Tanapu steifi teige den triki fu Satan
„Weri na heri fetisani fu Gado, sodati yu kan tanapu steifi teige den triki fu didibri.” — EFESESMA 6:11.
1. Sortu bewijsi fu a de di Satan de wan sma den tesi fu Yesus e gi wi?
Satan de trutru? Son sma e tak-go-tak-kon taki na bijbel e bedoel nanga „Satan” soso na ogri na ini libisma. Den e taki taki a no de leki wan mekisani. Ma san bjbel e ferteri wi? Den evangeliumtori fu Matthéüs nanga Lukas e meki wi si taki Kristus Yesus ben kisi tesi langalanga fu Satan, èn ibritron Yesus ben poti en a wan sei fu di a ben gebroiki na bijbel. Fu san-ede Yesus ben piki en nanga wortu fu den Hebrew buku fu na bijbel? Fu di Satan ben kon na en nanga wan fowtu gebroiki fu den srefi wortu dati fu na bijbel fu meki a sondu èn fu meki a misi a marki leki na Manpikin fu Gado, na pramisi Siri. — Matthéüs 4:1-11; Lukas 4:1-13.
2. Fa wi sabi taki Yesus no ben abi soso ini prakseri den miti di a ben miti nanga Satan?
2 A de krin taki Yesus, wan volmaakti libisma, no ben go prakseri ini ensrefi den miti disi di a ben miti nanga Satan (Hebrew sma 4:15; 7:26). A ben abi dya na srefi sma na en fesi di ben de a krakti baka na sneki na ini Eden, en eigi fositen brada a mindri den engel di someni hondrohondro yari di pasa kaba ben meki opruru èn di ben poti na ini prakseri now fu meki na kon tru fu Genesis 3:15 no feni presi. Satan ben wani broko na soifri-retifasi fu na pramisi Siri. Fu di Yesus ben si na triki fu en, meki a ben poti na tesiman nanga krakri na wan sei. San Satan ben du tapu dati? „Di Satan now ben tyari ala tesi kon na wan kaba, a ben komoto gwe fu en te leki wan tra bun ten.” A de krin taki Yesus no ben gwe libi ensrefi! Satan di sani no waka bun gi en ben gwe libi en, „èn luku! engel ben kon èn go dini en [Yesus]”. — Lukas 4:13; Mattéüs 4:11.
3. San wan historia skrifiman e taki fu san na de di Satan de wan sma wani taki gi na kristendom?
3 Ini akruderi nanga frustan meki wan historia skrifiman e gi komentaar: „Fu taki dati Didibri no de èn fu taki dati a no abi wan prenspari rol na ini na kristendom, wani taki dati wan sma e go teige na leri fu den apostel èn na historia gro fu na kristen leri. Fu di fu taki na ini tra wortu san na kristendom de leki disi ben sa de sondro betekenis, dan a no ben sa klop nanga a frustan fu taki fu wan kristendom di e poti Didibri na dorosei. Efu Didibri no de, dan na kristendom fu seni bigin e misi krinkrin tapu wan prenspari punt.”a Na bosroiti dati e poti ibri sma na grontapu ini a ten disi na fesi wan tyalani. Yu e erken taki wan feyanti de di wi no e si èn di poti na en ede fu nyan na soevereiniteit fu Gado èn na getrow fasi fu libisma na ondro?
