Fertrow ini Yehovah e tyari yu go fu gi yusrefi abra èn teki dopu

„Fertrow tapu Yehovah èn du san bun; tan na grontapu en handri nanga getrowfasi.” — PSALM 37:3.

1. Sortu kotoigi fu sma di abi ondrofeni ini grontapu afersi e meki wi si dati na wan law sani fu fertrow tapu libisma tiriman?

TAPU suma wi kan fertrow? Tapu libisma tiriman? A bericht fu den e meki wi si dati na wan law sani fu fertrow tapu onvolmaakti libi-sma. Srefi sma di abi furu ondrofeni fu a libi e erken a sani dati! Na so na Europees bisnis tijdschrift Vision ben taki wan dei dati „a moro takru sei fu na disi ten situwasi de, dati nowan sma sabi wan pasi fu komoto na ini”. Robert Heilbroner, wan man di e beoefen na ekonomia historia, ben taki: „Wan tra sani de ete di e nyan na wi. Dati de na vermoede dati nowan sma e tyari na frantwortu èn nowan sma de srekasreka fu lusu den problema di e kon a tapu wi.”

2. San wi kan taki fu den blesi fu na modern wetenschap?

² A tru, libisma ben go a fesi srefsrefi a tapu difrenti kontren a tapu a wetenschap. Ma ala disi ben tyari bun kon? Nono, dati no de so. Soleki na skrifiman Lewis Mumford ben tyari kon na a prakseri fu en leisiman, dan „na prakseri dati a go na fesi na ini machien nanga wetenschappelek sei ben sa dyaranti paralel libisma winimarki de now wan sani di wi no man hori now srefsrefi” Wan moi eksempre di fiti de den swa alen di e doti se nanga liba èn di e meki dati milyunmilyun bon e dede, Den sari stand fu bisnis pe na grontapu de na ini — na gro fu ogridu, takrudu, terrorisme, na de srafu fu drugs nanga sopi èn fu siki di no de fu ferdrage na seksueel sei, èn na precaire ekonomia situwasi — e kotoigi boiti fu dati alamala dati a no abi waarde fu poti un fertrow a tapu libisma tiriman.

3. Sortu rai a wortu fu Gado e gi ini a tori fu na aksi tapu suma wi e poti wi fertrow?

³ Wortu fu Gado e gi na wan fasi di fiti rai: „No poti yu fertrow na tapu gransma, no tapu na pikin fu na grontapu sma, di ferlusu no de na en. En yeye e komopo gwe fu en, a e drai go baka na en doti; futru, tapu a dei dati ala en prakseri e lasi gwe” (Psalm 146:3, 4). Efu wi no kan poti sobun wi fertrow a tapu libisma, tapu suma wi kan poti en dan? Wi kan poti wi fertrow tapu a Mekiman fu hemel nanga grontapu, soleki wi e leisi: „Blesi na tranga man na skinfasi de di e fertrow tapu Yehovah èn di en fertrow tron Yehovah.” — Yeremia 17:7.

Fu san-ede fu fertrow tapu Yehovah

4. San na den fondamenti eigifasi fu Yehovah, èn fa den e gi wi bun reide fu fertrow tapu en?

⁴ Wi abi bun reide fu fertrow tapu Yehovah. Ini a fosi presi wi kan poti wi fertrow a tapu en fu den fondamenti eigifasi fu en ede — lobi, koni, geregtigheid nanga makti — èn tra tumsi moi eigifasi. A Wortu fu en e dyranti wi dati a de almakti, bika wan fu den titel fu en de „Gado na Almaktiwan” (Genesis 28:3). Fa dati e gi unu wan fondamenti fu fertrow! Nowan sma nanga winimarki kan kakafutu gi Yehovah èn nowan sma kan dobbelkros en prakseri. A de ook a ma di sabi ala sani. No wawan a sabi a kaba fu sani fu sensi a bigin, fudi na tamara de wan opo buku gi en, ma na ini en ooktu ala sabi èn koni e libi, soleki e kon na krin ini en kefarlek moi wroko di a meki. Noiti a ben meki ooktu wan fowtu ini ala den du fu en (Yesaya 46:10; Romeini 11:33-35). Moro leki dati, Yehovah de volmaakti betrowbaar, wan Gado fu regtvaardikifasi èn getrowfasi. A no kan lei noiti (Deuteronomium 32:4; Titus 1:2; Hebrewsma 6:8). Boiti fu dati a de wan sani di fiti fu taki fu en fudi lobi sondro gridi de na eigifasi di de moro na fesi: „Gado na lobi.” — 1 Johannes 4:8, 16.

