’Den sani di kon na krin de gi wi’
„Den kibrisani de gi Jehovah, ma den sani di tjari kon a krin de gi wi.” — DEUTERONOMIUM 29:29.
1, 2. (a) Foe san-ede libisma abi tranga fanowdoe? (b) Fa wi moesoe de nanga den bodoi di Jehovah ben poti foe wi alamala kan abi den?
EFOE wan sma de na ini wan gron di lai nanga mijn (dati wani taki bom di kibri ondro gron èn di te joe trapoe tapoe a presi pe a de e baster opo nanga na bakapisi dati joe kan dede), ma a abi wan karta na en pe tanapoe via sortoe pasi a moe waka a mindri den mijn foe psa gwe libi a kontren, dan joe kan go prakseri o soifri a ben sa studeri a karta dati èn ben sa teki toe ala den sani di tanapoe a tapoe? Ofoe go prakseri wan sma di abi wan siki di a no sa feni betre noiti. Joe kan prakseri pikinso nanga omeni foeroe belangstelling a sa wani kon sabi ala lasti sani san datra kon sabi di e gi a howpoe foe kon betre kande? We, na sari tori de dati wi de na ini ala toe situwasi. Wi e libi na ini wan grontapoe di foeroe nanga trapoe èn krafana di kan tjari na pori foe wi kon. Èn wi e dede na a siki onvolmaaktifasi di wi ben kisi èn di nowan sma kan foe dresi (1 Johannes 2:15-17; Romeini 7:20, 24). Soso Gado abi na dresi gi na onvolmaaktifasi foe wi. En wawan kan jepi wi foe kon sabi den trapoe èn foe komoto na den pasi. Foe dat’ede wi abi den sani di Jehovah tjari kon a krin fanowdoe.
2 Dati de ooktoe na réde foe san-ede na skrifiman foe a boekoe Odo di ben abi na jeje foe Gado ben gi na rai: „Beni joe jesi èn arki den wortoe foe den koniwan, sodati joe ati kan poti ensrefi na tapoe a sabi foe mi” (Odo 22:17). Na sotoe wi e lési na ini Odo 18:15: „Na ati foe na sma di abi ferstan e kisi sabi, èn a jesi foe den koniwan e proberi foe kisi sabi.” Wi no kan gi wisrefi pasi foe poti sortoe sabi ooktoe di Jehovah e poti gi oenoe na wan sé.
Den kibri-tori foe Jehovah di a tjari kon na krin
3. Sortoe sani di Jehovah ben tjari kon na krin foe en prakseri Jehovah ben gi Adam nanga Eva?
3 Kolokoe dati Jehovah ben de toemsi royaal ini a tjari kon na krin foe sabi. Foe sensi na ten di a meki sani, Gado ben gi safrisafri en anbegiman ala bodoi di den ben abi fanowdoe na ondro difrenti omstandigheid (Odo 11:9; Prékiman 7:12). Na ini a bigin a ben tjari kon na krin dati a grontapoe èn a libi foe den meti ben sa moe de ondro Adam nanga Eva èn den bakapikin foe den (Genesis 1:28, 29). Ma Satan ben tjari Adam nanga Eva nanga jepi foe en krakti so fara foe den sondoe, èn a ben kon de moeilek now foe si fa na prakseri foe Gado ben sa kon troe leki wan grani gi Jehovah Gado. Ma Gado heri esi kaba ben tjari krin kon ini a tori. A ben sori dati baka wan pisten wan regtvaardiki bakapikin, wan regtvaardiki „siri”, ben sa kon di ben sa meki den wroko foe Satan nanga en bakaman tron noti. — Genesis 3:15.
4, 5. Sortoe tra sani di ben tjari kon na krin Jehovah ben gi, èn nanga jepi foe sortoe libisma kanaal?
