti tiriman nanga famirilin foe tiriman, spesroetoe nanga den wan di ben proberi foe gens en prakseri. Den sortoe tiriman dati den maskaderi èn panja leki noti moro leki stof ini na winti, èn ooktoe den grontapoe makti foe den. Foe eksempre joe ben abi na Farao foe Egypte di ben hori a pipel foe Gado na ini katibo. Ma Jehovah ben abi wan prakseri nanga en dienstknegti èn ben seni Mozes go foe taigi Farao dati a ben moe meki en pipel go ini fri. Ma na presi foe dati, Farao ben taki na wan asranti fasi: „Soema na Jehovah, sodati mi ben sa gi jesi na en sten?” A ben taki moro fara: „Mi no sabi Jehovah kwetkweti, èn tapoe disi e kon ete taki mi no sa seni Israël gwe.” — Exodus 5:2.
17 Jehovah ben gi Farao ala okasi foe kon tapoe tra prakseri. Ma alaten baka, soleki Exodus 11:10 e taki, Farao „ben tranga en ati”. Ma Jehovah de wan sma di abi krakti di nowan sma kon tapoe. Èn di na faste ten di a ben poti ben doro, a ben meki Farao nanga den sroedati makti foe en dede a watra na ini a Redi Se. Exodus 14:28 e taki: „No wan a mindri den ben tan abra.” Ma den dienstknegti foe Jehovah ben kisi kibri èn ben kon fri. Èn disi ben pasa precies tapoe a pisten di Jehovah proféti wortoe ben taki a fesi, na a kaba foe wan fo hondro jari pisten di hondrohondro jari a fesi a ben taki foe en nanga na getrow Abraham.
18. Fa Jehovah ben doe nanga Nebukadnezar? Foe san-ede?
18 Moro fara joe ben abi kownoe Nebukadnezar foe Babylon. A ben go djaf foe en makti nanga sani di a ben meki, netleki a ben de wan gado. Ma, na so a tanapoe na ini Daniël 4:33, „Ete na wortoe ben de na ini na mofo foe na kownoe, di wan sten ben fadon komoto foe hemel: ’Joe e kisi foe jere o kownoe Nebukadnezar: „Na kownoekondre srefi komoto gwe foe joe.”’” Jehovah ben taigi en dati a ben sa lagi en leki wan meti foe boesi, „teleki”, soleki vers 32 e taki, „joe sabi dati na moro Héwan de tiriman ini na kownoekondre foe libisma, èn dati a e gi en na soema a wani”. A so a ben pasa ooktoe, precies tapoe a ten di Jehovah ben poti ini en prakseri.
19. Foe san-ede na kroetoe foe Jehovah di no ben boen ben kon tapoe Babylon nanga en tiriman, Belsazar?
19 A lasti kownoe di ben sa tiri ini Babylon, ben de Belsasar. Na ini a ten foe en tiri, na ten ben kon di Jehovah ben bepaal dati na boen bigi grontapoe makti disi, ben sa fadon. Foe san-ede? Foedi den Babylon sma ben hori Jehovah pipel na ini katibo èn ben kosi Jehovah en nen. Daniël kapitel 5 e ferteri dati Belsasar ben seti wan bigi fesa gi doesoen foe den hé lantiman foe en. Ne „Belsasar ben taki foe den tjari den gowtoe nanga solfroe sani di en papa Nebukadnezar ben teki foe na tempel [Jehovah tempel] di ben de na ini Jeruzalem . . . , èn na kownoe nanga den bigiman foe en kondre, en oema nanga tweede rang oema ben dringi foe den” (Daniël 5:2, 3). Loekoe pikinso san den ben doe baka dati: „Den ben dringi win, èn den ben prijse den gado foe gowtoe èn foe solfroe, kopro, isri, oedoe nanga ston.” (Daniël 5:4). Foedi den dringi foe den santa wrokosani di ben gebroiki na ini na anbegi foe Jehovah, den ben spotoe Jehovah èn lé foe pori en nen. Foedi den anbegi den falsi gado foe den, den ben anbegi Satan.
20, 21. Sortoe boskopoe Daniël ben tjari go abra na Belsazar, èn fa na profétitori disi ben kontroe?
