Jongoewan di e prisiri Jehovah ati
„Prisiri mi ati, sodati mi kan gi wan piki na a sma di e spotoe mi.” — ODO 27:11.
1. Fa na fasi fa wi e libi abi krakti na tapoe wi papa nanga mama èn tapoe wi Mekiman?
EFOE JOE e ferstan en ofoe no, a abi trobi foe troe fa joe e libi. A abi trobi gi joe papa nanga mama foe eksempre. „Wan koni manpikin de a sma di e prisiri wan papa,” a bijbel e taki, „Èn wan manpikin sondro ferstan de na sari foe en mama” (Odo 10:1; 23:24, 25). Ma san de moro prenspari, na fasi fa joe e libi, kan prisiri ofoe sari a Mekiman foe joe, Jehovah Gado. „Sori taki joe koni, mi manpikin,” na dekati foe Jehovah de, èn prisiri mi ati sodati mi kan gi wan piki na a sma di e spotoe mi. — Odo 27:11.
2. Sortoe toemsi prenspari stréaksi Satan ben tjari kon a fesi, èn fa wi de na ini a tori?
2 Na sma di e spotoe Jehovah, na Satan Didibri. Na ini a djari foe Eden Satan ben tjari wan toemsi prenspari stré-aksi kon a fesi, di ben aksi wan piki foe Gado sé. Den troe tori e sori dati di Didibri a tapoe wan makriki fasi ben tjari Eva èn bakadati Adam go so fara foe psa a wetfoe Gado a ben tjalansi Jehovah. Te joe loekoe en boen dan Satan ben taki: ’Gi mi soso na tjans èn ala sma mi sa hari poeroe foe dini joe’ (Job 1:6-12). Foe dat’ede meki Jehovah ben aksi en manpikin na aksi di e waran na ati foe gi en „wan piki”, dati a ben sa kan piki na tjalansi foe Satan.
3. Foe san-ede Jehovah nanga en tranga aksi moro foeroe e taki nanga Jezus, èn soema moro sa ben prisiri Jehovah ati?
3 Ma tapoe soema spesroetoe Jehovah ben aksi na aksi disi di e waran ati foe di a e taki nanga en leki „mi manpikin”? Jezus Kristus de na ini wan spesroetoe fasi na Manpikin foe Gado, foe di a de en wan enkri gebore Manpikin (Johannes 1:14). Boiti foe dati, Jezus Kristus, dorosé foe Adam, di ben misi foe tan gi jesi na en Mekiman, ben de na wan enkri volmaakti man di oiti ben waka na grontapoe èn foe dat’ede na wan enkri man di ben kan bewijsi dorodoro dati wan sma kan tan getrow na Gado (1 Korinte 15:45). Foe dat’ede meki Jehovah e go nanga a tranga aksi disi na Jezus. Èn Jezus no e meki na fesi foe en Tata fadon. Nanga na getrow waka nanga libi foe en Jezus ben gi Gado wan piki tapoe na bigimofo tjalansi foe Satan dati sma no ben sa dini en getrow na ondro tesi (Hebrewsma 2:14; 12:2). Boiti foe dati, dan ooktoe ala sma di sa tiri makandra nanga Kristus na ini hemel ben sa prisiri Jehovah ati foe di srefi te na ini dede den tan getrow. — Openbaring 2:10.
4. Sortoe toemsi prenspari afersi joe moe loekoe te joe e bosroiti san joe sa moe doe nanga joe libi?
4 Ma san wi kan taki foe wisrefi ini a ten disi, makandra nanga oenoe den jongoewan? Oenoe de ini a stréaksi disi di e go efoe sma sa de getrow na Gado ofoe no? Foe troe! (Psalm 147:11; 148:12, 13) Kande joe no e ferstan en, ma nanga san joe e doe nanga joe libi, joe e hori baka gi a sé foe Gado ini a stréaksi ofoe gi a sé foe Satan. A e meki Jehovah prisiri ofoe Satan prisiri. Ija, na kari foe Jehovah ofoe na tranga kari foe en wi kan si ooktoe leki wan sani di taki nanga joe persoonlek: „Sori dati joe de koni, mi manpikin [ofoe oemapikin], èn prisiri mi ati, sodati mi kan gi wan piki na a sma di e spotoe mi.” (Odo 27:11) A prisiri foe na ati foe na Mekiman no de wan marki di joe kan abi na joe fesi èn di e gi joe satisfaksi?
