Na kristen Prisirijari e doro en hémarki ini na Millennium (doesoen jari tiri)
1. San den djoe na ini na republiek Israël no ben proeberi foe tjari kon baka, èn foe san-ede?
SREFI na ini na republiek Israël di (ben opo na ini 1948) den foeroe djoe di e bribi dati den de na ondro na wet foe Mozes no ben tjari na fesa foe na Prisirijari kon baka foe hori, èn foeroe moeilijkheid ben sa kon efoe den ben sa proeberi dati. Bigi economia problema ben sa de a bakapisi, bika reti foe goedoe de ini a tori. Na republiek Israël no abi na heri kondre ini en makti di den twarfoe lo foe owroeten ben e libi na ini. Ooktoe nowan tempel de nanga wan hépriester foe na lo foe Levi, bika den bodoi di moe sori foe sortoe lo wan sma de, lasi.
2. Fa son kristen bigin kaba nanga a njan foe a fesa foe wan Prisirijari di na Prisirijari foe na owroe Israël ben de wan agersifasi?
2 Ma ofara dati abi krakti tapoe wi positie ini a tori foe den blesi foe wan Prisirijarifesa? Wi e memre dati na owroe Prisirijari ben de wan fesa jari foe fri Israëlsma di ben seri densrefi leki srafoe, ben kon fri èn den ben kisi den famirigoedoe foe kon baka (Leviticus 25:8-54). Ini na artikel afesi wi ben si dati na seti disi ben kon na wan kaba di na ini 33 G.T. na Wetferbontoe foe Mozes ben stop foe de (Romeini 7:4, 6; 10:4). Ne wan njoen ferbontoe ben kon, tapoe a gron foe san Gado ben kan gi pardon na den sondoe foe bribiman, ben kan salfoe den nanga santa jeje, èn ben kan teki den leki manpikin nanga wan hemel howpoe (Hebrewsma 10:15-18). Den sma di na a fasi dati ben njan boen foe den seti disi ini a tori foe na njoen ferbontoe ben de soso wan „pikin ipi” foe 144.000 sma di „den ben bai poeroe foe grontapoe”. Fa den miljoenmiljoen tra loyaal kristen foe dat’ede kan njan boen foe na fri di na Prisiri jari ben de wan prenki foe en? — Lukas 12:32; Openbaring 14:1-4.
Wan srakti-ofrandi gi ala sma!
3. O boen na srakti-ofrandi foe Jezus de èn olanga den winimarki foe en e tan?
3 Ini den ten bifo Kristus den winimarki foe na ala jari Verzoendé ben tan soso wán jari. Den winimarki foe na ferloesoe-ofrandi foe Masra Jezus Kristus e tan foe a ala ten, ija foe tego. Foe dat’ede meki na agersi Hépriester, Jezus Kristus, no a foe tron ete wantron libisma, èn dede leki srakti-ofrandi èn dan go baka na hemel foe pristeri ibri jari baka a waarde foe na srakti-ofrandi dati ini na moro santa presi foe Jehovah Gado. Soleki na bijbel e ferklari: „Kristus, now di a opo baka foe dede, no e ede moro. . .; dede no de masra moro tapoe en.” — Romeini 6:9; Hebrewsma 9:28.
4, 5. (a) Nanga sortoe winimarki Jezus srakti-ofrandi foe sensi Pinksteren 33 G.T. ben gebroiki? (b) San e sori dati en srakti-ofrandi sa gebroiki moro bigi?
4 Foe dat’ede meki bribiman ini den jari foe sensi Pinksteren foe 33 G.T. ben tron discipel di ben wiki nanga santa jeje foe a glori Jezus Kristus, ben o njan na kristen Prisirijari. Foe sensi a ten di den „ben kon fri foe na wet foe sondoe èn dede”, den e njan boen foe wan fri di e gi den krakti (Romeini 8:1, 2). Ooktoe den ben meki na kristen boskopoe bekenti sodati tra sma ete ben kan kisi pardon foe sondoe, ben sa kisi salfoe èn ben kan tron jeje manpikin foe Gado, Ma disi wani taki dati wan sma di no de foe na skotoe groepoe dati foe 144.000, no kan ondrofeni now no wan prisiri fri?
