„Yu mu de santa . . .”

„Unu srefi mu kon de santa tu ini un heri waka nanga libi, ini akruderi nanga na santawan di ben kari unu bika buku ben taki: ’Unu mu de santa, bika mi de santa.’” — 1 PETRUS 1:15, 16.

1, 2. (a) Sortu sani fu ben memre ben de krin fu si tapu na tai-ede fu na heipriester, èn sortu marki disi ben e dini? (b) Fu san-ede a memre fu Yehovah santafasi de wan sani di fiti na ini a ten disi? (c) Sortu fermane di e go fu santafasi Paulus e meki wi yere?

„SANTAFASI de fu Yehovah.” Den dek’ati wortu disi ala sma ben kan si skrifi na tapu na plaat fu soifri gowtu di ben d a tapu na tai-ede fu a hei-priester fu Israël (Exodus 28:36-38). Den wortu tapu na brenki plaat disi ben memre den Israëlsma dati den ben e anbegi wan krin èn santa Gado èn no soleki den heiden natie ben e gi grani na gado di no ben krin.

² Efu yu de kaba wan sma fu Yehovah Kotoigi, yu e frustan dan, o soifri èn krin, èn Santa èn regtvaardiki na Gado de di yu e anbegi? A gersi leki a no de fanowdu srefsrefi moro fu memre wi na sowan gronwaarheid. Leki Yehovah pipel wi ben kisi a blesi fu frustan krin „den dipi sani fu Gado” - muilek bijbel profeititori, fa fu gebroiki bijbelgronprakseri nanga bijbelleri (1 Korinte 2:10; teki gersi nanga Daniël 12:4). Toku a de krin taki wan dipi waarderi gi Yehovah santafasi e mankeri fu na sei fu son sma. Fu san-ede wi e taki dati? Fu di ibri yari dusundusun e fadon go ini wan ofu tra vorm fu hurudu. Dusundusun moro ete e tyari rampu kon tapu den fu di den gi densrefi abra na du di net no de wan pasa fu bijbelwet ete. A de krin dati son sma no e teki tapu seryusuf asi den wortu di skrifi na ini 1 Petrus 1:15, 16: „Unu srefi musu kon de santa ini un heri libi èn waka, ini akruderi nanga a santa wan di ben kari unu bika buku taki: ’Unu mu de santa, bika mi de santa.’”

Wan santa Gado, santa anbegiman

3. San a singi fu Mozes e sori fu Yehovah?

³ ’Wan onvolmaakti libisma - santa? Dati a wan sani di no kan!’ Yu e taki kande. Ma luku pikinso na bakagron fu na fermane fu Petrus. Ini a tekst disi na apostel e teki wortu di ben taki biginbigin gi den Israëlsma syatu baka di den ben gwe libi Egypte. Nanga yepi fu na wondru fri disi Yehovah ben sori ensrefi leki wan sma di kan fri trawan, wan sma di e meki pramisi kon tru, „wan mannengre fu feti” (Exodus 3:14-17; 15:3). Ini wan singi fu meki prisiri fu na pori di den Egyptesma ben kisi ini na Redi Se Mozes ben tyari ete wan pisi kon a krin ete fu Yehovah: „Suma a mindri den gado de leki yu, o Yehovah? Suma de leki yu, di e sori yusrefi makti na ini santafasi?” (Exodus 15:11) Disi na a fositron ini den buku fu na bijbel dati den e taki dati Yehovah de santa.

4. (a) Na sortu fasi Yehovah de ’makti ini santafasi’? Fa Gado ben kenki fu den gado fu Kanaän?

⁴ Den Hebrew èn Griki wortu di vertaal ini bijbel nanga „santa” e tyari na prakseri kon abra fu ’brenki, nyun, fris, sondro flaka èn krin’. Mozes ben ferteri fu dat’ede fu Yehovah leki krin ini a moro hei marki, fri fu sani di no soifri, a no de fu pori, a no e ferdrage wan sani di no krin srefsrefi (Habakuk 1:13). Yehovah ben de leki wan brenki leti te yu sa teki en gersi nanga den gado fu a kondre na ini san den Israëlsma ben sa go libi heri esi — Kanaän. Skrifi di den dikipuru fu Ras Syamra, wan foto na a Noord Syrische lanpe, e gi wan luku di skotu ma ete e tyari sani kon na krin fu na Kanaänitis pantheon. Den tekst disi e skrifi fu gado di, leki fa a buku fu John Gray, The Canaanites, a taki, ben de „lobi meki trobi, dyarusu, e teki refrensi èn gi ensrefi abra na lostu”.

