Yu sa taki: „Dya mi de! Seni mi”?
„Yehovah ben taki: ’Suma mi sa seni, suma sa go gi wi?’ Tapu san mi ben taki: ’Dya mi de! Seni mi.’” — YESAYA 1:8.
1, 2. Fu sortu spesrutu reide wan bepaalde trowpaar ben abi prisiri?
„NANGA furu prisiri mi e seni a brifi disi gi unu fu taigi unu dati wi teki a toewijzing fu wi fu Columbia. Wi no kan tyari kon a fesi a tapu na skrifi machien disi afu srefi ete omeni wi e nyanbun fu na dienstgrani disi dya ini Ecuador.” Na so wan brifi ben bigin fu tu kotoigi fu Yehovah di ben go na Ecuador pe wan nyun bijkantoro fu na Wachttoren Genootschap ben e bow.
2 Den bedinari disi no ben go na Ecuador fu yepi wawan nanga a bow, den ben kon yepi ooktu leki kristen leriman. Den ben skrifi: „Wi ben si dati na velddienst de wan fu den moro prenspari sani. Soso 3 wiki psa kaba wi ben e go nanga wi aiti na wan wowoyopresi di no ben abi wan dak èn ben prati 73 buku nanga moro leki 40 tijdschrift. A wiki a fesi wi ben opo tu nyun bijbelstudi. Wi ben kan si trutru o fanowdu a nyun bijkantoro de. Mi uma nanga mi wani taki unu sote grantangi fu na grani fu go doro nanga spesrutu pisi fu na furuten-dienst disi now ini Columbia.”
3. Fa furu sma ben sori dati den ben abi na srefi yeye leki Yesaya?
3 Na trowpaar disi, èn hondrohondro trawan di ben pristeri densrefi fu den seni den go na wan ofu tra kondre, ben sori taki den abi na srefi yeye leki na profeiti Yesaya. Di a ben yere Yehovah ben taki: „Suma mi sa seni, èn suma sa go gi wi?” Yesaya ben piki: „Dya mi de! Seni mi.” Gado ben gi dan na komando: „Go, èn yu mu taigi na pipel disi: ’Yere alatron baka, ma no frustan’” (Yesaya 6:8, 9). Bifo den ben seni en go dan Yesaya ben pristeri ensrefi nanga en heri ati na san èn sortu bakapisi a ben tyari kon? Èn san wi kan leri fu a tori disi tapu a kontren fu modern parallel èn sortu persoonlek les wi kan teki fu disi?
Na komando di Yesaya ben kisi fu preiki
4, 5. (a) Sortu situwasi ben de di Yesaya ben kisi na visioen di skrifi na ini kapitel 6? (b) San Yesaya ben si na ini a visioen disi?
4 Ini a yari di kownu Uzzia ben dede, Yehovah Gado ben aksi Yesaya: „Suma mi sa seni?” (Yesaya 6:1) Dati ben de ini 777 Bifo G.T. ofu wan sani fu wán nanga dri kwart yarhondro bifo den Babylonsma ben pori Yeruzalem èn ben meki na kondre Yuda kon leigi. Yehovah ben kan si na sari sani disi e kon èn a ben gi Yesaya na komando ini disi fu meki wan boskopu bekenti. San wi kan leri fu a preiki komando fu en?
5 Yesaya ben mu de dipi na ondro na indruk, net soleki wi ben sa de dati, na ini na heri omlijsting pe a ben kisi en komando. A ben skrifi: „Mi ben kisi . . . fu si Yehovah, sidon tapu wan hei troon, èn en krosi lanki ben furu na tempel. Seraf ben tanapu tapsei fu en. Ibriwan ben abi siksi frei. Nanga tu a ben hori tapu en fesi, èn nanga tu a ben e tapu on futu, èn nanga tu a ben frei lontu. Èn a wan ben beri kari a trawan èn a ben taki: ’Santa, santa, santa Yehovah fu den legre de. Na furu fasi fu heri na grontapu te en glori.’” — Yesaya 6:1-3.
6. Fu san-ede a ben de wan grani gi Yesaya fu si na visioen disi?
6 Yesaya ben sabi dati Yehovah ben naki Uzzia nanga gwasi di nanga asrantifasi a ben psa go na ini na santa pisi fu na tempel fu offer switi-smeri-ofrandi, fu di a no ben de fu na lo fu den priester. Fa a ben de sobun wan grani gi Yesaya fu si a de-noya fu Gado! Leki onvolmaakti libisma Yesaya no ben si Yehovah letterlek, ma a ben kisi pasi fu si en ini wan visioen (Exodus 33:20-23). Krakti ben poti tapu na glori fu ala disi nanga yepi fu engel fu hei rang (seraf) di ben e du dienst na a troon fu Yehovah. Fu di den ben sabi na santafasi fu Gado meki den ben tapu den fesi nanga respeki. Boiti dati den ben sori na so fasi dati den no de noti, dan den ben meki nanga krakti na santafasi fu Gado bekenti. Sortu krakti disi ben sa abi tapu wan libisma, yu denki?
