Yu sa de wan kotoigi fu na tru Gado?
„’Unu de mi kotoigi,’ a so den wortu fu Yehovah de, ’èn mi de Gado.’” — YESAYA 43:12.
1. Fu san-ede wi mu gi grani na a tru Gado?
SYATU bifo Yesus ben dede, a ben opo en ai go na hemel fu begi. A ben kari na sma na suma a ben begi „na wan tru Gado” (Yohannes 17:1, 3). Redelijkerwis soso wán libi èn tru Gado kan de, na Soeverein fu na universum, na Mekiman. Fu di wi mu taki na tru Gado tangi dati wi de, meki wi mu sori en na grani di a mu kisi. Openbaring 4:11 e tyari disi na a fasi disi kon a fesi: „Yu, Yehovah, iya, wi Gado, warti fu kisi na glori èn na grani èn na krakti bika yu ben meki ala sani èn fu yu wani ede den ben de èn yu ben meki den.”
2. (a) Ini san ini a tori fu a tru Gado wi kan poti fertrow logischerwijs? (b) Fa a e kon ini kontakti nanga den sma di wani anbegi en?
2 A de wan logis sani fu ferwakti dati na tru Gado no sa ferdrage fu alaten den takru toestand di pori den sani di a meki na grontapu. Èn a de ooktu logis fu fertrow a tapu dati a ferteri en anbegiman san a o du èn san a wani meki den du bifo a tyari den krutu fu en kon (Amos 3:7). Na sortu fasi a e abi kontakti nanga den sma di e suku waarheid? A e gebroiki sma di de klarklari leki en takiman: „’Unu de mi kotoigi,’ a so den wortu fu Yehovah de . . . ’Bifo mi no wan Gado ben meki èn baka mi a ben tan de so dati no wan ben de. Mi — mi na Yehovah, èn dorosei fu mi no wan ferlusuman de’” (Yesaya 43:10, 11). Ma fa wan sma kan sabi suma na tru Gado e gebroiki leki en kotoigi? Fa den nanga den boskopu e kenki fu anbeiman fu tra gado?
Wan tyalansi na tra gado
3. Sortu tyalansi Yehovah e gi ala tra gado?
3 Yehovah yeye ben buweigi Yesaya fu skrifi na tyalansi disi na ala tra gado: „Suma a mindri den [den gado fu den natie èn den pipel] kan ferteri disi [soifri profeititori]? Ofu den kan meki wi yere srefi den fosi sani [di sa psa ini a ten di e kon]? Meki den [leki gado] tyari kotoigi fu den kon, sodati den [leki gado] kan ferklari regtvaardiki ofu meki den [den pipel fu den natie] yere èn taki: ’A de na waarheid’” (Yesaya 43:9) Na so Yehovah e tyalansi ala den gado di sma e anbegi so, fu bewijsi dati den de gado. Den kotoigi fu den mu tyari bewijsi kon dati den gado fu den de betrouwbaar èn den warti fu sma anbegi den.
4. Fa wi sabi dati den gado fu owru natie no warti noti?
4 Ma san den gado dati èn den anbegiman fu den ben meki du kon? Den ben tyari tru vrede, tanbun èn libi kon gi wi? Na historia e kotoigi dati furu gado fu den èn natie ini owruten sori dati den de sondro waarde èn sondro krakti. Srefi leki sani fu anbegi den no ben kan sori dati, bika ini a ten disi den no de moro. Den furu gado fu na owru Egypte, Assiria, Babylon, Medo-Perzië, Grikikondre, Rome èn tra natie sori taki den falsi. Den de soso ete ini den historiabuku ofu na ini musea pe den popki fu den de soso wan sani di sma gridi fu sabi.
5. San wi kan aksi fu na tori fu den disi ten gado?
5 Ma den disi ten gado èn den anbegiman fu den de pikinso moro betre leki den di fu owruten? Soso kaba na hindu fasi fu anbegi e teri milyunmilyun gado. Boeddhistsma, confucianistsma dyusma, katholieksma moslim, anitrisma, sjintoïstsma, taoïstsma èn furu trawan abi den eigi gado. Ini Afrika, Asia èn tra kontren ete den krakti fu na natuur, meti èn sani sma e anbegi leki gado. Na lobi fu wan sma kondre, a lobi fu gudu èn srefi fu na eigi „sma srefi”, tron gado, ini a fasi dati furu sma moro furu e gi densrefi abra na dati. Sortu fasi fu anbegi e teki now a presi gi na sma di e ferklari: „Mi na Yehovah, no wan trawan de. Boiti mi no wan Gado de”? — Yesaya 45:5.
