Yu de tevrede nanga den sani di Yehovah seti na yeyefasi?

„’Tesi mi grantangi na ini disi,’ Yehovah fu den legre ben taki, ’ofu mi no sa opo gi unu den sroisi fu hemel èn trutru kanti wan blesi tapu unu te leki mankeri no de moro’”. — MALEACHI 3:10.

1. Nanga sortu seti na lostu fu pikinmoro „ala san e libi”, e kisi satisfaksi?

EFU yu ben tapu fu hari bro, dan ini wantu minuut yu sa dede. Efu yu tapu fu dringi watra, dan na ini wantu dei yu sa dede. Efu yu tapu fu nyan, dan ini wantu wiki yu sa dede. Efu yu tapu fu gi yusrefi nyanyan nanga den sani di Yehovah seti na yeye fasi, dan yu sa dede fu tego, te yu dede. Yehovah e gi na loktu, na watra èn na nyanyan di ala sani di de na libi abi fanowdu. Fu dat’ede meki na Psalmsingiman e taigi Yehovah: „Yu e opo yu anu èn e kowru na angri fu ala san e libi” (Psalm 145:16). Na angri fu pikinmoro „ala san e libi”, e kowru krinkrin nanga yepi fu den sani di seti na skinfasi. Ma disi no de so gi libisma meki-sani.

2. A faya lostu fu libisma e go na sortu sani, èn sortu seti de fanowdu fu meki na lostu disi kisi satisfaksi?

² Yesus ben meki disi kon na krin di a ben taki: „Libisma no mu libi wawan fu brede, ma fu ibri taki di e komoto fu Yehovah mofo” (Mattéus 4:4). Den lagi mekisani no abi ferstan fu tego libi, ma libisma wel, soleki e taki ini Preikiman 3:11: „Srefi ten di no abi marki a ben poti ini den ati.” Ofu soleki na Revised Standard Version e taki en: „A ben poti tego-fasi ini na ferstan fu na libisma.” Na tranga lostu fu na libisma fu dat’ede de fu libi fu ten di no abi marki, iya fu tego, Loktu, watra nanga brede wawan no de nofo fu dati. Fu libi fu tego, dan sani di seti na yeye fasi de fanowdu, di abi den fondamenti tapu „ibri taki di kon fu Yehovah mofo”. Ini a ten disi wan sma kan feni den ini wán buku, a bijbel, èn na voorraad de so, dati a no e kaba noiti — ala sani san yu abi fanowdu, moro leki yu kan ferstan. Na maksin disi noiti e kon leigi.

3. Leki fa Yesus taki dan san ben de na moro prenspari sani, èn sortu kibri-tori Paulus ben leri?

³ Yesus ben leri wi begi fu kisi na fanowdu nyanyan na skinfasi: „Gi wi tide na brede fu tide.” Ma no langa a baka a ben poti yeye afersi tapu a fosi presi di a ben taki: „Tan suku dan fosi na kownukondre nanga en regtvaardikifasi” (Mattéus 6:11, 33). Nyanyan na skinfasi e hori wi alaten baka na libi soso fu wan dei . Te wi teki yeye nyanyan na ini wi, dan wi kan libi wan heri libisma libi, iya fu tan srefi fu tego na ini libi. Sobun no broko yu ede noiti fu sani na skinfasi. Paulus no ben du disi. A ben taki fu yeye yepi di ben e yepi en fu de te vrede awinsi a ben de ini sortu omstandigheden na skinfasi tu. A ben taki: „Wi ben leri a kibritori fu alatu fu mi bere furu èn fu angri kiri mi, fu abi pasamarki èn fu pina. Gi ala sani mi abi na tranga nanga yepi fu en di e gi mi krakti.” — Filipi 4:12, 13.

Rampu e kon tapu den wan di no de tevrede

4. Sortu sani di ben seti na fosi libismapaar no ben feni nofo, èn san den ben wani moro ete?

⁴ Ma furu sma no de tevrede nanga den sani di Yehovah seti. Den fosi papa nanga mama fu wi no ben de dati. Den ben libi ini wan paradijsdyari — na moi kontren ben de wan lostu gi na ai, na loktu di den ben hari go na ini ben furu nanga switi smeri fu moi bromki, switi nyanyan ben meki den kisi watramofo, èn na singi fu fowru ben de gi den leki wan moi serenade. Boiti fu dati dan na moi wroko ben de tapu den skowru fu sorgu gi na dyari èn ooktu ete na blesi grani fu furu na grontapu nanga volmaakti bakapikin. Ma den ben prakseri densrefi nomo. Den ben feni san Yehovah ben gi no nofo. Den ben wani moro. Den ben wani bepaal densrefi san bun èn san ogri. Sobun den ben du disi èn a fosi bosroiti fu den ben tyari rampu kon èn ben meki dati den nanga den bakapikin fu den ben lasi ala sani. — Genesis 3:1-7, 16-19.