5, 6. (a) Sortu krakti na anbegi fu hurudugado ben abi tapu den Kanaänietsma? (b) Sortu krakti na anbegi fu na santa Gado ben abi tapu den Israëlietsma?

⁵ A de wan logis sani dati na kulturu fu den Kanaänsma e tyari kon a doro den morsu fisti gado di den ben e anbegi. Na buku The Religion of the People of Israël e ferklari: „Du di ben de ini akruderi nanga na gado den ben si leki dienst di ben du gi na Gado . . . [Na seksuma-gado] Astarte ben abi wan nomru fu dinari nanga uma-dinari di den ben skrifi fu den leki sma di den ben wèie . . . den ben gi densrefi ini a dini fu en na motyo libi.” Na leriman William F. Albrigt e taki moro fara: „Ma di na pisi fu na anbegi fu den fu na lobi fu na skin ben kon de moro ogri, dan a ben musu saka go na den moro fisti pisi fu porifasi fu na maatschappij.” Na anbegi fu fallische „santa postu” na offer fu pikinnengre, towfruwroko, a tai fu wan sma nanga wan wisi, a seks a mindri famirman, sodomie nanga a libi fu libisma nanga meti — ala disi ben de wan gewoon zaak ini a kondre Kanaän. — Exodus 34:13; Leviticus 18:2-25; Deuteronomium 18:9-12.

⁶ Yehovah na a tra sei ’de makti ini santafasi’. A no ben sa kan gi pasi dati den anbegiman fu en ben kon de so pori (Psalm 15). Kontrari nanga den pori gado fu Kanaän dan Yehovah ben tyari en pipel go na wan moro hei plan. Nanga den wortu di Petrus bakaten ben sa teki skrifi, Yehovah ben sa fermane en pipel alaten baka: „Unu musu sori taki un de santa, bika mi, Yehovah, un Gado, de santa.” — Leviticus 11:44; 19:2; 20:26.

’Na Wet de santa, regtvaardiki èn bun’

7, 8. (a) Fa den Israëlsma ben kan ’sori dati den ben santa’? (b) Poti Yehovah wet abrasei fu na Babylonisch Codex.

⁷ ’Sori taki yu de Santa’ no ben wani taki volmaaktifasi ofu wan fasi di wan sma e teki fu falsi froomfasi; a ben wani taki fu gi yesi na wan wetsystema di ben abi furu wet èn di ben gi na Israël nanga yepi fu Mozes (Exodus 19:5, 6). Soleki a no ben de nanga no wan tra enkri nationaal wet, dan yu ben kan kari a wet fu Gado „santa èn regttvaardiki èn bun”. — Romeini 7:12.

⁸ A de tru dati na Babylonische Codex Hammurabi, di leki fa sma e taki ben skrifi bifo a wet fu Mozes, ben e go fu den srefi tori disi. Son fu den wet di ben de na ini, soleki na wet fu ’ai fu ai’ ofu na wet fu pai ogri nanga ogri, e akruderi nanga a gronprakseri ini a wet fu Mozes. Fu dat’ede meki sma di e krutu sani fini e taki dati Mozes ben puru den wet fu en fu na Codex Hammurabi. Ma na Codex Hammurabi no ben du more furu leki a gi grani na Hammurabi èn fu dini en politiek belang. A wet fu Gado ben gi na Israël ’fu a bun fu den fu alaten, sodati den ben sa tan na libi’ (Deuteronomium 6:24). Pikinso bewijsmateriaal de ooktu dati na wet fu Hammurabi oiti ben ab krakti na ini Babylon ini a wet èn ben du furu moro leki soso „gi yepi akruderi na wet na sma di ben e suku rai” (The New Encyclopaedia Britannica, uitgave fu 1985, Deel 21, blz. 921). Na wet fu Mozes na a tra sei ben abi furu krakti èn ben abi regtvaardiki wet fu gi strafu tapu tranga yesi. Te fu kaba dan na wet-systema fu Hammurabi moro furu e taki fa fu du nanga sma di du ogri; soso feifi fu den tuhondro aititenti wet de sani di langalanga e taki san yu no musu du. Ma na wet fu Gado more furu ben poti ensrefi tapu yepi fu no du ogri èn no a strafu fu a du fu ogri.