„Na den froktu fu den yu sa kon sabi den”
6. Fa wi kan si tru anbegi fu falsi wan?
6 Yesus ben gi wan betrouwbaar regel fu sabi san de tru ofu falsi ini a tori fu anbegi. A ben taki: „Na den froktu fu den yu sa kon sabi den . . . Ibri bun bon e tyari tumsi bun fruktu kon, èn ibri pori bon e tyari froktu di no abi waarde kon . . . Ibri bon di no e tyari tumsi bun froktu kon den e koti trowe èn e trowe go ini a faya” (Mattéus 7:16-19). Fu kon sabi na tru Gado fu falsi gado, èn tru anbegiman fu falsi wan, dan wi mu ondrosuku sobun san den e tyari kon. Den froktu fu den ’de tumsi bun’ ofu den de ’sondro waarde’?
7. San na historia fu na yarhondro disi e ferteri wi fu den fasi fu anbegi fu a grontapu disi?
7 Sortu wan fu den fasi fu anbegi na grontapu fu eksempre ben tyari tru vrede kon a mindri den bakaman fu en? Sma fu na tru fasi fu anbegi, yeye brada, seiker no mu kiri makandra. Ma ini den feti fu na di fu twenti yarhondro disi hondro milyun sma den kiri èn ala den feti dati ben kisi na yepi fu den fasi fu anbegi fu na grontapu disi. A bakapisi ben de dati kerkiman ben kiri tra kerkiman. Nofotron den ben kiri sma fu den eigi kerki. Lomsu ben kiri lomsu, anitri ben kiri anitri, moslim ben kiri moslim èn ini tra fasi fu anbegi den ben du asrefi.
8. Fa sma di e luku sani e taki fu na misi di a fasi fu anbegi misi a marki ini wi ten?
8 Ini wan redactioneel kommentaar ondro na titel „Na tranga ogridu di ben du ini na nen fu Gado” Meike Royko ben taki aladi te yu luku en bun a ben taki nanga Gado fu den fasi fu anbegi fu na grontapu: „Den e sori a gi di den gi densrefi abra na yu fu di den kiri makandra nanga hondrohondro na asrefi ten. Mi e prakseri dati den e denki dati efu na wan partij sabi fu kiri a trawan puru, dati a bewijsi de dati a fasi fu den fu anbegi de a yoistiwan.” A ben taki dati ala-di a paus e pristeri ensrefi leki wan man fu vrede, „toku sma ben si en bakaman ben trowe milyunmilyun liter brudu te den ati ben kon bron”. Di na fosten Amerkan president Carter ben taki dati „na grontapu kon law”, na asrefi fasi a ben taki: „Kerki overtoigi di abi den rutu dipi, di ben mu tai sma ini lobi komakandra, nofotron e gersi dati a de wan pisi fu na lawfasi èn na kiri fu sma.”
9. Fu san-ede wi no mu waka a baka nowan „gado di no warti noti?”
9 Den sortu froktu disi di no abi waarde de abra sei fu san e tyari kon fu na sei fu den sma di e dini na tru Gado (Galasia 5:19-23). Den sma di e horibaka gi fasi fu anbegi di e feti èn di e horibaka gi filosofie, a de net so seiker wan pisi fu na falsi anbegi leki den owru Eyptesma, Assiriasma, Babylonsma èn trawan di e opo ai luku „gado . . . di no warti noti èn di babaw” (Habakuk 2:18). Èn net so seiker leki na profeiti wortu fu na tru Gado ben kon tru fu na tori fu falsi fasi fu anbegi, na net so a sa kon ooktu tru ini wi ten: „Den gado srefi di no warti noti, sa pori gwe trutru” (Yesaya 2:18). A warskow fu en de betrouwbaar: „No drai go na gado di, no warti noti.” — Leviticus 19:4.