5. Sortu bericht wi e feni ini a Wortu fu Gado leki wan bericht fu en betrowbaarfasi?

⁵ Morofara den bemui di Yehovah e bemui nanga libisma e kotoigi dati a de wan betrowbaar Gado fu almakti, koni, geretigheid nanga lobi. Mozes dyaranti den Israëlsma dati ehovah e hori na ferbontu èn na lobi bunfasi ini prakseri ini a tori fu den di lobi en èn e ondrow en gebod (Deuteronomium 7:9). A fesi kaba Yehovah ben kibri Noach nanga en famiri di ben frede en, psa bun na bigi Frudu. Gado ben fri na regtvaardiki Lot nanga en tu umapikin fu na faya pori fu Sodom nanga Gomoro. Bakaten Gado ben puru den Israëlsma fu Egypte èn ben gi den na kondre Kanaän èn na sofasi ben hori getrow na en pramisi na Abraham (Genesis 7:23; 17:8; 19:15-26). Èn Yehovah no ben tyari fri kon gi den dri Hebrewsma di den ben trowe go ini a faya onfu, èn ooktu ben sorgu fu Daniel lon omoto fu na lew-olo? — Daniël 3:27; 6:23.

6. Sortu buweisi fu modern ten wi abi di e sori dati fertrow ini Yehovah no de wan fowtu sani?

⁶ Dati Yehovah de wan sma di wi kan poti fertrow tapu en, kon de ooktu tru fu den ondrofenitori fu en disiten Kotoigi. Adolf Hitler fu eksempre ben meki bigi dati a ben sa kiri den „saka-saka sma” dati fu Yehovah Kotoigi puru ini Doisrikondre. Ma na presi fu dati dan Hitler nanga en nazi-parti ben hari puru èn a grupu dati fu Kotoigi kon de furu furu tron moro bigi èn ben gro kon oro leki 119.000. Boiti fu dati dan letterlek hondrohondro libi ondrofenitori fu yehovah Kotoigi di ben kon ini Na Wachttoren èn a sisa tijdschrift Ontwaakt!, e kotoigi na tapu wan moifasi dati Yehovah futru de a Gado di wi kan fertrow na tapu en.

Fu san-ede son sma no e fertrow tapu Yehovah

7. Fu san-ede wan sma ben taki dati a de wan sma di „lobi Yehovah Kotoigi”?

⁷ Èn toku, na pikinso sma nomo e poti now den fertrow a tapu Yehovah! Srefi furu sma di ben kon sabi en eigifasi nanga en du e misi fu poti fertrow tapu en. Wan artikel di ben kon na ini a blad U.S. Catholic (yanuari 1979) taki fu wan fu den sortu sma dati: „Di na enquetrice (a uma di ondrosuku sani) ben aksi a man sortu kerki a ben lobi, a ben piki: ’Mi denki taki mi na wan sma di lobi Yehovah Kotoigi.’ Tapu a aksi fu tyari disi kon moro a krin a ben taki: ’Na bigi mi e bribi san Yehovah Kotoigi e bribi - ma wi no wani tai misrefi.’” Na tijdschrift e gi leki kommentaar: „Wan Kotoigi fu Yehovah di gi ensrefi abra na Yehovah no e si no wan tra mogelekheid leki wan tranga tai.”

