Begi e aksi wroko
„Yehovah de farawe fu den goddelowsoewan, ma a begi fu den regtvaardikiwan a e yere.” — ODO 15:29.
1. Na sortu kondisi wi mu miti efu wi wani dati Gado yere den begi fu wi?
ALA vereiste fu Yehovah de koni, regtvaardiki èn nanga lobi. Seker den no de wan lai di e kwinsi wi (1 Joh. 5:3). Disi de ooktu so gi en vereiste di abi fu du nanga begi. Wan fu den vereiste de dati wi mu libi ini akruderi nanga den begi fu wi. A waka nanga libi fu wi mu plisi Yehovah Gado. Fa wi kan ferwakti tra fasi dati a sa poti yesi arki na den begi an tranga begi fu wi?
2, 3. Fu san-ede Yehovah no ben yere den begi fu den Israëlsma soleki ben kon a fesi ini den wortu fu Yesaya, Yeremia nanga Micha?
2 Disi na wan fu den sei fu den begi di a moro bigi pisi fu den memre fu na kristenheid e frigiti, net soleki den Israëlsma ini a ten fu Yesaya di ben fadon komoto na bribi ben frigiti dati. Fu dat’ede Yehovah ben meki en profeiti taki san e kon ini a nen fu en: „Awinsi unu e seni furu begi kon, wi no e arki . . .. wasi unsrefi, krin unsrefi, puru na tu fasi fu den du fu unu na fesi fu mi ai, kaba fu du ogri. Leri fu du bun” (Yesaya 1:15-17). Iya efu den Israëlsma dati ben wani kisi a bunati fu Gado, dan den ben mu handri tapu wan fasi di ben e plisi en. Soleki den ben taki wan dei tapu wan moi fasi: „Efu yu Cado arki na yu te yu e begi, dan yu mu arki na en te en e taki.”
3 Te yu luku en bun dan Yehovah Gado alaten baka ben feni en fanowdu fu memre en pipel Israël na den waarheid disi. Na so wi ben leisi: „A sma di e puru en yesi fu a yere fu a wet — srefi en begi de wan tegu sani” gi Gado. „Yehovah de farawe gu den goddelowsuwan, ma na begi fu den regtvaardikiwan a e yere” (Odo 28:9; 15:29). Fu na situwasi disi ede meki Yeremia ben e sari èn taki: „Yu [Yehovah] ben poti sani abra na pasi di e go na yu nanga wan wolku, sodati na begi no kan pasa gwe” (Kragisingi 3:44). Na warskow di Micha ben gi na ondro na krakti fu santa yeye, seker ben kontru: „Den sa kari Yehovah fu kisi yepi, ma a no sa piki den. Na a ten dati a sa kibri en fesi gi den, ini akruderi nanga na takrudu di den ben du ini den wroko fu den.” — Micha 3:4; Odo 1:28-32.
4. San e sori dati srefi bun furu sma na mindri Yehovah pipel no e ferstan dati den wroko fu den mu de ini akruderi nanga den begi fu den?
4 A de sobun fanowdu fu libi ini akruderi nanga den begi fu wi. A de fanowdu fu poti krakti a tapu a sani disi ini disi ten? Iya futru, no wawan fu na situwasi na ini na kristenheid, ma ooktu fu na situwasi ede na ini san furu memre fu Yehovah pipel di gi densrefi abra de na ini. Fu den moro leki dri miljoen preikiman fu na bun nyunsu di ben de na yari di ben psa, moro leki 37.000 ben sluit uit fu waka nanga libi di no fiti wan kristen. Dati de wan sani fu wán tapu 80. A de séker dati a moro bigi pisi fu den ben e begi so wawantron. Ma den ben e handri ini akruderi nanga na begi fu den? Kwetkweti! Srefi wantu owruman di tintin yari kaba ben de ini na furutendienst, ben de a mindri den sma di ben kisi wan ofu tra vorm fu tranga leri. Fa disi de wan sari sani! Iya, „a sma di denki dati a e tanapu, mu luku bun dati a no fadon”; dati a no handri tapu wan fasi di e meki dati den begi fu en de wan sani di en Mekiman no e teki. — 1 Kor. 10:12.