Suma e kotoigi gi Yehovah
10. Den bakaman fu fasi fu anbegi fu a grontapu disi de kotoigi gi na tru Gado?
10 Wan kotoigi fu na tru Gado mu de wan sma di e gi kotoigi di e go fu en. Den kerkiman ini a grontapu disi e gi sowan kotoigi? O furutron sma fu den kerki disi e taki nanga yu fu na anbegi fu den? Oten den ben fisiti yu na oso fu gi kotoigi fu na gado fu den? Na tyalansi di na tru Gado meki go na falsi gado fu tyari den kotoigi fu den kon a fesi den ben poti a wan sei. Den sma fu den kerki fu na grontapu disi no e gi sowan kotoigi. Den no kan ferteri yu suma de a tru Gado ofu san den prakseri fu en de. Den leriman fu den ben libi en fu ferteri den a waarheid. „Den de breni tyariman. Efu now wan breniman e tyari wan breniman dan alatu sa fadon ini wan olo.” — Mattéus 15:14.
11. Suma wawan e gi kotoigi fu na nen fu na tru Gado?
11 Suma de klari fu offer den ten, den gudu fu den, srefi den libi fu kotoigi fu na tru Gado? Suma e ferteri den sma dati na tru Gado ferklari: „Mi na Yehovah. Dati na mi nen” (Yesaya 42:8). Suma e leri den sma dati „Yu, di nen na Yehovah, yu wawan de a moro Heiwan abra na heri grontapu”? (Psalm 83:18). Yesus ben kan taki ini en ten gi na tru Gado: „Mi e meki yu nen kon a publiki” (Yohannes 17:6). Ini wi ten soso Yehovah Kotoigi kan taki dati. Fa a nen fu den fiti — Yehovah Kotoigi!
Kotoigi di e go fu na kownukondre
12. Sortu prenspari leri tru kotoigi mu meki bekenti gi trawan?
12 San den kotoigi fu na tru Gado, boiti dati den ben sa meki en nen bekenti, ben sa ferteri spesrutu fu den prakseri fu en? Yesus ben gi a eksempre fu di a ben leri en bakaman fu begi na a tru Gado: „Yu kownukondre mu kon” (Mattéus 6:10) A hemel kownukondre fu Gado de na tiri di te fu kaba sa tiri na a heri grontapu (Daniël 2:44). A ben de na nen fu Yesus leri (Mattéus 4:23). Fu di na Kownukondre de na wan enkri lusu gi den muilekheid fu na libismafamiri meki a ben poti krakti tapu: „Tan suku fosi a kownukondre nanga en regtvaardikifasi.” — Mattéus 6:33.
13. (a) San den tru tori e sori fu a preiki fu Gado kownukondre fu na sei fu Yehovah Kotoigi? (b) Fa na Kownukondrepreikiwroko de wan bewijsi dati Yehovah Gado de na wan enkri Gado fu tru profeititori?
13 Suma e gi ini a ten disi kotogi fu a kownukondre fu Gado? Professor C.S. Braden, wan srapu ondrosukuman fu den fasi fu bribi fu a grontapu, ben taki: „Yehovah Kotoigi ben sungu na grontapu letterlijk nanga na kotoigiwroko fu den. . . . Ini waarheid wi kan taki dati nowan enkri kerki grupu ini a grontapu e sorl moro faya nanga horidoro ini a muiti fu den fu panya na bun nunsu fu a Kownukondre leki den Kotoigi fu Yehovah.” Ma a ben skrifi dati pikinmoro fotenti yari psa kaba! Now na ini wan oro bigi marki kotoigi fu a Kownukondre e gi, bika now moro leki tintron someini Kotoigi de! Sowan dri nanga afu milyun moro leki 54.900 gemeente tapu na heri grontapu e gi kotoigi fu na Kownukondre, èn na nomru fu den e gro esesi. Den tumsi moi froktu disi de na bewijsi dati Yehovah de na Gado fu tru pofeititori. A ben de en di ben gi en Manpikin, Yesus tranga fu ben taki fu a ten fu wi: „na bun nyunsu disi fu na kownukondre sa preiki na a heri grontapu pe libisma e libi leki wan kotoigi gi ala natie èn dan na kaba sa kon.” — Mattéus 24:14; Yohannes 8:28.