7. Fa Yesaya ben du, èn fu san-ede wi ben sa firi wisrefi kande net so tu?
7 Meki Yesaya gi a piki: „Ne mi ben taki: ’Helu fu mi! Bika mi de net so bun leki mi mofo tapu, bika wan man di no krin fu mofo-buba mi de, èn na mindri fu wan pipel di no krin fu mofo-buba mi e libi, bika mi ai srefi ben si na Kownu, Yehovah fu den fetilegre!’” (Yesaya 6:5) Yesaya ben sabi taki a ben de wan takiman fu Gado, ma toku na visioen disi ben poti go bun na ini en ede dati a ben no krin èn no ben abi den krin mofobuba di wan takiman fu na glori èn santa Kownu ben sa mu abi. Ooktu sonwan fu wi kande a wan fasi di e hati wi e kon sabi fu na sondufasi fu den, sodati den e firi densrefi no warti fu go na Gado na ini begi, lastan dati den e firi densrefi warti fu tyari en nen. Fu dat’ede meki san Yesaya ben ondrofeni moro fara de wan sani di e gi dek’ati.
8. Sortu dienst wan engel ben du gi en, èn nanga sortu bakapisi?
8 Wan fu den seraf di ben e du wroko ben frei go na en nanga wan krofaya di ben abi faya fu na altari tapu san den ben tyari ofrandi fu meti. Aladi na engel ben meri Yesaya mofo nanga a krofaya a ben taki: „Luku! na disi ben meri yu mofo-buba èn na sondu fu yu drifi gwe èn na sondu fu yusrefi kon verzoen” (Yesaya 6:6, 7). Ini a ten fu Salomo faya ben komoto kon fu hemel leki wan buwijsi dati Yehovah ben teki na offer-altari, awinsi den ofrandi no ben kan krin den priester srefi dorodoro na fesi na ai fu Gado (2 Kronieken 7:1-3; Hebrewsma 10:1-4, 11). Toku Yesaya, di na dotifasi fu en ben bron gwe nanga na krofaya di ben abi faya, ben kan teki na krutu fu Yehovah, dati na sondufasi fu en ben kon de verzoen ini a marki di ben de fanowdu fu ben kan de bun nofo fu kisi wan spesrutu preiki-komando. Sortu tumsi moi sani fu a ten di e kon disi abi na ini en?
9. San ben de na edeprakseri fu Yesaya boskopu?
9 Wantronwantron bakadi na profeiti ben ondrofeni na fruwondru sani disi, a ben kisi na preiki-komando di ben taki kaba (Yesaya 6:8, 9). Ma fu san-ede Yesaya ben mu taki dati a pipel ben sa yere alatron baka ma tog no ben sa abi sabi? A sten fu Gado ben taki more fara: „Meki na ati fu na pipel disi kon de wan sani di no e teki sani, èn meki srefi den yesi fu den no e firi sani, èn tapu srefi na ai fu den, sodati den no si . . . èn dati den no drai konbaka trutru èn kisi konbetre gi densrefi” (Yesaya 6:10). Disi ben wani taki dati Yesaya nanga grofofasi ofu no nanga tact ben musu pusu den dyu gwe, sodati den ben musu tan de ini trobi nanga Yehovah? Nono. Disi ben de soso wan marki fu na fasi tapu fa a moro bigi pisi fu den dyu ben sa teki a boskopu, awinsi o getrow èn finifini Yesaya ben sa du na preikiwroko di a ben pristeri ensrefi nanga en friwani nanga den wortu: „Dya mi de! Seni mi.”
10. (a) Pe na fowtu ben de dati na pipel ben de leki den breni èn dofu? (b) San Yesaya ben bedoel di a ben aksi: „Olanga”?
