Grontapoe no ben warti gi den
„Den ben ston den, den ben tesi den, . . . èn grontapoe no ben warti gi den.” — HEBREWSMA 11:37, 38.
1, 2. Ondro sortoe omstandigheid Jehovah Kotoigi ini owroeten ben kibri den soifri-retifasi foe den, èn fa den doe foe den abi krakti tapoe Gado dienstknegti na ini a ten disi?
JEHOVAH KOTOIGI na ini owroeten ben kibri na soifri-retifasi foe den na fesi foe Gado aladi foeroe tesi foe na onregtvaardiki libisma maatschappij ben tjari kon na tapoe den. Den dienstknegti foe Gado foe eksempre den ben ston èn ben srakti den nanga a fetowroe. Den ben behandel den takroe èn ben kwinsi den. Tokoe den no degedege ini a bribi foe den, A ben de seker soboen soleki na apostel Paulus ben taki: „Na grontapoe no ben warti gi den.” — Hebrewsma 11:37, 38.
2 Den doe di e sori bribi foe den sma di ben e libi na grontapoe èn di ben gi den srefi ini a dini foe Gado bifo na froedoe, den famiri edeman èn Mozes ben gi Jehovah disiten kotoigi dek’ati foe dini ini bribi. Ma fa a de nanga trawan di Hebrewsma kapitel 11 nanga 12 e kari? Fa wi kan njan boen te wi go loekoe den difrenti pisi foe a bribi foe den?
A bribi foe kroetoeman, kownoe nanga proféti
3. Fa a sani di psa nanga Jericho èn Rachab e sori dati bribi moe abi wroko leki bewijsi?
3 Bribi de moro leki foe teki sani soso taki den de troe; a wroko ofoe doe e bewijsi en (Lési Hebrewsma 11:30, 31.) Baka a dede foe Mozes den Israëlsma nanga bribi ben abi a wan wini baka a trawan ini Kanaän, ma moeiti foe a sé foe den ben de fanowdoe foe doe disi. Nanga na bribi foe Jozua èn trawan foe eksempre „den skotoe foe Jericho ben fadon broko baka di den ben waka sébi dé lontoe”. Èn „nanga bribi Rachab, na hoeroe oema, no ben dede nanga [den sma di ben libi na ini Jericho èn di no ben bribi] den di ben trangajesi”. Foe san-ede? „Foe di a ben teki den [Israël]spion ini vrede ini en oso” èn ben bewijsi a bribi foe en foedi a ben kibri den foe den Kanaënietsma no ben feni den. A bribi foe Rachab troetroe abi en fundamenti tapoe tori di ben ferteri taki „Jehovah ben meki den watra foe na Redi Se dré” na fesi na ai foe den Israëlsma èn ben meki den wini den Amoriet kownoe Sihon nunga Og. Rachab ben tjari den fanowdoe kenki kon na ini en libi tapoe moreel kontren èn ben kisi blesi foe den wroko foe en di ben komoto foe bribi foe di en makandra nanga en osofamiri ben tan a libi di Jericho ben fadon èn foedi en ben tron wan fosten mama foe Jezus Kristus. — Jozua 2:1-11; 6:20-23; Mattéus 1:1, 5; Jakobus 2:24-26.