Na sma di Satan de trutru
4. Fa wan volmaakti mekisani ben tron Satan?
4 Satan na wan makti yeye mekisani, di Gado ben meki bigibigin leki wan engel, wan yeye manpikin di ben abi pasi fu go na den hemel tanpresi fu Yehovah (Yob 1:6). Ma Satan ben gebroiki en fri teige Gado; nanga triki a ben tyari Eva èn nanga yepi fu Eva, Adam go sofara fu trangayesi Gado, san ben wani taki a dede fu den (2 Korinte 11:3). Na so Satan, san wani taki „gensman” — ben tron wan opruru man, wan ogri yeye, wan kiriman èn wan leiman (Yohannes 8:44). Fa na fasi fa Paulus e taki fu en fiti, taki ’Satan srefi e tan kenki ensrefi na ini wan engel fu leti’, aladi te yu luku en bun a de wan ’grontapu tiriman fu na dungru disi’! (2 Korinte 6:14; 11:14; Efesesma 6:12) Fu di a meki tra engel meki opruru, dan a tyari den komoto fu na leti fu Gado kon ini en eigi dungru. A ben tron ’na tiriman fu den ogri yeye’. Yesus ben meki unu kon sabi en ooktu leki ’na tiriman fu na grontapu disi’. A de krin taki fu a de wan tiriman, a mu de wan sma di de trutru leki wan yeye sma di Gado ben meki. — Matthéüs 9:34; 12:24-28; Yohannes 16:11.
5. Fa wi e kon sabi Satan bun na ini den Kristen Griki buku fu a bijbel?
5 Aladi ini den Hebrew buku fu na bijbel pikinmoro den no e kari Satan, na ini den Griki buku fu na bijbel den e tyari en kon na krin dorodoro suma a de — ini na marki disi taki wi e feni na nen Satan drape 36 tron èn a wortu Didibri 33 tron. (Luku na Comprehensive Concordance of the New World Translation of the Holy Scriptures.) Yu e kon sabi en ooktu na ondro tra nen nanga titel. Yohannes ben gebroiki tu fu den disi na ini Openbaring 12:9: „Den ben hiti fu dat’ede na bigi draak, na fosi sneki di nen Didibri èn Satan, di e kori na heri grontapu pe libisma e libi na tapu.” — Luku ooktu Matthéüs 12:24-27; 2 Korinte 6:14, 15.
6. San na wortu „Didibri” wani taki?
6 Dyaso na ini Openbaring na Griki wortu di di.abo.los de fu feni, di vertaal nanga „Didibri”. Letterlijk a wani taki „wan sma di e taki ogri, wan falsi kragiman, wan sma di e taki lei fu pori tra sma nen”, soleki na sabiman fu na Griki tongo J.H. Thayer e taki. (Teki gersi nanga 1 Timótheüs 3:3, Kingdom Interlinear.) W.E. Fine e skrifi fu Didibri leki „na ogri feyanti fu Gado èn libisma”.b
7. Fu san-ede Satan kan poti en muiti tapu Yehovah pipel?
7 Na bigi gensman no e sidon tiri (1 Petrus 5:8). Na fu dat’ede kande wan Ingrisi odo e taki: „Didibri e feni wroko fu leigi anu.” Ofu na Bakratongo odo: „No abi noti fu du de wan yesikunsu fu Didibri.” A poti na ini en ede fu meki ala tru kristen fadon komoto na bribi (2 Timothéüs 3:12). Èn dati a ben o poti ensrefi go na tapu Yehovah pipel, na wan makriki sani — A abi a tra pisi fu grontapu kaba na ini en makti! (1 Yohannes 5:19) Na disiten grontapu na Satan grontapu. A de na tiriman èn Gado fu en, ofu libisma e erken dati ofu no (Yohannes 12:31; 2 Korinte 4:4). Na bakapisi de taki a sa gebroiki ibri triki ofu finifini du ofu rai fu meki Yehovah pipel fadon komoto na bribi, efu a de aparti sma ofu leki grupu. Meki wi go luku wan tu fu den fasi fa a e wroko. — Markus 4:14, 15; Lukas 8:12.