5 Ini a pistori disi dan den wortoe foe na apostel Paulus a ini Romeini 8:19-21 wani taki foeroe: „Na faja ferwakti foe na mekisani e wakti tapoe a kon a krin foe den manpikin foe Gado. Bika na mekisani ben poti na ondro sosofasi [foedi a ben de nanga sondoe èn no man foe poeroe sondoe].” Morofara Paulus e poti krakti a tapoe, dati „howpoe de dati na mekisani srefi sa kon fri foe na katibo foe porifasi èn sa abi na glori fri foe den pikin foe Gado”. Na fri dati no de foe dat’ede wan skotoe sani gi den di tron „pikin foe Gado” ini hemel. Den wortoe foe Johannes 3:16 di ala sma sabi e sori disi. Èn soleki wi ben si kaba dan na salfoe apostel Johannes ben taki dati Kristus ben dede „gi wi sondoe, ma no wawan gi den di foe wi, ma ooktoe gi di foe na heri grontapoe”. — 1 Johannes 2:2.
1919 — Wan fri di ben bigin
6, 7. Sortoe fri den bariwroko foe en foe sensi 1919, èn foe san-ede spesroetoe foe sensi a ten dati?
6 Na ini a ten disi den salfoewan di e hori na kristen Prisirijari ben ferteri boen njoensoe di e tjari fri kon, spesroetoe sensi 1919. ’Foe san-ede foe sensi a ten dati?’ kande joe e aksi joesrefi efoe joe ben gebore baka a jari dati. Meki oen si dati pikinso èn hori nanga dati ini prakseri dati ai go foe fri ini san joe kan prisiri na ini.
7 Tintin jari bifo a ten dati Jehovah salfoe Kotoigi ben tjari bijbel waarheid ini boekoe kon na doro soleki na ini den barinen lo foe Schriftstudiën (1886-1917). Ooktoe den ben prati foeroe brochure nanga traktaat di ben gi foeroe bodoi. Ini na ten foe na fosi Grontapoefeti wan ten ben kon foe gens, tesi, nanga teki poeroe san no boen a mindri san boen, èn den ben kon slap na ini na activiteit foe den. Ma na ini 1919 na salfoe fikapisi ben go nanga wan njoen faja baka, na fesi foe meki bijbel waarheid bekenti. Netleki fa Jezus ben kan taki na ini 30 G.T. dati a ben kisi salfoe „foe préki fri gi den wan di ben de ini strafoe, èn gi den breniwan foe kon si baka”, na so den disiten salfoe Kotoigi ben kan taki dati ooktoe. Baka na kongres foe 17 september 1919a di ben gi den dekati den ben hari nanga krakti go foe préki waarheid, sodati boen foeroe sma ben sa kon fri. — Lukas 4:18.
8, 9. Na sortoe fasi foeroe sma kon fri, èn sortoe jepisani gebroiki foe bariwroko gi na fri dati?
8 Loekoe foe eksempre na a bijbelstudie jepi Na Harpoe foe Gado (Ingrisitongo 1921; Bakratongo 1932), pe toemsi prenspari waarheid ben tjari kon a fesi leki tin snaar foe wan harpoe. Na boekoe ben erken dati „foeroe sma ben kon frede foe ondrosoekoe na bijbel” foe a leri ede, dati „na strafoe foe den ogriwan ben de wan tego pina ofoe skinati na ini wan hel foe faja nanga swarfoe di no e dede”. Lésiman foe a boekoe disi di ben doro wan oplaag foe pikinmoro 6 miljoen, ben kon sabi dati na leri disi „foe fo difrenti rede di de aparti foe makandra no ben kan de troe: (1) a de onredelijk, (2) a de onregtvaardiki, (3) a de kontrari den gronprakseri foe lobi, nanga (4) a no de kwetikweti ini a bijbel”. Joe kan tjari pikinso kon a prakseri fa disi ben tjari fri kon gi sma di ben gro nanga na frede gi wan tego skinati ini hel efoe wan pina na ini vagevuur!
9 Ija, tangi foe na faja préki foe bijbel waarheid foe na sé foe den salfoewan disi meki na a heri grontapoe sma ben kon fri, di ben de na ini katibo foe falsi leri, bijgeloof nanga gwenti di no ben de ini akroederi nanga na bijbel (soleki na anbegi foe fosten bigisma, frede gi takroesani ofoe jeje nanga a poeroe moni na sma skin foe na sé foe den kerki fesiman). Soso kaba na nen foe son jepisani foe bijbelstudie ben sari taki den ben abi na krakti foe fri miljoenmiljoen sma.b Na so den wortoe foe Jezus ben sori taki den de troe di a ben taki dati en discipel ben sa doe ’moro bigi wroko’ leki en (Johannes 14:12). Te joe teki na jeje wroko na a bigin di Jezus ben doe foedi „a ben préki fri gi den wan di ben de ini katibo”, dan disiten dienstknegti foe Gado ben doe wan moro bigi ipi den ben go miti nanga miljoenmiljoen sma na a heri grontapoe.