Foe san-ede a de wan koni sani
5. Foe san-ede a de wan koni sani foe prisiri Jehovah ati?
5 Loekoe pikinso dati na dekati foe Jehovah de: „Sori dati joe koni.” Foe san-ede wi e sori dati wi koni foe meki Jehovah ati prisiri? We, foedi Jehovah de wan lobi Gado di abi a moro boen sani gi wi ini prakseri, èn ala sani san ai aksi foe oenoe de foe na boen foe wi. Soleki Jesaja 48:17, 18 e taki: „Mi, Jehovah, de oen Gado, na Sma di e leri oenoe fa oen moe kisi wini gi oensrefi, Na Sma di e meki oenoe go tapoe na pasi di oenoe moe waka. O efoe oenoe troetroe soso ben sa poti prakseri na mi gebod! Dan oen vréde ben sa de netleki wan liba, èn regtvaardikifasi leki den skwala foe na se.”
6. (a) San e sori dati Jehovah wani dati joe njan boen foe a libi? (b) Sortoe bakapisi joe na kan lon komoto gi en?
6 Leki wan lobi bigisma Jehovah wani dati joe njan boen dorodoro foe en diri presenti. Foe dat’ede ai taki: „Prisiri, oen jongoeman, na ini oen jongoe jari, èn meki oen ati doe oen boen na ini den dé foe oen jongoe dé jari, èn waka ini den pasi foe oen ati èn akroederi den sani di oen ai e si.” A no de foe taki dati disi no de wan kari foe doe ala den prisiri sani di joe ati wani nomo. Disi e kon a krin na ini a warskow di e kon a baka: „Ma sabi dati na troe Gado e tjari joe kon na ini kroetoe foe ala den sani disi ede” (Prékiman 11:9). Ija, joe no kan lon komoto gi den bakapisi foe joe waka nanga libi; Gado sa aksi joe frantwortoe foe san joe e doe. Na regel de faste: „San wan sma e sai, na dati a sa koti ooktoe.” — Galacia 6:7.
7, 8. (a) Fa joe kan poeroe sari nanga rampoe foe joe? (b) Oten den jongoe jari èn na bromki foe na libi de soso sani?
7 Foe datmeki Jehovah e taki moro fara: „Poeroe foe dat’ede sari [ofoe réde foe broko-ede] foe joe ati, èn hori rampoe fara foe joe skin; bika jongoe jari nanga na bromki foe joe libi de soso sani” (Prékiman 11:10). A de séker wan koni sani foe tan farawe foe activiteit di bakaten sa gi joe sari problema. O ja, sma sa de di sa taki dati joe e misi wan sani — dati joe no ’libi troetroe’ efoe joe no ben droengoe noiti, no ben abi seks di no mag ofoe no ben doe wan tra sani san „ben de wan prefoeroe sani”. Ma fa den don! „A no warti srefsrefi”, wan jongoe studenti-oemapikin ben kragi nanga watra na ai baka di a ben doe hoeroedoe. „Foe sensi a ten dati mi ben broko mi ede nomo.”