4. Den ondrofeni foe Gideon nanga Barak e poti krakti na tapoe san ini na sori foe bribi ini ten foe kefar?
4 Wan sma e sori en bribi te a poti en fertrow krinkrin a tapoe Jehovah na ini ten foe kefar (Lési Hebrewsma 11:32.) Paulus ben erken dati ten ben sa sjatoe gi en efi a ben sa ferteri morofara foe „Gideon Barak, Simson, Jefta, David èn ooktoe Samuël èn den tra proféti”, foe soema den sani di ben psa nanga den ben gi bewijsi psamarki foe bribi nanga fertrow ini Gado ini ten foe omstandigheden di abi foeroe kefar. Na so na kroetoeman Gideon tapoe a gron foe en bribi ben kisi na okasi foe a sé foe Gado foe masi na sroedati makti foe den Midiansma di ben kwinsi den nanga wan legre foe soso drihondroman (Kroetoeman 7:1-25). Na proféti oema Debora di ben gi krotoeman Barak dek’ati ben meki a wini a moro bigi sroedati makti foe kownoe Jabin, di ben abi moro leki 900 fetiwagi nanga isrinefi a den èn di ben de ondro na tiri foe Sisera nanga wan legre foe 10.000 man d ben e waka èn di no ben abi boen fetisani. — Kroetoeman 4:1—5:31.
5. Tapoe sortoe fasi Simson nanga Jefta ben sori wan bribi di ben sori fertrow krinkrin na ini Jehovah?
5 Wan tra eksempre foe bribi foe den dé foe den kroetoeman foe Israël ben de Simson, na kefarlek féanti foe den Filistijnsma. A de troe dati te foe kaba den Filistijnman foe en ben kisi en èn ben breni en. Ma Simson ben kiri foeroe foe den di a ben hari den postoe trowe foe na oso den ben e tjari wan bigi srakti-ofrandi gi na falsi gado foe den, Dagon. Seker, Simson ben dede nanga den Filistijnsma ma no leki wan sma di kiri ensrefi èn di ben broeja. Ini bribi a ben poti en fertrow tapoe Jehovah èn a ben begi na en foe kisi na krakti di ben sa jepi en foe teki refensi tapoe den féanti dati foe Gado èn foe en pipel (Kroetoeman 16:18-30). Ooktoe Jefta, di Jehovah ben gi en a wini tapoe den Amorietsma, nanga san en hebi fertrow a tapoe Jehovah ben kon a fesi. Soso sowan bribi kan ben gi en na okasi foe ben hori ensrefi na a pramisi foe en èn gi en oema pikin abra na a dienst foe Jehovah san ben wani taki gi na oemapikin dati en heri libi a ben moe tan wan njoenwenki. — Kroetoeman 11:29-40.
6. Fa David ben sori en bribi?
6 Ooktoe David ben kon a fesi nanga en bribi. A ben de wan boi ete di a ben feti nanga a bigi, langa Filistijn man Goliath. ’Joe e kon na mi nanga fetowroe, lansri èn lansri foe iti’, na so David ben taki, ’ma mi e kon na joe na ini a nen foe Jehovah foe den legre.’ Ija, David ben fertrow tapoe Jehovah, èn kiri na bigi langa Filistijn èn baka dati ben tron wan dek’ati sroedati kownoe, di ben e feti foe a boen foe a pipel foe Gado. Èn foe en bribi ede David ben de wan sma di ben de wan switisani gi na ati foe Jehovah (1 Samuël 17:4, 45-51; Tori foe den apostel 13:22). Samuël nanga tra proféti ben sori ini na heri libi foe den ooktoe wan bigi bribi èn troetroe fertrow na ini Gado (1 Samuël 1:19-28; 7:15-17). Fa disi de toemsi moi eksempre gi disiten jongoe èn owroeten dienstknegti foe Gado!
7. (a) Soema ’ben meki kownoekondre lasi a stré nanga jepi foe bribi’? (b) Soema „ben meki regtvaardikifasi doe kon” nanga jepi foe bribi?