A waka baka na lobi fu Gado
14. Sortu eigifasi Gado tru kotoigi mu waka na en baka èn san a wani taki efu den no e du dati?
14 Den tru kotoigi fu Gado mu waka baka en ini en moro prenspari eigifasi — lobi. „A sma di no lobi no ben leri sabi Gado, bika Gado na lobi” (1 Yohannes 4:8). Iya, „nanga disi den pikin fu Gado èn den pikin fu Didibri de fu sabi: Ibriwan sma di no e du regtvaardikifasi, no e kon fu Gado, èn ooktu a sma di no lobi en brada. . . . Wi [mu] abi lobi gi makandra; no soleki Kaïn, di ben kon fu na goddelowsuwan èn ben kiri en brada.” — 1 Yohannes 3:10-12.
15. Fu san-ede wi kan taki dati Yehovah Kotoigi e sori tru lobi?
15 Soso Yehovah Kotoigi abi na sortu fu lobi dati. Den no e boigi gi na gado fu feti, a lobi fu wan sma kondre nanga a lobi fu wan sma ras. Den no e gi yepi na no wan feti fu a grontapu disi èn fu dat’ede noiti de na ini na sltuwasi dati den e gi yepi na a kiri fu den yeye brada fu den na ini tra pisi fu a grontapu. Den de, soleki Yesus ben taki „no wan pisi fu a grontapu” èn den ben saka ’na feti owru na gron’. — Yohannes 17:14; Mattéus 26:52.
16. Fa trawan yepi fu kon sabi den tru kotoigi fu Gado?
16 Wan studi di e go fu na taki bun fu ogridu ben taki: „Yehovah Kotoigi ben hori consequent na standpunt fu den fu kristen ’neutraliteit’ sondro tranga . . . Na standpunt fu den di den hori te now ete teige a du fu nationaal dienst ini sortu vorm dan tu, srudati ofu civiel, èn a weigri di den e weigri fu gi grani na nationaal symbool ben abi leki bakapisi ini furu kondre pisi ten fu ferfolgu, straf’oso èn sani di ben du fu na sei fu na gewoon pipel . . . Ma den kotoigi noiti ben du wan sani tapu dati nanga gebroiki fu tranga.” Na Brasion koranti O Tempo, ben taki fu den: „Aladi na ala pe na tapu na aardbol disi furu fasi fu bribi di e meki indruk e meki propaganda, toku nowan enkri organisatie de ini heri grontapu fu suma den memre fu en e sori na srefi lobi.” A tru lobi disi, na so Yesus ben ferklari, ben meki sma kon sabi den tru kotoigi fu Gado. „Nanga disi ala sma sabi dati unu de mi kotoigi, efu unu abi lobi mindri makandra.” — Yohannes 13:35.
Ferfolgu e meki na kotoigiwroko gro
17, 18. Sortu eksempre solanga psa kaba e sori fa ferfolgu kan meki na Kownukondrekotoigi kon moro bigi?
17 Ferfolu kan abi srefi leki bakapisi wan moro bigi Kownukondrekotoigi. Ini India fu eksempre soso sowan 8000 Kotoigi fu Yehovah de. Toku Yehovh nen èn prakseri no solanga psa kaba ben kon ini a kondre dati furu ini na nyunsu nanga san erfu pikin fu Yehovah Kotoigi ben du fu di den ben waka na baka den fosi yarhondro kristen di ben ferklari na fesi wan krutubangi: „Wi mu gi yesi na Galo leki rigeriman moro leki libisma” (Tori fu den apostel 5:29). Den pikin fu India ben seni gwe fu skoro fu di den no ben wani singi na kondre singi. Ma na moro hei krutu fu India ben bosroiti, soleki ben kon ini na nyunsu ini na Deccan Herald fu Bangalore, dati „ini a kondre disi no wan ferplekiti de fu singi”. A krutubangi ben taki dati den pikin, „ben sori respeki di ben fiti” èn dati fu di den no ben singi, „na no wan fasi ben kon tapu a meki fu opruru”. A krutubangi ben gi na komando fu gi den pikin pasi fu go baka na skoro.
