Jehovah prisiri jari — Wan ten foe prisiri gi wi

„Èn joe moe santa na di foe féfitenti jari èn bari fri na ini na kondre gi ala den sma di e libi na ini en. A sa tron wan prisiri jari gi oenoe. . . A moe tron wan santa sani gi oenoe . . . Dan seiker joe sa libi na ini sekerfasi na ini na kondre”. — LEVITICUS 25:10-12, 18.

1. Sortoe wortoe tanapoe na tapoe na Oloisi foe fri èn pe den teki den wortoe poeroe?

PE JOE e libi ooktoe joe ben jere kande foe na barinen Oloisi foe fri, di de na ini Philadelphia (Pennsylvania, VS). Na World Book Encyclopedia e taki dati na oloisi disi ben naki gengen makandra nanga tra kerki oloisi tapoe 8 juni 1776 foe barwroko dati den ben teki na onafhankelijkheidsverklaring. Den sani di skrifi na tapoe na oloisi de: ’Bari fri na ini heri na kondre èn gi ala den sma di e libi na ini’, na wortoe di den teki foe bijbel (Leviticus 25:10).

2. Fa joe e prakseri foe na ferwakti foe fri, ma san den problema ben sa kan de di kan sori densrefi na ini disi?

² Fri e sori taki a de alaten ete wan sani di e hari sma kon, a no so? Kande joe ben sa prisiri srefsrefi na a froewakti foe troetroe fri — wan toestand pe wan sma e kon fri foe fowtoe denki, foe politiek druk ofoe kwinsi, foe a swaki di owroedé nanga siki e meki wan sma kon swaki nanga na kabapisi di e kon dati wani taki dede. Efoe dati de so, dan boen rede de foe joe prisiri èn djonsro moro rede sa de ete. ’Fa dati kan now’? joe e aksi kande, foedi te nanga no nowan enkri tiri tjari fri kon dorodoro èn nowan koniman nowan datra ben kan meki dati a proces foe kon owroe, siki èn te foe kaba dede no feni presi. Ma wi e taki a sani ete wantron: Wan fondamenti de foe joe kan prisisi na ini fri. Foe begrijp fa dati o psa, a de boen foe go loekoe prenspari bodoi foe sani di psa èn di now èn ini a ten di psa sa kan abi krakti tapoe joe.

3. San ben de a Prisirijari, èn san ben psa na a jari dati?

³ Den wortoe di tanapoe dja na tapsé e gebroiki a wortoe „prisirijari”. A Prisirijari ben de wan pisten foe wan jari di ben de gi a kondre Israël leki wan sabbat. A ben waka kon a baka wan lo foe sébi pranigronsabbatjari abra wan pisten foe ala nanga ala 49 jari. A di foe 50 jari, na Prisirijari, ben de wan hémarki foe wan lo sabbatfesa gi na kondre di Jehovah ben gi na en pipel foe meki na pramisi kontroe di a ben gi na den fosten tata, Abraham, „Jehovah mati” (Jakobus 2:23; Jesaja 41:8). Na a ten foe na Prisirijari dan fri e bari ini na heri kondre. Disi ben wani taki dati ala Israëlsma di ben sei densrefi go ini katibo foe paiman ede, ben moesoe go ini fri. Wan tra marki foe na Prisirijari ben de dati ala gron di ben de leki wan famiri-goedoe èn di den ben seri (nofotron foedi problema ben kon na monisé), ben moe gi baka na a famiri. — Leviticus 25:1-54.

4. Oten den ben taki dati a Prisirijari ben bigin èn fa?

⁴ Nanga a ferstan disi foe den sani disi joe sa ferstan foe san-ede na Prisirijari ben de wan féstijari foe fri. A marki ben gi dati a bigin foe di na a Verzoendé den ben meki den bro wan toetoe.a Soleki Mozes ben skrifi na ini Leviticus 25:9, 10: „Na ini na di foe sébi moen, tapoe a di foe tin dé, dan joe moe meki sma jere na toetoe di e gi bigi babari; tapoe na Verzoendé oenoe moe meki na toetoe bari tranga ini heri joe kondre. Èn joe moe santa na di foe féfitenti jari èn bari fri ini a kondre gi ala den sma di e libi na ini. A sa tron wan Prisirijari gi oenoe, èn ibriwan foe oenoe moe drai go baka na a goedoe foe en èn ibriwan foe oenoe moe drai go baka na den famiri foe oenoe.” Na ini 1473 bifo G.T. den Israëlsma ben koti na liba Jordaan abra ondro na tiri foe Jozua èn ben go ini na Pramisi Kondre, pe den ben moesoe hori na Prisirijari.