10. Foe san-ede wi kan ferwakti dati wan moro bigi fri sa kon ete?
10 Ma no frigiti dati na ini a fosi Jarhondro tapoe a dé foe na pinksterfesa na ini 33 G.T. wan tra fri ben bigin. Ne na kristen Prisirijari ben bigin gi na „pikin ipi” di ben sa kisi pardon foe sondoe, sodati den memre foe na ipi dati ben sa tron manpikin foe Gado na ini hemel. Fa dati de now na ini wi ten? Den miljoenmiljoen tra kristen di e doe dienst gi Gado ben sa kan kon fri foe a katibo foe sondoe èn na sofasi kan njan wan bigi prisirijarifesa? Ija, èn apostel Petrus ben sori na dati di a ben taki foe den „ten foe ala sani kon boen baka, foe san Gado ben taki foe en nanga mofo foe en santa proféti foe owroeten”. — Tori foe den Apostel 3:21.
Wan Prisirijari gi miljoenmiljoen sma
11. Fa Leviticus kapitel 25 e sori a tapoe dati wi kan loekoe na a kon foe wan fri di no wawan sa de gi na jeje Israël?
11 Na wan aparti sani foe si dati Israëlsma na ini Leviticus kapitel 25 ben kisi na memre toe tron dati foe a sé foe Gado Jehovah den ben de „srafoe” di a ben meki kon fri foe Egypte (vers 42 nanga 55). Na ini na kapitel disi foe na Prisirijari disi den e ferteri ooktoe foe den „sma di ben kon libi” na den èn den ’freemde sma di ben tan na den’. Den sma disi e feni na ini a ten disi wan parallel foe den memre foe na „bigi ipi” di makandra nanga den jeje Israëlsma e teki prati na a meki bekenti foe na kristen boen njoensoe.
12. Sortoe prisiri sani e feni presi sensi 1935?
12 Sensi 1935 na „toemsi boen Herder” Jezus Kristus ben sorgoe dati den sma di a e kari „tra skapoe”, tai densrefi aktief nanga na salfoe fikapisi. A ben moesoe „tjari” den, èn den ben sa de „wán ipi” ondro „wán Herder” (Johannes 10:16). Now joe abi miljoenmiljoen foe den sortoe „tra skapoe” disi. Efoe joe de wan pisi foe na kolokoe ipi dati, dan den e teri regtvaardikifasi gi joe leki wan mati foe Gado, èn leki wan pisi foe na libisma mekisani joe e loekoe a fesi foe „kan kon fri foe na katibo foe pori na ini den ten pe ala sani o kon boen” na grontapoe. Disi a no wan fowtoe howpoe. — Romeini 8:19-21; Tori foe den Apostel 3:20, 21.
13. Spesroetoe foe sortoe blesi di sa kon baka na „bigi banawtoe” wi moe poti prakseri?
13 Bakadi na apostel Johannes ben si 144.000 sma di ben e prisiri densrefi nanga wan hemel howpoe ini den blesi foe na kristen Prisirijari, a ben skrifi foe wan „bigi ipi” èn ben taki: „A de den disi di komoto foe na bigi benawtoe, èn den ben wasi den langa krosi èn den ben meki a kon weti na ini na broedoe foe na Lam. Foe dat’ede mekl den de afesi foe na troon foe Gado; èn den e doe dé nanga neti santa dienst gi en na ini en tempel.” — Openbaring 7:14, 15.
14, 15. Foe san-ede den memre foe na „bigi ipi” abi spesroetoe rede foe prisiri now?
14 Now kaba, bifo na bigi benawtoe, den sma disi e sori bribi na ini na broedoe foe Kristus di ben lon èn e prisiri foe dat’ede ini den winimarki foe en ofrandi dede. Ooktoe den abi prisiri dati den ben kon fri foe Babylon na Bigiwan, èn dati a fesi foe Jehovah Gado den abi wan boen konsensi, èn dati den abi na grani foe abi prati na a kontroe foe Mattéus 24:14, foedi den e préki a kownoekondre bifo a kaba kon.
15 Ma fa a de nanga na ferwakti foe na bigi ipi tapoe fri foe sondoe nanga onvolmaaktifasi di sma e kisi foe sensi a gebore? A ten foe dati kon krosbé? Wi abi boen rede foe bribi dati a mindri wi sma de te now ete foe na libisma geslagti foe soema Jezus Kristus ben taki afesi dati a no ben o psa te leki ala den sani di ben taki afesi ben sa kontroe (Matteus 24:34). Na moro bigi kaba foe „na bosroiti fue na seti foe sani” moesoe de foe dat’ede boen krosbé. — Mattéus 24:3.