8. Sortu fondamenti marki e tyari wan sma go sofara fu wani dini Yehovah?

⁸ Fu san-ede son sma no wani tai densrefi? Fudi den no abi na yoisti toestand fu ati. Wan sma mu abi „na yoisti yeye fasi gi na tego libi” (Tori fu den apostel 13:48). Soleki Yesus ben taki ini en agersitori fu na saiman, dan den sma di e meki froktu, ben kisi na wortu fu a waarheid ini wan „soifri èn bunati” (Lukas 8:15). Iya, a waarheid no e hari sma di no de opregti. Wan gron vereiste de wan opregti ati. Na waarheid fu a Wortu fu Gado no e hari ooktu den sma di abi heimemre. Wan saka asi de fanowdu (Yakobus 4:6). Boiti fu dati na waarheid no abi nowan krakti di e hori sma di de tevrede èn di e regtvaardiki densrefi. Ma abi krakti fu hari sma kon tapu den sma di sabi bunbun den yeye nowtu, di e angri èn e dreiwatra fu regtvaardikifasi èn di e soktu èn e geme fu ala den tegu sani di den e si e psa na a grontapu. — Mattéus 5:3, 6; Ezechiël 9:4.

Fertrow ini Yehovah e tyari wan sma go sofara fu gi ensrefi abra

9, 10. (a) San de fanowdu bifo wan sma kan poti en fertrow tapu Yehovah, èn fa den sma e du di abi na yoisti toestand fu ati? (b) Na ini suma den sortu sma disi e poti bribi?

⁹ Bifo wan sma kan poti fertrow na ini Yehovah, dan a mu yere fu en. „Ma fa den sa kari en di den no ben poti bribi ini en? Fa den den sa poti bribi ini en morofara fu suma den no ben yere fu en? Fa den sa yere morofara sondro dati wan sma e preiki?” (Romeini 10:14). Te Yehovah dienstknegti e preiki, dan den sma nanga den yoisti ati toestand sa teki sani bun, soleki furu sma na ini na owru Thessalonika ben du. Fu den sma disi Paulus ben skrifi: „Di unu ben kisi a wortu fu Gado, di unu ben yere fu wi, unu no ben teki en leki na wortu fu libisma, ma, san a de trutru tu, leki na wortu fu Gado di e wroko ooktu na ini unu, un bribiwan. — 1 Thessalonika 2:13.

¹⁰ Te den sortu sma disi di abi wan yoisti ati, e kon sabi Yehovah, dan den sa poti bribi ini en. Disi de fu na moro bigi belang bika „sondro bribi a no kan fu plisi en, bika na sma di e kon na Gado, musu bribi dati a de èn dati en e tron a sma di e gi pai na a sma di e suku en seryusu” (Hebrewsma 11:6). Ooktu a de prenspari fu sori bribi na ini a Manpikin fu Gado. „Na ini nowan tra sma ferlusu de, bika nowan tra nen ben gi a mindri den sma na ondro na hemel di wi mu kisi ferlusu nanga en.” — iya nowan tra nen leki di fu Yesus Kristus. — Tori fu den Apostel 4:12.

11. Sortu rai fu na apostel Petrus wan sma di e fertrow ini Yehovah sa waka na en baka?

¹¹ Fertrow ini a Wortu fu Gado, ini Yehovah èn ini en Manpikin Yesus Kristus sa buweigi wan sma fu poti prakseri a tapu Petrus rai na den dyu ini den dei: „Abi fu dat’ede berow èn drai yusrefi, sodati yu sondu kan figi puru, sodati ten fu kowru-ati mag kon fu na sei fu Yehovah” (Tori fu den Apostel 3:19). Te wi teki sabi fu Yehovah èn den vereiste fu en, dan wan sma e leri dati a wani fu Gado gi en de dati a tron wan bakaman fu Yesus Kristus. Petrus ben taki en na a fasi disi: „Den ben kari yu kon na a libifasi disi, bika ooktu Kristus ben nyan pina gi yu, ben libi gi yu wan model sodati yu ben kan waka soifri ini en futumarki” (1 Petrus 2:21). Yesus ben tyari kon na krin san ben de ini disi di a ben taki: „Efu wan sma wani kon na mi baka, dan a no mu ke fu ensrefi èn teki en pina udu èn waka doronomo na mi baka” (Mattéus 16:24). Dati wani taki fu gi yusrefi abra na Gado èn du en wani èn fu waka na baka den futumarki fu Yesus Kristus.