4 A no de foe taki dati man nanga oema di e frede Gado sa abi foeroe aksi ini a tori foe na siri dati. Soema ben sa de disi? Oten a ben sa kon? Fa a ben sa de wan wini gi na libisma-famiri? Omoro den jarhondro ben e psa gwe, omoro Jehovah ben tjari moro sani kon na krin foe en prakseri, te foe kaba a ben piki ala den aksi disi. Bifo a Froedoe a ben gi Henoch en jeje foe taki wan profétitori foe na pori di boo kon tapoe a siri foe Satan (Judas 14, 15). Sowan 2400 jari bifo G.T. a ben tjari kon na krin gi Noach dati libisma libi nanga broedoe de de santa — wan waarheid di boo de toemsi prenspari na a ten di na pramisi siri ben o kon. — Genesis 9:1-7.
5 Baka a ten foe Noach, Jehovah ben tjari nanga tra getrow famiri-edeman toemsi prenspari sani kon a krin. Na ini a di foe twenti jarhondro bifo G.T. Abraham ben kon sabi dati na pramisi siri ben sa de wan foe en bakapikin. (Genesis 22:15-18). Na pramisi disi ben de na diri goedoe foe Abraham manpikin Isaak èn en granpikin Jakob (di bakaten ben kisi a nen Israël) (Genesis 26:3-5; 28:13-15). Èn Jakob Jehovah moro fara ben tjari kon na krin dati na siri disi, „Silo”, ben sa de wan makti tiriman di ben sa gebore na ini na geslagtilin foe en manpikin Juda. — Genesis 49:8-10.
6. Soema ben tron na ini na di foe tina siksi jarhondro bifo G.T. na kanaal foe „den sani di ben kon na krin”, èn san ben de wantoe sani di den ben leri?
6 Na ini a di foe tina siksi jarhondro bifo G.T. Jehovah ben orga den bakapikin foe Israël kon tron wan naatsi. Gi soema den tra waarheid di ben sa tjari kon na krin na a ten dati ben sa de? Mozes ben piki na aksi dati di a ben taki a sani di e kon now gi na jongoe naatsi dati: „Den kibri sani de gi Jehovah, wi Gado, ma den sani di tjari kon na krin de foe wi te ten di no abi marki èn gi wi man-pikin” (Deuteronomium 29:29). Ija, baka na kon gebore na ini 1513 bifo G.T. foe na naatsi Israël a ben tron na libisma kanaal di „den ben gi den santa taki foe Gado” (Romeini 3:2). Èn fa a ben de wan lo foe taki di ben kon via na kanaal dati! Gado ben teki den Israëlsma poti na ini a Wetsverbontoe, di ben gi den na okasi foe tron wan naatsi foe priester nanga kownoe (Exodus 19:5, 6). Na wèt ben abi wan systema foe regel fa foe libi di ben jepi den foe kon sabi den trapoe foe sondoe èn fa foe tan farawe foe den èn ooktoe wan systema foe srakti-ofrandi pe na santa broedoe foe meti ben e gebroiki foe tapoe na sondoe foe den tappe wan agersifasi.
7, 8. (a) Sortoe tra bodoi Jehovah ben tjari kon na krin foe na Siri di boo kon? (b) Fa den ben kibri den sortoe sani disi kon na krin?
7 Baka wan pisten Jehovah ben tjari moro sani kon na krin foe a Siri. Nanga jepi foe na Psalmsingiman, Jehovah ben tjari kon na krin dati den naatsi ben sa trowe a Siri foe en, ma dati a Siri nanga jepi foe Jehovah ben sa wini (Psalm 2:1-12). Nanga mofo foe Jesaja a ben tjari kon na krin dati a Siri ben sa de „Vrédekownoe”, ma ooktoe dati foe den sondoe foe trawan a ben sa njan pina (Jesaja 9:6; 53:3-12). Na ini na di foe aiti jarhondro bifo wi G.T. Jehovah ben tjari srefi na presi kon na krin pe na Siri ben sa gebore, èn na ini di foe siksi jarhondro bifo G.T. a ben tjari na ten-schema foe en diniwroko kon na krin. — Micha 5:2; Daniël 9:24-27.