Wan fri di ben bari biginbigin

5. Sortoe fasi foe fri èn foe na Prisirijari wi sa go loekoe?

⁵ San wi taki dja na fesi kande gersi owroe historia di no wani taki foeroe gi na libi foe wi, spesroetoe efoe wi no komoto foe djoe famiri. Ma Jezus Kristus ben wan boen rede foe froewakti wan moro bigi Prisirijari. Disi de na fundamenti foe a prisiri foe wi foe fri èn kon fri. Foe ferstan foe san-ede dan wi moe ferstan fa Jezus na ini na fosi jarhondro ben sorgoe foe toe fasi foe kon fri. Morofara wi sa kon si fa den toe fasi disi e kroederi nanga toe fri ofoe ferloesoe na ini wi égi libi, na ferloesoe tapoe wan moro bigi fasi, èn di e gi oenoe boiti foe dati wan moro bigi rede foe prisiri.

6, 7. (a) Sortoe wondroe sani di ben psa ben taki afesi na ini Jesaja 61:1-7? (b) Fa Jezus ben sori dati Jesaja profétitori ben e kontroe?

⁶ Na ini Jesaja 61:1-7, aladi a no langalanga den e taki foe na owroe Prisirijari, den e sori profétis tapoe wan sortoe ferloesoe foe a ten di e kon: „Na jeje foe na Soeverein Masra, de tapoe mi, bika Jehovah ben salfoe mi foe ferteri den safri-atisma boen njoensoe. A ben seni mi foe tai den wan di ati ben broko, foe bari fri gi den wan di den ben kisi èn meki den ai kon opo bradi srefu foe den strafoeman; foe bari na jari foe boen wani foe na sé foe wi Gado; foe trowstoe ala den wan di e sari. . . Prisiri te ten di no abi marki sa kon de foe den.” Ma fa èn oten na profétitori disi ben sa kon troe?

⁷ Baka na fesa foe na Pascha ini 30 G.T. Jezus Kristus ben go tapoe na sabatdé ini wan djoekerki. Drape a ben lési wan pisi foe na profétitori foe Jesaja èn a tjari en kon tapoe ensrefi. Lukas 4:16-21 e taki wan pisi: „A ben opo na boekoelolo èn ben feni na presi pe skrifi taki: ’Jehovah jeje de tapoe mi, bika a ben salfoe mi foe meki boen njoensoe bekenti gi den pôtiwan, a ben seni mi foe préki fri gi den wan di den ben kisi èn foe meki a ai foe den breniwan kon boen baka, èn foe seni den wan di den ben masi go ini fri, foe préki Jehovah jari foe boenati’. . . Ne a ben bigin foe taigi den: ’Tide den wortoe disi di oen ben jere djonsro kontroe.’”

8. (a) Na ini sortoe fri biginbigin Jezus ben sorgoe? (b) Fa disi de leki wan eksempre na ini Johannes 9:1-34?

⁸ Na boen njoensoe di Jezus ben meki bekenti, e sorgoe ini jeje fri ofoe ferloesoe gi den djoe di ben teki en. Foedi den ai ben kon opo foe san na troe anbegi ben wani taki troetroe èn den wet di ben de ini a tori dati, meki den ben kon fri foe foeroe fowtoe denki (Mattéus 5:21-48). Na fri disi ben de foe moro bigi waarde leki na dresi di Jezus ben dresi sma. Foe dat’ede meki, aladi Jezus ben opo na ai foe wan man di sensi a ben gebore ben breni, tokoe a man disi e kisi moro boen sani di ben abi waarde foedi a ben erken Jezus leki na proféti foe Gado. Na njoen fri foe na man dati ben de moro krin leki na toestand pe den kerki tiri man ben de na ini, di ben de srafoe foe gwenti foe den èn fowtoe bribi èn overtoigi (Johannes 9:1-34; Deuteronomium 18:18; Mattéus 15:1-20). Tokoe disi ben de ete soso wan fri di ben bigin ofoe wan fosi fri. Ini na fosi jarhondro ete Jezus ben sa jepi foe wan tra sortoe fri bigin kon, di ben abi wan parallel ini a Prisirijari foe na owroe Israël. Foe san-ede disi de wan redelek sani foe loekoe en so?