20 Ma precies tapoe na momenti dati, wan skreki sani ben pasa. Den finga foe wan anoe ben sori densrefi èn ben skrifi na tapoe na skotoe foe na paleisi! Disi ben skreki na kownoe sote, dati „srefi na kloroe foe en fesi ben kon kenki, èn en égi prakseri ben skreki en, èn den djonkoe foe en ben kon slap èn srefi den kindi foe èn ben naki na makandra” (Daniël 5:6). Ma nowan foe den kerki raiman foe Belsasar ben kan poeroe na anoe-skrifi kon na krin èn foe dat’ede den ben seni kari Jehovah dienstknegti Daniël foe leg den uit. Daniël ben ferteri na kownoe dati na boskopoe ben komoto foe Jehovah èn ben de disi: „Gado ben teri den dé foe joe kownoekondre èn meki wan kaba kon na den. . . . Den ben wegi joe na tapoe wan wegi ma den ben feni joe lekti. Den prati na kownoekondre foe joe èn gi en na den Persiasma.” — Daniël 5:26-28.
21 Na a srefi neti den Medo-Persia legre ben boro go na ini na foto via den doro di ben libi opo. Daniël 5:30 e bosroiti foe dat’ede: „Na ini na srefi neti dati ete den ben kiri Belsazar.” Na fadon foe Babylon ben meki a de mogelek dati Jehovah pipel precies sébitenti jari baka na bigin foe na katibo foe den ben kan drai go baka na den égi kondre. Dati ben de soifri ini akroederi nanga Jehovah tenschema, soleki ben taki a fesi na ini Jeremia 27:10.
22, 23. Fa Jehovah ben doe nanga kownoe Agrippa 1, di ben gens den kristensma na ini a fosi jarhondro?
22 Na ini na fosi jarhondro kownoe Herodes Agrippa ben de na latsti tiriman foe Palestina, di na a ten dati ben de wan pisi foe na kownoekondre foe Rome. Herodes meki den ben poti na apostel Petrus na ini straf’oso èn a ben ferfolgoe tra kristensma. A ben meki den ben kiri srefi na apostol Jakobus (Tori foe den Apostel 12:1, 2). Herodes ooktoe ben orga feti pe fetiman ben feti nanga makandra èn tra heiden pré. Ala den sani disi ben sori taki a no ben de soleki fa a ben taki, dati a ben de wan anbegiman foe Gado.
23 Ma ne na momenti ben doro di Jehovah ben poti foe kiri na gensman disi. Tori foe den Apostel 12:21 te leki 23 e ferteri wi: „Tapoe wan faste dé Herodes ben weri wan kownoe krosi èn a ben go sidon na tapoe na kroetoestoeroe èn ben hori wan publiki taki gi den. Èn a pipel di ben kon makandra ben bari taki: ’A sten foe wan Gado èn no foe wan libisma!’” Èn san ben pasa dan? Na bijbel e taki: „Wantronwantron na engel foe Jehovah ben naki en, foedi a no ben gi na glori na Gado; èn woron ben njan en èn a ben bro na laatste bro.” Disi ben de ete wan eksempre foe na fasi fa Jehovah ’e poeroe kownoe foe a troon’, soleki Daniël 2:21 e ferklari.
24. Den sortoe historia tori disi e kotoigi foe san?
24 Den sortoe sani disi di ben psa na ini na historia e sori dati Jehovah poti ten nanga pisten gi na kontroe foe en prakseri. Den e sori ooktoe dati a abi séker na krakti èn na makti foe meki na kontroe foe en prakseri foe kenki na grontapoe disi kon ini wan paradijs pe ’regtvaardikifasi sa libi’ sa go doro. — 2 Petrus 3:13.
Joe kan memre disi ete?
◻ Foe san-ede a de so prenspari foe kon sabi den ten nanga pisten foe Jehovah?
◻ Foe san-ede Jehovah e hori en steun na baka gi den tiriman nanga pipel foe na grontapoe disi?
◻ Sortoe sma sa kisi na paradijs na grontapoe di e kon?
◻ Fa Jehovah ben sori a makti foe lagi tiriman di e gens en?