Gi yusrefi abra no de dati yu e teki ete wan ferplekti na yu tapu

12. Fa sma e geboiki nofotron ini na kristenheid na wortu „ferplekti?

¹² Ini na kristenheid na wortu „ferplekti” e gebroiki nofotron te wan sma e tron wan kristen. Na so wi kan leisi dati evangelikalen (fu na Low Church) ini den Verenigde Staten „e poti krakti tapu wan persoonlek ferplekti di den meki nanga Yesus”. Wan lomsu katholiek kerkileriman ben taki fu wan „kathollek kerki ferplekti”. Fu taki bun fu den politiek bemui meki wan katholiek priester ben taki wan dei: „Fu fo ini politiek ben de wan afersi fu hari mi ferplekti (leki priester) go morofora.” Èn firma e poti advertensie nanga den wortu „wi ferplekti na wi kranti”. Te yu luku en bun dan wan sma kan abi wan lo ferplekti na asrefi ten: bisnis ferplekti, sociaal ferplekti, politiek ferplekti èn kerki ferplekti.

13. San de ini a tori te wan sma gi ensrefi abra na Yehovah?

¹³ Ma te wan sma gi ensrefi abra na Gado dan dati no de gewoon na teki fu ete wan ferplekti na tapu. Wan ferplekti de eenvoudig wan kruderi ofu wan pramisi fu du wan sani ini a ten di e kon”. Ma fu gi yusrefi abra wani taki ’fu gi yusrefi spesrutu na a dienst ofu na anbegi fu wan gado ofu a gebroiki fu santa marki di yu poti na yu fesi’. A moro bigi pisi fu den sma e de tevrede fu teki wan ekstra ferplekti na presi dati den e gi densrefi abra. Disi e ferklari sondro degedege fu san-ede a kerki fu den de eenvoudig wan sortu bakagronpoku. A switi fu yere ma no e tapu a sma san a wani du trutru.

14. Fu san-ede soso na erken fu wan ferplekti na fesi fu Yehovah Gado no de wan sani di a e teki?

¹⁴ Wan gi yu srefi abra na Gado e meki na du fu en wani na moro prenspari sani na ini yu libi. A e aksi dati wan sma e gi yesi na a fosi èn moro bigi gebod, di Yesus ben teki puru fu wan buku èn di a ben taki: „Yu musu lobi Yehovah, yu Gado, nanga heri yu sili, nanga heri yu ati èn nanga heri yu frustan, èn nanga heri yu krakti.” Yesus ben poti krakti tapu na aparti fasi fu na dini fu Gado di a ben ferklari: „Nowan sma kan dini tu Masra leki srafu bika ofu a sa abi ogri-ati gi a wan èn lobi a trawan, ofu tai ensrefi na a wan èn feragti na trawan. Yu no kan dini Gado èn gudu leki srafu” (Markus 12:30; Mattéus 6:24). A de fu dat’ede ooktu krin dati soso fu teki wan ekstra ferplekti tapu yu no de wan sani di Gado e teki.

Fu san-ede yu mu dipi go ondro ondro watra?