9. Sortu tranga krakti na wet fu Moses ben abi tapu a libi fu den dyu?

⁹ Fu di na wet fu Mozes ben de ’santa, regtvaardiki èn bun,’ meki a ben abi wan bigi krakti tapu na persoonlek libi fu dyusma. A ben seti na anbegi fu den, ben sorgu fu sabbat tapu san sma no ben mu wroko, a ben hori ai na tapu na ekonomia strokturu fu a natie, e tyari wantu wet kon a krin ini a tori fu krosi èn ben gi bun tiri ini afersi leki nyanyan, seksactiviteit èn gwenti di e meki krinfasi kon a fesi. Srefi normaal wroko di ben feni presi ini a skin ben de ondro na soifri luku fu na wet fu Mozes.

„Na gebod fu Yehovah de krin”

10. (a) Fu san-ede a wet ben e buweigi ensrefi tapu someni kontren ? (b) Fa na wet ben meki krinfasi na skinfasi èn wan bun gesontu go na fesi? (Tyari na voetnoot kon ooktu ini a taki.)

¹⁰ Den furu wet disi di ben go fu na libi fu aladei ben dini wan heimarki: fu meki den Israëlsma kon krin — na skinfasi, na yeyefasi, ferstan èn moreelfasi. Wet di ben aksi fu den dati den ben wasi, ben beri na pupe fu den, fu hori sma di ben abi wan siki di a ben kan gi wan tra sma aparti èn fu tan farawe fu bepaalde sortu nyanyan, ben de fu eksempre alamala fu meki wan bun gesontu nanga krinfasi na skinfasi go a fesi.a — Exodus 30:18-20; Leviticus hfst. 11; 13:4, 5, 21, 26; 15:16-18, 21-23; Deuteronomium 23:12-14.

11. San a ben wani taki fu de ceremonieel doti?

¹¹ Toku wan bun gesontu en krinfasi te yu luku en bun de na baka fu yeye krinfasi. Fu dat’ede meki wan sma di ben nyan kande wan fu den nyanyan di a no ben mag fu nyan, ben abi seks ofu ben fasi wan dedeskin no ben de krin fu go dini Gado (Leviticus hfdst. 11, 15; Numeri hfdst. 19). A sofasi dan sowan sma di no ben de krin no ben mag teki prati na a anbegi — ini son geval srefi nanga a kisi fu dede! (Leviticus 15:31; 22:3-8) Ma san den sortu wet disi di ben e tapu sma fu du bepaalde sani ben abi fu du nanga yeye krinfasi?

12. Fa yeye krinfasi ben go a fesi nanga yepi fu den wet di ben abi fu du nanga ceremonieel dotifasi?

¹² Na heiden anbegi ben abi leki marki a du fu hurudu, a gi grani na dedesma èn tra sortu sani. Ma The International Standard Bible Encyclopedia e meki un si san e kon now: „Nowan enkri du fu seks ben e kisi pasi fu psa leki wan yepi fu anbegi Yehovah. Ala den sortu activiteit disi ini a tori fu a sani disi ben e meki fu dat’ede wan sma de doti . . . Ini Israël den dedewan ben e kisi a grani di den ben mu kisi, ma kwetkweti den ben e kisi anbegi di nofiti èn ooktu den no ben tron sani di sma ben e anbegi . . . Moro fara demakandra na a ten fu den fesa fu den heiden birti, san ben wani taki ooktu a teki prati na wan fesanyanyan, ben de ooktu gi den Israëlsma wan sani di no kan, bika a nyanyan fu den ben de wan sani di no ben de krin. Den voorschrift fu na wet ben de fu dat’ede „wan, skotu di ben e prati den” fu kerki elementi di no ben de krin.

13. Fa krinfasi na ini ferstan ben go a fesi nanga yepi fu a wet?

¹³ A wet ben meki ooktu dati den Israëlsma ben tan krin na frustan sei. Den voorschrift di ben skrifi na ini a tori fu trowintimiteit fu eksempre ben abi leki marki fu hei na denki fu libisma (Leviticus 15:16-33). Den Israëlsma ben leri tapu a kontren fu seks fu sori taki den e dwengi den srefi fu di den no ben o gi densrefi net soleki den Kanaänsma na lostu di no ben de ondro kontrole. Na wet ben leri den sma di ben hori densrefi na en fu dwengi densrefi, den firl èn lostu fu den fu di den ben krutu wan bigi ai denki. — Exodus 20:17.