8 Te foe kaba den ben tjari den „sani di ben tjari kon na krin” kon makandra na ini den 39 boekoe foe den Hebrew Skrifi. Ma na ini foeroe geval dati ben de soso na fosi stap. Den sani di ben skrifi nofotron ben de moeilek foe ferstan, srefi gi den sma di den ben e gebroiki foe skrifi den! (Daniël 12:4, 8; 1 Petrus 1:10-12) Ma te bakaten leti ben kon a tapoe san den ben wani taki, èn disi joe no ben kan taki tangi na wan libisma di ben tjari en kon na krin. Net soleki fa a de na ini a geval foe proféti dren „na so den poeroe foe a tori kon a krin de wan afersi foe Gado”. — Genesis 40:8.
Wan njoen kanaal
9. Foe sanede na Israël na skinfasi ben lasi na grani foe de na kanaal foe „den sani di ben kon na krin” èn oten dati ben pasa?
9 Di Jezus Kristus ben de na grontapoe dan Israël ben de ete na kanaal foe Gado. lbriwan sma di ben wani dini Jehovah, ben moesoe go moksi ensrefi nanga na naatsi foe en di a ben teki (Johannes 4:22). Ma Mozes ben sori dati na grani foe de den sma di boo abi a loekoe tapoe „den sani di ben tjari kon a krin”, ben sa tjari frantwortoe kon nanga en. A ben taki: „Den sani di tjari kon na krin de gi wi te ten di no abi marki èn gi wi manpikin, sodati wi mag doe ala den wortoe foe na wèt disi” (Deuteronomium 29:29). Den „sani di tjari kon na krin” dati ben kon na wan kaba ini 33 G.T. Foe san-ede? Foedi den djoe leki naatsi ben misi ’foe doe ala wortoe foe na wèt’. Den ben tan misi spesroetoe foe bari odi gi na Siri Jezus Kristus, Èn dati ben de so aladi na wèt ben de troetroe wan ’leri méster di e tjari joe go na Kristus’ (Galacia 3:24). Foe na mi-no-ke-fasi disi meki Jehovah ben teki wan tra kanaal gi „den sani di ben tjari kon na krin”.
10. San ben de na njoen kanaal gi den sani di Jehovah ben tjari kon na krin?
10 San ben de na njoen kanaal disi? Paulus e meki oen kon sabi en di a ben skrifi gi den Efesesma dati „nanga jepi foe na gemeente na koni foe Gado di de na difrentifasi ben sa meki bekènti akroederi na tégo prakseri di a ben abi na ini a tori foe na Kristus, Jezus wi Masra” (Efese 3:10, 11). Ija, na a kristen gemeente di ben kon gebore na a ten foe Pinksteren ini 33 G.T., ben kisi den njoen „sani di ben tjari kon na krin”. Leki wan groepoe den salfoe kristen e doe dienst leki „na getrow èn koni srafoe” di den ben poti foe gi na a reti ten jeje njanjan (Mattéus 24:45). Now den kristensma „ben de sma di den poti loekoe den santa kibri-tori foe Gado”. — 1 Korinte 4:1
11, 12. San ben de wantoe foe den moi sani di ben tjari kon na krin, èn di ben kon nanga jepi foe na njoen kanaal disi?
11 Den njoen „santa kibri-tori” ben bow lontoe na mama foe a tori, dati Jezus Kristus, na Pramisi Siri, ben sori ensrefi (Galacia 3:16). Jezus ben de „Silo”, na sma di ben abi na reti foe tiri na libisma-famiri, èn Jehovah ben poti en leki Kownoe foe na Kownoekondre di te foe kaba ben sa meki na paradijs kon baka na a grontapoe disi (Jesaja 11:1-9; Lukas 1:31-33). Jezus ben de ooktoe na hé-priester foe Jehovah di a ben poti, di ben gi en sondro flaka èn volmaakti libi leki wan loesoeprijs gi na libisma-famiri, wan troetroe wondroe fasi foe tjari na gronprakseri foe na santafasi foe na broedoe kon ini na libi (Hebrewsma 7:26; 9:26). Den libisma di ben e bribi ben abi now na howpoe foe kisi baka na volmaakti libisma libi di Adam ben lasi. — 1 Johannes 2:1, 2.