7 Nanga bribi wi kan kakafoetoe nanga boen winimarki gi ibri tesi tapoe wi soifri-retifasi èn wi kan doe ala sani san de ini akroederi nanga a wani foe Gado (Lési Hebrewsma 11:33, 34.) Di Paulus ben kari morofara den doe foe bribi dan a ben abi ini prakseri kande Hebrew kroetoeman, kownoe nanga proféti, bika den sortoe man dati a ben kari djonsrode. „Nanga bribi” kroetoeman leki Gibeon nanga Jefta ben meki ’kownoekondre lasi a feti.’ Dati kownoe David ben doe ooktoe di a ben poti den Filistijnsma, den Moabietsma, den Syriasma, den Edomietsma nanga tra folkoe na en ondro (2 Samuël 8:1-14). Joe ben abi ooktoe reti-ati kroetoeman di „ben doe regtvaardikifasi” èn na regtvaardiki rai foe Samuël nanga tra proféti ben boewegi son sma foe tan farawe foe ogridoe ofoe foe tapoe nanga dati. — 1 Samuël 12:20-25; Jesaja 1:10-20.
8. Sortoe pramisi David ben kisi, èn a pramisi disi ben meki san pasa?
8 David ben de wan foe den sma di nanga bribi „ben kisi pramisi”. Jehovah ben pramisi en: „A troon foe joe sa tron wan di sa meki kon stéfi te ten di no abi marki” (2 Samuel 7:11-16). Èn Gado ben hori ensrefi na a pramisi dati di a ben opo na ini 1914 na Messias kownoekondre. Jesaja 9:6, 7; Daniël 7:13, 14.
9. Ondro sortoe omstandigheid ’den mofo foe loew ben tapoe nanga bribi’?
9 Na proféti Daniël nanga winimarki ben kakafoetoe gi wan tesi tapoe en soifri-retifasi di, aladi wan wet foe kownoe ben tapoe foe doe dati, a ben tan begi na Gado akroederi fa a ben gwenti aladé. Nanga a bribi foe wan sma di e kibri en retifasi Daniël „ben tapoe na sofasi den mofo foe lew” foedi Gado ben kibri en libi ini na lewolo ini san den ben trowe en go. — Daniël 6:4-23.
10. Soema ben ’tapoe na krakti foe na faja’ nanga jepi foe bribi, èn te wi abi sowan bribi wi sa kisi a jepi foe doe san?
10 Den Hebrew mati foe Daniël, Sadrach, Mesach nanga Abednego, di ben kibri den soifri-retifasi ooktoe, ’ben tapoe na krakti foe na faja’ te joe loekoe en boen. Di den ben tapoe skreki gi den nanga dede foe go ini wan onfoe di faja psamarki, den ben taigi kownoe Nebukadnezar dati, efoe Gado now ben sa ferloesoe den ofoe no, den no ben sa dini den gado foe na Babylon kownoe, èn ooktoe den no ben sa anbegi na popki di a ben meki. Jehovah no ben kiri na faja na ini na onfoe dati, ma a ben sorgoe dati den dri Hebrewman no ben kisi mankeri foe dati (Daniël 3:1-30). Efoe wi abi net so wan bribi, dan wi sa man foe kibri wi soifri-retifasi na a fesi foe Gado, srefi efoe dati wani taki kande dati den féanti kiri wi. — Openbaring 2:10.
11. (a) Soema ben lon komoto gi na srpoe sé foe na fetowroe? (b) Soema ben ’meki kon de krakti’ nanga jepi foe bribi? (c) Soema ’ben sori taki a de nanga dek’ati ini feti’, èn benmeki den legre foe den freemde sma teki lon?