Kefarlek bigi hémarki foe na kristen Prisirijari
16. Pe wi de na ini a kontroe foe na prakseri foe Gado, èn san de a wi fesi?
16 Na feti foe na bigi dé foe Gado, na Almaktiwan, e doro esesi, èn na fikapisi foe na „pikin ipi” èn na „bigi ipi” foe getrow èn loyaal kompe foe den sa kibri den soifri-retifasi na fesi foe Jehovah Gado èn e loekoe na a ten dati Gado sa kibri den. Nanga foeroe ferwakti den e loekoe na a wini di Jehovah sa wini ala féjanti krakti, sodati a sa kon kisi reti leki na universele soeverein. Fa dati sa de wan bigi paiman foe na kristen fri di den prisiri densrefi na ini. — Openbaring 16:14; 19:19-21; Habakuk 2:3.
17. Fa ete miljoenmiljoen sma sa kisi fri na ini wan kefarlek bigi Prisirijari?
17 Dan na tiri foe na victori kownoe Jezus Kristus kan bigin tapoe na grontapoe di kon krin; aladi Jehovah universele soevereiniteit sa kon poti njoen baka èn Jezus Kristus leki kownoe foe den kownoe èn Masra foe den masra sa abi na heri tirimakti abra grontapoe ini anoe. Dan a sa gebroiki foe na boen foe den miljoenmiljoen sma, makandra nanga den sma di opo komoto foe dede, na verdienste foe en srakti-ofrandi langalanga, efoe den e sori bribi èn e teki nanga ala toe anoe na pardon foe sondoe ini san Gado ben sorgoe foe en nanga jepi foe Kristus. Disi sa kon na krin ini na sani disi dati Gado ’sa figi poeroe ala watra na den ai, èn dede no sa de moro, no wan sari, no wan babari, no wan pen sa de moro’ (Openbaring 21:3, 4). Efoe dati no de troe fri dan san dan?
18. San sa psa nanga na grontapoe ini na njoen seti foe sani akroederi wan bepaalde marki foe na owroe Prisirijari?
18 Èn dan, a grontapoe no sa abi moro gridi sma, bigi bisnis onderneming nanga libisma tiri di e basi en, di e doti èn di e pori en (Openbaring 11:18). Ma presi foe dati, den sa gi en baka na troe anbegiman. Den sa kisi na toemsi moi wroko foe abi wan prati na a letterlijk kontroe foe Jesaja profétitori: „Den sa bow seker oso èn libi na ini, den sa prani seker windroifidjari èn njan a froktoe foe en. Den no sa bow foe wan tra sma go libi na ini; den no sa prani èn wan tra sma sa njan a froktoe foe en. . . den no sa wroko foe noti, èn den no sa meki pikin na ini moeilijkheid, bikasi den de a bakapikin di de foe den blesiwan foe Jehovah” (Jesaja 65:21-25). Na a kaba foe na doesoen jari tiri dan ala marki foe sondoe nanga onvolmaaktifasi di libisma kisi sa figi poeroe èn den loyaalwan foe Gado na grontapoe sa njan prisiri foe na hémarki nanga san na Prisirijari kon na wan kaba. Na fri di a Prisirijari e agersi sa kon dan na wan kaba. — Efese 1:10.
Baka na hémarki di doro foe na Prisirijari na ini na Millennium
19, 20. Fa Satan nanga den ogrijeje sa proeberi foe pori den blesi di na Millenium-Prisirijari ben tjari kon, ma san sa de na kabapisi?
19 Openbaring 20:1-3 e taki afesi dati Satan Didibri, na tiriman foe den ogrijeje groepoe, sa poeroe a pasi na ini a ten foe na doesoen jari tiri foe Jezus Kristus tapoe a libismafamiri. Te Didibri nanga en ogrijeje na a kaba foe na Millennium sa kisi foe wan sjatoe ten na okasi foe sori densrefi, dan den goddelowsoe jeje disi no sa si na grontapoe ini a toestand ini san den ben libi en na baka, ma leki wan toemsi moi grontapoe paradijs. Den sa si dati na grontapoe abi na getrow „bigi ipi” nanga den miljardmiljard sma di opo baka foe dede, e libi a tapoe; èn foe soema Jezus Kristus ben dede leki wan ferloesoe-ofrandi. Na a kaba foe na Millenium dan a kristen Prisirijari sa doro a marki foe en, dati wani taki foe fri na libismaFamiri krinkrin foe den bakapisi foe sondoe (Romeini 8:21). Fa dati sa de wan bigi sjen gi Didibri efoe wan sma ben sa proeberi foe pori na moi situatie disi! Ma nanga primisi foe na Almakti Gado Didibri sa doe ini disi wan laatste moeiti èn sondro howpoe èn nanga bitafasi a sa naki foe pori sani. Foe disi Openbaring 20:7-10, 14 e taki:
20 „Zodra now den doesoen jari ben kon na wan kaba, dan Satan sa loesoe komoto foe en straf’oso, èn a sa go na doro foe kori den natie di sa de na den fo oekoe foe na grontapoe, Gog nanga Magog, foe tjari den kon makandra na a feti. Na nomroe foe den de leki na santi foe se. Èn den ben hari èn na abra na bradi foe na grontapoe èn ben lontoe na legrepresi foe den santawan èn na lobi foto. Wan faja ben saka komoto foe hemel èn ben njan den poeroe. Èn Didibri, di ben kori den den ben teki slinger go na ini na se foe faja nanga swarfoe.”