10 Na fowtu ben de na a pipel. Aladi Yesaya alatron baka „ben meki den yere” toku den no ben wani teki sabi ini den ofu kisi frustan. Gado ben taki a fesi dati a moro bigi pisi fu den, fu den tranga ede fasi fu denki èn na fasi fu den na skinfasi no ben sa teki den sani na wan bun fasi. Wan pikin grupu ben sa du disi kande. Ma na moro bigi pisi ben sa de so breni dati a ben sa gersi leki den ai fu den ben tapu nanga moro tranga lijm, efu yu ben kan tyari disi kon pikinso ini yu prakseri. Olanga na takru situwasi disi ben sa kan go doro? Na dati Yesaya ben aksi èn no omeni yari a ben mu dini. Na aksi fu en ben de: „Olanga o Yehovah?” Gado ben piki: „Te leki den foto trutru kon tron wan brokoston ipi, fu de sondro sma di e libi na ini.” Èn so a ben psa ooktu, aladi disi no ben psa ini a libiten fu Yesaya. Den Babylonsma ben tyari a grontapusma gwe, sodati fu Yuda wan kondre ben tan abra di ’ben ruïneer tron wan leigi presi’. — Yesaya 6:11, 12; 2 Kownu 25:1-26.
11. Fa wan elementi fu trowstu ben de ini a preiki fu Yesaya?
11 Te fu kaba Yehovah ben gi Yesaya na dyaranti dati a no ala sani de sondro howpu. „Wan di fu tin pisi sa de ete ini a kondre.” Iya, a ben de ’leki wan bigi bon na ini san, te den fara en wan tompu e de, wan santa siri’ (Yesaya 6:13). Bakadi den ben de seibitenti yari ini katibo fu Babylon, dan wan siri ofu fikapisi ben drai go baka na a kondre netleki wan nyun sproiti ben kon a doro komoto fu na tompu fu wan bigi bon (2 Kronieken 36:22, 23; Ezra 1:1-4; teki gersi Yob 14:7-9; Daniël 4:10, 13-15, 26). Dat’meki na boskopu fu Yesaya aladi a ben de wan sari wan, toku a ben abi trowstu na ini. Ma tapu na gron fu na bijbel wi abi reide fu si Yesaya leki wan model fu san di o psa ini a ten di e kon. Fa so?
Moro bigi kon tru
12. Tapu sortu gron fu bijbel wi kan kari Yesus a more bigi Yesaya?
12 Hondrohondro yari baka na dede fu Yesaya wan sma ben kon di wi ben sa kan kari na moro bigi Yesaya Yesus Kristus. Ini en libi bifo a ben tron wan libisma a ben pristeri ensrefi nanga en friwani fu en Tata ben seni en kon na grontapu, pe a ben sa teki ini en preikiwroko sani di Yesaya ben skrifi (Odo 8:30, 31; Yohannes 3:17, 34; 5:36-38; 7:28; 8:42; Lukas 4:16-19; Yesaya 61:1). Moro soifri ete Yesus ben tai ensrefi nanga Yesaya kapitel 6 di a ben tyari kon a krin fu san-ede a ben gi leri tapu a spesrutufasi di a ben gebroiki (Mattéus 13:10-15; Markus 4:10-12; Lukas 8:9, 10). Disi ben fiti bika a moro bigi pisi fu den dyu di ben yere Yesus, no ben sori wan moro bigi de klari fu teki en boskopu èn fu handri ini akruderi nanga dati leki den sma di ben yere na profeiti Yesaya ini a tori fu en boskopu (Yohannes 12:36-43). Ooktu den dyu di ben meki densrefi ’breni èn dofu’ gi Yesus boskopu, ben kon tanapu ini 7O G.T. fesi wan srefi sortu pori leki ini 607 Bifo G.T. San ben psa na ini a fosi yarhondro, ben gro kon tron wan benawtu di ben kon tapu Yeruzalem ’soleki fu sensi a bigin fu grontapu no ben sori ensrefi èn ooktu no ben sa sori ensrefi moro’ (Mattéus 24:21). Toku, soleki Yesaya ben tyari kon a fesi, wan fika pisi ofu „wan santa siri” ben de di sori en bribi. Den sma disi den ben meki tron wan yeye natie, a salfu „Israël fu Gado”. — Galasia 6:16.
13. Fu san-ede wi kan fruwakti ete wan kon tru fu Yesaya 6?
13 Disi e tyari unu kon tapu wan tra kon tru fu Yesaya kapitel 6 di abi en fondamenti tapu a bijbel. Luku leki wan sroto fu frustan disi den wortu fu na apostel Paulus lontu a yari 60 G.T. A ben tyari kon a krin fu san-ede furu dyu di ben yere en na ini Rome no ben wani bribi „en kotoigi di ben abi fu du nanga na kownukondre fu Gado”. A reide fu dati ben de dati Yesaya 6:9, 10 ben kon tru baka (Tori fu den Apostel 28:17-27). Disi ben wani taki dati den salfu disipel fu Yesus, bakadi a ben gwe libi na grontapu toneel, ben sa musu du komando di ben kon ini kruderi nanga na komando fu Yesaya? Iya, futru!