11 David „ben lon komoto gi na srapoe sé foe den fetowroe” foe den man foe kownoe Saul (1 Samuël 19:9-17). Den proféti Elia nanga Elisa ben lon komoto ooktoe gi na dede foe na sé foe na fetowroe (1 Kownoe 19:1-3; 2 Kownoe 6:11-23). Ma soema ’ben kon krakti foe wan swaki toestand’? Gideon foe eksempre ben si ensrefi nanga en man leki toemsi swaki foe ferloesoe Israël foe na anoe foe den Midiansma. Ma Gado, di ben gi na wini, ben ’meki a kon krakti’, èn dati soso nanga 300 man! (Kroetoeman 6:14-16; 7:2-7, 22) Di a ben meki den koti a wiwiri foe Simson, dan „foe wan swaki toestand” Gado „ben meki a kon krakti” èn a ben kiri foeroe Filistijnsma (Kroetoeman 16:19-21, 28-30; Teki gersi Kroetoeman 15:13-19). Kande Paulus ben prakseri kownoe Hizkia ooktoe leki wan sma di foe wan swaki sroedati èn srefi skin toestand „ben meki kon krakti” (Jesaja 37:1-38:22). A mindri den dienstknegti foe Gado di „ben kon kisi dek’ati na ini a feti” joe ben abi kroetoeman Jefta nanga kownoe David (Kroetoeman 11:32, 33; 2 Samuël 22:1, 2, 30-38). Èn na mindri den sma „di meki den legre foe freemde sma tek’foetoe”, joe ben abi kroetoeman Barak (Kroetoeman 4:14-16). Ala den sani disi di ben psa moe overtoigi wi dati nanga jepi foe bribi wi kan kakafoetoe nagna boen winimarki gi ibri tesi tapoe wi soifri-retifasi èn dati wi kan doe ala sani san de ini akroederi nanga Jehovah wani.
Tra sma di ben abi wan bribi di ben de wan eksempre
12. (a) Sortoe „oema ben kisi den dedewan foe den nanga jepi foe wan opobaka”? (b) Na sortoe fasi na opobaka foe bepaalde man foe bribi sa „de moro betre”?
12 Wan sani di de ooktoe wan pisi foe bribi de na bribi ini a opobaka, wan howpoe di e jepi wi foe kibri wi soifri-retifasi na Gado (Lési Hebrewsma 11:35.) Nanga jepi foe bribi „oemasma ben kisi den dedewan foe den nanga wan opobaka”. Nanga jepi foe bribi èn nanga jepi foe na krakti foe Gado Elia ben wiki na manpikin foe wan weduwe ini Sarfath komoto foe dede èn Elisa ben wiki na boi foe wan Sulammitisch oema kon baka na libi (1 Kownoe 17:17-24; 2 Kownoe 4:12-37). „Ma tra man ben kisi pina [letterlek: den naki den nanga tiki] foe di den no ben wani sabi foe kon fri nanga wan ofoe tra loesoe prijs, sodati den ben mag kisi wan moro betre opobaka.” A de krin dati den kotoigi disi foe Jehovah di den no e meki oen sabi den morofara na den nen den ben naki kiri foe di den ben wégri foe teki wan fri di ben sa de a bakapisi foe skepi nanga a bribi foe den. Na opobaka foe den sa de „moro betre” foedi a no sa de moro so, dati wan sma sondro foe a wani sa dede baka (soleki ini a geval foe den sma di Elia nanga Elisa ben opobaka) èn foedi na opobaka dati sa feni presi na ondro den Kownoekondretirimakti foe Jezus Kristua na „Tego Tata” foe soema na ferloesoe prijs e opo na okasi foe kisi tego libi. — Jesaja 9:6; Johannes 5:28, 29.
13. (a) Soema ben odrofeni „spotoe nanga krawasi”? (b) Soema ben moe ferdrage „boei nanga doengroe-oso”?