14. Fa na wet fu Gado ben de a wan enkri wan ini en sortu ini a tori fu a meki-kon a fesi fu moreel krinfasi?

¹⁴ Ma na moro moiwan fu ala sani ben de dati na wet ben potl krakti tapu moreel krinfasi. A de tru dati na Codex Hammurabi ben e krutu tu den sortu pasa fu wet soleki sutadu. Wan artikel ini The Biblical Archeologist ben taki: „Kontrari nanga den Babylon nanga Assyriasma, di ben si sutadu soso leki wan ogri teige den reti fa a gudu fu na masra, dan na wet fu na Owru Testament e si sutadu ooktu leki wan seryusu ogri teige na moraliteit.”

15. (a) Tyari kon a krin fa wan Israëlsma ben mu du furu muiti fu tan krin? (b) Fa den Israëlsma ben feni wini na den sortu muiti dati?

¹⁵ Fa den wortu fu na psalmsingiman de tru: „Na gebod fu Yehovah de krin, a e meki den ai brenki” (Psalm 19:8). Wi e piki dati wawantron a e aksi bun furu muiti fu tan krin. Den sma di tron wan mama no solanga psa kaba, ben mu go wantu wiki baka na gebortu fu a pikin fu den na Yerusalem fu saka densrefi na ondro na procedure fu don kon krin (Leviticus 12:1-8; Lukas 2:22-24). Den man èn den uma ben de ferplekti fu krin densrefi ceremonieel baka te den ben abi seks nanga makandra èn ooktu tra situwasi di abi fu du nanga na tori dati (Leviticus 15:16, 18; Deuteronomium 23:9-14; 2 Samuël 11:11-13). Efu den ben hori densrefi nanga den heri konsensi na a wet èn ben tan krin, dan den ben ’sa gi densrefi wini’ — na skinfasi, na frustanfasi, na moreelfasi èn na yeyefasi (Yesaya 48:17). Boiti fu dati, na prensparifasi èn na seryusufasi fu a tan krin ben sa spikri go sondro fu ben kan figi en puru moro ini den frustan. A moro moiwan fu ala sani ben de dati den sortu opregti muiti disi fu hori santafasi ben sa dyaranti den a bunati fu Gado.

De krin ini wan grontapu di doti

16, 17. (a) O fara den e fruwakti fu kristen ini a ten disi fu tan krin? (b) Fu san-ede a de so muilek na ini a ten disi fu tan krin? (c) Fa prenspari sma ben misi a marki fu de eksempre fu waka na den baka?

¹⁶ Wi kan frustan a sani san Petrus ben taigi Kristen now moro betre: „Leki pikin di e gi yesi no kon de baka moro langa akruderi den lostu di yu ben abi fosten ini a sabi di yu no ben sabi sani, ma ini akruderi nanga na santawan di ben kari yu kon de ooktu santa ini yu heri libi nanga waka, bika buku ben taki: ’Yu mu de santa, bika mi de santa.’” — 1 Petrus 1:14-16.

¹⁷ Wi e erken dati disi no de makriki. Alape lontu wi e si sma di e gi densrefi abra na bedrigifasi èn seks hurudu. The New York Times ben taki: „Moro nanga moro Amerkansma e teki a bosroiti fu libi nanga makandra bifo a trow.” Srefi prenspari sma e gi wan takru eksempre. Ini a disi ten grontapu wantu fu den moro populair sma ini na politiek arena èn ini a sport èn amusement grontapu e du na fesi ala sma fasi fu doti libi. „A de wan kefarlek sani di e broko yu saka”, wan sma di lobi sport e kragi, „fu poti wan sma leki wan eksempre èn dan fu kon sabi dati a no de soifri ini en libi.” San ben de a problema? Difrenti populair atleet ben ferteri dati den ben gebroiki drugs. O furu tron a no e psa dati sma di den e si leki afu gado e libi wan doti, ya wan fisti libi leki wan sutaduman, huruduman, homoseksueelman, homoseksueel-uma, fufuruman, bidrigiman nanga sma di de srafu fu drugs! Den kan luku na skinfasi krin, ma den mofo lai nanga dot’taki. Den e feni en srefi kande switi na publiki fu tyalansi san de fatsunlek fu di den e meki bigi fu den hurudu afersi.