5. Nanga san Yehovah ben blesi den Israëlsma, èn fa den ben teki dati?

⁵ Den Israëlsma ben waka baka a takru eksempre fu den. Gado ben fri den fu katibo ini Egypte, ben meki den tron wan natie, ben gi den wan volmaakti wet, ben tyari den ini a waka di den ben waka lontu psa na sabana, ben sorgu gi krosi gi den di noiti ben broko èn ben horibaka gi den tapu wan wondrufasi nanga mana di ben fadon komoto fu hemel èn watra di ben kuku kon fu wan stonbergi. Ma den no ben de tevrede nanga den sani di Yehovah ben seti. (1 Korinte 10:1-5). Aladi den ben hari psa na sabana den ben kragi alaten baka. — Exodus 13:21, 22; Numeri 11:1-6; Deuteronomium 29:5.

6. Sortu libifasi ben tyari pori kon tapu den Israëlsma leki natie?

⁶ Ooktu di den ben seti den srefi kaba na ini na Pramisi kondre — wan fatu kondre di ben abi furu watra èn „ben lon, merki nanga oni” — den ben knoru ete. Den ben de ete sondro tangi, den no ben de tevrede ete nanga den sani di Yehovah ben seti, èn den ben tapu fu anbegi en, ben drai go na seksanbegi fu kruktu gado. ben offer den pikin fu den na Molech èn ben tyari pori kon tapu den leki natie. Bakadi den ben kon fri fu katibo ini Babylon, den ben waka na baka mofotaki sodati na Wortu fu Gado ben meki kon de sondro krakti. Te fu kaba den ben kiri na pramisi Messias fu den, Kristus Yesus. — Deuteronomium 6:3; 8:7-9; Krutuman 10:6; 1 Kownu 14:22-24; 2 Kownu 21:1-16; Yesaya 24:1-6; Mattéus 15:3-9; 27:17-26.

7. Fa den disi ten kerki fesiman e tan waka baka na srefi libifasi leki den priester fu Maleachi ten di no ben tan getrow?

⁷ Te nanga a dei fu tide a libisma-famiri ini algemeen e tan sori dati den wani falsi kerkibribi moro furu. Den kerki fesiman e feragti Yehovah nen, iya den no e gebroiki dati srefi. Den e afrontu en nanga den sortu leri disi di no komoto fu a bijbel, soleki na Driwanfasi, na sili di no e dede noiti èn tego pina ini na helfaya. Den leri fu den no wawan doti nanga lei di teki abra fu na owru Babylon nanga Egypte ma ini furu geval den pori ooktu nanga na no erken fu Kristus ferlusu-ofrandi èn na teki di den e teki evolutie. Den e fufuru na grani puru fu Yehovah di a mu kisi, net soleki den priester ini Maleachi ten ben du disi. — Maleachi 1:6-8; 3:7-9.

8. (a) Sortu kari den priester fu na ten fu Maleachi èn den kerki fesiman fu na ten disi ben poti a wan sei? (b) Suma ben teki wel na kari, èn nanga sortu bakapisi?

⁸ Den Israëlsma na ini a ten dati ben kisi dek’ati fu krin densrefi èn fu drai go na Yehovah. „Drai kon baka na mi, èn mi sa drai baka na yu”, Yehovah ben taki. Moro fara a ben gi den na kari di e kon now: „’Tesi mi grantangi na ini disi,’ Yehovah fu den legre ben taki, ’ofu mi no sa opo gi unu den sroisi fu hemel èn trutru kanti wan blesi tapu unu, te leki mankeri no de moro’” (Maleachi 3:7, 10). Soso wan fikapisi fu na dyu natie ben drai baka na Yehovah; ini a ten disi wan getrow fikapisi fu na yeye Israël ben drai komoto fu den falsi fasi fu anbegi fu a grontapu disi. Den, makandra nanga wan bigi ipi fu anbegiman di yu kan teki gersi nanga skapu di a nomru fu den e gro dei fu dei, e prijse Yehovah leki en kotoigi (Yohannes 10:16). Fu den Yehovah ben hori ensrefi na en pramisi èn a ben ’opo den sroisi fu na hemel èn ben kanti tapu den wan blesi te leki mankeri no de moro’ — wan trutru nyanyan fu yeye nyanyan! — Yesaya 25:6