Fu san-ede begi e aksi wroko
5. Fa wi mu sori na opregtifasi fu wi sodati Yehovah kan yere den begi fu wi?
5 Efu wi wani dati Yehovah Gado arki na den begi fu wi, dan wi no mu do soso moreel nanga yeyefasi krin, ma wi mu sori ooktu dati den begi fu wi mu do opregti fudi wi e wroko na den sani fu san wi e begi fu den. Begi wawan no de wan sani di e kon ini a presi fu opregti, èn ferstandiki muiti. Yehovah no sa du gi wi san wisrefi kan du fu di wi nanga ala seryusu fasi e poti a rai ini en Wortu ini wi libi èn e waka na baka na tiri fu na santa yeye fu en. Wi mu de klari ini disi fu du ala sani san de ini wi makti, sodati a abi wan fondamenti fu yere den begi fu wi. Sobun ’wi no mu aksi moro leki fu san wi de klari fu wroko’, soleki wan sma ben taki en heri moi.
6. Fu sortu tu rede wi mu begi?
6 Ma na aksi ben kan poti ’fu san-ede wi e begi, efu wi mu wroko gi den sani fu san wi e aksi fu den’? Moro pikinso fu tu bun rede wi mu begi. Ini a fosi presi wi mu erken nanga den begi fu wi dati ala bun sani e komoto fu Gado. En de na Giman fu ibri bun èn volmaakti presenti — a skijn fu na son, alen, fatuten nanga someni moro ete! (Matt. 5:45; Tori. 14:16, 17; Yak. 1:17.). Ini a tweede presi a e anga fu na blesi fu Yehovah ofu den muiti fu wi sa waka bun ofu no. Soleki wi e leisi na ini Psalm 127:1: „Efu Yehovah srefi no bow a oso, a fu soso den bowman e wroko tranga na en. Efu Yehovah srefi no e luku na foto, na fu soso waktiman e wakti.” Na srefi prakseri e kon a fesi fu den wortu fu na apostel Paulus ini 1 Korinte 3:6, 7: „Mi ben prani, Apollos ben meki nati, ma Gado ben tan meki a gro, sodati no a sma di ben prani de wan sani, no a sma di e nati de wan sani, ma Gado di meki a gro.”
Wantu eksempre fu owruten
7, 8. (a) Sortu sani di ben psa ini a libi fu Yokob ben sori dati a ben ferstan dati begi mu go makandra nanga wroko? (b) Sortu eksempre Kownu David ben gi ini a tori disi?
7 Den buku fu na bijbel e ferteri fu furu geval pe e kon a krin dati Yehovah dienstknegti ben e wroko na den sani fu san den ben e bigi fu den. Meki wi luku wantu aparti eksempre. Fudi Abraham pikinpikin Yakob ben kisi na blesi fu na fosi gebortu reti, meki en moro owru brada Esau ben abi wan hogri ati fu en fu kiri en (Gen. 27:41). Wan twenti yari so na baka, di Yakob ben drai go baka fu Paddan-aram go na en gebortu kondre, a ben kon sabi dati Esau ben go hari go miti en. Nanga na feianti fasi fu Esau na ini prakseri meki Yakob ben begi tranga na Yehovah fu kibri en tege na atibron fu en brada. Ma a ben libi a tori nanga dati? Nono, kwetkweti. A ben seni bun furu presenti na fesi go bika na so a tak-go-tak-kon: „Kande mi kan meki en ati firi bun nanga na presenti di mi e seni go a fesi fu mi.” Èn so a ben waka ooktu, bika di den tu brada ben miti makandra, Esau ben brasa Yakob èn a ben bosi en. — Gen. 32, 33.
8 Wan tra eksempre fu wroko fu a bun fu den sani fu san wi e begi wi kisi fu David. Di en manpikin Absalom ben teki na troon abra, dan Achitofel, na raiman fu David, ben go na a sei fu Absalom. Fu dat’ede David ben begi tranga ofu a rai fu Achitofel no ben sa waka bun. Ma David e libi a begi disi leki fa a ben de? Nono, a ben komanderi en raiman Husai fu go moksi ensrefi na Absalom fu meki na rai fu Achitofel no go doro. Èn so a ben psa ooktu. Absalom ben handri na ini akruderi nanga na takru rai di a ben kisi fu Husai, èn a ben trowe na rai fu Achitofel. — 2 Samuël 15:31-37; 17:1-14; 18:6-8.