8 Soboen oen jongoewan, sori taki joe koni èn poti prakseri na tapoe na rai foe Gado foe poeroe foe joe ati ibri réde di sa gi broko-ede ofoe spéti, soleki san jongoesma e ondrofeni di e feti na baka wan libifasi pe den prefoeroe foe doe ala sani èn pe den prakseri densrefi nomo. Wan 17-jarhondro skrifiman foe sjatoetori ben taki: „A moro bigi pisi foe jongoe libisma e gebroiki den fosi libijari foe meki den laatste wan de ellendig.” Fa disi de wan sari sani, ma wan troe sani. Te wan jongoesma e pori en skinkrakti nanga koni tapoe wan fasi di e meki a de moro moeilek gi en foe en bakaten jari leki bigisma, dan troetroe joe kan taki dati en jongoe jari nanga bromki foe a libi de wan soso sani! (Odo 22:3) Sori soboen taki joe koni! Gi jesi na a fermane di e kon moro fara: „Memre joe Gran Mekiman na ini joe jonoe dé.” — Prékiman 12:1.
9. Sortoe blesi sa kon gi joe te joe e prakseri Jehovah na ini joe jongoe jari?
9 Te joe e prakseri Jehovah ini joe jongoejari, dan wi sa feni troetroe wini. No wawan dati wi sa tan farawe foe sari nanga rampoe nanga moeilekheid, ma now kaba joe prisiri na ini wan kolokoe libi di e pai foe di joe e dini joe gran Mekiman. Boiti foe dati, nanga koni joe sa de bezig foe tjari goedoe kon makandra na ini hemel, di de foe tégo sa de leki blesi gi joe (Matteus 6:19-21). Efoe now kaba joe e prakseri Jehovah foe doe en wani dan en sa prakseri joe èn pai joe foe di a sa meki den ’begi foe ati’ kon troe, ija, sa gi joe foe tégo wan libi di foeroe nanga kolokoe na ini wan paradijs! — Psalm 37:4; 133:3; Lukas 23:43; Openbaring 21:3, 4.
Fa joe e denki foe Jehovah
10. (a) Foe san-ede na bosroiti foe joe foe dini Jehovah no kan de wan kowroe berekening foe san de koni? (b) Fa Jehovah e taki moro ete nanga joe?
10 Tokoe na bosroiti foe joe foe dini Jehovah no kan de soso wan kowroe berekening foe san de koni. Satan de so wan koni féjanti dati efoe joe denki soso na joe persoonlek wini, a kan man te foe kaba foe wroko tapoe wan ofoe tra firi pe joe e prakseri joesrefi nomo foe hari joe poeroe foe na dini foe Jehovah. Foe dat’ede meki Jehovah no e kari joe wawan foe de koni. Nono, ma ai taki toe nanga joe ati foe joe gi joesrefi persoonlek na en abra. Jezus ben taki: „Joe moe lobi Jehovah, joe Gado nanga heri joe ati” (Mattéus 22:37). Joe sabi san a wani taki foe lobi Jehovah nanga heri joe ati?
11. (a) San a wani taki foe gi Jehovah joe ati? (b) Fa na ondrofeni foe Jozef e sori dati wi joisti boewégi foe ati kan tjari wi foe doe a wani foe Gado?
11 Joe ati abi foe doe nanga na inisé sma foe joe, den boewégi foe joe ati, joe jejefasi èn joe dipi emotie, ini wroko makandra nanga joe ferstan. Lobi Jehovah nanga joe heri ati wani taki foe dat’ede taki joe lobi en tranga èn dati tapoe ala tra sani na ini a libi a de joe faste bosroiti foe prisiri en ati foe di joe e gi en wan piki tapoe na spotoe foe Satan. Na inisé si foe sani disi èn den sortoe dipi firi disi foe lobi nanga belangstelling gi Gado sa de den moro tranga boewégi foe ati foe a doe foe en wani, o moi a mag gersi ooktoe foe waka tapoe wan tra fasi. Na jongoe Jozef ben abi so wan lobi gi Jehovah di wan prenspari oema ben kari en taki: „Kon didon na mi”, Jozef ben piki: „Fa mi ben sa kan doe na bigi takroe-doe disi èn sondoe foe troe na Gado?” — Genesis 39:7-9.
12. (a) Fa joe e sori dati joe kan gi Jehovah joe ati? (b) Sortoe aksi joe moe loekoe efoe joe no wani gi Jehovah joe ati ete?