14. Fa Yesus disipel ben sa du net so wan wroko leki Yesaya?
14 Bifo na Moro Bigi Yesaya ben opo go a hemel a ben taki dati en disipel ben sa kisi na santa yeye, èn baka dati ’ben sa de kotoigi fu en na ini Yeruzalem èn na ini heri Yudéa èn Samaria èn te na den more farawe kontren fu a grontapu’ (Tori fu den Apostel 1:8). Netleki fa a offer-altari ben sorgu ini san ben de fanowdu fu meki na sondu fu Yesaya psa gwe, na so Yesus ofrandi ban de na fondamenti na tapu na gron fu san ’den sondu fu en disipel ben kan verzoen’ (Leviticus 6:12, 13; Hebrewsma 10:5-10; 13:10-15). Na sofasi Gado ben kan salfu den nanga santa yeye, sodati den ben sa kisi na krakti ooktu fu ’de kotoigi na den moro fara kontren fu na grontapu’. Èn na profeiti Yesaya èn na Moro Bigi Yesaya ben de sma di den ben seni go fu meki na boskopu fu Gado bekenti. Na asrefi fasi „Gado ben seni” den salfu bakaman fu Yesus „go . . . ini kompani fu Kristus”. — 2 Korinte 2:17.
15. Fa den sma ben du ini algemeen nanga na preikiwroko net-leki di fu Yesaya na ini wi ten, èn na sortu sani di o kon disi e sori?
15 Ini disi ten, spesrutu sensi na a kaba fu na Fosi Grontapufeti, salfu kristen ben si na fanowdu fu meki a boskopu fu Gado bekenti, makandra nanga na „dei fu refensi fu na sei fu wi Gado” di de krosbei (Yesaya 61:2). Na pori di sa kon fu disi sa de spesrutu gi na kristenheid wan slag, di net soleki na Israël fu owruten langaten ben taki dati den de na pipel fu Gado. Aladi Gado salfu kotoigi tintin yari kaba e preiki loyaal, toku den moro bigi pisi fu den sma ini na kristenheid ben meki den ’ati de wan sani di no e teki èn den yesi sondro fu firi sani; den ai pleister tapu’. A profeititori fu Yesaya ben sori dati disi ben sa kan de so „teleki den foto ben kon tron trutru wan brokoston-ipi, fu de sondro sma di e libi drape, èn den oso sondro grontapusma, èn na gron srefi ruïneer tron wan leigi presi”. Disi sa wani taki na kaba fu na goddelowsu seti fu sani. — Yesaya 6:10-12.
„Seni mi”
16. Fu san-ede wi kan taki dati na „bigi ipi” e teki prati na wan wroko leki di fu Yesaya?
16 Ini a ten disi milyunmilyun kristen di gi densrefi ini a dini fu Gado abi na bijbel howpu fu libi fu tego tapu wan paradijs grontapu. Tapu a gron fu Yesus ofrandi-brudu den sondu fu den memre fu na „bigi ipi” disi kan kisi pardon ini a marki di disi de now fanowdu. Nanga yepi fu Gado yeye den e kisi ooktu krakti èn yepi aladi den e taki makandra nanga den salfu kristen di tan abra: „Dya mi de! Seni mi.” Den e seni den fu du san? Paulus meki disi kon a krin ini Romeini 10:13-15: „’Ibriwan sma di e kari a nen fu Yehovah sa feni yepi.’ Ma fa den sa kari en na ini suma den no ben poti bribi? Fa moro fara den sa poti bribi ini en fu suma den no ben yere? Fa den sa yere moro fara sondro dati wan sma e preiki? Fa den sa preiki moro fara efu den no ben seni den go? Soleki ben skrifi [ini Yesaya 52:7]: ’O switi den futu fu den sma de di e meki bun nyunsu bekenti fu bun sani!’” — Openbaring 7:9-15.