9. Sortoe fasi foe katibo ben tan de srefi gi gi den sma di ben kon fri na jejefasi?

⁹ Jezus ben taigi na man di ben breni fosten: „Foe na kroetoe disi mi ben kon na ini na grontapoe disi: dati den sma di no si ben sa si èn den sma di e si ben sa kon breni.” Ne Jezus taigi den Farisman: „Efoe oenoe ben breni, dan oenoe no ben sa abi sondoe. Ma now oenoe e taki: ’Wi e si.’ Oen sondoe e tan” (Johannes 9:35-41). Ija, sondoe di ben abi dede leki bakapisi, ben de wan bigi problema ete, net soleki now (Romeini 5:12). Den djoe, makandra nanga den apostel, di ben njan boen foe na fri biginbigin, a jeje fri di Jezus ben sorgoe foe en, ben tan de onvolmaakti libisma. Den ben tan srafoe foe sondoe nanga na dede di e komoto foe dati. Jezus ben sa kan tjari kenki kon na ini dati? A ben sa doe en ooktoe? Èn efoe a de so, oten?

10. Jezus ben pramisi foe sorgoe morofara gi sortoe fri ete?

¹⁰ Jezus ben taki afesi: „Efoe oenoe tan ini mi wortoe, dan oenoe sa de troetroe discipel foe mi èn oenoe sa sabi na waarheid èn na waarheld sa meki oenoe kon fri.” Den djoe arkiman ben piki en: „Wi na Abraham pikin, èn noiti wi ben de na srafoe foe wan tra sma. Fa joe kan taki dan: ’Oenoe sa kon fri’?” Jezus ben piki: „Foetroe, foetroe, mi e taigi oenoe: ala sma di e doe sondoe, de wan srafoe foe na sondoe. Boiti dati na srafoe no e tan foe tego ini na osofamiri, na manpikin e tan foe tego” (Johannes 8:31-36). Foedi den djoe na skinfasi ben komoto foe Abraham, dan dati no ben sa kan fri den foe dat’ede foe na katibo foe sondoe. Jezus ben taki den historia wortoe disi foe a tori foe fri foedi a ben wani poti a prakseri foe sma tapoe wan sani di ben sa kon èn di ben sa de moro bigi leki san den Israëlsma ben ondrofeni oiti na ini wan Prisirijari.

Na kristen Prisirijari e bigin

11. Foe san-ede na belangstelling di wi abi gi na kristen Prsisijari e poti ensrefi spesroetoe tapoe na jari 33 G.T.?

¹¹ Den djoe no ben si dati na Prisirijari di na wet foe Mozes ben skrifi foe en ben de wan agersifasi foe wan moro bigi Prisirijari (Kolosse 2:17; Efese 2:14, 15). Na a Prisirijari disi gi kristensma na „waarheid” di kan meki sma kon fri de ini a tori — a waarheid na ini san na Manpikin Jezus Kristus de na mama foe a tori (Johannes 17:17). Oten na fesa foe na moro bigi Prisirijari dati ben bigin, di ben kan tjari srefi fri kon foe na sondoe èn na bakapisi foe en? Na ini na lente ofoe pikin dréten foe 33 G.T., tapoe a dé foe na pinksterfesa. Disi ben de tin dé bakadi Jezus ben opo go na hemel foe pristeri na waarde foe en srakti-ofrandi na Jehovah Gado. — Hebrewsma 9:24-28.

12, 13. San ben psa na baka a dede foe Jezus, sodati den disipel foe en esesi a baka dati ben abi wan aparti ondrofeni?

¹² Bifo Jezus ten no wan libisma oiti ben opo foe dede go kisi tego libi (Romeini 6:9-11). Ala sma ben go sribi na ini dede na a tra sé èn ben sa tan sribi te a ten ben doro dati na libismafamiri ben sa kisi wan opobaka. Foedi Jezus Kristus nanga jepi foe na krakti foe Gado ben kisi wan opobaka foe na dede, dan, soleki na bijbel di skrifi nanga jepi foe Jehovah jeje e taki „a ben tron na fosiwan foe den di ben go sribi”. — 1 Korinte 15:20.