12 Joe e sori dati joe e lobi Jehovah nanga heri joe ati te joe e go na en ini begi èn e ferteri en dati joe wani de foe en, èn dati joe wani dini en foe tégo. Tapoe a fasi disi joe e gi joesrefi abra na Jehovah. Joe ben doe disi? Efoe no foe san-ede? San e hori joe a baka? Joe owroe nofo foe ferstan dati wan prenspari stré-aksi de a mindri Jehovah nanga Satan, èn san de alamala ini a tori disi? Èn joe ben sa wani prisiri Jehovah ati? Satan séker no wani dati joe lobi Jehovah nanga heri joe ati. A wani dati joe doe joe égi wani tapoe wan gridi fasi, dati joe prisiri joesrefi. Soema joe sa prisiri, Jehovah ofoe Satan? Go prakseri boen foe a sani disi pikinso.
13. Efoe joe gi joe libi abra èn joe teki dopoe, san joe moe aksi joesrefi dan?
13 Efoe joe ben gi joesrefi abra na Jehovah èn joe ben sori disi nanga a teki dopoe na ini watra dan a e kon na krin na ini joe waka nanga libi dati joe ati de troetroe foe Gado? Tapoe san joe poti joe belangstelling, joe lobi? Tapoe a kisi foe wan njoen oto? Tapoe a wroko foe moni foe bai krosi ofoe tra persoonlek sani? Den belang foe soema e kon tapoe a fosi presi — joe égi belang ofoe di foe Jehovah? Joe ben gi jesi troetroe tapoe a taki di Jehovah e taki nanga joe foe gi en joe ati?
14. (a) Sortoe warti sani jongoesma abi? (b) Foe san-ede a de wan sari sani te wan jongoeman no e prakseri en Mekiman?
14 Ala di owroewan abi moro ondrofeni èn gewoonlek moro koni, tokoe jongoewan abi ooktoe wan sani di de warti èn di den kan gebroiki foe plisi Gado. „Na glori foe den jongoewan de ini a krakti foe den”, na bijbel e taki (Odo 20:29). Gebroiki na krakti disi now. Prakseri joe Mekiman „bifo den sari dé” foe na owroedé „o kon”, te a skin kon swaki èn den difrenti pisi foe a skin no wani moro èn no e wroko boen moro. A de wan sari sani te wan sma misi foe prakseri en Mekiman na ini en jongoe jari èn foe dat’ede na ini en owroedé no abi noti foe rikomanderi ensrefi na Gado! A de „a moro bigi soso sani!” (Prékiman 12:1-8) Sori foe dat’ede taki joe koni èn prakseri joe Mekiman ala di joe abi krakti nanga energie ete. Bow wan bericht foe getrow dienst gi Gado di sa prakseri joe nanga wan boen kroetoe, ja, nanga tégo libi. — Hebrewsma 6:10-12; Prékiman 12:13, 14.
Den ben prisiri Gado ati
15. Sortoe eksempre na bijbel abi foe jongoewan di ben gebroiki den krakti na ini na dienst foe Gado?
15 Na bijbel foeroe nanga eksempre foe jongoewan di ben gebroiki na „glori” foe den, a krakti foe den, na ini a dienst foe Gado. A ben de es’esi èn gawgaw „jongoeman” di ben go loekoe a Pramisi Kondre na wan kibrifasi (Jozua 6:22, 23; 2:15, 16, 23). David, di ensrefi ben de soso twenti jari nomo, ben seni tin „jongoeman” foe begi Nabal wan boen (1 Samuël 25:4, 5). Soema ben doe na kefarlek hebi wroko, di den djoe na ondro granman Nehemia ben bow den skotoe foe Jeruzalem baka ala di den ben tanapoe a fesi a kefar foe wan aanval? „Afoe foe den jongoe man”, Nehemia ben ferklari, ’ben de bezig nanga wroko èn afoe foe den ben hori den lansri, den skilt nanga den bo èn nanga den maliënkolder’ (Nehemia 4:1). Èn di Gado ben kiri Ananias nanga en wefi Saffira foe di den ben lé, a ben de ’jongoe man’ di ben tjari den go na dorosé èn beri den. — Tori foe den Apostel 5:5, 6, 10.