Yeye nyanyan psa marki

9. Sortu yeye seti fu sani de na ini a ten disi, èn fa den e kon fu ala sma kan kisi den, èn nanga sortu bakapisi?

⁹ „Na getrow èn koni srafu”, di leki fa Yesus ben taki na fesi ben sa kon na ini wi ten, de druk bezig fu gi wan hoeveelheid yeye nyanyan pasamarki (Mattéus 24:45). Soso kaba na ini a yari di psa moro leki dri milyun kotoigi fu Yehovah ini 208 kondre èn eilanti èn den se èn ini sowan 200 tongo den ben poti den yeye sani disi gi ala sma fu kisi fu di den tyari fisiti go oso fu oso èn fu prati hondrohondro milyun buku nanga tijdschrift nanga bijbel. Furu sma ben meki gebroiki fu na yeye nyanyan disi èn den bere ben furu: Moro leki 225.000 nyun sma ben teki dopu ini wan yari!

10. Sortu seti de fu kan gi yesi na a fermane fu Paulus fu kon makandra?

¹⁰ Yehovah seti fu sani na yeyefasi de ooktu fu kisi nanga yepi fu districtcongres, kringkomakandra èn den feifi alawiki konmakandra di e hori geregeld ini sowan 52.000 gemeente fu Yehovah Kotoigi — ala disi fu gi yesi na a fermane fu Paulus ini Hebrewsma 10:25 ’un no libi na komakandra fu wi a wan sei’.

11. San e sori dati a de na fasi di yu sa winsi fu sreka yeye nyanyan a fesi?

¹¹ Te wan uma e kari fisitiman fu kon nyan, dan a no de so dati a e bori wan pikin pisi meti èn e poti en tapu wan preti. A e meki gebroiki fu spesrei èn sowtu fu meki a kisi wan switi smeri èn a e poti sani lontu ala sani fu switi na ai. Soso a si èn a smeri de nofo fu meki wan sma kisi watramofo èn fu gi tranga na den sap fu na spijsvertering. Disi na a fasi tapu fa Yehovah ben sreka sani na yeyefasi — no ini wan drei, fasi leki ini wan encyclopedia ma tapu wan switifasi fu meki na yeye prisiri èn fu seki na ati. Ibri aparti kristen mu waka baka na eksempre dati. „Na yesi srefi no e tesi wortu, soleki na tapsei fu mofo e tesi nyanyan?” — Yob 12:11.

12. Sortu eksempel de fu yeye nyanyan di sreka tapu wan switifasi?

¹² Na buku Handleiding gi na theokratis diniwrokoskoro e poti krakti ini studi 1 tapu na gebroiki fu switi wortu. Salomo no ben gebroiki wawan den yoisti wortu ma ooktu switi wortu (Preikiman 12:10) Ini Psalm 45:2 den ben taki a fesi fu a Messias: „Switifasi ben kanti tapu yu mofobuba”. Disi ben sori taki a de so ooktu. Den arkiman fu en „ben fruwondru fu den switi wortu di ben komotofu den mofo”. Den ben tan krosbei fu en fu yere en, ben go fruku mamanten ini a tempel fu yere en, ben arki nanga prisiri na en èn ben e fruwondru fu en fasi fu leri sma. Beamte di ben seni go fu kisi en ben taki: „Noiti wan tra sma ben taki tapu na fasi disi” (Lukas 4:22; 19:48; 21:38; Markus 12:37; Mattéus 7:28; Yohannes 7:46). Na Handleiding-buku ben gi fu yepi wi fu taki switi wortu fu waarheid. Yu e gebroiki en dorodoro?

