Jezus libi nanga diniwroko

Tjari wan kefarlek bigi winti kon tiri

A HERI dé Jezus ben de druk bezig. A ben gi leri foe eksempre na de ipi sma tapoe na sjoro èn bakaten ferklari den agersitori persoonlijk gi en discipel. Te neti e doro ai taki: „Meki wi koti abra go na a tra sjoro”.

Na a abrasé foe na oostoesjoro foe na se foe Galiléa na gebied didon di den e kari Dekápolis, foe na Griki wortoe de’ka, san wani taki „tien”, èn po’lis, san wani taki „foto”. Den foto foe na Dekápolis de wan centrum foe Griki koeltoeroe, aladi sondro degedege ooktoe foeroe djoe e libi drape. Ma na aktiviteit foe Jezus ini a gebied de pikinso. Srefi na a fisiti disi, soleki bakaten wi sa si ai kisi hendri foe tan langa drape.

Tapoe na aksi foe Jezus foe go na a tra sjoro, dan den discipel e teki en go ini a boto. Ma a hari gwe foe den no e tan wan sani di sma no e si. Heri esi tra sma ooktoe e djompo ini den boto foe den foe go makandra nanga den. A no de toemsi fara foe go na a tra sé. Na se foe Galiléa te joe loekoe en boen de soso wan bigi meer foe sowan 20 kilometer langa èn nanga wan bradi foe maximaal 12 kilometer.

A de wan sani di de foe ferstan dati Jezus wer. Foe dat’ede baka te den hari gwe Jezus e go didon es’esi bakasé ini a boto, e poti en ede tapoe wan koensoe èn e fadon go ini wan dipi sribi. Difrenti foe den apostel de sériman di abi ondrofeni èn di nofotron ben go fisi ini a se foe Galiléa. Den e hori densrefi soboen bezig nanga koti abra.

Ma disi no sa de wan makriki waka. Foe na hé temperatuur ede tapoe na watra, di de moro leki 200 meter ondro na se-spigri, èn na moro kowroe loktoe ini den bergi di de krosbé, meki wawantron krakti winti e naki èn e meki hebi bigi winti e kon wantewante tapoe a se. Disi e psa ooktoe now. Her’esi den skwala e naki tege a boto èn e spat go na inisé sodati a boto pikinmoro e foeroe nanga watra. Ma Jezus e sribi gewoon doro.

Den seman di abi ondrofeni e wroko tranga foe hori a boto ini na joisti koers. Sondro degedege a de so dati den ben sabi a fesi foe psa bigi winti. Ma a tron disi den de na a kaba foe den krakti foe den. Foe di den frede foe a libi foe den meki den e wiki Jezus. ’Masra joe no e broko joe ede kwetkweti, wi e soengoe’, den e bari. ’Ferloesoe wi, wi sa dede a watra!’

Aladi Jezus e opo, a e komanderi a winti èn a se: ’Tan pi! Tan pi!’ èn na krasi winti e go didon èn na se e bedari. Dan den e drai go na en discipel èn Jezus e aksi: ’Foe san-ede oenoe e frede so? Oenoe no abi bribi ete?’

Dan wan ongewoon frede e kon abra den discipel. ’Soema na a man disi tog?’ den e aksi makandra. ’Bika ai komanderi srefi den winti nanga watra, èn den e jere en?’

Fa Jezus ben sori bigi krakti! Fa ai gi joe wan korostoe firi foe sabi taki a kownoe foe wi abi makti tapoe den natuurelementi èn dati, te ini a ten foe en kownoekondretiri a sa poti ala en prakseri kon tapoe na grontapoe disi, dati ala sma sa libi ini sekerfasi, sondro frede gi kefarlek natuurrampoe!

Wan pisten baka te a bigi winti saka, dan Jezus nanga en discipel e doro boen na a oostoe sjoro. Kande den tra boto ben psa na hebi foe na bigi winti èn den ben drai go boen baka na oso. Markus 4:35–5:2; Mattéus 8:18, 23-28; Lukas 8:22-27.

◆ San na a Dekápolis, èn pe a didon na ini na gebied?

◆ San e meki den hebi winti tapoe na se foe Galiléa doe kon?

◆ San den discipel e doe, te na koni foe den leki sériman no kan jepi den?

[Wan prenki di e tapoe heri bladzijde 12]