Jezus libi nanga diniwroko

Doe boen wroko tapoe na sabbat

A DE a mofojari foe 31 G.T. Wantoe moen psa foe sensi Jezus di a ben de a pasi foe Judéa go na Galiléa, ben taki ini Samaria nanga wan oema na wan peti.

Now Jezus e go agen na Judéa, pe a ben préki na ini den djoe kerki, baka na bigi leriprogramma na ini heri Galiléa. Te joe teki na prakseri di a bijbel e poti tapoe na diniwroko foe Jezus na ini Galaliéa gersi nanga Jezus activiteit ini Judéa nanga a fisiti disi èn na den moen di a ben psa dja, baka na Pascha a fesi, dan a bijbel e taki pikinso foe dati. Na diniwroko foe en na ini Judéa kande séker taki sma no ben teki en so boen leki ini Galiléa.

Eri esi Jezus de a pasi e go na a moro prenspari foto foe Judéa, Jeruzalem, foe go njan a fesa foe na Pascha ini 31 G.T. Djaso na a skapoedoro foe a foto, na piswatra di den e kari Bethzatha de, pe foeroe sikiman, breniman nanga malengriman e kon. Den e bribi dati sma kan kon betre te den saka go na ini a watra te a watra bigin seki.

A de Sabbat, èn Jezus e si na a piswatra wan man di siki 38 jari kaba. Foe di ai ferstan dati a man siki solanga kaba, Jezus e aksi: ’Joe wani kon betre?’

„Mijnheer, mi no abi no wan sma, di e tjari mi go na ini a watra te a watra seki,” ai piki, „ma te mi e hari go, wan tra sma e go bifo mi na ini.”

Jezus e taigi en: „Opo tanapoe, teki joe bedi èn waka.” Tapoe disi a man e kon betre wantewante, e teki en bedi èn e go waka!

Ma efoe den djoe e si a man, den e taki: „A de Sabbat, joe no mag foe tjari na bedi.”

A man e piki den: „A sma di meki mi kon betre, na en ben taigi mi taki: ’Teki joe bedi èn waka.’”

„Soema na a sma di ben taigi joe: ’Teki en èn waka’?”, den e aksi. Jezus ben waka gwe foe di someni sma ben de drape èn a sma di ben kon gesontoe no ben sabi fa Jezus ben nen. Bakaten Jezus nanga a man e miti makandra èn a man e kon sabi soema ben meki a kon betre.

A man di ben kon betre e go soekoe soboen den djoe foe ferteri den dati Jezus de a sma di ben meki a kon gesontoe. Te den djoe e jere disi den e go na Jezus. Foe san-ede? Na foe kon sabi fa a doe kon dati a kan doe den wondroe sani disi? Nono. Ma foe feni sani taki foe en, foe di a e doe den boen sani disi na tapoe Sabbat. Èn den e go ferfolgoe en srefi! Lukas 4:44; Johannes 5:1-16.

◆ A de olanga so psa kaba sensi Jezus ben de a laatste tron na Galiléa?

◆ Foe san-ede a piswatra di den ben kari Bethzatha ben de so populair?

◆ Sortoe wondroe Jezus ben doe na a piswatra, èn fa den djoe ben teki dati?