13. O krakti Efese 5:15-17 e poti en dati wi ’mu bai na ten’, èn fu san-ede krakti e poti so tapu disi?

¹³ Efese 5:15-17 e fermane wi: „Luku fu dat’ede bun fa yu e waka, no leki lawman, ma leki koniman, e bai na yoiati ten gi yusrefi, fu di den dei de goddelowsu. No de fu dat’ede moro langa onredelek, ma tan si san de a wani fu Yehovah.” Na Griki wortu di vertaal dya nanga „ten” no wani taki ten ini soso algemene zin ma e sori tapu wan faste ten, wan ten di fiti gi wan spesrutu marki. A Griki werkwortu di vertaal nanga ’bai’ gi yusrefi, de na ini na intensieve vorm, èn „ini na context disi a wani taki seiker ’bai sani fayafaya’. Dati wani taki, gebroiki ibri okasi di e sori ensrefi”.a Yu e gebroiki a ten tapu yu schema bun srefsrefi sodati yu e tyari koni kon makandra fudi yu e gebroiki den yeye seti fu Yehovah? Disi yu mu du. Wi alamala mu du disi. Fu san-ede? „Fudi den dei de goddelowsu.”

Fu wan yeye sabana kon tron wan yeye paradijs

14. Den e gebroiki sortu bijbelvers dya èn sortu kenmerk fu na Nyun Grontapuvertaling nanga studiverwijzingen den e teki leki eksempre?

¹⁴ Wan tumsi moi yeye seti de wi Nyun Grontapuvertaling fu den Santa Buku — nanga studieverwijzingen di ben gi fri ini Ingrisitongo ini 1984. Na vertaling disi abi furu kenmerk di e meki a de mogelek fu gebroiki ’ten di bai’ fu meki wi sabi kon moro furu.b Wan eksempre fu dati de den kruisverwijstekst. Teki Psalm 1:3 (4), di e handri fu na toestand fu na man di e denki dipi fu a wet fu Gado dei nanga neti. Na vers dati e taki so: „Seiker a sa tron leki wan bon di prani na sei watra, di e gi en eigi froktu te a de a yoisti ten fu dati èn fu san den wiwiri no e flaw, èn ala san a e du, sa waka bun.” Furu, furu moro de na ini a vers disi leki na leisiman di e leisi psa esesi en, e go moro fara ben sa si wantewante.

15. Sortu aksi e kon a fesi fu na bon fu Psalm 1:3 èn sortu krin leti Yesaya 44:4 e gi wi?

¹⁵ Teki grantangi ini prakseri san e kon now: Na bon prani. Suma prani en? A de a sei watra moro leki wán watra. Wán bon e gro na den watra sei fu den difrenti watra? Nono. A gridi fu yu fu sabi sani wiki now? Fa a de nanga a bon disi? Den kruisverwijstekst e opo den ai fu wi ferstan. Den e sori wi tapu Yesaya 44:4; 61:3 nanga Yeremia 17:8. Yesaya 44:4 e taki dati en pipel sa de leki bon „na sei gotro”. Furu gotro? Iya, a no de fu taki! Den watra de gotro di e tyari watra fu gi den bon ini wan droifipranasi watra!

16. Sortu sani Yesaya 61:3 èn Yeremia 17:8 e gi moro fu tyari sani kon a krin?

¹⁶ Yesaya 61:3 e kari sonwan fu den bon „bigi bon fu regtvaardikifasi, na sani san Yehovah prani, sodati a sa kisi glori.” Yehovah na a sma di e prani den bon disi èn e gi den watra èn en na a sma di mu kisi glori nanga den froktu di den bon disi e meki! Yeremia 17:8 e teki na man di e denki dipi fu Gado wet dei nanga neti gersi nanga „wan bon di prani na watra, di e panya en rutu leti na a waka fu na watra, èn a no sa si en te hati son e kon, ma en wiwiri sa tan de trutru furu. Èn ini wan yari fu drei a no sa broko-ede, ooktu a no sa tan a baka fu meki froktu.” Den wiwiri fu en no e flaw; ala san a e du e waka bun!

17. Fa wi e ferstan now sortu prenki Psalm 1:3 (4) e gi, èn sortu rol wi e du na ini disi?

¹⁷ Now den sani di ben tapu wi ai e fadon komoto. Ini Psalm 1:3 wan tumsi moi prenki e sori dya. Den sma di e denki dipi fu Yehovah wet dei nanga neti, de leki bon di prani na wan watra fonten di noiti e drei. Den no de moro langa wan pisi fu grontapu organisatie di drei na yeyefasi, ma den de now wan pisi fu Gado organisatie pe pasamarki waarheid watra di e kowru-ati e lon kon. Den de futru ini wan yeye paradljs, e kisi kowru-ati na yeyefasi èn e meki yeye froktu di e prijse Yehovah. Èn go prakseri pikinso, Gado e gebroiki en kotoigi fu tyari den sma komoto fu na drei grontapu organisatie èn fu sori den na pasi di e go na a yeye paradijs di e gi kowru-ati èn di e gi furu watra!