¹³ Féfitenti dé baka en opobaka a boewijsi ben gi dati na Jezus Kristus di ben opo komoto foe dede ben opo go na hemel èn ben sori ensrefi na ini na denoja foe Jehovah Gado nanga na waarde foe en volmaakti libisma srakti-ofrandi èn ben gebroiki na waarde dati foe na boen foe na libismafamiri. Disi ben de na tapoe na dé foe na pinksterfesa ini 33 G.T. 120 discipel ben kon makandra na ini Jeruzalem foedi den ben gi jesi na a komando foe Jezus, Ne Kristus ben kanti leki wan kontroe foe Joël 2:28, 29 santa jeje tapoe den discipel disi. Tongo leki faja ben zweef na tapoe na ede foe den, èn den ben bigin foe taki na ini tongo di den no ben sabi afesi (Tori foe den Apostel 2:16-21, 33). Disi ben de a boewijsi dati na Jezus Kristus di ben opo komoto na dede ben opo go na hemel èn ben sori ensrefi na fesi foe Gado nanga na waarde foe wan volmaakti libismasrakti-ofrandi di ben kan gebroiki foe na boen foe na libismafamiri.

14. (a) Na ini sortoe situatie den discipel foe Kristus ben de ini a tori foe den ferbontoe? (b) Sortoe aparti blesi na njoen ferbontoe ben abi na ini en?

¹⁴ Sortoe bakapisi disi ben abi gi den discipel dati? Foe bigin dan den ben kon fri foe na wetsferbontoe foe Mozes di Gado ben meki nanga na natie foe Israël na skinfasi, ma di a ben poeroe now foedi a ben spikri en na a pina-oedoe foe Jezus (Kolosse 2:13, 14; Galacia 3:13). Wan njoen ferbontoe ben kon na ini a presi foe a ferboentoe dati, di no ben meki nanga na natie foe na Israël na skinfasi, ma nanga na njoen „natie foe a jeje Israël” (Hebrewsma 8:6-13 Galacia 6:16). Na njoen ferbontoe disi, di Jeremia 31:31-34 ben taki foe en a fesi, ben doe kon via wan mindriman di ben de moro bigi leki na proféti Mozes foe owroeten. Foedi wi abi belangstelling gi fri meki wi moe loekoe spesroetoe wan fasi foe a njoen ferbontoe. Na apostel Paulus e poti na prakseri tapoe disi di a ben skrifi: „’Disi na a ferbontoe di mi sa meki nanga den baka den dé dati,. . . mi no sa prakseri den sondoe foe den èn den kroektoedoe foe den kwetkweti moro’. We, pe disi e kisi pardon, na drape offer presenti no de moro gi sondoe.” — Hebrewsma 10:16-18.

15. Foe san-ede wi kan taki dati tapoe na dé foe na pinksterfesa na ini na jari 33 G.T. na kristen Prisirijari ben bigin gi salfoewan? (Romeini 6:6, 16-18)

¹⁵ Jezus ben sori na tapoe na fri foe sondoe disi di a ben taki: „Efoe na Manpikin meki joe fri, dan joe sa de fri troetroe” (Johannes 8:36). Go prakseri disi — foe kan de fri foe sondoe na tapoe na gron foe a srakti-ofrandi foe Kristus. Bigin tapoe na pinksterdé Gado ben ferklari bribiwan regtvaardiki èn ben teki den baka dati, ben adopteer den, leki jeje manpikin di abi na ferwakti foe tiri nanga Kristus ini hemel. Paulus e tjari kon a krin: „Bika oenoe no ben kisi wan jeje foe katibo, di agen e meki frede kon, ma oenoe ben kisi wan jeje foe teki oenoe leki manpikin. . . efoe wi de dan pikin, dan wi de ooktoe erfgenaam, ija, erfgenaam foe Gado, ma mede-erfgenaam nanga Kristus” (Romeini 8:15-17). A ben de wan sani di degedege no ben de na ini dati na kristen Prisirijari ben bigin gi salfoe kristen.

16. Sortoe blesi èn ferwakti, den wan di ben e hori na kristen Prisirijari ben sa kisi morofara ete?

¹⁶ Soboen na tapoe a dé dati foe na pinksterfesa na ini na jari 33 G.T. na njoen natie, na jeje Israël doe kon. A ben abi na ini en libisma di ben kisi pardon foe sondoe tapoe na gron foe na ofrandibroedoe foe Kristus (Romeini 5:1, 2; Efese 1:7). Soema foe wi ben sa taki dati a no de so dati den fosi memre dati foe na jeje Israël di ben teki poti na ini na njoen ferbontoe ben ondrofeni wan wondroe fri foedi den ben kisi pardon foe den sondoe? Gado ben meki den tron „’wan geslagti di den ben ferkise, wan kownoe priesterwroko, wan santa natie, wan pipel di de wan spesroetoe goedoe, sodati den ben sa meki den toemsi moi sani bekenti’ foe na Sma di ben kari den komoto foe na doengroe kon na a wondroe leti foe en” (1 Petrus 2:9). Seker, na skin foe den foe meti ben de onvolmaakti ete èn te a ten ben sa doro den ben sa dede. Ma now di Gado ben ferklari den regtvaardiki èn ben teki den leki jeje manpikin, dan a dede foe den ini meti de soso wan „kon fri”, sodati den ben sa kisi wan opobaka go na Kristus „hemel kownoekondre”. — 2 Timóteus 4:6, 18.

