Jezus libi nanga diniwroko

Na profétitori foe Jesaja e kon troe

EFOE Jezus e jere dati den Fariséman nanga den partijman foe Herodes e meki plan foe kiri en, dan en nanga en discipel e hari go na a Se foe Galiléa. Djaso bigi ipi sma foe heri Palestina èn srefi foe abra na grens e hari kon na en. A e dresi foeroe sma, nanga a bakapisi dati ala sma di abi wan hebi siki e poesoe foe kan fasi en.

Foe di na ipi sma de so bigi, meki Jezus e ferteri en discipel foe abi alaten wan boto di a kan gebroiki. Foe di a kan hari komoto na a sjoro a kan meki dati den ipi sma no poesoe kon krosbé foe en. Komoto foe a boto a kan leri den ofoe waka sé na sjoro go na wan tra gebied foe jepi sma drape.

Na discipel Mattéus e ferteri dati nanga na activiteit foe Jezus e kon troe „san na proféti Jesaja ben taki”. Dan Mattéus e teki na profétitori skrifi di Jezus ben meki kon troe, dati wani taki:

„Loekoe! Mi knegti, di mi ben teki, mi lobiwan, di mi sili ben feni boen! Mi sa poti mi jeje tapoe en, èn a sa tjari kon krin gi den naatsi san na geregtigheid. A no sa meki trobi èn ooktoe no sa bari tranga, èn ooktoe wan sma no sa jere en sten tapoe na bradi strati. Wan broko ken a no sa masi èn wan kokolampoe di e leti safrisafri a no sa kiri te leki nanga boen winimarki a seni geregtigheid go na doro. Foetroe, tapoe en nen den naatsi sa howpoe.”

Na lobi knegti di Jehovah e feni boen de, Jezus èn dati no de foe taki. Èn Jezus e meki ken na krin san de troetroe geregtigheid, di falsi kerki gwenti e meki kon doengroe. Den Fariséman, foe na onregtvaardikifasi fa den ben e gebroiki na wèt foe Gado, no ben sa kon jepi wan sikiman srefi na tapoe na sabbat! Jezus e tjari soboen kon na krin san a geregtigheid foe Gado de foe di a e ferloesoe sma foe na hebi foe onregtvaardiki gwenti, èn dati de a rede foe san-ede den kerki fesiman wani foe kiri en.

San a wani taki dati ’a no sa meki trobi, no sa opo en sten foe sma jere en na tapoe den bradi strati’? We, te Jezus e dresi sma, ’a e taigi den nanga tranga sten foe no ferteri foe en na publiki’. A no wani dati na tapoe strati na wan babari fasi reklama e meki foe en ofoe dati ala sortoe span tori foe en e go mofo foe mofo èn e drai en poti fa sma wani.

Ooktoe Jezus e tjari en boskopoe di e gi trowstoe go a sma di na agersifasi de leki wan broko ken, di broko a toe èn di sma waka na en tapoe. Den de leki wan kokolampoe di abi faja di e leti safrisafri, di a laste pikin libi pikinmoro o komoto gwe. Jezus no e masi na broko ken ofoe e kiri na kokolampoe di e gi smoko èn di a faja foe en e degedege. Ma nanga safrifasi èn nanga lobi a e opo nanga konifasi den safri atisma. Ija, Jezus de a sma tapoe soema den naatsi kan howpoe. Mattéus 12:15-21; Markus 3:7-12; Jesaja 42:1-4.

◆ Fa Jezus e sori krin san na geregtigheid, sondro dati a e meki trobi ofoe e opo en sten tapoe den bradi strati?

◆ Soema de leki wan broko ken èn wan kokolampoe, èn fa Jezus e behandel den?