21. Sortoe fasi foe na se foe den hemel manpikin foe Gado sa meki wi denki na Job 38:7, baka na kaba foe na Millenium na kristen Prisirijari kon na wan kaba?
21 Alape ala sma sa tan prisiri ini na troe fri, di ben kon nanga na seti foe na Prisirijari; ibri mekisani foe tego sa de fri èn gi grani na a Sma di leki na wan enkriwan e tjari na nen Jehovah, aladi Jehovah sa go doro foe meki den prakseri foe en na ini na heri universum kon troe (Psalm 83:18). Na a ten foe na meki foe na grontapoe, bifo den ben poti libismafamiri a tapoe, ’den mamanten stari makandra ben opo wan prisiri babari, ala manpikin foe Gado ben agri morofara nanga prisiri’ na a si foe a moi sani disi (Job 38:7). Omoro foeroe den sa doe disi te den sa si fa a grontapoe sa foeroe nanga man nanga oema di ben sori èn ben boewijsi a gi di den gi densrefi krinkrin ini a dini foe Gado èn den soifri retifasi a fesi foe Gado na Almaktiwan.
22. San moe de ini akroederi nanga dekati ini Psalm 150:1-6 na fasi foe wi?
22 Te wi e loekoe ala sani na a fasi disi ini na krin brenki leti di e skijn tapoe a bijbel, dan wi no kan trafasi leki prisiri makandra nanga den hemel èn taki hallelujah! Disi na a dekati di e kon na wi nanga san na boekoe Psalm e tapoe: „Hallelujah, Prijse Gado ini en santa presi, prijse en ini en makti loktoe; prijse en foe en makti wroko, prijse en foe a kefarlek bigi di a bigi. Prijse en nanga bazuin babari, prijse en nanga harpoe nanga citer, prijse en nanga tamboerijn èn reidansi, prijse èn nanga snaarpré èn froiti, prijse en nanga symbaal di e bari, prijse en nanga symbaal di e bari tranga. Ala san abi bro, moe prijse MASRA. Hallelujah.” — Psalm 150:1-6, Njoen Vertaling foe na Nederlands Bijbelgenootschap.
[Foetoewortoe]
a Tapoe na kongres dati wan njoen tijdschrift ben kon na doro, di ben sa de „leki wan sten ini na sabana foe broejafasi èn di ben abi leki marki foe barwroko gi na kon foe na Gowtoe Pisten”. Now na tijdschrift disi nen Ontwaakt!
b Miljoenmiljoen sma di e libi now no sa dede oiti!; (1920); Fri! (1926); Fri gi den folkoe (1927); Fri! (1932); „Na waarheid di sa meki joe kon fri” (1943); San a bijbel e taki foe „a tan a libi baka dede”? (1955); Tego libi — Na ini a fri foe den manpikin foe Gado (1966); Na waarheid di e tjari joe go na tego libi (1968); Na pasi foe a troe foe Gado di e tjari joe go na fri (1980). (Den nomroe e sori na a jari ini san na boekoe ben kon a doro ini Ingrisitongo.)
Fa joe ben sa piki?
◻ Foe san Jezus discipel ben kon fri na tapoe na dé foe na Pinksterfesa na ini 33 G.T. èn san ben bigin nanga dati gi den?
◻ Foe san-ede red de foe ferwakti wan moro bigi fri leki ben feni presi na ini na fosi jarhondro?
◻ Sortoe fri e feni presi foe sensi 1919?
◻ Fa èn oten dan „tra skapoe” e njan boen foe wan kefarlek bigi Prisirijari?
◻ Fa na grontapoe sa tan baka na hémarki foe na Prisirijari?
[Prenki na tapoe bladzijde 7]
Den barwroko gi fri na Cedar Point 1919