9. Fa Nehemia ben sori dati a ben ferstan bunbun na gronprakseri dati begi mu go anu nanga anu nanga wroko?
9 Ete wan eksempre di kan kari fu gi wi dek’ati de di fu Nehemia. A ben abi na frantwortu fu bow wan bigi project — na bow baka fu den skotu fu Yeruzalem. Ma furu feianti ben de di ben meki komplot tege en. Nehemia no ben begi wawan ma, soleki wi e leisi, a ben wroko ooktu: „Wi ben begi wi Gado èn dei nanga neti wi ben hori wakti tege den fu den ede.” Fu bigin nanga a pisten dati dan afu fu den yunguman fu Nehemia ben de klarklari fu kibri na tra afu, den sma di ben e bow na a muur. — Neh. 4:9, 16.
Na eksempre fu Yesus
10, 11. Sortu eksempre di Yesus ben gi ben sori dati a ben handri ini akruderi nanga den begi fu en?
10 Yesus Kristus ben gi wi wan tumsi moi eksempre ini a tori fu wroko na den sani fu san wi e begi fu den. A ben leri wi begi: „Yu nen mu kon santa.” (Matt. 6:9). Ma ooktu Yesus ben du san a ben kan sodati den arkiman fu en ben sa santa a nen fu en Tata. Ooktu Yesus no ben poti ensrefi nomo fu begi: „Tata gi grani na yu nen” (Yoh. 12:28). Nono, a ben du san a ben kan fu gi grani na en Tata nen èn fu beweigi trawan go sofara fu du disi ooktu. — Luk. 5:23-36; 17:12-15; Joh. 17:4.
11 Di Yesus ben si na bigi nowtu fu den sma, a ben taigi den discipel: „Na kotiwroko bigi, ma weiniki wrokoman de. Begi fu dat’ede na Masra fu a kotiwroko” (Matt. 9:37, 38). Yesus ben libi a tori nanga dati? Kwetkweti! Wantewante a baka dati a ben seni twarfu apostel tu na tu go na wan preiki ofu „koti”-veldtocht. Bakaten Yesus ben seni den seibitenti evangeliumpreikiman go fu du asrefi wroko. — Matt. 10:1-10; Luk. 10:1-9.
Gebroiki na gronprakseri
12. Fa wroko abi fu du nanga wi begi na Gado fu kisi na brede fu wi fu aladei?
12 A de krin dati Yehovah Gado e ferwakti fu wi dati wi de consequent, dati wi handri ini akruderi nanga den begi fu wi èn na sofasi sori na opregti fasi fu wi. Yesus ben leri wi fu begi: „Gi wi fu tide na brede fu wi fu tide” (Matt. 6:11). A de fu dat’ede nanga reti dati ala en bakaman e seni tranga begi na ini a yeye disi go na Gado. Ma wi e ferwakti dati wi hemel Tata sa yere a begi dati sondro dati wi du wan sani na en? Kwetkweti. Fu dat’ede meki wi e leisi: „Na lesiman e sori taki a de nanga big’ai” — kande srefi fu bigi — „ma en sili no abi noti” (Odo 13:4). Na apostel Paulus ben meki a punt disi kon krin na ini 2 Thessalonika 3:10, pe a e taki: „Efu wan sma no wani wroko, no meki a nyan ooktu.” Na begi fu kisi brede fu aladei mu go anu nanga anu nanga a de klari di wan sma de klari fu wroko. A de wan moi sani fu si dati Paulus ben sori wan moifasi fu si sani di a ben taki dati a sma di no wani wroko no musu nyan. Son sma di wel wani wroko, de sondro wroko kande, e siki ofu de tumsi owru fu wroko. Den de klarklari fu wroko ma den omstandigheden fu den no e gi pasi fu dati. Fu datmeki dati nanga leti den kan begi fu a brede fu tide èn mag howpu fu kisi en.
13. San wi mu du sodati Yehovah sa yere den begi fu wi fu kisi en santa yeye?
13 Yesus ben gi wi ooktu na rai fu aksi en hemel Tata fu santa yeye. Soleki Yesus e dyaranti, dan Gado de klarklari moro ete fu gi wi a santa yeye leki den grontapu papa nanga mama de klari fu gi den pikin bun sani (Luk. 11:13). Ma wi kan ferwakti dati Yehovah Gado sa gi wi tapu wan wondrufasi en santa yeye, sondro wan enkri muiti fu wi sei? Kwetkweti! Wi mu du san wi kan fu kisi santa yeye. Boiti dati wi mu begi fu en, wi mu gi wisrefi nyanyan fayafaya nanga a Wortu fu Gado. Fu san-ede? Fu di Yehovah Gado no e meki wi kisi en yeye lusu fu en Wortu, èn wi no kan howpu fu kisi santa yeye efu wi no e luku na grontapu kanaal fu san Yehovah e meki gebroiki fu en na ini a ten disi, „na getrow èn koni srafu”, di na Tiri Skin fu Yehovah Kotoigi e teki presi fu en. Sondro na yepi fu na „srafu” disi dan wi no ben sa man fu ferstan na heri betekenis fu san wi e leisi, èn ooktu no ben sa sabi fa wi ben mu gebroiki san wi ben leri. — Matt. 24:45-47.