18. Fa furu sma di ben libi wan libi di no krin koti „san den ben sai”?

¹⁸ Toku yu no kan poti den wortu fu a bijbel na wan sei: „Gado no e meki sma spotu nanga en [„Yu no kan meki wan langa noso gi Gado.” — Byington]. Bika san wan sma e sai dati a sa koti ooktu; bika suma e sai nanga a skin na prakseri, sa koti pori fu en skin” (Galasia 6:7). Libi nanga waka fu waka na baka gridilostu e tyari nofotron wan siki kon, ofu srefi wan biten dede fu siki soleki syfilis, gonnorroe, nanga AIDS, fu kari den moro prenspariwan. No de ini balans ini ferstan en na ini firi, firi brokosaka ooktu a firi fu yusrefi de nofotron bakapisi fu libifasi di de soso tapu seks. Aladi den wan di e du hurdu e lafu den wan di e hori densrefi krin kande, dan na lafu e tapu te den spotuman e bigin fu ’koti sani di den sai’. — Teki gersi Romeini 1:24-27.

19, 20. Fa den kerkifesiman fu na kristenheid ben sori dati den ben kon doti na a sei fu na anbegi fu Gado èn ooktu na moreelsei?

¹⁹ Wi e libi ooktu ini wan grontapu di na kerki sei kon doti. A kan de dati den kerkifesiman e weri moi èn krin krosi ma den leri sma du èn leri di no krin èn komoto fu Babylon soleki a dini fu kruktu gado, a driwanfasi, na helfaya, na dede di na libisma sili no kan dede èn na vagevuur. Den de leki den kerkifesiman fu suma Yesus ben taki: Elu fu unu, un meester fu wet, hoigriman! Bika un gersi grebi di den ferfi weti èn di na dorosei e sori moi kande, ma inisei den furu nanga dedebonyo nanga ala sortu fu doti sani. So unu ooktu e sori kande na dorosei regtvaardiki gi den sma ma na inisei unu de furu nanga hoigrifasi èn kruktudu.” — Mattéus 23:27, 28.

²⁰ Den kerkifesiman e luku srefi psa doti libi na inisei fu den ipi fu den. Den e gi pasi dati sma fu suma de bekenti dati den e libi wan hurudu libi èn no de krin èn de huruduman, sutadumam nanga homoseksueelman e tan ini wan bun positsi. Fu disi Newsweek e ferteri: „Na psycholoog Richard Sipe, fu Maryland (VS), wan fosten priester, ben kon na a bosroiti dati sowan 20 procent fu den 57.000 lomsu priester ini den VS de homoseksueel . . . Tra therapeut e denki dati a trutru cijfer kan de wel more krosbei fu 40 procent.” Na lomsu theoloog John J. McNeil (di leki fa ensrefi taki de homoseksueel) de taki bun fu homoseksualiteit na fesi fu ala sma: „Na lobi na mindri tu homo-uma ofu tu homoman, a no de fu taki efu yu e abi en fu wan constructief libisma lobi, no de wan sondu sani èn ooktu a no e meki dati den lobiwan nanga dati e poti na dorosei fu a plan fu Gado, ma a kan de wan santa lobi.” — The Christian Century.

21. Fa na sani di sma ben musu memre dati wani taki „santafasi de fu Yehovah” ben de wan sani di fiti gi wi ini a ten disi?

²¹ Na sani di ben poti na tapu na tai-ede fu na heipriester èn di ben de krin fu si dati wani taki „santafasi de fu Yehovah”, de sobun noiti ete so fiti leki now (Exodus 28:36). Yehovah e aksi fu wi, ya e tanapu na tapu, dati ini ala fasi wi tan krin! Ma san wan sma mu du now precies? Sortu kontren abi kande spesrutu wi prakseri? Na ini a tra artikel wi sa go taki fu den aksi disi.

[Futuwortu]

Aksi fu luku san wi ben leri

◻ Fa Yehovah de ’makti ini santafasi’, èn san disi wani taki gi en anbegiman?

◻ Fa den wet fu Mozes ben kenki fu den wet fu ala tra natie?

◻ Fa na wet fu Mozes ben meki krinfasi na skinfasi, yeyefasi, mentaalfasi nanga moreelfasi go na fesi?

◻ Fa furu sma di e libi wan libi di no krin ’ben poti san den ben sai’?

[Prenki na tapu bladzijde 2]

Na anbegi fu gado di abi lusufasi fu libi ben tyari den Kanaänsma go ini lagifasi fu libi