17, 18. Foe san-ede na fri di na kristen Prisirijari ben tjari nanga en ben abi moro waarde leki na biginbigin fri di Jezus ben bari wroko foe en?

¹⁷ Na biginbigin ofoe fosi stap, di ben wani taki dati bribi djoe ben kon fri foe fowtoe denki nanga fowtoe doe ben de foe bigi waarde. Ma wi ben si dati Jezus no ben libi na tori na a jeje fri dati. Foe sensi pinksteren 33 G.T. a ben fri bribisma poeroe foe na „wet foe sondoe èn dede”. (Romeini 8:1, 2). Na so na kristen Prisirijari ben bigin gi salfoe kristen. Disi ben de troetroe wan moro waarti fri, bika nanga dati na ferwakti tapoe libi ini hemel leki mede-erfgenaam nanga Kristus ben de wan pisi foe en.

¹⁸ Te so fara wi loekoe toe fasi foe kristen fri ini na fosi jarhondro, di seker ben de wan fonten foe prisiri. Èn den bribiwan ini na fosi jarhondro ben prisiri foe troe (Tori foe den Apostel 13:44-52; 16:34; 1 Korinte 13:6; Filippi 4:4). Disi spesroetoe ben de so ini a tori foe na prati di den abi ini na kristen Prisirijari, di ben opo a pasi gi den foe kisi tego blesi ini hemel. — 1 Petrus 1:3-6; 4:13, 14.

19. Sortoe aksi e tan ini a tori foe kristen di na jeje no wiki, èn san e sori dati den sa abi wan prati na wan fri di Gado ben gi?

¹⁹ Ma pe a morobigi pisi foe den troe kristen foe now e fiti na ini a prenki, foedi den no ferklari regtvaardiki foe kisi libi èn no kisi salfoe nanga santa jeje? Rede de ini bijbel te wi loekoe na kristen Prisirijari foe ferwakti wan moro bigi fri di de foe na boen foe den. Prakseri pikinso na a sani san tanapoe na ini Tori foe den Apostel 3:20, 21: „Jezus di aladi a moe tan ini hemel te na den ten foe a kon boen foe ala sani di Gado ben taki foe den nanga mofo foe santa proféti foe owroeten” (Teki gersi nanga Tori foe den Apostel 17:31.) Na ini na fasi dati Johannes, wan salfoe apostel di ben prisiri kaba na ini den blesi foe na kristen Prisirijari ben skrifi foe Jezus Kristus: „A de wan zoenofrandi gi wi sondoe, ma no wawan gi di foe wi, ma ooktoe gi di foe na heri grontapoe” (1 Johannes 2:2). Disi wani taki dati den foeroe loyaal kristen na ini a ten disi di no abi wan hemel howpoe, kan prisiri ini kristen fri? Dati de soso wan sani foe a ten di e kon, ofoe wi abi now kaba rede foe prisiri? Dati wi kan kon sabi te wi go ondrosokoe den fasi foe kristen fri èn foe na Prisirijari di abi wan spesroetoe betekenis gi troe anbegiman ini a ten disi.

[Foetoewortoe]

Joe e prakseri foe disi?

◻ San ben de den winimarki foe na Prisirijari ini na owroe Israël?

◻ Fa Jezus ben bari wan bigin fri, èn san ben de ini a tori?

◻ Oten na kristen Prisirijari ben bigin, èn san de na gron foe na bosroiti disi?

◻ Foe san-ede wi abi rede foe loekoe na a fri foe den miljoenmiljoen kristensma di no wiki na ini jeje?

[Prenspari pisi na tapoe bladzijde 1]

„A pasi foe den regtvaardikiwan de leki na brenki leti, di e kon moro krin te leki a dé kon bigi” (Odo 18:4). Ini akroederi nanga na gronprakseri dati, dan na artikel disi èn a trawan na en baka e tjari wan tra loekoe na wan bradi fasi kon a krin san na Prisirijari wani taki.

[Prenki na tapoe bladzijde 2]

Jezus e bari fri ini 30 G.T.

[Prenki na tapoe bladzijde 4]

Na kristen Prisirijari e bigin ini 33 G.T.