14, 15. (a) Fa wi mu wroko makandra efu wi wani dati Yehovah yere den begi fu wi fu kisi koni? (b) Fa na eksempre fu kownu Salomo e bewijsi disi?
14 Na gronprakseri dati begi e aksi wroko, abi fu du ooktu nanga den wortu fu a discipel Yakobus, na afu brada fu Yesus di e kon now: „Efu wan sma fu unu mankeri koni, dan a musu tan aksi Gado, bika a e gi na ala sma sondro gridi èn sondro ferweiti; èn a sa kisi en” (Jak. 1:5; Matt. 13:55). Ma Gado e gi wi a koni disi nanga yepi fu wan ofu tra wondru? Ini na fosi presi wi mu abi na yoisti yeyefasi soleki wi e leisi: „A sa leri den safri-ati sma en pasi” (Ps. 25:9). Èn fa Gado e leri „den safri-atiwan”? Nanga yepi fu en Wortu. Ete wantron, wi mu du muiti fu ferstan en èn fu gebroiki en, soleki ooktu ini Odo 2:1-6 wi e kisi fu yere: „Mi manpikin, efu yu teki mi wortu èn e poti mi gebod leki wan gudu na yu, fu poti prakseri nanga yu yesi na koni, sodati yu e beni yu ati go na koni fu si sani; efu boiti fu dati yu e bari kari yusrefi na ferstan èn e opo yusrefi go na a koni fu si sani, efu yu tan suku en leki yu e suku solfru . . . dan ini a geval dati yu sa ferstan na frede fu Yehovah, èn yu sa feni na sabi fu Gado. Bika Yehovah srefi e gi koni.”
15 Na gronprakseri dati begi e aksi ooktu wroko kan tyari kon a tapu a tori dati kownu Salomo ben begi fu koni èn Gado ben yere en begi na tapu wondrufasi? Iya, bika leki kownu fu Israël Salomo ben de ferplekti fu meki gi ensrefi wan afschrift fu na wet, fu leisi aladéi na ini èn fu poti na weti disi ini en eigi libi. Ma di Salomo ben go tege den instructie fu na wet, fu di fu eksempre a ben teki furu uma nanga asi, dan den wroko fu en no ben de moro na ini akruderi nanga en begi. A bakapisi ben de dati Salomo ben fadon komoto fu bribi èn ben dede sondro „ferstan”. — Ps. 14:1; Deut. 17:16-20; 1 Kow. 10:26; 11:3, 4, 11.
16. Sortu eksempre e sori dati den begi fu wi fu kisi yepi fu wini swakifasi fu a skin mu go makandra nanga wroko?
16 A gronprakseri dati begi mu go makandra nanga begi, abi ooktu fu du te wi e aksi a yepi fu Gado fu wini wan ofu tra gwenti te wi e prakseri wisrefi nomo. Na so wan sisa di ben de pionier ben ferteri dati a ben de wan srafu fu televisie-serie èn dati a ben luku na dati ibridei fu erfu yuru mamanten te go miti harfu fo bakadina. Di a ben yere tapu wan lezing tapu wan districtcongres omeni hogri den sortu hurudu programma dati de, a ben poti na afersi dati na ini begi a fesi Yehovah. Ma a ben hori wan heri pisten bifo a ben wini a gwenti disi fu en. Fa dati ben du kon? Ensrefi ben taki fu disi: ’Fu di mi ben e begi alaten baka fu wini a gwenti disi èn dan tog ben go sdon luku den programma dati. Fu dat’ede mi ben teki a bosroiti . . . . . fu tan a heri dei ini velddienst, sodati mi no ben sa kon ini na tesi. Te fu kaba mi ben kon so fara dati mi ben kan kiri na t.v. mamanten èn ben kan de heri dei na strati.’ Iya, boiti dati a ben begi fu wini a swakifasi fu en, a ben mu wroko fu wini dati.