Den finifini fasi èn triki fu Satan
8. Sortu winimarki Satan ben gebroiki teige wi?
8 Satan ben abi bun langa na ten fu studeri na libims apsyche, fu ondroduku finifini na libisma natuur nanga ala den mankeri di a gebore nanga den èn di a kisi. A sabi fa a musu prei nanga wi swakifasi èn na sosofasi fu wi. We, fa na situwâsi de efu yu feyanti sabi de swakifasi fu yu èn yusrefi no e si den? Dan yu no de srekasreka bunbun fu opo feti gi yusrefi, fu di yu no sabi den olo ini yu yeye fetisani (1 Korintesma 10:12; Hebrewsma 12:12, 13). O bun den wortu fu wan puwemaskrifiman fu Schotland de: ’O efu a ben kan de taki wan ofu tra makti ben gi wi na presenti fu si wisrefi leki fa trawan e si wi! A ben sa kibri wi fu bun furu don fowtu’.
9. San ben de na sari bakapisi te wi libi en a wan sei fu ondrosuku èn kenki wisrefi?
9 Wi de klari fu wi wisrefi leki fa trawan e si wi — spesrutu soleki Gado ofu Satan ben sa kan si wi? Dati e aksi wan opregti ondrosuku èn trutru krutu fu wisrefi, nanga na wani fu tyari kenki kon. A de so makriki fu kori wisrefi (Yakobus 1:23, 24). Fa sontron wi kan tak-go-tak-kon nanga wisrefi fu taki bun fu na libifasi fu wi! (Teki gersi nanga 1 Samuël 15:13-15, 20, 21, 24.) Èn o makriki de fu taki: „Ke, no wan sma de tog volmaakti!” Dati na precies san Didibri sabi, èn a e meki gebroiki fu wi onvolmaaktifasi (2 Samuël 11:2-27). Fa a de wan sari sani fu doro na middelbare libimarki èn fu kon frustan taki wan sma no abi no wan mati fu di yari langa a ben handri nanga trawan tapu wan fasi pe a ben dwengi den, ofu pe a no ben sori switifasi ofu ben de onpersoonlijk; ofu fu go frustan taki wan sma praktisch no ben du noti fu meki trawan de koloku. Tapu wan fini fasi kande Satan ben tyari wi pasa a libi èn ben gebroiki na prakseri di wi e prakseri wisrefi nomo èn di wi gebore nanga en fu breni wi. Wi no ben man fu kon frustan na prenspari fasi fu na tru yeye fu Kristus — lobi, sari-ati, switifasi nanga bun fasi. — 1 Yohannes 4:8, 11, 20.
10. Sortu aksi wi ben sa kan aksi wisrefi èn fu san-ede?
10 Fu kakafutu gi Satan, dan wi mu ondrosuku wisrefi ooktu. Yu abi wan swakifasi di Satan ben sa kan gebroiki na wan fowtu fasi ofu di yu tapu a momenti e gebroiki na wan fowtu fasi? Yu abi wan problema nanga heimemre? Yu mu de alaten nomru wan? Yu heimemre de na kibri krakti di e pusu yu? Na persoonlijkheid fu yu e kon de kron fu dyarusu, bigi-ai ofu lobi fu moni ede? Yu e mandi es’esi? Yu de kowru èn e spotu nanga trawan? Ofu yu e mandi es’esi te wan sma e kon nanga rai ofu kritiek? Yu e feni en wan sani di no prisiri fu kisi rai ofu yu e poti dati srefi na wan sei? Efu wi sabi wisrefi, dan wi kan poti den sortu problema disi reti efu wi de nanga sakafasi. Noso wi e tan de wan sani di Satan kan du ogri nanga en. — 1 Timótheüs 3:6, 7; Hebrewsma 12:7, 11; 1 Petrus 5:6-8.
11. Nanga sortu finifini sani Satan ben sa kan proberi fu nyan wi yeyefasi na ondro?
11 Satan kan nyan ooktu wi yeyefasi na ondo tapu wan finifini èn feradelek fasi. Kande wi e kon bruya fu na fasi fa sani e du na ini na gemeente of ini na organisâsi. Nofotron wi no sabi ala sani, ma wi e teki makriki èn es’esi wi besroiti. Efu na matifasi fu wi nanga Yehovah swaki, dan a de wan pikin stap nomo fu go denki negatief èn kon degedege ini a tori fu waarheid. Son sma kande e suku wan fasi fu regtfaardiki densrefi te den no e du moro den frantwortu di e kon nanga a waarheid. Satan e poti den deloyaliteit nanga verraad na ini den ati. Her’esi den e tron sma di e fadon komoto na bribi èn Satan e prisiri. — Lukas 22:3-6; Yohannes 13:2, 27; 2 Yohannes 9-11.