18. Fa son sma e du te den si o bun trawan e gi kotoigi, èn fa a du kon dati a no e waka so bun gi den?

¹⁸ Fu kan du a wroko disi bun, meki wi mu dwengi wi yeye nanga wi ati fu meki gebroiki fu ala den yeye seti fu Yehovah. Son sma e yere tra sma e ferklari bijbeltekst èn den e taki dan: „Mi ben sa wani dati mi ben sabi na bijbel net so bun leki en!” Ma efu den sma disi ben sa dwengi densrefi fu studeri a bijbel, dan densrefi ben sa kisi moro bijbel-sabi. Sonwan e yere trawan e gi kotoigi na sma doro èn e taki dan: „Mi ben wani dati mi ben kan kan gi kotoigi net so bun na a doro leki den!” Ma efu den ben sa dwengi densrefi fu teki prati geregeld na a velddienst èn ben sa meki gebroiki fu a buku Tak-go-tak-kon nanga yepi fu den Buku, dan den ooktu ben sa tron more bekwaam kotoigi. Son sma e yere fa trawan e hori bijbellezing èn e taki dan: „Mi ben wani dati mi ben kan hori net so bun lezing leki en.” Ma ooktu dya a de so dati efu den sortu sma disi ben sa dwengi densrefi fu sreka densrefi tapu den toewijzing fu den gi wan lezing, ala di den sa poti densrefi na tapu den les ini Handleiding fu na Theokratis Diniwrokoskoro, dan ooktu den ben sa go na fesi ini na bekwaamheid fu taki.

19. San na a sroto fu meki den capaciteit fu wi leki kotoigi gro?

¹⁹ Fu wani wan sani sote bun, ma soso a winsi sondro fu du wan sani, no e tyari na bakapisi kon di wi wani. Nanga yepi fu wroko e kon san wi e winsi. Wan spier di no e gebroiki e meki spieratrofie kon. Efu yu no e gebroiki wan bekwaamheid dan dati sa go na baka. Efu yu no e gebroiki yu ferstan dan den dati sa go na baka. Efu yu no e gebroiki sabi, dan a sabi di yu abi sa lasi gwe. Gi ibri aparti geval na regel de: „Gebroiki san yu abi, noso yu sa lasi en.” ’Nanga a gebroiki na koni fu si sani e kon oefen.’ Dan „na denki krakti srefi sa hori wakti abra yu, na koni fu si sani srefi sa kibri yu”. — Hebrewsma 5:14; Odo 2:11.

20. San wi mu tan farawe fu en fudi wi e nyanbun fu Yehovah yeye seti, èn sortu bun disi sa tyari gi wi?

²⁰ Sobun meki gebroiki fu yeye seti. Prisiri makandra nanga den di Gado ben meki den nyan den bere furu. Lon komoto gi na angriten di Amos ben taki na fesi: „’Luku! Dei e kon,’ a so den wortu fu a Soeverein Masra Yehovah de, ’èn seiker mi sa seni wan angriten go ini na kondre, nowan angri fu brede, nowan dreiwatra fu watra, ma fu yere den wortu fu Yehovah’” (Amos 8:11). Nyan bun makandra nanga den di e nyan èn e prisiri èn no go moksi yusrefi na a sei fu den sma di e poti a nyanyan a wan sei èn di e kon kisi syen: „Disi na Soeverein Masra Yehovah ben taki: ’Luku! Mi knegti sa nyan, ma unu sa pina fu angri. Luku! Mi knegti sa dringi ma unu sa abi dreiwatra. Luku! Mi knegti sa prisiri, ma unu sa kisi syen.’” — Yesaya 65:13.

[Futuwortu]

Yu e memre disi ete?

◻ Fa na natie Israël ben sori dati den no ben de tevrede nanga Yehovah seti fu sani?

◻ Fa Maleachi 3:10 ben kon tru tapu Yehovah Kotoigi?

◻ San Psalm 1:3 wani taki trutru?

◻ Fu san-ede a de fanowdu dati wi e meki gebroiki fu den sani di wi ben kon sabi nanga yepi fu den yeye seti fu Yehovah?