12 Na pramisi Siri disi ben de ooktoe na mindriman, di a mindri en bakaman nanga en hemel Tata ben meki wan njoen ferbontoe kon di ben teki na presi foe na owroe Wetsverbontoe (Hebrewsma 8:10-13; 9:15). Tapoe a gron foe na njoen ferbontoe disi dan na njoen kristen gemeente ben kon ini na presi foe na naatsi foe Israël na skinfasi èn den memre foe en ben tron wan jeje Israël, makandra nanga Jezus wan jeje ’siri foe Abraham’ èn sma di den poti foe loekoe „den sani di kon na krin” (Galacia 3:29; 6:16; 1 Petrus 2:9). Boiti foe dati wan sani ben psa di ben de wan sani di no ben kan kwetkweti gi den djoe: heiden sma ben kisi na kari foe tron wan pisi foe na njoen jeje Israël dati! (Romeini 2:28, 29) Makandra den djoe èn den no-djoe jeje Israëlsma ben kisi na wroko foe meki sma na alape na grontapoe tron discipel foe Jezus (Mattéus 28:19, 20). Na a fasi disi den „sani di kon na krin” ben kon de wan sani gi ala naatsi.
13. Fa den njoen „sani disi di ben kon a krin” ben kibri gi geslagti di ben sa kon bakaten?
13 Baka wan pisten dan na kristen gemeente ben skrifi „den sani disi di ben tjari kon na krin” na ini den 27 boekoe foe den kristen Griki Skrifi, èn nanga disi den meki na canon foe na bijbel di skrifi nanga Jehovah jeje ben kon klari. Ma agen foeroe profétitori di ben abi foe doe nanga Jehovah prakseri di pas foeroe jarhondro a baka sma ben sa ferstan dorodoro, ben skrifi poti ini den boekoe disi. Den skrifiman foe den santa boekoe ben dini agen te joe loekoe en boen den geslagti di no ben gebore ete.
„Den sani di tjari kon a krin na ini disiten”
14. Oten agen Jehovah, baka na bigi fadon komoto na bribi, ben sa poti krin leti tapoe „den sani di ben kon na krin”?
14 Baka na dede foe don apostel, soleki ben taki a fesi, dan na bigi fadon komoto a bribi ben kon mindri den sma di ben taki dati den de kristen (Mattéus 13:36-42; Tori foe den Apostel 20:29, 30). Foeroe jarhondro ben kon pe na ferstan foe „den sani di ben kon na krin” ben kon doengroe, aladi Jezus no ben libi den sma di ben proberi foe tan getrow (Mattéus 20:28). Ma Jezus ben pramisi dati na situwasi disi no ben sa tan foe tégo. Na ini a bosroiti foe na seti foe sani agen wan prati-wroko di sma ben sa si nanga ai ben sa feni presi a mindri don godelowsoewan èn den regtvaardikiwan, èn „den regtvaardikiwan ben sa go skijn krin na ini a kownoekondre foe den Tata” (Mattéus 13:43). Precies soleki Daniël ben taki a fesi, dan na „troe sabi na ini a ten foe a kaba ben sa kon foeroe pasamarki” (Daniël 12:4). Agen krin leti ben sa kon a tapoe „den sani di kon na krin”.
15. Foe san-ede den fasi foe bribi foe na kristenheid ben sori dati den no de warti foe dini leki na kanaal gi a disiten ferstan foe „den sani di ben kon na krin”?
15 Foe sensi 1914 wi e libi na ini a bosroiti foe na seti foe sani disi. Foe datmeki a de prenspari foe sabi soema Jehovah e gebroiki now leki wan kanaal foe na njoen jeje leti. A no e gebroiki kwetkweti den fasi foe bribi foe na kristenheid di de so langa kaba. Den disi ben sori taki den no wani libi falsi leri, di ben kon moro foeroe na a ten foe na bigin fadon komoto na bribi. Na ini a ten disi a moro bigi pisi foe den tiriman foe den roestoe fasi so tranga na ini gwenti nanga sani di den e bribi na ini dati den no e opo densrefi gi njoen sabi, ofoe den de ondro krakti so foe scepticisme (sma di o degedege na ini a bribi foe sani) dati den e degedege na ini na skrifi di bijbel skrifi nanga jepi foe Gado jeje èn na boenfasi foe den moreel markitiki foe en.