15. Sortu eksempre Yesus ben gi ini na sori na publiki fu en bribi ini Gado?

¹⁵ Fu san-ede wan sma musu symboliseer na gi di a e gi ensrefi abra na Gado fu di a e teki dopu? Efu wan sma wani tron wan Kotoigi fu Yehovah, dan a no kan du tra fasi. Dati de ooktu so efu a wani sma sabi en leki wan kristen, wan bakaman fu Yesus Kristus. Yehovah „getrow kotoigi” Yesus, ben gi ini disi na eksempre, bika den ben dopu en ini na Yordaan liba. Fudi Yohannes ben dopu sondari di ben abi berow, mekl a no ben kan frustan fu san-ede Yesus ben wani teki dopu, ma Yesus ben taigi en: „Meki a de a tron disi so, bika na sofasi a fiti fu wi du ala sani san de regtvaardiki” (Openbaring 1:5; Mattéus 3:13-17). Na sofasi na Manpikin fu Gado ben sori na publiki a bribi fu en fudi a ben pristeri ensrefi na Yehovah, èn nanga disi ben gi na eksempre na ala sma di wani du a wani fu Gado.

16. Sortu gebod Yesus ben gi en bakaman ini a tori fu a dopu, èn fu san a e kon na krin dati en disipel ben gi yesi na a gebod dati?

¹⁶ Moro leki dati, syatu bifo Yesus ben drai gobaka na en Tata ini hemel, a ben gi en bakaman na gebod: „Go fu dat’ede èn meki disipel fu sma fu ala natie, dopu den ini na nen fu na Tata, na Manpikin èn fu na santa yeye, èn leri den fu ondrow ala sani san mi komanderi unu” (Mattéus 28:19, 20). Den tori ini a buku Tori fu den apostel e meki wi dati Yesus disipel ben gi yesi fayafaya na a gebod dati. — Tori fu den Apostel 2:40, 41; 8:12; 9:17, 18; 19:5.

17. Fu san-ede soso na iti fu watra tapu wan sma no de wan dopu di abi waarde?

¹⁷ Fa den ben dopu den sma disi? Den ben kisi piso pikinso watra di den ben iti a tapu den, soleki dati de a gwenti ini moro furu fu den kerki fu na kristenheid? Kwetkweti! Yesus ’ben opo komoto fu na watra’ bakadi den ben dopu en. Disi ben e sori krin dati a ben dipi go ondro watra (Markus 1:9, 10). Te yu luku en bun dan no wan tra sani ben kan de na dopu, bika na Griki wortu di vertaal nanga „dopu” wani taki „dipi go na ini, dipi go na ondro”. — Tori fu den Apostel 8:36-39.

18. Fu san-ede a dipi go na ondro watra de sowan symbool di fiti fu na gi di wan sma gi ensrefi abra na Gado?

¹⁸ Sowan sortu dopu de wan tumsi aparti symbool fu na gi di wan sma e gi ensrefi abra na Gado. Go na ondro watra, e agersi heri bun dati na sma e dede gi en fosten libi fasi. Te den hefti en puru fu a watra e agersi taki a e kisi wan opobaka go ini wan nyun libifasi. Net soleki wan trow ceremonie e meki dati trow-uma, nanga trow-masra e kisi bun ini den prakseri san a trow fu den wani taki, na so na dipi go na ondro watra na fesi fu kotoigi kande seiker e meki wan indruk di e tan tapu na dopu-kandidaat. A no wan sani fu degedege; fudi wan sma e teki dopu, dan a gi di a e gi ensrefi abra na Yehovah e skrifi poti ini en yeye nanga en memre fu no kan figi puru moro leki na moro prenspari sani na ini en libi. A e marki na punt fu pe a go abra fu na dini fu ensrefi na a dini fu Yehovah Gado.

19. San de ete wan reide fu teki dopu?

¹⁹ Meki wi no waka psa a sani disi dati na dopu ini watra de wan vereiste di a kisi fu wan bun konsensi na fesi fu Yehovah. Disi e tyari kon a krin na ini 1 Petrus 3:21, pe a vers e taki disi: „Ooktu now yu e kisi ferlusu nanga san e akruderi nanga disi, dati wani taki na dopu (no a puru fu a doti fu na skin, ma na begi na Gado fu wan bun konsensi) nanga na opobaka fu Yesus Kristus.”