Begi èn a preiki fu wi
17-19. (a) Fu sortu tru tori e kon a krin dati Yehovah Kotoigi ben handri ini akruderi nanga den begi fu den? (b) Nanga sortu eksempre a srefi sani e bewijsi?
17 Na gronprakseri dati begi e aksi wroko, nowan tra presi de so tranga leki ini na Kownukondrepreikiwroko. Sobun ala kotoigi fu Yehovah no wawan e begi fu kisi moro wrokoman ini a kotiwrolo, ma densrefi e poti densrefi a tapu a wroko dati. Na bakapisi de dati na ini na wan kondre baka a trawan kefarlek bigi gro de fu si. Fu kari soso wan eksempre: Na ini 1930 soso wan kotoigi fu Yehovah ben preiki ini Chili. Now na wan kotoigi dati no tron soso dusun ma te so wan 30.000 (Yes. 30:22). Disi ben de soso na bakapisi fu begi? Nono, wroko ben du ooktu. Iya, soso kaba na ini 1986 Yehovah Kotoigi ini Chili ben gi moro leki 6.492.000 yuru ini a preikiwroko.
18 Asrefi de so te den tapu a preikiwroko. Dan kotoigi no e begi wawan fu gro ma den e tan preiki na kibrifasi ooktu. Aladi gens de fu a sei fu lanti toku gro e feni presi ooktu ini den kondre disi. Na so Yehovah Kotoigi ini 33 kondre pe den abi fu du nanga gens fu a sei fu lanti ben gi ini a dienstyari 1986 moro leki 32.600.000 yuru ini preikiwroko èn den ben kan prisiri na ini wan gro fu 4,6 procent!
19 A no de fu taki dati na gronprakseri dati begi e aksi wroko abi ooktu fu du nanga un persoonlek. Kande wi e aksi Yehovah fu kisi wan oso-bijbelstudi ma wi no e du ala san wi kan fu kisi wan. Dati ben de na ondrofeni fu wan sisa di ben de pionier. Fu di a ben abi soso wán bijbelstudi a ben begi efu a ben mag kisi moro. A ben libi a tori nanga dati? Nono, ma a ben go luku a diniwroko fu en finifini èn a ben si dati na den gobaka fu en a no ben e taki fu a tori fu bijbelstudi. Di a ben tyari kenki kon ini disi dan heri esi a ben kisi tu bijbelstudi.
20. Fa na gronprakseri dati begi e aksi wroko kan tya kon na fesi syatu?
20 Furu moro eksempre ben kan gi fu bewijsi dati begi e aksi wroko, soleki fu eksempre ini a geval fu persoonlek matifasi ini a osofamiri ofu ini na gemeente, Ma den eksempre di gi dya a fesi ben sa mu de nofo fu sori a tori krinkrin dati begi trutru e aksi wroko. Disi de wan sani di logis srefsrefi, bika wi no kan ferwikti dati Yehovah Gado sa gi wi wan bun yesi fu arki na den begi fu wi efu na asrefi ten wi e gi en sari nanga wi waka nanga libi. Ooktu a de logis dati wi musu du ini akruderi nanga den begi fu wi san wi kan fu mag ferwakti dati Yehovah du gi wi san wisrefi no kan. Iya, Yehovah gronprakseri de trutru koni èn regtvaardiki. Den de redelek èn efu wi e handri na ini akruderi nanga dati, dan dati de fu na égi tanbun fu wi.
Yu e memre disi ete?
◻ Sortu vereiste di abi fu du nanga begi furu sma ini a owru Israël ben luku psa?
◻ Fu san-ede a no de onredelek dati Gado e aksi fu wi dati wi wroko èn begi fu den sani di wi wani?
◻ Sortu eksempre fu owruten e sori taki Yehovah dienstknegti ben wroko na den sani san den ben aksi fu den?
◻ Nanga san wi mu hori wisrefi bezig, efu wi wani dati Gado yere den begi fu wi fu kisi en santa yeye èn koni?
◻ Fa na gronprakseri dati begi e aksi wroko abi fu du nanga velddienst?
[Prenki na tapu bladzijde 7]
Jezus ben gi en discipel dek’ati foe begi foe moro wrokoman kan kon ini na kotiwroko. Ma a ben seni den ooktu go ini na préki ofoe „kotiwroko”
[Prenki na tapu bladzijde 8]
Joe e begi foe kisi jepi foe tan basi foe joe gwenti foe loekoe Teevee? We poti na gronprakseri ini joe libi di e taki begi e aksi wroko foe joe sé èn kiri joe TV