16. Soema ben sori taki den de Jehovah disiten kanaal?
16 Jezus ben taki dati na kownoekondre foe Gado ben sa teki poeroe foe den djoe èn „ben sa gi na wan naatsi di ben sa meki den froktoe foe en” (Mattéus 21:43). Na ini na fosi jarhondro a ben sori taki disi ben de a jongoe kristen gemeente foe na jeje Israël. Na ini a ten disi soso wán groepoe de di e meki froktoe di joe kan teki gersi nanga di foe a fosi gemeente. Den jeje Israëlsma disi de den memre foe na klasse ofoe groepoe di Mattéus 24:45-47 e kari a „getrow èn koni srafoe”. Netleki den fosi kristensma na so den disiten kristen no ben frede foe ’meki a leti foe den skijn’ (Mattéus 5:14-16). Foe sensi 1919 nanga dek’ati den ben teki na wroko a tapoe den foe doe di ben de na ini a préki foe na boen njoensoe foe na Kownoekondre na ini na heri grontapoe leki wan kotoigi (Mattéus 24:14). Foedi den meki den froktoe foe Gado kownoekondre, meki Jehovah ben blesi den foeroe foe di a ben tjari den kon up to date nanga na „koni foe Gado di de na difrentifasi”. — Efese 3:10.
17, 18. Sortoe moro boen ferstan foe sani Jehovah ben meki mogelek nanga jepi foe en disiten kanaal?
17 Na so den ben kon ferstan na ini 1923 na uitvoerig profétitori foe Jezus di e go den skapoe nanga don bokoboko heri boen, aladi den ben si krin dati na heri grontapoe e kisi kroetoe (Mattéus 25:31-46). Na ini 1925 den grontapoe dienstknegti foe Gado ben kisi wan soifri loekoe tapoe Openbaring kapitel 12 èn ben si precies san ben psa na ini na aparti jari 1914. Èn na ini 1932 na loekoe foe den ben kon moro dipi srefi. Jehovah ben tjari kon na krin dati en profétitori di abi foe doe nanga na drai go baka foe den djoe na ini Jeruzalem no ben abi foe doe nanga na Israël na skinfasi di foe langa ten kaba ben sori taki a no de getrow èn dati den ben trowe en, ma moro foeroe ben abi foe doe nanga na jeje Israël, na kristen gemeente (Romeini 2:26, 29). Èn na ini 1935 den salfoewan ben kisi wan tra ferstan foe na visioen di Johannes ben skrifi foe en ini Openbaring kapitel 7 foe na „bigi ipi”, sodati den ai ben kon opo gi na kefarlek bigi wroko foe tjari sma konmakandra èn di ben de na den fesi foe kon ete. — Openbaring 7:9-17.
18 Disi ben de a réde foe wan kefarlek bigi kon a libi foe na grontapoe prékiwroko, foe di na a ten dati a tjari konmakandra foe „den sani na grontapoe” te foe kaba ben bigin sondro foe meki spotoe (Efese 1:10). Di na ini 1939 den wolkoe foe feti ben kon miti na makandra na ini 1939 na tapoe Europa, dan na afersi foe neutraliteit ben ferklari moro krin leki oiti wan ten. Na ini 1950 den ben kon sabi soifri den „granman” di Jesaja 32:1, 2 e taki foe en. Na ini 1962 tapoe a gron foe „den sani di ben kon na krin” den ben kon ferstan moro krin soema ben de precies „den hé-makti” èn san de na wan enkri joisti fasi di wan kristen moesoe de nanga den (Romeini 13:1, 2). Èn na ini 1965 wan moro krin loekoe ben kon na tapoe a grontapoe opobaka èn a ben kon moro krin soema kan njan boen foe en. — Johannes 5:28, 29.