12. (a) Satan ben gi son sma na dek’ati fu du san? (b) Fa Satan e kisi furu sma go ini hurudu?
12 Tra sma Satan e meki de so nanga man-ati taki no wawan den e du bigi sondu pe den kan sluit den uit, ma srefi e go abra fu lei èn bedrigi den owruman fu a gemeente. Netleki Ananías nanga Saffira den e denki fu bedrigi den engel nanga Gado santa yeye (Tori fu den apostel 5:1-10). Furu dusundusun sma ini den yari di no pasa langa ete ben kon na ini a trapu fu Satan fu hurudu. Didibri sabi taki den sekslostu fu libisma de tranga èn via en grontapu sistema a poti krakti na tapu, e pori èn e kron na rol fu seksualiteit (Numeri 25:1-3). Den kan kori kristen sma di no trow ete na ini hurudu ofu tra seks dotilibi (Odo 7:6-23). Efu kristen sma di trow meki den yeye nanga ati go na tra sani, dan makriki den kan fadon go na ini feradelek waka nanga libi, tori na tra patna di den ben sweri fu tan getrow na en. — 1 Korinte 6:18; 7:1-5; Hebrew sma 13:4.
13. (a) Fa televisie ben sa kan kenki wi denki? (b) Fa wi kan kakafutu gi so wan krakti?
13 Wi e libi na ini wan grontapu pe lei, bedrigifasi nanga fay’ati de wan gewoon sani. Satan e meki gebroiki dorodoro fu televisie, koranti, radio fu tyari na pori denki disi go abra na tapu sma. Televisie programma e sori moi sma di e libi na ini wan sortu anansititei fu bedrigi libi nanga makandra. Efu wi gi pasi dati na denki dati kisi wi, dan es’esi wi kan gi wisrefi abra na „pikin” sondu di sa opo na pasi go du „bigi” sondu. Den finifini rai fu Satan makriki e kroipi go na ini wi denki. Fa wi kan kakafutu gi den sortu krakti disi? ’No gi Didibri pasi’, soleki Paulus e gi rai — noiti! Dati wani taki ooktu dati yu e abi na kontrole tapu suma yu e meki kon na ini yu oso via na televisie. A no mu furu wi nanga tegu, taki suma di ati e bron es’esi, di e gi densrefi abra na hurudu èn di e taki doti taki ben sa kon na ini wi oso fu doti pe wi e libi? — Efesesma 4:23-32.
Fa wi kan kaka futu gi Satan èn tan na Gado?
14. Sortu besroiti di de na ini tu pisi de fanowdu fu kakafutu gi Satan, èn san disi e aksi?
14 Fa wi, leki onvolmaakti libisma mekisani kan kibri wi soifri-retifasi na fesi fu sowan makti feyanti di hei moro leki libisma? Na sroto didon na ini den wortu fu Yakobus: „Saka yu srefi fu dat’ede na Gado ondro; ma kakafutu gi Didibri èn a sa lon gwe libi yu” (Yakobus 4:7). Luku pikinso taki Yakobus rai abi tu sani na ini. Aladi wi e kakafutu gi Didibri nanga en wani, dan wi mu saka wisrefi a ondro Gado wani. Disi wani taki taki wi abi lobi gi a wani fu Gado èn no wani si a wani fu Satan na ai (Romeini 12:9). Yakobus e taki fu dat’ede: „Go na Gado èn en sa kon na yu. Krin yu anu sondari, èn soifri yu ati un suma di no e teki besroiti” (Yakobus 4:8). Na ini na kaka di wi e kakafutu gi Satan presi no de sobun gi afuatifasi nanga sondro fu teki besroitifasi. Wi no kan gi wisrefi pasi fu tyari wi soifriretifasi kon ini gevaar fu luku o krosbei wi kan kon na ini a lin fu ogri. Wi mu abi ’ogr-ati gi san takru’ dorodoro — Psalm 97:10.