13 Efoe wi abi bribi, dan wi sa man foe ferdrage ferfolgoe (Lési Hebrewsma 11:36-38.) Te wi kisi ferfolgoe, dan na wan boen sani foe denki na a opobaka howpoe èn foe ferstan dati Gado kan horibaka gi wi soleki a ben doe na ini a geval foe „trawan di ben kisi a tesi foe den tapoe den bribi nanga jepi foe spotoe èn krawasi, srefi moro leki dati nanga jepi foe boei èn doengroe-oso”. Den Israëlsma „ben spotoe [doronomo] en proféti, te leki na atibron foe Jehovah ben opo kon tege en pipel” (2 Kronieken 36:5, 16). Nanga jepi foe bribi, Michaja, Elisa nanga tra dienstknegti foe Gado ben ferdrage „spotoe” (1 Kownoe 22:24; 2 Kownoe 2:23, 24; Psalm 42:3). „Krawasi” ben kon ini den dé foe Israël kownoe nanga proféti èn gensman „ben naki” Jeremia, san moro foeroe ben wani taki ben gi en wan krap leki wan sortoe afrontoe. „Boei nanga doengroe-oso” kan memre wi na den ondrofeni foe en èn ooktoe na di foe den proféti Michaja nanga Hanani (Jeremia 20:1, 2; 37:15; 1 Kownoe 16:7, 10). Foedi Jehovah disiten kotoigi abi net so wan bribi, meki den man „foe njan pina foe regtvaardikifasi ede”. — 1 Petrus 3:14.
14. (a) Soema ben de a mindri den sma di den „ben ston”? (b) Soema kande den „ben sa ini pispisi”?
14 „Den ben ston den”, Paulus ben taki. Wán sowan man foe bribi ben de Zacharia, na mapikin foe priester Jojada. Nanga Gado jeje di ben lontoe en a ben kragi na ini publiki a den wan foe Juda di ben fadon komoto na bribi. Nanga sortoe bakapisi? Tapoe a komando foe kownoe Joas dan sma di ben meki mofo foe kiri en ben ston en ini na fessé djari foe Jehovah oso (2 Kronieken 24:20-22; Mattéus 23:33-35). Paulus e taki morofara: „Den ben kisi tesi; den ben sa den na ini pisipisi.” Kande a ben prakseri na proféti Michaja, wan foe den sma di „ben kisi tesi”, èn leki fa wan djoe tori di noja bewijsi e taki dan ini a tiri foe kownoe Manasse den ben sa Jesaja na mindri. — 1 Kownoe 22:24-28.
15. Soema den ben „behandel takroe” èn „ben e waka lontoe ini sabana”?
15 Trawan „ben dede foe di den ben srakti den nanga fetowroe”, soleki foe eksenpre den kompe-proféti foe Elia di „den ben kiri nanga a fetowroe” ini den dé foe na goddelowsoe kownoe Achab (1 Kownoe 19:9,10). Elia nanga Elisa ben de na mindri den man foe bribi di „[ben waka lontoe] ini skapoeboeba, ini krabita-boeba, aladi den ben njan pina èn ben kisi kwinsi èn den ben handri den takroe” (1 Kownoe 19:5-8, 19; 2 Kownoe 1:8; 2:13; teki gersi nanga Jeremia 38:6). A mindri den sma di foe a ferfolgoe ede di den ben kisi „ben waka lontoe ini sabana èn tapoe bergi èn bergi-olo èn olo a grontapoe”, dan wi no moe teri wawan Elia nanga Elisa ma ooktoe den hondro proféti di Obaja ini groepoe foe féfitenti ben kibri ini wan bergi-olo, pe a ben sorgoe dati den ben kisi brede nanga watra di na kownoe Izébel di ben e doe afkodré ben go abra foe „koti Jehovah proféti poeroe” (1 Kownoe 18:4, 13; 2 Kownoe 2:13; 6:13, 30, 31). Fa disi de sma di kibri den soifri-retifasi! A no de wan wondroe dati Paulus ben taki: „Na grontapoe [na onregtvaardiki libisma maatschappij] no ben de warti gi den”!
16. (a) Foe san-ede kotoigi foe Jehovah bifo a ten foe Kristus „no ben kisi na kontroe foe na pramisi” ete? (b) Nanga san „a tjari kon de volmaakti” ini a geval foe Jehovah kotoigi ini a ten foe Kristus ben abi foe doe?