19. Fa na disten „srafoe”-klasse foe Jehovah ben sori taki den de wan boen sma di kan loekoe a Wortoe foe Gado?
19 Boiti foe dati, na salfoe kristen gemeente na ini a di foe twenti jarhondro disi ben sori taki den de wan boen sma di e loekoe a Wortoe foe Gado, den „sani di tjari kon na krin” di ben skrifi poti na boekoe. Wan nomroe foe memre di e teki a presi foe na gemeente disi ben bigin foe vertaal na bijbel na ini disiten Ingrisitongo èn te nanga na dé foe tide na Njoen Grontapoe Vertaling foe den Santa Skrifi kon a doro na ini erfoe tongo, nanga wan oplage foe ala nanga ala 40.000.000 exemplaar. Na „srafoe”-klasse foe salfoe kristen de foe dat’ede ooktoo na fesi foe internationaal leri-programma èn e tjari leri-boekoe nanga tijdschrift kon na doro di abi den fundamenti tapoe na bijbel. A e orga ala wiki komakandra, alaten moro bigi komakandra èn difrenti skoro di alamala abi leki marki foe jepi sma di e soekoe a waarheid foe kisi soifri sabi foe „den sani di ben kon na krin”. Nanga reti wi kan taki dati „den regtvaardikiwan e skijn” now na ini jeje fasi „moro krin leki a son” èn e sori dati den warti a frantwortoe foe den foe de sma di e loekoe den sani boen di den kisi foe loekoe. — Mattéus 13:43.
Na frantwortoe foe wi
20, 21. (a) Jehovah Wortoe di ben tjari kon na krin ben bewégi na Psalmsingiman foe ben taki san? (b) Sortoe afersi wi sa go taki foe den na ini na tra artikel?
20 Jehovah soboen no ben meki wi waka kon fasi na ini na gron di lai nanga mijn foe na grontapoe disi. Na a tra sé a ben gi oenoe en Wortoe foe krin na pasi foe wi èn foe jepi wi foe tan farawe foe jeje kefar (Psalm 119:105). Ooktoe Jehovah no ben libi oenoe na oensrefi foe dede leki wan bakapisi foe sondoe nanga onvolmaaktifasi. Na presi foe dati a ben opo na okasi foe kisi tégo libi tapoe wan paradijs na grontapoe èn a ben tjari sabi foe na okasi disi kon makriki foe wi kan kisi (Johannes 17:3). A no de wan ferwondroe sani dati na Psalmsingiman di ben e taki foe „den sani di ben tjari kon na krin” na ini en ten, ben kan bari taki: „O fa mi lobi na wèt foe joe! Na heri dé a abi mi heri belangstelling.” — Psalm 119:97.
21 Joe e prakseri ooktoe so foe „den sani di Jehovah tjari kon na krin”, èn di wi e ferstan now? Joe abi wan faja warderi gi den waarheid di joe ben leri? Joe e ferstan o fanowdoe den waarheid disi de foe jepi joe foe teki bosroiti, foe komoto na a pasi foe tesi èn foe dini Jehovah? Omeni ten joe e gi troetroe na a lési nanga a studeri foe „den sani disi di ben tjari kon na krin”? A kan sonte foe meki den studi-gwenti foe joe kon moro boen? Den afersi disi wi sa go behandel na ini a tra artikel.
Joe kan memre disi ete?
◻ San ben de bifo na ten foe Jezus wan toe foe den kanaal gi „den sani di kon a krin”?
◻ Gi soema „den sani di ben kon na krin” de, baka 33 G.T.?
◻ San ben de wan toe foe den toemsi prenspari sani di ben kon na krin foe na njoen kanaal disi?
◻ Foe san-ede meki „den sani di ben kon na krin” de now gi den jeje Israëlsma?
◻ Fa na salfoe kristen gemeente e sori taki den de warti sma di e loekoe a Wortoe foe Gado?
[Prenki na tapoe bladzijde 1]
Jehovah ben tjari nanga jepi foe getrow man ini owroeten toemsi prenspari sabi kon na krin