Tapu sortu libimarki yu mu teki dopu?

20. Fu san-ede den no kan feni baby bun fu a dopu?

²⁰ Den wortu fu Yesus na ini Mattéus 28:19, 20 e meki wi si dati den sma di meki kon tron en disipel mu teki dopu. Fu disi e kon a fesi dati nowan baby ofu pikin-nengre ben sa kan doro den bijbel vereiste fu teki dopu. Wan baby no ben kan sori bribi ini a wortu fu Gado, èn ooktu no ini Gado a Mekiman èn ini en Manpikin Yesus Kristus. Wan baby no ben kan frustan dati na santa yeye de na wroko krakti fu Gado; ooktu a no ben kan abi nowan beraw fu den sondu di a ben du fosten èn no ben kan gi wan plegtig pramisi fu du Gado wani.

21. A de wan sani di fiti efu yonguwan wani teki dopu?

²¹ Ma a gersi dati son sma a mindri Gado pipel e fadon go te na tra sei fu a tori. Furu kristen papa nanga mama e meki den pikin fu den wakti te na a lati tini yari fu den bifo den e taki fu a tori fu dopu. Alatron baka wi e yere fu yonguwan di tapu den eigi initiatief ben kon a wan gi fu densrefi abra na Gado di bun. A so wan manpikin fu wan owruman ben de, wan boi di no ben de tinadri yari ete, di trutru ben abi na lostu fu teki dopu. En papa meki dri tra owruman luku den aksi nanga en di meki gi den sma di e prakseri na dopu.a A bosroitl fu den ben de dati aladi a ben de kefarlek yongu a ben de bun fu teki dopu leki wan geordineerde bedinari fu Yehovah Gado. No solanga psa kaba yu ben abi tapu a pionierskoro tapu den Bahama’s wan tin yari owru dopu meisje, na umapikin fu tu furuten bedinari!

22. Efu papa nanga mama e bow wan kristen persoonlekheid ini den pikin fu den, dan san den kan fruwakti?

²² Son papa nanga mama gersi leki den e misi na ini disi. Ofara den e gebroiki ’materiaal di kan bel faya fu bow go ini den pikin fu den wan kristen persoonlekheid (1 Korinte 10:15) Disi e aksi na ini a fosi presi dati na soifri anbegi fu Yehovah de a moro prenspari sani ini a libi fu den papa nanga mama. Boiti fu dati den papa nanga mama mu poti prakseri na tapu na tumisi moi rai ini Deuteronomium 6:6, 7 èn Efese 6:4. Na bakapisi de dan kande dati den mama nanga papa mu hori den pikin fu teki dopu fruku na presi fu mu gi den tranga fu dati bakaten.

23. Te wan sma doro na punt fu gi ensrefi abra èn teki dopu dan san den e aksi moro ete?

²³ Te wan sma sori kaba fertrow na ini Yehovah nanga yepi fu na gi di a gi ensrefi abra èn teki dopu na ini watra dan a mu tan sori a fertrow dati. Na tra artikel, „dini ini fertrow leki Yehovah konpewrokoman”, sa yepi wi fu frustan san de ini a tori disi.

[Futuwortu]

San yu ben sa piki?

◻ Sortu sani e meki wi si krin o law a de fu poti wi fertrow tapu libisma?

◻ Fu san-ede den eigifasi nanga du fu Yehovah e gi wi bun reide fu fertrow a tapu en?

◻ Fu san-ede a poti fu fertrow na ini Yehovah e aksi fu gi wisrefi abra èn no soso wan ferplekti na en?

◻ Fa papa nanga mama kan meki na lostu kon na den fu gi den srefi abra na Yehovah na wan biten libimarki?

[Prenki na tapu bladzijde 1]

Wi kan poti wi fertrow tapu Yehovah leki na Bigi Ferlusuman