16. Jongoewan na ini a ten di psa ben teki prati na sortoe jeje activiteit?
16 A e prisiri Jehovah ati srefsrefi te jongoewan e pristeri densrefi gi sortoe dienst toe di moe doe tapoe wan bepaalde momenti. Tokoe jongoewan ben de ini wan jeje activiteit di ben aksi moro leki skin krakti èn a hori foe bro. „Mi de jongoe foe dé”, Elihu ben erken. Ma tokoe ete Jehovah ben gebroiki en foe pir’ai gi Job (Job 32:4-6) Samuël ben de ete „wan boi” di a ben bigin foe doe dienst ini Jehovah tabernakel na Silo (1 Samuël 2:18). A ben de „wan pikin meisje” di, awinsi a ben de wan srafoe ini na oso foe Naäman sondro frede ben ferteri san Jehovah proféti ben kan doe (2 Kownoe 5:2-4). Di Jehovah ben poti Jeremia leki proféti, Jeremia ben taki: „Mi de wan boi ete” (Jeremia 1:5, 6). „Èn foe taki foe den pikin disi, den fo,” Daniël nanga en dri Hebrew kompe fa den ben de aparti dienstknegti foe Jehovah ini a katibo foe Babylon! (Daniël kapitel 1 nanga 3) Na neef foe Paulus, „wan jongoeman”, ben handri nanga dek’ati ini a belang foe en omoe (Tori foe den Apostel 23:16-22). Dan joe ben abi wan boi Timóteus, di foe sensi pikinnengre ten ben sabi den Santa Boekoe èn di ben gebroiki en jongoe jari ini Jehovah dienst. — 2 Timóteus 3:15; Filipi 2:19-23; 1 Korinte 4:17.
Prisiri na ati foe Jehovah na ini a ten disi
17. Foe san-ede wi kan ferwakti dati na ini a ten disi jongoewan ben sa de di plisi Jehovah èn den de ooktoe?
17 Èn no wawan jongoewan na ini a ten di pasa ben prisiri Jehovah ati nanga na getrow dienst foe den. „’Ini den laatste dé’, Gado e taki ’mi sa kanti afoe foe mi jeje tapoe ala sortoe foe skin èn oen manpikin èn oen oemapikin sa taki profétitori. Èn oen jongoeman sa si visioen’” (Tori foe den Apostel 2:17; Joël 2:28). Wi kan ferwakti soboen nanga leti dati na ini den laatste dé disi foeroe jongoe kristen sa de di e plisi Jehovah. Èn den dati de ooktoe! Aladi jongoe Kotoigi no de sondro mankeri, san te joe loekoe en boen no de so nanga nowan foe oen, tokoe foeroe foe den de toemsi boen kristen. Den e broko den ede foe prisiri Jehovah ati. — Odo 21:11; 3:1, 2.
18, 19. Sortoe wroko e doe now, èn foe san-ede jongoewan de spesroetoe boen foe dati?
18 Na ini den laatste dé disi a de a wani foe Jehovah dati wan bigi kotoigi na a heri grontapoe gi foe en Kownoekondre, san e aksi bigi moeiti (Mattéus 24:14). Kownoekondrezaal foe anbegi moe bow èn ooktoe moro bigi oso foe kringkomakandra. Na ini foeroe kondre moro drukkerij presi de fanowdoe foe meki bijbellektuur èn na presi foe libi na ini den Betheloso moe kon moro bigi. Foe kan sorgoe na ini den njoen faciliteit disi, meki hebi bowwroko moe doe, èn netleki na a bow foe na skotoe na ini Nehemia ten, dan jongoe man di abi krakti nanga bro e doe foeroe foe na wroko.