15. Fu san-ede na „heri fetisani fu Gado” de prenspari? Gi eksempre fu disi.
15 Tumsi moi rai fu na kakafutu gi Satan wi kan feni na ini Efesesma kapitel 6. Leki fa Paulus taki, dan fa wi kan kakafutu gi Satan „triki”, „koni fu feti” ofu „triki fasi”? (Efesesma 6:11, Leidse Vertaling, Bigi Nyunsu Bijbel, Na libi Wortu. „Weri na heri fetisani fu Gado”, na en rai. Den wortu disi, „heri fetisani”, no e libi presi opo gi wan mi-no-ke-fasi gi na de di wi de wan kristen, netsoleki wan Romein srudati no ben kan gi ensrefi pasi fu no poti prakseri na ini na sreka di a mu sreka ensrefi tapu na feti. Fa a srudati ben o du efu a ben sreka ensrefi fu weri en heri fetisani ma ben libi schild nanga fetimusu (helm) a baka? A ben kan denki: ’A de wan tumsi bigi schild èn na helm de so hebi. Den e wegi bun furu èn mi no abi en trutru fanowdu’. Tyari na situwâsi kon na yu fesi pikinso — wan Romein srudati di sreka ensrefi nanga fetisani gi na feti ma mu du en sondro den moro prenspari wan fu verdedig ensrefi. — Efesesma 6:16, 17.
16. (a) Fa wi mu waka baka Yesus eksempre ini na gebroiki fu wi feti-owru? (b) Fa wi kan kibri wisrefi teige den „faya peiri” fu Satan èn nanga sortu bakapisi?
16 Tyari ooktu kon na fesi wan srudati sondro en fet’owru. „Na fet’owru fu na yeye” na wan tumsi bun wapen fu verdedig yu srefi fu di den e gebroiki en fu kapu den fetisani puru di Satan e fadon kon feti tapu na kristen nanga den. Na ’fet’owru’ fu wi mu de klar-klari alaten. Dati a sa de ooktu efu wi no e verwaarloos persoonlijk studie èn osofamiri bijbelstudie. Ma ini na fosi presi „na fet’owru disi . . . a wortu fu Gado” de na wapen di wi e opo go feti nanga en. Yesus gebroiki en tapu tu fasi (Matthéüs 4:6, 7, 10; 22:41-46). Dati wi mu du ooktu. Wi mu tan srapu wi warderi gi waarheid. Wi no kan hori wi yeyefasi na libi tapu a gron fu san wi ben kon sabi den fosi mun ofu yari na ini na waarheid. Efu wi misi fu nyun na yeye circuit, dan na yeye luku fu wi ben sa kon dungru. Na faya fu wi gi Yehovah tru anbegi ben sa lon flaw. Wi ben sa kon swaki na yeyefasi. Wi no ben sa man moro langa fu naki den aanval puru fu famiriman, mati, patna nanga sma di fadon komoto na bribi di ben sa soso wi bribi-overtoigi. Ma Gado sa ferlusu wi fu Didibri nanga en „faya peiri” te wi e tan sreka wisrefi nanga na „heri fetisani fu Gado”. — Yesaya 35:3, 4.
17, 18. Wi abi fu feti teige suma, èn fa wi kan wini?