17. San na a inibere fu na boskopu fu wi di wi kan teki gersi nanga Yesaya profeititori?
17 Hori na ini prakseri dati Yesaya no ben frustan krinkrin na heri prensparifasi fu na boskopu ete di a ben taki: „Dya mi de! Seni mi.” Kontrari fu dati wi sabi wel san Gado wani meki now bekenti gi den sma di tapu wan positief fasi e teki en kari: „Suma mi sa seni, èn suma sa go gi wi?” A boskopu wani taki wan warskow a fesi gi „a dei fu refensi fu na sei fu wi Gado”. Ma a boskopu wani taki ooktu „bun nyunsu fu bun sani”. Den sma di den „seni go”, abi fu eksempre ooktu wan prati na „a bari fri gi den sma di den kisi poti na strafu èn na opo bradi fu den ai srefi fu den wan di de na strafu”. Wi no musu kisi bigi satisfaksi ini a du fu disi? — Yesaya 61:1, 2.
18, 19. Na ini sortu spesrutu fasi furu sma e taki: „Seni mi”?
18 Efu yu abi kaba wan prati na a meki bekenti fu „bun nyunsu fu bun sani”, dan na luku fu Yesaya kapitel 6 disi kande e meki na aksi di e kon now kon ini yu: Fa mi kan gi misrefi moro ete ini na yeye fu Yesaya 6:8? Net soleki na trowpaar fu suma wi ben taki fu den na ini a bigin, na so hondrohondro sma ben abi leki friwani wrokoman wan prati na bowwroko ini difrenti pisi fu a grontapu. Furu trawan di no ben de vakman tapu a kontren fu bow, froisi go na kondre pe na fanowdu fu kownukondrepreikiman ben de moro bigi. A de moro bun fu aksi rai fosi na a bijkantoro fu na Wachttoren Genootschap fu a presi. A no de fu taki dati meki plan a fesi de fanowdu, bika na tongo, na libi-standard, den ferwakti fu wroko, èn tra sani kan de heri tra fasi ini wan vreemde kondre. Ma no puru wan mogelijkheid di ben sa man ini yu prakseri soso fu di kande a e aksi bigi kenki fu yu sei. Furu sma di abi na yeye fasi fu „dya mi de!” hari gwe èn ben kisi furu blesi fu Gado. — Teki gersi nanga Odo 24:27; Lukas 14:28-30.
19 Dan trawan baka — brada nanga sisa di no trow, trowpaar, srefi heri osofamiri — froisi ini den eigi kondre ofu kontren go na wan tra presi pe wan moro bigi fanowdu ben de fu Kownukondrepreikiman ofu kristen opziener (Tori fu den Apostel 16:9, 10). Disi ben kan aksi offer fu den sei, soleki a teki fu wan tra sortu wroko di kande no ben gi someni moni. Son sma ben meki den gi den moro biten pensioen, sodati den ben go na moni sei na baka, èn den ben feni wan afu dei wroko fu gi moro ten na ini a diniwroko. Fa a de wan moi sani te heri osofamiri e taki: „Dya mi de! Seni mi.” Ooktu disi de wan tori fu na situwasi fu Yesaya. En uma ben abi wan actief prati ini a du fu a wani fu Gado leki wan profeiti, èn en Manpikin ben de ini a tori fu profeititori. — Yesaya 7:3, 14-17; 8:3, 4.
20. Nanga Yesaya 6:8 ini prakseri, dan san yu sa teki ini prakseri?
20 Srefi efu na disi ten omstandigheid fu yu no e gi pasi fu tyari den sortu bigi kenki disi kon, dan yu kan go denki fu a sani di e kon now, ’mi e du pe mi de now ala sani san de ini mi makti, sodati mi e waka baka na de klari di Yesaya ben de klari fu du wroko?’ Span yusrefi krakti ini a meki bekenti fu Gado boskopu, srefi efu den weersomstandigheden no bun ofu den sma abi wan mi-no-ke-fasi; Yesaya ben du disi seiker ooktu. Taki nanga faya nanga tra sma fu na ’bun nyunsu fu bun sani’! Yehovah ben taki, „suma mi sa seni?” Sori dati a piki fu yu de precies so leki a piki fu Yesaya fu owruten: „Dya mi de!” Fu meki en boskopu bekenti.
◻ Ondro sortu omstandigheid Yesaya ben kisi a visioen di skrifi na ini kapitel 6, èn san a ben si?
◻ Sortu komando Yesaya ben kisi?
◻ Fu san-ede den kan kari Yesus na moro bigi Yesaya? èn fa den disipel fu en de ini wan wroko net leki di fu Yesaya?
◻ Fa yu kan sori net so wan yeye leki Yesaya?
[Aksi fu a tori disi]
[Prenki na tapu bladzijde 2]
Den ben krin Yesaya èn seni en go fu preiki
[Prenki na tapu bladzijde 8]
Furu sma ben teki na kari èn ben taki: „Dya mi de! Seni mi”