16 Bribi e gi wi na overtoigi dati na tapoe a faste ten foe Gado ala sma di lobi en ’sa kisi na kontroe foe na pramisi’. (Lési Hebrewsma 11:39, 40). Foe taki foe sma di ben kibri den soifri-retifasi bifo a ten foe Kristus ’dan nanga jepi foe den bribi kotoigi ben gi’, wan kotoigi di tanapoe now na ini a bijbel. Ma den no kisi foe Gado ete „na kontroe foe na pramisi” nanga jepi foe wan opobaka nanga froewakti tapoe tego libi na ondro Kownoekondretiri. Foe san-ede? Foedi den no „sa tjari kon ini volmaaktifasi” sondro den salfoe bakaman foe Jezus, foe soema ’Gado ben abi wan moro betre sani gi den a prakseri’ — hemel libi sondroe dede moro èn na grani foe tiri makandra nanga Kristus Jezus leki kownoe. Nanga jepi foe na opobaka foe den, nanga san wan bigin e kon baka na opo foe na Kownoekondre ini 1914 dan salfoe kristen e „tjari kon de volmaakti” na ini hemel bifo Jehovah kotoigi foe den ten bifo Kristus e opobaka kon a grontapoe (1 Korinte 15:50-57; Openbaring 12:1-5). „Foe tjari kon de volmaakti” abi foe doe ini a geval foe den fosten kotoigi nanga a grontapoe opobaka foe den, te te foe kaba „den sa kon fri foe na katibo foe pori” èn kisi libisma volmaaktifasi nanga jepi foe den dienst foe na hépriester Jezus Kristus nanga en 144.000 hemel ondro-priester na a ten foe en doesoenjari tiri. — Romeini 8:20, 21; Hebrewsma 7:26; Openbaring 14:1; 20:4-6.
Hori ai tapoe na sma di e meki wi bribi kon de volmaakti
17, 18. (a) San wi moe doe foe kan abi winimarki ini a strélon foe wi foe kan kisi tego libi? (b) Na sortoe fasi Jezus Kristus de „a Sma di e meki oen bribi kon de volmaakti”?
17 Bakadi Paulus ben taki foe kotoigi foe Jehovah di ben de bifo Kristus, a e sori tapoe na moro prenspari eksempre foe bribi. (Lési Hebrewsma 12:1-3.) Fa a de wan fonten foe dek’ati dat „wi abi so wan bigi wolkoe foe kotoigi lontoe wi”! Disi e poesoe wi foe poti a wan sé ibri hebi di ben sa skotoe a go a fesi foe wi na ini jeje fasi. Wi e kisi jepi foe tan farawe foe na sondoe foe lasi ofoe mankeri foe bribi èn foe waka nanga horidoro na kristen strélon foe tego libi. Ma foe doro a marki foe wi, wi moe doe moro ete. San dan?
18 Efoe wi wani waka nanga boen winimarki na strélon foe wi foe tego libi na ini Gado njoen seti dan wi „moe poti ai tapoe na moro Prenspari Wrokoman [ofoe Moro hé Tiriman] èn na sma di e meki wi bribi kon de volmaakti, Jezus”. Na bribi foe Abraham nanga tra sma di ben kibri den soifri-retifasi èn di ben libi bifo na grontapoe diniwroko foe Jezus Kristus, ben de onvolmaakt, no ben de boen helemaal ini a fasi disi dati den no ben ferstan ete den profétitori di no ben kontroe ete èn di ben abi foe doe nanga na Messias. (Teki gersi nanga 1 Petrus 1:10, 10-12.) Ma nanga a gebortoe foe Jezus, en diniwroko, dede èn opobaka dan foeroe Messias profétitori ben kontroe. Na sofasi bribi ben tjari kon de volmaakti nanga jepi foe Jezus Kristus (Galacia 3:24, 25). Boiti foe dati, foe a presi foe en na ini hemel Jezus e tan na sma di e tjari a bribi foe en bakaman kon de volmaakti, foedi foe eksempre na a dé foe a Pinksterfesa ini 33 G.T. a ben kanti santa jeje tapoe den èn nanga jepi foe Openbaring nanga san a bribi foe den ben gro go na fesi (Tori foe den Apostel 2:32, 33; Romeini 10:17; Openbaring 1:1, 2; 22:16). Fa wi de grantangi gi „na getrow kotoigi disi”, na Moro hé Tiriman disi foe Jehovah Kotoigi! — Openbaring 1:5; Mattéus 23:10.