18 Na srefi koranti ben taki ooktu „Den pikin disi ben weigri fu singi na kondre singi fu di Yehovah Kotoigi e feni dati den leki kristen mu gi densrefi krinkrin na a kownukondre fu Gado. . . . Den no e teki fu dat’ede prati na nowan poliitiek activiteit fu na kondre.” Ooktu na Telegraph di e kon a doro ini Calcuta hen taki: „Na fasi fu waka nanga libi fu den skoro pikin ben poti na algemene prakseri na tapu Yehovah Kotoigi, di syatu a fesi sma no ben sabi so furu na ini wi kondre.” Iya, ’na bun nyunsu disi fu na kownukondre sa preiki leki wan kotoigi gi ala natie’ bifo na kaba kon. — Mattéus 24:14.
A tyari kon makandra fu Kotoigi gi na tru gado
19. San opregti sma mu du efu den wani anbegi na tru Gado?
19 Ini a ten disi na tru Gado, Yehovah e meki en pipel gi kotoigi fu en soevereiniteit èn den prakseri fu en. Ini ala a ten dati a e meki en boskopu bekenti nanga moro bigi krakti, a e tyari moro nanga moro opregtisma fu ala natie kon makandra nanga en anbegiman (Yesaya 2:4). Den e draibaka gi den falsi gado fu den èn den e drai go na anbegi fu na tru Gado, net soleki gi den di ben wani anbegi Yehovah fri ben kon ini na owru Babylon pe na anbegi fu falsi gado ben de a loktu. — Yesaya 43:14.
20, 21. Fu san-ede a de tranga fanowdu fu draibaka now gi falsi gado èn no soso gi den sma di e firi gi falsi anbegi?
20 Yu kan de wan kotoigi fu na tru Gado? Yu sa teki a sei fu a tru anbegi, èn tan farawe fu a teki prati na a brudu paiman èn morele fowtu libi fu na grontapu disi èn den falsi gado fu en? A Wortu fu Gado nanga krakti e taki fu en: „Komoto fu en [falsi anbegi fu Babylon] efu unu no wani abi prati nanga en ini en sondu, èn efu unu no wani si no wan pisi fu den plaag fu en” (Openbaring 18:4). Iya, „komoto”, handri bifo a lati! No de leki a man, di wan katholiek tijdschrift ben aksi en fu a kerki di a lobi ben taki: „Mi denki dati mi de wan fu den sma di e firi gi Yehovah Kotoigi. Ini bigi mi e bribi san Yehovah Kotoigi e bribi — ma mi no wani tai misrefi.”
21 Ma heri esi ibriwan sma na grontapu sa de ini a tori te Yehovah e tyari na krutu kon tapu a grontapu disi nanga den anbegiman fu en: „Den gado di no ben meki na hemel nanga a grontapu, den dati sa lasi gwe fu na grontapu èn fu ondro na hemel disi” (Yeremia 10:11). No wan sma di e firi gi [a tru anbegi] sa de. Soso tu grupu fu sma sa de — den di de kotoigi fu na tru Gado èn den di no de dati (Mattéus 24:37-39; 2 Petrus 2:5; Openbaring 7:9-15). Yu sa de wan kotoigi fu na tru Gado? A de a wan enkri yoisti libifasi bika „na tru Gado de gi wi wan Gado fu du fu ferlusu; èn den pasi di e tyari sma komoto fu dede de fu Yehov na Soeverein Masra”. — Psalm 68:20.
Aksi fu luku san yu ben leri
◻ Sortu tyalansi na tru Gado e gi falsi gado?
◻ Akruderi sortu betrouwbaar regel wi kan kon si tru anbegi fu falsi anbegi?
◻ Sortu froktu e sori dati den gado fu a grontapu disi abi net so weiniki waarde leki den gado fu owruten?
◻ Sortu tumsi bun froktu kotoigi fu na tru Gado mu tyari kon èn suma e sori den froktu dati?
◻ Fu san-ede a de tranga fanowdu fu du stap now fu draibaka gi falsi anbegi?
[Prenki na tapu bladzijde 6]
Den gado di no warti noti fu owru natie no de moro leki sani san sma e anbegi
[Prenki na tapu bladzijde 7]
Ini wi yarhondro wan sani fu wán milyun sma dede ini feti, di den fasi fu anbegi fu a grontapu disi ben horibaka gi.
[Sma di abi a reti foe a prenki]
U.S. Army photo
[Prenki na tapu bladzijde 8]
Yesus ben taki dati sma ben sa kon sabi tru kotoigi na a lobi di den abi gi makandra