17 Iya, Paulus e poti krakti a tapu o kefarlek wi kristen feti de di a ben skrifi: „Bika na feti fu wi no de teige libisma feyanti, ma teige den makti na ini hemel, teige den autoriteiti nanga makti fu na dungru grontapu disi, teige den makti di hei moro libisma fu na ogri na ini heymel” (Efesesma 6:12, The New English Bible). Fa wi leki sma di no de noti kan kakafutu èn wini na ino so wan ongelijke feti? Paulus e taki ete wan tron a punt fu en: „Teki fu dat’ede na heri fetisani fu Gado sodati yu kan kakafutu tapu na hogri dei èn, baka te yu ben du ala sani finifini, kan tanapu steifi” (Efesesma 6:13). Na moro prenspari pisi fu na zin de „baka te yu du ala sani finifini.” Agen a no e gi wi pasi fu wan afu-atifasi, fu di wi de prati ini wi prakseri ini a de fu wi di wi de wan kristwn. — 1 Yohannes 2:15-17.
18 Meki wi tanapu fu dat’ede steifi na ini na waarheid fudi wi e lobi Yehovah regtvaardikifasi, e preiki na bun nyunsu fu freide èn e hori tranga na a waarheid nanga wan tranga bribi na ini na ferlusu san Yehovah e gi nanga yepi fu Kristus Yesus aladi a Wortu fu Gado e gi wi a moro bigi yepi (Efesesma 6:14-17). Hori a prakseri taki Gado lobi wi èn sa yepi fu kon leki winiman na fesi ini den tesi èn muilekheid di wi o miti tapu wi pasi na ini Satan seti fu sani. Meki wi alamala poti prakseri tapu na warskow: „Hori yu prakseri na wán, de nanga ai. Yu gensman, Didibri, e waka lontu leki wan krasi lew, e suku fu swari wan sma.” Iya, „kakafutu gi en, faste na ini bribi”. — 1 Petrus 5:6-9.
19. (a) Sortu tra prenspari sani wi mu gebroiki fu kakafutu gi Satan? (b) San sa psa te fu kaba nanga Satan?
19 Meki wi no frigiti san Paulus e kari leki wan prenspari sani di de moro boiti na „fetisani”. A e taki: „Aladi nanga ibrl vorm fu begi èn tranga begi na ibri okasi èn na ini yeye yu e tan begi. Èn tan na ai fu du dati nanga ala stanfaste fasi èn nanga tranga begi fu na bun fu ala santawan” (Efesesma 6:18). Na feyanti fu wi di wi no kan si de so wan mmakti taki „wi abi ala vorm fu begi nanga tranga begi fanowdu”. Fa den begi fu wi ben de fu dat’ede opregti èn difrenti. A de tumsi prenspari taki wi bow krinkrin tapu Yehovah te wi wani wini na feti èn wi wani hori wi soifri-retifasi. Soso en wawan kan sorgu na ini „na krakti di e pasa san de normaal” èn di sa man fu meki wi kakafutu gi wi gensman du no abi sari-ati. Fa a de wan trowstu fu sabi taki wi bigi Gensman dyonsro den sa iti en go na ini na peti di no abi gron èn te fu kaba sa kisi pori fu tego! — 2 Korinte 4:7; Openbaring 20:1-3, 10.
[Futuwortu]
a Satan — The Early Christian Tradition, fu na anu fu Jeffrey Burton Russell, blz. 25.
b An Expository Dictionary of New Testament Words
Yu kan piki disi?
◻ Fa wi sabi taki Satan de wan trutru sma?
◻ Fu san-ede den tra nen nanga titel fu Satan fiti?
◻ Sortu ondrosuku fu wisrefi e yepi wi fu kakafutu gi den fini aanval fu Satan?
◻ Sortu rai sa yepi wi fu wini Satan èn fu san-ede?
[Prenki na tapu bladzijde 8]
Wan fasi fu kakafutu gi na krakti fu Satan na fu sori belangstelling èn lobi gi trawan èn fu yepi den.
[Prenki na tapu bladzijde 9]
Wi mu kibri wisrefi fu de leki Ananías nanga Saffira, di ben broko kindi gi Satan
[Prenki na tapu bladzijde 10]
Fu kan tapu den projectiel fu Satan fu no kisi wi, dan wi no kan libi nowan pisi fu wi yeye-fetisani na baka