19. Foe san-ede wi moe poti ai boen tapoe Jezus?
19 Foedi a no de wan makriki sani foe ferdrage sjen foe sma di no e bribi, meki Paulus ben skrifi: „Poti prakseri boen tapoe a sma [Jezus] di ben ferdrage foe sondari bigi taki kontrari den égi belang, sodati joe no kon weri èn brako-saka na ini joe égi sili.” Ija, efoe wi poti wi ai boen tapoe na „getrow kotoigi”, Jezus Kristus, dan wi no sa kon weri noiti foe doe a wani foe Gado. — Johannes 4:34.
20. San na wantoe sani di joe ben leri foe bribi di joe ben loekoe Hebrewsma 11:1—12:3?
20 Wi e leri foeroe foe na bigi wolkoe foe kotoigi foe den difrenti fasi foe bribi. Bribi soleki di foe Abel foe eksempre ben meki a waarderi foe wi kon moro bigi gi a srakti-ofrandi foe Jezus. Troetroe bribi e meki oen kon de dek’ati kotoigi, net soleki Henoch, di ben meki Jhovah boskopoe bekenti fri èn sondro frede. Net soleki ben de na ini a geval foe Noach, na so bribi e boewegi wi foe waka soifri na baka den instructie foe Gado èn foe dini leki prékiman foe regtvaardikifasi. Na bribi foe Abraham ben meki wi kon ferstan boenboen na fanowdoe foe gi jesi na Gado èn foe poti fertrow na ini den pramisi foe en, awinsi sowan foe den no kontroe ete. Na eksempre foe Mozes e sori dati bribi jepi wi foe kibri wisrefi sondro flaka foe a grontapoe disi èn foe jepi a pipel foe Jehovah loyaal.Den sani di psa nanga den kroetoeman nanga kownoe nanga proféti foe Israël e bewijsi dati bribi ini Gado kan horibaka gi wi na mindri foe ferfolgoe. nanga tesi. Èn fa wi de nanga tangi na ati dati na eksempre foe Jezus Kristus di psa ala trawan e meki wi bribi de stanfaste èn sondro foe seki! Meki foe dat’ede wi go doro leki kotoigi foe Jehovah foe sori bribi di e tan, nanga Jezus leki wi Tiriman èn ini na krakti foe wi Gado.
San de a piki foe joe?
◻ Sortoe doe foe kotoigi foe Jehovah bifo a ten foe Kristus e bewijsi dati bribi e sori te joe poti joe fertrow krinkrin a tapoe Jeho- vah na ini a ten foe kefar?
◻ Foe san-ede wi kan taki dati wi kan kakafoetoe nanga boen winimarki nanga jepi foe bribi gi ibri tesi tapoe wi soifri-retifasi?
◻ Sortoe bewijsi wi abi dati wi kan ferdrage ferfolgoe nanga jepi foe bribi?
◻ Foe san’ede den kari Jezus „a Sma di e meki wi bribi kon de volmaakti”?
◻ San na wantoe foe den foeroe fasi foe bribi?
[Prenki na tapoe bladzijde 6]
David ben sori bribi foedi a ben fertrow krinkrin tapoe Jehovah. Wan heri boen eksempre gi Jehovah pipel ini a ten disi!
[Prenki na tapoe bladzijde 8]
„Oemasma ben kisi den dedewan foe den baka nanga jepi foe opobaka.” Bribi na ini na opobaka e jepi wi foe kibri wi soifri-retifasi na fesi foe Jehovah