19 Den sortoe jongoeman disi e doe ooktoe na moro bigi pisi foe na hebi skinwroko di moe doe foe druk ala jari doesoendoesoen ton bijbellektuur, foe tai den èn foe seni den gwe. Ija, moro leki 1400 jongoewan foe 25 jari èn moro jongoe de tapoe na edekantoro foe Jehovah Kotoigi ini New York èn a tapoe den Watchtower Farms. Na ini a dienst foe den a no de soso nomo na wroko di e aksi foeroe foe joe skin dati den e doe na ini na ten foe a wiki; na den kaba foe den wiki makandra nanga den gemeente pe den de na ini den e teki prati na a oso foe osowroko èn den e go na den kristen komakandra. Fa den e prisiri Jehovah ati!
20. (a) Sortoe prati jongoewan abi na a pionierwroko? (b) Sortoe aksi jongoewan moe aksi densrefi di no de na ini a foeroetendienst?
20 Ini den Verenigde Staten moro leki tindoesoen trawan foe na srefi libiten groepoe e doe dienst leki gewone pionier, skowroe na skowroe nanga den jongoewan disi makandra. Ini tra pisi foe na grontapoe joe abi tindoesoendoesoen jongoewan ete di e pionier toe. Efoe joe de wan jongoewan di no de ete na ini na foeroetendienst joe kan poti dan marki na joe fesi sodati joe e meki Jehovah kon dan na ini a fosi presi na ini joe libi, na presi foe kande poti wan marki foe kisi wan boen wroko di e pai, moro fara foe trow èn foe abi wan osofamiri? Joe e ferstan a bigi stré-aksi ini a universum? Joe e angri troetroe foe si dati na nen foe wi Gran Mekiman kon soifri foe ala sjen? Efoe dati de so, dan a no de wan sani di fiti dati joe doe someni leki a kan na ini Jehovah dienst? Èn dati no ben sa wani taki, awansi fa a no gi foeroe moro foe oenoe, foe pristeri joesrefi nanga joe fri wani foe dini ini Betheloso ofoe foe teki prati na a pionierwroko?
21. (a) Joe moe gi jesi na sortoe kari foe Jehovah èn tapoe sortoe fasi? (b) Foe san-ede wi sa abi foeroe fertrow dati foeroe moro jongoewan netleki Jesaja sa gi jesi na a kari foe Jehovah?
21 Arki! Jehovah e gi joe na kari, ija, e taki krakti nanga joe foe gi en wan piki tapoe na godelowsoe spotoe foe Satan. Joe kan jere netieki Jesaja fa Jehovah e aksi: „Soema mi sa seni go, èn soema sa go gi wi?” Foe san-ede joe no ben sa de so koni foe doe net soleki Jesaja: „Dja mi de! Seni mi” (Jesaja 6:8). Wi abi foeroe fertrow dati foeroe moro jongoewan foe oenoe ete, sa gi jesi na a kari bika a Wortoe foe Jehovah abi na pramisi: „A pipel foe joe sa pristeri densrefi nanga den heri ati na tapoe na dé foe joe sroedatimakti . . . Joe abi joe kompani foe jongoeman [èn oemasma] netleki dowdropoe” (Psalm 110:3; 148:12, 13). Èn te joe e gi jesi na a kari, dan joe kan njan prisiri foe sabi dati Jehovah e loekoe joe èn e feni joe boen, dati troetroe joe e prisiri en ati!
Loekoe baka sjatoe san wi ben leri
◻ Foe san-ede a fasi fa wi e libi de prenspari gi Jehovah?
◻ Foe san-ede a de wan koni sani foe prisiri Jehovah ati?
◻ Fa wi kan sori dati wi ben gi Jehovah wi ati?
◻ Soema na ini a ten di psa ben prisiri Jehovah ati?
◻ Soema e prisiri Jehovah ati na ini a ten disi èn na sortoe fasi?